འོས་བསྡུའི་སྒྲིག་གཞིར་གསལ་བཤད་དང་ལམ་སྟོན་གནང་སོང་།

དབུས་འོས་བསྡུ་ལས་ཁང་ནས་འོས་གཞིའི་སྐྱེ་བོ་དང་དེའི་ཕྱོགས་གཏོགས་ཚོ་འོས་བསྡུའི་སྒྲིག་གཞི་དང་འགལ་གྱི་ཡོད་ན་དཔང་རྟགས་དང་བཅས་དབུས་སར་ཞུ་གཏུག་དགོས་པའི་འབོད་སྐུལ་གནང་སོང་།

དེ་རིང་སྔ་དྲོའི་ཆུ་ཚོད་ ༡༠ པའི་སྟེང་གངས་སྐྱིད་ལྷག་པ་ཚེ་རིང་ཚོགས་ཁང་དུ། དབུས་འོས་བསྡུ་ལས་ཁང་གི་ངོས་ནས་ལོ་འདིའི་ཟླ་ ༦ ཚེས་ ༡༠ ཉིན་འོས་བསྡུའི་སྒྲིག་གཞི་དོན་ཚན་ ༢༤ པའི་ནང་གསེས་༩ པ་སྟེ་འོས་བསྡུ་ཆེན་མོ་དང་འབྲེལ་བའི་ལམ་སྟོན་དོན་ཚན་ ༩ ཅན་ཞིག་གསལ་བསྒྲགས་གནང་བ་དང་། དེ་བཞིན་ཕྱི་ཟླ་ ༧ པའི་ཚེས་ ༢༥ ཉིན་ལམ་སྟོན་དོན་ཚན་ ༩ དང་འགལ་འཛོལ་བྱུང་བ་དངོས་ར་འཕྲོད་བྱུང་ཚེ། སྐབས་དང་བསྟུན་ནས་ཉེས་ཆད་ལག་བསྟར་གནང་རྒྱུ་ཡིན་སྐོར་གསལ་གསལ་བསྒྲགས་གནང་ཡོད་པ་ལྟར། འོས་བསྡུའི་སྒྲིག་གཞི་དོན་ཚན་ ༢༤ པའི་ནང་གསེས་ཁག་ཅིག་གི་ཐོག་མང་ཚོགས་ཁྲོད་གོ་བ་ལེན་ཕྱོགས་འདྲ་མིན་ཡོང་བཞིན་པར་གསལ་བཤད་དང་ལམ་སྟོན་གྱི་གསར་འགོད་གསལ་བསྒྲགས་ཤིག་གནང་སོང་།

གསར་འགོད་ལྷན་ཚོགས་ཐོག་དབུས་འོས་བསྡུའི་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་ཀྱིས་ཡིག་ཐོག་ནས་བསྒྲགས་གཏམ་སྒྲོགས་སྦྱངས་གནང་བའི་ནང་། འོས་བསྡུའི་སྒྲིག་གཞི་དོན་ཚན་ ༢༤ ཡི་ནང་གསེས་ ༢ པ་འོས་གཞིའམ་འོས་འཕེན་པའི་སྐྱེ་བོ་ལ་དྲག་ཤུགས་ཀྱི་འཇིགས་སྣང་སྐུལ་བ་ཡང་ན། སྐྱེ་བོ་གང་དག་འོས་གཞིར་འཛུལ་འཐེན་སོགས་ཀྱི་འོས་བསྡུའི་རང་དབང་ལ་ཐེ་བྱུས་འགལ་རྐྱེན་བྱེད་པའི་འགལ་འཛོལ་དངོས་ར་འཕྲོད་བྱུང་ཚེ། སྐྱེ་བོ་དེར་ལོ་ ༡༠ རིང་གཞུང་འབྲེལ་འོས་འཕེན་གྱི་ཐོབ་ཐང་འཕྲོག་རྒྱུའི་འགྲེལ་བཤད། “ འོས་གཞིའམ་འོས་འཕེན་པའི་སྐྱེ་བོ་ཞིག་ལ་ཐལ་ཆ་ཆེ་བའི་ལུས་ངག་གང་རུང་གི་དྲག་ཤུགས་ཀྱིས་འཇིགས་སྣང་བསྐུལ་ཏེ་དམངས་གཙོའི་གལ་གནད་ཆེ་ཤོས་འོས་བསྡུའི་རང་དབང་ལ་ཐེ་བྱུས་དང་། འགལ་རྐྱེན་བྱས་པར་བརྟེན་ནས་འོས་གཞིར་ལངས་མ་ཐུབ་པ་དང་། མི་འདོད་བཞིན་དུ་འོས་བསྡུ་བྱེད་དང་མི་བྱེད་པ་ཞིག་ལ་གོ་དགོས། ”

ནང་གསེས་ ༣ པ་འོས་གཞིའི་སྐྱེ་བོ་གཞན་ཞིག་གམ་དེའི་ཕྱོགས་གཏོགས། ཡང་ན་སྐྱེ་བོ་སུ་རུང་ནས་སྐྱེ་བོ་གཞན་ཞིག་ལ་འོས་བསྡུའི་རྒྱལ་ཁ་མ་ཐོབ་ཆེད། གཞི་མེད་སྒྲོ་བཏགས་ཀྱིས་སྐྱོན་བརྗོད་དམའ་འབེབས་བྱེད་པ་དང་། སྤྱི་ཚོགས་འཁོན་འཁྲུག་འབྱུང་གཞིའི་རྐྱེན་སློང་བ་སོགས་ཀྱི་འགལ་འཛོལ་དངོས་ར་འཕྲོད་བྱུང་ཚེ། འགལ་ཚབས་ཆེ་བར་ངོས་འཛིན་གྱིས་འོས་གཞི་སྐྱེ་བོ་དེའི་འོས་ཤོག་ཆ་ཚང་རྩིས་མེད་དང་། དེའི་ཕྱོགས་གཏོགས་ཚོར་ལོ་ ༡༠ རིང་གཞུང་འབྲེལ་སྡེ་ཚན་གང་དུའང་འོས་འཕེན་ཐོབ་ཐང་འཕྲོག་རྒྱུ་ཡིན་པའི་འགྲེལ་བཤད། “འོས་གཞིའི་སྐྱེ་བོ་གཞན་ཞིག་གམ། དེའི་ཕྱོགས་གཏོགས། གཞན་ཡང་སྐྱེ་བོ་སུ་རུང་ནས་སྐྱེ་བོ་གཞན་ཞིག་ལ་འོས་བསྡུའི་རྒྱལ་ཁ་མ་ཐོབ་པའི་བསམ་སྦྱོར་ངན་པས་ཀུན་ནས་བླངས་ཏེ་གཞི་མེད་སྒྲོ་བཏགས་ཀྱིས་སྐྱོན་བརྗོད་དམའ་འབེབས་བྱེད་པ་དང་། ལུང་ཚན། ཆོས་བརྒྱུད། སྤྱི་ཚོགས་བཅས་ཀྱི་དབར་དབྱེན་སྦྱོར་གྱིས་ཕན་ཚུན་འཁོར་འཁྲུག་ས་གནང་གང་ཞིག་ཏུ་དངོས་སུ་བྱུང་སྟེ་དེའི་རྐྱེན་གྱིས་ས་གནས་གཞན་དུའང་གཅིག་མཚུངས་ཕན་ཚུན་འཁོན་འཁྲུག་གཅིག་མཇུག་གཉིས་ལངས་ཀྱིས་སྤྱི་ཚོགས་ཟང་ཟིང་དངོས་སུ་བྱུང་བ་ཞིག་ལ་གོ་བ་ཡིན།”

ནང་གསེས་ ༥ པ་འོས་གཞི་སུ་ཐད་ནས་འོས་བསྡུའི་ལས་དོན་སྐོར་མི་མང་སྐོང་ཚོགས་ཀྱིས་དྲང་བདེན་མིན་པའི་གནས་ཚུལ་གསལ་བསྒྲགས་དང་ཡིག་ཆ་འགྲེམས་སྤེལ་གྱི་འགལ་འཛོལ་དངོས་ར་འཕྲོད་བྱུང་ཚེ། ཉེས་ཆད་ནི་འོས་མི་དེའི་འོས་ཐོབ་ཆ་ཚང་རྩིས་མེད་གཏོང་རྒྱུའི་འགྲེལ་བཤད། “འོས་མི་དེའི་ཐོབ་ཆ་རྩིས་མེད་ཀྱི་ཉེས་ཆད་གཏོང་རྒྱུའི་འགྲེལ་བཤད་དུ། འོས་གཞི་སུ་ཐད་ནས་དབུས་སའི་འོས་བསྡུའི་ལས་དོན་བྱེད་ཕྱོགས་ཐོག་དྲང་བདེན་མིན་པའི་གནས་ཚུལ་ཁྱབ་སྤེལ་བྱེད་པ་དང་། ཁུངས་མེད་ཡིག་ཆ་འགྲེམས་སྤེལ་བྱེད་པ་ཞིག་ལ་གོ་བ་ཡིན།”

གནང་གསེས་ ༨ པ་འོས་བསྡུའི་ལས་རིམ་གསལ་བསྒྲགས་ཟིན་པའི་ཉིན་མོ་ནས་སྲིད་སྐྱོང་དང་བཀའ་བློན། སྤྱི་འཐུས་བཅས་འབྲེལ་ཡོད་འོས་གཞིའི་ནང་ཞུགས་བློ་ཡོད་ཚེ། སྒྲིག་འཛུགས་དང་གཞུང་འབྲེལ་མིན་པའི་ཚོགས་པ་ཁག་གིས་འོས་བསྡུ་དང་འབྲེལ་བའི་བགྲོ་གླེང་ཚོགས་འདུའི་ནང་། གཞུང་འབྲེལ་གྱི་ངོ་བོར་ཚོགས་བཅར་མི་ཆོག་པ་མ་ཟད། བོད་མིའི་སྒྲིག་འཛུགས་ཀྱི་ལས་བྱེད་དང་དངུལ་དངོས་གང་ཡང་བེད་སྤྱོད་གཏོང་མི་ཆོག གཞུང་འབྲེལ་ཕྱོགས་སྐྱོད་ཀྱི་སྐབས་སུ་འོས་བསྡུ་དང་འབྲེལ་བའི་གཏམ་བཤད་བྱེད་མི་ཆོག ས་གནས་གང་དུའང་དེ་ལྟར་བྱས་འཛོལ་དངོས་ར་འཕྲོད་པ་བྱུང་ཚེ། འོས་གཞི་དེར་ས་གནས་དེའི་འོས་ཐོབ་ཆ་ཚང་རྩིས་མེད་གཏོང་རྒྱུའི་འབྲེལ་ཡོད་ལམ་སྟོན། “གཞུང་འབྲེལ་ཕྱོགས་བསྐྱོད་སྐབས་འོས་བསྡུ་དང་འབྲེལ་བའི་གཏམ་བཤད་རིགས་བྱ་མི་ཆོག་ཅེས་པ་ལ། གཞུང་འབྲེལ་ཕྱོགས་བསྐྱོད་སྐབས་སུ་ལས་དོན་དེ་དང་འབྲེལ་བའི་གནད་དོན་ཁོ་ན་མ་གཏོགས། དེ་མིན་དངོས་སུ་སོ་སོ་རང་ཉིད་ལ་འོས་བསྡུའི་རྒྱལ་ཁ་ཐོབ་ཆེད་འདས་པའི་ལས་དོན་བྱས་འབྲས་དང།  མ་འོངས་བྱེད་འཆར་སོགས་ཀྱི་གཏམ་བཤད་རིགས་སྐབས་དུས་གང་དུ་ཡང་དངོས་ཤུགས་བརྒྱུད་གསུམ་ནས་མི་ཆོག་པ་ལ་གོ་བ་ཡིན། གལ་སྲིད་གཞུང་འབྲེལ་ཕྱོགས་བསྐྱོད་སྐབས་ས་གནས་སུ་གཞུང་འབྲེལ་མ་ཡིན་པའི་ཚོགས་སྡེ་གང་རུང་གིས་འོས་བསྡུ་དང་འབྲེལ་བའི་བགྲོ་གླེང་གོ་སྒྲིག་ཐོག་གདན་ཞུ་བྱུང་རིགས་གཞུང་འབྲེལ་ལས་དུས་ལ་དོ་ཕོགས་མེད་ཚེ་སྒེར་ངོས་ནས་བསྐྱོད་འཐུས།”ཅེས་དང་།

ཡང་འོས་བསྡུ་དང་འབྲེལ་བའི་ལམ་དོན་དོན་ཚན་ ༩ བའི་ནང་གསེས་གཉིས་པ། གཞུང་འབྲེལ་ངོས་ལེན་ཡོད་པའི་ཚོགས་པ་ཁག་ཕུད་སྤྱི་སྒེར་སུ་ནས་སྲིད་སྐྱོང་དང་སྤྱི་འཐུས་འོས་མིའི་ཡིག་ཐོག་ཆོག་མཆན་མེད་པར་ས་གནས་གང་དུ་ཡང་རྒྱབ་གཉེར་གསལ་བསྒྲགས་དང་དེ་འབྲེལ་འགྲོ་སོང་གཏོང་མི་ཆོག ཆོག་མཆན་ཡོད་པའི་འགྲོ་སོང་ཁག་འོས་གཞིར་ཡོད་པའི་སྐྱེ་བོ་དེའི་འོས་བསྡུ་དང་འབྲེལ་བའི་འགྲོ་གྲོན་རྩིས་ཁྲའི་ཁོངས་སུ་བརྩི་དགོས། དེ་ལྟར་འགལ་འཛོལ་དངོས་ར་འཕྲོད་བྱུང་ཚེ། སྒྲིག་དོན་ལོ་ལྔ་རིང་གཞུང་འབྲེལ་སྡེ་ཚན་གང་དུ་ཡང་འོས་འཕེན་ཐོབ་ཐང་འཕྲོག་རྒྱུའི་སྐོར་གྱི་འགྲེལ་བཤད། “བོད་མིའི་སྒྲིག་འཛུགས་ནས་ངོས་ལེན་ཡོད་པའི་གཞུང་འབྲེལ་མ་ཡིན་པའི་ཚོགས་པ་ཁག་ནི། དབུས་གཙང་དང་། མདོ་སྟོད།  མདོ་སྨད། བོད་ཀྱི་གཞོན་ནུ་ལྷན་ཚོགས། བོད་ཀྱི་བུད་མེད་ལྷན་ཚོགས། བོད་ཀྱི་རྒྱལ་ཡོངས་མང་གཙོ་ཚོགས་པ། བོད་ཀྱི་དགུ་བཅུ་གསུམ་ལས་འགུལ་ཚོགས་པ། མངའ་རིས་སྤྱི་མཐུན་ཚོགས་པ། བོད་ཀྱི་རྒྱལ་ཡོངས་ཆིག་བསྒྲིལ་ཚོགས་པ། བོད་ཀྱི་རྒྱལ་ཡོངས་ཆབ་སྲིད་བཙོན་གྲོལ་ཚོགས་པ། བལ་ཡུལ་སྤོག་ར་གློ་སྒྲིག་བདེ་དོན་བཅས་དབུས་ཚོགས་པ་བཅུ་གཅིག་ལ་གོ་བ་ཡིན། གཞན་ཡང་འོས་གཞིའི་སྐྱེ་བོ་དེས་རྒྱབ་སྐྱོར་གསལ་བསྒྲགས་བྱེད་འཐུས་ཆོག་པའི་ཡིག་ཐོག་ཆོག་མཆན་གནང་བའི་ངོ་བཤུས་འབྲེལ་ཆགས་ས་གནས་འོས་བསྡུ་ལས་ཁང་དུ་ངེས་འབུལ་དགོས་པ་ཡིན།”

གསུམ་པ། འོས་མིའི་འོས་བསྡུའི་དྲིལ་བསྒྲགས་དང་འབྲེལ་བའི་བྱུང་སོང་རྩིས་ཁྲ་མཐའ་དག་དངོས་གཞིའི་འོས་བསྡུའི་གྲུབ་འབྲས་གསལ་བསྒྲགས་མ་ཟིན་གོང་འོས་མི་ཡོང་ཁུངས་སོ་སོའི་ས་གནས་འོས་བསྡུ་ལས་ཁང་དུ་འབུལ་དགོས། བྱུང་སོང་རྩིས་ཁྲ་མཐའ་དག་རྩིས་ཞིབ་སྐབས་དགོས་མཁོའི་རྒྱབ་ལྗོངས་དན་རྟགས་མཉམ་སྦྱར་དགོས་པ་ལྟར། དགོས་ངེས་རྣམས་ཆ་ཚང་ཁམས་གཙང་དུས་ཐོག་མ་ཕུལ་བ་ཡིན་ན། འོས་གཞི་སྐྱེ་བོ་གང་དེའི་འོས་ཐོབ་ཀྱི་བརྒྱ་ཆ་ ༡༠ གཅོག་རྒྱུའི་སྐོར་གྱི་འབྲེལ་ཡོད་ལམ་སྟོན། “འོས་གཞི་སྐྱེ་བོ་སོ་སོའི་འོས་བསྡུའི་དྲིལ་བསྒྲགས་དང་འབྲེལ་བའི་བྱུང་སོང་རྩིས་ཁྲ་ཁམས་གཙང་དུས་ཐོག་ཕུལ་མིན་དང། དངུལ་འབོར་ཚད་གཞི་ལས་བརྒལ་མིན། དངུལ་འབོར་ཁྲིམས་མཐུན་ཡིན་མིན་བཅས་ལ་ས་གནས་འོས་བསྡུ་ལས་ཁང་གིས་ཞིབ་འཇུག་གང་གནང་བ་དེར་རྩ་འཛིན་ཞུ་དགོས།”

བཞི་བ། སྲིད་སྐྱོང་དང་སྤྱི་འཐུས་སུ་འོས་པའི་མི་འགྲོ་དམིགས་འཛུགས་ཀྱིས་རྒྱབ་གཉེར་ཡིག་ཆ་དང་དྲིལ་བསྒྲགས་སྦྱར་ཡིག་སོགས་ལ་འགལ་འཛོལ་རིགས་དངོས་ར་འཕྲོད་བྱུང་ཚེ། ལོ་ལྔ་རིང་གཞུང་འབྲེལ་སྡེ་ཚན་གང་དུ་ཡང་འོས་འཕེན་ཐོབ་ཐང་འཕྲོག་རྒྱུའི་ཉེས་ཆད་སྐོར་ལ་འབྲེལ་ཡོད་ལམ་སྟོན། “སྲིད་སྐྱོང་ངམ། སྤྱི་འཐུས་སུ་འོས་པའི་མི་འགྲོ་དམིགས་འཛུགས་ཀྱིས་རྒྱབ་གཉེར་གསལ་བསྒྲགས་ཡིག་ཆ་དང། ལྟེབ་ཤོག་འགྲེམ་སྤེལ། གྱང་སྦྱོར་པར་རིས་གསལ་བསྒྲགས་སོགས་ཀྱི་ནང་འགྲེམ་སྤེལ་དང་དཔར་སྐྲུན་བྱེད་པོ་སུ་རུང་གི་མིང་དང་ཁ་བྱང་ཁ་གསལ་ངོས་འཛིན་ཐུབ་པ་འབྲི་བཀོད་མེད་པའི་རིགས་ཡིག་འཁྱམ་དུ་ངོས་འཛིན་ཞུ་རྒྱུ།”

ལྔ་བ། འོས་གཞིར་ཞུགས་མཁན་སུ་ཐད་ནས་ཀྱང་སྐབས་དོན་སོ་སོར་འོས་བསྡུའི་རྒྱལ་ཁ་ཐོབ་ཆེད་དུ་དྲིལ་བསྒྲགས་ཡིག་ཆའི་ཐོག་༧གོང་ས་མཆོག་གི་སྐུ་པར་དང་། བོད་མིའི་སྒྲིག་འཛུགས་ཀྱི་ལས་རྟགས། རྒྱལ་དར་དང་བོད་ཀྱི་ས་ཁྲ་བཅས་བེད་སྤྱོད་བྱེད་མི་ཆོག གལ་སྲིད་དེ་འདྲའི་བྱས་འཛོལ་དངོས་ར་འཕྲོད་པ་བྱུང་ཚེ། འོས་གཞི་སྐྱེ་བོ་གང་དེའི་འོས་ཐོབ་ཀྱི་བརྒྱ་ཆ་ ༥ རྩིས་མེད་གཏོང་རྒྱུའི་ཉེས་ཆད་སྐོར་གྱི་འབྲེལ་ཡོད་ལམ་སྟོན། “དེ་ལྟར་བེད་སྤྱོད་མི་ཆོག་ཅེས་པའི་གཙོ་གནད་ནི་རང་ཉིད་འོས་བསྡུའི་རྒྱལ་ཁ་ཐོབ་ཆེད་དུ་དམིགས་ཏེ་རྒྱབ་ལྗོངས་ལ་གསར་དུ་གོང་གསལ་པར་རིས་དེ་དག་བེད་སྤྱོད་མི་ཆོག་པ་ལས། རང་གི་མི་ཚེའི་བྱུང་བའི་ནང་ལས་དོན་སྐབས་དང་ལས་དོན་སྒྲུབ་ཡུལ་སོགས་སུ་པར་རིས་དེ་དག་ཡོད་པ་ཙམ་ལ་གོ་བ་མིན། པར་བསྐྲུན་དང་འགྲེམ་སྤེལ་བྱེད་མཁན་གྱི་མིང་བྱང་ཁ་གསལ་མེད་ཚེ་རྩིས་མེད་གཏོང་རྒྱུ། གལ་སྲིད་སྐྱེ་བོ་སུ་རུང་ནས་དེ་ལྟར་བྱས་འཛོལ་དངོས་ར་འཕྲོད་པ་བྱུང་ཚེ་ལོ་ ༥ རིང་གཞུང་འབྲེལ་སྡེ་ཚན་གང་དུ་ཡང་འོས་འཕེན་པའི་ཐོབ་ཐང་འཕྲོག་རྒྱུ།”

བདུན་པ། འོས་བསྡུ་དང་འབྲེལ་བའི་དྲིལ་བསྒྲགས་བྱེད་སྒོ་ཁག་གནས་ཡུལ་རྒྱལ་ཁབ་སོ་སོའི་ཡུལ་ཁྲིམས་དང་མ་འགལ་བ་བྱེད་པར་འགལ་འཛོལ་དངོས་ར་འཕྲོད་པ་བྱུང་ཚེ། འོས་གཞི་དེར་ལོ་ལྔ་རིང་འོས་གཞིར་ཞུགས་རྒྱུའི་ཐོབ་ཐང་དང་། གཞན་སྐྱེ་བོ་སུ་རུང་ལ་ལོ་ལྔ་རིང་གཞུང་འབྲེལ་སྡེ་ཚན་གང་དུ་ཡང་འོས་འཕེན་ཐོབ་ཐང་འཕྲོག་རྒྱུའི་ཉེས་ཆད་སྐོར་གྱི་ལམ་སྟོན། “དེ་ལྟའི་གནས་སྟངས་བྱུང་ཚེ་ས་གནས་འོས་བསྡུ་ལས་ཁང་དང་མང་ཚོགས་ནས་པར་རིས་དང། གསལ་བསྒྲགས་ཡིག་ཆ་རྣམས་འཕྲལ་མར་བཀོག་སྟེ་མ་འོངས་པའི་དགོས་མཁོའི་ཆེད་ཉར་ཚགས་བྱེད་དགོས།”ཞེས་གསུངས་སོང་།

མཇུག་ཏུ་ཁོང་གིས་འོས་བསྡུ་དང་འབྲེལ་བའི་འབོད་སྐུལ་གནང་དོན། བཙན་བྱོལ་བོད་མིའི་འོས་བསྡུའི་སྒྲིག་གཞི་སྤྱི་དང། ལྷག་དོན་འོས་སྒྲིག་དོན་ཚན་ ༢༤ ནང་གསེས་ཁག་དང་བཅས་པར་དབུས་འོས་བསྡུ་ལས་ཁང་ནས་གཏན་འབེབས་ལམ་སྟོན་གནང་བ་ཁག་ལ་སྐྱེ་བོ་སུ་རུང་གིས་ས་གནས་གང་དུ་འགལ་འཛོལ་བྱས་པ་དངོས་ར་འཕྲོད་པ་བྱུང་ཚེ། དཔང་རྟགས་དང་བཅས་པ་སྐབས་འཕྲལ་ས་གནས་འོས་བསྡུ་ལས་ཁང་དུ་སྙན་གསན་ཞུ་དགོས་པ་ཡིན། དེ་མིན་སྐྱེ་བོ་སུ་རུང་ལ་བོད་མིའི་ཡ་རབས་བཟང་སྤྱོད་དང་འགལ་ཞིང་། བོད་མི་ནང་ཁུལ་དབྱེན་སྦྱོར་དཀྲུགས་ཤིང་གི་གཞིར་གྱུར་བའི་དྲང་བདེན་མིན་པའི་སྐྱོན་བརྗོད་དང། དམའ་འབེབས་ཟུར་ཟ་སོགས་དགྲ་དགའ་གཉེན་སྡུག་གི་འཆལ་གཏམ་རིགས་དྲ་ལམ་སོགས་སུ་གང་བྱུང་མི་སྤེལ་བའི་འབོད་སྐུལ་ནན་པོ་ཞུ་རྒྱུ་ཡིན། ཞེས་གསུངས་སོང་།

དེ་རྗེས་དྲི་བ་དྲིས་ལན་གྱི་སྐབས་སུ། གསར་འགོད་པ་ཞིག་གིས་གཞུང་འབྲེལ་གྱི་སྡིངས་ཆ་བེད་སྤྱོད་བཏང་ནས་སོ་སོའི་འདས་པའི་ལས་དོན་དང་མ་འོངས་ལས་འཆར་སོགས་དྲིལ་བསྒྲགས་བྱས་པ་དེ་འགྲིག་གི་མ་རེད་གསུང་གིན་ཡོད་ཀྱང་། མི་མང་གི་ངོས་ནས་ཡར་འོས་བསྡུ་ལས་ཁང་ལ་དེ་འདྲ་བྱས་སོང་ཞེས་སྙན་སེང་ཞུ་རྒྱུ་དཀའ་ལས་ཁག་པོ་རེད་བསམ་གྱི་ཡོད། གཞུང་འབྲེལ་གྱི་སྡིངས་ཆ་བེད་སྤྱོད་བཏང་ན་གཞུང་འབྲེལ་བརྙན་པར་སྡེ་ཚན་དང་གསར་འགོད་པ་ཡོད་དུས། འོས་བསྡུ་ལས་ཁང་ནས་འགན་ག་རེ་བྱས་ནས་ཁུར་ཐུབ་ཀྱི་མེད་པ་རེད། ཅེས་འདྲི་པར། འདིའི་གོང་ལ་གནས་ཚུལ་དེའི་ས་མཚམས་གསལ་བོ་ཆགས་ཡོད་པ་རེད་བསམ་གྱི་ཡོད། ཡིན་ན་ཡང་། ང་ཚོ་དབུས་འོས་བསྡུ་ལས་ཁང་ལ་མི་གསུམ་མ་གཏོགས་ཡོད་པ་མ་རེད། ས་གནས་ཆ་ཚང་ལ་འོས་བསྡུ་ལས་བྱེད་ཡོད་བསྡད་པ་ཞིག་རེད། ས་གནས་འོས་བསྡུ་ལས་ཁང་ནས་འགན་གཙོ་བོ་ལེན་དགོས་དང་། ས་གནས་གང་ནས་གནས་ཚུལ་བྱུང་བ་ཡིན་ན་ང་ཚོས་དེ་ལ་ངོས་འཛིན་བྱེད་དགོས་པ་ཞིག་དང་། དེ་ལས་མང་ཆེ་ཤོས་མི་མང་ཆགས་ཡོད་དུས་མི་མང་གི་ངོས་ནས་འགན་ཁུར་དགོས་པ་ཞིག་རེད། ང་ཚོས་འགན་ཁུར་གྱི་མིན་ཞེས་ལབ་ཀྱི་ཡོད་པ་མ་རེད། ཨམ་མཆོག་དང་མིག་མང་ཆེ་ཤོས་དེ་མི་མང་ལ་ཡོད་པ་རེད། དེ་ནས་ས་གནས་འོས་བསྡུ་ལས་ཁང་ཁག་ཆགས་ཡོད་པ་རེད། ང་ཚོ་དབུས་ལ་མི་གསུམ་མ་གཏོགས་མེད་དུས་ང་ཚོ་ཚང་མས་ཧུར་ཐག་བྱེད་དགོས་པ་ཞིག་ཆགས་བསྡད་ཡོད་པ་རེད། ཅེས་བརྗོད་སོང་།

གཞན་ཡང་། ལྷན་ཚོགས་ཐོག་དབུས་འོས་བསྡུ་ལས་ཁང་གི་འགན་འཛིན་ལས་རོགས་བསྟན་འཛིན་ཆོས་འཕེལ་ལགས་ཀྱིས་སྲིད་སྐྱོང་འོས་བསྡུའི་དུས་ཚེས་དང་ལས་རིམ་གཏན་འབེབས་སྒྲོག་སྦྱངས་གནང་ནང་།

༡༽ འོས་བསྡུའི་ལས་དོན་བྱེད་ཕྱོགས་དང་ལས་རིམ་གཏན་འབེབས་རེའུ་མིག་ས་གནས་ཁག་ལ་གཏོང་རྒྱུའི་དུས་ཚེས་༢༠༡༥ ལོའི་ཟླ་ ༩ ཚེས་ ༢༦ ཉིན།

༢༽ གོང་གསལ་བཀོད་ཁྱབ་ས་གནས་སུ་འབྱོར་རྒྱུའི་ལམ་འགོར་དུས་ཚེས་༢༠༡༥ ལོའི་ཟླ་ ༩ ཚེས་ ༢༧ ནས་ཟླ ༡༠ ཚེས་ ༦ ཉིན།

༣༽ ས་གནས་སུ་མང་ཚོགས་འདུ་འཛོམས་དང་དྲིལ་བསྒྲགས་བྱ་རྒྱུའི་དུས་ཚེས་༢༠༡༥ ལོའི་ཟླ་ ༡༠ ཚེས་ ༧ ཉིན་ནས་ཚེས་ ༡༧ ཉིན།

༤༽ སྲིད་སྐྱོང་གི་སྔོན་འགྲོའི་འོས་དམིགས་འདེམས་སྒྲུག་གིས་འོས་བསྡུ་བྱ་རྒྱུའི་དུས་ཚེས་༢༠༡༥ ལོའི་ཟླ་ ༡༠ ཚེས ༡༨ ཉིན།

༥༽ ས་གནས་སུ་སྔོན་འགྲོའི་འོས་ཤོག་གྲངས་བཤེར་བྱ་རྒྱུའི་དུས་ཚེས་༢༠༡༥ ལོའི་ཟླ་ ༡༠ ཚེས་ ༡༩ ཉིན་ནས་ཚེས་ ༢༦ ཉིན།

༦༽  སྔོན་འགྲོའི་འོས་ཤོག་བྱུང་སོང་བསྡད་གསུམ་གྱི་གནས་སྟངས་དང་གྲངས་བཤེར་ཕྱོགས་བསྡོམས་དབུས་འོས་བསྡུ་ལས་ཁང་དུ་དུས་བཀག་ནང་ཚུན་འབུལ་འབྱོར་ཐུབ་པ་དགོས་རྒྱུའི་དུས་ཚེས་༢༠༡༥ ལོའི་ཟླ་ ༡༠ ཚེས་ ༢༧ ཉིན་ནས་ཟླ་ ༡༡་ ཚེས་ ༡༣ ཉིན།

༧༽ ས་གནས་ཁག་ནས་འོས་དམིགས་ཕྱོགས་བསྡོམས་འབྱོར་བསྡད་རྣམས་དབུས་ནས་ངང་བསྒུག་བྱ་རྒྱུའི་དུས་ཚེས་༢༠༡༥ ལོའི་ཟླ་ ༡༡་ ཚེས་ ༡༤ ཉིན་ནས་ཚེས ༡༩ ཉིན།

༨༽ དབུས་འོས་བསྡུ་ལས་ཁང་ནས་སྔོན་འགྲོའི་འོས་ཤོག་གྲངས་བཤེར་ཕྱོགས་བསྡོམས་བྱ་རྒྱུའི་དུས་ཚེས་༢༠༡༥ ལོའི་ཟླ་ ༡༡ ཚེས་ ༢༠ ནས་ཟླ་ ༡༢  ཚེས་ ༤ ཉིན།

༩༽ དབུས་འོས་བསྡུ་ལས་ཁང་ནས་སྔོན་འགྲོའི་འོས་གཞི་གསལ་བསྒྲགས་ས་གནས་ཁག་ཏུ་གཏོང་ཚེས་དང་དངོས་གཞིའི་འོས་དམིགས་གསལ་བསྒྲགས་མ་བྱས་པར་གྱི་དུས་ཡུན་དེའི་རིང་ས་གནས་འོས་བསྡུ་ལས་ཁང་སོ་སོའི་ཁྱབ་ཁོངས་སུ་དངོས་གཞིར་ཞུགས་མཁན་རྣམས་ཀྱི་ངོ་སྤྲོད་ལོ་རྒྱུས་སྙིང་བསྡུས་དང་། ཉེ་ཆར་རྒྱབ་པའི་ཕྱེད་པར་ཚོན་ཁྲ་ཅན་རེ་བསྡུ་ལེན་གྱིས་དབུས་འོས་བསྡུ་ལས་ཁང་དུ་འབུལ་དགོས་པ་དང་། འོས་གཞིར་ཞུགས་འདུན་མེད་རིགས་ནས་དགོངས་ཤོག་འབུལ་རྒྱུའི་དུས་ཚེས་༢༠༡༥ ལོའི་ཟླ་ ༡༢ ཚེས་ ༥ ཉིན་ནས་ཚེས་ ༢༤ ཉིན།

༡༠༽ དབུས་འོས་བསྡུ་ལས་ཁང་ནས་དངོས་གཞིའི་འོས་གཞི་གསལ་བསྒྲགས་བྱ་རྒྱུའི་གྲ་སྒྲིག་དུས་ཚེས་༢༠༡༥ ལོའི་ཟླ་ ༡༢ ཚེས་ ༢༥ ཉིན་ནས་ ༢༠༡༦ ལོའི་ཟླ་ ༢ ཚེས་ ༢ ཉིན།

༡༡༽ དབུས་འོས་བསྡུ་ལས་ཁང་ནས་དངོས་གཞིའི་འོས་གཞི་གསལ་བསྒྲགས་བྱ་རྒྱུའི་དུས་ཚེས་༢༠༡༦ ལོའི་ཟླ་ ༢ ཚེས་ ༣ ཉིན།

༡༢༽ དངོས་གཞིའི་འོས་གཞི་གསལ་བསྒྲགས་བྱ་རྒྱུའི་དུས་ཚོད་དང་། འོས་ཤོག་ས་གནས་སུ་འགྲེམས་གཏོང་གི་འགོར་ཡུན་དུས་ཚེས་༢༠༡༦ ལོའི་ཟླ་ ༢ ཚེས་ ༤ ཉིན་ནས་ཟླ་ ༣ ཚེས ༡༩ ཉིན།

༡༣༽ སྲིད་སྐྱོང་གི་དངོས་གཞིའི་འོས་བསྡུ་ཆེན་མོའི་དུས་ཚེས་ཏེ་ ༢༠༡༦ ལོའི་ཟླ ༣ ཚེས་ ༢༠ ཉིན།

༡༤༽ ས་གནས་སོ་སོའི་དངོས་གཞིའི་འོས་བསྡུ་མཇུག་བསྒྲིལ་གྱིས་འོས་ཤོག་གྲངས་བཤེར་ཕྱོགས་བསྡོམས་བྱ་རྒྱུའི་དུས་ཚེས་༢༠༡༦ ལོའི་ཟླ་ ༣ ཚེས་ ༢༡ ཉིན་ནས་ཚེས་ ༢༧ ཉིན།

༡༥ ༽ ས་གནས་ནས་འོས་ཤོག་བྱུང་སོང་བསྡད་གསུམ་གྱི་གནས་སྟངས་དང་། འོས་ཤོག་གྲངས་བཤེར་མཐའ་མའི་གྲུབ་འབྲས་བཅས་དབུས་འོས་བསྡུ་ལས་ཁང་དུ་དུས་བཀག་ནང་ཚུན་འབུལ་འབྱོར་དགོས་རྒྱུའི་དུས་ཚེས་༢༠༡༦ ལོའི་ཟླ་ ༣ ཚེས་༢༨ ཉིན་ནས་ཟླ་ ༤ ཚེས་ ༡༡ ཉིན།

༡༦༽ དབུས་འོས་བསྡུ་ལས་ཁང་ནས་དངོས་གཞིའི་འོས་ཤོག་གྲངས་བཤེར་ཕྱོགས་བསྡོམས་བྱ་རྒྱུའི་དུས་ཚེས་དེ་ ༢༠༡༦ ལོའི་ཟླ་ ༤ ཚེས་ ༡༢ ཉིན་ནས་ཚེས་ ༢༦ ཉིན།

༡༧༽ བོད་མིའི་སྒྲིག་འཛུགས་ཀྱི་འདེམས་ཐོན་སྲིད་སྐྱོང་གསར་འགོད་གསལ་བསྒྲགས་བྱ་རྒྱུ་སོགས་ ༢༠༡༦ ལོའི་ཟླ་ ༤ ཚེས་ ༢༧ ཉིན་ནས་ ༢༨ ཉིན། ཞེས་བཀོད་འདུག

ཡང་འོས་བསྡུའི་འགན་འཛིན་ལས་རོགས་དགེ་བཤེས་བསྟན་པ་བཀྲ་ཤིས་ལགས་ཀྱིས་སྤྱི་འཐུས་འོས་བསྡུའི་དུས་ཚེས་དང་ལས་རིམ་གཏན་འབེབས་སྒྲོག་སྦྱངས་གནང་བའི་ནང་།

༡༽ འོས་བསྡུའི་ལས་དོན་བྱེད་ཕྱོགས་དང་ལས་རིམ་གཏན་འབེབས་རེའུ་མིག་ས་གནས་ཁག་ལ་རྒྱུའི་དུས་ཚེས་༢༠༡༥ ལོའི་ཟླ་ ༩ ཚེས་ ༢༦ ཉིན།

༢༽ གོང་གསལ་བཀོད་ཁྱབ་ས་གནས་སུ་འབྱོར་རྒྱུའི་དུས་ཚེས་༢༠༡༥ ལོའི་ཟླ་ ༩ ཚེས་ ༢༧ ཉིན་ནས་ཟླ་ ༡༠ ཚེས་ ༦ ཉིན།

༣༽ ས་གནས་སུ་མང་ཚོགས་འདུ་འཛོམས་དང་དྲིལ་བསྒྲགས་བྱ་རྒྱུའི་དུས་ཚེས་༢༠༡༥ ལོའི་ཟླ་ ༡༠ ཚེས་ ༧ ཉིན་ནས་ཚེས་ ༡༧ ཉིན།

༤༽ སྔོན་འགྲོའི་འོས་དམིགས་འདེམས་བསྒྲུགས་ཀྱིས་འོས་བསྡུ་བྱ་རྒྱུའི་དུས་ཚེས་༢༠༡༥ ལོའི་ཟླ་ ༡༠ ཚེས་ ༡༨ ཉིན།

༥༽ དང་བླངས་འོས་གཞིར་འཛུལ་ཞུགས་བྱ་རྒྱུའི་འགེངས་ཤོག་དང་སྙན་ཞུ་བཅས་ས་གནས་འོས་བསྡུ་ལས་ཁང་ནས་ཞུ་ལེན་དང་ཕྱིར་འབུལ་བྱ་རྒྱུའི་དུས་ཚོས་༢༠༡༥ ལོའི་ཟླ་ ༡༠ ཚེས་ ༡༩ ཉིན་ནས་ཚེས་ ༢༢ ཉིན།

༦༽ ས་གནས་འོས་བསྡུ་ལས་ཁང་ནས་དང་བླངས་འོས་གཞི་རྣམས་སྒྲིག་གསལ་ཆ་རྐྱེན་ཚང་མིན་ཞིབ་འཇུག་བྱ་རྒྱུའི་དུས་ཚེས་༢༠༡༥ ལོའི་ཟླ་ ༡༠ ཚེས་ ༢༣ ཉིན་ནས་ཚེས་ ༢༥ ཉིན།

༧༽ སྐྱེ་བོ་གང་ཞིག་དང་བླངས་འོས་གཞིར་ཞུགས་རྗེས་རང་མོས་ཕྱིར་འཐེན་བྱ་རྒྱུའི་དུས་ཚེས་༢༠༡༥ ལོའི་ཟླ་ ༡༠ ཚེས་ ༢༦ ཉིན་ནས་ཚེས་ ༢༧ ཉིན།

༨༽ དང་བླངས་འོས་གཞི་དང་འོས་དམིགས་འདེམས་བསྒྲུགས་ཀྱིས་འོས་ཤོག་ཕྱོགས་བསྡོམས་ཡིག་ཆ་ཁག་དབུས་འོས་བསྡུ་ལས་ཁང་དུ་འབུལ་རྒྱུའི་གྲ་སྒྲིག་དང་གཏོང་རྒྱུའི་དུས་ཚེས་༢༠༡༥ ལོའི་ཟླ་ ༡༠ ཚེས་ ༢༨ ཉིན་ནས་ ༣༡ ཉིན།

༩༽ སྔོན་འགྲོའི་འོས་ཤོག་བྱུང་སོང་བསྡད་གསུམ་གྱི་གནས་སྟངས་དང་མཐའ་མའི་གྲུབ་འབྲས་དབུས་འོས་བསྡུ་ལས་ཁང་དུ་དུས་བཀག་ནང་ཚུན་འབུལ་འབྱོར་ཐུབ་པ་དགོས་རྒྱུའི་དུས་ཚེས་༢༠༡༥ ལོའི་ཟླ་ ༡༡ ཚེས་ ༡ ཉིན་ནས་ཚེས་ ༡༣ ཉིན།

༡༠༽ ས་གནས་ཁག་ནས་འོས་དམིགས་ཕྱོགས་བསྡོམས་འབྱོར་བསྡད་རྣམས་དབུས་ནས་ངང་སྒུག་བྱ་རྒྱུའི་དུས་ཚེས་ ༢༠༡༥ ལོའི་ཟླ་ ༡༡ ཚེས་ ༡༤ ཉིན་ནས་ཚེས་ ༡༩ ཉིན།

༡༡༽ དབུས་འོས་བསྡུ་ལས་ཁང་ནས་སྔོན་འགྲོའི་འོས་ཤོག་གྲངས་བཤེར་ཕྱོགས་བསྡོམས་བྱ་རྒྱུའི་དུས་ཚེས་༢༠༡༥ ལོའི་ཟླ་ ༡༡ ཚེས་ ༢༠ ཉིན་ནས་ཟླ་ ༡༢ ཚེས་ ༤ ཉིན།

༡༢༽ དབུས་འོས་བསྡུ་ལས་ཁང་ནས་སྔོན་འགྲོའི་འོས་གཞི་གསལ་བསྒྲགས་ས་གནས་སོ་སོར་གཏང་ཚེས་དང་དངོས་གཞིའི་འོས་དམིགས་གསལ་བསྒྲགས་མ་བྱས་པར་སྒྲིག་གསལ་ཉིན་གྲངས་ ༡༥ འཇོག་རྒྱུའི་དུས་ཚེས་དང་། དུས་ཡུན་དེའི་རིང་ས་གནས་འོས་བསྡུ་ལས་ཁང་སོ་སོའི་ཁྱབ་ཁོངས་སུ་འོས་གཞིར་ཞུགས་མཁན་རྣམས་ཀྱི་ལོ་རྒྱུས་དང་། ཉེ་ཆར་བརྒྱབ་པའི་ཕྱེད་པར་ཚོན་ཁྲ་ཅན་རེ་བསྡུ་ལེན་གྱིས་དབུས་འོས་བསྡུ་ལས་ཁང་དུ་འབུལ་དགོས་པ་དང་། འོས་གཞིར་ཞུགས་འདུན་མེད་རིགས་ནས་དགོངས་ཤོག་འབུལ་རྒྱུའི་དུས་ཚེས་༢༠༡༥ ལོའི་ཟླ་ ༡༢ ཚེས་ ༥ ཉིན་ནས་ ༢༠༡༦ ལོའི་ཟླ་ ༡ ཚེས་ ༡༨ ཉིན།

༡༣༽ དབུས་འོས་བསྡུ་ལས་ཁང་ནས་དངོས་གཞིའི་འོས་གཞི་གསལ་བསྒྲགས་བྱ་རྒྱུའི་གྲ་སྒྲིག་དུས་ཚེས་༢༠༡༦ ལོའི་ཟླ་ ༡ ཚེས་ ༡༩ ཉིན་ནས་ཟླ་ ༢ ཚེས་ ༢ ཉིན།

༡༤༽དབུས་འོས་བསྡུ་ལས་ཁང་ནས་དངོས་གཞི་ཁག་གསལ་བསྒྲགས་བྱ་རྒྱུའི་དུས་ཚེས་༢༠༡༦ ལོའི་ཟླ་ ༢ ཚེས་ ༣ ཉིན།

༡༥༽ དབུས་འོས་བསྡུ་ལས་ཁང་ནས་དངོས་གཞིའི་འོས་གཞི་གསལ་བསྒྲགས་བྱ་རྒྱུའི་དུས་ཚེས་དང་། གསལ་བསྒྲགས་བྱས་ཉིན་ནས་སྒྲིག་གསལ་ཉིན་གྲངས་ ༡༥ འཇོག་རྒྱུའི་དུས་ཚེས་༢༠༡༦ ལོའི་ཟླ་ ༢ ཚེས་ ༤ ཉིན་ནས་ཟླ་ ༣ ཚེས་ ༡༩ ཉིན། ཉིན་གྲངས་ ༤༥།

༡༦༽ བོད་མི་མང་སྤྱི་འཐུས་སྐབས་ ༡༦ པའི་དངོས་གཞིའི་འོས་བསྡུ་ཆེན་མོའི་དུས་ཚེས་༢༠༡༦ ལོའི་ཟླ་ ༣ ཚེས་ ༢༠ ཉིན།

༡༧༽ ས་གནས་ས་སོའི་དངོས་གཞིའི་འོས་བསྡུ་མཇུག་སྒྲིལ་གྱིས་འོས་ཤོག་གྲངས་བཤེར་ཕྱོགས་བསྡོམས་བྱ་རྒྱུའི་དུས་ཚེས་༢༠༡༦ ལོའི་ཟླ་ ༣ ཚེས་ ༢༡ ཉིན་ནས་ཚེས་ ༢༧ ཉིན།

༡༨༽ འོས་ཤོག་བྱུང་སོང་བསྡད་གསུམ་གྱི་གནས་སྟངས་དང་མཐའ་མའི་གྲུབ་འབྲས་དབུས་འོས་བསྡུ་ལས་ཁང་དུས་བཀག་ནང་ཚུན་འབུལ་འབྱོར་ཐུབ་པ་དགོས་རྒྱུའི་དུས་ཚེས་༢༠༡༦ ལོའི་ཟླ་ ༣ ཚེས་ ༢༨ ཉིན་ནས་ཟླ་ ༤ ཚེས་ ༡༡ ཉིན།

༡༩༽ དབུས་འོས་བསྡུ་ལས་ཁང་ནས་དངོས་གཞིའི་འོས་ཤོག་གྲངས་བཤེར་ཕྱོགས་བསྡོམས་བྱ་རྒྱུའི་དུས་ཚེས་༢༠༡༦ ལོའི་ཟླ་ ༤ ཚེས་ ༡༢ ཉིན་ནས་ཟླ་ ༤ ཚེས་ ༢༦ ཉིན།

༢༠༽ འདེམས་ཐོན་སྤྱི་འཐུས་རྣམས་ཀྱི་མཚན་གཞུང་གསར་འགོད་གསལ་བསྒྲགས་དང་འབྲེལ་དོ་བདག་སོ་སོར་བཀོད་ཁྱབ་གཏོང་རྒྱུའི་དུས་ཚེས་༢༠༡༦ ལོའི་ཟླ་ ༤ ཚེས་ ༢༧ ཉིན་ནས་ཚེས་ ༢༨ ཉིན།

༢༡༽ འདེམས་ཐོན་སྤྱི་འཐུས་རྣམས་དམ་འབུལ་ཆེད་བཞུགས་སྒར་དུ་འབྱོར་ཚེས་༢༠༡༦ ལོའི་ཟླ་ ༥ ཚེས་ ༢༩ ཉིན།

༢༢༽ བོད་མི་མང་སྤྱི་འཐུས་སྐབས་ ༡༦ པའི་དམ་བཅའ་འབུལ་བཞེས་གནང་རྒྱུའི་མཛད་སྒོ་བཅས་༢༠༡༦ ལོའི་ཟླ་ ༥ ཚེས་ ༣༠ ཉིན་ཞེས་བཀོད་འདུག

གསར་འགོད་པ། འཇིགས་མེད་རྒྱ་མཚོ།