མང་ཚོགས་རྩིས་ཁྲའི་ཚོགས་ཆུང་སྐབས་ ༦ པ་མགོ་འཛུགས་སྐབས་རྩིས་ཁྲའི་སྐོར་གྱི་སྐྱོན་གནད་སོགས་གྲངས་ ༢༡༠༡ བྱུང་ཡོད་པ་ལས་ ༡༧༩༦ གཙང་བཟོ་ཐུབ་ཡོད་འདུག
བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་གཙོ་བོ་རྩིས་ལོ་ ༢༠༡༡ ནས་ ༢༠༡༣ བར་གྱི་རྩིས་སྙན་ཁག་ལ་མང་ཚོགས་རྩིས་ཁྲའི་ཚོགས་ཆུང་སྐབས་ ༦ པས་ཞིབ་འཇུག་གནང་བའི་གྲུབ་དོན་ཐད། གྲོས་ཚོགས་ཀྱི་ལམ་སྟོན་ལྟར་འཛིན་སྐྱོང་བཀའ་ཤག་ནས་མཇུག་སྐྱོང་གནང་བའི་ཕྱོགས་བསྡོམས་སྙན་ཐོར་སྤྱི་འཐུས་རྒྱུན་ལས་ནས་ཞིབ་ཚགས་ཀྱིས་གཟིགས་ཞིབ་གོ་སྡུར་གནང་བ་དང་། འབྲེལ་ཡོད་ལས་ཁུངས་ཁག་ལ་ནན་སྐུལ་བཅས་གནང་བ་བརྒྱུད། མང་ཚོགས་རྩིས་ཁྲའི་ཚོགས་ཆུང་སྐབས་ ༦ པ་མགོ་འཛུགས་སྐབས་རྩིས་ཁྲའི་སྐྱོན་གནད་སོགས་གྲངས་ ༢༡༠༡ བྱུང་བ་ནས་མང་ཆེ་བ་གཙང་བཟོ་ཐུབ་སྟེ། མང་ཚོགས་རྩིས་ཁྲའི་ཚོགས་ཆུང་སྐབས་ ༧ པས་མཇུག་སྐྱོང་གནང་དགོས་པའི་སྐྱོན་གནད་སོགས་གྲངས་ ༣༠༥ ལས་ལྷག་མེད་པ་དང་། སྤྱི་འཐུས་རྒྱུན་ལས་ཀྱིས་རྩིས་གཙང་བཟོས་ཁོངས་ནས་ཡོང་བསྡད་ཧིན་སྒོར་འབུམ་ ༡༧༠ ལྷག་( ༡.༧༠.༥༣.༤༦༤།༧༥)དང་། ཨ་སྒོར་ ༩༨༨།༥༠། ཡུ་སྒོར་ ༡༩༨༩།༧༢ བཅས་ཁུངས་སོ་སོར་ཕྱིར་བསྡུ་ཐུབ་པ་བྱུང་ཡོད་འདུག
དེ་ཡང་བོད་མི་མང་སྤྱི་འཐུས་རྒྱུན་ལས་ནས་བཀའ་ཤག་གི་ཕྱོགས་བསྡོམས་སྙན་ཐོར་ཞིབ་འཇུག་གནང་བའི་མཐོང་སྣང་འགའ་བཀོད་པའི་ནང་། ༡ ༽ མང་ཚོགས་རྩིས་ཁྲའི་ཚོགས་ཆུང་སྐབས་ ༦ པས་ཞིབ་འཇུག་གིས་མཚོན་ལས་དོན་ཞིབ་ཚགས་དང་འབྲེལ་གྲོས་ཚོགས་སུ་སྙན་ཐོ་དོན་ཚན་རེ་རེ་བཞིན་སྙན་སྒྲོན་གནང་བ་དང་། འཛིན་སྐྱོང་བཀའ་ཤག་གི་བཀོད་ཁྱབ་ལམ་སྟོན་འོག ལས་ཁུངས་མ་ལག་དང་སྡེ་ཚན་ཁག་བཅས་ཀྱིས་མཇུག་གནོན་ནན་པོ་གནང་བར་བརྟེན། དེ་རེས་རྩིས་སྙན་ཁག་ནང་གསལ་དངུལ་འབབ་གང་ཙམ་ཕྱིར་བསྡུ་ཐུབ་པ་སོགས་རྩིས་རྙོག་རིགས་ཁྱོན་ཆེ་གད་གཙང་བཟོ་ཐུབ་པ་བྱུང་ཡོད།
༢ ༽ རྩིས་སྙན་མཇུག་སྐྱོང་གཙང་བཟོ་མ་ཐུབ་པར་ལྷག་བསྡད་ཁོངས་འགྲོ་སོང་སྔོན་བཏང་དང་། བཀའ་འཁྲོལ་རྗེས་ཞུའི་རིགས་མང་དག་ཡོང་འདུག་པ། སླད་འདི་རིགས་མི་འབྱུང་བའི་ཆེད་དུ་འབྲེལ་ཡོད་དབང་ལྡན་འགན་འཛིན་དང་རྩིས་པ་སོ་སོས་འགན་ཁུར་ཆེར་བཞེས་གནང་དགོས་པ་མཐོང་།
༣ ༽གཏའ་འཇོག་གི་ཡིག་ཆ་ངོ་མ་རྣམས་དབང་ལྡན་འགན་འཛིན་སོ་སོས་བདག་ཉར་གྱིས་གནས་སྤོས་སྐབས་རྩིས་སྤྲོད་ལེན་གྱི་ཡིག་ཆའི་ཁོངས་འཇོག་དགོས་གལ་མཐོང་།
༤ ༽ འབབ་ཁྲལ་གཞུང་ནས་ཕྱིར་སློག་ཡོང་དགོས་སྐོར་འབྲེལ་ཡོད་དབང་ལྡན་འགན་འཛིན་དང་རྩིས་པ་སོ་སོས་འགེངས་ཤོག་འགེངས་འབུལ་སོགས་དུས་ཐོག་བྱ་དགོས་ཀྱི་ཟབ་སྦྱོང་ངམ། ལམ་སྟོན་གསལ་པོར་དུས་ནས་དུས་སུ་གནང་དགོས་གལ་མཐོང་།
༥ ༽ ད་ཐེངས་རྩིས་སྙན་ཁག་ལ་མཇུག་སྐྱོང་སྐབས་རྩིས་རྙིང་མང་དག་དང་འབྲེལ་བའི་བགྲེས་ཡོལ་ཐོན་ཟིན་པའི་ལས་བྱེད་ཟུར་པ་དང་། སྡེ་ཚན་ཁག་གི་འགན་འཛིན་ཟུར་བ་རྣམས་ལའང་ཉེན་བརྡ་མང་པོ་བཏང་འདུག་པ་ལས། ལས་དོན་ལ་ཕན་པ་གང་ཡང་ཡོང་གི་མེད་སྟབས། ལས་ཁུར་གནང་བཞིན་པའི་དབང་ལྡན་འགན་འཛིན་དང་། རྩིས་པ་སོ་སོས་འགན་ཁུར་མ་འཕྱུག་པ་དགོས་རྒྱུ་གལ་ཆེ་ཡིན་པ་དང་། སྤྱི་ཁྱབ་རྩིས་ཞིབ་ལས་ཁང་ནས་ལོ་མང་རིམ་བསགས་ཀྱི་རྩིས་ཞིབ་དུས་གཅིག་ལ་མ་ཡིན་པར་ལོ་ལྟར་རྩིས་ཞིབ་གནང་ཐབས་དགོས་གལ་ཆེ་བ་མ་ཟད། བོད་མི་མང་སྤྱི་འཐུས་ལྷན་ཚོགས་ནས་ཀྱང་མང་ཚོགས་རྩིས་ཁྲའི་ཚོགས་ཆུང་ཁག་དུས་ཐོག་བཙུགས་ཏེ་ཞིབ་འཇུག་དང་བདའ་འདེད་ཀྱིས་སྐབས་དུས་སོ་སོར་གཙང་བཟོ་ཐུབ་པ་བྱ་རྒྱུ་གལ་ཆེར་མཐོང་།
༦ ༽ ལས་ཁུངས་མ་ལག་ཁག་དང་སྡེ་ཚན་སོ་སོས་རྩིས་ཞིབ་སྙན་ཐོར་མཇུག་གནོན་ཞུ་བར་སྐབས་དུས་སོ་སོར་དོ་ཁུར་ཆེ་ཙམ་གནང་ན། མ་འོངས་པར་རྩིས་སྙན་རིམ་གསོག་ཕོན་ཆེ་རིགས་མི་ཡོང་བ་ཆགས་ངེས་ཡིན་པར་བརྟེན། འཛིན་སྐྱོང་ནས་དུས་ནས་དུས་སུ་ཡོངས་ཁྱབ་ཀྱི་སྐུལ་ལྕག་གནང་དགོས་སུ་མཐོང་།
༧ ༽ རང་སྐྱོང་སྡེ་ཚན་ཁག་དང་བཟོ་ཚོགས་ཁག་གི་འགན་ལྷན་དུས་ཐོག་ཚོགས་མ་ཐུབ་པའི་རྒྱུ་མཚན་ལ་བརྟེན་ནས་རྩིས་སྙན་མང་དག་གཙང་བཟོ་མ་ཐུབ་པའི་སྐྱོན་གནད་ཆགས་འདུག
༨ ༽ འཕྲོད་བསྟེན་ལས་ཁུངས་ནས་མང་ཚོགས་རྩིས་ཁྲའི་ཚོགས་ཆུང་གི་སྙན་ཐོའི་ནང་གསལ་མཇུག་འདེད་དགོས་རིགས་ཆེད། ས་གནས་ཁག་ཏུ་བཀོད་ཁྱབ་བཏང་བ་ཙམ་ལས་ལན་འདེབས་གསལ་བཤད་དུས་ཐོག་མ་འབྱོར་བར་བརྟེན། དུས་ཚོད་ཆུད་ཟོས་གང་འཚམས་ཕྱིན་སོང་ན། མ་འོངས་པར་མཇུག་འདེད་ཚད་ལྡན་གནང་དགོས་སུ་མཐོང་། ཅེས་དང་།
ཡང་སྤྱི་འཐུས་རྒྱུན་ལས་ཀྱི་རྒྱབ་གཉེར་ནང་།
༡ ༽ བཙན་བྱོལ་བོད་མིའི་གཞུང་དངུལ་འདུ་འགོད་དང་ལོ་འཁོར་སྔོན་རྩིས། དངུལ་རྩིས་སྟངས་འཛིན་བཅས་ཀྱི་སྒྲིག་གཞི་དོན་ཚན་ ༥ པའི་ནང་གསེས་ ༤ པའི་དགོངས་དོན་བཞིན་ཕྱག་བསྟར་གྱིས་སྲི་ཞུའི་ལས་བྱེད་པས་ལས་དོན་བྱེད་འཛོལ་རིགས་ལ་ཉེན་བརྡ་བཏང་བ་རྣམས་ཀྱི་ངོ་བཤུས་རེ་ལས་བྱེད་འདེམས་བསྐོ་ལྷན་ཁང་དུ་འབུལ་དགོས།
༢ ༽ ཉེན་བརྡ་དང་རྩིས་བསུབ་གཏོང་དགོས་རིགས་སྐབས་དུས་སོ་སོར་བྱེད་མ་ཐུབ་པ་དང་། དེ་བཞིན་ལས་ཁུངས་ཁག་སོགས་ཀྱི་སྙན་ཐོའི་ལན་འདེབས་མང་པོའི་ནང་རྩིས་གཙང་བཟོས་ཟིན་གསལ་བ་གང་ཞིག་ལ་བྱུང་འཛིན་དང་དན་རྟགས། དེ་མིན་རྒྱབ་རྟེན་སོགས་ཀྱི་ཡིག་ཆའི་ངོ་བཤུས་མཉམ་སྦྱར་མིག་སྟོན་མ་བྱས་པའི་རྐྱེན་གྱིས། དེ་དག་རྩིས་གཙང་བྱུང་བར་ཐག་གཅོད་བྱ་རྒྱུར་ནར་འགྱངས་སུ་འགྲོ་བཞིན་འདུག་པས། ཉིན་བརྡ་དང་རྩིས་བསུབ། ག་བསྒྱུར་གཏོང་རྒྱུ་ལས་ཐབས་ལམ་གཞན་མེད་པ་རྣམས་སྐབས་འཕྲལ་གཙང་བཟོ་བྱ་དགོས་དང་། ཉེན་བརྡ། རྩིས་བསུབ། ག་བསྒྱུར། གཞན་ཡང་ལུགས་མཐུན་ཐག་གཅོད་ཟིན་རིགས་ཀྱི་ཁུགས་སྐྱེལ་ལམ་དན་རྟགས་ཅི་ཡོད་འཚེམས་ལུས་སུ་མ་སོང་བར་རྩིས་ཞིབ་པས་གཙོས་མང་ཚོགས་རྩིས་ཁྲའི་ཚོགས་ཆུང་ལ་འབུལ་དགོས།
༣ ༽ རྩིས་སྙན་ཐོག་མང་ཚོགས་རྩིས་ཁྲའི་ཚོགས་ཆུང་ནས་ལམ་སྟོན་ཇི་གནང་ལྟར་གང་མྱུར་ལག་བསྟར་མ་བྱས་པའི་ཉེར་ལེན་ལ་བརྟེན་ནས་མཇུག་སྐྱོང་ངམ་རྩིས་གཙང་མེད་པ་མུ་མཐུད་ལྷག་འགྲོ་བའི་སྐྱོན་གནད་རིགས་གང་འཚམས་ཐོན་འདུག་པས། ལམ་སྟོན་ལྟར་མཇུག་སྐྱོང་ལག་བསྟར་ཐུབ་ངེས་རིགས་ཐབས་ཤེས་ཡོད་རྒུས་སྐབས་འཕྲལ་སོ་སོར་གཙང་བཟོ་ཐུབ་པ་དགོས།
༤ ༽ འགན་འཛིན་ལྷན་ཚོགས་ཡོད་པའི་ཚོགས་སྡེ་དང་། བཟོ་ཚོང་སོགས་ཀྱི་རྩིས་བསུབ་དང་། ག་བསྒྲུར་དགོས་རིགས་ཁུངས་སོ་སོའི་སྤྱི་ལ་ཁྱབ་པའི་འགན་འཛིན་ལྷན་ཚོགས་ཀྱི་ཆོག་མཆན་བཀའ་འཁྲོལ་དང་འབྲེལ་བའི་ཐོག་ནས་གཙང་བཟོ་བྱ་དགོས།
༥ ༽ ལམ་ཁུངས་དང་ས་གནས་ཁག་ཏུ་རྩིས་ཞིབ་ཆེད་རྩིས་པ་ཆེད་བཅར་སྐབས་སྡེ་ཚན་ཁག་ཅིག་གི་རྩིས་པ་དང་། གཤམ་འོག་ལས་བྱེད་ཙམ་ལས་དབང་ལྡན་འགན་འཛིན་ནས་ལན་འདེབས་མ་གནང་བ་དེས་ཀྱང་རྩིས་རྙོག་མང་དག་རྩིས་གཙང་མ་ཐུབ་པའི་རྐྱེན་རྩ་ལྟེ་བ་ཞིག་ཆགས་ལུགས་སྐོར་སྤྱི་ཁྱབ་རྩིས་ཞིབ་ལས་ཁུངས་ནས་སྙན་གསན་བྱུང་བས། སླད་ནས་འབྲེལ་ཡོད་དབང་ལྡན་འགན་འཛིན་སོ་སོས་འགན་ཁུར་ལན་འདེབས་དང་། རྩིས་གཙང་ཡོང་བ་བཟོ་ཐབས་དགོས། དེ་མཚུངས་ལས་ཁུངས་ཁག་དང་ས་གནས་ཁག སྡེ་ཚན་ཁག་བཅས་ལ་རྩིས་ཞིབ་ཆེད་བསྐྱོད་སྐབས་རྩིས་གཙང་བཟོས་པའི་དན་རྟགས་ཡིག་ཆ་དང་བྱུང་འཛིན་སོགས་རྩིས་ཞིབ་པར་མིག་སྟོན་མ་བྱས་པ་མང་དག་ཡོང་བ་འདིས་ཀྱང་རྩིས་གཙང་ཆགས་ཟིན་པ་ཞིག་སྙན་ཐོའི་ནང་སླར་ཡང་འགོད་དགོས་ཀྱི་སྐྱོན་གནད་དུ་འགྱུར་བཞིན་འདུག་ཅེས་སྤྱི་ཁྱབ་རྩིས་ཞིབ་ལས་ཁང་ནས་སྙན་གསན་བྱུང་བས། རྩིས་གཙང་བཟོས་ཟིན་པའི་དན་རྟགས་རྣམས་རྩིས་ཞིབ་པར་དུས་ཐོག་མིག་སྟོན་གྱིས་སྐབས་འཕྲལ་གཙང་བཟོ་ཐུབ་རྒྱུར་ཐུགས་སྣང་ཆེར་བསྐྱེད་དགོས།
༦ ༽ རྩིས་གཙང་མ་ཆགས་པའི་ཡོང་བསྡད་སྤྲོད་བསྡད་རྙིང་པ་རྣམས་མང་ཚོགས་རྩིས་ཁྲའི་ཚོགས་ཆུང་གི་སྙན་ཐོའི་ནང་ཁ་གསལ་འདོན་དགོས་པ་ལས། ད་ལྟ་འགྲོ་བཞིན་པའི་ཡོང་བསྡད་སྤྲོད་བསྡད་ཆ་ཚང་སྙན་ཐོའི་ནང་བཀོད་ན་ཡིག་རྫོབ་ཆེན་པོ་ཆགས་རྒྱུ་ལས་དགེ་མཚན་དེ་ཙམ་མེད་སྟབས། སླད་དེ་དག་ཚོགས་ཆུང་གི་སྙན་ཐོའི་ནང་འགོད་མི་དགོས་པ་བྱ་དགོས།
༧ ༽ ངེས་ཅན་བསྡུ་དངུལ་ཕོགས་འབབ་བརྒྱ་ཆ་བསྡུ་འབུལ་མ་ཐུབ་པ་རྣམས་སྒྲིག་གསལ་ལྟར་གྲོས་ཚོགས་སམ་རྒྱུན་ལས་ནས་ཆག་ཡང་ཞུ་དགོས།
༨ ༽ བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཆོད་དགོངས་དོན་ཐད་འབྱོར་རོགས་དངུལ་བརྒྱ་ཆ་ ༡ འབབ་འབུལ་རྒྱུར་དཀའ་ངལ་ཡོད་རིགས་རྣམས་བཀའ་ཤག་གམ་དཔལ་འབྱོར་ལས་ཁུངས་བརྒྱུད་གྲོས་ཚོགས་ནས་ཆག་ཡང་ཞུ་དགོས། ཞེས་བཀོད་འདུག
གསར་འགོད་པ། པདྨ་རྒྱལ།
