རིན་པོ་ཆེའི་གྲོངས་རྐྱེན་གསལ་བཤད་བྱེད་དགོས།

དེ་རིང་དྷ་རམ་ས་ལའི་གཞུང་འབྲེལ་མིན་པའི་ཚོགས་པ་ལྔས་སྐད་འབོད་གོམ་བགྲོད་ཀྱི་ལས་འགུལ་ཞིག་སྤེལ་ཏེ། རྒྱ་ནག་གཞུང་གིས་སྤྲུལ་སྐུ་བསྟན་འཛིན་བདེ་ལེགས་གྲོངས་རྐྱེན་གསལ་བཤད་དང་ཁོང་ལ་ནག་ཉེས་གང་ཡང་མེད་པ་དག་འབུལ་བྱེད་དགོས་ཞེས་བརྗོད་སོང་།

དེ་རིང་ཞོགས་པའི་དུས་ཚོད་ ༡༠ སྟེང་། བོད་ཀྱི་གཞོན་ནུ་ལྷན་ཚོགས་དང་བོད་ཀྱི་བུད་མེད་ལྷན་ཚོགས། བོད་རྒྱལ་ཡོངས་དམངས་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ། བོད་ཀྱི་དགུ་བཅུ་གསུམ་ལས་འགུལ་ཚོགས་པ་བཅས་ཀྱི་གོ་སྒྲིག་འོག དྷ་རམ་ས་ལའི་གཙུག་ལག་ཁང་ནས་དྷ་ཤོད་ཀ་ཅ་རིལ་ཁྲིམས་ཁང་བར་གོམ་བགྲོད་སྐད་འབོད་ཀྱི་ལས་འགུལ་ཞིག་སྤེལ་ཡོད་ཅིང་། དེ་ནི་ཟླ་འདིའི་ཚེས་ ༡༢ ཉིན་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ཁྲིན་ཏུའུ་བཙོན་ཁང་ཞིག་ཏུ་སྐུ་བཀྲོངས་པར་མྱ་ངན་དང་ཁོང་གི་སྐུ་ཕུང་ནང་མིར་རྩིས་སྤྲོད་དགོས་པ། ཁོང་གི་ཡུལ་མི་ཚོ་འཛིན་བཟུང་བཀག་བསྐྱེལ་བྱས་པ་མྱུར་དུ་གློད་གྲོལ་གཏོང་དགོས་པ་བཅས་ཀྱི་ཆེད་ཡིན་འདུག

ལས་འགུལ་དེའི་ནང་མི་མང་ ༣༠༠ ཡས་མས་ཤིག་མཉམ་ཞུགས་གནང་ཡོད་པ་དང་། དྷ་ཤོད་ཀ་ཅ་རིའི་མི་མང་འདུ་འཛོམས་ཐང་ཆེན་དུ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ཚ་བོ་དགེ་བཤེས་ཉི་མ་ལགས་ཀྱིས། ༢༠༠༢ ལོའི་ཕྱི་ཟླ་ ༤ ཚེས་༧ ཉིན་རྒྱ་ནག་གཞུང་གིས་རིན་པོ་ཆེ་ཁོང་རྒྱལ་ཁབ་ཁ་བྲལ་དང་འཇིགས་སྐུལ་རིང་ལུགས་སོགས་མ་ཉེས་ཁ་གཡོག་འོག་འཛིན་བཟུང་བྱས་ཏེ། འདས་པའི་མི་ལོ་ ༡༣ ལྷག་རིང་ཁྲི་མུན་བཙོན་དུ་བཅུག་པ་དང་། ཟླ་འདིའི་ཚེས་ ༡༢ ཉིན་ཁོང་སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་ཁྲང་ཏུང་བཙོན་ཁང་དུ་སྐུ་བཀྲོངས་པ་བཅས་ཀྱི་སྐོར་མང་ཚོགས་ལ་གཏམ་བཤད་དང་། ཡང་བོད་མི་མང་སྤྱི་འཐུས་ཨ་ཅརྱཱ་ཡི་ཤེས་ཕུན་ཚོགས་ལགས་ཀྱིས་ཧིན་སྐད་ཐོག་གཏམ་བཤད་གནང་སོང་།

གཞུང་འབྲེལ་མིན་པའི་ཚོགས་པ་ལྔའི་བསྒྲགས་གཏམ་ནང་། ང་ཚོས་བོད་ཀྱི་ཆབ་སྲིད་བཙོན་པ་དང་བོད་རྒྱུད་ནང་བསྟན་གྱི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ཁྲིན་ཏུའུ་བཙོན་ཁང་དུ་ ༢༠༡༥ ལོའི་ཟླ་ ༧ ཚེས་ ༡༢ ཉིན་སྐུ་བཀྲོངས་པ་ཤེས་རྟོགས་བྱུང་། ད་ལྟ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆོའི་ནང་མི་སྐུ་འཁོར་ནས་རིན་པོའི་སྐུ་ཕུང་ནང་མིར་རྩིས་སྤྲོད་དགོས་པའི་རེ་འདུན་ཞུ་བཞིན་འདུག མི་ལོ་ ༡༣ རིང་རིན་པོ་ཆེ་མཆོག་ལ་མ་ཉེས་ཁ་གཡོག་གི་བཙོན་འཇུག་འོག ཁོང་གི་སྐུ་གཟུགས་གི་གནས་སྟངས་ཧ་ཅང་སྐྱོ་བོ་ཆགས་ཡོད་ནའང་། ཁོང་ལ་སྨན་བཅོས་ཀྱི་མཐུན་རྐྱེན་གང་ཡང་སྤྲད་མེད། ༢༠༠༤ ལོར་ཁོང་གི་ནང་མིས་རྒྱ་ནག་གཞུང་ལ་ཁོང་སྨན་བཅོས་ཀྱི་མིང་ཐོག་ནས་གློད་གྲོལ་དགོས་པའི་སྙན་ཞུ་ཕུལ་ཡང་། རྒྱ་གཞུང་གིས་དང་ལེན་བྱས་མེད།

༢༠༠༢ ལོའི་ཟླ་ ༤ ཚེས་ ༧ ཉིན་རྒྱ་ནག་གཞུང་གིས་རིན་པོ་ཆེ་ཁོང་འཛིན་བཟུང་བྱས་པ་དང་། ༢༠༠༢ ལོའི་ཟླ ༡༢ ནང་ཁོང་ལ་རྒྱལ་ཁབ་ཁ་བྲལ་དང་འཇིགས་སྐུལ་རིང་ལུགས་པའི་ནག་ཉེས་བཀལ་ཏེ་སྲོག་ཐོག་ཁྲིམས་ཆད་བཅད་པ་རེད། དེིའི་རིང་ཁོང་ལ་ནང་མི་ཚོས་འདམ་ག་བྱས་པའི་ཁྲིམས་རྩོད་པ་མ་རེག་པ་མ་ཟད། ཁོང་གི་གྱོད་དོན་དང་འབྲེལ་བའི་ཡིག་ཆ་ད་བར་ཕྱི་ལ་ཁྱབ་བསྒྲགས་བྱས་མེད། རྗེས་སུ་རྒྱལ་སྤྱིའི་སྟེང་ཁོང་ལ་རྣམ་པ་འདྲ་མིན་གྱི་ལས་འགུལ་སྣ་ཚོགས་སྤེལ་བའི་དབང་གིས། ༢༠༠༤ ལོའི་ ༡ པོར་ཁོང་ལ་སྲོག་ཁྲིམས་ནས་ཚེ་བཙོན་དུ་འགྱུར་བ་བཏང་བ་རེད། ད་བར་ཁོང་གིས་བཙོན་ཁང་ནང་རང་ཉིད་ལ་ནག་ཉེས་གང་ཡང་མེད་པ་དག་འབུད་བྱས་ཡོད།

བོད་མི་རྒྱ་ཕྲག་མང་པོས་རིན་པོ་ཆེ་མཆོག་གི་སྐུ་ཕུང་ནང་མིར་རྩིས་སྤྲོད་དགོས་པའི་འབོད་སྐུལ་རིམ་པར་ཞུས་ཏེ། ནང་པའི་ཆོལ་ལུགས་ཀྱི་འགྲོ་ལུགས་ལྟར་ཆོ་ག་སྒྲུབ་རྒྱུའི་རེ་འདུན་བཏོན་ཡང་། རྒྱ་ནག་གཞུང་གིས་ཁས་མ་བླངས་པ་རེད། དེ་ལས་ལྡོག་སྟེ་སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་ཁྲང་ཏུང་བཙོན་ཁང་ནས་ལེ་དབར་ ༥ ཡི་སར་ཡོད་པའི་རྒྱ་གཞུང་གི་བཙོན་ཁང་ཞིག་ནང་ཁོ་ཚོར་བཙན་ཤེད་ཀྱིས་འཇིགས་སྣང་བསླངས་ཡོད།  

ས་གནས་ས་ཐོག་གི་བོད་མི་བརྒྱ་ཕྲག་མང་པོས་རིན་པོ་ཆེ་མཆོག་རྒྱ་ནག་གཞུང་གི་བཙོན་ཁང་ནང་སྐུ་བཀྲོངས་པའི་རྒྱུ་རྐྱེན་གང་ཡིན་ལན་འདེབས་ཁ་གསལ་དགོས་ཞེས་ཞི་རྒོལ་ཤུགས་ཆེར་བྱས་པར། རྒྱ་ནག་གཞུང་གིས་ཡང་དག་པའི་བརྡ་ལན་སྤྲོད་རྒྱུ་ལྟ་ཞོག དེ་ལས་ལྡོག་སྟེ་མི་མང་གི་ཁྲོད་དུ་གང་བྱུང་མེ་མདའ་བརྒྱབ་པ་དང་། འབར་མདེལ་སོགས་འཕངས་ནས་དྲག་གནོན་བྱས་ཤིང་། གནས་སྟངས་དེ་འདྲའི་འོག་མི་མང་པོར་རྨས་སྐྱོན་ཕོག་སྟེ་སྨན་ཁང་ནང་ལུས་ཡོད།

ནག་ཉེས་མེད་པའི་བོད་ཀྱི་སྤྲུལ་སྐུ་ཞིག་འདི་ལྟར་སྐུ་བཀྲོངས་པ་དེའི་ཐོག་ནས་བོད་ནང་གི་གནས་སྟངས་དེ་གདུག་རྩུབ་དང་སྔར་བཞིན་དྲག་གནོན་འོག་གནས་ཡོད་པ་མཚོན་པ་མ་ཟད། བོད་མིའི་རང་དབང་དང་དྲང་བདེན། ཐོབ་ཐང་བཅས་ཀྱི་དོན་དུ་འཐབ་རྩོད་བྱེད་མཁན་ཚོའི་མཐའ་མའི་ལས་དབང་ཇི་འདྲ་ཡོང་གི་ཡོད་པའི་མཚོན་རྟགས་ཀྱང་རེད། ཅེས་སོགས་བརྗོད་འདུག

ཚོགས་པ་ལྔས་དགོས་འདུན་དོན་ཚན་ ༣ བཏོན་ཡོད་པ་ནི། ༡། འཛམ་གླིང་ས་གནས་གང་སར་སྡོད་པའི་བོད་མི་ཚོས་རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་སྐུ་དཀྲོངས་པར་ལན་འདེབས་ཁ་གསལ་ཞིག་བྱེད་དུ་འཇུག་དགོས། ༢། བོད་མི་ཞི་རྒོལ་བ་ཚོར་དྲག་གནོན་བྱ་རྒྱུ་འཕྲལ་དུ་མཚམས་འཇོག་དགོས། ༣། མཉམ་འབྲེལ་རྒྱལ་ཚོགས་ཀྱི་ངོས་ནས་སྤྲུལ་སྐུ་བསྟན་འཛིན་བདེ་ལེགས་ཀྱི་གནད་དོན་ཐད་འགན་འཁུར་ལེན་དགོས། ང་ཚོའི་རེ་འདུན་འདི་ནི་འཛམ་གླིང་མི་མང་གིས་ད་ལྟའི་བོད་ནང་གི་མི་སྤྱོད་ལས་འདས་པའི་བྱ་སྤྱོད་དེ་དག་ལ་རྒོལ་གཏམ་གཏོང་དགོས་པ་མ་ཟད། སྤྲུལ་སྐུ་བསྟན་འཛིན་བདེ་ལེགས་སྐུ་དཀྲོངས་པའི་གནད་དོན་རང་དབང་གི་ཐོག་ནས་ཞིབ་འཇུག་བྱེད་དགོས་ཡོད། ཅེས་སོགས་བཀོད་འདུག