ཨོ་སི་ཊོ་ལི་ཡའི་རྒྱལ་ས་ཁན་བྷེ་རར་རྒྱལ་ཡོངས་བོད་རིགས་མཐུན་ཚོགས་ཀྱི་འགན་འཛིན་ལྷན་ཚོགས་སྐབས་གསུམ་པ་ཚོགས་ཏེ་མཇུག་སྒྲིལ་ཡོད་པ་རེད།
ཟླ་འདིའི་ཕྱི་ཚེས་ ༨ ནས་ཉིན་གྲངས་གཉིས་རིང་ཨོ་སི་ཊོ་ལི་ཡའི་རྒྱལ་ས་ཁན་བྷེ་ར་རུ། བོད་ཀྱི་སྐུ་ཚབ་དོན་གཅོད་ཁང་གི་གོ་སྒྲིག་འོག ཨོ་སི་ཊོ་ལི་ཡ་རྒྱལ་ཡོངས་བོད་རིགས་མཐུན་ཚོགས་ཀྱི་འགན་འཛིན་ལྷན་ཚོགས་སྐབས་གསུམ་པའི་ཚོགས་ཆེན་ཚོགས་ཡོད་པ་དང་། སྐབས་དེར་སྐུ་ཚབ་དོན་གཅོད་ལྷག་པ་མཚོ་སྒོ་ལགས་ཀྱི་དབུས་ཨོ་སི་ཊོ་ལི་ཡ་ནང་ཡོད་པའི་ས་གནས་བོད་རིགས་མཐུན་ཚོགས་ཁག་བདུན་ཀྱི་སྐུ་ཚབ་དང་རྒྱུན་ལས་བཅས་མཉམ་ཞུགས་གནང་ཡོད་པ་རེད།
ཚོགས་འདུ་དབུ་འབྱེད་ཐོག་སྐུ་ཚབ་དོན་གཅོད་ལྷག་པ་མཚོ་སྒོ་ལགས་ཀྱིས་ཨོ་སི་ཊོ་ལི་ཡའི་བོད་རིགས་སྤྱིའི་གནས་སྟངས་དང་ཆབ་སྲིད་ཐོག་ནས་བོད་དོན་ལས་འགུལ་སྤེལ་ཕྱོགས། བོད་དོན་རྒྱབ་སྐྱོར་ཚོགས་པ་ཁག་གིས་སྔར་ལས་ནུས་པ་འདོན་ཕྱོགས། ཆོས་ཚོགས་ཁག་ནས་དོལ་རྒྱལ་ལ་གདོང་ལེན་གནང་ཕྱོགས་སོགས་ཀྱི་སྐོར་ལ་གསུང་བཤད་གནང་ཡོད་འདུག
དེ་རྗེས་སྐབས་གཉིས་པའི་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་ནེ་རྒན་དགོ་ཚང་ལགས་ཀྱིས། རྒྱལ་ཡོངས་བོད་རིགས་མཐུན་ཚོགས་དབུས་སྤྱི་ཁྱབ་རྒྱུན་ལས་ཁང་གི་ལས་སྡོམ་སྙན་སྒྲོན་ཞུས་པ་དང་། དེ་བཞིན། ཨོ་སི་ཊོ་ལི་ཡའི་ས་གནས་བོད་རིགས་ཚོགས་པ་ཁག་གིས་ལས་སྡོམ་སྙན་སྒྲོན་ཞུས་ཡོད་པ་རེད། གཞན་ཡང་ས་གནས་བོད་རིགས་མཐུན་ཚོགས་ཁག་གིས་འགན་བླངས་ཏེ། བོད་མིའི་དང་བླངས་དཔྱ་དངུལ་བསྡུ་འབུལ་འཐུས་ཚང་གནང་ཕྱོགས་སོགས་ཀྱི་སྐོར་ལ་གོ་བསྡུར་སྦྱངས་བཤད་ལྷུག་པོ་གནང་རྗེས། ཨོ་སི་ཊོ་ལི་ཡའི་རྒྱལ་ཡོངས་བོད་རིགས་ཚོགས་ཆེན་སྐབས་གཉིས་པའི་ཐོག་གི་གྲོས་གཞི་གྲོས་ཆོད་ཁག་ཅིག་ལ་བསྐྱར་ཞིབ་དང་འབྲེལ། དེའི་ཐོག་སྒྲིག་གཞི་གསར་བ་ཁ་ཤས་གཏན་འབེབས་ཡང་གནང་ཡོད་པ་རེད།
ཉིན་གཉིས་པར་ས་གནས་ཁག་གི་སྐུ་ཚབ་འཐུས་མི་གཉིས་རེ་ནས་གསང་བའི་འོས་འཕངས་ཏེ། སྐབས་གསུམ་པའི་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་དང་དྲུང་ཆེ་གཉིས་འདེམས་བསྐོ་གནང་ཡོད་པ་དང་། ས་གནས་ནེལ་ཁ་སི་ཀྲལ་གྱི་ཚོགས་གཙོ་བློ་བཟང་ལུང་རྟོགས་ལགས་སྐབས་གསུམ་པའི་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་དང་། བྷར་སི་སྦལ་གྱི་རྒྱུན་ལས་སྐུ་ཚབ་ཡེ་ཤེས་ལགས་དྲུང་ཆེར་འདེམས་ཐོན་བྱུང་ཡོད་འདུག
ཨོ་སི་ཊོ་ལི་ཡའི་སྐབས་གསུམ་པའི་རྒྱལ་ཡོངས་བོད་རིགས་མཐུན་ཚོགས་དབུས་སྤྱི་ཁྱབ་རྒྱུན་ལས་ཁང་གི་འདེམས་ཐོན་ཚོགས་གཙོ་བློ་བཟང་ལུང་རྟོགས་ལགས་ཀྱིས་མཇུག་སྡོམ་གཏམ་བཤད་གནང་སྐབས། ད་ཐེངས་ཨོ་སི་ཊོ་ལི་ཡའི་ས་གནས་ཁག་གིས་དམངས་གཙོའི་ལམ་སྲོལ་གྱི་ཐོག་ནས་ཕྲན་རང་མང་མོས་ཚོགས་གཙོར་ཐོབ་པར་རང་ཉིད་ལ་འགན་ཞིག་ཡོད་པའི་ཚོར་བ་ཆེན་པོ་ཞིག་བྱུང་སོང་། སླད་ཕྱིན་ཡང་༧ གོང་ས་མཆོག་གི་བཀའ་དགོངས་སྤྱི་གཙུག་ལ་འཛིན་ཐོག བོད་དང་བོད་ཀྱི་ཕན་བདེའི་རྩ་དོན་ཆེད་ནུས་པ་གང་ཡོད་འདོན་འདུན་ཡོད་པའི་དམ་བཅའ་གཙང་མ་ཡོད། བོད་ཀྱི་སྐུ་ཚབ་དོན་གཅོད་དང་ས་གནས་ཁག་གི་བོད་རིགས་མཐུན་ཚོགས་ཁག་བཅས་མཐུན་སྒྲིལ་རྡོག་རྩ་གཅིག་སྒྲིལ་ངང་མཉམ་འབྲེལ་གྱིས་བོད་ཀྱི་རྩ་དོན་ཐད་ལས་འགུལ་སྔར་ལས་ཚགས་ཚུད་གནང་སྟེ་རིག་པ་སྒྲིམ་རན་རེད་ཅེས་བརྗོད་ཡོད་པ་རེད།
ཨོ་སི་ཊོ་ལི་ཡའི་རྒྱལ་ཡོངས་བོད་རིགས་མཐུན་ཚོགས་ནི། ཕྱི་ལོ་ ༢༠༡༢ ལོར་དབུ་བརྙེས་ཤིང་། ལོ་གཉིས་རེའི་མཚམས་སུ་ཚོགས་གཙོ་དང་དྲུང་ཆེ་གསར་འདེམས་གནང་གི་ཡོད་པ་ལྟར་ད་རེས་སྐབས་གསུམ་པ་དེ་ཆགས་ཡོད་པ་རེད། ཕྱི་ལོ་ ༡༩༧༢ ནས་ཨོ་སི་ཊོ་ལི་ཡའི་ནང་བོད་མི་སྐྱབས་བཅོལ་བ་ཐོག་མར་ཡོང་འགོ་ཚུགས་པ་ནས་བཟུང་སྟེ། རིམ་བཞིན་བོད་མི་འདུས་སྡོད་ཆེ་སར་བོད་རིགས་མཐུན་ཚོགས་གསར་དུ་བཙུགས་ནས་ས་གནས་ཁག་བརྒྱད་ཙམ་ཡོད་པའི་ནང་། ད་ལྟའི་ཆར་ཁྱོན་བོད་མི་ ༡༧༠༠ ལྷག་ཡོད་པ་རེད།
ཨོ་སི་ཊོ་ལི་ཡའི་ས་གནས་གསར་འགོད་འབྲེལ་མཐུད་པ་བསང་ཆུ་འབྲུག་བྷེ།
