བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༧༦ སྟེང་གི་རྩོམ་སྒྲིག་པའི་གཏམ།
དེང་སང་དྷ་སའི་རི་གྲོང་གི་གྱང་ངོས་གང་སར་སྲིད་སྤྱིའི་འོས་མིའི་པར་རིས་ཁྱབ་བསྒྲགས་ཀྱིས་ཁེངས་ཤིང་། ཕྲག་དོག་དང་ཞེ་འཁོན། འགྲན་སེམས་དང་འཐབ་རྩོད་ཀྱིས་རྩབ་ཧྲལ་བཏང་བའི་སྦྱར་ཡིག་མང་པོ་ལྷགས་རླུང་གིས་འཁྱེར་ཏེ་སྲང་ལམ་གྱི་ཟུར་དང་ཡུར་བུའི་འདམ་རྫབ་ནང་དུ་འཚང་ཁ་རྒྱག་པ་ལྟར་སྣང་ཞིང་། སྐད་འཕྲིན་དང་ངོ་དེབ་སོགས་ཀྱི་ནང་དུའང་ཚོགས་པ་ཆེད་འཛུགས་ཀྱིས་འོས་མི་ཁྱབ་བསྒྲགས་དང་བགྲོ་གླེང་སྣ་ཚོགས་བྱེད་ཀྱི་ཡོད་པ་མ་ཟད། ཞེན་ཁོག་དང་འུར་སྒྲོག དཀྲོག་གཏམ་དང་འཐེན་འཁྱེར་གྱིས་བསླངས་བའི་མེ་ལྕེ་རྒོད་པོ་ཞིག་ཀྱང་ཕྱོགས་གང་ས་ན་དམར་ལྷམ་ལྷམ་འབར་བཞིན་འདུག
སྤྱིར་བཏང་ཕྱི་ལོ་ ༢༠༡༦ ལོའི་སྲིད་སྤྱིའི་འོས་བསྡུར་མཚོན་ན། བཙན་བྱོལ་བོད་མིའི་འོས་བསྡུའི་ལོ་རྒྱུས་ཁྲོད་འོས་མི་མང་ཤོས་དང་། ལྟ་བ་ལངས་ཕྱོགས་དང་ལོ་རྒྱུས་རྒྱབ་ལྗོངས་སོགས་ཕྱོགས་གང་ཐད་ནས་ཆེས་ཕུན་སུམ་ཚོགས་པ་ཞིག་ཏུ་ངོས་འཛིན་བྱེད་ཆོག་པར་འདོད། ཡིན་ནའང་། ཆིག་སྒྲིལ་གྱི་འཛིན་སྐྱོང་ནུས་པ་དང་སྤྱི་མང་གི་འགན་འཁྲིའི་འདུ་ཤེས། ལྷག་པར་དུ་སྐབས་དོན་དཔྱད་ཞིབ་ཀྱི་གནས་ཚད་ཞན་དྲགས་པའི་རྐྱེན་གྱིས་ང་ཚོའི་སྤྱི་ཚོགས་འདི་འུར་སློང་ཆོག་ཆོག་དང་། གཡོ་འགུལ་ཐེབས་སླ་པོ་ཞིག་ཡོད་སྟབས། སྐབས་འཚོལ་བ་མང་པོས་གོ་སྐབས་འདི་བཟུང་ནས་ཕྱོགས་རིས་འཐེན་འཁྱེར་གྱི་ཚོ་ཁག་བསྒྲིགས་སྟེ་མང་ཚོགས་ཀྱི་བསམ་བློའི་ཁ་ལོ་བསྒྱུར་ཐབས་དང་། སྤྱི་ཚོགས་འདི་ཁ་འཐོར་ནས་ཡང་འཐོར་དུ་གཏོང་བཞིན་པ་འདིར་ཚང་མས་བསམ་གཞིག་དང་གཟབ་ནན་དགོས་ཀྱི་འདུག་ལ། དེ་ལས་ཀྱང་འོས་བསྡུའི་ཁྱབ་བསྒྲགས་འདི་དག་ཚོགས་སྡེ་ག་གེ་མོ་ཞིག་ཁྱབ་བསྒྲགས་བྱེད་པའི་ཆེད་དུ་མིན་པས་རང་དབང་དང་དང་བླངས་ཀྱི་ཚོགས་སྡེ་ཚོས་ཀྱང་རང་འཁྲིའི་འོས་འགན་འཁུར་དུ་ལེན་པའི་དུས་ལ་བབས་འདུག
དབུས་འོས་བསྡུ་ལས་ཁུངས་ནས་སྲིད་སྤྱིའི་འོས་བསྡུ་དང་འབྲེལ་བའི་སྒྲིག་གཞི་མང་པོ་ཞིག་ཡོངས་ཁྱབ་གསལ་བསྒྲགས་གནང་སྟེ་ཟླ་བ་ ༣ ལྷག་ཕྱིན་པའི་རིང་། དགོས་དབང་གི་ཁ་གཡང་འབོད་མཁན་དང་རྒྱབ་ལྗོངས་ཀྱི་སློང་མོ་བྱེད་མཁན། དེ་བཞིན་རྒྱུ་རྐྱེན་སྣ་མང་གིས་གོ་སྐབས་འཚོལ་མཁན་སོགས་འོས་མི་ཧ་ཅང་མང་པོ་ཞིག་གིས་འཚང་ཁ་ཤིག་ཤིག་གནང་གི་འདུག་ལ། མང་པོ་ཞིག་ལ་སྤྱི་ཚོགས་ཞབས་ཞུ་དང་རང་ནུས་མཐོར་འདེགས་ཀྱི་རེ་སྙེག་ཤུགས་ཆེན་ཡོད་པ་བརྗོད་མི་དགོས་ཀྱང་། རེ་འགའ་ནི་ཚོགས་སྡེ་ག་གེ་མོའི་རྒྱུ་ཤུགས་དཔུང་ཤུགས་ཀྱིས་བསླངས་བའི་དཔོན་ཚུགས་ཅན་དང་། ཡང་ཁ་ཤས་ནི་རང་ཉིད་ཁྱབ་བསྒྲགས་ཙམ་ལ་དམིགས་ཏེ་རང་སྣང་གང་ཤར་གྱིས་ཀུ་རེ་རྩེད་མཚར་ཆེད་ལངས་བའི་འོས་མི་བྱབ་ཆུང་དེ་འདྲའང་ཡོད་པ་འདྲ།
སྤྱིར་བཏང་དམངས་གཙོའི་སྤྱི་ཚོགས་ཚད་ལྡན་ཞིག་ཡིན་ན་ཁྲིམས་སྒྲིག་ལྟར་འོས་ཞུགས་ཀྱི་ཐོབ་ཐང་ནི་ཚང་མས་ལོངས་སུ་སྤྱོད་ཆོག་པའི་ཁེ་དབང་གལ་ཆེན་ཞིག་ཏུ་ངོས་འཛིན་གྱི་ཡོད་ཀྱང་། ང་ཚོ་བོད་མི་རྣམས་གནའ་བོའི་དུས་ནས་ཁྲིམས་སྒྲིག་གི་ཁྱབ་ཁོངས་སུ་འདུས་ཤིང་ཁྲིམས་ཀྱིས་སྲུང་སྐྱོབ་དང་འདོད་འདུན་བསྒྲུབ་པ་ཧ་ཅང་དཀོན་པོ་ཡིན་སྟབས། ད་ལྟའི་དུས་རབས་ཉེར་གཅིག་པའི་ནང་དུའང་རྒྱལ་ཁབ་དང་སྒྲིག་འཛུགས་ཀྱི་ཁྲིམས་ལ་དོ་སྣང་ཆུང་བས་དེར་རྩ་འཛིན་གྱི་འདུ་ཤེས་མེད་པར་རྒྱུན་དུ་ཨོར་འཐོམ་ཚ་བོ་བྱ་རྒྱུ་ནི། ལས་དོན་སྒྲུབ་པའི་ཐབས་ལམ་ཡག་ཤོས་སམ་སྟབས་བདེ་ཤོས་ལྟ་བུ་ཞིག་ཏུ་རྩི་བཞིན་ཡོད་པ་རེད། ངན་གོམས་འདིའི་དབང་གིས་ང་ཚོ་ག་དུས་ཡིན་ནའང་ཁྲིམས་ཀྱི་མདུན་སར་ལྐུགས་པ་ཆགས་ནས་གཉའ་ཞུམ་ཞིང་། ཁྲིམས་ཀྱི་ཁེ་དབང་ལས་རྒྱང་རིང་དུ་གནས་ཡོད་སྟབས། རང་གཅེས་འཛིན་གྱི་ཚོར་བ་ཇི་ལྟར་ཤུགས་ཆེ་བ་དེ་ཙམ་གྱིས་ཁྲིམས་མཐུན་གྱི་རང་སྲུང་ཐབས་ལམ་ལའང་གྲ་སྒྲིག་གང་ལེགས་དགོས་པ་ཧ་ཅང་གལ་ཆེའོ།།
