བཙུན་མའི་འཇང་དགུན་ཆོས་ཐེངས་ ༢༡ པ་དབུ་འཛུགས་ཐོག་ད་ལྟའི་བར་བཙུན་མ་གཅིག་གིས་ཀྱང་ཆོས་ཚོགས་འཛུགས་ཐུབ་མེད་པས་མ་འོངས་པར་དགེ་བཤེས་མ་ཚོས་ནང་ཆོས་འཆད་ཉན་གྱི་ཁོར་ཡུག་གང་ལེགས་བསྐྲུན་པར་ཤུགས་རྒྱག་དགོས་སྐོར་གསུངས་སོང་།
དེ་རིང་ཕྱི་དྲོའི་ཆུ་ཚོད་ ༢།༣༠ སྟེང་དྷ་སར་ཡོད་པའི་བཙུན་དགོན་དགེ་ལྡན་ཆོས་གླིང་དུ། བཙུན་མའི་ལས་འཆར་ཁང་དང་ཆོས་རིག་ལས་ཁུངས་གཉིས་ཐུན་མོང་གི་གོ་སྒྲིག་འོག བཙུན་མའི་འཇང་དགུན་ཆོས་ཐེངས་ ༢༡ པ་དབུ་འཛུགས་གནང་སོང་བ་དང་། སྐུ་མགྲོན་གཙོ་བོར་ཆོས་རིག་བཀའ་བློན་པདྨ་ཆོས་འབྱོར་མཆོག་དང་བཀའ་ཟུར་རིན་ཆེན་མཁའ་འགྲོ་མཆོག་གཉིས་ཀྱི་དབུས་འབྲེལ་ཡོད་དགོན་སྡེ་ཁག་གི་དགེ་བསྐོས་རྣམ་པ། དེ་བཞིན་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་ཅིག་གི་སྐུ་ཚབ་བཅས་ཕེབས་འདུག་པ་དང་། ཐེངས་འདིའི་དགུན་ཆོས་ནང་རྒྱ་གར་ནང་ཡོད་པའི་བཙུན་དགོན་ཁག་ ༥ དང་བལ་ཡུལ་ནང་ཡོད་པའི་བཙུན་དགོན་ ༢ ནས་ཆེད་དུ་ཕེབས་པའི་བཙུན་མ་ ༤༠༠ ལྷག་མཉམ་ཞུགས་གནང་འདུག
མཛད་སྒོའི་ཐོག་མར་དགེ་ལྡན་ཆོས་གླིང་གི་མཁན་རིན་པོ་ཆེ་བྱམས་པ་ཐུབ་བསྟན་མཆོག་གིས་ཟླ་གཅིག་རིང་གི་བཙུན་མའི་འཇང་དགུན་ཆོས་ཐེངས་ ༢༡ པའི་ལས་རིམ་ཁག་ངོ་སྤྲོད་གནང་རྗེས། བོད་ཀྱི་བཙུན་མའི་ལས་འཆར་ཁང་གི་ངེས་སྟོན་པ་ལྕམ་རིན་ཆེན་མཁའ་འགྲོ་མཆོག་གིས། ངས་དེ་རིང་གི་ཉིན་མོ་འདི་སྤྱིར་བུད་མེད་ཚོ་དང་ཡང་སྒོས་བཙན་བྱོལ་ནང་ཡོད་པའི་བུད་མེད་ཚོར་མཚོན་ན་ཧ་ཅང་རྩ་ཆེ་བའི་ཉིན་མོ་ཞིག་ལ་ངོས་འཛིན་བྱེད་ཀྱི་ཡོད་ལ། རྒྱུ་མཚན་ནི་བོད་ཕྱི་ལོགས་སུ་ཡོད་པའི་གྲྭ་བཙུན་རྣམས་ལ་མཚོན་ན་འདི་སློབ་སྦྱོང་གི་གོ་སྐབས་ཡག་པོ་ཞིག་ཡིན་ཞིང་། བཙུན་མའི་ལས་འཆར་དང་ཆོས་རིག་ལས་ཁུངས་གཉིས་ཐུན་མོང་གི་ཐོག་ནས་བཙུན་མའི་འཇང་དགུན་ཆོས་འདིའི་ཐོག་ལ་ཧ་ལས་པའི་སྐུ་ལས་ཆེན་པོ་བསྐྱོན་ཡོད་པ་རེད། དེ་ལྟར་སྐུ་ལས་བསྐྱོན་དགོས་པའི་རྒྱུ་མཚན་དེ་ང་ཚོ་ཚང་མས་མཁྱེན་གསལ་ལྟར། འཛམ་བུ་གླིང་འདིའི་ནང་གཞན་སུའང་མེད་པའི་ནོར་བུ་ཞིག་སྟེ། ནང་པ་སངས་རྒྱས་པའི་བསྟན་པ་རིན་པོ་ཆེ་འདིའི་ཐོག་སློབ་སྦྱོང་ག་འདྲ་ཞིག་གནང་དགོས་མིན་ཐད་དགོངས་པ་བཞེས་མཁན་ཞིག་ཡིན་ན། ང་ཚོའི་སྤྱི་ཚོགས་ནང་དར་བའི་ལུགས་སྲོལ་འདི་ལས་ལྷག་པ་ཞིག་མེད་པ་ཧ་ཅང་གསལ་བོ་རེད། དེ་འདྲ་ཡིན་སྟབས་ཕྱོགས་གཅིག་ནས་ང་ཚོས་སོ་སོའི་རྒྱལ་ཁབ་ནང་ནས་བཙན་དབང་གི་འོག་ཕྱི་ལོགས་སུ་ཐོན་དགོས་བྱུང་བ་དང་། དེ་བཞིན་བཙན་བྱོལ་ནང་ལོ་ངོ་ ༥༠ ལྷག་བསྐྱེལ་དགོས་བྱུང་བ་འདི་ཧ་ལས་པའི་སེམས་སྡུག་དགོས་པའི་གནས་ཚུལ་ཞིག་རེད། ཡིན་ནའང་། དེ་ལ་ཕྱོགས་གཞན་ཞིག་ནས་བལྟས་པ་ཡིན་ན། སྔོན་ཆད་བོད་རང་དབང་སྐབས་སུ་མ་བྱུང་བའི་གནས་ཚུལ་མང་པོ་ཞིག་རྒྱལ་བ་རིན་པོ་ཆེ་མཆོག་གི་དཀའ་ལས་བསྐྱོན་པ་ཁོ་ནར་བརྟེན་ནས་ང་ཚོར་བྱུང་ཡོད་པ་རེད། དེ་བཞིན་བཙུན་མའི་འཇང་དགུན་ཆོས་ཟེར་བ་འདི་བོད་ནང་དུ་སྔོན་མ་ནས་རྣ་བས་ཐོས་མ་མྱོང་བ་ཞིག་དང་མིག་གིས་རིག་མ་མྱོང་བའི་གནས་ཚུལ་ཞིག་ཆགས་བསྡད་ཡོད་པ་རེད། དེ་འདྲ་ཡིན་སྟབས་ད་རེབ་ཀྱི་བཙུན་མའི་འཇང་དགུན་ཆོས་ཐེངས་ ༢༡ པ་ཚོགས་ཐུབ་པ་བྱུང་བ་འདི་ངས་དོན་ཆེན་ཞིག་ཏུ་བརྩི་ཡི་ཡོད། སྔོན་ཆད་ང་ཚོས་དགེ་ལྡན་ཆོས་གླིང་འདི་གསར་འཛུགས་གནང་སྐབས། ༧སྐྱབས་མཆོན་རིན་པོ་ཆེ་མཆོག་གིས། བཙུན་མ་ཡོད་པ་དེ་ཞེ་དྲགས་ཡག་པོ་ཡོད་པ་རེད། ཡིན་ན་ཡང་ཁོང་ཚོར་སློབ་སྦྱོང་མ་སྤྲད་པ་ཡིན་ན་འགྲིག་གི་མ་རེད་དཱ་ཞེས་བཀའ་སློབ་གསུངས་པ་ལྟར། དེ་ནས་བཙུན་མ་ཚོར་སློབ་སྦྱོང་གི་གོ་སྐབས་མང་པོ་སྤྲད་ཡོད་ཀྱང་། བརྒྱ་བཅུ་གྱ་གྲངས་སྐབས་སུ་སློབ་གཉེར་གནང་མཁན་མང་པོ་ཡོད་པ་མ་རེད། ཡིན་ན་ཡང་གཙོ་བོ་༧སྐྱབས་མགོན་རིན་པོ་ཆེ་མཆོག་གི་བཀའ་དྲིན་དང་། ཡང་སྒོས་ང་ཚོའི་སྤྱི་ཚོགས་ཀྱི་གནས་སྟངས་དང་སྤྱི་མང་གི་དགོངས་པ་བཞེས་སྟངས་ལ་བརྟེན་ནས་ལྷན་རྒྱས་ཚོར་གོ་སྐབས་འདི་རག་པ་རེད་ལ། ལྷན་རྒྱས་ཚོའི་ངོས་ནས་ཀྱང་གོ་སྐབས་འདི་ཡག་པོ་ཞིག་བེད་སྤྱོད་བཏང་ནས་ད་རེབ་ཀྱི་འཇང་དགུན་ཆོས་ཐེངས་ ༢༡ པ་འཚོགས་པ་མ་ཟད། སང་ལོའི་ཕྱི་ཟླ་ ༥ ནས་ ༦ ནང་ལ་དགེ་བཤེས་མའི་ལག་འཁྱེར་ལེན་རྒྱུའི་དུས་ཚོད་ཅིག་ཆགས་ཡོད་པ་རེད། འདི་ལྟར་གྲུབ་འབྲས་ཐོན་པ་དེ་ལོ་མང་པོར་མུ་མཐུད་ནས་མི་མང་པོས་སྐུ་ལས་བསྐྱོན་པའི་གྲུབ་འབྲས་ཤིག་ཆགས་བསྡད་ཡོད་སྟབས། དེ་འདྲའི་གྲུབ་འབྲས་ཐོན་པ་དེ་ཚང་མས་སྐུ་ལས་བསྐྱོན་ནས་མཉམ་རུབ་མ་གནང་བ་ཡིན་ན། ཁག་པོ་ཞེ་དྲགས་རེད་བསམ་གྱི་འདུག དེར་བརྟེན་མཉམ་རུབ་གནང་མཁན་གཙོ་བོ་ཆོས་རིག་ལས་ཁུངས་ནས་༧གོང་ས་མཆོག་གི་བཀའ་སློབ་གཞིར་བཟུང་གིས་དངོས་གནས་དྲང་གནས་བཙུན་མ་ཚོར་ག་འདྲ་བྱས་ན་དགོངས་ཏེ། ཕྱག་རོགས་གནང་བ་རེད། དེའི་ནང་ནས་ལས་ཁུངས་ནས་ལས་ཁུངས་རེད་དེ། ལས་ཁུངས་ནང་གི་མཛད་གཙོ་ཚོར་ཞེ་དྲགས་ཀྱིས་རག་ལས་ཀྱི་འདུག དེ་ག་བར་ཡིན་ཡང་དེ་རང་རེད། ལས་ཀ་ཆུང་ཆུང་ཞིག་ཡིན་ནའང་། འགོ་ཁྲིད་ལ་ཞེ་དྲགས་རག་ལས་ཀྱི་འདུག ལས་ཀ་ཆེན་པོ་ཞིག་ཡིན་ཡང་། འགོ་ཁྲིད་ལ་ཞེ་དྲགས་རག་ལས་ཀྱི་འདུག་ལ་དེ་ཡང་འགོ་ཁྲིད་ལས་ཐོག་ལ་ཤུགས་ཆེན་པོ་རག་ལས་ཀྱི་ཡོད་སྟབས། ངས་དེ་རིང་ཆོས་རིག་བཀའ་བློན་པདྨ་ཆོས་འབྱོར་མཆོག་འདིར་བཞུགས་ཡོད་པའི་ཐོག་ནས་ཞུས་པ་ཡིན་ན། ཆོས་རིག་བཀའ་བློན་རིམ་པ་བྱུང་ཡོད་པ་རེད། ༧རྒྱལ་བ་རིན་པོ་ཆེ་མཆོག་གི་བཀའ་སློབ་ཡིན་པ་དེ་ཚང་མས་མཁྱེན་གྱི་ཡོད་པ་རེད། ཡིན་ཡང་ཁོ་རང་ནང་བཞིན་དེའི་ཐོག་སྐུ་ལས་བསྐྱོན་ནས་དེ་གནང་དགོས་པ་རེད་དཱ་ཟེར་ནས་མཉམ་རུབ་གནང་མཁན་ངས་བྱུང་མ་སོང་བསམ་ཏེ། བཙུན་མ་ཡོད་དོ་ཅོག་གིས་སྐུ་ཚབ་བྱས་ནས་སྐུ་ངོ་མཆོག་ལ་ཐུགས་རྗེ་ཆེ་ཞུ་ཡི་ཡོད། ཅེས་གསུངས་སོང་།
ཆོས་རིག་བཀའ་བློན་མཆོག་གིས་ད་ལྟའི་བར་བོད་ཀྱི་བཙུན་མ་ཚོས་ཆོས་འཆད་ཉན་གྱི་བསྟི་གནས་ཁང་གཅིག་ཀྱང་འཛུགས་ཐུབ་མེད་སྟབས། མ་འོངས་པར་དགེ་བཤེས་མ་ཚོས་ཆོས་ཚོགས་འཛུགས་པ་དང་ཆོས་འཆད་ཉན་གྱི་ཁོར་ཡུག་ཚད་ལྡན་བསྐྲུན་ཐབས་དགོས་རྒྱུ་གལ་ཆེན་ཡིན་སྐོར་བཀའ་སློབ་གནང་དོན། སྔོན་ཆད་བཙུགས་གནང་བའི་ཆོས་ཚོགས་དེ་ཚོའི་ནང་གི་མིས་ཡིད་ཆེས་དང་དད་པ་བྱེད་སའི་ཆོས་འཆད་མཁན་དེ་ཚད་དང་ལྡན་པའི་བསླབ་པ་སློབ་གཉེར་བྱས་ཡོང་མཁན་དང་སྤྱོད་པ་སོགས་གང་ཐད་ནས་ཕུན་སུམ་ཚོགས་པ་ཡོད་མཁན་ཞིག་མེད་པ་ཡིན་ན། ཞབས་ཞུ་ཞུ་ཡི་ཡོད་དང་ཞབས་འདྲེན་ཞུ་ཡི་ཡོད་ཧ་མི་གོ་བར་དོགས་པ་ཟ་གཞི་ཞིག་ལ་གང་ལ་གང་འཚམ་སླེབ་ཡོད་པ་རེད། ངས་གལ་ཆེན་ནང་གི་དོན་ཆེན་བྱས་ཏེ་ཆོས་བརྒྱུད་ཁག་གི་དབུ་བླ་རྣམ་ལའང་ཞུས་པ་ཡིན། ཆོས་བརྒྱུད་སོ་སོས་དེར་ལྟ་རྟོག་དང་བདག་པོ་མ་བརྒྱབ་ན། ཆོས་བརྒྱུད་གཅིག་གི་དེ་ཆོས་བརྒྱུད་གཞན་ཞིག་གིས་བདག་པོ་བརྒྱབ་པ་ཡིན་ན་ཞེ་དྲགས་རྙོག་གྲ་ཚ་བོ་རེད་འདུག སྤྱིར་བཏང་ནང་པའི་ཆོས་དེ་ཧ་ལས་པའི་རྩ་ཆེན་པོར་རྩི་ཡི་ཡོད་པ་རེད། ཡིན་ནའང་། ད་ལྟའི་བར་དུ་བཙུན་མ་གཅིག་གིས་ཀྱང་བསྟི་གནས་ཤིག་ཕལ་ཆེར་བཙུགས་ཐུབ་མི་འདུག ཕྱི་ལོ་ ༢༠༡༦ ལོར་དགེ་བཤེས་མ་ ༢༠ འཐོན་གྱི་ཡིན་པ་དང་། མཆོག་ཏུ་གྱུར་བའི་དགེ་བཤེས་མ་ ༢༠ ཐོན་པ་དེ་བོད་ཀྱི་རྒྱལ་རབས་ལོ་རྒྱུས་ནང་མ་ཡོང་བ་ཞིག་ཡོང་བ་དང་། མ་བྱུང་བ་ཞིག་བྱུང་བ། མེད་པ་ཞིག་ཡོད་པ་བཟོ་ཐུབ་པ་བྱུང་བ་དེར་ཚང་མས་དཀའ་ལས་བརྒྱབ་ཡོད་པ་རེད། ལོ་དང་ལོ་བྱས་ནས་དགེ་བཤེས་མ་མང་དུ་འགྲོ་ངེས་རེད་བསམ་གྱི་འདུག་པས། ངས་འདིར་ག་རེ་ཞུ་ཡི་ཡོད་ཟེར་ན། བཙུན་མ་རྣམས་ད་ལྟའི་བར་དུ་ཕྱི་རྒྱལ་ཁག་ཏུ་ཕེབས་ཏེ་བསྟི་གནས་བཙུགས་པ་དང་། བསླབ་པ་སློབ་གཉེར་བྱེད་པའི་ཁོར་ཡུག་བསྐྲུན་པ། སོ་སོར་ཡོད་པ་དེ་མི་ལ་ཕར་འཆད་པ་དེ་འདྲ་ད་ལྟའི་བར་དུ་བྱུང་ཐུབ་ཡོད་པ་མ་རེད། མ་འོངས་པར་དེ་འདྲ་ཡོང་གི་རེད་ལ། ཡོང་དགོས་པའང་རེད་ཅེས་ཚང་མས་རེ་བ་རྒྱག་གི་ཡོད་པ་རེད། དེ་འདྲ་ཞིག་ཡོང་བར་མགོ་རིལ་བཟོས་ཏེ་ན་བཟའ་དམར་པོ་མཆོད་པ་གཅིག་པུས་རྩ་བ་ནས་འགྲིག་གི་མེད་སྟབས། ནང་དོན་གྱི་ཐོག་ལ་རང་ཉིད་ཀྱིས་མཆོག་ཏུ་གྱུར་བ་དང་ཚད་དང་ལྡན་པའི་བསླབ་པ་སློབ་གཉེར་བྱེད་དགོས་པ་དེ་ཧ་ལས་པའི་གལ་ཆེན་པོ་རེད། ཅེས་གསུངས་སོང་།
གསར་འགོད་པ། པདྨ་རྒྱལ།
