པ་ཀི་སི་ཐན་གྱི་སྲིད་བློན་གྱིས་མཉམ་འབྲེལ་རྒྱལ་ཚོགས་ནང་རྒྱ་གར་དང་པ་ཀི་སི་ཐན་བར་གྱི་དཀའ་རྙོག་སེལ་ཐབས་ཀྱི་གྲོས་འཆར་དོན་ཚན་བཞི་བཏོན་འདུག
ཁ་སང་པ་ཀི་སི་ཐན་གྱི་སྲིད་བློན་ནཱ་ཝ་སེ་ཤཱ་རེབ་ཀྱིས་མཉམ་འབྲེལ་རྒྱལ་ཚོགས་ནང་ཀཱ་ཤི་མེར་གྱི་རྩོད་ཉོག་དང་། རྒྱ་གར་དང་པ་ཀི་སི་ཐན་བར་གྱི་བརྟན་ལྷིང་དང་ཞི་འགྲིག་གི་གནད་དོན་ཐོག་གཏམ་བཤད་བྱེད་སྐབས། ཁྱིམ་མཚེས་རྒྱལ་ཁབ་བར་འཁོན་འཛིན་དང་ཁ་གཏད་གཅོག་རྒྱུ་མཚམས་འཛོག་བྱས་ཏེ་མཉམ་ལས་ཀྱི་སྒོ་མོ་ཕྱེ་དགོས་སྐོར་བརྗོད་འདུག
རྒྱ་གར་གྱི་བང་ཆེན་ཐོག་སྲིད་བློན་ནཱ་ཝ་སེ་ཤཱ་རེབ་ཀྱིས། ད་ལྟ་རྒྱལ་ཁབ་གཉིས་བར་གྲོས་མོལ་བྱ་དགོས་པའི་དུས་ལ་བབ་ཡོད་སྟབས། ཕན་ཚུན་ཁ་གཏད་གཅོག་རྒྱུ་མཚམས་འཇོག་བྱས་ནས་མཉམ་ལས་ཀྱི་ནུས་པ་གཅིག་ཏུ་སྤུངས་དགོས། ཀཱ་ཤི་མེར་གྱི་གནད་དོན་ནི་ཁྱིམ་མཚེས་རྒྱལ་ཁབ་གཉིས་ཀྱི་རྩོད་གཞི་ཆེ་ཤོས་ཤིག་ཏུ་གྱུར་ཡོད་པ་མ་ཟད། ཀཱ་ཤི་མེར་གྱི་མང་ཚོགས་དང་གོ་བསྡུར་བྱས་ནས་དཀའ་རྙོག་སེལ་དགོས་པ་ཞིག་ཀྱང་ཆགས་ཡོད་སྟབས། ངས་ད་ཐེངས་གོ་སྐབས་འདི་བཟུང་ནས་མ་འོངས་པར་རྒྱལ་ཁབ་གཉིས་བར་གྱི་འབྲེལ་ལམ་ཡག་ཏུ་གཏོང་ཐུབ་པའི་སྤྱོད་སྒོ་ཆེ་བའི་གྲོས་འཆར་ཁ་ཤས་ཤིག་འདོན་རྒྱུ་ཡིན། ཞེས་བརྗོད་འདུག
ནཱ་ཝ་སེ་ཤཱ་རེབ་ཀྱིས་ཚོགས་ཐོག་ཏུ་ཁྱིམ་མཚེས་རྒྱལ་ཁབ་གཉིས་ཀྱི་དཀའ་རྙོག་སེལ་ཐབས་ཆེད་གྲོས་འཆར་དོན་ཚན་བཞི་བཏོན་པའི་ནང་། དང་པོ། ང་ཚོས་པ་ཀི་སི་ཐན་དང་རྒྱ་གར་གྱིས་༢༠༠༣ ལོར་བཞག་པའི་རྒྱལ་ཁབ་གཉིས་བར་གྱི་གྲོས་ཆོད་ཀྱི་དགོངས་དོན་ལྟར། ཀཱ་ཤི་མེར་གྱི་མཐའ་ཁུལ་ (Line of Control) ཞེས་པའི་ཐོག་དམག་འཐབ་མཇུག་གཙང་བྱེད་དགོས་སྟབས། མཉམ་འབྲེལ་རྒྱལ་ཚོགས་ཀྱི་དམག་དོན་རྟོག་ཞིབ་པ་རྒྱ་གར་དང་པ་ཀི་སི་ཐན་ནང་སྐད་བཏང་སྟེ། མེ་འཕེན་མཚམས་འཇོག་ཐད་ལྟ་སྲུང་ནན་མོ་བྱེད་དགོས། གཉིས་པ། རྒྱལ་ཁབ་གཉིས་པོས་ས་མཚམས་ཁུལ་དུ་ཛ་དྲག་གནས་སྟངས་གང་འདྲ་ཞིག་ཆགས་ཀྱང་། དམག་རྒྱག་པ་དང་དམག་གི་འཇིགས་སྐུལ་ནམ་ཡང་བྱ་རྒྱུ་མེད་པའི་འགན་ལེན་བྱེད་དགོས། འདི་ནི་མཉམ་འབྲེལ་རྒྱལ་ཚོགས་ཀྱི་བཅའ་ཡིག་ནང་འཁོད་པའི་ཆ་རྐྱེན་གཙོ་བོ་དེ་ཡིན། གསུམ་པ། ཀཱ་ཤི་མེར་ནང་གི་དམག་ཤུགས་ཕྱིར་བསྡུ་བྱ་རྒྱུར་ངེས་པར་དུ་ཐབས་ཤེས་གཏོང་དགོས། བཞི་པ། ང་ཚོས་ཐུན་མོང་ཐོག་འཛམ་གླིང་གི་དམག་ས་མཐོ་ཤོས་སཱ་ཆེན་འཁྱགས་གཤོང་ (Siachen Glacier) གི་དམག་དཔུང་དག་ཆ་རྐྱེན་གང་ཡང་མ་བཏོན་པར་ཕྱིར་བསྡུ་བྱ་རྒྱུར་མོས་མཐུན་བྱེད་དགོས་པ་བཅས་ཀྱི་དགོས་འདུན་ཁག་བཏོན་ཡོད་སྟབས། དེ་རིང་རྒྱ་གར་ཕྱི་སྲིད་ལྷན་ཁང་གི་མགྲིན་ཚབ་པ་ཝི་ཁཱ་སེ་ (Vikas Swarup) ཡིས་སྤྱི་ཚོགས་དྲ་རྒྱ་ཌོའུ་ཌར་བརྒྱུད། པ་ཀི་སི་ཐན་སྲིད་བློན་གྱིས་ཀཱ་ཤི་མེར་གྱི་དམག་ཤུགས་ཡོངས་རྫོགས་ཕྱིར་བསྡུ་བྱ་རྒྱུའི་དགོས་འདུན་བཏོན་པ་ལས། ང་ཚོར་པ་ཀི་སི་ཐན་གྱི་འཇིགས་སྐུལ་རིང་ལུགས་པ་རྩ་མེད་བཟོ་རྒྱུ་གལ་ཆེ་བ་ཆགས་ཡོད། པ་ཀི་སི་ཐན་ནང་བརྟན་བརླིང་མེད་པར་བརྟེན། ད་ལྟ་ཁོ་ཚོའི་རྒྱལ་ཁབ་འཇིགས་སྐུལ་རིང་ལུགས་པ་སྐྱེད་སྲིང་བྱ་ཡུལ་ཞིག་ཏུ་འགྱུར་བཞིན་ཡོད་སྟབས། རང་སྐྱོན་སྦས་ཏེ་ཁྱིམ་མཚེས་རྒྱལ་ཁབ་ལ་ཁག་དཀྲི་བྱས་ན་དཀའ་ངལ་སེལ་ཐུབ་ཀྱི་མ་རེད་ཅེས་བརྗོད་འདུག
ཟླ་སྔོན་མའི་ཚེས་ ༢༧ ཉིན་པ་ཀི་སི་ཐན་གྱི་སྲིད་བློན་གྱིས་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བྷན་ཁེ་མོན་མཆོག་དང་ཐུག་སྟེ། ཉེ་བའི་ལོ་ཤས་ནས་བཟུང་རྒྱ་གར་གཞུང་གིས་ཀཱ་ཤི་མེར་གྱི་མཐའ་མཚམས་ཁུལ་དུ་དམག་མི་ཕོན་ཆེ་འགྲེམས་འཇོག་བྱས་ཏེ། རྒྱལ་ཁབ་གཉིས་ཀྱི་བརྟན་ལྷིང་ལ་གནོད་གཞིའི་བྱ་འགུལ་སྤེལ་བཞིན་ཡོད་སྟབས། རྒྱལ་ཚོགས་ངོས་ནས་དམག་དོན་ཉུལ་ཞིབ་པ་ཆེད་གཏོང་བྱས་ཏེ། མཐའ་ཁུལ་དང་ཀཱ་ཤི་མེར་གྱི་དཀའ་རྙོག་སེལ་དགོས་པ་བརྗོད་ཡོད་སྟབས། རྒྱ་གར་གཞུང་གིས་སྐྱོན་བརྗོད་ཤུགས་ཆེ་བྱས་ཡོད་པ་མ་ཟད། མཉམ་འབྲེལ་རྒྱལ་ཚོགས་ནང་ཀཱ་ཤི་མེར་གྱི་གནད་དོན་གླེང་སློང་བྱས་རྗེས་ཀྱང་། སྤྱི་ཚོགས་དྲ་རྒྱ་ཁག་གིས་པ་ཀི་སི་ཐན་གྱི་སྲིད་བློན་ལ་ཁ་རྡུང་བཏང་ཡོད། པ་ཀི་སི་ཐན་གྱི་ཨ་རིའི་གཞུང་ཚབ་པ་ཟུར་པ་ཧུ་སན་གྱིས་ (Husain Haqqani) ཌོའུ་ཌར་དྲ་ཚིགས་ཐོག རྒྱལ་ཚོགས་ནང་གི་སྲིད་བློན་ནཱ་ཝ་སེ་ཤཱ་རེབ་ཀྱི་གཏམ་བཤད་དེས། པ་ཀི་སི་ཐན་ལ་གང་ཡང་ཐོབ་མེད་པ་མ་ཟད། ལྡི་ལིའི་གཞུང་ལ་སྐྱོན་འཛུགས་བྱས་པར་རྒྱལ་སྤྱིའི་ངོས་ནས་དང་ལེན་བྱ་རྒྱུ་ཁག་པོ་ཡིན་སྟབས། པ་ཀི་སི་ཐན་རྒྱལ་ཡོངས་ནང་མ་གཏོགས་རྒྱ་གར་ལ་གཡོ་འཁྱོམ་འཐེབ་མི་སྲིད་པ་ཞིག་རེད་ཅེས་དང་། ཡང་པཱ་ཝན་དྷུ་ར་ཎེ་ཟེར་བ་ཞིག་གིས། པ་ཀི་སི་ཐན་མངའ་ཁུལ་གྱི་ཀཱ་ཤི་མེར་མང་ཚོགས་ཁག་ཅིག་གིས། པ་ཀི་སི་ཐན་གཞུང་ལ་ངོ་རྒོལ་བྱས་ནས་རྒྱ་གར་རྒྱལ་ཁོངས་སྡོད་རྒྱུ་ཡིན་པའི་འབོད་ཚིག་སྒྲོག་བཞིན་ཡོད་སྟབས། མ་འོངས་པར་རྒྱ་གར་དང་པ་ཀི་སི་ཐན་བར་རྩོད་ཉོག་ཉུང་དུ་འགྲོ་སྲིད་པ་ཞིག་རེད་ཅེས་བརྗོད་འདུག
ཕྱི་ལོ་ ༢༠༡༤ ལོའི་ཟླ་ ༡༡ ནང་བལ་ཡུལ་རྒྱལ་ས་ཀ་ཐ་མན་གྲུ་རུ། ལྷོ་ཨེ་ཤ་ཡའི་རྒྱལ་ཁབ་བརྒྱད་ཀྱི་དཔལ་འབྱོར་མཉམ་འབྲེལ་ལྷན་ཚོགས་ཐེངས་ ༡༨ པ་མ་ཚོགས་གོང་། པ་ཀི་སི་ཐན་གྱི་སྲིད་བློན་ནཱ་ཝ་སེ་ཤཱ་རེབ་ཀྱིས། མ་འོངས་པར་རྒྱ་གར་དང་པ་ཀི་སི་ཐན་བར་གྱི་འབྲེལ་ལམ་དེ་གང་འདྲ་ཞིག་ཆགས་མིན་གྱི་སྤོ་ལོ་དེ་རྒྱ་གར་གྱི་རྩེད་རྭའི་ནང་ཡོད་སྟབས། རྒྱ་གར་གྱིས་རྩེད་མོ་གང་འདྲ་རྩེད་མིན་ལ་རག་ལུས་པ་བརྗོད་ཡོད། ཉེ་ལམ་པ་ཀི་སི་ཐན་གཞུང་གིས་རྒྱལ་ཁབ་གཉིས་ཀྱི་རྒྱལ་སྲུང་སློབ་སྟོན་པ་བར་གྱི་གྲོས་མོལ་ཕྱིར་བསྡུ་བྱས་ཡོད་པ་མ་ཟད། ནེའུ་ཡོག་གྲོང་ཁྱེར་དུ་མཉམ་འབྲེལ་རྒྱལ་ཚོགས་ཚོགས་སྐབས་དང་མ་འཚོགས་གོང་། རྒྱ་གར་སྲིད་བློན་དང་ཐུག་འཕྲད་མ་བྱས་པའི་གནས་ཚུལ་བྱུང་ཡོད།
གསར་འགོད་པ། དོན་གྲུབ།
