ཟླ་འདིའི་ཕྱི་ཚེས་ ༢༡ ཉིན་གྱི་སྔ་དྲོར་དཀར་མཛེས་ཁུལ་དཔལ་ཡུལ་རྫོང་ནས་ཡིན་པའི་ཆབ་སྲིད་བཙོན་ཟུར་པད་སྟོབས་ལགས་ཀློད་གྲོལ་བཏང་ཡོད་འདུག
འདི་གར་འབྲེལ་ཡོད་ནས་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ་ ༢༠༠༩ ལོའི་༧གོང་ས་མཆོག་ལ་ནོར་སྤེལ་ཞི་བདེའི་གཟེངས་རྟགས་འབུལ་བཞེས་ཀྱི་དུས་དྲན་སྐབས། པད་སྟོབས་ལགས་བོད་ཀྱི་རྒྱལ་ས་ལྷ་ས་རུ་ཡོད་པ་དང་། རྒྱ་གཞུང་གི་དམ་དྲག་ལ་མ་འཛེམས་པར་ཁོང་དང་ཁོང་གི་ཚོང་རོགས་ཁ་ཤས་ཀྱིས། ༧གོང་ས་མཆོག་གི་སྐུ་པར་གདན་དྲངས་ཏེ་བསང་གསོལ་བཏང་བ་དང་། ཇོ་བོར་ཞལ་གསེར་བརྒྱབ་པ་སོགས་བྱས་ཏེ་དུས་དྲན་སྲུང་གཙི་གནང་ཡོད་སྟབས། རྒྱ་གཞུང་ཉེན་རྟོག་པས་ཁོང་འཛིན་བཟུང་བྱས་ཏེ་ཆབ་སྲིད་ཀྱི་ཁེ་དབང་འཕྲོག་ཡོད་པ་མ་ཟད། ལོ་ ༦ བཙོན་འཇུག་ཁྲིམས་ཐག་བཅད་ཡོད་པ་ལྟར། ཟླ་འདིའི་ཕྱི་ཚེས་ ༢༡ ཉིན་ཁོང་ཀློད་གྲོལ་བཏང་སྟེ་ཕ་ཡུལ་དུ་འབྱོར་ཡོད་པ་དང་། སྐབས་དེར་ས་གནས་བོད་མི་ཚོས་ཁོང་ལ་དགའ་གུས་ཀྱི་ཁ་བཏགས་གཡོགས་ཏེ། གཞས་དང་ཞབས་བྲོ་འཁྲབ་ནས་ཕེབས་བསུ་ཞུས་ཡོད་འདུག
དེ་ཡང་ས་གནས་ཀྱི་འབྲེལ་ཡོད་ཚོས་བརྗོད་པ་ལྟར་ན། པད་སྟོབས་ལགས་སྡེ་དགེ་དཔལ་ཡུལ་ནས་ཡིན་པ་དང་། བོད་རིགས་སྤུན་ཟླར་ཤ་ཞེན་ཆེན་པོ་ཡོད་མཁན་ཞིག་ཡིན་པ་མ་ཟད། ས་གནས་བོད་མི་ཚོས་གཟིག་དང་སྲམ་སོགས་ཀྱི་པགས་རིགས་རྒྱན་ཆས་གྱོན་པར་རྒྱུན་དུ་བཀག་འགོག་གནང་མཁན་གྱི་བོད་རིགས་ཚོང་པ་ཞིག་ཡིན་འདུག
གསར་འགོད་པ། པདྨ་མཚོ།
པད་སྟོབས་ལགས་བཀྲིས་བདེགས་ཞུ།