བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༦༢ སྟེང་གི་རྩོམ་སྒྲིག་པའི་གཏམ།
དྷ་རམ་ས་ལའི་དབུས་སྣེ་ལེན་ཁང་གི་ལས་བྱེད་ཅིག་ལ་མེ་མདའ་བརྒྱབ་སོང་ཟེར་བའི་གནས་ཚུལ་དེས་བཙན་བྱོལ་སྤྱི་ཚོགས་ཆུང་ཆུང་དེ་སླར་ཡང་འུར་ལོང་སེར་བཏང་། མི་ཚང་མས་མིག་ཧྲིག་ཧྲིག་དང་ཨམ་ཅོག་གྲུང་གྲུང་གིས་གཅིག་ཐོག་ལ་གཉིས་དང་། གཉིས་ཐོག་ལ་བཞི་བརྩེགས་ཏེ་དཀྲོག་གཏམ་ལུང་པ་གང་རེ་བཤད་མགོ་བརྩམས་ཡོད། འདི་ནི་ང་ཚོའི་སློབ་གསོས་སྐྱེད་པའི་སྤྱི་ཚོགས་ཀྱི་མཁའ་དབུགས་བཙོག་པོ་དང་། ཆབ་སྲིད་པས་བཟོས་པའི་བོད་མིའི་ཡ་རབས་བཟང་སྤྱོད་དང་ཚུལ་ལྡན་བག་ཡོད་ཀྱི་དངོས་གཞན་དེ་རེད།
སྣང་ཚུལ་འདི་བརྒྱུད་དེ། བཙན་བྱོལ་བོད་མི་ཚོའི་སེམས་ནང་དུས་རྒྱུན་དོགས་པ་རྣམ་རྟོག་མང་པོ་ཞིག་གིས་འཆང་ཡོད་པ་དང་། ཆབ་སྲིད་པ་དང་དབང་འཛིན་པ་ཚོས་མང་ཚོགས་ནང་རྒྱུན་པར་རྒྱ་མིའི་མྱུལ་མ་དང་སོ་པ་སོགས་ཀྱི་ཞེད་སྣང་སྐུལ་བ་མང་དྲགས་པའི་འཇིགས་དངངས། བོད་མི་ཚོའི་དད་པ་དམ་ཚིག་དང་དགའ་ཞེན་དག་སྣང་གི་གསེང་ན། ༧གོང་ས་མཆོག་གི་སྐུ་ཕྱྭའི་ཐོག་སེམས་འཚབ་བག་ལ་ཞ་བ་ཞིག་གིས་དུས་ནས་དུས་སུ་སྐུལ་མ་གཏོང་གི་ཡོད་པ་བསྟན་ཡོད།
བོད་པའི་ཁ་རྒྱུན་ལ། ཆུ་མ་ཡོངས་སྔོན་ལ་རགས་དང་། དགྲ་མ་ཡོང་སྔོན་ལ་མཚོན་ཟེར་བ་ལྟར། དོགས་ཟོན་མཐོར་འདེགས་གནང་དགོས་པ་གལ་ཆེན་ཡིན་ཡང་། དགོས་སར་ཆད། མི་དགོས་སར་ལྷག་ཟེར་བ་ལྟར། གནས་ཚུལ་ལ་ལའི་ཐོག་བོད་པ་རང་ཉིད་ཀྱིས་རང་ཉིད་ནག་ཅན་བཟོས་ཏེ་ཟུར་དུ་བྲོས་ནས་ལྐོག་ཏུ་ཡིབ་པ་དང་། རྟོག་བཏགས་དང་འཆར་སྣང་སྣ་ཚོགས་བཞེངས་སྐྲུན་བྱས་ཏེ། སེམས་པ་གུ་དོགས་པོ་དང་བྱེད་སྟངས་ཁྱད་མཚར་བོ་ཡ་མ་བརླ་མང་པོ་སྟོན་གྱིན་འདུག
ཉེ་ལམ་དྷ་ས་ཟློས་གར་ལམ་ཁའི་ཁང་སྟོང་ཞིག་ནས་མིའི་ཕུང་བོ་ཞིག་བརྙེད་པ་དེར་འུར་སྒྲ་ཆེན་པོ་གྲགས་ཤིང་། ད་ལོའི་ཕྱི་ཟླ་དང་པོའི་ནང་དྷ་སའི་སྐོར་ལམ་གྱི་གད་སྙིགས་ཁྲོད་ནས་ཤོག་ཐུམ་ཞིག་རྙེད་པ་དེའང་འགད་རྫས་ཡིན་པའི་གླེང་སློང་བྱུང་། སྤྱིར་མི་ཞིག་རྒྱུན་ལྡན་མིན་པར་ཤི་བ་དང་། ཁོར་ཡུག་ཅིག་ཏུ་རྒྱུན་ལྡན་མིན་པའི་གནས་ཚུལ་བྱུང་ན། མི་སུ་ཡིན་ཡང་དོ་སྣང་བྱེད་པ་རང་བཞིན་ཡིན་ཡང་། བོད་པ་ཚོའི་སེམས་ངོར་འཆར་ཡོང་བ་དེ་རྒྱ་མིའི་སོ་པ་དང་མྱུལ་མ་ཟེར་བའི་མིང་ཚིག་སྐྱུར་མོ་འདི་དག་རེད།
དྷ་རམ་ས་ལ་ན་རྒྱ་ནག་གི་སོ་པས་སོ་ལྟ་བྱེད་ཡུལ་གྱི་ཉེན་ཁ་གང་ཡང་བཟོ་ཡི་མེད་ལ། སྤྱིར་བཙན་བྱོལ་སྤྱི་ཚོགས་ཁྱོན་ཡོངས་ནང་རྒྱ་ནག་གི་མྱུལ་མས་མྱུལ་ཞིབ་བྱེད་དགོས་པ་གང་ཡང་སྦས་བསྐུངས་བྱས་མེད། སྤྱི་ཚོགས་དཀྲུག་མཁན་དང་རྒྱ་སྒོར་ཟ་མཁན་ཡོད་མདོག་མདོག་སྟོན་མཁན་དང་བཤད་མཁན་ཚོས་ཀྱང་། རྒྱ་ནག་གིས་བོད་ནང་གི་ཞི་རྒོལ་དང་རང་ལུས་མེ་བསྲེགས་བཙན་བྱོལ་སྒྲིག་འཛུགས་དང་ཏཱ་ལའི་བླ་མས་བརྒྱུད་སྐུལ་བྱས་པ་ཡིན་ཚུལ་བཤད་པ་ལྟར། རྣམ་དཔྱོད་ལྡན་པའི་བཤད་སྟངས་དང་ཕུགས་ལ་ཕན་པའི་བྱེད་ཐབས་ཤིག་མིན།
དེ་བས་༧གོང་ས་མཆོག་ཕྱི་རྒྱལ་ཁག་དང་། བོད་པའི་སྤྱི་ཚོགས་ཀྱི་མཛད་སྒོ་རིགས་ལ་ཕེབས་སྐབས། ཕྱོགས་ཡོངས་ལ་དོགས་ཟོན་མཐོན་པོ་གནང་དགོས་པ་གལ་ཆེན་ནང་གི་དོན་ཆེན་ཡིན་ཡང་། འདིའི་ཐོག་དེ་སྔ་འགན་ཡོད་ཚོས་འཐུས་ཤོར་བཏང་བ་མང་པོ་བྱུང་ཡོད་ལ། མང་ཚོགས་ཁྲོད་དུའང་སེམས་འཚབ་དང་དོ་སྣང་སྤྲོད་མཁན་ཉུང་ཉུང་ཡིན། ད་ལྟའི་འཁྲུག་ཆ་དོད་པའི་སྤྱི་ཚོགས་ནང་། རྒྱ་མིའི་སོ་པ་ཙམ་མིན་པར་མི་སུས་ཀྱང་གློ་བུར་གྱི་གནད་དོན་བཟོ་སྲིད་ལ། བཞུགས་སྒར་དྷ་ས་ཙམ་མིན་པར་ས་གང་དུའང་ཛ་དྲག་གི་གནས་ཚུལ་འབྱུང་སྲིད་དོ།།
