རྒྱལ་གཅེས་དཔའ་བོ་དཔའ་མོ་རྗེས་དྲན་དང་བུད་མེད་ཀྱི་ནུས་སྟོབས་གོང་སྤེལ་གྱི་ལག་སྤོན་འགྲན་ཚོགས་ཁྲོད་སྨན་རྩིས་ཁང་གི་བུ་མོའི་རུ་ཁག་དང་བུའི་འབྲོག་པ་རུ་ཁག་གཉིས་ལ་ཨང་དང་པོ་ཐོབ་སྟེ་ཧིན་སྒོར་ཁྲི་གཅིག་རེའི་བྱ་དགའ་གནང་སོང་།
ཁ་སང་བོད་ཀྱི་གཞོན་ནུ་ལྷན་ཚོགས་དབུ་བརྙེས་ཏེ་ལོ་ངོ་ཧྲིལ་བོ་ ༤༦ འཁོར་བའི་དུས་དྲན་སྲུང་གཙི་དང་བསྟུན། ཉིན་གུང་ཆུ་ཚོད་ ༡།༠༠ སྟེང་སིལ་པོལ་རྩེད་ཐང་དུ། དྷ་སའི་ས་གནས་གཞོན་ནུ་ལྷན་ཚོགས་དང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པ་གཉིས་ཀྱི་གོ་སྒྲིག་འོག བོད་ཀྱི་དཔའ་བོ་དཔའ་མོ་རྗེས་དྲན་དང་བུད་མེད་ཀྱི་ནུས་སྟོབས་གོང་སྤེལ་གྱི་ལག་སྤོལ་འགྲན་ཚོགས་ཀྱི་ཉིན་མཐའ་མ་སྟེ། བུ་མོའི་རུ་ཁག་གཉིས་དང་བུའི་རུ་ཁག་གཉིས་བར་རྟིང་རྩོད་འགྲན་སྡུར་གནང་སོང་བ་དང་། སྐུ་མགྲོན་གཙོ་བོ་སྤྱི་འཐུས་ཀརྨ་ཡེ་ཤེས་ལགས་དང་གཞོན་ནུའི་ཚོགས་གཙོ་ཟུར་བ་བོད་དོན་འཐབ་རྩོད་པ་རྒན་ལྷ་བཟང་ཚེ་རིང་ལགས། དེ་བཞིན་གཞོན་ནུའི་དབུས་རྒྱུན་དྲུང་ཆེ་བཀྲ་ཤིས་ལམ་བཟང་ལགས་ཀྱི་གཙོས་དྷ་སའི་དབུས་ས་གཉིས་ཀྱི་རྒྱུན་ལས་དང་། ལྟད་མོ་བ་བཅས་མི་གྲངས་ ༥༠༠ ཡས་མས་འཛོམས་འདུག
ཐེངས་འདིའི་འགྲན་ཚོགས་ཐོག་བུའི་རུ་ཁག་ ༡༢ དང་བུ་མོའི་རུ་ཁག་ ༦ བཅས་མཉམ་ཞུགས་བྱས་ཡོད་པའི་ཁྲོད་ནས་བུའི་རུ་ཁག་གི་འབྲོག་པ་རུ་ཁག་དང་དྷ་ས་རུ་ཁག བུ་མོའི་རུ་ཁག་གི་སྨན་རྩིས་ཁང་གི་རུ་ཁག་དང་ས་ར་མཐོ་སློབ་ཀྱི་རུ་ཁག་བཅས་ཀྱི་བར་རྟིང་རྩོད་འགྲན་སྡུར་བྱས་པ་བརྒྱུད། བུ་མོའི་རུ་ཁག་གཉིས་ལས་སྨན་རྩིས་ཁང་མཐོ་སློབ་ཀྱི་རུ་ཁག་གིས་སྤོ་ལོ་ ༡༩ བླུགས་ཏེ་ཨང་དང་པོའི་ཧིན་སྒོར་ཁྲི་གཅིག་གི་བྱ་དགའ་ཐོབ་ཡོད་པ་དང་། ས་ར་མཐོ་སློབ་ཀྱི་རུ་ཁག་གིས་སྤོ་ལོ་ ༦ བླུགས་ཏེ་ཨང་གཉིས་པའི་ཧིན་སྒོར་ ༧༠༠༠ གི་བྱ་དགའ་ཐོབ། དེ་བཞིན་བུའི་རྟིང་རྩོད་འགྲན་སྡུར་ཁྲོད་འབྲོག་པ་རུ་ཁག་གིས་སྤོ་ལོ་ ༤༩ བླུགས་ཏེ་ཨང་དང་པོའི་ཧིན་སྒོར་ཁྲི་གཅིག་གི་བྱ་དགའ་ཐོབ་པ་དང་། དྷ་ས་རུ་ཁག་གིས་སྤོ་ལོ་ ༤༤ བླུགས་ཏེ་ཨང་གཉིས་པའི་ཧིན་སྒོར་ ༧༠༠༠ གི་བྱ་དགའ་ཐོབ་ཡོད་འདུག ཐེངས་འདིའི་ལག་སྤོལ་རྩེད་འགྲན་ཁྲོད་བུ་མོའི་རུ་ཁག་གི་སྤོ་ལོ་བླུག་མང་ཤོས་སྨན་རྩིས་ཁང་གི་བཀྲ་ཤིས་ཆོས་འཛོམས་ལགས་ཀྱིས་ཁྱོན་བསྡོམས་སྤོ་ལོ་ ༣༢ བླུགས་ཡོད་པ་དང་། བུའི་རུ་ཁག་གི་སྤོ་ལོ་བླུག་མང་ཤོས་ཐུ་བྷོད་རུ་ཁག་གི་བྱམས་པ་ལགས་ཀྱིས་ཁྱོན་བསྡོམས་སྤོ་ལོ་ ༡༤༡ བླུགས་ཡོད་འདུག
མཛད་སྒོའི་ཐོག་གཞོན་ནུའི་དབུས་རྒྱུན་དྲུང་ཆེ་བཀྲ་ཤིས་ལམ་བཟང་ལགས་ཀྱིས། འདས་པའི་ལོ་ངོ་ ༤༦ རིང་བོད་ཀྱི་གཞོན་ནུ་ལྷན་ཚོགས་གནས་ཐུབ་པ་དེ་གནས་སྟངས་རྒྱུ་མཚན་བཞི་ལ་བརྟེན་ནས་བྱུང་ཡོད། ༡༽༧སྐྱབས་མགོན་རིན་པོ་ཆེའི་ཐུགས་རྗེ་བཀའ་དྲིན་དང་ཡིད་ཆེས། ལས་འགུལ་གྱི་ནུས་སྟོབས་རྩ་ཆེན་པོ་བརྩི་བཞིན་པ་དེ་རེད། ༢༽ བོད་ཀྱི་གཞོན་ནུ་ལྷན་ཚོགས་ཀྱི་དབུ་རྒྱུན་དང་ས་རྒྱུན་ཁག་གི་ལས་བྱེད་ཚོས་རང་ཉིད་ཀྱི་སློབ་སྦྱོང་གི་ཁེ་ཕན་དང་དཔལ་འབྱོར་གྱི་ཁེ་ཕན་སོགས་བློས་བཏང་བྱས་ནས་ཞབས་ཞུ་ཞུས་པ་དེ་ཆགས་ཡོད། ༣༽བོད་ཀྱི་གཞོན་ནུ་ལྷན་ཚོགས་ཀྱི་ཆོགས་མི་ཡོངས་ཀྱིས་ཚོགས་པའི་ལས་དོན་ལ་འཕྱར་གྲུ་མཉམ་འདེགས་ཀྱིས་རྒྱབ་སྐྱོར་མཐར་ཕྱིན་པ་གནང་བ་དེ་ཡིན། ༤༽ བོད་གཞིས་བྱེས་གཉིས་ཀྱི་བོད་རིགས་སྤུན་ཟླ་ཡོངས་སུ་རྫོགས་པས་བོད་ཀྱི་གཞོན་ནུ་ལྷན་ཚོགས་ཀྱི་ལས་དོན་ལ་རྒྱབ་སྐྱོར་གནང་སྟེ་གཞོན་ནུ་ལྷན་ཚོགས་ཀྱི་ལས་དོན་འགྲུབ་པའི་ནུས་པའི་འབྱུང་ཁུངས་དེ་ཆགས་ཡོད། ཅེས་བརྗོད་སོང་།
སྐུ་མགྲོན་གཙོ་བོ་སྤྱི་འཐུས་ཀརྨ་ཡེ་ཤེས་ལགས་ཀྱིས། ཟླ་སྔོན་མའི་ཕྱི་ཚེས་ ༡༠ ཉིན་ནས་བཟུང་གཞོན་ནུའི་དབུས་རྒྱུན་ཚོགས་གཞོན་རྟ་མགྲིན་སྲི་གཅོད་ལགས་དང་དཔལ་འབྱོར་འགན་འཛིན་བསྟན་འཛིན་དབང་ཕྱུག་ལགས། དེ་བཞིན་དྲིལ་བསྒྲགས་འགན་འཛིན་ཚེ་དབང་སྒྲོལ་མ་ལགས་བཅས་ཀྱིས། རྒྱ་གར་གྱི་རྒྱལ་ས་ལྡི་ལིར་ཟས་བཅད་ངོ་རྒོལ་བྱས་ཏེ་ཉི་མ་ ༢༨ ཕྱིན་ཡོད་པ་དང་། ཁོང་ཚོའི་ཟས་བཅད་ངོ་རྒོལ་གྱི་དམིགས་ཡུལ་དང་དགོས་འདུན་དེ་དག་ང་ཚོ་ཚང་མའི་དགོས་མདུན་ཡིན་སྟབས། གཞོན་ནུའི་ཟས་བཅད་ངོ་རྒོལ་འདི་རྣམ་པ་ཚོས་གཞན་ལ་བརྒྱུད་སྐུར་དང་དྲ་རྒྱའི་ཐོག་གི་སྙན་ཞུ་དེ་ཚོར་མཚན་རྟགས་བཀོད་ནས་རྒྱབ་སྐྱོར་གནང་གལ་ཆེན་པོ་ཆགས་ཡོད་སྐོར་སོགས་གསུངས་སོང་།
ཡང་ཁོང་གིས། རྩེད་མོའི་འགྲན་སྡུར་ཟེར་བ་དེ་གཅིག་ཐོབ་པ་དང་གཅིག་ཕམ་དགོས་ཡོད་སྟབས་རྒྱལ་ཕམ་དེ་གལ་ཆེན་པོ་མ་རེད། དེ་ལས་གལ་ཆེ་ཤོས་རྩེད་མོ་བརྒྱུད་ནས་མི་རིགས་མཐུན་སྒྲིལ་དང་རྒྱལ་ཁབ་ཀྱི་རྡོག་རྩ་ཆིག་སྒྲིལ་བྱེད་དགོས་པ་སོགས་རེད། དེ་རིང་བུ་དང་བུ་མོའི་རྟིང་རྩོད་འགྲན་སྡུར་འདིར་སུ་ལ་ཐོབ་པ་དང་སུ་ཕམ་པ་གལ་ཆེན་པོ་མ་རེད། རྩེད་མོ་འདི་འཆམ་མཐུན་གྱིས་རྩེད་རྒྱུ་དང་རྩེད་མོ་འདི་བརྒྱུད་ནས་རྒྱལ་སྤྱིའི་དཔའ་བོ་དཔའ་མོ་རྣམས་དང་བོད་ནང་དུ་དངོས་སུ་དཀའ་ངལ་མྱོང་བཞིན་པ་ཚོར་རྗེས་དྲན་ཞུས་ནས་རྩེད་རྒྱུ་གལ་ཆེན་པོ་རེད། དེ་བཞིན་རྩེད་མོ་རྩེ་མཁན་ཚང་མར་འཚམས་འདྲི་ཞུ་བ་དང་ཆབས་ཅིག་རྣམ་པ་ཚོར་རྒྱལ་ཁ་ཐོབ་དང་མ་ཐོབ་གལ་ཆེན་པོ་མ་རེད། རྩེད་མོ་རྩེ་རྒྱུ་གལ་ཆེན་པོ་རེད། མ་འོངས་པ་ཡང་རྩེད་མོ་འདིའི་རིགས་སུས་གོ་སྒྲིག་བྱས་པ་ཡིན་ན་དེའི་ནང་འཛུལ་ཞུགས་བྱེད་རྒྱུ་གལ་ཆེན་པོ་རེད། ཅེས་བརྗོད་སོང་།
གཞོན་ནུ་དབུ་བརྙེས་ཏེ་ལོ་ངོ་ཧྲིལ་པོ་ ༤༦ འཁོར་བའི་དུས་དྲན་གྱི་བསྒྲགས་གཏམ་ནང་། ཕྱི་ལོ་ ༢༠༡༥ ཟླ་ ༨ ཚེས་ ༢༤ དང་ ༢༥ ཉིན་གཉིས་རིང་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པ་ཟེར་བ་ཞིག་པེ་ཅིང་དུ་ཚོགས་ཡོད་པ་དང་། ཚོགས་ཐོག་ཏུ་རྒྱ་ནག་གི་སྲིད་འཛིན་ཞིས་ཅིན་ཕིང་གིས་བོད་ཀྱི་ལས་དོན་སྐོར་ལ་གཏམ་བཤད་རིང་པོ་ཞིག་བྱས་ཡོད་ཀྱང་། གཏམ་བཤད་རིང་པོ་དེའི་གནད་དོན་ལ་ཕྱོགས་བསྡོམས་ཤིག་བྱས་ན་ནང་དོན་བཞི་དང་དམིགས་ཡུལ་གསུམ་ཡིན་པ་རེད། དེ་ཡང་དང་པོ། ”མི་རིགས་ཁག་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་དེད་གཏོང་” ཟེར་བ་དེའི་ནང་དོན་ནི་རྒྱ་རིགས་ཕོན་ཆེ་བོད་ལ་གནས་སྤོས་ཀྱིས་རྒྱ་མི་རིགས་ཀྱི་སྲོལ་རྒྱུན་དང་གོམས་གཤིས་སྤེལ་བ་དང་། བོད་རིགས་དང་གཉེན་སྒྲིག་གིས་སྐད་ཡིག་དང་མི་རིགས་འདྲེས་མ་བཟོ་དགོས་པ་བསྟན་ཡོད་པ་དང་། གཉིས་པ། “བྱེད་ཐབས་གལ་ཆེན་ཁ་གསལ་བཟོས་ཏེ་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་། ཡུན་རིང་བདེ་འཁོད་ཀྱི་ལས་དོན་ལ་སྔར་བས་སྐུལ་འདེད་གཏོང་རྒྱུའི་འཐབ་ཇུས་བཀོད་སྒྲིག་དང་། དམངས་ཕྱུག་བོད་དར། ཡུན་རིང་བོད་སྐྲུན།” ཟེར་བ་སོགས་ཀྱི་ནང་དོན་ནི་དཔལ་འབྱོར་འཕེལ་རྒྱས་དང་དམངས་ཕྱུག་བོད་དར་གྱི་ཁ་གཡང་འོག་བོད་མི་རྣམས་དཔལ་འབྱོར་འགྲན་རྩོད་ཁོ་ནའི་ཐོག་མགོ་བོ་རྨོངས་སུ་འཇུག་རྒྱུའི་བསམ་བློ་བསྐྲུན་དགོས་པ་བསྟན་ཡོད། གསུམ་པ་། “བོད་ཀྱི་སྤྱི་ཚོགས་ཀྱི་འགལ་ཟླ་གཙོ་བོ་དང་དམིགས་བསལ་འགལ་ཟླ་ཁོང་དུ་ཆུད་པ་བྱས་ཏེ་ཏཱ་ལའི་རུ་ཚོགས་ལ་འཐབ་རྩོད་བྱེད་པའི་བྱེད་ཕྱོགས་སྲིད་ཇུས་ལ་གཡོ་འགུལ་མི་གཏོང་བ་མཐའ་འཁྱོངས་བྱེད་དགོས།” ཟེར་བའི་ནང་དོན་ནི་སྤྱི་ནོར་གོང་ས་༧སྐྱབས་མགོན་ཆེན་པོ་མཆོག་གི་དབུས་པའི་གཞིས་བྱེས་བོད་མིས་རྩོད་བཞིན་པའི་བོད་ཀྱི་གནད་དོན་དེ་བོད་ཀྱི་སྤྱི་ཚོགས་ཀྱི་འགལ་ཟླ་གཙོ་བོ་དང་དམིགས་བསལ་འགལ་ཟླ་ཞིག་གི་ངོ་བོར་བསྒྱུར་ནས་བོད་དོན་གླེང་སློང་བྱེད་མི་ཡོད་ཚད་ལ་དྲག་སྣོན་དང་རྡུང་རྡེག དྲི་རྩད། བཙོན་འཇུག དམར་གསོད་གཏོང་བ་སོགས་ཀྱི་སྲིད་ཇུས་རྒྱུན་སྐྱོང་བྱེད་དགོས་པ་བསྟན་ཡོད། བཞི་པ། “རྒྱལ་ཁབ་སྐྱོང་བར་ངེས་པར་དུ་མཐའ་མཚམས་སྐྱོང་དགོས་པ་དང། མཐའ་མཚམས་སྐྱོང་བར་སྔོན་ལ་བོད་བརྟན་ལྷིང་ཡོང་དགོས་ཟེར་བ་དང་། གུང་ཁྲན་ཏང་གི་འགོ་ཁྲིད་མཐའ་འཁྱོངས་དང་། སྤྱི་ཚོགས་རིང་ལུགས་ཀྱི་ལམ་ལུགས་མཐའ་འཁྱོངས་བྱ་དགོས་” ཟེར་བ་དང་། གནད་དོན་དེའི་ཐད་ལི་ཁེ་ཆང་གིས་ “ཕྱི་ཤུགས་ལ་བརྟེན་པ་དང་ནང་ཤུགས་འཕེལ་བར་བྱེད་པ།” ཟེར་བའི་སྐད་ཆ་གཉིས་ཀྱིས་རྒྱལ་ཁབ་ཀྱི་མཐའ་མཚམས་ལ་ཉེན་ཁ་ཡོད་པའི་འཇིགས་སྐུལ་དང་། ཉེན་ཁ་དེ་མེད་དགོས་ན་ངེས་པར་དུ་བོད་ནང་ཞི་རྒོལ་གྱི་ལས་འགུལ་མི་ཡོང་བ་བྱ་དགོས་ཟེར་བ། ཕྱིའི་རྒྱལ་ཁབ་ཀྱིས་རྒྱ་ནག་ལ་ཉེན་ཁ་ཡོད་པའི་འུར་སྒྲོག་ཀྱི་སྟོབས་ཤུགས་ལ་བརྟེན་ནས་རྒྱ་ནག་མི་མང་གི་ཆིག་སྒྲིལ་སྟོབས་ཤུགས་འཕེལ་ཐུབ་པ་བྱེད་དགོས་ཟེར་བ་སོགས་གཡོ་ཇུས་ལྡན་ལ་དོན་དངོས་དང་ཡོངས་སུ་འགལ་བའི་ཐོག་ནས་བོད་ཀྱི་གནད་དོན་དེ་རྒྱ་ནག་གི་བདེ་འཇགས་དང་འབྲེལ་བ་ཡོད་པར་སྙད་ཡོད་པ་བཅས། མདོར་ན་རྒྱ་ནག་གི་སྲིད་འཛིན་གྱི་གཏམ་བཤད་རིང་པོ་དེའི་དམིགས་ཡུལ་དངོས་ནི་། ༡༽ རྒྱ་མི་འབོར་ཆེན་བོད་ལ་གནས་སྤོ་བྱས་ནས་བོད་མི་རིགས་དང་བོད་ཀྱི་སྐད་ཡིག་རིག་གཞུང་། སྲོལ་རྒྱུན་གོམ་གཤིས་དང་བཅས་པ་མཉམ་འདྲེས་ཀྱིས་རྩ་བརླག་གཏོང་རྒྱུ་དང་། ༢༽ གྲོང་ཁྱེར་འཛུགས་སྐྲུན་དང་དཔལ་འབྱོར་ཡར་རྒྱས་ཀྱི་སླུ་ཁྲིད་འོག་བོད་མི་རྣམས་དཔལ་འབྱོར་འགྲན་རྩོད་ཁྲོད་མགོ་བོ་གཡེངས་སུ་འཇུག་རྒྱུ། ༣༽ ༧གོང་ས་མཆོག་གིས་གཙོས་པའི་གཞིས་བྱེས་མི་མང་ནས་བརྩོད་བཞིན་པའི་བོད་ཀྱི་གནད་དོན་དེ་སྤྱི་ཚོགས་ཀྱི་འགལ་ཟླ་གཙོ་བོ་རུ་བསྒྱུར་བ་མ་ཟད། རྒྱལ་ཁབ་ཀྱི་བདེ་འཇགས་དང་། མཐའ་མཚམས་ཀྱི་སྲུང་སྐྱོབ་སོགས་དང་འབྲེལ་བ་ཡོད་པར་སྙད་ནས་བོད་མི་རྣམས་རྒྱལ་ཁབ་ཀྱི་བདེ་འཇགས་དང་འབྲེལ་བའི་ཉེས་མིང་འོག་གང་བྱུང་འཛིན་བཟུང་དང་གཙོན་འཇུག་གིས་མནར་གཅོད་གཏོང་རྒྱུའི་སྲིད་ཇུས་རྒྱུན་སྐྱོང་དང་། དམར་ཤོག་ཚོགས་པས་རྒྱ་ནག་སྲིད་གཞུང་གི་དབང་ཆ་བདག་བཟུང་བྱ་རྒྱུ་སྲ་བརྟན་གཏོང་རྒྱུ་བཅས་ཡིན་པས་གཞིས་བྱེས་མི་མང་ཡོངས་ནས་རྒྱ་ནག་སྲིད་གཞུང་གི་ཞེ་གནག་པའི་སྲིད་ཇུས་ཀྱི་དམིགས་ཡུལ་གསལ་པོ་ཤེས་པའི་ཐོག་ནས་མི་རིགས་ཀྱི་ངོ་བོ་གསོན་གནས་དང་བོད་ཀྱི་སྐད་ཡིག་རིག་གཞུང་སྲུང་སྐྱོབ་སོགས་ཀྱི་ཐོག་ལ་སྔར་བས་ལྷག་པའི་ཐོག་ནས་ནུས་ཤུགས་བསྒྲིལ་དགོས། ཞེས་དང་།
ང་ཚོས་བོད་ཀྱི་གནད་དོན་འདི་ཡང་རེ་བ་བཟང་ས་དང་གྲ་སྒྲིག་སྡུག་ས་ནས་ཞེས་པ་ལྟར་ངེས་པར་དུ་ཕྱོགས་གང་ཅིའི་ཐད་ནས་གྲ་སྒྲིག་དང་རང་འགན་རང་ཁུར་གྱིས་འཐབ་རྩོད་བྱས་ཏེ་སེལ་དགོས་པ་ལས་རེ་སྒུག་ཁོ་ན་བྱས་ནས་སེལ་ཐབས་མེད་པ་ངེས་ཤེས་བརྙེད་དགོས་པ་མ་ཟད་། གཞིས་ལུས་སྤུན་ཟླའི་སྙིང་སྟོབས་དང། ཆིག་སྒྲིལ། འགོག་རྒོལ་སོགས་ཀྱི་ནུས་ཤུགས་ཧ་ཅང་གི་ཚད་མཐོར་བསླེབས་པའི་གོ་སྐབས་འདི་དམ་འཛིན་གྱིས་རྒྱལ་སྤྱིའི་ས་གནས་ཁག་ཏུ་ཡོད་པའི་བོད་རིགས་ཡོངས་ཀྱིས་སྒོ་གང་ས་ནས་བོད་ཀྱི་བདེན་དོན་འཐབ་རྩོད་ཐོག་ཤུགས་སྣོན་རྒྱག་དགོས་པ་དང་བོད་དོན་ལས་འགུལ་ཅི་རིགས་ལ་མཉམ་བཞུགས་ཀྱི་འགན་ཁུར་འདུ་ཤེས་གོང་མཐོར་གཏོང་དགོས་པའི་དུས་ལ་བབ་ཡོད། ཞེས་བཀོད་འདུག
ཡང་བསྒྲགས་གཏམ་ནང་། དེ་རིང་བོད་ཀྱི་གཞོན་ནུའི་ལྷན་ཚོགས་དབུ་བརྙེས་ནས་ལོ་ངོ་ ༤༦ འཁོར་བའི་དུས་སྐབས་འདི་དང་སྟབས་བསྟུན་ནས་རྒྱལ་སྤྱིའི་ས་ཕྱོགས་གང་སར་གནས་བའི་བོད་རིགས་སྤྱི་དང་ལྷག་པར་རང་རིགས་གཞོན་སྐྱེས་རྣམས་ལ་ནན་བརྗོད་བྱ་རྒྱུར། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་འདི་ནི་སྤྱི་ལོ་ ༡༩༧༠ ལོར་ལྷག་བསམ་དང་ཤེས་འབྱོན་གཉིས་ལྡན་གྱི་བོད་རིགས་གཞོན་སྐྱེས་གང་མང་ཞིག་ནས་མ་གྲོས་བསམ་པ་གཅིག་མཐུན་གྱིས་བོད་སྤྱི་པའི་བདེན་དོན་འཐབ་རྩོད་ཆེད་དུ་བོད་རིགས་གཞོན་སྐྱེས་རྣམས་ཀྱི་ནུས་པ་གཅིག་ཏུ་སྤུངས་སའི་སྡིང་ཆ་གལ་ཆེན་ཞིག་ཏུ་གསར་འཛུགས་གནང་བ་ལྟར། ད་བར་བོད་བསྟན་སྲིད་ཀྱི་ལས་དོན་ཆེད་རླབ་ཆེན་གྱི་ལས་དོན་གང་མང་ཞིག་གནང་ཐུབ་པ་བྱུང་ཡོད་པ་དང་། འབྱུང་འགྱུར་ཡང་རང་རིགས་གཞོན་སྐྱེས་ཡོངས་ནས་བོད་བསྟན་སྲིད་ལ་སྨན་པའི་བོད་དོན་ལས་འགུལ་ཁག་གི་ནང་ངེས་པར་དུ་འགན་འཁུར་མཉམ་བཞུགས་དང་སྣེ་ཁྲིད་ཀྱིས་བོད་དོན་ལས་འགུལ་འདི་བཞིན་རྒྱལ་སྤྱིའི་ནང་སྔར་ལས་ལྷག་པའི་སྒོ་ནས་ཚད་གཞི་ཇེ་མཐོར་གཏོང་དགོས་པའི་འབོད་སྐུལ་ཤུགས་དྲག་ཞུ་རྒྱུ་ཡིན། ཞེས་བཀོད་འདུག
གསར་འགོད་པ། འཇིགས་མེད་རྒྱ་མཚོ།
