ངོ་རྒོལ་རྒྱག་རྒྱུ་མ་གཏོགས་ནུས་པ་མེད་ན་ང་དེ་རིང་ཁྱེད་ཚོའི་མདུན་ལ་འཐོན་གྱི་མ་རེད།

དེ་རིང་སྲིད་སྐྱོང་གི་འོས་མི་ཀླུ་མཁར་བྱམས་ལགས་ཀྱིས་ང་ཀླུ་མཁར་བྱམས་ལ་ངོ་རྒོལ་རྒྱག་རྒྱུ་མ་གཏོགས་ནུས་པ་མེད་ན། ངས་བོད་ཀྱི་རྒྱལ་རབས་ལོ་རྒྱུས་ཀྱི་རྒྱལ་གཅེས་དཔའ་པོ་རྣམས་པ་ཚད་བཙུགས། ང་དེ་རིང་ཁྱེད་ཚོའི་མདུན་ལ་འཐོན་གྱི་མ་རེད་ཟེར། 

དེ་རིང་སྔ་དྲོའི་ཆུ་ཚོད་ ༡༠།༠༠ ཐོག་མེག་གྷན་བོད་ཀྱི་གསོལ་མགྲོན་ཁང་དུ་ཨ་ཚོགས་ཀླུ་མཁར་བྱམས་ལགས་ཀྱི་དང་བླངས་རྒྱབ་སྐྱོར་བའི་གོ་སྒྲིག་འོག ཨ་ཚོགས་ཀླུ་མཁར་བྱམས་ལགས་ཀྱིས་༢༠༡༦ ལོའི་སྲིད་སྐྱོང་གི་འོས་མིར་ལངས་རྒྱུ་ཡིན་པའི་གསར་འགོད་གསལ་བསྒྲགས་ཤིག་སྤེལ་སོང་།

ཐོག་མར་རྒྱབ་སྐྱོར་བ་གཉིས་ཀྱིས་དབྱིན་བོད་གཉིས་ཐོག་ནས་ཀླུ་མཁར་བྱམས་ལགས་ཀྱི་མི་ཚེའི་ལོ་རྒྱུས་སྙིང་བསྡུས་རེ་སྒྲོགས་སྦྱང་དང་འབྲེལ། ཁོང་གི་མི་ཚེའི་ལོ་རྒྱུས་ཀྱི་དངོས་བྱུང་བརྙན་ཐུང་བསྟན་རྗེས། ཨ་ཚོགས་ཀླུ་མཁར་བྱམས་ལགས་ཀྱིས་སྲིད་སྐྱོང་གི་འོས་མིར་ལངས་དགོས་དོན་གང་ཡིན་སྐོར་བརྗོད་དོན། བོད་ནང་གི་རྒྱལ་གཅེས་དཔའ་བོ་ཤི་གསོན་མང་པོ་ཞིག་གིས་ང་ཚོ་ལ་བལྟ་བསྡད་ཡོད་པ་མ་ཟད། དག་པའི་ཞིང་ནས་ཉན་བསྡད་ཡོད་པ་རེད། གནས་སྟངས་འདི་འདྲ་ཞིག་གི་འོག་ནས་ངས་ཧ་ཅང་གིས་སེམས་ཚོར་ཆེན་པོའི་ཐོག་ནས་ང་ ༢༠༡༦ ལོའི་སྲིད་སྐྱོང་ལ་ལངས་པ་འདི། ང་རང་ལ་ཆ་བཞག་ན་འགན་ཁུར་ཆེན་པོ་ཞིག་ཡིན་བསམ་གྱི་ཡོད། ང་ཚོ་བཙན་བྱོལ་གྱི་ལོ་རྒྱུས་ཐོག་ནས་རྒྱལ་ཁབ་ཕྱི་ནང་གང་ལ་ང་ཚོ་ངོམ་སོ་བྱེད་ཆོག་པའི་གནད་དོན་གཅིག་ག་རེ་བྱུང་ཡོད་རེད་ཟེར་ན། བོད་ཀྱི་ལོ་རྒྱུས་ཀྱི་དེབ་ཐེར་ནང་ལ་འཁོད་དོན་ཡོད་པ་ཞིག་༧རྒྱལ་དབང་སྐུ་ཕྲེང་བཅུ་བཞི་པ་ཆེན་མོ་མཆོག་གིས་དམངས་གཙོ་གསོལ་རས་གནང་བ་དང་། ཁོ་རང་གི་སྐུ་དབང་དེ་མི་མང་གིས་བདམས་པའི་མགོ་ཁྲིད་ཚོ་ལ་རྩིས་སྤྲོད་གནང་བ་དེ། བཙན་བྱོལ་སྤྱི་ཚོགས་འདིའི་ནང་ནས་ལས་ཀ་ཨང་དང་པོ་དེ་བྱུང་བ་རེད། ཡིན་ཡང་ཐབས་སྐྱོ་བ་ཞིག་ལ་ང་ཚོའི་དམངས་གཙོའི་གོ་སྐབས་ལེན་མཁན་དང་དམངས་གཙོའི་གསོལ་རས་ཡག་ཐག་ཆོད་བཞེས་མཁན་གྱི་མི་དེ་ཚོས། གངས་ཅན་སྐྱིད་གཤོངས་ལ་སླེབ་སྐབས། གངས་ཅན་སྐྱིང་གཤོངས་དེ་༧སྐྱབས་མགོན་རིན་པོ་ཆེས་གསུངས་སྟངས་བྱས་ན། སྐུ་དྲག་གསར་པའི་སྤྲོ་ར་ཆགས། སྐྱབས་བཅོལ་བ་ཁ་ཤས་ཤིག་གི་མགོ་ན་སྒྲིག་འཛུགས་ཤིག་ཡོད་པ་འདི། སྟོད་དབུས་གཙང་གི་ཉི་མ་ལྷ་ས་རྒྱལ་ས་ལྷ་ས་མིན་པ་དྲན་པ་བརྗེད། འབངས་མི་སེར་གྱི་མགོ་ལ་ང་གཅིག་ཡིན་མདོག་མདོག་བྱས་ནས་བོར་ཤོར་བཤད་རྒྱུ་མགོ་བཙུགས། དམངས་གཙོའི་གོ་སྐབས་བརྒྱུད་ནས་ཡར་ལ་བསླེབས་པ་དག་ལ་དམངས་གཙོ་དང་འབངས་མི་སེར་གྱི་བདེ་སྡུག་ལག་པར་བཞག་པའི་ཉིན་མོར་དེ་འདྲའི་བསམ་ཚུལ་མ་གཏོགས་མེད་པ་ཡིན་ན། དེ་ངས་དྲན་པས་བཟོད་ཀྱི་མི་འདུག དེ་འདྲའི་དུས་སྐབས་ཤིག་ལ་ང་ཚོ་འདྲ་པོ་ཞིག་མདུན་ལ་ཡར་འཐོན་མ་ཡོང་ན། ངས་དེ་རྩ་བ་ཉིད་ནས་འགྲིག་གི་ཡོད་མ་རེད་བསམ་གྱི་འདུག་དེ་མ་གཏོགས། ངར་ཆབ་སྲིད་ཀྱི་གཤིས་ཀ་མེད། ངའི་མི་ཚེ་འདི་དེབ་འདྲ་པོ་ཞིག་ཀློག་ནས་ཚེ་མཇུག་འདི་བསྐྱལ་ན་བསམ་གྱི་ཡོད། ཡིན་ཡང་དེ་འདྲའི་གནས་སྟངས་འདི་ལ་ངས་འདི་འདྲ་བཤད་རྒྱུ་ངོ་ཚ་གི་འདུག སྔོན་མ་ནས་བཤད་བཞག་པ་དེར་ཡང་བསྐྱར་དེའི་སྒང་ལ་བསྐྱར་ཟློས་བྱས་ནས་ཡང་བཤད། དངོས་གནས་བྱས་ན་ཆབ་སྲིད་པའི་རིགས་རླངས་འཁོར་ནག་པོའི་ཐོག་ལ་གློག་དམར་པོ་བཏགས་ནས་འགྲོ་མཁན་ཚོའི་འཁྲིས་ལ་ང་ཐག་ཉེ་པོར་འགྲོ་རྒྱུ་མ་བདེ་བ་ཞེ་པོ་ཞིག་ ཡོད། ཡིན་ཡང་སྲིད་སྐྱོང་ཟེར་བ་འདི་ངའི་མ་འོངས་པའི་འཛིན་སྐྱོང་ངོས་ནས་ངས་འདི་གང་འདྲ་ཞིག་ལ་ངོས་འཛིན་བྱེད་ཀྱི་རེད་ཟེར་ན། འདི་འཐབ་རྩོད་ཀྱི་ཁ་ཕྱོགས་ལ་ཡོད་པ་ཞིག་དང་བོད་མི་རིགས་དྲན་པ་བརྗེད་མི་ཉན་བ་ཞིག ང་ཚོ་བོད་མི་རིགས་ཀྱི་རྒྱལ་རབས་ལོ་རྒྱུས་ཀྱིས་ཆོས་ལ་གཡུག་མི་ཉན་ཞིག་ལམ་ཁ་དེ་ཕན་མ་ཐོགས་པ་ཡིན་ཡང་། དེའི་ཕྱོགས་ལ་གོམ་པ་རྐང་གཅིག་སྤོ་ཆེད་ངས་སྲིད་སྐྱོང་ལ་ལངས་བ་ཡིན། མཐའ་མཇུག་འདིར་ང་དེ་རིང་འདིར་ངོ་རྒོལ་གྱི་རིམ་པའི་ཐོག་ནས་ལངས་ཀྱི་ཡོད། ཡིན་ཡང་མིའི་རིགས་ཀྱིས་ཧ་གོ་གི་རེད། ང་ཚོའི་ཚང་ལ་ངོ་རྒོལ་གཅིག་པོ་མ་གཏོགས་ནུས་པ་མེད་ན། ང་ཀླུ་མཁར་བྱམས་ལ་ངོ་རྒོལ་རྒྱག་རྒྱུ་མ་གཏོགས་ནུས་པ་མེད་ན། ངས་བོད་ཀྱི་རྒྱལ་རབས་ལོ་རྒྱུས་ཀྱི་རྒྱལ་གཅེས་དཔའ་པོ་རྣམས་པ་ཚད་བཙུགས། ང་དེ་རིང་ཁྱེད་ཚོའི་མདུན་ལ་འཐོན་གྱི་མ་རེད། ང་ཚོར་བསྐྱར་དྲན་གྱི་འཆར་གཞི་ཞིག་དང་རྟོགས་སད་ཀྱི་སྤོབས་པ་ཞིག་ཡོད། ངས་ང་ཚོའི་མི་རབས་གསར་པ་འདིས་ཡར་ལངས་ཐུབ་པའི་ཡིད་ཆེས་ཡོད་ལ་རེ་བ་ཡང་ཡོད། ཅེས་སོགས་བརྗོད་སོང་།

གསར་འགོད་བསྒྲགས་གཏམ་ནང་འཁོད་དོན། བོད་འདི་བཙན་པོའི་སྙིང་སྟོབས་ཀྱིས་རྟག་དུ་བསྐྱངས་ཡོད། དེ་ཡི་ཕྱིར་ན་ང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་ལངས་བ་ཡིན། དེ་ཡང་བོད་རྒྱལ་ཁབ་དར་བའི་ཡང་རྩེར་སོན་སྐབས། སུམ་གཉིས་ས་ཡི་དཀྱིལ་འཁོར་ལ་མངའ་མཛད་པ་དང་། སྨད་རྒྱ་ནག་གི་རྒྱལ་ས་ཁྲང་ཨན་ནས། སྟོད་རྒྱ་གར་གྱི་ཆུ་བོ་གཱང་གྷའི་འགྲམ། ནུབ་ཨ་རབ་ཀྱི་ཨོག་སོ་གཙང་པོའི་ཕ་མཐའ་བར་དུ་འུ་ཚང་གི་རྟ་དམག་གི་རྨིག་པས་བརྫིས་མྱོང་། སྐབས་དེའི་འཛམ་གླིང་ཤར་ནུབ་གཉིས་ཀྱི་འབྲེལ་ཟམ་དུ་གྲགས་པའི་དར་གོས་འགྲུལ་ལམ་རིང་མོ་ཡང་བོད་ཀྱིས་བདག་གིར་བཟུང་སྟེ། བོད་ནི་འཛམ་གླིང་ཤར་ནུབ་ཀྱི་དཔལ་འབྱོར་དང་ཤེས་རིག་གི་ལྟེ་གནས་ཆགས་ཡོད། བོད་ལ་གྱེན་ལོག་གི་སྙིང་སྟོབས་ཡོད། དེ་ཡི་ཕྱིར་ན་ང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་ལངས་བ་ཡིན། དེ་ཡང་མངའ་བདག་བཙན་པོའི་གཞུང་གིས་ཁྲལ་བསྡུ་ཁྲིམས་གནོན་ཚུལ་བཞིན་མ་བྱས་པར། མི་སེར་ལ་གཉའ་གནོན་བཤུ་གཞོག་བཏང་བའི་ཚེ་ན། འབངས་རྒོད་གཡུང་གཉིས་ཀ་མཉམ་རུབ་ཀྱིས་གྱེན་ལོག་བྱས་ཤིང་། རྒྱལ་ལྡན་གཞུང་གི་ཁེངས་དྲེགས་ཀྱི་རལ་བ་གནམ་ནས་ས་ལ་ཕབ་པར་མ་ཟད། ལྷ་བཙན་པོའི་བང་སོ་ཡན་ཆད་བྲུས་ནས་འབངས་འཁོས་ཞན་པ་དག་ལ་བགོ་བཤའ་བརྒྱབས། བོད་མི་རིགས་ལོག་དང་བསྟུན་ནས་སྲིད་འགྱུར་གྱི་གོ་སྐབས་འཛིན་ཐུབ་མཁན་ཞིག་ཡིན། དེ་ཡི་ཕྱིར་ན་ང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་ལངས་པ་ཡིན།

  དེ་ཡང་གསར་བརྗེ་རང་བཞིན་གྱི་དུས་འགྱུར་ནི་མིའི་འཆར་གཞི་ལས་རིང་ནས་བརྒལ་ཡོད་སྟབས། དུས་འགྱུར་དང་བསྟུན་ནས་གོ་སྐབས་འཛིན་ཐུབ་མཁན་ནི་ད་གཟོད་ཆབ་སྲིད་པ་ཡིན། བོད་ཀྱི་ཉེ་རབས་ལོ་རྒྱུས་ཐོག་གཟི་བརྗིད་ལྡན་པའི(རྒྱ་ཕུད)ལས་འགུལ་ཐེངས་འགར་བྱུང་མྱོང་ལ། མན་ཇུ་རྒྱལ་རྒྱུད་མགོ་རྟིང་ལོག་པའི་སྐབས་དང་བསྟུན། རྒྱལ་དབང་བཅུ་གསུམ་པ་ཆེན་པོས་དབུ་ཁྲིད་འོག་བོད་དབུས་ནས་རྒྱ་མི་ཡོད་ཚད་མཐར་བསྐྲད་བཏང་བར་མ་ཟད། བོད་རང་བཙན་གྱི་བསྒྲགས་གཏམ་སྤེལ་བ་སོགས་བཀའ་དྲིན་བསམ་གྱིས་མི་ཁྱབ་པ་བྱུང་། བཙན་གནོན་འོག་གི་མི་རིགས་ཁག་ལ(རླབས་ཆེན་གཙོ་འཛིན)མའོ་ཙེ་ཏུང་ལ་རྒོལ་བ་ནི་ གནམ་རྒན་མའི་ཁ་གཏད་དུ་ལངས་པ་མིན་པ་ཐོག་མར་ཤེས་སུ་འཇུག་མཁན་དེ་བོད་པ་རེད། དེ་ཡི་ཕྱིར་ན་ང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་ལངས་པ་ཡིན།

 དེ་ཡང་དུས་རབས་གོང་མའི་ལོ་རབས ༥༠ པར་རྒྱ་དམར་བཙན་འཛུལ་པས་བོད་ས་ཧམ་བཟུང་བྱས་པའི་མོད་ལ། འ་ཆད་འུ་ཐུག་གི་ཉིན་མོར་བོད་ཆོལ་ཁ་གསུམ་གྱི་ཡུལ་མི་རྣམས་མ་གྲོས་བསམ་པ་གཅིག་མཐུན་ངང་། ཞི་དྲག་གཉིས་ཀྱི་ཐོག་ནས་རྒྱ་མི་བཙན་འཛུལ་བར་ངོ་རྒོལ་བྱས་པ་ཨ་ཅང་ཅང་། བཙན་འཛུལ་བའི་ཁ་བཀོད་འོག་ཆུ་སྣ་གར་ཁྲིད་ཡིན་པའི་བོད་སྡེ་བ་གཞུང་གི་དཔོན་ངན་ཚོར་ཡིད་ཆེས་བློ་འགེལ་མེད་པའི་རྒོལ་གཏམ་སྤེལ་བ་དང་། ཐ་ན་རྒྱ་མིའི་མིག་གི་མཐོང་ས་ནས་ནང་རུལ་བ་ཁག་ཅིག་དམར་གསོད་བཏང་བ་སོགས། སྐད་གྲགས་སྲིད་མཐར་ཆོད་པའི་གསུམ་བཅུའི་སྒེར་ལངས་ཆེན་མོ་དེ་དུས་བྱུང་། བོད་མི་རིགས་ཕོ་ཟད་མོ་ལ་ཐུག་ཀྱང་བཙན་འཛུལ་བར་མགོ་མི་སྒུར་བའི་དུས་ཀྱི་ཅོང་བརྡ་བསྒྲགས་ཡོད། དེ་ཡི་ཕྱིར་ན་ང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་ལངས་པ་ཡིན།

  དེ་ཡང་དུས་རབས་གོང་མའི་ལོ་རབས ༨༠ བ་ནས་བཟུང་། བོད་ཀྱི་མི་རབས་གསར་བ་རྣམས་མི་སེར་སྤེལ་མཁན་ཕྱི་མའི་བསླུ་བྲུད་འོག་མ་ཚུད་པར། ལྷ་ས་ནས་འགོ་བཙུགས་ཏེ་ངོ་རྒོལ་རིམ་པར་བྱུང་བ་དང་། ཉིས་སྟོང་བརྒྱད་ལོར་བོད་ས་ཡོངས་ནས་ཉིན་བརྒྱ་དུས་གཅིག་ལ་རྒྱ་རྒོལ་ལས་འགུལ་བྱུང་ནས་ལོ་རྒྱུས་ཀྱི་དཀྱོགས་མཚམས་གསར་བ་ཞིག་གི་ཡོལ་བ་ཕྱེས། དེ་བས་ཀྱང་སྨྲ་བསམ་བརྗོད་འདས་ཀྱི་དོན་རྐྱེན་ཞིག་ནི། ད་ལྟའི་སྐབས་སུ་བོད་ཕྱི་ནང་གཉིས་ནས་རང་དབང་རང་བཙན་ཆེད་རང་སྲོག་དམར་མོ་མེ་ལ་བསྲེགས་ཐུབ་མཁན་རྒྱལ་གཅེས་དཔའ་བོ་དཔའ་མོ་ཞལ་གྲངས་བརྒྱ་དང་ལྔ་བཅུའི་ཁར་སླེབས་གྲབས་ཡོད། བོད་མི་རིགས་འདི་བཞིན་འཚོ་གནས་ཐད་གཞན་ལ་བརྟེན་མ་དགོས་པར་རང་མགོ་ཐོན་མཁན་ཞིག་ཡིན། དེ་ཡི་ཕྱིར་ན་ང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་ལངས་པ་ཡིན། དེ་ཡང་བོད་གཞིས་བྱེས་གཉིས་བཙན་དབང་གིས་ཁ་གྱེས་དགོས་བྱུང་ཡང་། མི་ཐོག་རྒན་པ་རྣམས་ཀྱིས་དཀའ་སྤྱད་འབད་བརྩོན་གནང་བར་བརྟེན། ད་ལྟའི་སྐབས་སུ་རྒྱ་བལ་འབྲུག་གསུམ་གཙོས་མི་ཡུལ་ལུང་བར་གཞིས་སྡོད་བྱེད་མཁན་རྣམས། ཁྱོན་ཡོངས་ནས་བཤད་ན་ཡུལ་དུས་གནས་བབ་དང་བསྟུན་ནས་འཚོ་གནས་ཐོག་འགྲིག་བསྡད་ཡོད་པའི་ཁར། གཞོན་སྐྱེས་རྣམས་རང་གི་ཤེས་འཇོན་ལ་དཔག་པའི་ས་གནས་ཡུལ་མི་དང་དཔུང་བ་མཉམ་གཤིབས་བྱས་ནས་འགྲོ་ཐུབ་ཀྱིན་ཡོད། ཅེས་དང་།

བསྒྲགས་གཏམ་ནང་མུ་མཐུད་འཁོད་དོན། འདི་གར་མིག་མདུན་ཙམ་ལས་སྲིད་དོན་བསྐྱར་ཞིབ་ཀྱི་འཆར་སྒོ་འགག་ཡོད། དེ་ཡི་ཕྱིར་ན་ང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་ལངས་པ་ཡིན། དེ་ཡང་ང་ཚོ་རྒྱལ་ཤོར་དམངས་སྡུག་གི་གནས་སྟངས་འོག་ནས་ཡར་ལངས་དགོས་ན། ཚོང་བ་རྒྱགས་པ་ཞིག་གི་དངུལ་ཁུག་ནང་ནས་ལངས་ཐུབ་པར་ང་ལ་ཡིད་ཆེས་མེད། རི་ཁྲོད་སྒོམ་ཆེན་ཞིག་གི་ཉམས་མགུར་ཀློང་ནས་ལངས་ཐུབ་པར་ང་ལ་ཡིད་ཆེས་མེད། དེ་བཞིན་ནུབ་ལུགས་སློབ་ཆེན་ཞིག་གི་ལག་འཁྱེར་ཡོད་ན་འགྲིག་འགྲོ་བ་ཞིག་དེ་བས་ མིན། གཙོ་བོ་མི་རིགས་རང་ཉིད་ཀྱི་ཤེས་རིག་སྙིང་སྟོབས་དང་། ཐུ་བྷོད་བཙན་པོའི་བླ་སྲོག་སྙིང་ལ་བཅིངས་ནས་སྲིད་དོན་བསྐྱར་ཞིབ་ཡང་དག་པ་ཞིག་མ་གནང་མཐུ་མིན་ལ་ཐུག་ཡོད། དེ་མ་གཏོགས་ཤེས་རིག་གི་གཞན་བརྟེན་བསམ་བློ་འཇགས་ནས། བྱ་བ་ཐམས་ཅད་གཞན་གྱི་ལད་མོ་རྐྱང་བྱས་བསྡད་པ་ཡིན་ན། ང་ཚོར་ཡར་ལངས་ཀྱི་གོ་སྐབས་ནམ་ཡང་མེད་ལ། ལངས་ཐུབ་པའི་དབང་དུ་བཏང་ཡང་དེ་ནི་བོད་ལ་འཚམས་པའི་བོད་ཞིག་བསྐྲུན་ཆེད་མིན་པ་ངས་ཁ་ཚོན་གཅོད་ཐུབ།

 འདི་གར་ཤོག་ཁག་འཐེན་འཁྱེར་ནང་གཞུང་སྲིད་བར་གནས་ཐུབ་ཀྱིན་མེད། དེ་ཡི་ཕྱིར་ན་ང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་ལངས་པ་ཡིན། དེ་ཡང་བོད་པ་བཙན་བྱོལ་བ་ཚོའང་མི་སྡེ་སྤྱི་ཚོགས་ཀྱི་གྲུབ་ཆ་ཡིན་པའི་ཆ་ནས། དེ་ལ་འབབ་པའི་ཕྱོགས་སྒྲིག་འཐེན་འཁྱེར་གང་འཚམས་རེ་ཡོད་ངེས་ཡིན་མོད། ཆེ་ས་ནས་དབུས་བོད་མིའི་སྒྲིག་འཛུགས་འདི་བཞིན་སྤྱི་ཚོགས་རིང་ལུགས་དང་མ་རྩ་རིང་ལུགས་ལ་སོགས་པའི་ཕྱོགས་སྒྲིག་འགྲན་རྩོད་ནང་བར་གནས་མ་ཐུབ་ཀྱང་། ནང་ཁུལ་གྱི་རྩོད་རྙོག་ཆུང་ཙག་ལ་ཐུག་སྐབས་དྲང་སྙོམ་བར་གནས་ཀྱི་ཁྲིམས་ས་ཞིག་གི་གོ་བབ་འཛིན་རྒྱུའི་ཚབ་ལ། རང་ཉིད་རྙོག་གྲ་གང་ཞིག་བསྐྱེད་མཁན་དུ་བསྒྱུར་ནས་རྐྱེན་ཆུང་རྩ་ཆེ་བཟོ་བཞིན་ཡོད་ལ། དེ་སྔར་ཆུ་སྒང་གསར་རྙིང་གཉིས་དང་། དོལ་རྒྱལ་དང་འབྲེལ་ནས་ཁ་དང་ཁ་སྤུ་ཁ་ཁ་བྱས་པ། ཉེ་ཆར་ཉིའུ་ཡོག་ནས་བོད་རིགས་སྤྱི་མཐུན་ཚོགས་པ་གཙོས་གསུམ་བཅུའི་དུས་དྲན་གོ་སྒྲིག་བྱེད་མཁན་ཚོས། བོད་རང་བཙན་གྱི་འབོད་ཚིག་ཁྱེར་ནས་མི་མང་མཉམ་དུ་ཡོང་ན་ཉེན་རྟོག་པར་རྩིས་སྤྲོད་དགོས་ལུགས་ཀྱི་རྩོད་རྙོག་བྱུང་རྗེས། དབུས་བོད་མིའི་སྒྲིག་འཛུགས་བར་གནས་མ་ཐུབ་པར་རྔ་མ་གང་གི་ཕྱོགས་སུ་འཁྱོག་ཡོད་པ་གསལ་བོ་རེད།

 འདི་གར་བྲན་གཡོག་གཤིས་སྤྱོད་ཀྱིས་ཡོད་ཚད་རྩ་མེད་བཟོ་ངེས་ཡིན། དེ་ཡི་ཕྱིར་ན་ང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་ལངས་པ་ཡིན། ཆབ་སྲིད་ཀྱི་ཐད་ནས་བོད་ནང་རྒྱ་དམར་གཞུང་གི་འགོ་ཁྲིད་མེད་ན། བོད་ལྟ་བུའི་ཀླ་ཀློ་དང་རྗེས་ལུས་ཀྱི་མི་རིགས་ཤིག་ལ་ཡར་རྒྱས་ཀྱི་མདུན་ལམ་མེད་སྐོར་བཤད་ཀྱིན་ཡོད་ལ། བཙན་བྱོལ་ནང་དུ་དེ་ལ་རམ་འདེགས་ཀྱི་ཚུལ་དུ་རྒྱ་གཞུང་སྟོབས་ཆེན་ཡིན་སྟབས་བོད་རང་བཙན་ལ་རེ་བ་མེད་སྐོར་དང་། རྒྱ་ནག་ཡར་རྒྱས་འགྲོ་བཞིན་ཡོད་སྟབས་བོད་རྒྱ་འོག་ནས་བསྡད་ན་ཁེ་བཟང་ཆེ་ཚུལ་བཤད་པ་བཅས་ནི་ཆབ་སྲིད་ཐོག་གི་བྲན་གཤིས་རྣལ་མ་དེ་ཡིན་པ་མ་ཟད། བཙན་བྱོལ་ནང་སྤྱི་སྒེར་གང་རུང་གི་འགོ་བྱེད་ཚོས་དེ་ལས་གཞན་གྱི་བྲན་གཤིས་ལྷག་མ་ཞིག་སྤེལ་བཞིན་པ་ནི། བཟང་སྤྱོད་དང་དམ་ཚིག་ཁ་ལ་ཁུར་ནས་མ་རབས་ག་ཚོད་འཁྲབ་ཡང་། སྤྱི་ཚོགས་ཀྱིས་དེ་དག་ངོ་མ་ཤེས་པ་མ་ཡིན་པར་ཤེས་བཞིན་སྣང་མེད་འཇོག་གི་ཡོད་སྟབས། བྲན་གཤིས་འདིར་དག་ཐེར་གཙང་ཕྱགས་མ་ཐུབ་ཕྱིན་བོད་མི་རིགས་དུས་གཏན་དུ་མགོ་འདེགས་མི་ཐུབ།

འདི་གར་དད་པ་ལོག་པར་བེད་སྤྱོད་ཀྱིས་བཙན་བྱོལ་སྤྱི་ཚོགས་ཟང་ཟིང་བཟོས་ཡོད། དེ་ཡི་ཕྱིར་ན་ང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་ལངས་པ་ཡིན། དེ་ཡང་མི་སྡེ་སྤྱི་ཚོགས་ཀྱི་དཔལ་ཡོན་ཡར་རྒྱས་ཕྱིན་པ་དང་ཆབས་ཅིག ཆོས་ལུགས་འཐེན་འཁྱེར་དང་། དད་པར་རྗེས་འབྲེལ་གྱི་དཀའ་ངལ་ཉུང་དུ་འགྲོ་བར་མི་རྣམས་ཀྱིས་རེ་བ་བྱེད་བཞིན་ཡོད་མོད། དུས་རབས་ཉེར་གཅིག་པ་འགོ་བཙུགས་པ་ནས་ཆོས་ལུགས་ཁ་ལ་ཁྱེར་བའི་འཐེན་འཁྱེར་ཇེ་ཆེར་འགྲོ་བཞིན་ཡོད་ལ། ང་ཚོ་བཙན་བྱོལ་སྤྱི་ཚོགས་ནང་དུའང་ལྷ་འདྲེ་རྩོད་གཞིའི་རྐྱེན་པས་མི་གསོད་ཁྲག་སྦྱོར་གྱི་བྱ་ངན་དངོས་སུ་རྩོམ་མྱོང་ཁར། ལོ་འདི་དག་ནང་དོལ་རྒྱལ་བརྟེན་མཁན་དང་དེར་ཁ་གཏད་གཅོག་མཁན་ཡིན་ཟེར་མཁན་མང་བོ་ཞིག་གིས་ནང་ཁྲོལ་ཕྱི་ལ་བསྟན་ནས། འཁྲབ་སྟོན་ཡ་ང་བ་ཞིག་གི་འགོ་དངོས་སུ་བཙུགས་ཟིན་ལ། ངན་ཤུགས་འདི་དག་བོད་ནང་དུའང་རིམ་བཞིན་ཁྱབ་བརྡལ་ལ་འགྲོ་བཞིན་ཡོད། གནས་སྐབས་འདི་འདྲར་སྲིད་གཞུང་ཞིག་གིས་ལྷ་འདྲེར་རང་སྣང་གིས་དག་ཐེར་བྱ་རྒྱུ་གཙོ་བོ་མ་ཡིན་པར། བབ་བརླིང་བརྟན་གསུམ་ཀྱི་སྒོ་ནས་དད་པ་ལོག་པར་བེད་སྤྱོད་བྱེད་མཁན་ཚོར་ཚོད་འཛིན་མ་ཐུབ་ཕྱིན། སྤྱི་ཚོགས་ཀྱི་གཞི་མཐུན་རྨང་ནས་འཐོར་ཉེན་ཡོད། ཅེས་སོགས་བཀོད་འདུག

   མཇུག་ཏུ་གསར་འགོད་པས་ཀླུ་མཁར་བྱམས་ལགས་སུ་ཁྱེད་ཀྱིས་རང་བཙན་འཐབ་རྩོད་པ་ཞིག་ཡིན་པ་མ་ཟད། ཁྱེད་ཀྱི་གཏམ་བཤད་ནང་རང་བཙན་ནི་འཐབ་རྩོད་ཀྱི་ངོ་བོ་གཙོ་བོ་དེ་ཆགས་ཡོད་སྐོར་བརྗོད་སོང་ཀྱང་། ད་ལྟ་ང་ཚོའི་གཞུང་འབངས་གཉིས་ཀྱིས་དབུ་མའི་ལམ་གྱི་སྲིད་བྱུས་ལག་བསྟར་བྱས་ནས་འགྲོ་གི་ཡོད་སྟབས། ཁྱེད་ཀྱིས་ལོ་གཅིག་གཉིས་ནང་ལངས་ཕྱོགས་དེ་གཉིས་ཀྱི་བར་ཐག་གསལ་ཐུབ་ཀྱི་རེད་བསམ་གྱི་འདུག་ཅེས་དྲིས་པར་ཁོང་གིས། སྤྱིར་བཏང་བཙན་བྱོལ་བོད་གཞུང་འདི་ངོ་བོ་གཉིས་རེད། ཁོ་རང་གི་ཨ་མ་དེ་རྒྱལ་ཁབ་ཤོར་ཟིན་པའི་བུ་མོ་ཞིག་བཙན་བྱོལ་བ་བསླེབས་ཡོད་སྟབས། ལྷ་རབས་བྱུང་ན་འདིའི་དམིགས་ཡུལ་དེ་བསྐྱར་གསོ་བྱེད་དགོས། དེ་བཞིན་ཁོའི་དོན་དག་གཉིས་པ་དེ་འདིར་ང་ཚོ་བོད་ཀྱི་ཡུལ་མི་འབུམ་གཅིག་ལྷག་ཡོད་སྟབས་འདིའི་རྟོག་ཞིབ་ཀྱི་གནད་དོན་དེ་ཡང་འགན་ཁུར་དགོས་པར་བརྟེན། ངའི་བསམ་པར་ང་དང་ངའི་འཛིན་སྐྱོང་ཡར་སླེབ་པ་ནས་བཟུང་སྟེ། བཀའ་བློན་དང་ལས་བྱེད་ཡོངས་རྫོགས་ཀྱིས་བསྟན་འཛིན་བརྩོན་འགྲུས་ནང་བཞིན་གྱིས་མགོ་ལ་རས་དམར་པོ་དཀྲིས་ཏེ་ལྟོ་ཕད་འཁུར་ནས་ཆ་ཚང་གིས་བོད་རང་བཙན་འཐབ་རྩོད་བྱེད་བར་རྒྱུག་དགོས་ཟེར་བའི་གནས་སྟངས་ཆགས་ཀྱི་མ་རེད་བསམ་གྱི་འདུག དེ་ཡིན་དུས་དབུ་མའི་ལམ་ཁ་ལ་འཁྱེར་ནས་བོད་ཀྱི་རྒྱལ་རབས་ལོ་རྒྱུས་ནག་བསུབ་གཏོང་གི་ཡིན་ན། དེ་ང་ཚོས་བྱེད་བཅུག་གི་མ་རེད། གཞུང་གི་དབུ་མའི་ལམ་གྱི་སྲིད་བྱུས་ཀྱི་རྨང་གཞི་དེ་རྒྱ་མི་དང་མཉམ་དུ་གྲོས་མོལ་བྱ་རྒྱུ་ཡིན་ཟེར་གྱི་ཡོད་པ་རེད། རྒྱ་མི་དང་མཉམ་དུ་གྲོས་མོལ་བྱ་བར་སོ་སོ་སྒེར་ལ་གདེང་ཚོད་གང་འདྲ་ཞིག་འདུག རྒྱ་མི་ལ་གྲོས་མོལ་བྱས་ནས་ད་བར་གྱོང་ག་ཚོད་རག་འདུག ང་ཚོས་ལོ་རྒྱུས་ཀྱི་ཐོག་ནས་སྟོབས་ཤུགས་འདྲ་མཉམ་མེད་པའི་གཞུང་ཕན་ཚུན་གྲོས་མོལ་བྱེད་ཕྱོགས་ལ་བལྟས་ན། སྔོན་མ་ཧྥ་རན་སིས་འཇར་མན་ལ་གྲོས་མོལ་བྱས་ནས་ག་རེ་རག་འདུག རྒྱ་གར་གྱིས་དབྱིན་ཇིར་གྲོས་མོལ་བྱས་ནས་གྱོང་ག་རེ་རག་འདུག བོད་པར་ཡཱང་ཧ་སེ་བྷན་ཌི་ཡིས་དམག་བརྒྱབ་སྟེ་གྱོང་ག་རེ་རག་འདུག ངས་བོད་རྒྱལ་ཞི་མོལ་ལ་རྣམ་གྲངས་ཁ་ཤས་ཤིག་དབྱེ་དགོས་ཀྱི་རེད་བསམ་གྱི་འདུག རྒྱ་ནག་གཞུང་དང་ང་ཚོས་གྲོས་མོལ་བྱས་ཏེ་དེས་ཕན་ཐོགས་ཀྱི་ཡོད་ན། དེ་བྱེད་རྒྱུ་ཡོད་མ་རེད་བརྒྱ་ཆ་བརྒྱ་ཐམ་པ་ལབ་རྒྱུ་ཡོད་མ་རེད་བསམ་གྱི་འདུག ཡིན་ཡང་གྲོས་མོལ་གང་གཅིག་ཡིན་ཡང་བོད་མི་རིགས་ཀྱི་ཆེ་མཐོང་དང་སྤོབས་པ། སོ་སོའི་བླ་མ་བཙོང་བ་གཞིར་བཞག་པའི་ཐོག་ནས་ང་ཚོས་བྱེད་དགོས་པ་དེ་ཧ་ཅང་གལ་ཆེན་པོ་རེད་བསམ་གྱི་འདུག ངའི་ངོས་ནས་ག་རེ་བྱེད་ཀྱི་ཡིན་ལབ་ན། བཙན་བྱོལ་བོད་གཞུང་གི་ལམ་དབུ་མའི་སྲིད་བྱུས་དེ་དང་། ད་ལྟ་རང་བཙན་རྩོད་ཀྱི་མིན་ཟེར་བ་དེ་ཚོ་ཁ་ཡོད་ལག་ཡོད་ཀྱིས་འགྲོ་གི་མེད་ན། གཞུང་གི་ངོས་ནས་གྲོས་ཚོགས་ལ་ཁྲིམས་འཆར་ཕུལ་ནས་ངས་བོད་རྒྱ་ཞི་མོལ་ཡོང་ཐུབ་ཀྱི་མི་འདུག རྒྱ་ནག་གི་གནས་སྟངས་འདི་འདྲ་རེད་ཟེར་ན་གྲོས་ཚོགས་ངོས་ནས་དགོངས་པ་བཞེས་ཀྱི་རེད་བསམ་གྱི་འདུག གྲོས་ཚོགས་ནང་ནས་དགོངས་པ་བཞེས་མི་དགོས་པའི་སྔོན་ལ་དབུ་མའི་ལམ་དང་འབྲེལ་བའི་བཙན་བྱོལ་སྤྱི་ཚོགས་ཀྱིས་བྱེད་མི་དགོས་པ་མང་པོ་ཞིག་བྱེད་བསྡད་ཡོད་པ་རེད། ལྷག་པར་དུ་འབུམ་མང་པོ་ཞིག་སོ་སོའི་མི་རིགས་ནང་ལ་དབུ་མའི་ལམ་ཁྱབ་བསྒྲགས་དང་། གཞིས་ཆགས་ཁག་གི་སྤོ་བོ་རྨོ་རྨོ་ཚོ་སྡོད་མ་བཅུག་པ་མ་ཟད། སློབ་གྲྭ་ཁག་ཏུ་འགྲོ་ནས་ཕྲུག་གུ་ཆུང་ཆུང་འཛིན་རིམ་བཅུ་གཉིས་འོག་ཡན་ཆད་ལ་དབུ་མའི་ལམ་སྐོར་བཤད་བསྡད་པ་དེས། ངས་དེས་ག་རེ་ཕན་གྱི་ཡོད་མེད་ཧ་གོ་གི་མེད་སྟབས། ངའི་གཞུང་གིས་དེ་ལ་འགྲོ་སོང་གཏོང་བ་ལས་རྒན་གསོ་ཁང་ལ་གསང་སྤྱོད་རྒྱག་རྒྱུ་དང་ཕྲུག་གུ་ཚོར་ཉིན་རྟག་པར་ལྡ་ལི་སྤྲོད་མི་དགོས་པ་བྱས་ཏེ། ལྟོ་ཆས་སྒང་ལ་གཏོང་གི་ཡིན། དེ་ཡིན་དུས་ངས་མ་འོངས་པར་དབུ་མའི་ལམ་སྒང་ལ་འགྲོ་སོང་འཕྲོག་བརླག་གཏོང་གི་མིན་ཟེར་གསལ་པོ་བྱས་ནས་ཞུ་རྒྱུ་ཡིན། ཞེས་བརྗོད་སོང་།

གསར་འགོད་པ་ཞིག་གིས་ཁོང་ལ་བཙན་བྱོལ་བོད་གཞུང་དབུ་མའི་ལམ་ཐོག་བསྐྱོད་ནས་ལོ་མང་པོ་ཞིག་ཕྱིན་ཡོད་སྟབས། དེ་རིང་ཁྱེད་རང་འཐབ་རྩོད་པ་ཞིག་སྲིད་སྐྱོང་ལ་ལངས་ཡོང་དུས་མི་མང་པོ་ཞིག་གིས་ ཧ་ལམ་རང་བཙན་འཐབ་རྩོད་པ་ཞིག་སྲིད་སྐྱོང་གི་ལས་གནས་ཐོག་ལངས་ས་རྩ་བ་ནས་ཡོད་མ་རེད་བསམ་པའི་ཚོར་བ་ཞིག་ཡོད་ཀྱང་། ཁྱེད་རང་སྲིད་སྐྱོང་ལ་ལངས་ཡོད་པ་མ་ཟད། མ་འོངས་པར་སྲིད་སྐྱོང་གི་ལས་གནས་ཐོབ་པ་ཡིན་ན། རྒྱ་ནག་གཞུང་ལ་སྤྲོད་རྒྱུའི་བརྡ་ལན་དང་པོ་དེ་ག་རེ་རེད་བསམ་གྱི་འདུག་དྲིས་པར། ཁོང་གིས། ང་རང་བཙན་འཐབ་རྩོད་པ་ཞིག་སྲིད་སྐྱོང་ལ་ཐོབ་པ་ཙམ་གྱིས་རྒྱ་ནག་གཞུང་ལ་ལན་འཕྲོད་པ་རེད་བསམ་གྱི་འདུག ཡིན་ཡང་ང་ཚོར་ལན་དེ་འཕྲོད་རྒྱུའི་བསྐལ་བ་བཟང་པོ་དེ་འདྲ་ཡོད་མེད་རྒྱ་ཆེའི་མི་མང་གི་སྙིང་སྟོབས་ལ་བལྟ་རྒྱུ་མ་ཟད། ངས་རྒྱ་ཆེའི་མི་མང་ལ་རེ་བ་ཡང་རྒྱག་གི་ཡིན། ང་སྲིད་སྐྱོང་ལ་ཐོབ་པའི་ཉིན་མ་དང་པོ་དེ། ད་ལྟའི་སྲིད་སྐྱོང་བློ་བཟང་སེང་གེ་སྲིད་སྐྱོང་ལ་ཕེབས་པ་ནས་བཟུང་སྟེ། རླངས་འཁོར་སྒང་ལ་གློག་དམར་པོ་འབར་བའི་གནས་སྟངས་ཤིག་ཡོད་སྟབས། ངས་རླངས་འཁོར་དེའི་ནང་སྡོད་ཀྱི་མིན་ལ་གློག་དམར་པོ་དེ་ཡང་མི་དགོས། ང་སྲིད་སྐྱོང་ལ་འཐོབ་པ་ཡིན་ན། ང་དབུས་བོད་མིའི་སྒྲིག་འཛུགས་ཀྱི་འོག་ལ་འཛུལ་རྒྱུ་དེ་ང་ངོ་ཚ་རེད། དེ་ངའི་ངོ་ཚ་མ་རེད་བོད་རྒྱལ་ཁབ་ཀྱི་ངོ་ཚ་ཡིན་སྟབས། ངའི་ལས་ཀ་དང་པོ་དེ་དབུས་བོད་མིའི་སྒྲིག་འཛུགས་དེ། ཡང་བསྐྱར་བཙན་བྱོལ་བོད་གཞུང་ལ་བསྒྱུར་རྒྱུའི་འབད་བརྩོན་བྱེད་ཀྱི་ཡིན། རྒྱ་དཀར་གཞུང་གི་གནོན་ཤུགས་ཡོད་ཀྱང་། གནོན་ཤུགས་དེ་ཆ་ཚང་འཁྱེར་གྱི་ཡིན། མཐའ་མཇུག་ང་ཀླུ་མཁར་བྱམས་སྲིད་སྐྱོང་གི་མིང་ཐོག་ནས་ངའི་མགོ་རྒྱ་གར་གྱི་ཁྲིམས་ཁང་ལ་བཞག་དགོས་འབྱུང་ཡང་བཞག་གི་ཡིན། བོད་མི་རིགས་ཀྱི་སེམས་ཤུགས་ལ་རྩེད་མོ་རྩེད་ཀྱི་མིན། བོད་མི་རིགས་ཀྱི་རྒྱལ་རབས་ལོ་རྒྱུས་འདི་ཚོང་པ་རྒྱགས་པའི་སྦ་ཁུག་བརྒྱང་རྒྱུ་མ་རེད། ཅེས་བརྗོད་སོང་།

གསར་འགོད་པས་ཀླུ་མཁར་བྱམས་ལགས་སུ་ཁྱེད་རང་བོད་རང་བཙན་རྩོད་ལེན་བྱེད་མཁན་ཞིག་ཡིན་པ་མ་ཟད། ལྟ་བ་ཧ་ཅང་གིས་མཁྲེགས་པོ་ཞིག་ཡིན་སྟབས། ཁྱེད་རང་སྲིད་སྐྱོང་ལ་ལངས་བ་ཡིན་ན་རྒྱལ་ཁ་འཐོབ་ཀྱི་རེད་བསམ་གྱི་འདུག་ཅེས་དྲིས་པར། ཁོང་གིས། ང་འཐོབ་རྒྱུའི་གདེང་ཚོད་གང་ལ་གང་འཚམ་ཡོད། ཡིན་ཡང་ངར་མ་འཐོབ་པ་ཡིན་ཡང་གྱོང་མེད། ངར་འཐོབ་དགོས་རྒྱུའི་དུས་ལ་བསླེབས་ཡོད། གང་ཡིན་ཟེར་ན། སྒང་ལ་སྡོད་མཁན་ཚོར་ཚད་དང་ངོ་ཚ་རྒྱུ་མེད་ན། འོག་ན་སྡོད་མཁན་གྱི་མི་མང་ཚོར་འུ་ཐུག་རྒྱུ་ཡོད་པ་རེད། ངའི་བསམ་པར་བྱས་ན་རྒྱ་ཆེའི་མི་མང་འུ་ཐུག་ཡོད་བསམ་གྱི་ཡོད། ང་འུ་ཐུག་མཁན་ནང་གི་གཅིག་ཡིན་སྟབས། ངས་བསམ་པར་ད་རེས་འུ་ཐུག་མཁན་གྱི་མི་མང་འདིས། བོད་རྒྱ་ཞི་མོལ་ལ་བསྒུག་བསྡད་ཡོད་པ་མ་ཟད། ༧རྒྱལ་བ་རིན་པོ་ཆེ་བོད་ལ་ཕེབས་ཐུབ་རྒྱུ་བསྒུག་བསྡད་ཡོད་པ། ༡༤༠ ལྷག་གིས་རང་ལུས་མེར་བསྲེགས་གནང་སོང་ཟེར་ནས་གྲངས་ཀ་བརྩིས་བསྡད་པ་ཙམ་མིན་པར། ཕུགས་བསམ་དང་རེ་བ་ཆ་ཚང་གསལ་ནས་བོད་ནས་འདིར་སླེབ་མཁན་ཚོ་བོད་ལ་གཅིག་པོ་འགྲོ་ཐུབ་ན་སྙམ་ནས་སྡོད་བཞིན་ཡོད་པའི་སྐབས་འདིར། འདིའི་རྒྱབ་ལ་ངས་ཏན་ཏན་གཅིག་ཡོད་རེད་བསམ་གྱི་འདུག་སྟབས། ངར་འཐོབ་མིན་མ་ཤེས་ཀྱང་འཐོབ་དགོས་པའི་དུས་ལ་སླེབ་ཡོད་རེད་བསམ་གྱི་འདུག ཅེས་བརྗོད་སོང་།

གསར་འགོད་པ་གཞན་ཞིག་གིས་བོད་མིའི་མགོན་སྐྱབས་༧གོང་ས་མཆོག་ཆགས་ཡོད་སྟབས། བར་ལམ་ཞིག་ནས་ཀླུ་མཁར་བྱམས་ཀྱི་གཏམ་བཤད་ལ་སོགས་པའི་རྐྱེན་བྱས་ཏེ་ནག་ཐིག་འདྲ་པོ་ག་རེ་ཆགས་ཡོད་རེད་ལབ་ན། ཀླུ་མཁར་བྱམས་ནི་༧གོང་ས་མཆོག་ལ་མཚན་སྨད་ཞུ་མཁན་ཞིག་དང་བཀའ་དགོངས་ལ་མ་བརྩི་མཁན་ཞིག་ཡིན་པའི་སྐད་ཞ་ཞིག་ཡོང་གི་ཡོད་སྟབས། གསལ་བཤད་ཅིག་གནང་རོགས་ཞེས་ཞུས་པས། ཁོང་གིས། ངས་༧གོང་ས་མཆོག་ལ་མཚན་སྨད་ཞུ་གི་འདུག དམའ་འབེབས་བྱས་བཞག རྩོམ་ཡིག་ཉག་གེ་ཉོག་གེ་བྲིས་བཞག་ཟེར་བ་སོགས་བཙན་བྱོལ་སྤྱི་ཚོགས་ནང་ལ་སྒྲུང་མང་པོ་ཞིག་བཟོ་གི་ཡོད་པ་རེད། ངས་ང་རང་གིས་དེ་འདྲ་གཅིག་ཡིན་པར་ངོས་འཛིན་བྱེད་ཀྱི་མེད་ཀྱང་། རྒྱ་ཆེའི་མི་མང་ཟེར་ནའང་འདྲ་དེ་འདྲས་ལབ་མཁན་ཚོས་དེ་འདྲ་མཐོང་བ་ཡིན་ན། དེ་ཁོ་ཚོར་ལབ་རྒྱུའི་ཐོབ་ཐང་ཡོད་ཀྱི་རེད། ཡིན་ཡང་ངས་༧རྒྱལ་བ་རིན་པོ་ཆེར་མཚན་སྨད་ཞུ་མཁན་གྱི་དགྲ་གྲོགས་ཀྱི་དབྱེ་བ་མ་ཆོད་མཁན་གྱི་མི་སྐོར་ཞིག་མཐོང་བསྡད་ཀྱི་འདུག་ལ། ངས་ང་ཚོའི་བཙན་བྱོལ་སྤྱི་ཚོགས་ནང་༧རྒྱལ་བ་རིན་པོ་ཆེའི་བཀའ་བེད་སྤྱོད་ལོག་པ་གཏོང་མཁན་དང་པེ་ཅིང་དང་ལག་སྦྲེལ་བྱེད་མཁན་དེ་འདྲ་མང་པོ་ཡོད་པ་མཐོང་གི་འདུག་སྟབས། མི་སྐོར་ཞིག་གིས་ང་༧རྒྱལ་བ་རིན་པོ་ཆེའི་བཀའ་དགོངས་ལ་འགྲེལ་བཤད་ལོག་པ་རྒྱག་མཁན་ཡིན་པ་མཐོང་ཆོག་གི་རེད་ཀྱང་། ང་རང་ངོས་ནས་ང་༧རྒྱལ་བ་རིན་པོ་ཆེའི་བཀའ་དགོངས་ལ་ལོག་འགྲེལ་དང་ལོག་ལྟ། མཐོང་ཆུང་བྱེད་མཁན་དེ་འདྲ་ཡིན་པར་ངོས་འཛིན་བྱེད་ཀྱི་མེད་ལ་མཐོང་གི་ཡང་མེད། ཡིན་ཡང་༧གོང་ས་མཆོག་གིས་དམངས་གཙོ་གསོལ་རས་གནང་བ་དང་། ང་རང་བཙན་འཐབ་རྩོད་པ་ཞིག་ཡིན་པ། ༧སྐྱབས་མགོན་རིན་པོ་ཆེ་ལ་ལམ་དབུ་མའི་དགོངས་གཞི་ཡོད་པ་དེའི་འོག་ནས། ངས་དྲང་བདེན་དང་ཡང་དག་པའི་ལྟ་ཕྱོགས་ཤིག་བཟུང་སྟེ། ༧གོང་ས་མཆོག་གི་དགོངས་གཞི་དེ་འགྲིག་གི་མ་རེད་ཟེར་ནས་ངས་བཤད་ཀྱི་ཡོད། དེ་༧རྒྱལ་བ་རིན་པོ་ཆེར་མཚན་སྨད་ཞུས་པ་རེད་ཟེར་ན། ང་རང་གིས་གོ་བ་དེ་ལེན་གྱི་མེད། ངས་༧རྒྱལ་བ་རིན་པོ་ཆེ་ཡིན་དང་ཡིན། བོད་མི་ཆ་ཚང་ལ་གུས་ཞབས་ཞུ་གི་ཡོད། ཅེས་བརྗོད་སོང་།