དམག་ཆེན་གཉིས་པའི་མཇུག་མ་རིང་པོ།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༧༤ སྟེང་གི་རྩོམ་སྒྲིག་པའི་གཏམ།

 
དམག་ཆེན་གཉིས་པའི་གཏེ་པོ་ཧེ་ཐི་ལིར་གྱིས། ཁྱོད་རྒྱལ་བ་ཡིན་ན་ཁྱོད་ཀྱིས་དེར་འགྲེལ་བཤད་རྒྱག་དགོས་པ་མ་རེད། གལ་སྲིད་ཁྱོད་ཕམ་པ་ཡིན་ན། ཁྱོད་རང་གིས་འགྲེལ་མི་དགོས་པར་གཞན་གྱིས་འགྲེལ་བཤད་རྒྱག་ངེས་རེད་ཅེས་པ་དེར་བསམ་བློ་ཞིག་བཏང་ན་་་་་་་་་་་

 
ཕྱི་ཟླ་ ༩ ཚེས་ ༣ ཉིན་གུང་ཁྲན་ཏང་གིས་འཇར་འགོག་དམག་འཁྲུག་ལ་རྒྱལ་ཁ་བླངས་ནས་ལོ་ངོ་ ༧༠ འཁོར་བ་ཞེས་པའི་དུས་དྲན་ཞིག་འུར་འུར་ཟང་ཟིང་གིས་སྤེལ་ཏེ། གནམ་ས་གཉིས་ནས་དྲག་དམག་གི་དཔུང་ཤུགས་ངོམ་པ་དེས་འཛམ་གླིང་དམག་ཆེན་གཉིས་པ་མཇུག་སྒྲིལ་ནས་ཁྲག་དྲི་བྲོ་བའི་ལོ་རྒྱུས་ཤིག་དྲན་པའི་ཡུལ་ཙམ་དུ་གྱུར་བའི་དགའ་ཚོར་ལས་ལྡོག་སྟེ། སྐྱི་གཡའ་བའི་དམག་ཆེན་གཞན་ཞིག་གི་འཐབ་འཁྲུག་མགོ་རྩོམ་གྱི་ཡོད་པའི་ཚོར་སྣང་ཞིག་བསྐྲུན་སོང་།

 
རྒྱལ་སྤྱིའི་མིག་མདུན་དུ་ཐོག་མར་ངོམ་སོ་བྱས་པའི་ཏུང་ཧྥོང་འཕུར་མདའ་ཨང་ ༣༡ པ་སོགས་སྤྱི་ལེ་ཆིག་ཁྲི་ལྷག་གི་འཕུར་ཤུགས་ལྡན་ཡོད་ལུགས་བརྗོད་པའི་དྲག་ཆས་དེ་ཚོར་བེད་སྤྱོད་ཀྱི་ནུས་པ་ཡོད་མེད་ལ་མ་ལྟོས་པར་རྒྱལ་སྤྱིའི་ཐོག་གུང་ཁྲན་ཏང་གི་སྲིད་འབྱོར་རིག་གསུམ་གྱི་སྟོབས་དང་། ཞི་ཅིན་ཕིན་གྱི་དབང་ཤུགས་ར་འཕྲོད་ཐབས་བྱས་པ་དེས་ཕྱི་དགྲའི་དཔུང་འཇོམ་ཞིང་ནང་དགྲའི་གཉའ་གནོན་པར་དྲང་ཕྱོགས་ལྡོག་ཕྱོགས་གཉིས་ནས་ཤུགས་རྐྱེན་ཆེན་པོ་ཞིག་ཐོན་ཡོད་པ་བརྗོད་དུ་མེད།

 
ཞི་ཅིན་ཕིན་གྱི་ཨ་རིའི་ནང་གི་གཞུང་དོན་སྐོར་སྐྱོད་ལ་འགོག་རྒོལ་ཆེན་པོ་ཐེབས་པ་སོགས་ཕྱི་ཡི་གནོན་ཤུགས་དང་ཁ་རྡུང་བཙན་པའི་ཐོག ཐེན་ཅིན་གྱི་འབར་གས་དོན་རྐྱེན་དང་མ་རྐང་ཁྲོམ་རའི་ཉམས་རྒུད། ལྐོག་ཟ་རུལ་སུངས་ལ་རྒོལ་བའི་ཁེ་དབང་འཐབ་རྩོད་སོགས་ནང་ཁུལ་གྱི་རྩོད་རྙོག་ལ་རྣོ་ངར་རྒྱས་ཏེ། གུང་ཁྲན་ཏང་གི་སྲིད་དབང་ཡོམ་ཡོམ་བྱས་ནས་ནམ་ཞིག་ཐལ་སྐྱ་ཉིལ་ལེར་འཐོར་ཞིག་ཏུ་འགྲོ་ཉེན་ཆེ་བའི་སྐབས་འདིར། ལོ་ངོ་ ༧༠ ཡར་སྔོན་གྱི་རྨ་ཁ་ཞིག་བསྐྱར་དུ་དྲན་གསོས་པར་བྱས་ནས་དཔའ་ངར་ལྡན་ཞིང་། རྒྱལ་ཁབ་ཀྱི་ཆེད་དུ་ཡོད་ཚད་བློས་གཏོང་ཕོད་པའི་ཀྲུང་ཧྭའི་བུ་རྒྱུད་ཚོ་ཞེས་མི་རིགས་རིང་ལུགས་ཀྱི་ངར་ཤུགས་སློང་གིན་ཡོད་པ་དེའི་དམིགས་ཡུལ་ཅི་ཞིག་ཡིན་ནམ།

 
ཅང་ཅི་ཧྲི་ཡིས་སྣེ་ཁྲིད་པའི་འཇར་འགོག་དམག་འཁྲུག་ཁྲོད་ཤི་འཐབ་བྱས་པའི་དམག་མི་རྒན་རབས་པ་ཁག་ཅིག་གིས། ཞི་ཅིན་ཕིན་གཞུང་གི་དུས་དྲན་དང་བསྟུན་ལོ་རྒྱུས་ཀྱི་བདེན་པ་ར་སྤྲོད་པའི་བསྒྲགས་གཏམ་སྤེལ་ཏེ། བློ་ཕམ་གྱི་ངང་ནས་འཇར་འགོག་དམག་འཁྲུག་གི་རྒྱལ་ཁ་གོ་མིན་ཏང་གིས་བླངས་བ་ཡིན་ལ། དམག་འཁྲུག་ལ་རྗེས་དྲན་བྱེད་དགོས་ན་ཐོག་མར་ལོ་རྒྱུས་ཀྱི་བདེན་པའི་ཕྱོགས་ནས་ལངས་དགོས་པ་ལས་ལོ་རྒྱུས་ལ་འཁྱོག་བརྗོད་ཀྱིས་རྫུན་བཟོ་བྱས་ན། རྒྱལ་ཁབ་ཀྱི་ངོ་ཚ་དང་འདག་མི་ཐུབ་པའི་ལོ་རྒྱུས་ཀྱི་ནག་ཉེས་ཡིན་པའི་ཐ་ཚིག་བསྒྲགས་ཤིང་། ཞི་ཅིན་ཕིན་གྱི་སྐད་ཆ་སྟེ་ཚབ་བྱེད་མི་ཐུབ་པའི་རྒྱལ་ཁབ་ཀྱི་རྒྱུ་ནོར་དུ་འབོད་པའི་དམག་མི་རྒན་རབས་པ་ཚོར་འཚོ་བའི་མ་མཐའི་འགན་སྲུང་ཡང་མེད་པའི་སྐྱོན་བརྗོད་བྱས་ཡོད། དེ་བཞིན་གུང་ཁྲན་ཏང་གི་ཁ་གཏད་ན་ལངས་མ་འགྱེལ་དུ་ཡོད་པའི་ཐའེ་ཝན་སྲིད་འཛིན་མཱ་ཡེན་ཅིག་གིས་ཀྱང་། གོ་མིན་ཏང་སྲིད་གཞུང་གིས་འཇར་འགོག་དམག་འཁྲུག་ལ་སྣེ་ཁྲིད་པ་ནི་དོན་དངོས་ཀྱི་ལོ་རྒྱུས་ཡིན་སྐོར་ནན་བརྗོད་བྱས་སོང་།

 
རྒྱ་ནག་དང་ཉི་ཧོང་གཉིས་ཀྱི་རྩོད་རྙོག་ཤུགས་ཆེ་རུ་འགྲོ་བཞིན་པའི་སྐབས་འདིར་གུང་ཁྲན་ཏང་གིས་ཧྥ་ཤི་སི་རིང་ལུགས་ལ་ངོ་རྒོལ་དམག་འཁྲུག་ཁྲོད་ཉི་ཧོང་གི་དམག་དཔུང་ཕམ་ཉེས་གཏོང་མཁན་གུང་ཁྲན་ཏང་ཡིན་ཞེས་འུར་སྒྲོག་བྱས་ཏེ། ཡོངས་གྲགས་སུ་རྒྱལ་སྤྱིའི་ཆབ་སྲིད་པ་དང་ལོ་རྒྱུས་སྨྲ་བ་ཚོས་ཧྥ་ཤི་སི་རིང་ལུགས་ལ་ངོ་རྒོལ་གྱིས་ཉི་ཧོང་གི་དམག་དཔུང་ཕམ་ཉེས་གཏོང་མཁན་དེ་གོ་མིན་ཏང་དང་གུང་ཁྲན་ཏང་སོགས་གང་ཡང་མིན་པར་ཨ་རི་དང་སུའུ་ལེན་དམག་གི་མཉམ་འབྲེལ་བརྒྱུད་ཕམ་ཉེས་བཏང་བ་ཞིག་ཡིན་པའི་ངོས་འཛིན་དེར་ཅིའི་ཕྱིར་མཐའ་གཅིག་ཏུ་ངོ་རྒོལ་བྱེད་ཀྱི་ཡོད་པ་རེད། དྲི་བ་མང་པོ་འདིའི་རྒྱབ་ལོག་ན་གུང་ཁྲན་ཏང་གིས་དོན་གྱིས་ཅི་ཞིག་སྔོག་གིན་ཡོད་དམ།