ལངས་ཕྱོཊ་མ་འདྲ་བ་ཡོད་རུང་འཐབ་རྩོད་ལ་ནུས་པ་ཐོན་པའི་ཐབས་ཤེས་བྱ་དགོས།

སྐབས་ ༡༦ པའི་མདོ་སྨད་སྤྱི་འཐུས་འོས་མི་གསར་པ་པདྨ་ཆོས་སྒྲོན་ལགས་ཀྱིས་འཇོན་ནུས་མེད་པའི་སྤྱི་འཐུས་ཀྱིས་རྐུབ་བཀྱག་སྲུང་ནས་མི་འདུག་པར་བཟང་སྤྱོད་ཀྱི་ཐོག་ནས་རང་འགུལ་གྱིས་དགོངས་པ་ཞུས་ཏེ་རྟ་ལམ་བོང་བུས་མི་འགོག་པ་བྱ་རྒྱུ་དེ་སོ་སོའི་འགན་འཁྲི་ཆགས་ཡོད་སྐོར་བརྗོད་སོང་།

   དྲི་བ། ཁྱེད་ཀྱི་འདས་ཟིན་པའི་མི་ཚེའི་ལོ་རྒྱུས་དང་ནང་མིའི་རྒྱབ་ལྗོངས། སློབ་སྦྱོང་གི་བརྒྱུད་རིམ་སོགས་ངོ་སྤྲོད་རག་བསྡུས་ཤིག་གནོངས་དང་།

ལན། ངའི་མིང་ལ་པདྨ་ཆོས་སྒྲོན་ཟེར་བ་དང་ཕ་ཡུལ་ཨ་མདོ་བླ་བྲང་མཛོད་དགེ་ནས་ཡིན། ལོ་བདུན་ནས་མགོ་བཙུགས་ཏེ་འབྲིང་རིམ་བར་དུ་སློབ་གྲྭར་འགྲིམས་པ་ཡིན། ཕྱི་ལོ་ ༡༩༩༨ ལོར་རང་གི་རྨི་ལམ་དང་འཆར་སྣང་ཞིག་གིས་རྒྱ་གར་ལ་ཡོང་སྟེ། སུ་ཇ་བོད་ཁྱིམ་དུ་སོང་ནས་འཛིན་གྲྭ་དགུ་པ་ཐོན་སྐབས་ཝ་ར་ཎཱ་སི་མཐོ་སློབ་ལ་ཕྱིན་ནས་ཉེ་བའི་གཙུག་ལག་རབ་འབྱམས་ཐོན་རྗེས། དྷ་རམ་སར་ཡོང་ནས་སྒེར་གྱིས་༼རྔམ་བརྗིད་རི་བོ་འཚོགས་རྣམས་ཐོད་ཀྱིས་བསུས༽ཞེས་པའི་རྒྱ་ཡིག་དེབ་ཅིག་བོད་བསྒྱུར་བྱས་པ་ཡིན། དེ་དང་མཉམ་དུ་དཔེ་དེབ་རྩོམ་སྒྲིག་འགའ་རེ་བྱེད་ཞོར་དུ་ཨིན་དྷར་གྷན་དྷི་གཙུག་ལག་སློབ་ཆེན་ (Indira Gandhi open university) ནང་ཟུར་ཞུགས་ཀྱི་ལམ་ནས་ནུབ་ཕྱོགས་རྩོམ་རིག་སྐོར་ལ་གཙུག་ལག་རབ་འབྱམས་པའི་སློབ་སྦྱོང་བྱས་པ་ཡིན། ༢༠༡༢ ལོ་ནས་དབུས་བུད་མེད་ལྷན་ཚོགས་ཀྱི་རྒྱུན་ལས་ཆགས་ཏེ། ༼སྒྲོལ་མ་༽དང་ ༼ཕྱི་ལོ་ ༡༩༥༩ ནས་ ༢༠༡༥ བར་གྱི་བོད་ཀྱི་བུད་མེད་ལྷན་ཚོགས་ཀྱི་ལོ་རྒྱུས༽། ༼བོད་ཀྱི་བདེན་པའི་འཐབ་རྩོད་ཁྲོད་ལག་རྗེས་ཅན་གྱི་བུད་མེད་ཁག་གི་ལོ་རྒྱུས།༽ ༼བོད་ཀྱི་བུད་མེད་ལྷན་ཚོགས་ཀྱི་ས་གནས་ཡན་ལག་ཁག་གི་ལོ་རྒྱུས་༽བཅས་ཀྱི་རྩོམ་སྒྲིག་པའི་འགན་ཁུར་པ་ཡིན།

   དྲི་བ། ཁྱེད་རང་སྐབས་ ༡༦ པའི་སྤྱི་འཐུས་འོས་མིར་ལངས་ཡོད་པ་ལྟར། སྤྱི་འཐུས་ཤིག་གི་ཆ་རྐྱེན་ག་རེ་ག་རེ་ཚང་ཡོད།

ལན། ད་ལྟ་ངས་དམིཊ་བསལ་ཆ་རྐྱེན་བཏོན་པ་ཡིན་ན་བདེ་པོ་མི་འདུག་ཀྱང་། སྔོན་མའི་སྤྱི་འཐུས་ཀྱི་ལོ་རྒྱུས་ལ་བལྟས་དུས། ང་ལ་སྤྱི་འཐུས་རྣམ་པ་ཚོར་ཚང་པའི་ཆ་རྐྱེན་ཚང་མེད་པ་དང་། ཁོ་ཚོ་ལས་ཞན་པ་འདུག་བསམ་པའི་བསམ་བློ་གང་ཡང་མེད། ཡིན་ནའང་ཆ་རྐྱེན་གཅིག་གཉིས་ཤིག་ཞུས་ན། ངས་རྒྱ་ཡིག་དང་དབྱིན་ཇི། བོད་ཡིག་བཅས་སྐད་ཡིག་གསུམ་ཤེས་ཀྱི་ཡོད་པ་མ་ཟད། ཆབ་སྲིད་དང་རྒྱལ་སྤྱིའི་ཁྲིམས་ལུགས་སོགས་ལ་དོ་སྣང་གང་ལ་གང་འཚམ་ཡོད་སྟབས། ང་སྤྱི་འཐུས་ཆགས་པ་ཡིན་ན་མ་འགྲིག་པ་གང་ཡང་མེད་པ་འདྲ་བོ་ཞིག་མཐོང་གི་ཡོད། ང་རང་སྒེར་ལ་སྤོབས་པ་དང་གདེང་ཚོད་ག་རེ་ཡོད་ཅེས་ན། ད་ལྟའི་སྤྱི་འཐུས་ལྷན་ཚོགས་ནང་ལ་སྤྱི་འཐུས་མི་སྒེར་ཁ་ཤས་ཀྱིས་ལས་དོན་ཆེ་མ་ཆུང་གསུམ་གྱི་ཐག་གཅོད་ག་རེ་བྱས་ཀྱང་། ཁྱི་སྤྱང་ངན་འབྲེལ་བྱ་བ་དང་རྐུན་རྒྱབ་ཇག་ལངས་བྱ་བ། ཕྱོགས་རིས་འཐེན་འཁྱེར་སོགས་ཀྱི་ལམ་ལ་འགྲོ་བཞིན་པ་དེར་མོས་མཐུན་རྩ་བ་ནས་མེད། ཕྱིན་ཆད་སོ་སོ་སྤྱི་འཐུས་ཆགས་པ་ཡིན་ན་དེའི་རིགས་ནོར་འཁྲུལ་ཞིག་ལ་རྩིས་ནས་རྩ་བ་ནས་བྱ་རྒྱུ་མིན།

   དྲི་བ། མ་འོངས་པར་ཁྱེད་ལ་སྤྱི་འཐུས་ཀྱི་རྒྱལ་ཁ་འཐོབ་པ་ཡིན་ན། བུད་མེད་སྤྱི་འཐུས་ཤིག་གི་ངོས་ཐད་ནས་རང་རེའི་བུད་མེད་ཚོར་ལམ་སྟོན་གྱི་ནུས་པ་ག་རེ་འདོན་འཆར་ཡོད།

ལན། བཀའ་ཤག་སྐབས་སྔོན་མས་བོད་ཀྱི་བུད་མེད་ཚོའི་ནུས་ཤུགས་གོང་འཕེལ་གཏོང་ཆེད་དོན་ཚན་ལྔ་དྲུག་ཅིག་གཏན་འབེབས་བྱས་ཡོད་སྟབས། ད་ཆ་དེ་ལག་བསྟར་བྱས་དང་མ་བྱས་ཀྱི་སྐོར་ལ་ཚོགས་འདུ་རབ་དང་རིམ་པ་འགྲོ་བཞིན་ཡོད། ལྷག་པར་ཏུ་བུད་མེད་ལྷན་ཚོགས་ཀྱི་འབྲེལ་ཡོད་ལས་བྱེད་དེ་འདྲ་སྐད་བཏང་ནས་ཟབ་སྦྱོང་དང་ལས་ཀ་མཉམ་དུ་འགྲོ་བཞིན་ཡོད་པ་རེད། སྤྱི་ཡོངས་ཀྱི་ཆ་ནས་བུད་མེད་ཀྱི་ནུས་སྟོབས་གོང་འཕེལ་ཟེར་བ་དེ། ང་རང་སྒེར་གྱིས་ལོ་རེར་ཟབ་སྦྱོང་དང་ཚོགས་འདུ་ཐེངས་གཅིག་གཉིས་ཤིག་ཚོགས་པར་བརྟེན་ནས་ནུས་ཤུགས་གོང་སྤེལ་འགྲོ་གི་ཡོད་པར་ངོས་འཛིན་བྱེད་ཀྱི་མེད། ངས་སོ་སོའི་བསམ་བློ་གཏོང་སྟངས་དང་སློབ་སྦྱོང་ལ་བརྟེན་ཏེ་རང་རྐྱ་འཕེལ་བའི་བསམ་བློ་ཞིག་དང་པོ་ནས་གྲུབ་བཅུག་དགོས་པ་རེད་བསམ་གྱི་ཡོད་པ་མ་ཟད། རང་ཉིད་ལ་ནུས་འཇོན་གང་ཡོད་པ་དེ། སྤྱི་ཚོགས་ཤིག་གི་སྡིངས་ཆའི་སྟེང་ཡོང་ནས་ལག་ལེན་བསྟར་བ་སོགས་གང་ལྟར་རང་གིས་གང་འདོད་པ་དང་གང་བསམ་པ། གང་ཤེས་འདོད་པ་དེ་ལག་ལེན་གྱི་རིམ་པའི་ཁྲོད་ནས་སྤྱི་ཚོགས་སྟེང་ངོ་འཕྲོད་ཐུབ་པ་བྱེད་དགོས་པ་རེད་བསམ་གྱི་འདུག

   དྲི་བ། ད་ལྟའི་བོད་མི་མང་སྤྱི་འཐུས་ལས་ཐོག་རྣམ་པས་ཕྱག་ལས་གནང་སྟངས་ཐད་འཐུས་ཤོར་དང་སྐྱོན་ཆ་ག་རེ་མཐོང་གི་འདུག

ལན། ངས་ནམ་རྒྱུན་ནས་སྐབས་སྔོན་མའི་སྤྱི་འཐུས་ཀྱི་ཕྱག་ལས་གནང་ཕྱོཊ་ཁ་ཤས་ཤིག་ལ་མ་འགྲིག་པའི་དོ་སྣང་བྱུང་སོང་། མདོ་སྨད་སྤྱི་འཐུས་ཡིན་ན་འདྲ། ཆོལ་ཁ་དང་ཆོས་བརྒྱུད་ཁག་གི་སྤྱི་འཐུས་ཡིན་ནའང་འདྲ། གལ་སྲིད་སྤྱི་འཐུས་ཀྱི་ལས་ཀ་བྱེད་མ་ཐུབ་པ་ཡིན་ན། བཟང་སྤྱོད་ཀྱི་སྒང་ནས་སོ་སོས་དགོངས་པ་ཞུ་དགོས་པའི་ཚོར་སྣང་ཞིག་ཡོང་གི་འདུག རང་ཉིད་ལ་སྤྱི་འཐུས་ཀྱི་རྐུབ་བཀྱག་དེ་ཡིན་གཅིག་མིན་གཅིག་ཐོབ་དགོས་པ་དང་། གཞན་གྱིས་བརྒྱུད་སྐུལ་འོག་ཐོབ་བཅུག་སྟེ་རྐུབ་བཀྱག་སྲུང་དགོས་པ། གྲངས་ཚད་ལོན་དགོས་པ་དེ་འདྲ་གང་ཡང་ཆགས་ཡོད་པ་མ་རེད། གལ་སྲིད་འཇོན་ནུས་མེད་པའི་སྤྱི་འཐུས་བྱེ་བྲག་པ་ཞིག་གིས་རྟ་ལམ་བོང་བུས་འགོག་པ་ཟེར་བ་ལྟར། མི་འཇོན་ཐང་ཅན་ཞིག་གི་ལམ་ཁ་བཀག་ནས་རྐུབ་བཀྱག་སྲུང་བ་དང་། རྐུབ་བཀྱག་ཚ་བོ་བཟོས་ནས་བཀའ་མོལ་གནང་རྒྱུ་མེད་པ་དང་ལྟ་ཚུལ་འདོན་རྒྱུ་མེད་པ། གནས་ཚུལ་ག་རེ་བྱུང་ནའང་ཁ་འཚུམ་ནས་བསྡད་པ་དེ་ཏག་ཏག་ཅིག་བསྡད་མེད་པའི་ཚོར་སྣང་ཞིག་ཡོང་གི་འདུག་སྟབས། ངས་བཟང་སྤྱོད་ཐོག་ནས་སོ་སོས་དགོངས་པ་ཞུས་ནས་རྟ་ལམ་བོང་བུས་མི་འགོག་པ་དེ་མི་སྒེར་གྱི་འགན་འཁྲི་ཞིག་ཆགས་ཡོད་པར་ངོས་འཛིན་བྱེད་ཀྱི་ཡོད།

   དྲི་བ། ཁྱེད་རང་བོད་ཀྱི་བུད་མེད་ལྷན་ཚོགས་ཀྱི་རྒྱུན་ལས་བཅུ་གཅིག་པའི་ནང་ལ་བདམས་ཡོད་ཀྱང་ཁྱེད་རང་བཞུགས་མེད་ཚུལ་བརྗོད་ཀྱི་འདུག དེའི་རྒྱུ་མཚན་ག་རེ་ཡིན་ནམ།

ལན། སྤྱིར་བཏང་རྒྱུ་མཚན་བྱེ་བྲག་པ་ཁ་ཤས་ཤིག་ཡོད་པ་རེད། ད་ལྟ་ང་ཚོའི་སྐབས་བཅུ་པ་དེ་བཟང་ངན་གཉིས་འཁྱོལ་ཙམ་རེད། སྐབས་བཅུ་གཅིག་པ་ཡང་མགོ་ནས་ལས་རོཊ་གསར་བ་མང་པོ་ཞིག་དང་མཉམ་དུ་ལས་ཀ་བྱེད་དགོས་སྐབས། ལས་རོགས་ཚོའི་སློབ་སྦྱོང་གི་རྒྱབ་ལྗོངས་དང་། ལས་ཀའི་ཁ་ཕྱོཊ་ཤིག་གཏན་འབེབས་བྱེད་སྐབས་བསམ་བློ་དང་སློབ་སྦྱོང་ཚད་ངེས་ཅན་ཞིག་ཡོད་དགོས་སྟབས། དེའི་ཐོག་ལ་དཀའ་ངལ་འཕྲད་ཀྱི་རེད་བསམ་ནས་དགོངས་པ་ཞུས་པ་ཡིན། ང་རང་བུད་མེད་ལྷན་ཚོགས་ནང་ལས་ཀ་བྱེད་དགོས་དོན་གཙོ་བོ་དེ། བོད་ནང་གི་བུད་མེད་དང་ཁོ་ཚོའི་བདེ་སྡུག་ཡར་མཉམ་འབྲེལ་རྒྱལ་ཚོགས་སོགས་ལ་སྙན་ཞུ་འབུལ་པ་དང་། བསྐྱར་ཞིབ་ཀྱི་ལོ་རྒྱུས་ཕྱོགས་སྒྲིག་དང་རྩོམ་སྒྲིག་སོགས་བྱས་ནས་རྒྱལ་སྤྱིའི་སྟེང་གསལ་བསྒྲགས་བྱ་རྒྱུ་ཡིན་སྟབས། དེའི་ནང་མུ་མཐུད་བསྡད་པ་ཡིན་ན་དེའི་ཐོག་ལ་ལས་ཀ་ག་འདྲ་ཞིག་བྱ་དགོས་པའི་གདེང་ཚོད་བསླེབས་མ་སོང་བ་མ་ཟད། རྒྱུན་ལས་ཁ་ཤས་ཀྱིས་འགན་མ་ཁུར་བའི་ཐོག་ནས་མི་ལ་སློབ་སྦྱོང་ཡོད་མེད་ལ་མ་ལྟོས་པར་འདྲ་མིན་བྱེད་པ་སོགས་ཀྱིས་རྐྱེན་བྱས་ནས་འདོད་པ་མ་ཁེངས་སྟབས་དགོངས་པ་ཞུ་དགོས་འཁེལ་སོང་།

   དྲི་བ། དེང་སང་ང་ཚོའི་སྤྱི་ཚོགས་ཁྲོད་དབུ་མ་དང་རང་བཙན་བར་གྱི་འགལ་བ་ཤུགས་ཆེ་རུ་འགྲོ་བཞིན་འདུག ཁྱེད་ཀྱིས་བལྟས་ན་དེའི་རྒྱུ་རྐྱེན་གཙོ་བོ་གང་ལ་ཐུག་པ་རེད། བོད་མི་མང་སྤྱི་འཐུས་ཤིག་ལ་དེའི་ཐད་འགན་འཁྲི་ག་རེ་ཡོད་པ་རེད་བསམ་གྱི་འདུག

ལན། སྤྱིར་དབུ་མ་དང་རང་བཙན་སྐོར་ལ་འགལ་བ་ཤུགས་ཆེན་པོ་ཞིག་འགྲོ་དང་འགྲོ་བཞིན་པ་རེད། ལྷག་པར་དུ་འོས་བསྡུ་འདི་འདྲའི་སྐབས་ལ་གང་ཟག་སྒེར་པའི་ལངས་ཕྱོགས་དམིགས་འདོན་བྱས་ནས་རྒྱལ་ཕམ་དབྱེ་བ་ཕྱེ་བའི་ཐབས་ཤེས་དང་། རང་ཉིད་དང་ལྟ་ཕྱོགས་མི་མཐུན་པར་མགོ་ལྕག་ཞུས་ནས་རྒྱལ་ཁ་མ་འཐོབ་པའི་ཆེད་ཐབས་ཤེས་སྣ་ཚོགས་བྱེད་བཞིན་པའི་གོམས་གཤིས་ངན་པ་ཞིག་ང་ཚོའི་སྤྱི་ཚོགས་ནང་ཁྱབ་བསྡད་ཡོད་པ་རེད། སྤྱིར་བཏང་བོད་མི་རྩམ་ཟན་ཚང་མས་རང་བཙན་འདོད་ཀྱི་ཡོད་ལབ་ཀྱི་ཡོད་ཀྱང་། སོ་སོའི་འདོད་མོས་ལྟར་དེའི་སྒང་ལ་ནུས་པ་དང་ཆུ་ཚོད། བསམ་བློ་ཚང་མ་གཏོང་སྐབས། ཕྱོགས་གཅིག་ནས་༧གོང་ས་མཆོག་གི་དགོངས་གཞི་དང་ཐ་དད་འགྲོ་བཞིན་ཡོད་པ་མ་ཟད། ཕར་ཕྱོགས་ནས་དབུ་མའི་ལམ་དང་ཁ་གཏད་རེད་ཅེས་ཐབས་ཤེས་ཡོད་རྒུ་བཏོན་ཏེ། ༧གོང་ས་མཆོག་ལ་མཚན་སྨད་ཞུ་མཁན་གྱི་ཐ་སྙད་ཅིག་འཁྱེར་ནས་ཕམ་ཐབས་བྱེད་ཀྱི་ཡོད་པ་རེད། ང་ཚོ་དམངས་གཙོའི་སྤྱི་ཚོགས་ཤིག་ཆགས་ཡོད་སྟབས། ང་ཚོས་བོད་མིའི་སྒྲིག་འཛུགས་ཀྱི་ལངས་ཕྱོགས་ཡིན་ན་འདྲ། གང་ཟག་བྱེ་བྲག་པའི་ལྟ་ཕྱོགས་ཡིན་ནའང་འདྲ། སྐྱོན་བརྗོད་བྱེད་ཆོག་པ་དེ་ང་ཚོའི་དམངས་གཙོའི་ཁྱད་ཆོས་ཡིན་དགོས་ཀྱི་རེད་བསམ་གྱི་ཡོད། གལ་སྲིད་དེ་ཆོག་གི་མེད་ན་རྒྱ་ནག་གཞུང་དང་ཁྱད་པར་གང་ཡང་ཡོད་མ་རེད།

སྤྱི་འཐུས་ཤིག་ལ་འགན་འཁྲི་ག་རེ་ཡོད་ཟེར་བ་དེ། གཞུང་གི་སྲིད་ཇུས་དབུ་མའི་ལམ་གཏན་འབེབས་བྱེད་མཁན་སྤྱི་འཐུས་ལྷན་ཚོགས་ཆགས་ཡོད་སྟབས། སྤྱི་འཐུས་ལྷན་ཚོགས་ཀྱིས་དབུ་མའི་ལམ་ལ་བསྐྱར་ཞིབ་བྱ་དགོས་པ་ཡིན་ན། མི་སྒེར་གྱིས་རང་གི་བསམ་འཆར་བཏོན་ནས་མཐའ་མའི་ཐག་གཅོད་དེ། སྤྱི་མོས་དང་མང་མོས་ཐོག་ནས་འགྲོ་དགོས་རེད་མ་གཏོགས། རྒྱབ་ལོགས་ལ་འཛོམས་ནས་ང་ཚོ་ཚང་མས་ལག་པ་འགྱོག་དགོས་ཟེར་བ་དང་། གཏན་འབེབས་འདིའི་སྒང་ལ་ཤར་སྐྱོད་བྱ་དགོས་ཟེར་ནས་ཐག་གཅོད་བྱེད་བཞིན་པ་དེ་སྤྱི་འཐུས་ཤིག་གིས་དགོས་དོན་མ་བསྒྲུབ་པ་མ་ཟད། ཤོག་ཁག་སྒྲིག་ནས་ཐག་གཅོད་བྱས་པ་ཞིག་ལ་ངས་ངོས་འཛིན་བྱེད་ཀྱི་ཡོད། ད་ལྟའི་བར་འདི་བྱས་སོང་ཟེར་ནས་དམིགས་འདོན་བྱ་རྒྱུ་མེད་ཀྱང་། རྣམ་པ་དེ་འདྲ་ཞིག་ཐོག་འགྲོ་བཞིན་ཡོད་པའི་བཤད་ཚུལ་ཞིག་ང་ཚོའི་སྤྱི་ཚོགས་ནང་ཡོད་པ་རེད།

   དྲི་བ། དབུས་འོས་བསྡུ་ལས་ཁང་གིས་འོས་བསྡུའི་སྒྲིག་གཞི་མང་པོ་ཞིག་གསལ་བསྒྲགས་གནང་ཡོད་པ་དང་། མ་འོངས་པར་ལག་བསྟར་གནང་ཐུབ་མིན་ཐོག་ད་ལྟ་ནས་གླེང་སློང་མང་པོ་ཡོང་བཞིན་འདུག ཁྱེད་རང་དེའི་ཐོག་མཐོང་ཚོར་ག་རེ་ཡོང་གི་འདུག

ལན། ཉིན་ཤས་གོང་འོས་བསྡུ་ལས་ཁང་གིས་མང་ཚོགས་ཁྲོད་འོས་བསྡུའི་སྒྲིག་གཞི་གསར་པ་དེ་ཁ་གསལ་བོ་ཆགས་ཆེད་ཡང་བསྐྱར་གསལ་བསྒྲགས་ཤིག་བསྐྱངས་ཡོད་པ་རེད། དེ་ལག་ལེན་བསྟར་མིན་ང་ཚོའི་ལག་པར་མེད་པའི་བཟོ་འདྲ་བོ་ཞིག་འདུག འདས་པའི་ལོ་རྒྱུས་ནང་སྐབས་སྔོན་མའི་འོས་བསྡུ་ལས་ཁང་གིས་དོན་ཚན་ཁ་ཤས་ལག་བསྟར་མ་བྱས་པ་དེ་འདྲ་བྱུང་ཡོད། དངོས་གནས་བྱས་ན་འོས་བསྡུ་ལས་ཁང་ནི་རང་དབང་ཅན་གྱི་ལས་ཁང་ཤིག་ཆགས་ཡོད་ཀྱང་། དེ་བེད་སྤྱོད་མ་བཏང་བར་སྤྱི་འཐུས་ལྷན་ཚོགས་ལ་བཀའ་འདྲི་ཞུས་པའི་གནས་སྟངས་བྱུང་ཡོད་སྟབས། ད་ལྟ་འོས་བསྡུ་ལས་ཁང་གིས་འོས་བསྡུའི་སྒྲིག་གཞི་གསར་པ་ཁྱབ་བསྒྲགས་བྱས་ཡོད་ཀྱང་། ལག་ལེན་ག་ཚོད་བསྟར་ཡོང་བསམ་པའི་ང་ལ་གདེང་ཚོད་ཞེ་དྲགས་མེད། ད་ལྟ་འོས་བསྡུའི་ཁྱབ་བསྒྲགས་མགོ་བཙུགས་ནས་ཟླ་ཤས་ཕྱིན་ཡོད་པ་མ་ཟད། སྒྲིག་གཞི་དང་འགལ་བ་མང་པོ་བྱུང་ཡོད་ཀྱང་། ད་ལྟ་བར་དུ་དེར་འོས་བསྡུ་ལས་ཁང་གིས་ལག་པ་བརྐྱངས་ནས་མཚམས་འཇོག་བྱེད་དགོས་ཟེར་བ་དང་གནང་ཕྱོགས་འགྲིག་གི་མི་འདུག་ཟེར་བའི་སྐད་ཆ་གང་ཡང་བྱུང་མེད་སྟབས། ངས་མ་འོངས་པར་སྒྲིག་གཞི་ལྟར་ལག་ལེན་བྱ་རྒྱུ་རེད་བསམ་པའི་ཡིད་ཆེས་མེད་ཞུ་རྒྱུ་ཡིན།

གསར་འགོད་པ། འཇིགས་མེད་རྒྱ་མཚོ།