སྲིད་སྐྱོང་དང་འོས་མི་རྩེད་ཆས་མ་རེད།

བློ་གྲོས་རབ་བརྟན།

བཙན་བྱོལ་བོད་མིའི་སྲིད་སྐྱོང་དང་སྤྱི་འཐུས་འོས་བསྡུ་ཁྱབ་བསྒྲགས་བྱས་པ་བསྟུན། བོད་རྒྱལ་ཡོངས་རང་བཙན་ལྷན་ཚོགས་ཀྱིས་རང་གི་མངོན་འདོད་བསྒྲུབ་པའི་སྲིད་སྐྱོང་འོས་མི་ཞིག་མིང་འདོན་གནང་སྟེ། རང་གི་མངོན་འདོད་བོད་མིའི་སྒྲིག་འཛུགས་ཀྱི་བཀའ་ཤག་ཏུ་བསྐྱེལ་ལ་འབད་རྒྱུ་རེད་བསམ། འོན་ཀྱང་དོན་ལ་དེ་ལས་ལྡོག་སྟེ་སྲིད་སྐྱོང་དང་སྲིད་སྐྱོང་འོས་མིའི་རྩེད་མོ་རྩེ་བཞིན་འདུག

སྐུ་ཞབས་ཀླུ་མཁར་བྱམས་བོད་རྒྱལ་ཡོངས་རང་བཙན་ལྷན་ཚོགས་ཟེར་བས་༢༠༡༦ ལོའི་སྲིད་སྐྱོང་གི་འོས་མིར་མིང་འདོན་གནང་འདུག་པས། ང་ཧང་སང་བ་དང་མཉམ་དུ་ཁོང་ཚོས་ཀླུ་བྱམས་དང་སྲིད་སྐྱོང་གི་རྩེད་མོ་རྩེ་བཞིན་འདུག་བསམས་ཏེ་ཁོང་ཁྲོ་འང་ལངས་སོང་། ཀླུ་བྱམས་སྲིད་སྐྱོང་གི་འོས་མི་ལ་ལངས་པ་རྒྱུད་ལམ་ཁག་ནས་ཤེས་རྟོག་བྱུང་ཡང་ཁོའི་རྒྱབ་ན་གོང་གི་ཚོགས་པ་དེ་ཡོད་པ་གང་ནས་ཤེས།

རང་བཙན་ཚོགས་པར་མཚོན་ན་ཚོགས་པའི་ཚོགས་ཁོངས་སུ་རྩོམ་པ་པོ་གྲགས་ཅན་འཇམ་དབྱངས་ནོར་བུ་དང་། དེ་མིན་འཇིགས་མེད་ཨོ་རྒྱན། བསྟན་འཛིན་བརྩོན་འགྲུས་སོགས་ང་ཡིན་ན་ཁྱོད་ཡིན་ཟེར་མཁན་བཅུ་གྲངས་ཤིག་ཡོད་ཚོད་རེད་ལ། དེ་དག་ལས་གཅིག་ངེས་པར་དུ་སྲིད་སྐྱོང་ལ་ལང་དགོས་ཏེ། ཚོགས་པ་དེའི་ལངས་ཕྱོགས་ནི་རང་བཙན་ཡིན་ཞིང་། ད་ལྟའི་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་ཇུས་ལ་སྐྱོན་བརྗོད་དང་མ་འགྲིག་མ་འཐུས་རྐྱང་ཤོད་འབྲི་བྱེད་མཁན་ཡིན་པས་སོ།། རང་ལ་ལངས་ཕྱོགས་དང་ལྟ་བ་ཡོད་པ་དེ་བོད་མིའི་སྒྲིག་འཛུགས་ཀྱི་སྲིད་ཇུས་ལ་བསྒྱུར་དགོས་པ་དེ་ཁྱོད་ཅག་གི་རེ་བ་ཉག་གཅིག་དེ་ཡིན་ངེས་ན། དེ་ཡོང་བའི་ཐབས་ལམ་དེ་མང་གཙོའི་ལམ་ནས་འོས་འདེམས་ཀྱི་སྲིད་སྐྱོང་འདི་རེད། ཁྱེད་ཅག་གི་ཁྲོད་ནས་མི་གཙོ་བོ་ཞིག་སྲིད་སྐྱོང་གི་འོས་མི་ལ་ལང་དགོས་པ་དེ་ད་ཐེངས་གཡོལ་དུ་མེད། འོན་ཀྱང་དེ་ལྟར་མ་བྱས་པར་ཀླུ་མཁར་བྱམས་སྲིད་སྐྱོང་གི་འོས་མི་ལ་བཏོན་པ་དེ་ཡ་མཚན་ཞིག་རེད།

ཐེངས་འདིའི་འོས་འདེམས་འདི་ཁྱེད་ཅག་གིས་གོ་སྐབས་ཤིག་ཡིན་པ་ཤེས་ཡོད་ལ། གོ་སྐབས་དེའི་ནང་རང་ཉིད་ཀྱི་གདོང་སྟོན་མ་ཐུབ་པ་དེ་ཅི་ཞིག་མ་འགྲིག་པ་རེད། ཤེས་ཡོན་དང་འཇོན་ཐང་། སྙན་གྲགས་བཅས་ཀྱི་ཆ་ནས་མ་འདང་བ་གང་ནས་ཡིན། ད་ཨོ་ན། རང་གི་ལྟ་བ་དང་ལངས་ཕྱོགས་ལ་ཡིད་ཆེས་མེད་པ་འམ། ད་བར་དུ་རང་བཙན་རང་བཙན་ཞེས་ལབ་བསྡད་པ་དེ་ཁ་ཙམ་མམ། ཡང་ན་རྒྱབ་ནས་ཅིག་བཤད་བསྡད་པ་ལས་མདུན་ལ་འཐོན་པར་གདེང་སྤོབས་མེད་པ་ཡིན་ནམ། གལ་ཏེ་འོས་མི་ལ་ལངས་ནའང་འོས་མ་ཐོབ་པ་ཡིན་ན་རང་གི་མཚན་སྙན་ལ་གནོད་པར་དོགས་ནས་ཡིན།

གོ་སྐབས་འདིར་རང་གི་མངོན་འདོད་འོས་འགྲན་གྱི་ལམ་ནས་རྒྱལ་ཕམ་བརྩད་རྒྱུའི་ཚབ་ལ། དེ་ལས་གཞན་པའི་གོ་སྐབས་ཤིག་ལ་འཇུ་བཞིན་ཡོད་དེ། ཀླུ་མཁར་བྱམས་ཀྱི་ཁོག་པ་ཁྱེད་ཅག་འཛུལ་བཞིན་སྲིད་སྐྱོང་གི་འོས་འགྲན་དུ་བརྫིངས་ཏེ། མང་ཁྲོད་དུ་དབུ་མའི་ལམ་གྱི་སྲིད་ཇུས་ལ་སྐྱོན་བརྗོད་དང་། ད་དུང་དེ་ལས་གཞན་པའི་བོད་མིའི་སྒྲིག་འཛུགས་ཀྱི་ལས་དོན་མང་པོར་མ་འགྲིག་མ་འཐུས་པ་རྐྱང་བཤད་བཅུག་སྟེ། སྲིད་སྐྱོང་འོས་འགྲན་གྱི་བགྲོ་གླེང་ཁག་བསྐྱེལ་རྒྱུ་ཡིན་པ་རེད། དེར་བརྟེན་ཁྱེད་ཅག་གི་དམིགས་ཡུལ་ངོ་མ་དེ་ཡང་སྲིད་སྐྱོང་གི་རྒྱལ་ཁ་འཐོབ་དགོས་པ་དེ་མ་ཡིན་པར། མང་ཁྲོད་དུ་རང་གི་ལྟ་བ་དང་ལངས་ཕྱོགས་ཁྱབ་བསྒྲགས་བྱ་རྒྱུ་དེ་རེད།

ཀླུ་མཁར་བྱམས་ལ་མཚོན་ན། མི་དྲང་བོ་ཞིག་དང་ཁ་རུ་ཁ་ཐུག ཁ་བཤད་དང་ལག་ལེན་པར་ཧེ་བག་ཉུང་ཞིང་། རང་གི་སེམས་ཁམས་གཙང་མ་དེ་གཞན་ལའང་དེ་ལྟར་ཡོད་པར་ཡིད་ཆེས་རྒྱུ་མང་སོང་བས། ཐེངས་འདིར་རང་བཙན་ལྷན་ཚོགས་ཀྱི་ཆེན་པོ་དག་གིས་ལག་ཏུ་ཚུད་དེ། བོད་མིའི་སྒྲིག་འཛུགས་ཀྱི་སྲིད་ཇུས་ཀྱི་ཁ་གཏད་དུ་འདེད་དེ་གཏམ་བཤད་རིམ་པར་གནང་རྒྱུ་རེད། རྒན་པ་ཚོའི་ལྷག་བསམ་ཁོ་ནས་བསྐྲུན་པའི་བོད་མིའི་སྒྲིག་འཛུགས་འདི་མི་རབས་གསར་པའི་ལག་པར་སྤྲད་དེ། སྔར་ལས་ལྷག་པའི་ཡག་ཐོག་ཡག་བརྩེགས་ཡོང་ཕྱིར་ཐད་ཀར་རང་གི་སྲིད་སྐྱོང་འོས་འདེམས་བྱེད་བཅུག་ནའང་། མི་རབས་གསར་པ་ཚོས་སྲིད་སྐྱོང་འོས་འདེམས་འདི་རང་གི་བསམ་ཚུལ་དྲིལ་བསྒྲགས་བྱེད་ས་ཞིག་དང་། སྲིད་སྐྱོང་དང་སྲིད་སྐྱོང་འོས་མིའི་རྩེད་མོ་རྩེ་བཞིན་པ་འདི་རེད།