དེ་རིང་ཉིན་རྒྱབ་དགེ་ལུགས་པའི་རྒྱལ་ཡོངས་ཚོགས་ཆེན་ཐེངས་དང་པོའི་ཐོག་༧གོང་ས་མཆོག་ཆིབས་སྒྱུར་བསྐྱངས་ཏེ། ཁྱེད་རང་ཚོས་ཁྲིམས་བཟོས་ནས་ཡིག་ཆ་གཏན་འབེབས་བྱས་ཀྱང་། དོ་བདག་སོ་སོའི་སེམས་ནང་ལ་གཡོ་འགུལ་ཐེབས་ནས་འགྲོ་དགོས་རེད་མ་གཏོགས། བཅའ་ཡིག་རྫིག་པ་ག་ཚོད་ཅིག་བཟོས་ཀྱང་གྲྭ་ཆས་ཕུད་ནས་མཆོངས་འགྲོ་གི་རེད་ཅེས་གསུངས།
དེ་རིང་ཉིན་རྒྱབ་ཆུ་ཚོད་ ༢།༠༠ སྟེང་། དྷ་སྟེང་བོད་ཁྱིམ་ཚོགས་ཁང་དུ། གཟའ་མིག་དམར་ཉིན་ནས་འཚོགས་བཞིན་པའི་རི་བོ་དགེ་ལུགས་པའི་རྒྱལ་ཡོངས་ཚོགས་ཆེན་ཐེངས་དང་པོ་དེ་མཇུག་བསྒྲིལ་བའི་མཛད་སྒོ་ཞིག་ཚོགས་ཡོད་པ་དང་། ཚོགས་མགོན་དུ་༧གོང་ས་མཆོག་དབུས་པའི་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས། བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་བཅས་ཕེབས་སོང་།
ཐེངས་འདིའི་ཚོགས་ཆེན་སྟེང་གྲོས་ཆོད་ཁག་ཅིག་བཞག་ཡོད་པ་ནི། ༧གོང་ས་མཆོག་གི་བཀའ་སློབ་ལམ་སྟོན་ཁག་ལག་ལེན་ཁེལ་བ་བྱ་རྒྱུ་དང་། ཁོང་གི་སྐུ་ཚེ་བསྐལ་བརྒྱར་བསྟན་པའི་གསོལ་འདེབས་ཞུ་རྒྱུ། བོད་མིའི་སྒྲིག་འཛུགས་ཀྱི་ལངས་ཕྱོགས་དབུ་མའི་ལམ་ལ་ཤར་སྐྱོད་བྱ་རྒྱུ་དང་། ༢༠༡༥།༦།༢༡ ནས་ ༢༠༡༦།༦།༢༡ ལོའི་བར་རྒྱལ་བའི་དགོངས་གཞི་དང་བཀའ་སློབ་ལམ་སྟོན་གཞིར་བཟུང་རྒྱལ་བའི་བཀའ་དྲིན་རྗེས་དྲན་སྲུང་གཙི་ཞུ་རྒྱུ། དོལ་རྒྱལ་བསྟེན་གསོལ་བྱེད་མཁན་སུ་ཡིན་ཡང་། རི་བོ་དགེ་ལུགས་པ་དང་བཀའ་གདམས་གསར་མ་གང་ཡང་མིན་པར་མ་ཟད། བོད་གངས་ཅན་གྱི་ཆོས་བརྒྱུད་གང་གིའང་ཁོངས་གཏོགས་མིན་པ་བསྐྱར་ནན། ༧གོང་ས་མཆོག་ལ་གཞི་མེད་སྐྱོན་འཛུགས་བྱེད་བཞིན་པར་ངོས་ལེན་མེད་པའི་ངོ་རྒོལ་དང་བོད་མི་མང་སྤྱི་འཐུས་ལྷན་ཚོགས་དང་བོད་པའི་ཆོས་ལུགས་ཁག་གི་ཚོགས་ཆེན་བཅས་སུ་བཞག་པའི་གྲོས་ཆོད་ཁག་ལ་རྒྱབ་སྐོར་ཞུ་རྒྱུ། དགེ་ལུགས་པའི་དགོན་སྡེ་ཡོངས་ཀྱིས་ཆོས་སྡེ་སྤྱི་ལ་ཁྱབ་པའི་བཅའ་ཡིག་ལ་བརྩི་བཀུར་ཞུ་དགོས་པ་སོགས་བཀོད་འདུག
མཇུག་བསྡོམས་མཛད་སྒོའི་སྟེང་དགེ་ལུགས་སྤྱི་འཐུས་ཨ་ཀྲུག་ཚེ་བརྟན་ལགས་ཀྱིས་ད་ལྟ་བོད་བརྒྱུད་ནང་བསྟན་སྤྱི་དང་བྱེ་བྲག་གིས་རི་བོ་དགེ་ལྡན་པའི་བསྟན་པ་འཛིན་སྐྱོང་སྤེལ་གསུམ་བྱེད་པར་ཆ་རྐྱེན་བཟང་པོ་གསུམ་ལྡན་ཡོད་སྐོར་བརྗོད་དོན། ད་ལྟ་ང་ཚོར་ཆ་རྐྱེན་བཟང་པོ་གསུམ་ཡོད་པའི་རྒྱུ་མཚན་ལ་བརྟེན་ནས་ཤུགས་རྒྱག་དགོས་པ་ཞིག་ལ་ངོས་འཛིན་བྱེད་ཀྱི་ཡོད། ཆ་རྐྱེན་བཟང་པོ་དང་པོ་དེ་ང་ཚོ་བོད་གངས་ཅན་སྤྱིའི་སྣོད་བཅུད་ཡོངས་སུ་རྫོགས་པར་ཉམས་རྒུད་དང་གོད་ཆག་ཆེན་པོ་ཞིག་བྱུང་བའི་སྐབས་དེར། ༧རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོས་བོད་འབངས་སྤྱི་དང་། ལྷག་པར་དུ་རྗེ་བླ་མའི་བསྟན་པ་འདི་ཉིད་དུས་རབས་ཉེར་གཅིག་པའི་ནང་འཛམ་གླིང་ཡུལ་གྲུ་གང་སར་ཁྱབ་པ་བྱེད་པར། རྗེ་བླ་མའི་བཀའ་དྲིན་དང་ཐུགས་རྗེའི་འོག་ཡོད་པ་དེ་ང་ཚོས་ད་ལྟ་ཤུགས་རྒྱག་པའི་ཆ་རྐྱེན་བཟང་ཤོས་ཤིག་ལ་ངོས་འཛིན་ཞུ་རྒྱུ་དང་། ཆ་རྐྱེན་གཉིས་པ་དེ་ང་ཚོ་རི་བོ་དགེ་ལུགས་པས་ལོ་བརྒྱ་ཕྲག་ཁ་ཤས་སྔོན་དུ་གཏན་འབེབས་བྱས་པའི་ལམ་སྲོལ་བཟང་པོ་དེ། ད་ལྟའི་དུས་རབས་ཉེར་གཅིག་པའི་ནང་ལའང་དུས་རབས་དང་མཐུན་པ། འོས་ཤིང་འཚམ་པ་ཞིག་ཆགས་ཡོད་ལ། མ་འོངས་ལོ་བརྒྱ་ཕྲག་མང་པོའི་ནང་དུའང་དུས་རབས་དང་མ་འཚམ་པ་ཡོང་གི་རེད་བསམ་པའི་སྣང་བ་མེད་པའི་ལམ་སྲོལ་བཟང་པོ་བོད་གངས་ཅན་གྱི་ཁ་ལ་ཡོངས་སུ་གྲགས་བསྡད་པ་དེ། ཨ་མའི་བུ་ལ་ཡོན་ཏན་ཡོད་ན་དགའ་ལྡན་ཁྲི་ལ་བདག་པོ་མེད་ཅེས་གསུངས་པ་ལྟར། ང་ཚོ་རི་བོ་དགེ་ལུགས་པར་བསྟན་བདག་དབུ་ཁྲིད་འདེམས་པའི་ལམ་སྲོལ་བཟང་པོ་ཞིག་ཡོད་པ་དེ་མི་ཉམས་པ་དང་། འབུར་དུ་ཐོན་པ་ཞིག་ཡོང་དགོས་པའི་ལམ་སྲོལ་དེ་ཆ་རྐྱེན་བཟང་པོ་ཞིག་རེད།
ཆ་རྐྱེན་བཟང་པོ་གསུམ་པ་དེ་ཕྱི་ལོ་ ༡༩༥༦ ལོར་བོད་ས་ཡོངས་རྫོགས་ལ་ཆག་འཇིག་ཆེན་པོ་ཞིག་བྱུང་སྟེ། ༧གོང་ས་མཆོག་སྐུ་འཁོར་དང་བཅས་པ་སྐྱབས་བཅོལ་དུ་ཕེབས་དགོས་པའི་གནས་སྟངས་ཆགས་པའི་འོག་ནས། ༧གོང་ས་མཆོག་གིས་མ་འོངས་སྔོན་གཟིགས་ཀྱི་ཐོག་ནས་རྗེ་བླ་མའི་བསྟན་པ་འཛིན་སྐྱོང་སྤེལ་གསུམ་བྱེད་མཁན་གྱི་བསྟན་འཛིན་གྱི་སྐྱེས་བུ་རྣམས་ལ། རྗེ་བླ་མའི་བསྟན་པ་འདི་མུ་མཐུད་འཛམ་གླིང་འདིའི་ཐོག་གནས་པའི་ལམ་སྟོན་བཟང་པོ་གནང་བའི་སྐུ་དྲིན་ལ་བརྟེན་ཏེ། དེ་རིང་ཚོགས་ཁང་འདིའི་ནང་ཕེབས་པའི་ཚོགས་བཅར་བའི་ནང་ཕྱི་ལོ་ ༡༩༥༩ ལོར་ཕེབས་པ་ཉུང་ཤས་ཤིག་ཆགས་བསྡད་ཡོད་ཀྱང་། དེའི་རྗེས་ཀྱི་རྗེས་རབས་པ་ཚོ་ཡིན་ནའང་རྗེ་བླ་མའི་བསྟན་པ་འཛིན་སྐྱོང་སྤེལ་གསུམ་བྱེད་པའི་སྲོལ་བཟང་རྒྱུན་མཐུད་དེ། མདོར་ན་མི་རབས་གསར་རྙིང་བར་གནས་སྟངས་ཏག་ཏག་ཅིག་མཐུད་ཐུབ་ཡོད་པ་དེ་ཆ་རྐྱེན་བཟང་པོ་ཞིག་རེད། ཆ་རྐྱེན་བཟང་པོ་འདི་གསུམ་ཡོད་པའི་ཐོག་ནས་ཤུགས་རྒྱག་དགོས་པ་དེ་ཕྱི་མེད་པ་ཡིན་ནའང་། སྔ་མེད་པའི་དུས་ཚོད་ཅིག་ལ་ངོས་འཛིན་བྱེད་ཀྱི་ཡོད། ཅེས་དང་།
ཆ་རྐྱེན་བཟང་པོ་དེ་ཚོ་དང་མཉམ་དུ་འགལ་རྐྱེན་ཡང་མང་པོ་ཞིག་ཡོང་གི་ཡོད་པའི་སྐོར་ལ་ཁོང་གིས། སྤྱིར་བཏང་འགལ་རྐྱེན་སྣ་ཚོགས་ཤིག་ཡོད་པའི་ནང་ནས་གསུམ་ཞུས་པ་ཡིན་ན། དང་པོ་འཛམ་བུ་གླིང་ལ་གཡོ་སྒྱུ་དང་ཧམ་པ་ལ་གོམས་འདྲིས་ཆེན་པོ་ཡོད་པའི་སྟོབས་ཆེན་རྒྱལ་ཁབ་ཁག་གིས། བོད་བརྒྱུད་ནང་བསྟན་སྤྱི་དང་ལྷག་པར་དུ་རི་བོ་དགེ་ལུགས་པ་རྩ་བ་ནས་མེད་པར་བཟོ་དགོས་པའི་སྐོར་ལ་ཕྱི་ལོ་ ༢༠༡༡ ལོར་གྲོས་ཆོད་ཅིག་བཞག་ཡོད་པ་དེ་རྣམ་པ་ཚོ་ཚང་མས་མཁྱེན་བསྡད་ཡོད་ལ། དེ་དང་མཉམ་དུ་ནང་གི་རྐྱེན་ནི་རི་བོ་དགེ་ལུགས་པའི་མིང་འཁུར་ཏེ་འཛམ་གླིང་གང་སར་ང་ཚོ་དགེ་ལྡན་པའི་བསྟན་པ་སྲུང་མཁན་ཡིན་ཞེས་དགེ་ལྡན་པའི་སྐྱེས་བུ་ཡོངས་རྫོགས་དགྲ་ལྟར་བརྩིས་ཏེ། རྒྱ་ནག་གི་དངུལ་དངོས་ཀྱི་རྗེས་སུ་འབྲང་ནས་འཛམ་གླིང་གང་སར་རི་བོ་དགེ་ལྡན་པའི་བསྟན་པར་རྨ་བཟོ་བའི་ཕུ་དཀྲོག་མདའ་དཀྲོག་མང་པོ་ཞིག་བཟོ་བསྡད་ཀྱི་ཡོད་པ་དེ་འགལ་རྐྱེན་ཆེན་པོ་ཞིག་རེད། ངས་དྲང་མོ་ཞུས་ན། འགལ་རྐྱེན་གསུམ་པ་དེ་ང་རང་ཚོ་རི་བོ་དགེ་ལྡན་པ་སྤྱི་དང་སྒེར་གྱི་སྒྲིག་འཛུགས་ཡོངས་རྫོགས་ཀྱི་འགན་བཞེས་མཁན་གྱི་ལས་བྱེད་ཚོར། ༧གོང་ས་མཆོག་གིས་ལམ་སྟོན་ཞིག་ག་རེ་གནང་ཡོད་པ་རེད་ཞུས་པ་ཡིན་ན། ཡག་པོ་དང་བཟང་པོའི་ཕྱོགས་དེ་མི་གཞན་ལ་གླེང་འཇུག་དགོས་པ་དང་། ངན་པ་དང་འཐུས་ཤོར་བའི་ཕྱོགས་དེ་ང་རང་ཚོས་གླེང་སློང་བྱས་ཏེ་འབད་བརྩོན་གནང་ནས་གདོང་ལེན་བྱེད་དགོས་པ་རེད་ཅེས་ལམ་སྟོན་བཟང་པོ་ཞིག་གནང་ཡོད་ཀྱང་། ད་ལྟའི་ཆར་སྒྲིག་འཛུགས་ཕལ་མོ་ཆེའི་ནང་འགན་བཞེས་མཁན་རྣམ་པ་ཚོས་ཡར་ཞུས་ན་རེད། མར་མང་ཚོགས་ལ་གནང་ནའང་རེད། ཡག་རབས་བཤད་པ་མ་གཏོགས་འཐུས་ཤོར་བའི་ཕྱོགས་དེ་གང་ཉུང་ཉུང་གིས་སྦེད་ཐབས་བྱེད་པའི་གནས་སྟངས་ཤིག་ཆགས་བསྡད་ཡོད་པ་དེའང་། ནམ་ཞིག་རི་ལུགས་པ་ཐག་པས་མི་འདོམ་པའི་གནས་སྟངས་ཤིག་ཆགས་པའི་ཉེན་ཁ་ཆེན་པོ་ཞིག་ཡིན་སྟབས། ཉེན་ཁ་དེར་གདོང་ལེན་ཆེད་དེ་རིང་ང་ཚོ་རི་བོ་དགེ་ལྡན་པ་སྤྱིའི་སྒྲིག་འཛུགས་འདི་ཚགས་ཚུད་དང་། དེང་རབས་དང་མཐུན་པ་ཞིག་ཡོང་བར་ཚོགས་ཆེན་འདི་སྐོང་ཚོགས་ཞུས་པ་ཡིན། ཞེས་བརྗོད་སོང་།
མཇུག་ཏུ་༧གོང་ས་མཆོག་གིས་དགོན་པ་ཆུང་ཆུང་ཞིག་ཡིན་ཡང་ཆོས་སློབ་གཉེར་བྱེད་ཡུལ་ཞིག་ཆགས་པ་བྱ་དགོས་སྐོར་བཀའ་གནང་དོན། དགོན་པ་ལྷ་ཁང་ག་པར་ཡོད་པ་ཡིན་ཡང་རིམ་པས་རིམ་པས་དེ་སློབ་གཉེར་ཁང་ཞིག་བཟོ་དགོས་རེད། དགོན་པ་ཞིག་ཡོད་རེད་ཟེར་ལབ་དུས་སྐྱབས་སུ་མཆི་ཟེར་ནས་དུས་རྒྱུན་ཏུ་མཆོད་མེ་འབུལ་བར་ཕྱིན་པ་དང་། ལོ་གཅིག་ཆགས་སོང་ན་ཆོས་ཐེབས་འདྲ་པོ་རྒྱག་པར་འགྲོ་རྒྱུ་མ་གཏོགས་བྱ་བ་གཞན་དག་མེད་པ་འདྲ་པོ་བྱས་ན་ཡག་པོ་ཡོད་པ་མ་རེད། དགོན་པ་ཞིག་ཡོད་ཟེར་ལབ་དུས་སློབ་གཉེར་ཁང་ཞིག་ཡིན་བསམ་པའི་འདུ་ཤེས་ཤིག་བློར་བཅར་ཐུབ་པ་ཞིག་བཟོ་དགོས་རེད། དཔེར་ན། རྒྱ་གར་བ་རྒྱུས་ཡོད་མཁན་ཚོས་ན་ལེན་ཌ་ཟེར་སྐབས་དེ་ལམ་སེང་མཁས་པའི་འབྱུང་ཁུངས་སློབ་གཉེར་ཁང་ཞིག་ཡིན་པ་བློ་ལ་འཆར་ཡོང་གི་འདུག་མ་གཏོགས། ན་ལེན་ཌ་ཟེར་སྐབས་དེར་དགེ་འདུན་པ་ཁ་ཤས་ཤིག་ཚོགས་ནས་བཞུགས་ཡོད་པ་ཞིག་བློར་འཆར་གྱི་མི་འདུག ང་རང་ཚོ་བོད་པ་ཚོ་ཡིན་ཡང་སེ་འབྲས་དགེ་གསུམ་ལབ་ན་གཙོ་བོ་སློབ་གཉེར་བྱེད་ས་ཞིག་ཡིན་པར་གང་འཚམ་ཞིག་བློ་ལ་འཆར་གྱི་ཡོད་པ་རེད། འབྲས་སྤུངས་ཆ་བཞག་ན་ན་ལེན་ཌ་གཉིས་པ་གསུངས་སྲོལ་ཡོད་པ་རེད་ལ། གང་ལ་གང་འཚམ་ཡིན་པའི་བཟོ་འདྲ་པོ་ཆགས་ཡོད། དེ་འདྲ་ཡིན་དུས་གང་ལྟར་ང་ཚོས་དགོན་པར་དཀོན་གཉེར་ཞིག་ལས་མེད་པ་ཡིན་ཡང་། དེའི་ནང་ལ་དུས་རྒྱུན་དུ་ཚེས་བཟང་དུས་བཟང་དེ་འདྲར་མཆོད་མཇལ་ལ་ཡོང་མཁན་ཚོས་ཡར་དངུལ་དེ་འདྲ་བཞག་ན། དཀོན་གཉེར་དེས་དངུལ་དེ་རྩིས་བརྒྱབ་པ་ཙམ་རང་མིན་པ་བྱས་ཏེ། དཀོན་གཉེར་གཅིག་ཡོད་བསྡད་པ་དེ་ཏོག་ཙམ་དཔེ་ཆ་ཤེས་མཁན་དེ་འདྲ་བསྐོས་ནས། ཚེས་བཟང་དུས་བཟང་ལ་གནས་སྐོར་ལ་ཡོང་མཁན་ཚོར་སྐྱབས་འགྲོ་ངོ་སྤྲོད་བྱེད་དགོས། སྐྱབས་འགྲོ་ངོ་སྤྲོད་བྱེད་བར་བདེན་པ་བཞིའི་ཐོག་ནས་ངོ་སྤྲོད་བྱ་རྒྱུ་ལས་མེད་པ་རེད། བདེན་བཞི་ངོ་སྤྲོད་བྱེད་པར་བདེན་གཉིས་ཐོག་ནས་བྱེད་དགོས་པ་རེད། རྣམ་འགྲེལ་ནང་གསུངས་བའི་དབུ་ཚད་སེང་གེའི་འཇིང་གནོན་ཟེར་བ་དེ་རེད། དབུ་མའི་གཞུང་ལས་གསུངས་པའི་སྟོང་ཉིད་ལྟ་བ་རྟེན་འབྱུང་གི་དེ་ཁོ་ན་ཉིད་ཀྱི་ལྟ་གྲུབ་དེ་རིག་པ་དེ་རྣམ་འགྲེལ་ནས་གསུངས་བཞག་པ་དེ་ཚུར་བླངས་ཏེ་སློབ་ཁྲིད་བྱ་རྒྱུ་དེ་དཔེ་མི་སྲིད་པའི་གལ་ཆེན་པོ་རེད་འདུག ལྷ་ཁང་ཆུང་ཆུང་ཞིག་ལས་མེད་ཀྱང་གང་ལྟར་དཀོན་གཉེར་ཞིག་མེད་ན་མ་གཏོགས། དཀོན་གཉེར་ཞིག་ཡོད་ན་དེ་འདྲས་སློབ་ཁྲིད་བྱ་རྒྱུའི་ལས་འགན་ཞིག་སྤྲད་དགོས་པ་རེད། དེ་རིང་ཁ་སང་དགེ་བཤེས་བཞག་པ་དེ་འདྲ་མང་པོ་ཞིག་འགྲོ་ས་མ་རག་པ་བྱས་ཏེ། ཨ་རིར་ག་དུས་ཐར་གྱི་རེད་བསམ་ནས་བསྡད་ཡོད་པ་དེ་འདྲ་མང་པོ་ཡོང་གི་འདུག ད་ལྟ་ང་ཚོ་དགེ་ལུགས་དགོན་པ་ཧི་མ་ལ་ཡའི་རི་བརྒྱུད་ལ་ག་ཚོད་ཅིག་འདུག་བལྟས་ཏེ། དེ་ཚོར་དཔེ་ཆ་ཤེས་མཁན་དེ་འདྲ་བཏང་སྟེ་དེ་ཚོས་འགན་ཁུར་བླངས་ནས་ཚེས་བཟང་དུས་བཟང་ལ་མི་མང་ཡོང་བའི་སྐབས་ལ་ཆོས་ངོ་སྤྲོད་དང་སློབ་ཁྲིད་བྱ་རྒྱུ་གལ་ཆེན་པོ་ཆགས་ཡོད། ཅེས་གསུངས་སོང་།
ཡང་ཁོང་གིས་ཆོས་སེམས་ཀྱི་བྱེད་དགོས་རེད་མ་གཏོགས་བཅའ་ཡིག་རྫིག་པོ་ག་ཚོད་བཟོས་ཀྱང་ཆོ་མེད་པ་ཆགས་ཉེན་ཡོད་སྐོར་གསུངས་དོན། ང་ཚོ་སངས་རྒྱས་པའི་བསྟན་པ་གནས་དང་མི་གནས་ཟེར་བ་དེ་དགེ་འདུན་གྱི་སྡེ་ལ་རག་ལས་ཡོད་པ་རེད་གསུངས་ཀྱི་ཡོད་པ་རེད། དེ་དེའི་ཚེ་དེའི་དུས་ཀྱི་བཤད་སྲོལ་ཞིག་རེད། སངས་རྒྱས་ཀྱི་བསྟན་པ་ཟེར་བ་དེ་ལུང་རྟོག་གི་བསྟན་པ་གཉིས་པོ་དེ་རེད། ལུང་རྟོག་གི་བསྟན་པ་གཉིས་པ་དེ་དགེ་འདུན་རྐྱང་རྐྱང་གིས་འཛིན་རྒྱུ་ཞིག་མ་རེད། ཁྱིམ་པ་ཕོ་མོ་ཚོ་ཆོས་དད་མེད་ན་མ་གཏོགས་ཡོད་ན་འཛིན་དགོས་པ་རེད། ཇི་ཙམ་གྱིས་སྤྱི་ཚོགས་ནང་ལ་བསྟན་དང་རྟོག་པའི་བསྟན་པ་ཡོང་བ་ལ་ལུང་གི་རྟོག་པའི་ཐོག་ནས་གོ་བ་ཆགས་པ་ཡིད་སྨོན་སྐྱེ་རྒྱུ་ཞིག་དགོས་པ་རེད། དེ་མིན་ན་ཡོང་རྒྱུ་ཁག་པོ་ཆགས་ཡོད། ཁ་སང་ཁ་ཉིན་ཞིག་ལ་ངོས་དང་སུ་ཡིན་མིན་ཧ་གོ་མ་བྱུང་གང་ལྟར་སྐད་ཆ་ཞིག་བྱུང་། རབ་བྱུང་ཐོག་མ་སྒྲུབ་སྐབས་རབ་བྱུང་སྒྲུབ་བྱ་དེ་ཚོ་ངེས་འབྱུང་ངོ་སྤྲོད་གནང་རྒྱུ་དེ། རབ་བྱུང་སྒྲུབ་སྐབས་ངོ་སྤྲོད་ཏོག་ཙམ་གནང་བ་དེ་ཙམ་མ་ཡིན་པར། རབ་བྱུང་མ་སྒྲུབ་པའི་གོང་ལ་བདུན་ཕྲག་གཅིག་རིང་འཛིན་གྲྭ་ཚོགས་ཏེ་གཙོ་བོ་དེ་བདེན་བཞིའི་རྣམ་བཞག་ཐོག་ནས། གང་ལྟར་ང་ཚོས་ངེས་འབྱུང་སྒོམ་རྒྱུའི་རྒྱུ་མཚན་དེ་འདུ་བྱེད་ཀྱི་སྡུག་བསྔལ་སྐོར་ལ། ཁོ་ཚོའི་བར་ལ་ཆོས་མཐུན་ཆུ་ཚོད་གཅིག་ཙམ་རིང་ངོ་སྤྲོད་དང་བགྲོ་གླེང་བྱས་ནས་ཁོ་རང་ཚོར་བསམ་བློ་གཏོང་རྒྱུ་ཞིག་བྱུང་ན། དངོས་གཞིའི་རབ་བྱུང་སྒྲུབ་སྐབས་ཐར་པ་ཟེར་བ་དེ་འདི་འདྲ་ཞིག་རེད་འདུག་བསམ་པ་ཞིག་བསམ་བློའི་ནང་བྱུང་ན་ཡག་པོ་མི་འདུག་གམ། ང་ཚོས་དེ་སྤུས་དག་ཏུ་གཏོང་དགོས་འདུག་མ་གཏོགས། གྲྭ་ཆས་གྱོན་ཐུབ་ཙམ་ཞིག་དང་རྟགས་ཆ་ལུགས་འགྱུར་ཐུབ་ཙམ་ཞིག་མ་གཏོགས་བསམ་བློ་ཚེ་འདིའི་སྒང་ལ་ཕྱིན་ཏེ། གྲྭ་པ་ཟེར་སྐབས་ལྟོ་གོས་འཚོལ་ས་ཞིག་མ་གཏོགས་གང་ཡང་མེད་པ་འདྲ་པོ་བྱས་ན་ཆོ་གང་ཡང་མེད་པ་འདྲ་པོ་ཆགས་ཡོད། དཔེ་ཆ་བལྟ་རྒྱུ་དེ་ཡང་དགེ་བཤེས་ཀྱི་མིང་ཞིག་ཐོབ་པ་ཡིན་ན་བླ་མ་བཟོད་པའི་སྐུ་མདུན་ལ་བཅར་ཏེ། ཆོས་ཚོགས་ཤིག་ལ་གཏོང་རོགས་ལབ་རོགས་ཟེར་བ་འདྲ་པོ་བྱུང་ན་ཡག་པོ་གང་ཡང་མི་འདུག ཡིན་ཡང་དེ་དངོས་ཡོད་གནས་ཚུལ་ཞིག་ཆགས་ཡོད་སྟབས། ཁྱེད་རང་ཚོས་ཁྲིམས་བཟོས་ནས་ཡིག་ཆ་གཏན་འབེབས་བྱས་ཀྱང་། དོ་བདག་སོ་སོའི་སེམས་ནང་ལ་གཡོ་འགུལ་ཐེབས་ནས་འགྲོ་དགོས་རེད་མ་གཏོགས། བཅའ་ཡིག་རྫིག་པ་ག་ཚོད་ཅིག་བཟོས་ཀྱང་ཕན་ཐོགས་མེད་པ་ལྟར་ཆགས་ནས་གྲྭ་ཆས་ཕུད་ནས་མཆོངས་འགྲོ་གི་རེད། ཅེས་གསུངས་སོང་།
གསར་འགོད་པ། དོན་གྲུབ།
གསར་འགོད་པ་ལ་བཀའ་དྲིན་ཆེ། ཡིན་ཡང་ང་ལ་བསམ་ཚུལ་ཞིག་ཡོད། བོད་ཀྱི་དུས་བབས་གསར་འགྱུར་ལ་མཚོན་ན་བཙན་བྱོལ་སྤྱི་ཚོགས་ནང་ད་སྔ་ཆེས་གདེང་འཇོག་ཡོད་པའི་གསར་ཁང་གཅིག་བུ་དེ་ཡིན་མོད། ཡིན་ཡང་ཁ་སང་དེ་རིང་གི་གསར་འགོད་པ་ཚོར་མཁྱེན་རྒྱ་ཡོད་སྲིད་ཀྱང་། དོ་སྣང་དེ་ཙམ་བྱེད་གྱིན་མེད་པ་ཡིན་ནམ། གང་ལྟར་ཚིག་གི་གཅོད་མཚམས་དང་། གསུང་བཤད་ཡིག་ཐོག་ལ་འབེབ་སྟངས། དུས་གསུམ་དང་བྱ་བྱེད་སོགས་ཀྱི་ཐད་ལ་གཟབ་གཟབ་བྱོས། མ་གཞི་ནས་བཙན་བྱོལ་སྤྱི་ཚོགས་ནང་དབྱངས་གསལ་སོ་བཞིའི་གོམ་པའི་འདེགས་འཇོག་དེ་ཙམ་བརྟན་པོ་མེད་ཁར་ལམ་ཆེན་ནང་རྡོ་གསེག་བཏབ་ན་མ་འོངས་པར་ག་འདྲར་འགྱུར་ས་རེད། རང་གིས་བྲིས་པའི་གསར་འགྱུར་རང་གིས་ངེས་པར་དུ་ཀློགས་རོགས།