འོས་བསྡུའི་སྐབས་མཚམས་ལ་ཞུ་གཏུག་བྱས་པ་དེ་འཚམ་པོ་མཐོང་མ་སོང་།

དབུས་འོས་བསྡུའི་འགན་འཛིན་ཤོ་ཟུར་བསོད་ནམས་ཆོས་འཕེལ་མཆོག་གིས་དངོས་གནས་བོད་པར་ཞེན་ཁོག་ཡོད་པ་ཡིན་ན། མ་འོངས་པར་ལམ་སྟོན་བྱེད་དགོས་པ་ལས་སྐྱོན་བརྗོད་སོགས་ཀྱི་ལམ་ཀར་ཕྱིན་པ་ཡིན་ན་ཚགས་ཚུད་པ་དེ་མ་ཚུད་པ་བཟོ་བའི་ཉེན་ཡོད་པ་རེད་ཟེར།

ཉེ་སྔོན་ཨ་རི་དང་སུད་སི། སི་པིན། དབྱིན་ཇི། ཧྥ་རན་སི། འཇར་མན། ཁ་ན་ཌ་སོགས་རྒྱལ་ཁབ་ ༡༢ ཙམ་གྱི་ནང་ཡོད་པའི་བོད་དོན་རྒྱབ་སྐྱོར་ཚོགས་པ་དང་། རྒྱལ་སྤྱིའི་བོད་དོན་ལས་འགུལ་ཁང་(International Campaign for Tibet)སོགས་ཀྱི་འགན་འཛིན་ཟུར་པ་དང་ལས་ཐོག ཚོགས་མི་དང་བོད་རིག་པ་བ་བཅས་མི་གྲངས་ ༢༧ ཙམ་གྱིས་རྒྱབ་སྐྱོར་མཚན་རྟགས་འཁོད་ཡོད་ཚུལ་འཁོད་པའི་སྙན་ཞུ་ཞིག་བོད་མིའི་སྒྲིག་འཛུགས་འོས་བསྡུ་ལས་ཁང་དང་བཀའ་ཤག་ལ་ཕུལ་ཡོད་འདུག

ཞུ་སྙན་དེའི་ནང་དོན་གཙོ་བོ་ཉེ་ལམ་དབུས་འོས་བསྡུ་ལྷན་ཁང་གིས་བོད་མི་མང་སྤྱི་འཐུས་སྐབས་ ༡༦ པ་དང་། བཀའ་ཤག་སྐབས་ ༡༥ པའི་འོས་བསྡུའི་ལས་རིམ་སྐོར་ལ་སྒྲིག་གཞི་གསར་པ་ཞིག་གསལ་བསྒྲགས་བསྐྱངས་པ་དེ་དམངས་གཙོའི་འགྲོ་ལུགས་དང་མཐུན་གྱི་མེད་སྐོར་འཁོད་དང་། གནད་དོན་དེའི་ཐད་སྔོན་འགྲོའི་འོས་བསྡུའི་གོང་དུ་གསལ་བཤད་དགོས་སྐོར་སོགས་བཀོད་འདུག

འདི་གའི་གསར་འགོད་པས་དབུས་འོས་བསྡུའི་འགན་འཛིན་ཤོ་ཟུར་བསོད་ནམས་ཆོས་འཕེལ་མཆོག་ལ་གོང་གི་སྙན་ཞུ་དེའི་སྐོར་བཅར་འདྲི་ཞུས་པར་ཁོང་གིས། ཡི་གེ་དེ་འདྲ་ཞིག་ང་ཚོར་འབྱོར་སོང་། ཡིན་ནའང་སྙན་ཞུ་དེར་ཁོ་རང་ཚོས་མཚན་རྟགས་བསྐྱོན་ཡོད་པ་རེད་ཟེར་བ་མ་གཏོགས་མཚན་རྟགས་བསྐྱོན་ཡོད་པའི་ཡི་གེ་ང་ཚོས་མཐོང་མེད་སྟབས། ཁོང་ཚོས་ལབ་པ་ནང་བཞིན་ང་ཚོས་ལན་འདེབས་བྱེད་དགོས་པ་ཞིག་ལ་མཐོང་གི་མི་འདུག གང་ཡིན་ཟེར་ན། ང་ཚོ་འོས་བསྡུའི་ཁྲིམས་དང་སྒྲིག་གཞིར་འགལ་ནས་ནོར་འཁྲུལ་ཡོད་ན་ནོར་བ་ངོས་ལེན་བྱེད་དགོས་པ་རེད། ཡིན་ནའང་། ང་ཚོས་སྒྲིག་གཞི་དང་འགལ་བའི་ལས་ཀ་ཅི་ཡང་བྱས་ཡོད་པ་མ་རེད། ཕར་ཕྱོགས་དེའི་འདོད་པ་ཁེངས་དང་མ་ཁེངས་ཀྱི་ཐོག་ནས་ཡོངས་ཁྱབ་བཟོས་ཡོང་གི་ཡོད་པ་ཡིན་ན། དེ་ཁོ་རང་ཚོའི་རང་དབང་རེད། འོན་ཀྱང་། དེ་ལ་ལན་རྒྱག་དགོས་ཀྱི་ཡོད་དང་མེད་ང་ཚོས་བསམ་གཞིག་བྱེད་དགོས་པ་ཞིག་རེད། ཅེས་གསུངས་སོང་།

ཁོང་གིས་མུ་མཐུད་དུ། སྤྱིར་བཏང་ང་ཚོས་གནད་དོན་དེའི་སྐོར་ལ་བཀའ་བསྡུར་གནང་རྒྱུ་ལྷག་བསྡད་ཡོད་པ་རེད། གལ་སྲིད་འོས་བསྡུ་དང་འབྲེལ་བའི་ཐོག་ནས་གསལ་བཤད་དེ་འདྲ་ཞུ་དགོས་ཁེལ་ན། སྔོན་འགྲོའི་འོས་བསྡུ་ཚར་བའི་རྗེས་སུ་གསར་འགོད་ལྷན་ཚོགས་ཤིག་བསྐུངས་ཏེ་གསལ་བཤད་བྱ་རྒྱུ་ཡིན། སྤྱིར་བཏང་ཁོ་རང་ཚོར་དེ་འདྲའི་དགོངས་ཚུལ་ཡོད་ན། སྔ་ས་ནས་དབུས་འོས་བསྡུ་ལས་ཁུངས་ལ་སྐད་ཆ་དྲིས་ན་འགྲིག་གི་རེད་ལ། འཛིན་སྐྱོང་བཀའ་ཤག་ལའང་སྙན་ཞུ་ཕུལ་ན་མ་འགྲིག་པ་ཡོད་པ་མ་རེད། ཡིན་ནའང་། འོས་བསྡུའི་ལས་རིམ་མགོ་བཙུགས་པའི་དུས་ཚོད་དང་བསྟུན་ཏེ། ཞུ་གཏུག་བྱེད་ཡོང་བ་དེ་ང་ཚོའི་ངོས་ནས་འཚམ་པོ་ཞིག་ཏུ་མཐོང་གི་མི་འདུག ཅེས་གསུངས་སོང་།

སྙན་ཞུའི་ནང་བཙན་བྱོལ་བོད་མིའི་འོས་བསྡུའི་སྒྲིག་གཞི་རྣམས་རྒྱལ་སྤྱིའི་འོས་བསྡུའི་འགྲོ་ལུགས་དང་མཐུན་གྱི་མེད་སྐོར་བརྗོད་པ་དེར་ཁོང་གིས། རང་དབང་ཡོད་པའི་རྒྱལ་ཁབ་ཀྱི་འོས་བསྡུའི་འགྲོ་ལུགས་དང་ང་ཚོའི་འོས་བསྡུའི་འགྲོ་ལུགས་གཉིས་ཏག་ཏག་ཅིག་མཐུན་གྱི་ཡོད་པ་མ་རེད། ང་ཚོས་ང་རང་ཚོར་དཔག་པའི་རན་པ་དང་འཚམ་པ་ཞིག་གི་ཐོག་ནས་ལམ་སྟོན་བྱས་པ་ཞིག་རེད། ཡིན་ནའང་། རིམ་པས་ཡར་རྒྱས་གཏོང་བར་མང་ཚོགས་ནང་བསམ་ཚུལ་ག་རེ་ཡོང་གི་འདུག དེ་བཞིན་སྒྲིག་འཛུགས་དང་མཁས་དབང་རྣམ་པར་བསམ་ཚུལ་ག་རེ་ཡོང་གི་འདུག བསམ་ཚུལ་དེ་ཚོ་ཡར་བསྡུས་ཏེ་སྒྲིག་གཞིར་བསྐྱར་བཅོས་དང་གསར་འཇུག་བྱེད་པའི་ལམ་ཁ་དེ་ཡོད་དང་ཡོད་བཞིན་པ་ཞིག་ཡིན་སྟབས། དངོས་གནས་ཞེན་ཁོག་ཡོད་པ་ཡིན་ན། མ་འོངས་པར་ང་ཚོར་སྒྲིག་གཞི་འདི་ཚོའི་ནང་འདི་འདྲ་འདི་འདྲ་དགོས་པ་རེད། འདི་འདྲ་འདི་འདྲ་བྱུང་ན་ཡག་པོ་ཡོད་པ་རེད་ཅེས་ལམ་སྟོན་བྱེད་པར་ང་ཚོས་རེ་བ་རྒྱག་གི་ཡོད། དེ་ལས་ལྡོག་སྟེ་ང་ཚོར་སྐྱོན་བརྗོད་སོགས་ཀྱི་ལམ་དུ་ཕྱིན་ན། ཚགས་ཚུད་པ་དེ་ཚགས་མ་ཚུད་པའི་ལམ་ཁར་འགྲོ་བའི་ཉེན་ཁ་ཡོད་སྟབས། ང་ཚོ་ཏོག་ཙམ་བློ་ཕམ་ཡོང་གི་འདུག ཅེས་བརྗོད་བྱུང་།

བཀའ་ཤག་དང་དབུས་འོས་བསྡུ་ལས་ཁང་སོགས་ལ་ཕུལ་བའི་སྙན་ཞུའི་ནང་། ང་ཚོས་༧གོང་ས་མཆོག་གི་མཛད་པ་དང་དེ་བཞིན་ཁོང་གི་ལས་འཁྱུར་སྐབས་ཀྱི་གསུང་འཕྲིན་དེའི་གལ་ཆེའི་རང་བཞིན་ལ་ཧ་ཅང་ཡི་རང་བསྔགས་བརྗོད་ཞུ་བཞིན་ཡོད་ཅིང་། གསུང་འཕྲིན་དེའི་ཁོངས་སུ་བཙན་བྱོལ་གཞུང་གི་ལས་འགན་སྒྲུབ་རྒྱུ་ཙམ་ཞིག་མ་ཡིན་པར་ཡུན་རིང་མནར་གཅོད་འོག་ཡོད་པའི་བོད་རྒྱལ་ཁབ་ཀྱི་འབྱུང་འགྱུར་ཇེ་ལེགས་སུ་གཏོང་བའི་ཆེས་མཐོའི་འོས་འགན་ཅན་གྱི་ལས་སྣེའི་འོས་འདེམས་ལ་བཙན་བྱོལ་བོད་མི་མི་རེ་ངོ་རེ་བཞིན་གྱིས་དྲང་བདེན་དང་རང་དབང་གི་ཐོག་ནས་ཆ་ཤས་ལེན་པའི་ཐོབ་ཐང་ཡོད་པ་དེ་ཡང་འདུས་ཡོད་པ་ཡིན། ལྷག་དོན་དུ་བོད་མི་ཚང་མ་ལ་བོད་ཀྱི་འབྱུང་འགྱུར་སྐོར་ལ་བསམ་ཚུལ་འཛིན་པ་དང་ཤོད་པའི་ཐོབ་ཐང་ཡོད་པར་ང་ཚོས་ཡིད་ཆེས་བྱེད་བཞིན་ཡོད། ཅེས་སེམས་འཚབ་ཡོད་པའི་གནས་ཚུལ་ཁག་ཅིག་བཀོད་པའི་ནང་།

དབུས་འོས་བསྡུ་ལས་ཁང་ནས་ཉེ་ཆར་སྒྲིག་གཞི་ཞིག་སྤེལ་པ་དེས་འབྱུང་འགྱུར་བཙན་བྱོལ་བོད་མིའི་འོས་འདེམས་ཁྲོད་སྨྲ་བརྗོད་རང་དབང་དང་། དེ་བཞིན་ཚོགས་སྡེ་དང་སྒེར་གྱི་འདུ་འཛོམས་ཐོབ་ཐང་ལ་ཚད་འཛིན་བྱས་འདུག སྒྲིག་གཞི་དེའི་ནང་དུ་དམིགས་བསལ་བ་གཅིག་མ་གཏོགས་གཞན་རང་དབང་ཅན་གྱི་ཚོགས་པའམ་གང་ཟག་སྒེར་ངོས་ནས་སྐད་འབོད་ལས་དོན་སྤེལ་རྒྱུ་ལ་མ་དངུལ་གཏོང་བའམ་དྲིལ་ བསྒྲགས་བྱེད་རྒྱུ་ལའང་ཚད་བཀག་བྱས་ཡོད་པ་ཚུད་ཡོད། ཚད་བཀག་བྱས་པ་འདི་དག་ནི་བཙན་བྱོལ་བོད་མིའི་བཅའ་ཁྲིམས་ཀྱི་ཁྲོད་དུ་བཞག་ཡོད་པའི་རྒྱལ་སྤྱིའི་ཡོངས་གྲགས་འགྲོ་བ་མིའི་ཐོབ་ཐང་དང་མི་མཐུན་པ་ཆགས་ཡོད།

སྒྲིག་གཞིའི་འོག་ནས་དམིགས་བསལ་སྤྲད་པའི་ཚོགས་སྡེ་ཁག་གི་རང་འདོད་ཐོ་གཞུང་དེ་ནི་བཀའ་ཤག་གིས་བཟོས་ཤིང་། འདིས་ད་ཡོད་དབུ་ཁྲིད་དག་ལ་འོས་འདེམས་ཀྱི་ཁེ་ཕན་ཆེན་པོ་སྤྲོད་ཀྱིན་འདུག ཐོ་དེའི་ནང་མ་མཐའ་ལའང་ཚོགས་པ་གཅིག་གིས་ཡོངས་གྲགས་ཀྱི་ཐོག་ནས་ད་ཡོད་ཀྱི་དབུ་ཁྲིད་དག་ལ་རྒྱབ་སྐྱོར་བྱེད་ཀྱི་ཡོད། ཅེས་བཀོད་འདུག

ཡང་ སྙན་ཞུའི་ནང་། འོས་བསྡུ་ལས་ཁང་གི་སྒྲིག་གཞི་དེར་གསལ་ཁ་མེད་པའི་དགག་བྱའི་སྐོར་འཁོད་པ་དེས་གང་འདོད་ཀྱིས་དེ་ལ་འགྲེལ་བརྗོད་བྱེད་པའམ་ཕྱིས་འབྱུང་སྔོན་ཁྲིམས་ལ་ཁག་དཀྲི་བྱེད་པའི་གོ་སྐབས་སྤྲད་ཡོད། དཔེར་ན་ཁྲིམས་གཞི་འདི་དག་གིས་སྐྱེ་བོ་སུ་ཞིག་གིས་ “གཞི་མེད་སྒྲོ་བཏགས་ཀྱིས་སྐྱོན་བརྗོད་དམའ་འབེབས་བྱེད་པ་” དང་ཡང་ན། “སྤྱི་ཚོགས་བཅས་ཁྲོད་དབྱེན་སྦྱོར་གྱིས་ཕན་ཚུན་འཁོན་འཁྲུག་འབྱུང་གཞིའི་ རྐྱེན་སློང་” བཟོ་བ་བཀག་ཡོད་མོད། མིང་ཚིག་དེ་ལྟ་བུ་ལ་འགྲེལ་བརྗོད་བྱས་མེད་ལ། དེ་དག་ཐག་གཅོད་ཇི་ལྟར་བྱེད་རྒྱུ་ཡིན་པའི་སྐོར་ཡང་བཤད་མེད། སྒྲིག་འགལ་བྱུང་ན་འོས་མི་བྱེ་བྲག་པ་༼འོས་མི་དེས་ལས་ཀ་དེ་དག་བྱས་ཀྱང་རུང་མ་ བྱས་ཀྱང་རུང་༽ གང་དེར་བྱ་བ་དེ་འདྲ་ལ་བརྟེན་ནས་ཐོབ་པའི་འོས་ཤོག་ཡོད་ཚད་རྩིས་མེད་དང་ངོས་ལེན་མེད་པ་ཡིན་པར་བསྒྲགས་རྒྱུ་དེའང་འོས་བསྡུ་ལས་ཁང་གི་འདོད་དབང་ཁོ་ན་ལ་ཡོད། ད་དུང་སྒྲིག་གཞི་འདིའི་ཧ་ཅང་གསལ་ཁ་མེད་པ་དང་ཕྱོགས་ཞེན་ཅན་གྱི་རྗོད་པ་འདིས་དམངས་གཙོའི་བགྲོ་གླེང་དང་ཕྱོགས་འགལ་གླེང་བའི་སྤོབས་པ་ཞུམ་དུ་འཇུག་པའི་ཉེན་ཁ་བཟོ་ཡི་ཡོད།

ད་ཕན་མ་མཐའ་ལའང་ད་ཡོད་སྲིད་སྐྱོང་མིན་པའི་འོས་མི་ཞིག་གི་ངོས་ནས་འོས་བསྡུ་ལས་ཁང་ལ་བསམ་འཆར་ཞུས་ཡོད་པ་རེད་ལ། དེ་ཡང་འོས་བསྡུ་ལས་ཁང་གིས་གཞུང་འབྲེལ་སྡིངས་ཆ་དེ་འོས་འདེམས་སྐད་འབོད་ཆེད་སྤྱོད་མི་ཆོག་ཅེས་པ་དེ་ལ་ད་ཡོད་སྲིད་སྐྱོང་ལས་ཐོག་པས་རྒྱབ་འགལ་བྱས་སྐོར་བཤད་ཡོད་ལ། འོས་བསྡུ་ལས་ཁང་ལ་སྒྲིག་འགལ་ཡོད་ཚད་ལ་ལྟ་རྟོག་བྱེད་པའི་མཐུན་རྐྱེན་མེད་པ་དང་། འོས་བསྡུ་ལས་ཁང་གི་ལས་འདེབས་ཀྱིས་འདམ་གསེས་བྱས་ཏེ་སྒྲིག་གཞི་ལག་བསྟར་བྱེད་སྲིད་པའི་ཉེན་ཁ་ཡོད་པ་བསྟན་ཡོད། ཅེས་དང་། འོས་བསྡུའི་སྒྲིག་གཞི་རྣམས་གཏན་འབེབས་ཡོངས་བསྒྲགས་མ་གནང་གོང་མི་མང་གི་བསམ་ཚུལ་བསྡུ་ལེན་དང་། སྒྲིག་གཞི་རྣམས་རྒྱལ་སྤྱིའི་འགྲོ་བ་མིའི་ཐོབ་ཐང་གི་སྤྱི་འགྲོས་དང་མཐུན་གྱི་ཡོད་མེད་ཐད་རང་དབང་ཅན་གྱི་ཁྲིམས་ལུགས་ཞིབ་བཤེར་བརྒྱུད་ངེས་གཏན་བཟོས་མེད་སྐོར་སོགས་བཀོད་འདུག

སྙན་ཞུའི་མཇུག་ཏུ། ང་ཚོའམ་འཛམ་གླིང་ཁྱོན་ཡོངས་ཀྱི་མི་སྣ་གཞན་མང་པོས་མུ་མཐུད་ནས་བོད་དོན་རྒྱབ་ སྐྱོར་བྱེད་རྒྱུ་དེ་ནི། ༧གོང་ས་མཆོག་གིས་བོད་ཀྱི་ཆབ་སྲིད་འཛིན་སྐྱོང་ཁྲོད་དུ་དམངས་གཙོའི་ལམ་ལུགས་བཙུགས་པའི་འབད་བརྩོན་གྱི་མཛད་པ་དེའི་ལག་ལེན་དང་དགོངས་པ་གཉིས་ཀ་ལ་དབུས་བོད་མིའི་སྒྲིག་འཛུགས་ཀྱིས་བཀའ་བརྩི་དང་ལེན་བྱེད་མིན་དེ་ལ་གཞི་བཅོལ་ཡོད་ཅིང་། དེ་ཡང་རང་དབང་དང་དྲང་བདེན། རིས་སུ་མ་བཅད་པའི་འོས་འདེམས་ཀྱི་བརྒྱུད་རིམ་ལ་མི་དམངས་ཀྱི་བློ་འགེལ་ཡིད་གཙང་མ་ཞིག་བྱས་ཡོད་པ་དེས་ཁྱད་པར་དུ་ཕྱེས་པ་དེ་ལ་གཞི་བཅོལ་ཡོད། ང་ཚོས་སྐུ་ཉིད་ཀྱིས་གོང་བཀོད་ང་ཚོའི་སེམས་འཚབ་ཚང་མ་ལ་གང་མགྱོགས་ ༼ སྔོན་འགྲོའི་འོས་འདེམས་ཀྱི་ཡར་སྔོན་ལ་ ༽ བཟང་ཕྱོགས་ཀྱི་ལན་རེ་གནང་རྒྱུར་འབོད་སྐུལ་ཞུ་བཞིན་ཡོད། ཅེས་སོགས་བཀོད་འདུག

གསར་འགོད་པ། པདྨ་མཚོ།