པཱ་ཀི་སི་ཐན་གྱི་གྲོང་གསེབ་ཁག་ཏུ་འཇིགས་སྐུལ་བས་བྱིས་པ་མང་པོ་བཙན་འཁྲིད་བྱས་ཏེ་ཆགས་སྲེད་དང་འབྲེལ་བའི་གནོད་འཚེ་གཏོང་བཞིན་ཡོད་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། པན་ཇབ་ (Punjab) མངའ་སྡེའི་བློན་ཆེན་ཤཱ་ཧ་བྷ་ཛི་ཤཱ་རེ་ཧྥི་ (Shahbaz Sharif) ལགས་ཀྱིས་ཁྲིམས་རྩོད་པ་ཞིག་ལ། པཱ་ཀི་སི་ཐན་གྱི་གྲོང་ཁྱེར་ཀ་སུར་ (Kasur) ཞེས་པའི་ཉེ་འགྲམ་གྱི་གྲོང་གསེབ་ཅིག་ཏུ་ད་ལྟའི་བར་ཁ་ཆེ་འཇིགས་སྐུལ་བས་བྱིས་པ་ ༡༠༠ ལྷག་དངུལ་དངོས་ཀྱི་གཏམ་མར་བཟུང་སྟེ། ཁོ་ཚོར་ལྟ་བས་མི་བཟོད་པའི་ཆགས་སྲེད་ཀྱི་གནོད་འཚེ་གཏོང་བཞིན་ཡོད་པ་གཟུགས་མཐོང་བརྙན་པར་དུ་བླངས་ནས། བྱིས་པ་དེ་དག་གི་ཕ་མ་ཚོར་འཇིགས་སྐུལ་གཏོང་གི་ཡོད་སྟབས། ད་ལྟའི་བར་པཱ་ཀི་སི་ཐན་གཞུང་གིས་ཉུང་མཐར་འཇིགས་སྐུལ་བ་ ༢༥ འཛིན་བཟུང་བྱས་ཡོད་འདུག
པཱ་ཀི་སི་ཐན་ནང་གི་བྷི་བྷི་སི་གསར་ཁང་གི་དཔྱད་ཞིབ་པ་ཨལ་ཡ་སི་ཁན་ (Ilyas Khan) ཟེར་བ་ཞིག་གིས། ཉེ་བའི་ལོ་ངོ་འདི་དག་རིང་པཱ་ཀི་སི་ཐན་ནང་དང་ལྷག་པར་དུ་གྲོང་གསེབ་ཁག་ཏུ་ན་ཆུང་བྱིས་པ་ཚོར་ཆགས་སྲེད་ཀྱི་གནོད་འཚེ་གཏོང་བ་ཧ་ཅང་ཚབས་ཆེ་ཞིང་། ཕྱི་ལོ་ ༢༠༡༤ ལོར་བྱིས་པ་ ༣༥༠༠ ཡས་མས་ཤིག་ལ་ཆགས་སྲེད་དང་འབྲེལ་བའི་གནོད་འཚེ་ཚབས་ཆེན་ཐེབས་ཡོད་པ་དང་། ཆགས་སྲེད་ཀྱི་གནོད་འཚེ་ཐེབས་པའི་བྱིས་པ་བརྒྱ་ཆའི་ ༦༧ གྲོང་གསེབ་ཁག་ནས་ཡིན་སྐོར་བརྗོད་འདུག
དེང་སྐབས་པར་ཆས་ཅན་གྱི་ལག་ཁྱེར་ཁ་པར་དར་ཁྱབ་བྱུང་བ་དང་སྦྲགས། མི་མང་གི་ངོས་ནས་སྤྱི་ཚོགས་སྟེང་བྱིས་པ་བསམ་མེད་ཚོར་ཆགས་སྲེད་ཀྱི་གནོད་འཚེ་གཏོང་བ་དང་རྐུ་འཕྲོག་བྱེད་པ། གཏའ་མར་འཛིན་པ་བཅས་ཡིད་སྐྱོ་བའི་གནས་ཚུལ་དེ་དག་ཕྱི་ལོ་ ༢༠༠༩ ཟླ་ ༡༡ ནང་འཛམ་གླིང་ཚོང་གཉེར་ཁང་ཆེན་མོ་ (World Trade Center) གཏོར་བཅོམ་བཏང་བའི་གནད་དོན་ལྟ་བུར་ཆ་འཇོག་གིས་དཔྱད་ཞིབ་བྱེད་ཀྱི་ཡོད་འདུག
ཉེ་ལམ་འཇིགས་སྐུལ་བའི་གནོད་འཚེ་ཐེབས་པའི་ལོ་ ༡༡ ཅན་གྱི་བྱིས་པ་ཞིག་གིས་བྷི་བྷི་སིའི་གསར་འགོད་པར་བརྗོད་དོན། ཁོ་ཚོས་གསང་བའི་པར་ལེན་འཕྲུལ་ཆས་ཀྱི་མདུན་ནས་ང་ལ་ཆགས་སྲེད་ཀྱི་བརྙས་བཅོས་བཏང་བ་རེད། དེ་ནས་བདུན་ཕྲག་གཅིག་གི་རྗེས་སུ་ཁོ་ཚོ་ཕྱིར་ཡོང་ནས་ང་ལ་སྐབས་དེའི་བརྙན་པར་བསྟན་ཏེ། གལ་ཏེ་ངས་ཁོ་རང་ཚོའི་འདོད་བློ་ལྟར་བྱེད་དུ་མི་འཇུག་ཚེ། ཁོ་ཚོས་བརྙན་པར་དེ་དག་ངའི་གྲོགས་པོ་དང་སློབ་གྲོགས་ཚོར་སྟོན་རྒྱུ་ཡིན་ཟེར། ཞེས་བརྗོད་འདུག་ལ། ཡང་པཱ་ཀི་སི་ཐན་གྱི་སྐྱེས་མ་ཞིག་གིས་བྷི་བྷི་སིའི་གསར་འགོད་པར། ཁོ་མོའི་བུ་ཆུང་ལོ་ལྔ་རིང་འཇིགས་སྐུལ་བས་དངུལ་དངོས་ཀྱི་གཏམ་མར་བཟུང་བ་དང་། ལོ་ངོ་དེ་དག་རིང་ཁོ་ལ་ཆགས་སྲེད་ཀྱི་གནོད་འཚེ་ཐེབས་པའི་གནས་ཚུལ་དེ་ཁོ་མོས་ཉེ་ཆར་གཞི་ནས་ཤེས་རྟོགས་བྱུང་། ཞེས་བརྗོད་འདུག
རྒྱལ་སྤྱིའི་གསར་ཁང་ཁག་གིས་གནས་ཚུལ་སྤེལ་བ་ལྟར་ན། ད་ལྟའི་བར་ལོ་ན་ ༡༤ མ་སོན་པའི་བྱིས་པ་ ༢༨༠ ལྷག་ལ་ཁ་ཆེ་འཇིགས་སྐུལ་བས་ཆགས་སྲེད་ཀྱི་གནོད་འཚེ་གཏོང་གིན་པའི་བརྙན་པར་ ༤༠༠ ཡས་མས་སྤྱི་ཚོགས་བརྒྱུད་ལམ་ཁག་ཏུ་ཁྱབ་ཡོད་འདུག
