ང་ཚོས་མི་མང་གི་བསམ་བློའི་རང་དབང་དང་དཔལ་འབྱོར་གྱི་རང་དབང་སྲུང་སྐྱོབ་བྱེད་མ་ཐུབ་པ་ཡིན་ན། མ་འོངས་པར་བོད་མི་རིགས་ཀྱི་ངོ་བོ་དང་འཐབ་རྩོད་ཀྱི་ངོ་བོའི་ཐད་རང་བཞིན་གྱིས་དོ་ཕོག་དང་ཉམ་ཉེས་འབྱུང་བའི་གནས་སྟངས་ཤིག་ཡོང་གི་ཡོད།
ཕྱི་ཚེས་ ༣༡ ཉིན་གྱི་སྔ་དྲོའི་ཆུ་ཚོད་ ༩།༣༠ ཐོག་གངས་སྐྱིད་གཉའ་ཁྲི་ཚོགས་ཁང་དུ། དབུས་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བོད་མིའི་ཚོང་ལས་ཡར་རྒྱས་རམ་འདེགས་ལས་གཞི་ཚན་པའི་གོ་སྒྲིག་འོག ཉིན་གཉིས་རིང་གི་བཙན་བྱོལ་བོད་མིའི་ཡར་ཐོན་ཚོང་པའི་འདུ་འཛོམས་ཟབ་སྦྱོང་དབུ་འཛུགས་གནང་སོང་བ་དང་། ཚོགས་ཐོག་ཏུ་སྐུ་མགྲོན་གཙོ་བོར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གི་དབུས་ལྷན་ཁང་ལྔ་ཡི་བཀའ་བློན་ལྷན་རྣམ་པ་དང་། དེ་བཞིན་རྒྱ་བལ་འབྲུག་གསུམ་ནས་ཆེད་དུ་བཅར་བའི་བོད་རིགས་ཚོང་པ་ ༡༠༠ ལྷག་མཉམ་ཞུགས་བྱས་འདུག
ཚོགས་ཐོག་ཏུ་སྲིད་སྐྱོང་བློ་བཟང་སེང་གེ་མཆོག་གིས་རང་ཁ་རང་གསོ་གནང་ཐབས་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་གསུང་བཤད་གནང་དོན། ང་རང་ཚོའི་དམིགས་ཡུལ་གཙོ་བོ་གསུམ་གྱི་ནང་ནས་གསུམ་པ་ནི་རང་ཁ་རང་གསོ་སྟེ། ཆབ་སྲིད་དང་སྒྲིག་འཛུགས། སྤྱི་ཚོགས་དང་ཆོས་ལུགས་རིག་གཞུང་སྐད་ཡིག དེ་བཞིན་ད་རེབ་ཀྱི་ཡར་ཐོན་ཚོང་པའི་ཟབ་སྦྱོང་ཚོགས་འདུ་དང་འབྲེལ་བའི་དཔལ་འབྱོར་བཅས་ཀྱི་ཐོག་ནས་རང་ཁ་རང་གསོ་ཐུབ་དགོས་པ་དེ་ཧ་ཅང་གལ་ཆེན་པོ་ཆགས་བསྡད་ཡོད་པ་རེད། ཉེ་ལམ་ང་ཚོའི་འཆར་འགོད་ལས་ཁུངས་ནང་ཕྱག་ལས་གནང་མཁན་ཕྱི་གླིང་ཨ་ཅག་ཅིག་གི་ཞིབ་འཇུག་སྙན་ཐོའི་ནང་། བོད་པའི་སྤྱི་ཚོགས་སྤྱི་ཡོངས་ཀྱི་དཔལ་འབྱོར་གནས་བབ་ལ་བལྟས་ཚེ། བརྒྱ་ཆའི་ ༢༦.༧ དེ་གཞིས་ཆགས་ཁག་ནང་ཞིང་ལས་བྱེད་མཁན་དང་། བརྒྱ་ཆའི་ ༢༧.༡ དེ་ཚོང་ལས་གཉེར་མཁན་ཡིན་ཡང་། ཞིང་ལས་ཀྱི་ཡོང་འབབ་དང་ཚོང་ལས་ཀྱི་ཡོང་འབབ་གཉིས་བསྡུར་ཚེ། ཞིང་ལས་བྱེད་མཁན་སྤྱིའི་ཡོངས་འབབ་བརྒྱ་ཆའི་ ༨.༤ ཟིན་ཡོད་པ་དང་། ཚོང་ལས་གཉེར་མཁན་སྤྱིའི་ཡོང་འབབ་བརྒྱ་ཆའི་ ༤༡ ཟིན་འདུག དེར་བརྟེན་ཚོང་ལས་གཉེར་མཁན་ཚོར་སྔར་ལས་ཡར་ཐོན་རམ་འདེགས་གནང་ཐུབ་པ་ཡིན་ན། དེའི་ལྡབ་འགྱུར་གྱི་ཡོང་འབབ་བརྒྱ་ཆའི་ ༨༢ ཟིན་གྱི་ཡོད་སྟབས། དེ་ནི་ཧ་ཅང་གི་ཡར་རྒྱས་ཆེན་པོ་ཞིག་ཡིན་པ་རེད། ཅེས་གསུངས་སོང་།
དཔལ་འབྱོར་བཀའ་བློན་ཚེ་རིང་དོན་འགྲུབ་མཆོག་གིས་དཔལ་འབྱོར་ལས་ཁུངས་ཀྱི་དཔལ་འབྱོར་ཡར་རྒྱས་རམ་འདེགས་ལས་གཞིའི་སྐོར་གསུངས་དོན། རྒྱལ་ཁབ་དང་མི་རིགས་གང་ཞིག་ཡིན་རུང་རྒྱལ་ཁབ་དེ་དང་དེའི་མང་ཚོགས་ཀྱི་དཔལ་འབྱོར་གནས་བབ་སྲ་བརྟན་དང་ཡར་རྒྱས་གོང་འཕེལ་འགྲོ་དགོས་པ་དེ་ལས་དོན་གལ་ཆེ་ཤོས་སུ་བརྩི་ཡི་ཡོད་པ་རེད། ང་རང་ཚོའི་འདས་པའི་ལོ་རབས་བཅུ་དགུ་ཉི་ཤུའི་ནང་ལ་ཨེ་ཤ་ཡའི་ལས་འཆར་ནང་ཚུད་པའི་རྒྱལ་ཁབ་མང་པོའི་དཔལ་འབྱོར་གནས་སྟངས་ཡར་རྒྱས་ཕྱིན་པའི་གནས་ཚུལ་དེ་འདྲ་བྱུང་ཡོད་པ་རེད། དཔེར་ན། ལྷོ་ཀོ་རི་ཡ་དང་སང་གྷ་ཕོར་ལྟ་བུར་ཆ་མཚོན་ན། ཁོ་ཚོའི་སྔོན་མའི་དཔལ་འབྱོར་འཕེལ་རིམ་དང་ད་ལྟའི་དཔལ་འབྱོར་འཕེལ་རིམ་བར་ཧེ་བག་ཆེན་པོ་ཡོད་པ་རེད། དེ་དག་ཚང་མ་དཔལ་འབྱོར་གྱི་གནས་བབ་ཡར་རྒྱས་ཕྱིན་པའི་འཕེལ་རིམ་ཞིག་ཡིན་ཞིང་། དཔལ་འབྱོར་གྱི་གནས་བབ་དེ་ཡང་ཡར་ཐོན་ཅན་གྱི་རིག་གསར་ཚོང་ལས་གཉེར་མཁན་མང་པོ་ཐོན་སྐྱེད་བྱུང་བ་དང་། བཟོ་སྐྲུན་མཁན་མང་པོ་ཐོན་སྐྱེད་བྱུང་བ། དེ་བཞིན་མང་ཚོགས་ཀྱི་ཉིན་རེའི་འཚོ་བའི་གནས་བབ་དང་ཐད་ཀར་འབྲེལ་བ་ཡོད་པའི་ཐོན་སྐྱེན་བཟོ་སྐྲུན་མཁན་མང་པོ་སྐྱེད་སྲིང་ཐུབ་པའི་ཆ་ནས་བྱུང་བ་ཞིག་རེད་ལ། ལྷག་པར་དུ་ང་རང་ཚོའི་གནས་བབ་དང་འདྲ་མཚུངས་ཡིན་པའི་ཨེ་ཛི་རལ་དེ། འཇིའུ་མི་རིགས་ཀྱི་དཔལ་འབྱོར་གནས་བབ་ལ་ཕྱིར་མིག་ཅིག་བལྟས་ན། ཁོ་ཚོའི་ལོ་ངོ་སྟོང་ཕྲག་གཉིས་ལྷག་རིང་གི་དཔལ་འབྱོར་གནས་སྟངས་དེ་དེང་སང་གི་ང་ཚོའི་དཔལ་འབྱོར་གནས་སྟངས་ལྟ་བུ་ཆགས་ཡོད་པ་རེད། ཁོ་ཚོ་ལོ་ངོ་སྟོང་ཕྲག་གཉིས་རིང་བཙན་བྱོལ་དུ་གནས་ནའང་། ཁོ་རང་ཚོའི་མི་རིགས་ཀྱི་ངོ་བོ་དང་རིག་གཞུང་སོགས་ཉམ་རྒུད་དུ་མ་སོང་བར་སྲུང་སྐྱོབ་ཐུབ་ཡོད་པ་རེད། དེའི་འབྱུང་རྐྱེན་གཙོ་བོ་ནི་ཁོ་ཚོས་དཔལ་འབྱོར་དང་ཤེས་ཡོན་གྱི་ཐོག་ལ་སྐུ་ངལ་ཚད་མེད་བསྐྱོན་པའི་འབྲས་བུ་རེད། དཔལ་འབྱོར་ཡར་རྒྱས་ཀྱི་གནས་སྟངས་དེ་ཡང་འཇིའུ་མི་རིགས་དཔལ་འབྱོར་ཡོད་མཁན་ཚོས། འཇིའུ་མི་རིགས་དབུལ་བོ་ཉམ་ཐག་ཚོར་གནས་སྐབས་འཕྲལ་སེལ་གྱི་རོགས་སྐྱོར་ཙམ་མ་ཡིན་པར། ཁོ་ཚོ་ཡང་སྤྱི་ཚོགས་ཀྱི་ཚོང་ལས་དཔལ་འབྱོར་ནང་རྐང་ཚུགས་ཐུབ་པའི་ཐད་ལ་འབད་བརྩོན་གནང་ཡོད་སྟབས། ཁོ་རང་ཚོའི་མི་རིགས་ཀྱི་ངོ་བོ་དང་རིག་གཞུང་སོགས་མ་བརླག་པའི་ཐོག་ནས་སྲུང་སྐྱོབ་ཐུབ་སོང་བ་རེད། དཔེ་དེ་བཞིན་དུ་ང་རང་ཚོའི་སྤྱི་ཚོགས་འདིའི་ནང་མང་ཚོགས་ཀྱི་བསམ་བློའི་རང་དབང་དང་དཔལ་འབྱོར་གྱི་རང་དབང་དེ་ང་ཚོས་སྲུང་སྐྱོབ་མ་ཐུབ་པ་ཡིན་ན། མ་འོངས་པར་ང་ཚོའི་མི་རིགས་ཀྱི་ངོ་བོ་དང་འཐབ་རྩོད་ཀྱི་ངོ་བོ་སོགས་ཀྱི་ཐད་ལ་རང་བཞིན་གྱིས་དོ་ཕོག་དང་ཉམ་ཉེས་འབྱུང་བའི་གནས་སྟངས་ཡོང་གི་ཡོད་པ་རེད། ཅེས་སོགས་གསུངས་སོང་།
ཕྱི་
དཔལ་འབྱོར་ནི་ཆབ་སྲིད་ཀྱི་སྲོག་རྩ་ཡིན་ཟེར་བ་དེ་ང་ཚོས་ངེས་འཛིན་གསལ་བོ་བྱ་དགོས།