ཆོས་ཀྱི་ཚིག་རེ་རེ་བྱས་ནས་སློབ་སྦྱོང་བྱོས་ཨཱ།

དེ་རིང་གསུང་ཆོས་སྐབས་༧གོང་ས་མཆོག་གིས་ནང་པའི་ཆོས་ལ་སྐྱབས་སུ་མཆི་ཟེར་བ་ཙམ་མིན་པར་ཚིག་རེ་རེ་བཞིན་སློབ་སྦྱོང་བྱེད་དགོས་སྐོར་གསུངས་སོང་།

ཨེ་ཤ་ཡའི་ནང་པའི་རྒྱལ་ཁབ་ཁག་ཅིག་གི་དད་ལྡན་ཚོས་ཇི་ལྟར་གསོལ་འདེབས་ཞུས་པ་ལྟར། དེ་རིང་སྔ་དྲོའི་ཆུ་ཚོད་ ༨ པའི་སྟེང་དྷ་ས་ཐེག་ཆེན་གཙུག་ལག་ཁང་དུ། ༧གོང་ས་མཆོག་གིས་སློབ་དཔོན་ཞི་བ་ལྷས་མཛད་པའི་སྤྱོད་འཇུག་ལེའུ་ ༡༠ པ་དང་། རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མ་སོགས་ཀྱི་གསུང་ཆོས་དབུ་འཛུགས་གནང་སོང་བ་དང་། ད་རེས་ཀྱི་གསུང་ཆོས་སྐབས་ཨེ་ཤ་ཡའི་རྒྱལ་ཁབ་ཧིན་རྡུ་ནི་ཤི་ཡ་དང་ཀོ་རི་ཡ། མ་ལི་ཤི་ཡ། སེང་གྷ་པུར། ཐའེ་ལན་ཌི། ཝེ་ཋི་ནམ་བཅས་ནས་ཆེད་དུ་བཅར་བའི་དད་ལྡན་ཆོས་ཞུ་བ་༨༠༠ ལྷག་གཙོས་པའི་རྒྱ་ནག་སྐམ་ས་ནས་ཆོས་ཞུ་བ་ ༡༡ དང་། གཞན་ཡང་། འཛམ་གླིང་གི་རྒྱལ་ཁབ་ ༧༠ ལྷག་ནས་ཡོང་བའི་ནང་ཆོས་དོན་གཉེར་བ་དང་། དྷ་ས་ཁུལ་གྱི་སེར་སྐྱ་མི་མང་བཅས་ཁྱོན་མི་གྲངས་ ༦༠༠༠ ལྷག་འཛོམས་འདུག

གསུང་ཆོས་ཀྱི་ཐོག་མར་༧གོང་ས་མཆོག་གིས་བཀའ་སློབ་གནང་དོན། དེ་རིང་ཡུལ་གྲུ་ཁག་ཁ་ཤས་ནས་ཕེབས་པའི་སངས་རྒྱས་བཅོམ་ལྡན་འདས་ཀྱི་རྗེས་འབྲང་ཆོས་གྲོགས་ཁྱེད་རང་ཚོ་ཚང་མར་ཞུ་རྒྱུར། ད་རེས་ཁྱེད་རང་ཚོས་དོན་གཉེར་ཆེན་པོ་བྱས་ནས་འདིར་ཕེབས་པ་ཡིན་པས་ཁྱེད་རང་ཚང་མར་དགའ་བསུ་ཞུ་བཞིན་ཡོད། ནམ་རྒྱུན་ཀོ་རི་ཡ་དང་ཝེ་ཋི་ནམ། ལྷོ་ཤར་ཨེ་ཤ་ཡའི་ཡུལ་གྲུ་གཞན་ནས་ཕེབས་མཁན་བཅས་ཉི་མ་གཅིག་གཉིས་གསུམ་རེ་བྱས་ནས་ཆོས་འབྲེལ་བྱེད་བཞིན་ཡོད་པ་རེད། ད་ལོར་ལུང་པ་སོ་སོ་ནས་ཉི་མ་གཅིག་གཉིས་གསུམ་གྱི་ཆོས་འབྲེལ་དེ་མི་དགོས་པ་བྱས་ཏེ། ཁྱེད་རང་ཚང་མར་སྟབས་བདེ་བོ་བྱུང་ན་རུག་རུག་བྱས་ནས་ཚང་མ་དུས་གཅིག་ལ་ཉི་མ་བཞི་ཙམ་བཤད་རྒྱུའི་རེ་འདུན་ཞུས་པ་ལྟར། ཁྱེད་རང་ཚོས་དེ་བཞིན་འགྲིག་གི་འདུག་ཅེས་ཚང་མ་ཚུར་རུག་རུག་བྱས་ནས་ཆོས་འབྲེལ་བྱེད་རྒྱུ་བྱུང་བ་རེད། ངས་དུས་ཅིག་ལ་ཆོས་འབྲེལ་བྱེད་པར་ཁྱེད་རང་ཚོས་མོས་མཐུན་གནང་པ་དེར་ཐུགས་རྗེ་ཆེ་ཞུ་གི་ཡིན། ཞེས་གསུངས་སོང་།
ཆོས་ཀྱི་བྱིན་རླབས་ཟེར་བ་དེ་ནང་ནས་ཡོང་དགོས་པ་ལས་ཕྱི་ནས་ཡོང་རྒྱུ་མེད་སྐོར་ཁོང་གིས། སྤྱིར་སངས་རྒྱས་པའི་ཆོས་ཟེར་བ་དེ་བསམ་བློ་གཏོང་པ་ཞིག་རེད་བཱ། བྱིན་རླབས་ཞུ་བའི་སྐད་ཆ་གང་ཡང་མ་རེད། བྱིན་རླབས་ཞུ་བ་ཟེར་བ་ཞིག་ཡོད་ཡོད་པ་རེད་དེ། ཡིན་ནའང་གཙོ་བོ་བྱིན་རླབས་ནང་ནས་ཡོང་དགོས་པ་རེད་མ་གཏོགས་བྱིན་རླབས་ཕྱི་ནས་ཡོང་རྒྱུ་ཡོད་པ་མ་རེད། དེར་བརྟེན་སོ་སོ་རང་གིས་སངས་རྒྱས་པའི་ཆོས་ཀྱི་འགྲོ་སྟངས་དེ་ཤེས་པར་བྱས་པའི་ཐོག་ནས་བསམ་བློར་སྦྱོང་བརྡར་བྱས་ནས་བློ་མ་འདུལ་བ་འདུལ་བ་བྱེད་རྒྱུ་དང་། མ་ཤེས་པ་ཤེས་པར་བྱེད་པ་དེ་འདྲའི་ཐོག་ནས་ཆོས་རབ་ཏུ་རྣམ་འབྱེད་ཀྱི་ཤེས་རབ་དང་གཅིག དེ་བཞིན་བྱམས་བརྩེའི་བློ་བཟང་བོའི་ཡོན་ཏན་དང་གཉིས་གོང་ནས་གོང་དུ་སྤེལ་ཏེ། རང་རྒྱུད་ལ་ཡོད་པའི་རང་ཕོངས་པར་བྱེད་པའི་སྐྱོན་དེ་དག་རིམ་གྱིས་ཕར་སེལ་ནས་མཐར་ཐུག་སངས་རྒྱས་ཀྱི་གོ་འཕང་ཐོབ་པ་ཞིག་ཡོད་པ་རེད། ཆོས་ཉམས་ལེན་བྱེད་པ་ལའང་བྱེད་སྟངས་ཤེས་དགོས་ཡོད་པ་རེད། ཉམས་ལེན་ཤེས་པ་ལ་ཡང་ཐོས་དགོས་ཀྱི་ཡོད་སྟབས། དེ་རིང་ང་ཚོ་འདིར་འཛོམས་པ་དེ་སློབ་སྦྱོང་ཡིན་བསམ་པའི་འདུ་ཤེས་བཞག་ནས་སྡོད་པ་ལས་བྱིན་རླབས་ཡིན་བསམ་པའི་བསམ་བློ་དེ་མིན་པར་བྱོས། ཞེས་གསུངས་སོང་།

ཡང་ཁོང་གིས་བཀའ་བསྟན་འགྱུར་ལྷ་ཁང་ནང་བཤམ་ནས་མི་འཇོག་པར་སློབ་སྦྱོང་བྱ་དགོས་པའི་སྐོར་བཀའ་སློབ་གནང་དོན། ང་རང་ཚོ་དེ་སྔོན་ཡིན་ན་ཆོས་ཟེར་དུས་དད་པ་རྐྱང་རྐྱང་འདྲ་བོ་ཞིག་རེད། དད་པའི་ཤུགས་ཞེ་བོ་ཞིག་ཡོང་དུས་ལྷ་ཁང་བརྒྱབ་ནས་སྐུ་བཞེང་པ་དེ་ཚོའི་གྲས་དེ་ཨེ་ཤ་ཡའི་རྒྱལ་ཁབ་ཁག་ནང་མང་པོ་ཞེ་དྲགས་འདུག སངས་རྒྱས་པའི་གཞུང་གི་བསྟན་བཅོས་ཟེར་ན་སྣང་ཆུང་འདྲ་བོ་བྱེད་ཀྱི་འདུག ལྷ་ཁང་ནང་གི་སྐུ་རྟེན་དེ་ཚོའི་གྲས་རྩ་ཆེན་པོ་དང་། གསུང་རྟེན་དེ་ཚོར་ཞོར་ལ་དད་པ་བྱེད་ཀྱི་ཡོད་པ་རེད། ང་ཚོ་བོད་པ་ཡིན་ན་ཡག་པོ་རེད། ལྷ་ཁང་མང་ཆེ་བ་ལ་བསྟན་པའི་བདག་པོ་སྟོན་པའི་སྣང་བརྙན་དང་། དེ་མིན་གྱི་བཏང་སྙོམས་འདྲ་སྒོམ་ནས་བཀའ་འགྱུར་བསྟན་འགྱུར་མང་ཆེ་བ་བཞག་འདུག གསུང་རྟེན་དེ་རྩ་ཆེན་པོ་ཞིག་རྩི་ཡོང་གི་འདུག་གཱ། ཡིན་ནའང་གསུང་རྟེན་རྩ་ཆེན་པོར་རྩིས་ཏེ་སྐྱབས་སུ་མཆི་ཟེར་ས་ཞིག་ལ་བཞག་པ་མ་གཏོགས། དེ་ཀློག་ནས་ལྟ་མཁན་དེའི་རྒྱུད་ལ་བར་ཆད་སེལ་བ་དང་དེ་འདྲའི་དོན་དག་ལ་བཀའ་འགྱུར་དག་འདོན་དང་། བསྟན་འགྱུར་དག་འདོན་བྱེད་དགོས་རེད་ཟེར་ནས་བར་ཆད་སེལ་བའི་དོན་དག་མ་གཏོགས་དེར་ཞེ་བོ་ཞེ་བོ་སློབ་སྦྱོང་གི་འདུ་ཤེས་ཤིག་འཇོག་གི་མི་འདུག་གཱ། དེ་འདྲ་ཀོ་རི་ཡ་དང་ཝེ་ཋི་ནམ་ཡིན་ན་རེད། ཉི་ཧོང་ཡིན་ནའང་རེད། གང་ལྟར་ཁྱེད་རང་ཚོ་མང་པོ་ཞིག་གིས་ཤེས་རབ་སྙིང་བོ་འདོན་གྱི་ཡོད་པ་རེད། ཤེས་རབ་སྙིང་བོའི་དོན་དག་ལ་གཟབ་གཟབ་བྱས་ནས་སློབ་སྦྱོང་བྱེད་མཁན་ཞེ་དྲགས་རང་མེད་པའི་ཟོལ་འདྲ་བོ་ཞིག་འདུག ངའི་ཆོས་གྲོགས་ངོ་ཤེས་པ་དེ་ཚོས་ང་ལ་ནང་ཚགས་བྱས་ཏེ་ང་ཚོ་ཚང་མས་ཤེས་རབ་སྙིང་བོ་འདོན་གི་ཡོད་པ་རེད། དོན་དག་ནི་ཤེས་ཀྱི་ཡོད་པ་མ་རེད་ཅེས་ནས་གསུང་གི་འདུག དེ་འདྲ་ཡིན་དུས། ང་ཚོ་མང་པོ་ཞིག་གིས་འདོན་པ་འདོན་རྒྱུ་དང་སྨོན་ལམ་རྒྱག་པ་འདྲ་བོ་མ་གཏོགས། ཚིག་རེ་རེ་བྱས་ནས་སློབ་སྦྱོང་བྱེད་པ་དེས་ང་ཚོར་འདང་གི་མི་འདུག ངས་ནམ་རྒྱུན་བོད་པ་ཚོར་ཤོད་ཀྱི་ཡོད། ང་ཚོའི་བཀའ་འགྱུར་བསྟན་འགྱུར་ཟེར་བ་དེ་སློབ་སྦྱོང་བྱེད་པ་དང་སློབ་སྦྱོང་གི་འདུ་ཤེས་བཞག་ནས་སློབ་སྦྱོང་བྱེད་དགོས་པ་རེད་མ་གཏོགས། དེ་སྐྱབས་སུ་མཆི་ཞེས་ནས་བཞག་པ་ཞིག་མ་རེད་དཱ་ཞེས་རྟག་པར་འབོད་སྐུལ་ཞུ་བཞིན་ཡོད། ཅེས་སོགས་གསུངས་སོང་།

                                                                               གསར་འགོད་པ། འཇིགས་མེད་རྒྱ་མཚོ།