བཀའ་བསྒྲུབ་ན་ཇི་བཞིན་བསྒྲུབ།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༦༧ སྟེང་གི་རྩོམ་སྒྲིག་པའི་གཏམ།
བཞུགས་སྒར་དྷ་རམ་ས་ལ་ནས་བོད་མིའི་སྒྲིག་འཛུགས་དང་མདོ་སྨད་ཆོལ་ཁ་སོགས་ཀྱིས་༧གོང་ས་མཆོག་དགུང་གྲངས་བརྒྱ་ཅུར་ཕེབས་པའི་སྐུའི་གྱ་སྟོན་ཚ་ཚ་འུར་འུར་གྱིས་སྲུང་གཙི་ཞུས་སོང་། གྱ་སྟོན་གོ་སྒྲིག་ཞུ་མཁན་དང་སྟོན་མོར་མཉམ་ཞུགས་གནང་མཁན་ཚང་མས་ཅི་མི་སྙམ་པར། གོ་སྐབས་ཤིག་གི་འདུ་ཤེས་བཟུང་སྟེ་ཟང་ཟིང་ལང་ལོང་དང་། དགའ་དགའ་སྤྲོ་སྤྲོས་སྟོན་མོར་རོལ་སོང་། ཡང་སྙིང་བོད་པ་ཚང་གི་ཁོག་པའི་སྙིང་དང་དཔྲལ་བའི་མིག་གཅིག་པུ་དགུང་ལོ་བརྒྱད་ཅུ་བརྒལ་འགྲོ་བཞིན་པའི་ཛ་དྲག་གི་སྐྱོ་གནས་འདིར་སུ་ལ་ཡང་སེམས་ཚུབ་མེད་པ་འདྲ།
    གྱ་སྟོན་མཛད་སྒོར་ཞུགས་མཁན་བླ་ཆེན་དཔོན་ཆེན་དང་། དབང་ཆེན་རྒྱུ་ཆེན་མང་པོ་ཞིག་གིས་གཏམ་བཤད་གནང་སྟེ། ཚང་མས་མགྲིན་དབྱངས་གཅིག་གིས་༧གོང་ས་མཆོག་གི་བཀའ་བརྩི་དགོས་ཚུལ་དང་། དགོངས་པ་བསྒྲུབ་དགོས་སྐོར། ཁོང་གི་བཀའ་དགོངས་བསྒྲུབ་རྒྱུ་དེ་རྒྱལ་བ་དགྱེས་པའི་མཆོད་པ་དང་རང་གཞན་གཉིས་ཀྱི་ཚོགས་བསགས་ཡིན་ཚུལ་བཤད།
    ༧རྒྱལ་བ་རིན་པོ་ཆེའི་བཀའ་དགོངས་བསྒྲུབ་དགོས་ཟེར་བ་འདི་བཙན་བྱོལ་སྤྱི་ཚོགས་ནང་གི་ཁ་ཐོགས་ཚད་ལ་གོམས་ཡོད་པའི་སྤྱིར་བཏང་གི་ཁ་གཡང་ཞིག་ཆགས་ཡོད། དེ་ལྟར་ཤོད་མཁན་གྱིས་སོ་སོའི་ཁ་ནས་ཅི་ཞིག་ཤོད་ཀྱི་ཡོད་པ་དང་། བཤད་པའི་སྐད་ཆ་དེ་ལ་ལྕི་བབ་ག་ཚོད་ཡོད་མེད་ཤེས་ཀྱི་མེད་ལ། མཐའ་ན་སྐད་ཆ་དེ་དག་ཐོག་སོ་སོར་འགན་འཁྲི་ཅི་ཙམ་ཡོད་པའང་ཚོར་གྱི་མེད།
    བོད་ནང་གི་བོད་མི་ཚོས་ཀྱང་ཉིན་འདི་འགར་རྣམ་པ་འདྲ་མིན་ཐོག་གྱ་སྟོན་སྲུང་གཙི་ཞུ་བཞིན་འདུག བོད་སྐད་ལ་དག་ཐེར་དང་བོད་ཡིག་ལ་འགྲན་བསྡུར་བྱས་ཏེ་གྱ་སྟོན་སྲུང་གཙི་ཞུ་བཞིན་འདུག སྔོན་མ་ཉིས་སྟོང་ལྔ་ལོར་སྟག་གཟིག་སྲམ་ལྤགས་ཀྱི་རྒྱན་གོས་མཚམས་འཇོག་བྱས་པ་དང་། ཉིས་སྟོང་བརྒྱད་དགུ་ནས་སློབ་གྲྭ་ཁག་ཏུ་རིགས་ལམ་འཁྲིད་སྤེལ་གནང་བ། ད་ལོའི་གྱ་སྟོན་ལའང་སྲོག་ཀླུ་ཚེ་ཐར་དང་ཚོགས་བསགས་དགེ་སྦྱོར་ཆོས་ཀྱི་མཆོད་པ་རྒྱ་ཆེན་བྱས་ཡོད།
    ༧གོང་ས་མཆོག་གི་བཀའ་དགོངས་བསྒྲུབ་འདོད་ཡོད་མཁན་ཚོས་བཀའ་ཇི་བཞིན་བརྩི་རྒྱུ་དང་། དགོངས་པ་ཇི་བཞིན་བསྒྲུབ་དགོས་པ་ལས། གསུང་ཡར་འཐེན་མར་གཅོད་དང་། དགོངས་པ་ཡར་འགྲེལ་མར་དཀྲུག་བྱས་ན། དེ་ནི་སྒེར་དོན་བསྒྲུབ་པ་ལས་༧གོང་ས་མཆོག་གི་བཀའ་དགོངས་བསྒྲུབ་སྟངས་མིན། མི་རེ་ཟུང་གིས་༧གོང་ས་མཆོག་གིས་འདི་བསྒྲུབ་གསུངས་ཡོད་པ་ལས། དེ་མ་བསྒྲུབ་གསུངས་མེད་སྐོར་བཤད་དེ་རང་མགོ་རང་གིས་གཡོག་པ་དང་། ཁོང་གི་དགོངས་པ་འདི་ཡིན་གསུངས་ཡོད་པ་ལས། དེ་ལས་ལྡོག་ན་མི་འགྲིག་གསུངས་མེད་ཚུལ་གྱིས་གཞན་མགོ་བཙན་གྱིས་སྐོར་གྱི་འདུག
    ༧གོང་ས་ཏཱ་ལའི་བླ་མ་མིའི་སྤྱི་ཚོགས་ནང་འཚོ་ཞིང་གཞེས་པའི་མི་ཞིག་ཡིན་སྟབས། ཁོང་གིས་དུས་དང་རྣམ་པ་ཀུན་ཏུ་ཆོས་དང་མ་འདྲེས་པའི་མིའི་ཡ་རབས་བཟང་སྤྱོད་གསུང་གི་ཡོད་པ་བཞིན། མི་སྡེ་སྤྱི་ཚོགས་དང་བོད་དོན་འཐབ་རྩོད་ཁྲོད་ཁོང་གི་སྐུ་གསུང་ཐུགས་ཀྱི་སྤྲོས་པ་མཐའ་ཐག་ཀྱང་མིས་མཐོང་བ་དང་མིས་ཐོས་པ། མིར་མཐུན་པ་རྐྱང་རྐྱང་ཡིན་པ་ལས་མི་དང་མིའི་འཇིག་རྟེན་ལས་འདས་པའི་སྨྲ་བསམ་བརྗོད་མེད་ཀྱི་མཛད་པ་ཅི་ཡང་བསྟན་མེད་ལ་བཀའ་གསུང་གང་ཡང་གནང་མེད་དོ།།