དབུས་གཙང་གི་རྟེན་འབྲེལ་མ་འཕྱུག་པའི་ཆེད་དུ་ང་སྲིད་སྐྱོང་ལ་ལངས་པ་ཡིན།

དེ་རིང་སྔ་དྲོའི་ཆུ་ཚོད་ ༡༠།༤༠ ཐོག་མེག་གྷན་དབུས་གཙང་ཆོལ་ཁའི་སྤྱི་ཁྱབ་རྒྱུན་ལས་ཁང་གི་ཚོགས་ཁང་དུ། ཕྱི་ལོ་ ༢༠༡༦ ལོའི་སྲིད་སྐྱོང་གི་འོས་མི་བཀྲ་ཤིས་སྟོབས་རྒྱལ་ལགས་ཀྱིས་གསར་འགོད་གསལ་བསྒྲགས་ཤིག་གནང་སོང་།

ལྷན་ཚོགས་ཐོག་བཀྲ་ཤིས་སྟོབས་རྒྱལ་ལགས་ཀྱིས་ཁོང་གི་ལོ་རྒྱུས་ངོ་སྤྲོད་གནང་དོན། བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་མཁས་དབང་ཡིན་ལ། ལོ་མང་སྤྱི་འཐུས་ཚོགས་གཙོ་གནང་བའི་ཉམས་མྱོང་ཡོད་པ་དང་། དེ་བཞིན་བློ་བཟང་སེང་གེ་ཧར་ཝ་ཌི་ནས་ཡིན་པ་སོགས་རབ་དང་རིམ་པ་ཡག་པོ་ཡོད་བསྡད་པ་ཞིག་དང་། བཀྲ་ཤིས་དབང་འདུས་ལགས་ལོ་མང་ཉམས་མྱོང་ཡོད་པ་དང་མཐོ་སློབ་ཐོན་པ་ཡིན་པ། སྤེན་པ་ཚེ་རིང་ལགས་སྤྱི་འཐུས་ཀྱི་ཚོགས་གཙོ་དང་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་འགན་འཛིན་གནང་མྱོང་མཁན་དང་ཉམས་མྱོང་ཆེན་པོ་ཡོད་མཁན་གཅིག་ལས་གཅིག་ལེགས་པ་ཡོད་ཀྱང་། ང་ལ་དེ་འདྲའི་ཉམས་མྱོང་གང་ཡང་མེད། ང་བྱང་ཐང་ནང་ལུག་རྫིར་ལོ་ ༡༦ ཕྱིན་པ་དང་དམག་མིར་ལོ་ ༡༤ བསྡད་བཞག་པ་ལས་ཉམས་མྱོང་གང་ཡང་མེད་ཞུ་རྒྱུ་གཅིག་དང་། གཉིས་ནས་ད་ལྟའི་ལས་ཐོག་སྲིད་སྐྱོང་དང་ངོས་གཉིས་བར་ཁྱད་པར་ག་རེ་ཡོད་རེད་ཟེར་ན། སྲིད་སྐྱོང་ཧར་ཝ་ཌི་ནས་ཐོན་པ་ཞིག་ཡིན་པ་དང་ང་རྗེས་ལུས་ལ་ལྷག་བསྡད་པ་ཞིག་ཡིན་པ་ལས་གཞན་ཁྱད་པར་གང་ཡང་མེད། མི་གཅིག་པ་ཡིན་པ་དང་རྣམ་དཔྱོད་གཅིག་མཚུངས་ཡོད་པ་ཆ་ཡིན། ཞེས་བརྗོད་སོང་།

དེའི་རྗེས་ཁོང་གིས་སྲིད་སྐྱོང་ལ་ལངས་དགོས་དོན་གང་ཡིན་སྐོར་བརྗོད་དོན། དང་པོ། ངས་བཙན་བྱོལ་བོད་མིའི་སྒྲིག་འཛུགས་འདི་མ་འོངས་པར་རྒྱུན་གནས་སྲ་བརྟན་ཐུབ་ཆེད། ཕྱི་རྒྱལ་གྱི་རྒྱལ་ཁབ་ཁག་ལ་གནས་སྐབས་ངལ་རྩོལ་བྱེད་ས་བཙལ་ནས་བོད་མི་ལག་རྩལ་བ་དང་སྨན་ཞབས་པ་གང་མང་ཕར་འགྲོ་ཚུར་འོང་བྱེད་ཐུབ་པ་བྱས་ནས་སྤྱི་ཚོགས་ལ་ཕན་བདེ་བསྐྲུན་ཐུབ་པ་བྱ་རྒྱུ་དང་། གཉིས་པ། རང་གི་རྒྱལ་ཁབ་དང་མི་རིགས་ཀྱི་ཆེད་དུ་བོད་མི་རེ་ངོ་རེས་ཟླ་བ་གཅིག་ནང་ཉིན་གཅིག་གི་དགོང་ཟས་སྤང་སྟེ། དེའི་དོད་གཞུང་ལ་ཞལ་འདེབས་འབུལ་རྒྱུ་དང་། ཕ་མ་དང་རྒན་རབས་རྣམ་པས་མ་འོངས་བོད་ཀྱི་སོན་རྩར་འགྱུར་བ་རྣམས་ལ་རང་མི་རིགས་ཀྱི་རིག་གཞུང་གཙོས་པའི་སློབ་གསོ་གཏོང་རྒྱུ། གསུམ་པ། ད་ལྟ་བོད་མི་ཚོས་རྒྱ་གར་གཞུང་ལ་དཔྱ་ཁྲལ་རྒྱག་བཞིན་ཡོད་པ་དག་རྒྱག་མི་དགོས་པ་བཟོ་ཐབས་བྱ་རྒྱུ་བཅས་སྲ་བརྟན་བྱ་དགོས་པ་གསུམ་དང་། འཐུས་ཤོར་གཉིས་ནི། དང་པོ། ང་ཚོས་དབུ་མའི་ལམ་གྱི་འགན་ཁུར་མ་ཐུབ་པ་དང་། གཉིས་པ། རང་ངོ་རང་ཤེས་མ་ཐུབ་པ་དང་༧གོང་ས་མཆོག་ལ་བརྩི་བཀུར་གང་འདྲ་ཞུ་དགོས་མིན་མ་ཤེས་པ་དང་། འགན་མ་ཁུར་བ་ནི། ཚོགས་ཆེན་དང་གྲོས་ཚོགས་སོགས་ནང་སྤྱི་འཐུས་དང་འགན་ཁུར་མི་སྣས་འགན་ཏག་ཏག་ཅིག་འཁུར་མ་ཐུབ་པ་བཅས་དང་། དེ་མིན་དབུས་གཙང་མི་འབོར་ཆེན་པོ་འདི་ལ་སྲིད་སྐྱོང་ལ་ལངས་མཁན་མི་འདུག་ཟེར་མཁན་ཡོད་སྟབས། ངས་དེ་རིང་རྟེན་འབྲེལ་མ་འཕྱུག་པའི་ཆེད་དུ་སྲིད་སྐྱོང་ལ་ལངས་པ་ཡིན། ཞེས་བརྗོད་སོང་།

ཁོང་གིས་བོད་རྒྱ་ཞི་མོལ་གྱི་ལྡེ་མིག་དེ་ང་ཚོར་ཡོད་སྐོར་བརྗོད་དོན། སྲིད་སྐྱོང་བློ་བཟང་སེང་གེ་ལགས་ཀྱིས་ང་ཚོ་གཞན་དབང་སྟབས་བསྟུན་ཡིན་པས་བོད་རྒྱ་ཞི་མོལ་ཡོང་གི་མི་འདུག བོད་རྒྱ་ཞི་མོལ་གྱི་ལྡེ་མིག་དེ་རྒྱ་ནག་ལ་འདུག་གསུངས་ཡོད་པ་རེད། ངས་བསམ་བློ་བཏང་བ་ཡིན་ན་སྔོན་མ་ང་ཚོར་ལྡེ་མིག་དེ་རག་ཡོད་པ་མ་ཟད། ད་དུང་རག་རྒྱུའི་ཐབས་ཤེས་བྱ་རྒྱུ་འདུག་ཟེར་གྱི་ཡོད། སྔོན་མ་རྒྱ་ནག་གཞུང་གི་མཐོ་རིམ་མི་སྣས་རང་བཙན་མིན་པའི་སྐད་ཆ་ག་རེ་བཤད་ཀྱང་ཤོད་ཤོག་ཅེས་བརྗོད་ཡོད་སྟབས་ལྡེ་མིག་དེ་ང་ཚོར་གཡུགས་ཡོད་པ་རེད། གནད་དོན་དེ་རྒྱ་ནག་གི་དཔོན་རིགས་ཀྱིས་ག་དུས་ལབ་འདུག ག་རེ་བྱས་ནས་ལབ་འདུག་ཟེར་བ་དེ་ཡིན་སྟབས། སྐད་ཆ་དེ་ག་དུས་ལབ་འདུག་ཟེར་ན། མའོ་ཙེ་ཏུང་ཤི་ཚར་ཙམ་ཞིག་དང་རྒྱ་དཀར་ནག་གཉིས་བསྡུར་ན། རྒྱ་ནག་ཉག་ཕྲ་བའི་དུས་སྐབས་ཤིག་ཡིན་པ་མ་ཟད། ད་ལྟ་ནང་བཞིན་ང་ཚོ་ཕྱི་རྒྱལ་ལ་ཕོན་ཆེན་པོ་ཕྱིན་མེད་པ་དང་། གསུམ་བཅུའི་དུས་དྲན་གྱི་འབོད་སྒྲ་ཆེན་པོ་བསྒྲགས་སྐབས་བྱུང་ཡོད་ཀྱང་། སྐབས་དེར་ང་ཚོས་དབུ་མའི་ལམ་དང་རང་བཙན་གཙང་མ། བདེན་པའི་ཨུ་ཚུགས། རང་ཐག་རང་གཅོད་བཅས་ལམ་ཀ་བཞི་བཙལ་ནས་བསྡད་ཡོད་སྟབས། དེའི་རྗེས་ང་ཚོ་ནང་ཁུལ་བར་བཀྲ་མ་ཤིས་པ་བྱུང་ནས་དབུས་གཙང་དང་མངའ་རིས། མདོ་སྟོད་གསར་རྙིང་གཉིས་བཅས་བར་རྐུབ་བཀྱགས་ཆེད་འཁྲུག་རྩོད་ཤོར་བ་དང་། ཤ་དམར་རིན་པོ་ཆེས་ཡང་སྲིད་ངོས་འཛིན་གནང་བའི་ཀརྨ་པ་དང་བོད་ནང་འཁྲུངས་པའི་ཀརྨ་པ་མཆོག་བར་རྙོག་གྲ་བྱུང་བ་མ་ཟད། པན་ཆེན་རིན་པོ་ཆེའི་ཡང་སྲིད་མཆོག་ལ་སྐུ་ངལ་དང་། དོལ་རྒྱལ་གྱི་རྙོག་གྲ་བཅས་བྱུང་བ་རེད། ད་ལྟ་དོལ་རྒྱལ་གྱི་རྙོག་གྲ་མ་གཏོགས་དེ་སྔོན་གྱི་དཀའ་རྙོག་དེ་འདྲ་མེད་ཀྱང་། ད་ཆ་རྒྱ་ནག་གཞུང་ཧ་ལས་པའི་སྟོབས་ཆེན་པོ་ཆགས་ཡོད་སྟབས། རྒྱ་ནག་གཞུང་གིས་བོད་རྒྱ་ཞི་མོལ་གྱི་ལྡེ་མིག་དེ་སྒྲོག་ཙེའི་ནང་བླུགས་ནས་སྒོ་ལྕགས་བརྒྱབ་ཚར་ཡོད་ཀྱང་། ངས་ལྡེ་མིག་དེ་རག་རྒྱུའི་ཐབས་ལམ་ཡོད་རེད་བསམ་གྱི་འདུག ཐབས་ལམ་དེ་ག་རེ་རེད་ཞུས་ན། ༧གོང་ས་མཆོག་གིས་བཏོན་གནང་མཛད་པའི་དབུ་མའི་ལམ་ཆགས་ཡོད། དབུ་མའི་ལམ་ཚགས་ཚུད་ཡོང་བར་ག་རེ་དགོས་ཀྱི་འདུག་ཟེར་ན། ངས་ཟུར་བཞི་ནས་བཀྱག་དགོས་པ་ཞིག་མཐོང་གི་འདུག ཟུར་གཅིག་ནས་༧གོང་ས་མཆོག་གིས་ཤུགས་ཆེན་པོ་བསྐྱོན་ནས་བཀྱགས་གནང་ཡོད་པ་དང་། ཟུར་གཞན་ཞིག་ནས་བོད་ནང་བོད་རྒྱལ་ཁབ་དང་མི་རིགས་ཆེད་རང་སྲོག་བློས་གཏོང་གནང་མཁན་ཚོས་བཀྱགས་གནང་ཡོད་སྟབས། ཟུར་གཞན་གཉིས་དེ་བཀའ་སྤྱི་གཉིས་ཀྱིས་དཔལ་འབྱོར་རྒྱུན་གནས་དང་ཤེས་ཡོན་ཡར་ཐོན་ཅན་གྱི་སྤྱི་ཚོགས་ཞིག་འགྱུར་ཐབས་ལ་འབད་བརྩོན་བྱ་རྒྱུ་ཆགས་ཡོད་པ་རེད། དབུ་མའི་ལམ་གྱི་མི་དེ་གང་འདྲ་ཞིག་དགོས་ཀྱི་རེད་ཟེར་ན། དཔལ་འབྱོར་གྱི་རྒྱབ་ལྗོངས་ཡག་པོ་ཡོད་པ་དང་ཤེས་ཡོན་གྱི་གནས་ཚད་ཡག་པོ་ཡོད་པ་ཞིག་དགོས་ཀྱི་འདུག དཔལ་འབྱོར་ཡག་པོ་ཡོད་མཁན་གྱི་མི་འར་པོ་ཆེན་པོ་ཞིག་དང་སློབ་སྦྱོང་ཡོད་མཁན་གྱི་མི་ཉམ་ཆུང་ཞིག་ཡིན་ན། དཔལ་འབྱོར་ཡོད་མཁན་གྱི་མི་དེས་སློབ་སྦྱོང་ཡོད་མཁན་གྱི་མི་དེ་ག་པར་ཁྲིད་ཁྲིད་འདྲ་པོ་ཞིག་དང་། ཡང་ན་དཔལ་འབྱོར་ཡོད་མཁན་ཉམ་ཆུང་ཞིག་ཡིན་ན། སློབ་སྦྱོང་ཡོད་མཁན་གྱི་མི་འར་ཆེན་པོ་ཞིག་གིས་སོ་སོའི་ཁེ་ཕན་སྒྲུབ་ཆེད་ག་པར་ཁྲིད་ཁྲིད་འདྲ་པོ་ཆགས་ཡོད་སྟབས། ངས་དབུ་མའི་ལམ་ལ་འགྲོ་མཁན་གྱི་མི་དེ་དཔལ་འབྱོར་དང་སློབ་སྦྱོང་གཉིས་ཀ་ཡོད་པ་ཞིག་དགོས་ཀྱི་འདུག་ལབ་ཀྱི་ཡོད། ཅེས་བརྗོད་སོང་།

བཀྲ་ཤིས་སྟོབས་རྒྱལ་ལགས་ཀྱིས་གཅིག་སྒྲིལ་གྱི་ངོ་བོ་གང་ཡིན་སྐོར་བརྗོད་དོན། ད་ལྟ་སྲིད་སྐྱོང་མཆོག་གིས་གཅིག་སྒྲིལ་ཡོད་གསུངས་ཀྱི་ཡོད་པ་དེར་ང་མགོ་འཐོམ་གྱི་འདུག ངས་གཅིག་སྒྲིལ་ཟེར་བ་དེ་གཅིག་སྒྲིལ་མེད་པ་ཞིག་ཡག་ཏུ་གཏོང་དགོས་པ་དང་། ཡང་ན་གཅིག་སྒྲིལ་ཡོད་པ་ཞིག་ཡག་ཏུ་གཏོང་ཆེད་གཅིག་སྒྲིལ་དགོས་འདུག་ལབ་དགོས་པ་ཆགས་འདུག་མ་གཏོགས། གཅིག་སྒྲིལ་གྱི་ཚིག་གཅིག་པོ་བེད་སྤྱོད་བཏང་ན་འགྲིག་གི་མི་འདུག་ལབ་ཀྱི་ཡོད། ངས་གཅིག་སྒྲིལ་མེད་པ་དེ་ཐག་རིང་ནས་བརྙན་འཕྲིན་བརྒྱུད། ལོ་གཅིག་ནང་དུས་གཉིས་ཚོགས་བཞིན་ཡོད་པའི་གྲོས་ཚོགས་རྭ་བ་དེའི་ནང་མཐོང་གི་འདུག གྲོས་ཚོགས་ནང་ཆོལ་ཁ་དང་ཆོས་ལུགས་ཀྱི་འཐེན་འཁྱེར་ག་ཚོད་འདུག ཀརྨ་ཆོས་འཕེལ་ལོ་གཉིས་དང་ཕྱེད་ཀ་དང་སྤེན་པ་ཚེ་རིང་ལོ་གཉིས་དང་ཕྱེད་ཀ་ཚོགས་གཙོ་བྱེད་དགོས་བྱུང་བ་དེ་འཐེན་འཁྱེར་མ་རེད་དམ། དེ་བཞིན་ཀརྨ་ཡེ་ཤེས་སྤྱི་འཐུས་ཚོགས་གཙོ་མ་ཆགས་པ་དེ་འཐེན་འཁྱེར་བྱུང་བ་མ་རེད་དམ། དེ་སྔོན་ཇོ་ནང་གི་སྤྱི་འཐུས་དགོས་ཀྱི་འདུག་ལབ་སྐབས། མདོ་སྨད་ཀྱི་ལག་པ་བརྐྱངས་ཀྱང་། མདོ་སྟོད་ཀྱི་ལག་པ་བརྐྱངས་མེད་པ་དེ་འཐེན་འཁྱེར་མ་རེད་པས། ལོ་ཤས་གོང་གི་གྲོས་ཚོགས་ནང་མདོ་སྟོད་སྤྱི་འཐུས་ཀྱིས་བསོད་ནམས་སྟོབས་རྒྱལ་ལ་གནམ་གྲུའི་གླ་ཆ་སྤྲོད་དགོས་འདུག་ལབ་ཡོད་པ་དང་། ཡང་མདོ་སྟོད་མིན་པ་དག་གིས་སྤྲོད་དགོས་མ་རེད་ལབ་ཡོད་སྟབས། དེ་ཚོ་འཐེན་འཁྱེར་མིན་ན་གང་རེད། ང་ཚོའི་མི་མང་ལ་སྲིད་སྐྱོང་ལབ་དུས་མཁས་དབང་དང་ཌོག་ཌར་དེ་འདྲ་དགོས་ཀྱི་ཡོད་པའི་ཚོར་སྣང་ཞིག་ཡོང་གི་འདུག་སྟབས། ངས་དེ་མ་རེད་ཞུ་རྒྱུ་ཡིན། ང་ཚོར་རྒྱལ་རབས་ལོ་རྒྱུས་བཟོ་མཁན་ཞིག་དགོས་ཀྱི་འདུག་མ་གཏོགས། རྒྱལ་རབས་ལོ་རྒྱུས་ཤོད་མཁན་དགོས་ཀྱི་མི་འདུག་ཅེས་གསལ་པོ་བྱས་ནས་ཞུ་རྒྱུ་ཡིན། ང་ལ་རྒྱལ་རབས་ལོ་རྒྱུས་བཤད་རྒྱུ་མེད་ཀྱང་། རྒྱལ་རབས་ལོ་རྒྱུས་འཕེལ་རྒྱས་གཏོང་ཐུབ་པའི་འབད་བརྩོན་ཞུ་རྒྱུ་ཡིན་ལ། དེ་བཞིན་མི་གཞན་ལའང་རྒྱལ་རབས་ལོ་རྒྱུས་འཕེལ་རྒྱས་གཏོང་རྒྱུར་འབད་བརྩོན་གནང་རོགས་གནང་ཞུ་རྒྱུ་ཡིན། ཞེས་སོགས་བརྗོད་སོང་།

གསར་འགོད་པ། དོན་གྲུབ།