ཁྲག་དྲོན་གྱིས་བུ་ལོན་འཇལ་གྱི་ཡོད་ན་ཁ་ཆེ་བ་ལྷད་མེད་ཅིག་མ་རེད།

༧གོང་ས་མཆོག་གིས་ཁ་ཆེ་བ་གཅིག་པུ་མིན་པར་ཡེ་ཤུ་དང་ཧིན་རྡུ། སིག་དང་ཇེའུ་སི། ནང་པ་བཅས་ཀྱི་ནང་ལའང་དྲག་སྤྱོད་པ་ཡོད་པ་ཤེས་དགོས་སྐོར་གསུངས་འདུག

ཟླ་འདིའི་ཚེས་ ༢༡ ཉིན་ཨ་རིའི་སྙན་གྲགས་ཅན་གྱི་བརྙན་འཕྲིན་ཁང་སི་ཨན་ཨན་ (CNN) གྱི་གསར་འགོད་པ་ལྕམ་ཨཱ་མན་པུར་ (Christiane Amanpour) ལགས་ཀྱིས། ༧གོང་ས་མཆོག་དབྱིན་ཡུལ་རྒྱལ་ས་ལོན་ཌོན་དུ་མཛད་འཆར་ཁག་སྐྱོང་བཞིན་ཡོད་པ་དང་བསྟུན་ཏེ། བཅར་འདྲི་ཞུས་པ་ཁག་དང་ཆོས་ལུགས་ཁག་གི་མཐུན་སྒྲིལ་ལྷན་ཚོགས་ཐོག་གི་གསུང་བཤད་བཅས་མཛད་འཕྲིན་ཁག་ཅིག་བོད་སྒྱུར་ཞུས་ཡོད།

གསར་འགོད་པ་དེས་༧གོང་ས་མཆོག་ལ་སྐུ་ཉིད་འདིར་ག་རེ་གནང་གི་ཡོད་དྲིས་པར་ཁོང་གིས། འགྲོ་བ་མིའི་རིགས་ཡོངས་ལ་གལ་འགངས་ཆེ་ཤོས་ཏེ། ཁོ་ཚོ་ག་པར་གནས་ཡོད་མེད་དང་ཕྱུག་པོ་དང་དབུལ་པོ། ཤེས་ཡོན་ཡོད་པ་དང་མེད་པ་བཅས་གང་ལྟར་མི་སུ་འདྲ་ཞིག་ཡིན་རུང་མི་ཚང་མར་མི་ཚེ་སྐྱིད་པོ་ཞིག་སྐྱེལ་རྒྱུའི་ཐོབ་ཐང་ཡོད་པ་རེད། མི་མང་པོ་ཞིག་གིས་ང་ཚོའི་མི་ཚེའི་བདེ་སྐྱིད་ཕྱིའི་དངོས་པོར་བརྟེན་ནས་ཡོང་གི་ཡོད་པར་བསམ་གྱི་ཡོད་ཀྱང་། བདེ་སྐྱིད་ཟེར་བ་དེ་ནང་སེམས་ནས་ཡོང་གི་ཡོད་སྟབས། ངོས་ཀྱིས་ནང་སེམས་གྱི་རིན་ཐང་དེ་ཆོས་ཕྱོགས་ནས་གསུངས་པ་ལྟར་མིན་པར། ཚན་རིག་གི་བརྟག་དཔྱད་དང་མི་གཤིས་ཀྱི་མྱོང་རོལ་གཞི་རྩར་བཞག་པའི་ཆོས་ལུགས་དང་མ་འབྲེལ་བའི་བཟང་སྤྱོད་ཀྱི་ཐབས་ལམ་ལ་བརྟེན་ནས་ཐོབ་ཀྱི་ཡོད་པ་ངོ་སྤྲོད་བྱེད་བཞིན་ཡོད། ཅེས་གསུངས་འདུག

༧གོང་ས་མཆོག་སྐུ་ཞིང་ལ་ཕེབས་པ་ཡིན་ན་སྐུའི་ཤུལ་འཛིན་སུས་གནང་གི་རེད་དྲིས་པར་ཁོང་གིས། ད་ལྟ་བོད་བརྒྱུད་ནང་བསྟན་གྱི་གྲྭ་བཙུན་གྲངས་ ༡༠༠༠༠ ཙམ་གྱིས་ནང་ཆོས་ལ་ཐོས་བསམ་སྒོམ་གསུམ་ཐོག་ནས་བསླབ་པ་སློབ་གཉེར་བྱེད་བཞིན་ཡོད་སྟབས། ཁོ་ཚོས་མི་ཉམས་རྒྱུན་འཛིན་བྱེད་ཐུབ་རྒྱུ་རེད་བསམ་གྱི་འདུག ད་བར་བཅོམ་ལྡན་འདས་ཀྱི་མཆོག་སྤྲུལ་མེད་ཀྱང་ཁོང་གི་བསྟན་རབས་ལོ་ངོ་ ༢༦༠༠ ཙམ་ལ་གནས་ཐུབ་པ་བྱུང་ཡོད་སྟབས། གལ་སྲིད་ངོས་ཏཱ་ལའི་བླ་མ་མཐའ་མ་དེ་ཡིན་པའི་དབང་དུ་བཏང་ཡང་། ངོས་འདས་གྲོངས་མ་སོང་གོང་བླ་མ་སྐྱེས་ཆེན་དམ་པ་ཚོའི་ཁྲོད་ནས་ཤུལ་འཛིན་པ་ཞིག་འདེམས་སྲིད་པ་ཞིག་རེད། ཅེས་གསུངས་འདུག

ཡང་འབར་མའི་རོ་ཧེན་གྷ་ཡ་སེ་ས་ཁུལ་གྱི་ཁ་ཆེ་བར་འབར་མིའི་ནང་པ་ཚོས་འཚེ་བ་སྤྱོད་བཞིན་པར་ཐུགས་ཚོར་ག་རེ་ཡོད་བཀའ་འདྲི་ཞུས་པར་ཁོང་གིས། དེར་བློ་ཕམ་ཞེ་དྲགས་བྱུང་། ངོས་ཀྱིས་འབར་མའི་ནང་པ་ཚོར་ཁ་ཆེ་བ་ཚོར་འཚེ་བ་སྤྱོད་རྒྱུ་མཚམས་འཇོག་དང་ཕན་ཚུན་བསམ་ཤེས་དགོས་པའི་འབོད་སྐུལ་ཞུས་པ་ཡིན། ཁོ་ཚོས་ཁ་ཆེ་བ་དེ་ཚོར་ཁོང་ཁྲོ་ཟ་བའམ་སྡང་སེམས་འཛིན་པའི་ཚོར་བ་སླེབ་སྐབས། སངས་རྒྱས་བཅོམ་ལྡན་འདས་ཀྱི་ཞལ་དྲན་པ་གསོ་དགོས། གལ་སྲིད་སངས་རྒྱས་བཅོམ་ལྡན་འདས་ཞལ་བཞུགས་ཡོད་ཚེ། ངོས་ཀྱིས་ཁོང་གིས་རོ་ཧེན་གྷ་ཡ་སེ་ས་ཁུལ་གྱི་ཁ་ཆེ་བ་ཚོར་མགོན་སྐྱབས་མཛད་ཀྱི་རེད་བསམ་གྱི་འདུག ཅེས་བཀའ་ལན་བསྩལ་འདུག

སྲིད་འཛིན་ཞི་ཅིན་ཕིན་ཨ་རི་དང་དབྱིན་ཡུལ་ལ་སྐོར་སྐྱོད་བྱ་འཆར་ཡོད་སྟབས། གལ་སྲིད་༧གོང་ས་མཆོག་ལ་ཁོང་ཐུག་རྒྱུའི་གོ་སྐབས་འཐོབ་པ་ཡིན་ན་ག་རེ་ཞུ་ས་རེད་དྲིས་པར། ངོས་ཀྱིས་དུས་རབས་བདུན་པ་ནས་དགུ་པ་བར་གྱི་ལོ་རྒྱུས་ཡིག་ཆར་བལྟས་པ་ཡིན་ན། ང་ཚོ་རང་བཙན་ཡོད་པའི་རྒྱལ་ཁབ་ཅིག་ཆགས་ཡོད་ཀྱང་། ད་ལྟ་ང་ཚོས་རང་བཙན་རྩོད་ཀྱི་མེད་ཞུ་ས་རེད། ང་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཁོངས་བསྡད་ནས་བོད་འཕེལ་རྒྱས་ཡོང་རྒྱུར་ཕན་ཐོགས་ཡོང་བ་བྱ་རྒྱུ་དང་ཆབས་ཅིག ང་ཚོའི་ཐུན་མོང་མིན་པའི་སྐད་ཡིག་དང་རིག་གཞུང་། བོད་བརྒྱུད་ནང་བསྟན་མི་ཉམས་རྒྱུན་འཛིན་ཐུབ་པ་བྱེད་དགོས། ངོས་ཀྱིས་འདས་ལོའི་ནང་ཁོང་ཧྥ་རན་སིའི་རྒྱལ་ས་པེ་རེ་སི་ (Paris) དང་ལྡི་ལིར་ཕེབས་སྐབས། ཁོང་གིས་ནང་ཆོས་ཀྱིས་རྒྱ་ནག་གི་རིག་གཞུང་ལ་གལ་ཆེའི་ནུས་པ་འདོན་གྱི་ཡོད་པ་གསུངས་ཡོད་སྟབས། ངོས་ཀྱིས་ཁོང་ལ་ནང་ཆོས་ཀྱི་བཟང་པོའི་བསླབ་བྱ་བརྒྱུད་ཁོང་གིས་རྒྱ་ནག་རྒྱལ་ཡོངས་ནང་ཁྲིམས་འཆལ་སོང་བ་དང་། ལྐོག་ཟ་རུལ་སུངས་ལ་རྡུང་རྡེག་གཏོང་བཞིན་ཡོད་པར་ཕན་ཐོགས་བསྐྲུན་སྲིད་པ་ཞིག་ཀྱང་ཆགས་ཡོད་པ་རེད་ཞུ་རྒྱུ་ཡིན། ཞེས་གསུངས་འདུག

གསར་འགོད་པའི་དྲི་བར་བཀའ་ལན་བསྩལ་རྗེས། དབྱིན་ཡུལ་གྱི་ནང་བསྟན་ཚོགས་པས་གོ་སྒྲིག་ཞུས་པའི་གྲོས་ཚོགས་གོང་མའི་ཚོགས་ཁང་ནང་ཚོགས་བཞིན་ཡོད་པའི་ཡེ་ཤུ་དང་ཁ་ཆེ། ནང་པ་དང་ཧིན་རྡུ། སིག་བཅས་ཀྱི་ཆོས་ལུགས་མཐུན་སྒྲིལ་གྱི་ལྷན་ཚོགས་ཐོག་ཆིབས་བསྒྱུར་བསྐྱངས་ཏེ་བཀའ་སློབ་གནང་སྐབས། འདིར་ངོས་ཀྱིས་ཆོས་ལུགས་མི་གཅིག་པའི་ཆོས་གྲོགས་ཕོ་མོ་རྣམས་དང་ལྷན་འཛོམས་བྱུང་བར་དགའ་ཚོར་ཆེན་པོ་བྱུང་། དེང་སང་ས་ཆ་མང་པོ་ཞིག་ནང་ཆོས་ལུགས་དང་རྒྱལ་ཞེན་གྱི་དབང་གིས་འཇིགས་སྐྲག་སྐྱེ་གཞིའི་འཁྲུག་རྩོད་བྱུང་བཞིན་ཡོད་སྟབས། ང་ཚོས་འཁྲུག་རྩོད་དེ་དག་གཞིལ་ཐུབ་པའི་ཐབས་ལམ་འཚོལ་དགོས་པ་རེད། འདི་ཚོ་ང་ཚོ་ཆོས་པ་ཚོས་གནང་དགོས་པ་ཞིག་ཆགས་ཡོད་སྟབས། ལྷན་ཚོགས་འདི་ལྟ་བུ་ནི་ང་ཚོ་ཕན་ཚུན་བར་གྱི་མཐུན་ལམ་དང་ཡིད་ཆེས་གོང་འཕེལ་གཏོང་སའི་གོ་སྐབས་ཤིག་ཆགས་ཡོད། དེང་སང་མི་མང་པོའི་སེམས་ནང་ཁ་ཆེ་བ་ཚོ་དྲག་སྤྱོད་པ་ཞིག་ཡིན་པའི་བག་ཆགས་བྱུང་བཞིན་ཡོད་ཀྱང་། ང་ཚོས་ཡེ་ཤུ་དང་ཧིན་རྡུ། སིག་དང་ཇེའུ་སི། ནང་པ་བཅས་ཀྱི་ནང་ལའང་དྲག་སྤྱོད་པ་ཡོད་པ་ཡིད་ལ་ངེས་པར་འཆར་ཐུབ་པ་བྱེད་དགོས། བོད་ཀྱི་ཁ་ཆེ་བ་ཚོ་ནི་ཞི་བདེ་དང་ལྡན་པའི་ཁ་ཆེའི་སྤྱི་ཚོགས་ཤིག་ཡིན་པ་མ་ཟད། ངོས་ཀྱིས་ཁོ་ཚོ་སྐྱབས་བཅོལ་ལུང་པའི་ནང་ཐུག་སྐབས། ཁོ་ཚོས་ལྷ་སའི་སྐད་གཙང་མ་གཙང་རྐྱང་རྒྱག་གི་ཡོད་པ་ངོས་ཀྱིས་དྲན་གསོས་ཀྱི་འདུག ཁ་ཆེའི་ཆོས་གྲོགས་ཚོས་གལ་སྲིད་ཁྱེད་ཀྱིས་ཁྲག་གི་བུ་ལོན་འཇལ་གྱི་ཡོད་ན། ཁྱེད་རང་ཁ་ཆེ་བ་ལྷད་མེད་ཅིག་མ་རེད། ཁ་ཆེ་བ་ཚོར་ཁ་ཆེའི་སྟོན་པས་སྲོག་ཆགས་ཚང་མར་གཅིག་མཚུངས་བརྩི་བཀུར་ཞུ་དགོས་པའི་བསླབ་བྱ་གནང་བ་དག་ལ་ཁས་ལེན་ཞུ་དགོས། ཁ་ཆེའི་བསྟན་སྲུང་དམག་ (Jihad) ཟེར་བ་དེ་གོ་འཛོལ་ཐེབས་པ་ཞིག་ཡིན་པ་མ་ཟད། འདིས་མི་གཞན་དང་འཁྲུག་རྩོད་རྒྱག་དགོས་པ་གང་ཡང་བརྗོད་ཀྱི་མེད་ཀྱང་། རང་ཉིད་ཀྱི་སེམས་འཁྲུག་པའི་དབང་གིས་ཡོང་གི་ཡོད་པར་གོ་དགོས་པ་བརྗོད་ཀྱི་འདུག ཅེས་བཀའ་སློབ་བསྩལ་འདུག

ཟླ་འདིའི་ཕྱི་ཚེས་ ༡༩ ཉིན་དབྱིན་ཡུལ་གྱི་རྒྱལ་ས་ལོན་ཊོན་དུ་རྟེན་གཞི་བྱས་པའི་ O2 རྩེད་རིགས་ཁང་དུ། ༧གོང་ས་མཆོག་གིས་དབྱིན་ཡུལ་དང་ཡུ་རོབ་ཁུལ་ནས་ཆེད་བཅར་ཞུས་པའི་བོད་རིགས་རྣམས་ལ་བཀའ་སློབ་བསྩལ་སྐབས། དེང་སྐབས་བོད་ཀྱི་ནང་ཆོས་གཙོ་བོར་གྱུར་པའི་སྲོལ་རྒྱུན་རིག་གཞུང་ཁག་རྒྱལ་སྤྱིའི་ཐོག་དར་སྤེལ་ཤུགས་ཆེ་འགྲོ་བཞིན་ཡོད་པ་མ་ཟད། འགྲོ་བ་མིའི་རིགས་ལ་ཕན་ཐོགས་རླབས་ཆེན་སྒྲུབ་བཞིན་པ་དེ་ནི་བོད་མི་རིགས་ཀྱི་སྤོབས་པ་བྱ་འོས་པ་ཞིག་ཡིན་ཡང་། ང་ཚོས་དུས་ནམ་ཡང་ཁེངས་དྲེགས་བྱེད་རྒྱུ་མེད། རྒྱ་ནག་གཞུང་ཕྱོགས་ནས་བོད་ནང་མུ་མཐུད་དྲག་གནོན་བྱེད་བཞིན་ཡོད་ཀྱང་། བོད་མི་རིགས་ཀྱི་ཞུམ་པ་མེད་པའི་སྙིང་སྟོབས་དང་ལྷག་བསམ་ལ་བརྟེན་ནས་རྒྱ་ནག་གིས་བསམ་པ་ཇི་བཞིན་དུས་ད་ལྟ་ཡང་བསྒྲུབ་ཐུབ་མེད་པ་མ་ཟད། མ་འོངས་པར་དེ་དག་རྒྱུན་གནས་ཐུབ་ཐབས་སུ་ང་ཚོ་བོད་རིགས་ཡོངས་ནས་ཤེས་ཡོན་གྱི་ཆུ་ཚད་གོང་མཐོར་གཏོང་དགོས་པ་དང་། དོལ་རྒྱལ་རྗེས་འབྲང་པ་རྣམས་ནས་དངོས་ཡོད་གནས་ཚུལ་མ་ཤེས་པའི་དབང་གིས་མུ་མཐུད་སྐད་འབོད་སོགས་བྱེད་བཞིན་ཡོད་སྟབས། བོད་མི་ཚོས་གནད་དོན་དེའི་ཐད་ལ་ཁོང་ཁྲོ་ལངས་པ་སོགས་ནམ་ཡང་བྱེད་རྒྱུ་མེད་པ་མ་ཟད། གོ་སྐབས་བྱུང་ན་དངོས་ཡོད་གནས་ཚུལ་ཁག་གསལ་བཤད་བྱེད་རྒྱུ་བྱུང་ན་ཡག་པོ་ཡོད་པ་རེད། ཁོང་ཚོར་སྙིང་རྗེ་བསྒོམ་རྒྱུ་གལ་ཆེན་པོ་ཆགས་ཡོད། ཅེས་སོགས་གསུངས་འདུག

ཡང་སྐབས་དེར་བོད་དོན་རྒྱབ་སྐྱོར་བ་རྣམས་ལ་བཀའ་སློབ་གནང་དོན། བོད་རྒྱལ་ཁབ་ནི་འཛམ་གླིང་གི་སྣེ་གསུམ་པ་ལྟ་བུ་ཆགས་ཡོད་པ་མ་ཟད། ཨེ་ཤ་ཡའི་མི་མང་དུང་ཕྱུར་བཅུ་ལྷག་གི་འཚོ་གནས་བོད་ཀྱི་རྒྱུག་ཆུ་ཁག་ལ་ཐུག་གི་ཡོད་སྟབས། རྒྱལ་སྤྱིའི་ཐོག་ནས་བོད་ཀྱི་ཁོར་ཡུག་ལ་དོ་སྣང་གནང་རྒྱུ་གལ་ཆེན་པོ་ཆགས་ཡོད། བོད་དུ་ནང་ཆོས་དར་ཁྱབ་བྱུང་རྗེས་བོད་ཀྱི་རིག་གཞུང་དེ་བཞིན་འཚེ་བ་མེད་པའི་རིག་གཞུང་ཞིག་ཏུ་འགྱུར་ཡོད་པ་འདི་ནི་དེང་སྐབས་འཛམ་གླིང་གི་གཅེས་ནོར་ཞིག་ཏུ་གྱུར་ཡོད། རྒྱ་ནག་ནི་ནང་པའི་ཡུལ་ལུང་ཞིག་ཡིན་པ་མ་ཟད། རྒྱ་ནག་ནང་ནང་པ་ས་ཡ་ ༤༠༠ ཡོད་པའི་ཁྲོད་ནས་མང་པོ་ཞིག་གིས་བོད་བརྒྱུད་ནང་བསྟན་ལ་དོ་སྣང་བྱེད་བཞིན་ཡོད། སྔོན་མ་ངོས་དང་ཐུག་འཕྲད་བྱས་མྱོང་བ་མང་པོ་ཞིག་གིས་ངོས་རྒྱ་ནག་ཏུ་གདན་ཞུ་བྱེད་བཞིན་འདུག བོད་ནི་ཕྱི་དངོས་པོའི་ཐོག་ནས་རྗེས་ལུས་ཅན་ཞིག་ཡིན་པས་ཡར་རྒྱས་གཏོང་དགོས་ཀྱི་ཡོད་པར་བརྟེན། ཕྱིའི་ཡུལ་གྲུ་ཁག་ཏུ་ཡོད་པའི་བོད་རིགས་ཚོས་ཆོས་ཕྱོགས་ཙམ་མིན་པར་དངོས་པོའི་ཡར་རྒྱས་དགོས་འདོད་བྱེད་ཀྱི་ཡོད་སྟབས། བོད་རྒྱ་ནག་དང་ལྷན་དུ་གནས་ཚེ་བོད་རྒྱ་གཉིས་ཀར་ཕན་ཐོགས་ཡོད་པ་ཞིག་ཡིན། བོད་རིགས་གཞོན་སྐྱེས་ཚོས་རང་བཙན་གཙང་མའི་འཐབ་རྩོད་བྱེད་བཞིན་ཡོད་པ་ནི་ཁོང་རྣམ་པའི་ཐོབ་ཐང་ཡིན་ཡང་། ཁོ་ཚོས་འཐབ་རྩོད་བྱེད་སྐབས་དངོས་ཡོད་གནས་ཚུལ་ཤེས་དགོས་པ་རེད། ཅེས་གསུངས་འདུག

གསར་འགོད་པ། དོན་གྲུབ།