ཟླ་རྗེས་མའི་ནང་རྒྱ་ནག་གི་རྒྱལ་ས་པེ་ཅིན་དུ་འཛམ་གླིང་དམག་ཆེན་གཉིས་པ་མཇུག་སྒྲིལ་ནས་ལོ་ངོ་ ༧༠ འཁོར་བའི་དུས་དྲན་སྲུང་གཙི་བྱ་རྒྱུ་ཡིན་འདུག
ཟླ་རྗེས་མའི་ཚེས་ ༣ ཉིན་པེ་ཅིན་གནམ་བདེ་སྒོ་མོ་ཆེའི་ཐང་ཆེན་དུ། རྒྱ་ནག་གཞུང་གིས་འཛམ་གླིང་དམག་ཆེན་གཉིས་པ་མཇུག་སྒྲིལ་ནས་ལོ་ངོ་ ༧༠ འཁོར་བའི་དུས་དྲན་སྲུང་གཙི་བྱ་རྒྱུ་ཡིན་པ་དང་། མཛད་སྒོའི་ཐོག་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བྷན་ཁེ་མོན་ལགས་ཀྱི་དབུས་ཨུ་རུ་སུའི་སྲིད་འཛིན་པུ་ཌིན་དང་། ལྷོ་ཀོ་རི་ཡའི་སྲིད་འཛིན་ལྕམ་པག་གྷེན་ཧེ་ (Park Geun-hye) དང་བྱང་ཀོ་རི་ཡའི་མཐོ་རིམ་དཔོན་རིགས་སོགས་རྒྱལ་སྤྱིའི་དཔོན་རིགས་ ༣༠ ཙམ་མཉམ་ཞུགས་བྱ་རྒྱུ་ཡིན་འདུག
མཛད་སྒོའི་ཐོག་རྒྱ་ནག་གི་དམག་ཆེན་གཉིས་པའི་སྐབས་ཀྱི་མཐུན་གྲོགས་རྒྱལ་ཁབ་ཁག་གི་སྐུ་ཚབ་མགྲོན་འབོད་བྱས་ནས་གཞི་རྒྱ་ཆེ་བའི་མཛད་སྒོ་ཞིག་འཚོགས་ཏེ། ཨུ་རུ་སུ་དང་རྒྱ་ནག་གི་དམག་དཔུང་གིས་དམག་རྩེད་རུ་སྒྲིག་བྱ་རྒྱུ་ཡིན་པ་ཕྱིར་བསྒྲགས་བྱས་པར་བརྟེན། ནུབ་ཕྱོགས་རྒྱལ་ཁབ་ཀྱི་མགོ་ཁྲིད་ཁག་ཅིག་གིས་དུས་དྲན་ཐོག་ཞུགས་རྒྱུ་ཕྱིར་འཐེན་བྱས་པར་བྷན་ཁེ་མོན་ལགས་ཀྱིས་གདུང་སེམས་མཉམ་སྐྱེད་བྱ་དགོས་སྐོར་གསུངས་ཡོད་སྟབས། ཉི་ཧོང་གཞུང་གིས་ཁོང་ལ་མ་འདོད་པའི་རྣམ་འགྱུར་བསྟན་འདུག
ཤིན་ཧྭ་གསར་ལམ་ཐོག་བྷན་ཁེ་མོན་ལགས་ཀྱིས། འཛམ་གླིང་དམག་ཆེན་གཉིས་པའི་སྐབས་རྒྱ་ནག་གིས་བློས་གཏོང་དང་ལེགས་སྐྱེས་ཆེན་པོ་ཕུལ་པར་རྗེས་སུ་ཡི་རང་ཞུ་རྒྱུ་དང་སྦྲགས། ཁོང་ཚོར་འཛམ་གླིང་མི་མང་གིས་གདུང་སེམས་མཉམ་སྐྱེད་ཞུ་དགོས། ང་ཚོས་འདས་པའི་ཉམས་མྱོང་བླངས་ཏེ། མ་འོངས་པའི་འཛམ་གླིང་འདི་ཞི་བདེ་དང་འཆམ་མཐུན་ལྡན་པ་ཞིག་ཏུ་འགྱུར་ཐབས་བྱ་རྒྱུ་ནི་ང་ཚོའི་དོན་དངོས་ཀྱི་ཕུགས་བསམ་ཡིན་པར་བརྟེན། ད་ལན་ང་རང་རྒྱ་ནག་ལ་བསྐྱོད་ནས་འཛམ་གླིང་དམག་ཆེན་གཉིས་པ་མཇུག་སྒྲིལ་བའི་དུས་དྲན་སྲུང་གཙི་ཞུ་རྒྱུ་ཡིན། ཞེས་བརྗོད་ཡོད་སྟབས། ཉི་ཧོང་ཕྱི་སྲིད་བློན་ཆེན་གྱིས་བྷན་ཁེ་མོན་ལགས་ནི་ལྷོ་ཀོ་རི་ཡའི་ཕྱི་སྲིད་བློན་ཆེན་ཟུར་པ་ཡིན་པ་མ་ཟད། རྒྱ་ནག་དང་ང་ཚོའི་འབྲེལ་ལམ་གང་འདྲ་ཡོད་མེད་གསལ་པོ་མཁྱེན་མཁན་ཞིག་ཡིན་སྟབས། ད་རེས་དམག་ཆེན་གཉིས་པ་མཇུག་སྒྲིལ་བའི་དུས་དྲན་ཐོག་ཕེབས་རྒྱུ་ཐག་གཅོད་གནང་བ་དེ། ང་ཚོའི་རྨ་ཁར་ཚྭ་གཤོས་པ་རང་རེད། ཅེས་བརྗོད་འདུག
ད་ལྟ་རྒྱལ་སྤྱིའི་ལོ་རྒྱུས་མཁས་པ་མང་པོ་ཞིག་གིས་ཕྱི་ལོ་ ༡༩༣༧ ལོར་ཉི་ཧོང་གིས་རྒྱ་ནག་ལ་བཙན་འཛུལ་བྱས་རྗེས། འཛམ་གླིང་དམག་ཆེན་གཉིས་པ་མགོ་བཙུགས་པ་ལས་ ༡༩༣༩ ལོར་མགོ་འཛུགས་བྱས་མེད་པའི་དཔྱད་རྩོམ་མང་པོ་ཞིག་རྒྱལ་སྤྱིའི་བརྒྱུད་ལམ་ཁག་ཏུ་སྤེལ་བཞིན་འདུག ཟླ་འདིའི་ཚེས་ ༢༨ ཉིན་རྒྱལ་སྤྱིའི་སྤྱི་ཚོགས་ཚན་རིག་ཁང་གི་སྤྱི་ཁྱབ་དྲུང་ཆེ་རོ་བྷར་ཌི་ཧྥན་ (Robert Frank) གྱིས། ཧྥ་རན་སིས་འཛམ་གླིང་དམག་ཆེན་གཉིས་པའི་དུས་སྐབས་ ༡༩༣༩ ནས་ ༡༩༤༥ ལོ་བར་ངོས་འཛིན་བྱེད་བཞིན་ཡོད་ཀྱང་། དམག་འཁྲུག་དེ་ཨེ་ཤ་ཡ་ནས་མགོ་བཙུགས་ཡོད་པ་ལས་ཡུ་རོབ་ནས་མགོ་བཙུགས་མེད་པ་མ་ཟད། ཡུ་རོབ་གྱི་དམག་འཁྲུག་ཀྱང་མིན་སྟབས། ད་ལྟ་ང་ཚོས་ཡུ་རོབ་ཀྱིས་དམག་ཆེན་གཉིས་པར་འཛིན་པའི་ལོ་ཚིགས་ལ་འགྱུར་བ་བཏང་སྟེ། དམག་འཁྲུག་དེ་ཨེ་ཤ་ཡ་ནས་མགོ་བཙུགས་ཡོད་པ་དང་ལེན་བྱེད་དགོས་ཞེས་དང་། ཡང་༼བརྗེད་ཐབས་བྲལ་བའི་མཐུན་གྲོགས། རྒྱ་ནག་གི་དམག་ཆེན་གཉིས་པ༽ (Forgotten Ally: China’s World War II, 1937-1945) ཞེས་པའི་དཔེ་དེབ་ཀྱི་རྩོམ་པ་པོ་མེ་ཋར་ (Rana Mitter) གྱིས། དབྱིན་ཡུལ་དང་ཧྥ་རན་སི། ཨ་རི་སོགས་ལ་ཕྱི་རྒྱལ་བཙན་རྒྱལ་རིང་ལུགས་ཀྱིས་དྲག་གནོན་མ་བྱས་གོང་། ༡༩༣༧ ལོར་རྒྱ་ནག་ལ་ཉི་ཧོང་གོང་དམག་གིས་བཙན་འཛུལ་བྱས་ཡོད་སྟབས། འཛམ་གླིང་དམག་ཆེན་གཉིས་པ་མགོ་འཛུགས་བྱས་ཡོད་པ་བརྗོད་ཡོད།
གསར་འགོད་པ། དོན་གྲུབ།
