དེ་རིང་དགེ་ལུགས་སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས་སྐབས་ ༡༦ པའི་སྤྱི་འཐུས་སུ་ལང་རྒྱུ་མིན་པའི་ཡིག་ཐོག་གསལ་བསྒྲགས་ཤིག་བཏང་བྱུང་།
ཡིག་ཐོག་གསལ་བསྒྲགས་ནང་། འདི་ཕྱི་གཏན་གྱི་སྐྱབས་གནས་དཔལ་མཉམ་མེད་རི་བོ་དགེ་ལུགས་པའི་རྒྱ་ཆེའི་གྲྭ་བཙུན་ཡོངས་ལ་ཆེད་ཞུ། གུས་པ་ཕྱི་ལོ་༢༠༠༡ ཟླ་༤ ཚེས་༣༠ ཉིན་འཕགས་མཆོག་ཕྱག་ན་པདྨོ་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཡེ་ཤེས་དབྱིངས་དཔྱད་ཀྱིས་གནམ་བསྐོས་གསེར་གྱི་བཀའ་ཡིག་སྤྱི་ཐོད་དུ་བསྩལ་སྨིན་བྱུང་སྟེ་སྐབས་བཅུ་གསུམ་པའི་བོད་མི་མང་སྤྱི་འཐུས་སུ་ཐད་ཀར་བསྐོ་བཞག་གནང་བ་ལྟར། བོད་ཀྱི་ལོ་རྒྱུས་ནང་ཆེས་ཛ་དྲག་དང་རྙོག་འཛིང་གི་དུས་སྐབས་སུ་བོད་བསྟན་པ་ཆབ་སྲིད་ཐད་ཁ་ནས་སྐད་ཆ་བཤད་པ་དང་ལག་ནས་རྩོམ་ཡིག་བྲིས་པ་ཙམ་མ་ཡིན་པར་ཁ་ཡོད་ལག་ཡོད་ཀྱིས་ཞབས་ཞུ་སྒྲུབ་རྒྱུར་དགའ་སྒོམ་ཆེན་པོས་བཀའ་བཞིན་བསྒྲུབས་ཏེ། ལོ་ལྔའི་རིང་ཚོགས་ཐེངས་གཅིག་ལའང་མ་ཆད་པར་གྲོས་ཚོགས་ནང་མཉམ་ཞུགས་ཀྱིས་༸གོང་ས་མཆོག་གི་བཀའ་དགོངས་དང་། རྒྱ་ཆེའི་མང་ཚོགས་ཀྱི་མངོན་འདོད་ཐོག་འཇིགས་ཞུམ་ཆགས་སྡང་དང་རང་དོན་ཕྱོགས་ལྷུང་མེད་པར་བོད་མི་མང་སྤྱི་འཐུས་ཀྱི་འགན་དབང་ལག་བསྟར་ཚད་ལྡན་ཡོང་ཐབས་བྱས་པར་མ་ཟད། གཏན་འཇགས་སྡོད་གནས་སུའང་ཉམ་ཐག་བསྐྱར་ཞིབ་ཀྱིས་མཚོན་གཞུང་འབྲེལ་དུས་ཆེན་སྲུང་བརྩི་ཁག་ཏུ་གཏམ་བཤད་དང་། བོད་ནང་གི་ཛ་དྲག་གི་གནས་སྟངས་དང་འབྲེལ་སྦེལ་ཀོབ་ས་གནས་ཀྱི་ཚོགས་པ་ཁག་གིས་ས་གནས་ཀྱི་ཉེ་ཁུལ་གྲོང་ཁྱེར་དང་ས་གནས་སུ་འཐབ་རྩོད་ཀྱི་ལས་འགུལ་རབ་དང་རིམ་པ་སྤེལ་བ་སོགས་སུ་གཏམ་བཤད་དུ་གདན་ཞུས་གོ་སྐབས་ནམ་བྱུང་ལ་བོད་ནང་གི་བོད་མིའི་བསམ་བློ་དང་། སྐད་ཡིག་རིག་གཞུང་། ཡུལ་ཁམས་ཁོར་ཡུག་སོགས་རྒྱ་བསྒྱུར་གྱི་གནས་བབ་དང་། རྒྱལ་སྤྱི་དང་བཙན་བྱོལ་ནང་གི་བོད་དོན་འཐབ་རྩོད་ཀྱི་གནས་བབ་དང་འབྲེལ། ང་ཚོའི་འཐབ་རྩོད་ཀྱི་སྲོག་ཤིང་ཆོས་དང་རིག་གཞུང་ཉམས་པ་སླར་གསོ་དང་མི་ཉམས་གོང་འཕེལ་ཐད་ཁྱོན་ཡོངས་ནས་འབད་བརྩོན་བྱེད་དགོས་ཀྱི་ལམ་སྟོན་རིམ་པར་ཞུས་ཤིང་།
ལས་ཞོར་གྱི་དུས་ཚོད་སྤྱད་དེ། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མཛད་རྣམ་དང་། རླབས་ཆེན་གྱི་དགོངས་གཞི་ཁག་ཕྱོགས་ཡོངས་ནས་མཁྱེན་རྟོགས་སླད། རྒྱལ་བའི་མཛད་རྣམ། “བྱམས་བརྩེ་དང་དྲང་བདེན་གྱི་བླ་སྲོག”དང་། གཞུང་ཆེན་ཁག་གི་བཀའ་ཁྲིད། རྩ་བ་ཤེས་རབ་དང་། བཤེས་སྤྲིངས། རྒྱལ་སྲས་ལག་ལེན་སོ་བདུན་མ། སྤྱོད་འཇུག་ཆེན་མོ། ནང་ཆོས་སྤྱི་དོན་སོགས་རྩ་ཆེའི་བཀའ་ཁྲིད་ཟིན་བྲིས་གླེགས་བམ་ཆེན་པོ་ལྔ་རྩོམ་སྒྲིག་དང་ཞུ་དག་གིས་དཔར་བསྐྲུན་འགྲེམས་སྤེལ་བྱས་ཤིང་། ད་དུང་ཡང་མུ་མཐུད་བཞིན་ཡོད། དེར་མ་ཟད་རིག་གཞུང་གལ་ཆེ་རྩ་གནད་དུ་བཟུང་སྟེ། སེ་ར་ཐེག་ཆེན་གླིང་དང་སཱ་ར་མཐོ་སློབ། ཏཱ་ལའི་བླ་མའི་མཐོ་སློབ། ནོར་གླིང་མཐོ་སློབ་དང་། དབུས་སྨན་རྩིས་ཁང་སོགས་མཐོ་སློབ་ཁག་ལ་རིག་གཞུང་སློབ་ཁྲིད་སོགས་ཆོས་དང་རིག་གཞུང་བསྟན་པ་ཆབ་སྲིད་བཅས་པར་གང་འཚམས་ཞབས་ཞུ་ཞུ་རྒྱུ་བྱུང་བ་ནི། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཡིན་པས། འདིར་ཆེད་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ཚེ་འདི་ཕྱི་ཀུན་ཏུ་ཐུགས་རྗེ་བླ་མེད་དུ་ཆེ་ཞུ་རྒྱུ་དང་།
ཕྱི་ལོ་༢༠༡༡ ལོར་དགེ་ལུགས་རྒྱུགས་སྤྲོད་ཚར་བ་དང་། ཆོལ་ཁ་གསུམ་གྱི་རྒྱ་ཆེའི་དགེ་ལུགས་གྲྭ་བཙུན་མང་ཚོགས་ནས་ཐུགས་རེ་ཆེན་པོས་འོས་གྲངས་ ༣༣༣༦ གིས་སྐབས་བཅོ་ལྔ་པའི་དགེ་ལུགས་སྤྱི་འཐུས་སུ་འོས་འདེམས་ཀྱིས་བོད་མི་མང་སྤྱི་འཐུས་གྲོས་ཚོགས་སུ་སླེབས་ཤིང་། ད་ལྟའི་བར་ཆོལ་ཁ་ཆོས་ལུགས་དབར་མཐུན་ལམ་གཙོར་བཟུང་གིས་ལོ་གཉིས་ལྷག་སྤྱི་འཐུས་རྒྱུན་ལས་སུ་ངོ་བཅར་ཐོག་ཆབ་སྲིད་སྡེ་ཚན་དང་། རྒྱུན་འབྲེལ་སྡེ་ཚན། ཚོགས་ཆུང་ཁག་ཁ་ཤས་བཅས་སུ་ལས་ཀ་བྱས་ཤིང་། འདས་པའི་ལོ་བཞི་ལྷག་གི་རིང་སྦེལ་ཀོབ་ཕྱོགས་དང་། མོན་གྷོ་ཌིའི་ཕྱོགས། ཀོ་ལི་གྷལ་དང་དེའི་ཉེ་ཁུལ་ཕྱོགས་སོགས་ས་བགོས་ཕྱོགས་བསྐྱོད་ཀྱིས་རྒྱ་ཆེའི་སེར་སྐྱ་མང་ཚོགས་ཀྱི་བདེ་སྡུག་ལ་ལྟ་རྟོག་ཞིབ་ཚགས་ཀྱིས་སྙན་ཐོ་འབྲེལ་ཡོད་ལས་ཁུངས་ཁག་སོ་སོར་ཕུལ་ཏེ་དཀའ་ངལ་སེལ་ཐབས་དང་། ༧གོང་ས་མཆོག་དང་། བོད་མིའི་སྒྲིག་འཛུགས་ཀྱི་བཞེངས་ཕྱོགས་དང་དགོངས་གཞི། བོད་ནང་གི་ཛ་དྲག་གི་གནས་སྟངས་སོགས་གསལ་བཤད་དང་། བོད་མིའི་ཆོས་དང་རིག་གཞུང་། ཡུལ་སྲོལ་གོམས་གཤིས་སོགས་རྒྱུན་འཛིན་དང་། སློབ་གྲྭ་ཁག་ཏུ་རིགས་ལམ་དང་། ནང་ཆོས་སོགས་གནའ་དེང་ཤེས་ཡོན་ཟུང་འབྲེལ་ཐོག་ཀུན་སྤྱོད་དང་ལྷག་བསམ་གལ་ཆེའི་སྐོར་དང་། དགོན་སྡེ་ཁག་ཏུ་གཞུང་ཆེན་རིགས་གཅིག་རྐང་འཛིན་དང་། རིས་མེད་གཞུང་ཆེན་བགྲོ་གླེང་ཐོག་བཤད་སྒྲུབ་ཟུང་འབྲེལ་གྱིས་དམ་ཚིག་རྡོག་རྩ་གཅིག་སྒྲིལ་དང་། དག་སྣང་ནོར་བུའི་འོད་ཀྱིས་ཁྱབ་པར་བྱས་ཏེ་རྒྱ་ཆེ་ས་ནས་རྒྱལ་བསྟན་རིན་པོ་ཆེ་སྐྱེ་འགྲོ་ཀུན་གྱི་ཕན་བདེའི་རྩ་ལག་ཏུ་འཛིན་སྐྱོང་སྤེལ་གསུམ་དགོས་སྐོར་གཞེན་སྐུལ་ནན་ཏན་རིམ་པར་ཞུས་ཤིང་། གྲོས་ཚོགས་སུའང་དེ་དག་གི་སྐོར་གཙོ་གནད་དུ་བཟུང་ཞིང་། མ་ཟད་བཙན་བྱོལ་ནང་གི་གཞི་རིམ་གྱི་ཤེས་ཡོན་སྲིད་བྱུས་ཤིག་གཏན་འབེབས་ལག་བསྟར་འགྲོ་བཞིན་པ་དེ་ལྟར་ཡང་། ད་ཡོད་མཐོ་སློབ་ཁག་བོད་མིའི་སྒྲིག་འཛུགས་ཀྱི་ཐད་ཀའི་འཛིན་སྐྱོང་འོག་ལ་མེད་ཀྱང་། མཐོ་རིམ་ཤེས་ཡོན་སྲིད་བྱུས་ཤིག་བཟོ་དགོས་ཀྱི་འབོད་སྐུལ་དང་། གཅིག་གྱུར་གྱི་ལམ་སྟོན་སྲིད་བྱུས་ཤིག་གི་འོག་ཕེབས་ཐུབ་དགོས་པའི་རེ་བ་དང་རྨི་ལམ་ཡང་རྨི་བཞིན་ཡོད།
ཞོར་དུ་ཤེས་རིག་ལས་ཁུངས་ཀྱིས་རེ་སྐུལ་ལྟར་འཛིན་རིམ་དྲུག་པ་ནས་བཅུ་གཉིས་བར་གྱི་ཚད་མའི་གཞུང་གི་རིགས་ལམ་དང་། ནང་ཆོས་ཀྱི་སློབ་དེབ་གཉིས་རྩོམ་སྒྲིག་ལེགས་གྲུབ་ཀྱིས་ད་ལོ་དཔར་བསྐྲུན་ཐོག་ལོ་རྗེས་མར་དངོས་སུ་སློབ་གྲྭ་ཁག་ཏུ་སློབ་ཁྲིད་ལག་བསྟར་བྱེད་འཆར་ཡོད་པ་སོགས་བོད་བསྟན་པ་ཆབ་སྲིད་སྤྱི་དང་། ལྷག་པར་དུ་ཞྭ་སེར་ཅོད་པན་འཆང་བ་སྤྱི་ལ་ལོ་ཤས་རིང་དུས་ཚོད་མང་པོ་བློས་གཏོང་གིས་ཞབས་ཞུ་བྱེད་རྒྱུ་བྱུང་བ་ནི། འདི་ཕྱིའི་སྐྱབས་གནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། རི་བོ་དགེ་ལུགས་པའི་གྲྭ་བཙུན་ཡོངས་ཀྱི་རྒྱབ་སྐྱོར་དང་མཐུན་འགྱུར་ཉག་གཅིག་ལ་བརྟེན་ནས་བྱུང་བ་ཡིན་པས། བཀའ་དྲིན་བསམ་ཤེས་ཐོག་ཐུགས་རྗེ་ཆེ་ཞེས་ཞུ་རྒྱུ་དང་། མི་མང་གི་སྐུ་ཚབ་ཀྱི་འགན་དབང་ནི་ཁྲིམས་སྒྲིག་དང་། གནས་བབ་གང་ཅིའི་ཐོག་ཧ་ཅང་ལྕི་བས་སྤྱི་སྒོས་ཀྱི་ལས་དོན་བྱེད་ཕྱོགས་ཐོག་དགོངས་ཕྱོགས་འགྱུར་བའི་གནས་ཚུལ་རེ་བྱུང་ཡོད་ན་ཚེ་འདི་ཕྱི་གང་དུའང་བདག་ལ་སྒྲིབ་པར་མི་འགྱུར་བའི་སྐྱབས་འཇུག་དང་བཟོད་གསོལ་ཡང་ཆབས་ཅིག་ཞུ་རྒྱུ།
གང་ལྟར་སྐབས་བཅུ་གསུམ་པའི་ཐད་བསྐོས་དང་། སྐབས་བཅོ་ལྔ་པའི་དགེ་ལུགས་སྤྱི་འཐུས་སྐབས་གཉིས་ཀྱི་རིང་བོད་བསྟན་པ་ཆབ་སྲིད་ལ་ཞབས་ཞུ་ལྷག་བསམ་རྣམ་དག་གིས་ཞུས་པའི་དགེ་བའི་རྩ་བ་ཅུང་ཟད་ཅིག་ཡོད་ན་དེ་ནི་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་དབུས་རིས་མེད་བསྟན་འཛིན་གྱི་སྐྱེས་བུ་རྣམས་ཀྱི་སྐུ་ཚེའི་ཞབས་བརྟན་དང་། བསྟན་པ་རྒྱས་ཤིང་འགྲོ་བ་བདེ་བའི་ཆེད་དུ་བསྔོས་ཤིང་། ད་ནི་རང་ཉིད་ལ་ཆོས་དང་རིག་གཞུང་གི་ལས་དོན་མང་པོ་ཞིག་སྣེ་འཛིང་གིས་སྐབས་ ༡༦ པའི་བོད་མི་མང་སྤྱི་འཐུས་ཀྱི་ལས་འགན་ལེན་རྒྱུའི་དུས་ཁོམ་གཏན་ནས་མེད་པས། འོས་གཞིའི་ནང་ཞུགས་རྒྱུ་མིན་པའི་ཐག་གཅོད་བྱེད་དགོས་བྱུང་སོང་ན། དེ་ལུགས་དགོངས་དབྱིངས་སུ་མངའ་འཚལ་ཞུ་ཞེས་དགེ་ལུགས་སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ཀྱིས་བོད་རྒྱལ་ལོ་༢༡༤༢ ཕྱི་ལོ་༢༠༡༥ ཟླ་༨ ཚེས་ ༢༥ ཉིན་གུས་པས་ཕུལ། ཞེས་བཀོད་འདུག
གསར་འགོད་པ། དོན་གྲུབ།
