སྐབས་གསུམ་པའི་ཧི་མ་ལ་ཡའི་མཛངས་མའི་འགྲན་སྡུར་ནང་འགྲན་ཞུགས་གཞོན་ནུ་མ་དྲུག་འདུག
དེ་རིང་སྔ་དྲོའི་ཆུ་ཚོད་ ༡༡ ཙམ་ལ། དྷ་ས་བྷོག་སུ་མགྲོན་ཁང་གི་ལྡུམ་རའི་ནང་དུ། བོད་ཀྱི་མཛངས་མ་འགྲན་སྡུར་གོ་སྒྲིག་པ་བློ་བཟང་དབང་རྒྱལ་ལགས་ཀྱིས། སྐབས་གསུམ་པའི་ཧི་མ་ལ་ཡའི་མཛངས་མ་འགྲན་སྡུར་བྱ་རྒྱུ་ཡིན་པ་གསལ་བསྒྲགས་བྱས་སོང་།
འདི་ལོའི་ཧི་མ་ལ་ཡའི་མཛངས་མ་འགྲན་སྡུར་ནང་ཧི་མ་ཅལ་མངའ་སྡེ་ནས་ཡིན་པ་བོད་རིགས་བུ་མོ་བསྟན་འཛིན་སངས་ཉིད་(Tenzin Sangnyi)དང་། རྒྱ་གར་བུ་མོ་ (Priyanke Verma)།(Samrity Verma)། (Swattee Thakur)་བཅས་དང་། ཨར་ནཱ་ཅལ་པར་དྷི་ཤི་ནས་ཡིན་པ་བུ་མོ་ (Chum Darang) དང་། ཨུ་ཊར་ཁན་ནས་ཡིན་པ་བུ་མོ་ (Tanshuman Gurung)བཅས་འགྲན་ཞུགས་གཞོན་ནུ་མ་དྲུག་འདུག
ཐེངས་འདིའི་འགྲན་སྡུར་ཁྲོད་འགྲན་སྡུར་རིམ་པ་ལྔ་ཡོད་པ་ལས་དང་པོ་ཧི་མ་ལ་ཡ་ཁུལ་གྱི་ཁོར་ཡུག་སྲུང་སྐྱོབ་དང་ཡུལ་སྐོར་སྤྲོ་འཆམ་གཏོང་འཕེལ་ཐབས་སོགས་ཀྱི་བརྗོད་གཞིའི་ཐོག་གཏམ་བཤད་དང་། གཉིས་པ་འགྲན་ཞུགས་པ་སོ་སོས་སྒྱུ་རྩལ་འཁྲབ་སྟོན་བྱ་རྒྱུ་དང་། རྟིང་རྩོད་འགྲན་སྡུར་ཉིན་བོད་ཀྱི་ཟློས་གར་ཁང་དུ་ལྟད་མོ་བ་རྣམས་ལ་རང་ཉིད་ངོ་སྤྲོད་དང་སོ་སོའི་ཐུན་མིན་ཆས་གོས་འགྲེམ་སྟོན། གཟུ་དཔང་པའི་དྲི་བར་ལན་འདེབས་བྱ་རྒྱུ་བཅས་བརྒྱུད། ཨང་དང་པོ་ཐོབ་མཁན་ལ་ཧིན་སྒོར་འབུམ་གཅིག་དང་། ཨང་གཉིས་པར་ཧིན་སྒོར་ཁྲི་ལྔ། ཨང་གསུམ་པར་ཧིན་སྒོར་ ༢༥༠༠༠ བཅས་ཀྱི་བྱ་དགའ་སྤྲོད་རྒྱུ་ཡིན་འདུག
འགྲན་སྡུར་གོ་སྒྲིག་པ་བློ་བཟང་དབང་རྒྱལ་ལགས་ཀྱིས་གསར་འགོད་པར། འགྲན་སྡུར་འདིར་བྱ་དགའ་དང་དེ་བཞིན་འགྲོ་སོང་མང་པོ་ཡོད་པས་འགྲོ་སོང་ཐོག་འཆར་ཅན་ལྟར་དཀའ་ངལ་ཡོད་ནའང་། ད་ལྟའི་བར་མཐུན་རྐྱེན་སྦྱོར་མཁན་དེ་འདྲ་སུ་གང་ཕེབས་མ་སོང་། དུས་རྒྱུན་རིག་གཞུང་གོང་འཕེལ་དང་མི་རིགས་འཆམ་མཐུན། དེ་བཞིན་བུད་མེད་ཀྱི་ནུས་སྟོབས་གོང་འཕེལ་གཏོང་དགོས་པ་རེད་ཟེར་བ་དེས་སྡིངས་ཆ་འདི་འདྲའི་ཐོག་ལ་དོ་སྣང་མ་གནང་ན། ཚིག་སྟོང་པ་འདྲ་བོ་ཞིག་ཆགས་འགྲོ་ཡི་རེད་བསམ་གྱི་འདུག ང་ཚོའི་ངོས་ནས་རེ་བ་ག་རེ་རྒྱག་གི་ཡོད་ཟེར་ན། ཨང་དང་པོ་དང་གཉིས་པ། གསུམ་པ་འདྲ་བོའི་བྱ་དགའི་གསོལ་རས་གནང་བ་ཡིན་ན། ངའི་དངུལ་ཁུག་ནང་དུ་འགྲོ་གི་མ་རེད། དངུལ་ཚང་མ་བུད་མེད་ཁོ་རང་ཚོར་ཁ་ཐུག་ཏུ་འགྲོ་ཡི་ཡོད་པས། དགོངས་པ་བཞེས་རྒྱུ་ཞིག་མེད་འགྲོ་བསམ་གྱི་འདུག ཅེས་དང་། ཧི་མ་ལ་ཡའི་རི་བརྒྱུད་ཁུལ་གྱི་རིག་གཞུང་གོང་འཕེལ་དང་མི་རིགས་འཆམ་མཐུན་སོགས་ཀྱི་ཐོག་ལ་ཅིག་བྱེད་དགོས་ཟེར་བ་ཙམ་མ་གཏོགས་ཁ་ཡོད་ལག་ཡོད་ཀྱི་ལས་གཞི་གང་ཡང་མཐོང་རྒྱུ་མེད་པས་དེ་ཚོའི་ཐོག་ནུས་པ་ཐོན་པའི་རེ་བ་དང་། ཧི་མ་ལ་ཡའི་རི་བརྒྱུད་ཀྱི་ཁོར་ཡུག་ལ་གནོད་སྐྱོན་ཆེན་པོ་འགྲོ་བཞིན་ཡོད་པ་གླེང་སློང་དང་ཁྱབ་བསྒྲགས་བྱེད་པའི་ཆེད་དུ་འགྲན་སྡུར་འདི་གོ་སྒྲིག་བྱེད་བཞིན་ཡོད་སྐོར་སོགས་བརྗོད་སོང་།
གསར་འགོད་པ། པདྨ་མཚོ།
