གྲོས་ཚོགས་ཚོགས་དུས་ ༡༠ པའི་ལས་ཉིན་དང་པོར་བོད་ནང་གི་ཛ་དྲག་གནས་སྟངས་ཐད་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་དོན་ཚན་ ༤ སྤྱི་མོས་གཏན་འབེབས་གནང་སོང་།
དེ་རིང་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པའི་ལས་ཉིན་དང་པོར། སྤྱི་འཐུས་རྒྱུན་ལས་ཀྱིས་བོད་ནང་གི་ཛ་དྲག་གནས་སྟངས་ཐད་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་ཞིག་བསྣམས་ཕེབས་པའི་ཐད་སྤྱི་འཐུས་མང་པོས་དགོངས་ཚུལ་བརྗོད་པ་བརྒྱུད་གྲོས་ཆོད་དོན་ཚན་ ༤ སྤྱི་མོས་གཏན་འབེབས་གནང་སོང་།
སྤྱི་འཐུས་རྣམ་པས་དགོངས་ཚུལ་གསུང་སྐབས་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས། གཞུང་ཞིག་གི་ཆབ་སྲིད་ཀྱི་མཚོན་དོན་ཆེད་དེབ་གཟུགས་དཀར་པོ་བྱས་ནས་རྒྱབ་ཤ་དཀར་པོ་ཟེར་བ་འདི་བཏོན་གྱི་ཡོད་སྟབས། ངས་བལྟས་ན་འདིས་གཞུང་གཅིག་གི་ཆབ་སྲིད་དང་སྲིད་བྱུས་གང་ཡིན་མཚོན་གྱི་ཡོད་པ་རེད། རྒྱ་ནག་གཞུང་གིས་ཕྱི་ལོ་ ༡༩༩༢ ལོར་བོད་ཀྱི་བདག་དབང་སྐོར་ལ་རྒྱབ་ཤ་དཀར་པོ་ཞེས་པ་ཞིག་བཏོན་པ་ནས་བཟུང་། ད་བར་རྒྱབ་ཤ་དཀར་པོའི་དེབ་ ༡༢ བཏོན་དགོས་པའི་རྒྱུ་མཚན་ག་པར་ཐུག་ཡོད་རེད་ཞུས་པ་ཡིན་ན། ང་ཚོ་བོད་ཀྱི་གནད་དོན་འདི་རྒྱལ་སྤྱིའི་ཐོག་ལ་གླེང་སློང་ཤུགས་ཆེན་ཡོང་བཞིན་ཡོད་སྟབས། དེ་ཚོར་རྫུན་སྒྲིག་ཁ་གཏད་གཅོག་ཆེད་དེབ་དེ་དག་བཏོན་ཡོད་པ་རེད། རྒྱ་ནག་གཞུང་ལ་བོད་ནང་ཁོར་ཡུག་གཏོར་སྐྱོན་ཤུགས་ཆེ་འགྲོ་བཞིན་ཡོད་པའི་སྐྱོན་འཛུགས་བྱེད་སྐབས། ཁོར་ཡུག་གི་གནས་སྟངས་ཡག་པོ་ཡོད་པའི་རྒྱབ་ཤ་དཀར་པོའི་དེབ་བཏོན་པ་དང་། བོད་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་འགྲོ་བཞིན་ཡོད་པའི་སྐྱོན་བརྗོད་བྱེད་སྐབས། འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་ཕྱིན་ཡོད་པའི་རྒྱབ་ཤ་དཀར་པོ་དེབ་བཏོན་ཡོད་པ་མ་ཟད། བོད་ནང་ཆོས་དང་སྐད་ཡིག་རིག་གཞུང་བཅས་རྩ་མེད་འགྲོ་བཞིན་ཡོད་པའི་སྐྱོན་བརྗོད་བྱེད་སྐབས། ཁོ་ཚོས་སྐད་ཡིག་ཆོས་དང་རིག་གཞུང་བཅས་པ་ཡར་རྒྱས་ཕྱིན་ཡོད་པའི་རྒྱབ་ཤ་དཀར་པོའི་དེབ་སོགས་བཏོན་ཡོད་པ་རེད། ཅེས་སོགས་བརྗོད་སོང་།
ཡང་སྤྱི་འཐུས་ཀརྨ་ཡེ་ཤེས་ལགས་ཀྱིས། ང་ཚོའི་འཐབ་རྩོད་འདི་ལོ་གཅིག་གཉིས་ནང་ལ་འགྲུབ་སྲིད་པ་མ་ཟད། ལོ་བཅུ་བཅོ་ལྔ་དང་ལྔ་བཅུ་དྲུག་ཅུ་ནང་ལའང་འགྲུབ་སྲིད་པ་ཞིག་ཡིན་སྟབས། ང་ཚོས་དེ་ལ་དཔག་པས་འཆར་གཞི་བང་སྒྲིག་སྟེ་ལོ་བཅུ་ལྷག་པ་ཡིན་ན་ག་རེ་བྱེད་ཀྱི་ཡིན་མིན་དང་། ལོ་ལྔ་བཅུ་དང་བརྒྱ་ཕྲག་ལྷག་ན་གང་འདྲ་བྱེད་ཀྱི་ཡིན་མིན། དེ་བཞིན་བོད་ནང་དང་རྒྱལ་སྤྱིའི་ཐོག་ག་རེ་ཆགས་མིན་ལ་བལྟས་ཏེ། ད་ལྟ་རྒྱལ་སྤྱིའི་ཐོག་བོད་དོན་གྱི་རྒྱབ་སྐྱོར་གནས་སྟངས་ག་པར་སླེབ་ཡོད་མེད་དང་། གྲོས་ཚོགས་འཐུས་མི་དང་སྲིད་གཞུང་ཁག་གིས་རྒྱབ་སྐྱོར་ག་ཚོད་བྱེད་ཀྱི་ཡོད་མེད་ཕྱོགས་བསྡོམས་དང་འབྲེལ་ཉམས་ཞིབ་ཚད་ལྡན་ཞིག་བྱས་ཏེ། ང་ཚོས་ང་ཚོའི་གནས་བབ་ལ་གཞིགས་ནས་གོམ་སྟབས་ཤིག་མ་སྤོས་པ་ཡིན་ན། གང་ལྟར་རྒྱ་གཞུང་གིས་བསམ་བློ་གཏིང་རིང་པོ་བཏང་ནས་བོད་ཀྱི་ལས་དོན་ཚོགས་ཆུང་བརྒྱུད།དྲིལ་བསྒྲགས་བྱེད་བཞིན་ཡོད་པ་དག་ལ་ཁ་ལ་ཁ་ལན་དང་ཚིག་ལ་ཚིག་ལན་བརྒྱབ་སྟེ། ཞི་ཅིན་ཕིན་གྱི་དུས་སྐབས་འདིར་བོད་དོན་བདེན་མཐའ་སེལ་ཐུབ་པའི་རྩོད་ལེན་བྱེད་དགོས་པ་རེད། ཅེས་སོགས་བརྗོད་སོང་།
དེ་བཞིན་གྲོས་ཆོད་གྲོས་འཆར་དེའི་ཐོག་སྤྱི་འཐུས་ཁག་ཅིག་གིས་དགོངས་ཚུལ་བརྗོད་སྐབས། ཉེ་ལམ་རྒྱ་ནག་གཞུང་གིས་༼བོད་ལྗོངས་འཕེལ་རྒྱས་བགྲོད་ལམ་གྱི་ལོ་རྒྱུས་ཀྱི་གདམ་ག༽ཟེར་བའི་རྒྱབ་ཤ་དཀར་པོའི་དེབ་གཅིག་དང་། ༼མི་རིགས་ས་ཁོངས་རང་སྐྱོང་ལམ་ལུགས་བོད་ལྗོངས་སུ་གྲུབ་འབྲས་ལྡན་པར་ལག་བསྟར་བྱས་པ༽ཟེར་བ་གཅིག་བཅས་དེབ་གཉིས་བཏོན་ཡོད་ཀྱང་། དེབ་དེ་དག་རྒྱ་ནག་གཞུང་གིས་རྒྱལ་སྤྱིའི་ཐོག་བོད་ནང་གི་གནས་སྟངས་ལོག་འགྲེལ་རྫུན་སྒྲིག་བྱ་ཆེད་ཀྱི་དྲིལ་བསྒྲགས་ཡིག་ཆ་ཞིག་ཡིན་པ་ལས་དོན་དངོས་མིན་པའི་སྐོར་དང་། བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པ་ཚོགས་སྐབས་གཞིས་ལུས་རྒྱ་ཆེའི་མང་ཚོགས་ཀྱི་མངོན་འདོད་དང་འཚམ་པའི་གནད་དོན་དང་། དྲག་གནོན་དང་གདུག་རྩུབ་ཅན་གྱི་སྲིད་བྱུས་ལ་འགྱུར་བ་གཏོང་རྒྱུའི་སྐོར་ལ་གླེང་སློང་གང་ཡང་བྱས་མེད་པ། བོད་རང་སྐྱོང་ལྗོངས་ཟེར་བ་བཙུགས་ནས་མི་ལོ་ ༥༠ འཁོར་བའི་དུས་དྲན་ཚོགས་སྐབས་བོད་ནང་ཡར་རྒྱས་བཏང་ཡོད་ལུགས་ཀྱི་དྲིལ་བསྒྲགས་ཤུགས་ཆེ་བྱས་ཡོད་ཀྱང་། མི་ལོ་ ༥༠ རིང་གཞིས་ལུས་བོད་མི་རྣམས་ཆེས་མུན་ནག་གི་ཁྲོད་དུ་ཡ་ང་བའི་གནས་སྟངས་འོག་གནས་དགོས་བྱུང་ཡོད་པ། རྒྱ་ནག་དམར་ཤོག་ཚོགས་པའི་མགོ་ཁྲིད་ཚོས་ཆོས་ལུགས་རྨོངས་དད་རིང་ལུགས་དང་དཔོན་ངན་རིང་ལུགས། བཀས་བཀོད་རྒྱུན་འཛིན་ལམ་ལུགས་བཅས་ལམ་ལུགས་གསུམ་མེད་པ་བཟོ་ཡི་ཡོད་ལབ་ཀྱི་ཡོད་ཀྱང་། དེང་སང་ཁོ་རང་ཚོ་དེ་ཚོའི་ཕྱོགས་སུ་འགྲོ་གི་ཡོད་པ། བོད་ནང་རང་ལུས་མེར་སྲེག་གནང་མཁན་གཙོས་རྒྱལ་གཅེས་དཔའ་བོ་དཔའ་མོ་ཚོའི་སྙིང་སྟོབས་དེ་བོད་མི་ཡོངས་ཀྱིས་སེམས་ནང་ཇི་སྲིད་གནས་རྒྱུ་ཡིན་པ་དང་། མ་འོངས་བོད་ཀྱི་གནས་བབ་ལ་གཞིགས་ནས་འཕྱར་གྲུ་མཉམ་འདེགས་ཐོག་བོད་དོན་བདེན་མཐའ་རྩོད་ལེན་བྱ་རྒྱུ་ཤིན་ཏུ་གལ་ཆེན་ཆགས་ཡོད་པ་སོགས་ཀྱི་དགོངས་ཚུལ་བརྗོད་སོང་།
གྲོས་ཆོད་གྲོས་འཆར་དེའི་ཐོག་དགོངས་ཚུལ་མང་པོ་བརྗོད་པ་དང་འབྲེལ་ནས་སྤྱི་འཐུས་ཚོགས་གཙོ་མཆོག་གིས་གསུང་བཤད་གནང་སྐབས། ད་ལན་བགྲོ་གླེང་སྐབས་བཀུར་འོས་སྤྱི་འཐུས་ཤིག་གིས་རང་ལུས་མེར་སྲེག་གནང་མཁན་གྱི་གྲངས་ཀ་མི་འདྲ་བ་ཡོད་པའི་སྐོར་གསུངས་སོང་། འཛིན་སྐྱོང་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ངོས་ནས་བོད་ནང་ལ་རང་ལུས་མེར་བསྲེགས་གནང་བའི་གནད་དོན་རེ་རེའི་ཐོག་ལ་ཞིབ་ཚགས་པོ་བྱས་ནས་བལྟས་ཏེ། གྲངས་ཀ་དེ་གཏན་འབེབས་བྱེད་ཀྱི་ཡོད་སྟབས། ད་བར་དུ་བོད་ནང་རང་ལུས་མེར་བསྲེགས་གནང་མཁན་ ༡༤༢ བྱུང་ཡོད་པའི་གནས་སྟངས་དེ་ཆགས་བསྡད་ཡོད་པ་རེད། རླུང་འཕྲིན་ཁང་ཁག་གཅིག་གིས་ ༡༤༣ བྱུང་ཡོད་པ་སྙན་སྒྲོན་གནང་གི་ཡོད་བཟོ་འདུག དེ་བཞིན་གཞུང་འབྲེལ་མ་ཡིན་པའི་ཚོགས་པ་ཞིག་གིས་ ༡༤༩ ཞེས་བེད་སྤྱོད་བཏང་གནང་གི་ཡོད་ས་རེད། དེའི་གྲངས་ཀ་ནང་ལ་བོད་ཙམ་མིན་པ་བོད་ཕྱི་ལ་རང་ལུས་མེར་སྲེག་གནང་མཁན་རྣམས་བསྡོམས་ནས་བརྩི་གི་ཡོད་པ་ཞུ་རྒྱུ་དང་སྦྲགས། ད་ཕན་རང་ལུས་མེར་སྲེག་གནང་མཁན་ ༡༤༢ དང་ ༡༤༣། ༡༤༩ ཞེས་གྲངས་ཀ་མི་འདྲ་བ་གསུམ་བརྩི་བཞིན་ཡོད་པ་ལས་ ༡༤༥ དང་ ༡༤༦ ཟེར་བ་དེ་འདྲ་བེད་སྤྱོད་གཏོང་མཁན་མི་འདུག ཞེས་སོགས་གསུངས་སོང་།
མཇུག་ཏུ་སྲིད་སྐྱོང་མཆོག་གིས་གྲོས་ཆོད་གྲོས་འཆར་དེའི་ཐད་གསུང་བཤད་གནང་དོན། ཉེ་ལམ་རྒྱ་ནག་གཞུང་གིས་བོད་སྐོར་གྱི་རྒྱབ་ཤ་དཀར་པོ་གཙོས་པའི་བོད་རང་སྐྱོང་ལྗོངས་བཙུགས་ནས་ངོ་ལོ་ ༥༠ འཁོར་བའི་དུས་སྟོན་དང་བོད་ཀྱི་ལས་དོན་ཚོགས་ཆུང་ཟེར་བ་སོགས་ཚོགས་སྐབས། ཁོ་ཚོས་བོད་མིར་བདེ་སྤྲད་བདེ་ལེན་གྱི་སྲིད་བྱུས་འཛིན་གྱི་ཡོད་སྐོར་བརྗོད་ཡོད་པ་དང་། བདེ་སྤྲད་བདེ་ལེན་ཟེར་བ་དེ་བོད་མིར་ཐོབ་ཐང་དང་བདེ་སྐྱིད་སྤྲད་དེ། བདེ་འཇགས་ལེན་གྱི་ཡོད་སྐོར་ཟེར་གྱི་ཡོད་པ་གསལ་པོ་ཆགས་ཡོད་སྟབས། ང་ཚོས་རྒྱ་ནག་གཞུང་གི་ཐབས་བྱུས་དེར་མུ་མཐུད་གདོང་ལེན་བྱེད་དགོས་པ་མ་ཟད། དབུ་མའི་ལམ་ལ་གཞིར་བཞག་ཐོག་བོད་རྒྱ་འབྲེལ་མོལ་གྱིས་བོད་དོན་བདེན་མཐའ་སེལ་དགོས་པ་འདི་བོད་མིའི་སྒྲིག་འཛུགས་ཀྱི་སྲིད་བྱུས་ཡིན་པ་མ་ཟད། གྲོས་ཚོགས་ཀྱིས་སྤྱི་མོས་གཏན་ལ་ཕབ་པའི་སྲིད་བྱུས་ཤིག་ཀྱང་ཆགས་ཡོད་སྟབས། བཀའ་ཤག་གིས་དམ་བཅའ་གཙང་མ་ཞུས་ཐོག་ཐབས་ལམ་འདི་བརྒྱུད་བོད་དོན་བདེན་མཐའ་སེལ་རྒྱུར་མུ་མཐུད་འབད་བརྩོན་གནང་དང་གནང་མུས་ཡིན་ཞུ་རྒྱུ་ཡིན། ཞེས་སོགས་གསུངས་སོང་།
སྤྱི་འཐུས་རྣམ་པས་བགྲོ་གླེང་ལྷུག་པོ་གནང་བ་བརྒྱུད་གྲོས་ཆོད་དོན་ཚན་ལྔ་སྤྱི་མོས་གཏན་འབེབས་གནང་བ་ནི། དང་པོ། བོད་བསྟན་སྲིད་མི་རིགས་ཀྱི་ཆེད་དུ་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་དང་། དེ་བཞིན་བོད་བསྟན་སྲིད་མི་རིགས་ཀྱི་འཐབ་རྩོད་ཆེད་རྒྱ་གཞུང་གི་བཙོན་འོག་ཏུ་དཀའ་སྡུག་མྱངས་དང་མྱོང་བཞིན་པའི་རྒྱལ་གཅེས་དཔའ་བོ་དཔའ་མོ་ཚོའི་སྙིང་སྟོབས་ལ་རྗེས་སུ་ཡི་རངས་དང་སྦྲགས། ཁོང་རྣམ་པའི་ཤུལ་ལུས་ནང་མི་ཉེ་འབྲེལ་སོགས་ལ་གདུང་སེམས་མཉམ་སྐྱེད་དང་འབྲེལ་ཐུགས་གསོའི་འཚམས་འདྲི་དང་། འདས་གྲོངས་སུ་གྱུར་པ་རྣམས་འཕགས་མཆོག་ཕྱག་ན་པདྨོས་རྗེས་སུ་བཟུང་ནས་སླར་ཡང་བོད་ཁ་བ་གངས་ཅན་གྱི་ཞིང་དུ་རང་དབང་བདེ་སྐྱིད་ཀྱི་ཉི་མ་མྱུར་བ་ཉིད་དུ་ཤར་ནས་དེར་སྐྱེ་བ་དང་། རྒྱའི་དམ་དྲག་བཀག་བསྐྱིལ་འོག་སྡུག་སྦྱོང་མནར་གཅོད་མྱོང་བཞིན་པ་རྣམས་མགྱོགས་མྱུར་གློད་བཀྲོལ་ཡོང་བའི་སྨོན་འདུན་ཤུགས་དྲག་ཞུ་རྒྱུ།
གཉིས་པ། རྒྱ་ནག་གི་འགོ་འཁྲིད་ཚོས་བོད་དང་བོད་མིའི་ཐོག་འཛིན་པའི་མི་རིགས་མཉམ་བསྲེ་དང་། མི་སེར་སྤེལ་ཡུལ་སོགས་མཁྲེགས་འཛིན་དང་དམ་དྲག་ཅན་གྱི་སྲིད་བྱུས་ལ་འགྱུར་བ་བཏང་སྟེ་བོད་ནང་གི་དངོས་ཡོད་གནས་སྟངས་དང་། བོད་མིའི་མངོན་འདོད་དང་མཐུན་པའི་ཐོག་བོད་རྒྱ་གཉིས་སྨན་གྱི་བཟང་ཕྱོགས་ཀྱི་འགྱུར་བ་ཞིག་ཡོང་ངེས་པར་གཏོང་དགོས་པ་དང་། ༧ཀུན་གཟིགས་པཎ་ཆེན་ཆུང་སྲིད་རིན་པོ་ཆེས་དབུས་བོད་ནང་ཉེས་མེད་འཛིན་བཟུང་བཙོན་འཇུག་སོགས་ཀྱིས་སྡུག་སྦྱོང་མྱོང་བཞིན་པ་རྣམས་འཕྲལ་དུ་གློད་བཀྲོལ་གྱིས་རྒྱལ་སྤྱིའི་ཁྲིམས་ལུགས་ལྟར་འགྲོ་བ་མི་སྤྱི་མཚུངས་ཀྱི་ཐོབ་ཐང་ངེས་པར་དགོས་པ། བོད་ཀྱི་གནད་དོན་སྤྱི་ཡོངས་ལ་བསམ་ཞིབ་ནན་ཏན་གྱིས་བོད་རྒྱ་ཕན་ཚུན་ཞི་འཇམ་དང་འབྲེལ་མོལ་གྱི་ལམ་ནས་ཐག་གཅོད་གང་མྱུར་དགོས་རྒྱུ།
གསུམ་པ། འདི་ལོ་རྒྱ་ནག་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་སྒྲུབ་ཁང་ཞེས་པས་བཏོན་པའི་བོད་སྐོར་གྱི་རྒྱབ་ཤ་དཀར་པོའི་དེབ་གཉིས་ནང་བོད་ཀྱི་གནད་དོན་སྐོར་ལ་འཁྱོག་བཤད་མང་པོ་བྱས་འདུག་པ་ཁག་ལ་ངོས་ལེན་ནམ་ཡང་མེད་པ་དང་། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པ་ཟེར་བ་དང་། བོད་རང་སྐྱོང་ལྗོངས་ཟེར་བ་བཙུགས་ནས་མི་ལོ་ ༥༠ འཁོར་བའི་དུས་དྲན་ཟེར་བ་བཅས་ནི་རྒྱལ་སྤྱིའི་ཐོག་རྒྱ་ནག་གིས་བོད་ལ་སེམས་ཁུར་བྱེད་ཀྱི་ཡོད་མདོག་མཚོན་བྱེད་དང་། བོད་རྒྱ་ནག་དང་ཁ་བྲལ་ཐབས་མེད་པའི་ཆ་ཤས་ཡིན་ཚུལ་གྱི་སྒྲུབ་བྱེད་ལྟར་སྣང་ལ་བསྐྱར་འབད་བྱས་པ་ཙམ་ལས་བོད་རྒྱའི་དཀའ་རྙོག་སེལ་ཐབས་ཀྱི་དོན་ཕན་ལྡན་པའི་དགེ་མཚན་གང་ཡང་མ་མཐོང་བར་ངོས་འཛིན་བྱ་རྒྱུ།
བཞི་པ། འཛམ་གླིང་མཉམ་འབྲེལ་རྒྱལ་ཚོགས་དང་། རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས། རྒྱལ་སྤྱིའི་ཉེས་ཡང་ཚོགས་པ། གཞུང་དང་། གྲོས་ཚོགས། རྒྱལ་ཁབ་ཁག་གི་དབུ་འཁྲིད་རྣམ་པ། གཞུང་འབྲེལ་མ་ཡིན་པའི་ཚོགས་སྒེར་ཇི་སྙེད་བཅས་ཀྱིས་ད་ཕན་བོད་དང་བོད་མིར་རྒྱབ་སྐྱོར་གང་ལེགས་གནང་དང་གནང་བཞིན་པར་ཐུགས་རྗེ་བཀའ་དྲིན་ཆེ་ཞུ་རྒྱུ་དང་། ད་དུང་ཡང་རྒྱ་ནག་སྲིད་གཞུང་གི་གདུག་རྩུབ་དང་གཡོལ་ཐབས་ཀྱི་སྲིད་བྱུས་ངན་པ་རྣམས་ལ་ངོས་འཛིན་གསལ་པོས་བོད་ནང་བོད་མིས་མྱོང་བཞིན་པའི་དཀའ་སྡུག་ཚད་ལས་བརྒལ་བ་རྣམས་ལས་གྲོལ་སླད་ཐབས་རྣམ་ཡོད་རྒུས་ཤུགས་གནོན་རྒྱབ་སྐྱོར་ཡོང་བ། ཞེས་བཀོད་འདུག
གསར་འགོད་པ། དོན་གྲུབ།
