རྔ་པ་རྫོང་ནས་སེར་སྐྱ་མང་པོ་འཛིན་བཟུང་བྱས།

ཁ་སང་རྔ་པ་རྫོང་མཁར་དུ་གྲྭ་པ་གཉིས་དང་མི་སྐྱ་ཞིག་གིས་ཞི་རྒོལ་སྐད་འབོད་གནང་བར་བརྟེན་ཉེན་རྟོག་པས་སེར་སྐྱ་མང་པོ་བཙན་ཁྲིད་བྱས་ཡོད་འདུག
ཁ་སང་སྔ་དྲོར་རྔ་པ་ཀིརྟི་དགོན་གྱི་ལོ་ ༢༠ ཙམ་ཡིན་པའི་གྲྭ་ཨ་གྲགས་ཞུ་བ་ཞིག་གིས་”བོད་ལ་རང་དབང་དགོས། རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག་”ཅེས་རྒྱ་གཞུང་ལ་ངོ་རྒོལ་སྐད་འབོད་གནང་བཞིན་རྔ་པ་རྫོང་མཁར་གྱི་གཞུང་ལམ་དུ་ཞི་བའི་གོམ་བགྲོད་བྱས་མ་ཐག་ཉེན་རྟོག་པས་རུབ་རྡུང་བྱེད་བཞིན་འཛིན་བཟུང་བཙན་ཁྲིད་བྱས་ཡོད་པ་དང་། ཉེ་འཁོར་གྱི་བོད་མི་མང་པོས་སྐད་འབོད་སྣ་ཚོགས་བྱས་པར་བརྟེན་ཉེན་རྟོག་པས་མི་མང་ནང་གང་བྱུང་གཅར་རྡུང་བཏང་ཡོད་པ་མ་ཟད། མི་མང་པོ་འཛིན་བཟུང་བྱས་ཡོད་པའི་གནས་ཚུལ་ཐོན་ཡོད་ཀྱང་ཁོང་ཚོའི་མིང་དང་ས་གནས་སོགས་ཞིབ་ཕྲ་ཤེས་རྟོགས་ཐུབ་ཀྱི་མེད་པ་རེད།

གྲྭ་ཨ་གྲགས་ལགས་ནི་རྔ་པ་རྫོང་ཆོས་རྗེ་མ་ཡུལ་ཚོའི་སོ་རུ་མ་སྡེ་བའི་ཕ་འཛམ་པ་ དང་། མ་རིག་ཁོ་གཉིས་ལ་བུ་བུ་མོ་དགུ་ཡོད་པའི་ནང་གི་ཆུང་ཤོས་ཡིན་ལ། ཆུང་ཆུང་སྐབས་ནས་རྔ་པ་ཀིརྟི་དགོན་པར་ཆོས་ཞུགས་བྱས་ཏེ་དེང་སྐབས་བློ་རིག་ འཛིན་གྲྭ་ཡིན་འདུག་ཅིང་། ཕྱི་ལོ་༢༠༡༢ ལོར་ཁོང་གི་ཚ་བུ་གྲྭ་བློ་བཟང་ཚུལ་ཁྲིམས་ལ་ཡང་རང་ལུས་མེར་སྲེག་དང་འབྲེལ་བ་ ཡོད་པའི་ཉེས་འཛུགས་བྱས་ཏེ་ལོ་༡༡ གི་བཙོན་འཇུག་ཁྲིམས་ཐག་བཅད་ནས་དེང་སྐབས་བཙོན་ཁང་དུ་ཡོད་མུས་ཡིན་འདུག
གཞན་ ཡང་གནས་ཚུལ་ཡོང་ཁུངས་ནས་བརྗོད་པ་ལྟར་ན། མི་སྐྱ་སྐོར་ཞིག་གིས་ཀྱང་ཁ་སང་བོད་ནང་གི་ཉིན་གུང་ཙམ་ལ་རྔ་པ་རྫོང་མཁར་གྱི་ ཁྲོམ་གཞུང་དུ་ངོ་རྒོལ་སྐད་འབོད་བྱེད་བཞིན་ཞི་བའི་གོམ་བགྲོད་བྱས་ཡོད་པའི་ གནས་ཚུལ་ཐོན་ཡོད་ཀྱང་ཞིབ་ཕྲ་ཤེས་རྟོགས་ཐུབ་ཀྱི་མེད་པ་རེད།
ཡང་ཁ་སང་བོད་ནང་གི་ཕྱི་དྲོའི་ཆུ་ཚོད་༦ པ་ཙམ་ལ། རྔ་པ་ཀིརྟི་དགོན་པའི་གྲྭ་རང་ལོ་ ༢༢ ཡིན་པ་བློ་བཟང་ཞུ་བ་ཞིག་གིས་”བོད་ལ་རང་དབང་དགོས། རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག་”ཅེས་རྔ་པ་རྫོང་མཁར་གྱི་གཞུང་ལམ་དུ་ངོ་རྒོལ་སྐད་འབོད་ བྱས་པ་དང་། དེ་མ་ཐག་ཉེན་རྟོག་པས་འཛིན་བཟུང་བཙན་ཁྲིད་བྱས་ཏེ་གནས་ཚུལ་གང་ཡང་ཤེས་རྟོགས་མེད་པར་གྱུར་ཡོད་པ་དང་། གྲྭ་བློ་བཟང་ལགས་ནི་རྔ་པ་རྫོང་ཕྱུགས་ལས་འགབ་མའི་ཕ་སྒ་ཚེ་དང་མ་གནས་སྐྱིད་གཉིས་ལ་བུ་བུ་མོ་ལྔ་ལྷག་ཡོད་པའི་ནང་གི་བཞི་པ་ཡིན་ཞིང་། ཆུང་ཆུང་སྐབས་ནས་རྔ་པ་ཀིརྟི་དགོན་པར་ཆོས་ཞུགས་བྱས་ཏེ་དེང་སྐབས་བློ་རིག་འཛིན་གྲྭ་ཡིན་འདུག
བདུན་ཕྲག་འདིའི་ནང་བསྟུད་མར་ངོ་རྒོལ་སྐད་འབོད་གནང་མཁན་བཞི་བྱུང་ཡོད་པ་ཚང་མ་འཛིན་བཟུང་བཙན་ཁྲིད་བྱས་རྗེས་གང་དུ་བཀག་ཉར་བྱས་ཡོད་མེད་དང་། གནས་སྟངས་ག་འདྲ་ཡིན་སོགས་ཟུར་ཙམ་ཡང་ཤེས་རྟོགས་མེད་པར་གྱུར་ཡོད་པ་དང་། ཁ་སང་བོད་ནང་གི་ཉིན་གུང་ཙམ་ནསབཟུང་མི་སྒེར་གྱིས་བེད་སྤྱོད་བྱེད་བཞིན་པའི་དྲ་ལམ་ཡོངས་རྫོགས་བཅད་ཅིང་། ཁྲོམ་གཞུང་དང་ལམ་གྱི་བཞི་མདོ་ཁག་ལ་ཉེན་རྟོག་པའི་སྤྱི་སྤྱོད་རླངས་འཁོར་དང་རླངས་འཁོར་ཆུང་བ་མང་རུ་བཏང་ནས་ཉེན་རྟོག་པ་ཁ་སྣོན་བྱས་ཡོད་པ་སོགས་དམ་དྲག་ཤུགས་ཇེ་ཆེར་བཏང་ཡོད་འདུག
གནས་ཚུལ་མཁོ་སྤྲོད་པ་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས།