རྒྱ་གཞུང་གི་དགོས་མཁོ་ཞིག་དང་བོད་ནང་ཁུལ་དཀྲུག་ཤིང་ཞིག

བློ་གྲོས་རབ་བརྟན།

བཙན་བྱོལ་བོད་མིའི་ཁྲོད་ནས་དེང་གི་བོད་རང་བཙན་འགུལ་སྟངས་ནི་མ་འདྲ་བ་ཞིག་རེད། ལོ་རྒྱུས་ཐོག་གི་བོད་རང་བཙན་དེ་མ་རེད་ལ། ཐོབ་ཐང་གི་ཁྱབ་ཁོངས་ཀྱི་བོད་རང་བཙན་ཡང་མ་རེད། དེས་ན། རྒྱ་གཞུང་གི་དགོས་མཁོ་ཞིག་དང་། བོད་མི་ནང་ཁུལ་དུ་དཀྲུག་ཤིང་ཞིག ཐ་ན་༧གོང་ས་མཆོག་གི་མཛད་འཕྲིན་ཡན་ལ་ཟུར་ཟ་བྱེད་པའི་ཅ་ལག་ཅིག་ཏུ་གྱུར་འདུག

བོད་མིའི་སྒྲིག་འཛུགས་ཀྱིས་དབུ་མའི་ལམ་གྱི་སྲིད་ཇུས་བརྒྱུད་བོད་ལ་མིང་དོན་མཚུངས་པའི་རང་སྐྱོང་སྤྲོད་དགོས་པ་དང་། སྤྲོད་ཆོག་པའི་ཆ་རྐྱེན་ཡོངས་སུ་རྒྱ་གཞུང་གི་རྩ་ཁྲིམས་ན་གསལ་བ་ལྟར། གདོང་དང་གདོང་ཐུག་སྟེ་གྲོས་བསྡུར་དང་ཡིག་ཐོག་ནས་ཀྱང་གསལ་བཤད་རིམ་པར་བྱས་ཡོད། དེའི་བརྟེན་རྒྱ་གཞུང་གིས་དྲང་བདེན་དང་དོན་དངོས། རྒྱ་གཞུང་གི་རྩ་ཁྲིམས་གཞིར་བཟུང་ལན་རྒྱག་མ་ཐུབ་པར། བོད་རང་བཙན་དང་བོད་ཆེན་པོ་རྩོད་ཀྱིན་འདུག་ཅེས་ཁག་འཁྲི་བྱེད། འདིས་རྒྱ་གཞུང་ལ་བོད་རང་བཙན་རྩོད་དགོས་པ་དེ་སྟོན་གྱིན་ཡོད། བོད་རང་བཙན་བརྩད་ན་རྒྱ་གཞུང་ལ་ཁེ་བཟང་མ་གཏོགས་གྱོང་མེད་དེ། ད་ལྟའི་རྒྱ་གཞུང་གིས་བོད་མི་ཚོར་རང་བཙན་སྤྲོད་མི་སྲིད་ལ། བོད་མི་ཚོས་ལེན་མི་ཐུབ་པ་གཞིར་བཞག རྒྱལ་སྤྱིའི་ཁྲོད་ནས་བོད་རང་བཙན་ལ་རྒྱབ་སྐྱོར་མེད་པ་བཅས་ཀྱིས་རེད།

ད་དུང་བཙན་བྱོལ་དུ་རང་བཙན་འཐབ་རྩོད་ཀྱི་སྲིད་ཇུས་བཟུང་ན། བོད་དུ་རང་གི་འཚོ་གནས་ཀྱི་ཆེད་དུ་ངོ་རྒོལ་བ་ཚོ་སྔར་ལས་དྲག་གནོན་བྱེད་ལ་མཐུན་རྐྱེན་དུ་འགྱུར་ཞིང་། ༧གོང་ས་མཆོག་དང་བོད་མིའི་སྒྲིག་འཛུགས། རྒྱལ་སྤྱིའི་སྤྱི་ཚོགས་བཅས་ནས་རྒྱ་གཞུང་ལ་གནོན་ཤུགས་ཕྲན་བུ་ཐེབས་ཀྱིན་པ་ནི་མི་རིགས་རང་སྐྱོང་དང་། ཐོབ་ཐང་འདྲ་མཉམ་སོགས་ཀྱི་ཐད་ནས་ཡིན་པ་ལས། རང་བཙན་ཐད་ནས་རྒྱ་གཞུང་ལ་གནོན་ཤུགས་ཤིག་ཡོང་ས་མེད། དེར་བརྟེན་བོད་རང་བཙན་གྱི་སྲིད་ཇུས་བཟུང་ན། རྒྱ་གཞུང་གིས་མི་རིགས་འདྲ་མཉམ་དང་སྲུང་སྐྱོབ་སོགས་ཀྱི་ཐད་ནས། ད་ལྟ་གདོང་ལེན་བྱེད་དགོས་པ་དག་ཀྱང་མི་དགོས་པར་གྱུར་ཏེ། བོད་རང་བཙན་རྩོད་ཀྱིན་འདུག་ཅེས་ལས་སླ་བོ་དང་། སྟབས་བདེ་བོས། རྒྱལ་སྤྱིའི་སྤྱི་ཚོགས་ལ་བོད་དོན་ཐད་ནས་གདོང་ལེན་བྱེད་ཐུབ་པ་ཆགས་རྒྱུ་རེད། དེས་ན། བོད་རང་བཙན་བརྩད་ན་རྒྱ་གཞུང་ལ་ཁེ་བཟང་དང་དགོས་མཁོ་ཡོད་པ་ཞིག་རེད། དེ་ནི་ཆབ་སྲིད་པའི་གཡོ་ཇུས་ཀྱི་བསྐོར་བ་རྒྱག་སྟངས་ཤིག་ཀྱང་རེད།

གནད་དོན་དེ་དག་ལ་གཞིགས་ན། ཚོགས་པ་དང་སྒེར་བ་སུ་ཞིག་གིས་བོད་རང་བཙན་བརྩད་ན། དེས་རྒྱ་གཞུང་ལ་བོད་དོན་ཐད་ནས་ལས་ཀ་བྱེད་ལ་མཐུན་རྐྱེན་སྐྲུན་བཞིན་ཡོད་ལ། བོད་དུ་རང་གི་འཚོ་གནས་ཆེད་དུ་ངོ་རྒོལ་བ་ཚོ་སྔར་ལས་འཛིན་བཟུང་དང་དྲག་གནོན་བྱེད་ལ་སྟབས་བདེ་རུ་གཏོང་གི་ཡོད།

༧གོང་ས་མཆོག་དང་བོད་མིའི་སྒྲིག་འཛུགས་ཀྱིས་བོད་ལ་རང་སྐྱོང་ཡོང་བར་འབད་བརྩོན་བྱེད་བཞིན་པ་དེར། ཁ་གཏད་དུ་མི་སྐོར་ཞིག་གིས་བོད་རང་བཙན་རྩོད་དགོས་ཞེས་རྩོད་རྙོག་སློང་གི་ཡོད་ཅིང་། རྩོད་རྙོག་སློང་མཁན་གྲས་སུ་སྐུ་དྲག་གི་ཁྱིམ་རྒྱུད་ཀྱི་བུ་རབས་ཚ་རྒྱུད་དག་ཚུད་ཡོད་ལ། ༧གོང་ས་མཆོག་གིས་དེ་སྔའི་བོད་སྡེ་བ་གཞུང་གི་སྐབས་སུ་མི་མང་ལ་དྲང་བོ་བྱེད་ཀྱིན་མེད་པ་དང་། ཕྱིའི་ཡུལ་གྲུ་ཁག་ལ་འབྲེལ་བ་འཛིན་མ་ཐུབ་པར་རང་སར་ཆེར་རློམ་གྱིས་བསྡད་པའི་རྐྱེན་གྱིས།བོད་རྒྱལ་ཁབ་ཤོར་ཚུལ་གྱི་བཀའ་སློབ་དག་དང་། དེ་བཞིན་བོད་མིའི་སྒྲིག་འཛུགས་ཀྱི་འཛིན་སྐྱོང་མང་གཙོའི་ལམ་དུ་བསྒྱུར་བ་སོགས་ཀྱིས་ཁོང་ཚོར་ཕོག་ཐུག་བཏང་ཡོད། གཞན་ཡང་ཆུ་སྒང་གསར་རྙིང་ལས་༧གོང་ས་མཆོག་དང་བོད་མིའི་སྒྲིག་འཛུགས་ལ་ཟ་ཟུར་ནས་རྣམ་འགྱུར་སྟོན་མཁན་ཁག་ཅིག་དང་། དེ་མིན་དོལ་རྒྱལ་རྗེས་འབྲང་བ། དེ་མིན་རྒྱ་གཞུང་གི་དངུལ་གྱིས་འཚོ་བའི་མི་སྐོར་ཞིག་གིས་ཀྱང་༧གོང་ས་མཆོག་དང་བོད་མིའི་སྒྲིག་འཛུགས་ཀྱི་རང་བཙན་རྩོད་ཀྱི་མེད་པ་དེ། རྒྱལ་བཙོང་བ་དང་མགོ་འདོགས་རང་ལུགས་པ་ཡིན་ཚུལ་སོགས་བསྒྲགས་ཏེ། བོད་རང་བཙན་རྩོད་དགོས་ལ། བོད་མིའི་སྒྲིག་འཛུགས་ཀྱི་སྲིད་ཇུས་དེ་ཡང་རང་བཙན་འཐབ་རྩོད་ཀྱི་སྲིད་ཇུས་ལ་བསྒྱུར་དགོས་པ་ཤོད་ཀྱིན་ཡོད། དེ་དག་ལ་ཕྱི་ཚུལ་ལ་རྒྱལ་ཞེན་གྱི་རྣམ་པ་ཡོད་ཀྱང་། དོན་ལ་ནང་ཁུལ་དཀྲུག་ཤིང་དང་ཕན་ཚུན་ཁ་གཏད་གཅོག་བྱེད་ལ་བོད་རང་བཙན་འཁྱེར་བཞིན་པ་འདི་རེད།

བོད་རང་བཙན་ཞེས་མི་སྐོར་ཞིག་གི་བྱེད་སྟངས་དེས། བོད་པ་ནང་ཁུལ་མཐུན་སྒྲིལ་དང་དབུ་འོག་དཔུང་འདེགས་ཀྱི་ནུས་པ་ཆུང་དུ་གཏོང་གི་ཡོད་ཅིང་། ག་ཚོད་བོད་མིའི་སྒྲིག་འཛུགས་དང་འཐབ་རྩོད་ཀྱི་གནས་བབ་ཞན་དུ་སོང་ན། རྒྱ་གཞུང་ལ་དགོས་པ་ཨ་མ་དེ་བོད་པ་རང་སྟེང་ནས་སྒྲུབ་ཀྱི་ཡོད་པ་འདི་རེད།

བོད་རང་བཙན་ནི་ལས་སླ་བོ་ཞིག་མིན་པ་སྐུ་ཞབས་འཇམ་དབྱངས་ནོར་བུས་ཀྱང་ཁས་ལེན་གྱིན་ཡོད་དེ། གོ་ཐོས་ལྟར་ན། འཇམ་ནོར་གྱིས་བོད་རང་བཙན་ཐོབ་ཀྱི་མ་རེད། འོན་ཀྱང་ང་ཚོས་རང་བཙན་གྱི་ལངས་ཕྱོགས་འཛིན་དགོས་པ་དེ་གལ་ཆེན་ཆགས་ཡོད་དེ། རྒྱ་ཕྱོགས་ནས་ང་ཚོ་གོང་ཚད་མར་མར་གཅོག་བཞིན་པའི་སྐབས་འདིར། ང་ཚོའི་རང་བཙན་གྱི་ལངས་ཕྱོགས་མཁྲེགས་པོ་ཞིག་འཛིན་ཐུབ་པ་ཡིན་ན། དེ་རྒྱ་ཕྱོགས་ལ་བརྡ་ལན་ཡག་ཤོས་ཤིག་རེད་ཅེས་བཤད་མྱོངས་འདུག སྐད་ཆ་འདིས་རང་བཙན་ཞེས་སྒྲོག་མཁན་དག་ལ་འཆར་གཞི་དང་ཕུགས་བསམ། གདེང་ཚོད་ག་འདྲ་ཡོད་མེད་ལ་འགྲེལ་བཤད་བརྒྱབ་ཡོད།

ཅི་ཞིག་མ་འགྲིག་པ་ཡིན་ནམ། བོད་རང་བཙན་གྱི་ལངས་ཕྱོགས་འཛིན་མཁན་ཚོའི་མིག་ན་མི་མཛེས་པ་དེ་༧གོང་ས་མཆོག་ཕུད་རྗེས། ཁྲི་ཟུར་ཟམ་གདོང་རིན་པོ་ཆེ་དང་ཚོགས་གཙོ་སྤེན་པ་ཚེ་རིང་རེད། དེ་སྔོན་གྲོས་ཚོགས་ར་བ་ནས་བཀའ་བརྒྱུད་སྤྱི་འཐུས་བསྟན་པ་ཡར་འཕེལ་གྱིས་ཚོགས་གཙོར་ཉེས་འགེལ་བྱེད་སྟངས་དང་། དེ་བཞིན་ཀླུ་མཁར་བྱམས་ལ་ཁ་བརྡར་ས་ཞིག་རེག་སོང་ན། ཟམ་གདོང་རིན་པོ་ཆེ་བོད་རང་བཙན་མེད་པར་བཟོ་མཁན་དང་བོད་གཞུང་སྒོ་རྒྱག་མཁན་ཟེར་ནས་ངར་གྱིན་འདུག དངོས་གནས་ཡིན། མི་རིགས་འདིའི་ལས་དོན་སྣ་མང་ཐད་ལ་གྲུབ་འབྲས་ཅན་གྱི་སྐྱེས་བུ་དག་ལ་ཁྱད་གསོད་བྱེད་པ་འདི་དག་མི་བསམ་ཡོད་ཅིག་ལས་ཀ་མ་རེད།

རྒྱལ་ཞེན་དང་ལྷག་བསམ་ཁོ་ནས་བོད་རང་བཙན་ལབ་ཀྱིན་ཡོད་ན། བོད་རང་བཙན་དེ་བོད་མི་ནང་ཁུལ་དུ་དཀྲུག་ཤིང་ཞིག་དང་། ༧གོང་ས་མཆོག་ལ་མ་རངས་པའི་རྣམ་འགྱུར་སྟོན་བྱེད་ཅིག དེ་བཞིན་བོད་མི་ནང་ཁུལ་མཐུན་སྒྲིལ་དང་སྒྲིག་འཛུགས་རྒྱུན་གནས་ལ་བར་ཆད་བཟོ་མཁན་ཞིག་ཏུ་ནམ་ཡང་འགྱུར་གྱི་མ་རེད་འདོད།