ནན་ཅིན་སྦྲག་ཏར་སློབ་ཆེན་གྱི་སློབ་ཕྲུག་ཅིག་སྟོང་ལྷག་གིས་སློབ་གླིང་དེའི་དྲང་བདེན་མིན་པའི་ཐག་གཅོད་ལ་ངོ་རྒོལ་བྱས་འདུག
ཁ་སང་ཞོགས་པ་ཆུ་ཚོད་ ༩ བའི་ཡས་མས་ནས་རྒྱ་ནག་ཅང་སུའུ་ཞིང་ཆེན་ནན་ཅིན་གྲོང་ཁྱེར་ནན་ཅིན་སྦྲག་ཏར་སློབ་ཆེན་གྱི་སློབ་མ་ཅིག་སྟོང་ལྷག་གིས་སློབ་མཚམས་བཞག་ནས་ངོ་རྒོལ་བྱས་ཡོད་པ་དང་། དེ་ལ་སློབ་ཕྲུག་ཚོའི་ནང་མིས་ཀྱང་རྒྱབ་སྐྱོར་བྱས་ཏེ་འདུ་འཛོམས་བྱས་ཡོད་འདུག འདུ་འཛོམས་བྱེད་པའི་སློབ་ཕྲུག་ཅིག་གིས་ “ ཐོག་མ་སློབ་གྲྭས་དངུལ་སྒོར་གྱི་ཆེད་དུ་སློབ་ཕྲུག་གང་མང་བསྡུ་ལེན་བྱས་ཡོད་པ་དང་། ད་ལྟ་སློབ་ཕྲུག་ཚོ་བཙན་གྱིས་སློབ་གྲྭ་གཞན་ལ་གནས་སྤོར་བྱེད་དགོས་པ་ཟེར་བ་དེ་སློབ་ཕྲུག་ཚོའི་ཕྱོགས་ལ་རྩ་བ་ནས་བསམ་བློ་མ་བཏང་པ་རེད།” ཅེས་བརྗོད་འདུག
དེ་རིང་ཞིན་ཐང་རིན་གྱིས་རྒྱ་ནག་གི་གནས་ཚུལ་ལུང་འདྲེན་བྱས་པ་ལྟར་ན། ཅང་སུའུ་ཞིང་ཆེན་ནན་ཅིན་གྲོང་ཁྱེར་གྱི་ནན་ཅིན་སྦྲག་ཏར་སློབ་ཆེན་དོ་དམ་སློབ་གླིང་གིས་སློབ་མ་ཚོར་འཕྲལ་སེལ་རིང་སློབ་གྲྭ་རྙིང་པའི་ནང་གནས་སྤོར་བྱ་དགོས་བྱུང་ཡང་། སློབ་གྲྭ་རྙིང་པའི་ཆ་རྐྱེན་སྐྱོ་བོ་ཡོད་སྟབས་སློབ་མ་ཚོ་འདོད་པ་མ་ཚིམས་པའི་ཤུགས་རྐྱེན་བྱུང་ཡོད། ཅེས་འཁོད་འདུག་འོན་ཀྱང་། དེ་རིང་ད་དུང་རྒྱ་ནག་དྲ་བའི་བརྒྱུད་ལམ་ཁག་ཏུ་དེའི་སྐོར་གྱི་གནས་ཚུལ་ཅི་ཡང་སྤེལ་མེད།
ལས་འགུལ་དེར་འཛུལ་ཞུགས་བྱེད་མཁན་སློབ་ཕྲུག་ཞིག་གིས། སློབ་གྲྭས་སློབ་མ་བསྡུ་ལེན་བྱེད་དུས་སློབ་གྲྭ་གནས་སྤོར་དགོས་པའི་སྐོར་གཅིག་ཀྱང་བཤད་མེད་པ་དང་། འགྲོ་ལུགས་ལྟར་ན་སློབ་གླིང་གཞན་གྱི་ལོ་རིམ་བཞི་བའི་སློབ་མ་རྣམས་གནས་སྤོར་བྱ་དགོས་ཡོད་ཀྱང་། ཐེངས་འདིར་སློབ་གླིང་འདིའི་ལོ་རིམ་བཞི་པའི་སློབ་མ་རྣམས་གནས་སྤོར་བྱ་དགོས་ཆགས་ཡོད་འདུག
ཡང་སློབ་མ་ཁག་ཅིག་གིས་སློབ་གྲྭའི་གོ་སྒྲིག་དྲང་བདེན་མ་རེད། སློབ་གྲྭ་གཅིག་པ་ཡིན་པ་དང་སློབ་སྦྱོང་ཆེད་ལས་གཅིག་པ་ཡིན་པ། སློབ་ཡོན་ཡང་གཅིག་པ་ཡིན་ཡང་ཅིའི་ཕྱིར་དོ་དམ་སློབ་གླིང་གི་སློབ་ཕྲུག་ཚོ་ཆ་རྐྱེན་སྐྱོ་བོའི་ནང་དུ་གནས་སྤོར་བྱ་དགོས་པ་རེད་དམ། ཞེས་བརྗོད་འདུག སློབ་ཕྲུག་གི་ནང་མི་ཞིག་གིས། སློབ་གྲྭས་དུས་རྒྱུན་བྱ་བ་ཡོད་ཚད་ཐག་གཅོད་བྱེད་ངེས་ཡིན་སྐོར་ལབ་ཀྱི་ཡོད་ཀྱང་ད་རེབ་ཀྱི་གནས་ཚུལ་འདིར་གཞུང་ཕྱོགས་ནས་ཐག་གཅོད་གང་ཡང་བྱས་མ་སོང་། ཞེས་སོགས་བརྗོད་འདུག
ཕྱི་ལོ་ ༡༩༨༣ ལོ་ཟླ་ ༡༠ ཚེས་ ༡༡ ཉིན་ནན་ཅིན་སྦྲག་ཏར་སློབ་ཆེན་དོ་དམ་སློབ་གླིང་འཛུགས་བསྐྲུན་བྱས་ཏེ། སློབ་མགོ་བཙུགས་ཡོད་པ་དང་། ༡༩༨༤ ལོར་དོ་དམ་བཟོ་བཀོད་སྡེ་ཚན་སྒོ་འབྱེད་བྱས་ཡོད་པ་དང་། ད་ལྟའི་ཆར་སློབ་ཆེན་དེའི་ནང་ལ་སློབ་ཕྲུག་ ༢༨༠༠ ཙམ་ཡོད་འདུག གསར་འགོད་པ།
འཇིགས་མེད་རྒྱ་མཚོ།
