ད་ལོ་ཕྲུ་གུ་ ༧༠༧ སློབ་འཇུག་བྱས་པའི་ཁྲོད་བོད་ནས་ཡོང་བ་ ༧ འདུག

དེ་རིང་སྔ་དྲོའི་ཆུ་ཚོད་ ༩ པའི་ཐོག་དྷ་སྟེང་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ ༥༥ འཁོར་བའི་དུས་དྲན་མཛད་སྒོ་ཚོགས་ཡོད་པ་དང་། མཛད་སྒོའི་ཐོག་སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་མཆོག་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་རྣམ་གཉིས་གཙོས་དམངས་གཙོ་ཀ་བ་གསུམ་གྱི་མཛད་གཙོ་རྣམས་པ་དང་། ཕྱི་རྒྱལ་ཡུལ་གྲུ་ཁག་ནས་ཕེབས་པའི་བོད་ཁྱིམ་སློབ་གྲྭའི་སྦྱིན་བདག་རྣམ་པ། དེ་བཞིན་གཞུང་འབྲེལ་དང་གཞུང་མིན་པའི་ཚོགས་སྡེ་ཁག་གི་འགན་འཛིན་པ་རྣམ་པ། དྷ་སྟེང་བོད་ཁྱིམ་གྱི་དགེ་སློབ་ཟུར་བ་རྣམ་པ་དང་དྷ་ས་ཁུལ་གྱི་སེར་སྐྱ་མང་ཚོགས་སོགས་ཁྱོན་མི་མང་ ༢༠༠༠ མ་ཟིན་ཙམ་འཛོམས་འདུག

ཐོག་མར་བོད་ཁྱིམ་སློབ་ཕྲུག་རྣམས་རུ་བསྒྲིགས་ཏེ་སྐུ་མགྲོན་རྣམ་པར་ཕེབས་བསུ་ཞུས་པ་དང་། བོད་རྒྱལ་ཁབ་དང་མི་རིགས་ཀྱི་སླད་དུ་སྐུ་སྲོག་བློས་གཏོང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་རྗེས་དྲན་སྐར་མ་གཅིག་རིང་ངག་བཅད་གུས་འདུད་ཞུས་དང་། དེ་ནས་ཧིན་བོད་ཀྱི་རྒྱལ་གླུ་རིམ་བཞིན་བཏང་རྗེས། བོད་ཁྱིམ་སྤྱི་ཁྱབ་དབུ་འཛིན་ཚེ་དབང་ཡེ་ཤེས་ལགས་ཀྱིས་ལས་བསྡོམས་སྙན་སྒྲོན་ཞུ་སྐབས། ཕྱི་ལོ་ ༡༩༦༠ ནས་ཕྱི་ལོ་ ༢༠༡༥ བར་གཏན་སློབ་ནང་སློབ་འཇུག་གྲངས་ ༥༢༢༢༦ ཆགས་ཡོད་པ་དང་། དེའི་ནང་བོད་ནས་གསར་དུ་འབྱོར་ཁོངས་སློབ་ཞུགས་ ༡༢༨༩༩ ཡོད་ཅིང་། འདི་ལོའི་ནང་གཏན་སློབ་བུ་ཕྲུག་ ༧༠༧ སློབ་འཇུག་ཞུས་པའི་ཁོངས་ནས་བོད་ནས་གསར་དུ་འབྱོར་བའི་སློབ་མ་ ༧ དང༌ཧི་མ་ལ་ཡའི་རི་བརྒྱུད་ནས་ཡིན་པའི་བུ་ཕྲུག་ ༢༥༩ དང་། དེ་མིན་ལྷག་འཕྲོས་རྣམས་བོད་རིགས་བུ་ཕྲུག་ཤ་སྟག་ཡིན་སྐོར་ངོ་སྤྲོད་གནང་སོང་།

ཁྱིམ་སྡེའི་འགན་ཁུར་ལྟ་རྟོགས་འོག་གི་མི་འབོར་སྐོར་ལ། བོད་ཁྱིམ་སློབ་ཁག་ ༡༡ ནང་གཏན་སློབ་ ༨༤༡༡ དང་ཉིན་སློབ་ཁག་ ༥ ནང་སློབ་མ་གྲངས་ ༥༦༤ ཡོད་ཅིང་། ཕྱི་རོགས་སྡེ་ཚན་ནང་བུ་ཕྲུག་ ༧༨༨ ཡོད་ལ། ལས་རིགས་དང་མཐོ་སློབ་ཁག་ཏུ་འགྲོ་བཞིན་པའི་སློབ་མ་ ༢༡༡༣ ཡོད་པ་དང་། རྒས་གསོ་ཁང་ཁག་ ༤ ནང་བགྲེས་སོང་ ༥༧༧ ཡོད་ལ། དེ་བཞིན་ཡན་ལག་ཆེ་ཆུང་ཁག་ནང་ལས་བྱེད་གྲངས་ ༡༤༦༦ བཅས་བོད་ཁྱིམ་ཁག་ནང་ཁྱོན་མི་འབོར་ ༡༣༩༡༩ ཡོད་པ་དང་། ཡང་ཤེས་ཡོན་དང་འབྲེལ་བའི་ཐད། ཉེ་ཆར་ཤེས་རིག་ལས་ཁུངས་ནས་དགེ་རྒན་གནས་ཚད་དང་སློབ་ཁྲིད་ཡར་རྒྱས་ཡོང་ཐབས་སུ་ཟབ་སྦྱོང་མི་ཉུང་བ་ཞིག་ཕུལ་ཡོད་ཅིང་། འདི་ལོར་བོད་ཁྱིམ་རང་ངོས་ནས་ཀྱང་ཟབ་སྦྱོང་ཁག་ ༡༠ གོ་སྒྲིག་ཞུས་པ་གཙོ་བོ་བོད་ཡིག་དང་བོད་ཡིག་སློབ་ཁྲིད་ཡར་རྒྱས་ཡོང་ཐབས་སུ་དམིགས་བསལ་ཤུགས་གནོན་བརྒྱབ་པ་ཡིན། ཞེས་ངོ་སྤྲོད་གནང་སོང་།

འདི་ལོའི་འཛིན་རིམ་བཅུ་པའི་རྒྱུགས་འབྲས་སྐོར་ལ། འཛུལ་ཞུགས་སློབ་མ་ ༥༩༩ ནང་ནས་ཡིག་རྒྱུགས་འཁྱོལ་བ་ ༥༨༥ དང་ཡིག་རྒྱུགས་གཏོང་མ་ཐུབ་པ་ ༢ དང་། ཡིག་རྒྱུགས་མ་འཁྱོལ་བ་ ༠ དང་བསྐྱར་རྒྱུགས་གཏོང་དགོས་པ་ ༡༢ དང་། ཡིག་རྒྱུགས་འཁྱོལ་བའི་བརྒྱ་ཆ་ ༡༠༠ ཡིན་ཞིང་། འཛིན་རིམ་བཅུ་གཉིས་ཀྱི་ཡིག་རྒྱུགས་ནང་འཛུལ་ཞུགས་སློབ་མ་ ༦༦༡ ནང་ནས་ཡིག་རྒྱུགས་འཁྱོལ་བ་ ༦༡༨ དང་ཡིག་རྒྱུགས་མ་འཁྱོལ་བ་ ༡༢། བསྐྱར་རྒྱུགས་གཏོང་དགོས་པ་ ༣༡ དང་ཡིག་རྒྱུགས་འཁྱོལ་བའི་བརྒྱ་ཆ་ ༩༣་༥ ཡིན།

འཛིན་རིམ་ ༡༢ རྒྱལ་ཡོངས་ཡིག་རྒྱུགས་སྡེ་ཚན་སོ་སོའི་ནང་འབྱུང་རིག་སྡེ་ཚན་ནས་སུ་ཇ་བོད་ཁྱིམ་སློབ་མ་བསྟན་འཛིན་དགྲ་འདུལ་ལགས་ལ་རྒྱུགས་འབྲས་སྐར་གྲངས་ ༩༥་༨ ཐོབ་པ་དང་། ཚོང་རྩིས་སྡེ་ཚན་ནས་དྷ་སྟེང་བོད་ཁྱིམ་སློབ་མ་བསྟན་འཛིན་བདེ་ཆེན་ལགས་ལ་རྒྱུགས་འབྲས་སྐར་གྲངས་ ༩༡་༢ ཐོབ་ཅིང་། ཚན་རིག་སྡེ་ཚན་ནས་སེ་ལ་ཀུའི་བོད་ཁྱིམ་སློབ་མ་མཱི་ཆི་ཀོ་ཡ་མ་ས་ཀི་ལགས་ལ་རྒྱུགས་འབྲས་སྐར་གྲངས་  ༩༣ ཐོབ་ཡོད་སྟབས། ཁོང་ཚོར་ད་ལོའི་རྒྱུགས་འབྲས་རྩེར་སོན་གྱི་ཤེས་རིག་ལྷན་ཁང་གི་བྱ་དགའ་གནང་རྒྱུ་དང་། གཞན་ཡང་ཚན་རིག ༣  འབྱུང་རིག ༣  ཚོང་རིག ༢  བཅས་ཀྱི་སློབ་ཚན་སོ་སོའི་ཨང་རིམ་གསུམ་པའི་བར་ཤེས་རིག་ལྷན་ཁང་ནས་དགའ་ལྡན་ཕོ་བྲང་གི་གཟེངས་རྟགས་གནང་ལམ་ཡོད་པ་བཞིན། ད་ལོའི་ཤེས་ཡོན་བྱ་དགའ་ ༨ བོད་ཁྱིམ་སློབ་མ་ཚོར་ཐོབ་ཡོད་པ་མ་ཟད། ད་ལོའི་སྲིད་སྐྱོང་སློབ་ཡོན་དེ་ཡང་སུ་ཇའི་སློབ་མ་བསྟན་འཛིན་དགྲ་འདུལ་ལགས་ཀྱིས་འཛིན་རིམ་བཅུ་གཉིས་པའི་རྒྱལ་ཡོངས་ཡིག་ཚད་ཀྱི་བརྒྱ་ཆ་ ༩༥་༨ ལོན་པར་གནང་སོན་བྱུང་ཡོད་པ་རེད།

གཞན་ཡང་། བྱུང་སོང་གི་གནས་སྟངས་སྐོར་ལ། རྩིས་མགོར་དངུལ་ལྷག་སྒོར་ ༣༩༠༩༩༨༠༠༢་༧༡ ཡོད་པ་དང་། བྱུང་ཁག་ཁྱོན་སྒོར་ ༦༦༤༥༧༩༧༡༧་༢༡ དང་། སོང་ཁག་རྒྱུན་གྲོན་ཐོག་སྒོར་ ༥༥༦༧༨༢༠༧༥་༥༥ དང་། འཆར་གཞིའི་ཐོག་སྒོར་ ༡༠༣༦༩༢༡༧༤་༥༠། སོང་ཁག་ཁྱོན་སྒོར་ ༦༦༠༤༧༤༢༥༠་༡༥ དང་ལྷག་བསྡད་བསྡོམས་སྒོར་ ༣༩༥༡༠༣༤༦༩་༨༧ ཡོད་ལ། སྤྱིར་བཏང་རྩིས་དང་འབྲེལ་བའི་ཐོག་འདི་ལོའི་གྲོས་ཚོགས་སྐབས་ ༡༥ པའི་ཚོགས་དུས་ ༩ པའི་སྐབས་མང་ཚོགས་རྩིས་ཁྲ་ཚོགས་ཆུང་ནས་རྩིས་ཞིབ་སྙན་ཐོའི་སྐྱོན་གནད་སྙན་སྒྲོན་ཞུས་པའི་ཐད།  ཚོགས་གཙོ་བགྲེས་པོ་མཆོག་ནས་ཉེ་ཆར་གྲོས་ཚོགས་ཚོགས་དུས་ ༡༠ པའི་མཇུག་བསྡོམས་གསུང་བཤད་ཐོག་གསལ་ཁ་གཏོད་པ་བཞིན་རེ་ཟུང་བསྐྱར་ཞིབ་བྱེད་དགོས་པ་ལས་གཞན་ཚང་མ་གཙང་བཟོ་ཟིན་པ་ཡིན། ཞེས་སོགས་ངོ་སྤྲོད་གནང་སོང་།

བཀའ་ཤག་གི་སྲིད་ཚབ་ཆོས་རིགས་བཀའ་བློན་པདྨ་ཆོས་འབྱོར་མཆོག་གིས། ད་ལྟ་ང་ཚོ་དུས་རབས་ ༢༡ ནང་འགྲོ་བཞིན་ཡོད་སྟབས། ཤེས་ཡོན་དེ་ཧ་ཅང་གལ་ཆེན་པོ་ཡིན་པ་དང་། རང་ཉིད་མི་གཅིག་ལ་ཆ་བཞག་ན་འཛམ་གླིང་འདིའི་སྒང་མི་ཚེ་སྐྱེལ་ནས་འགྲོ་དགོས་དུས་ཤེས་ཡོན་ཚད་དང་ལྡན་པ་ཞིག་མེད་ན་སོ་སོའི་མི་ཚེ་སྐྱེལ་སྟངས་ཡང་ཚད་དང་ལྡན་པ་ཞིག་མེད་པ་གསལ་བོ་ཞེ་དྲགས་རེད། དེ་བཞིན་རང་ཉིད་ཀྱི་ནང་མི་དང་སྤུན་མཆེད་སོགས་ལ་ཕན་ཐོགས་དགོས་ཀྱི་ཡོད་ན། ཤེས་ཡོན་ཐོག་ནས་ལེགས་ཆ་མང་པོ་ལེན་རྒྱུ་དང་གཅིག་ཕན་གཅིག་གྲོགས་བྱས་པའི་གྲུབ་འབྲས་དམིགས་བསལ་ཞིག་འཐོན་གྱི་ཡོད་པ་རེད། དེ་བཞིན་ང་ཚོ་མི་རིགས་ཀྱི་དཀའ་ངལ་དེ་རྒྱལ་སྤྱིའི་ཐོག་ནས་འཐབ་རྩོད་བྱས་ནས་སེལ་དགོས་ཀྱི་ཡོད་པ་གསལ་བོ་ཡིན་སྟབས། ང་ཚོ་རྒྱལ་སྤྱིའི་སྟེང་འགྲོ་ཐུབ་པའི་ཤེས་ཡོན་དང་ཡོན་ཏན་ཞིག་མེད་པ་ཡིན་ན་ཏག་ཏག་ཅིག་ཡོང་གི་ཡོད་མ་རེད་ལ། དེང་སང་སྤྱི་ཚོགས་ནང་ཤེས་ཡོན་གལ་ཆེན་པོ་ཞེ་དྲགས་ཏུ་བརྩི་ཡི་ཡོད་པ་དང་། ཤེས་ཡོན་གྱི་གྲུབ་འབྲས་དེ་ཡང་ལོ་རེ་ནས་ལོ་རེར་ཡག་ཏུ་འགྲོ་ཡི་ཡོད་པ་གསལ་བོ་ཞེ་དྲགས་རེད། ཅེས་གསུངས་སོང་།

ཁོང་གིས་མུ་མཐུད་ནས། ང་ཚོ་བོད་པ་ཞིག་ཡིན་པའི་ཆ་ནས་བོད་པའི་དཀའ་ངལ་དང་སྡུག་བསྔལ། གནས་སྟངས་སོགས་ག་དུས་ཡིན་ན་སེམས་ལ་བཞག་ནས་ལག་ལེན་བསྟར་དགོས་པ་དེ་གལ་ཆེན་པོ་ཞེ་དྲགས་རེད། དེ་བརྟེན་ང་ཚོའི་དཀའ་ངལ་དང་སྡུག་བསྔལ། རྒྱལ་ཁབ་ཀྱི་གནས་སྟངས་མཁྱེན་པའི་ཐོག་ནས་ཕྱག་ལས་གནང་བ་དང་ལས་འགུལ་སྤེལ་པ་སོགས་སྐབས་སུ་བབ་པའི་མཛད་གཙོ་རྣམ་པ་ཚང་མར་དམིགས་བསལ་གྱི་འགན་ཞིག་ཡོད་པ་རེད་བསམ་གྱི་འདུག ད་ལྟ་འཛམ་གླིང་གི་མི་ཚང་མས་བོད་ཅེས་པ་དེར་ཧ་ལས་དགོས་ཀྱི་འདུག ཆོས་དང་རིག་གཞུང་། ཆུ་དང་གཏེར་ཁ་སོགས་ཀྱི་བང་མཛོད་ཡིན་པ་དང་འཛམ་གླིང་ནང་བོད་ཅེས་པ་རྩ་ཆེན་པོ་ཞིག་ལ་བརྩིས་ཏེ་ངོས་འཛིན་གནང་གི་འདུག ཡིན་ཡང་ང་ཚོས་རང་ཉིད་ལ་དྲི་བ་འདྲི་དགོས་པ་ཞིག་ལ་ང་ཚོའི་ལུང་པ་ཡག་པོ་ཡོད་པ་ཞིག་ག་རེ་བྱས་ནས་བརླག་པ་རེད། ག་རེ་བྱས་ནས་མིའི་ལག་པར་ཤོར་བ་རེད། འཛམ་གླིང་ནང་ལ་བོད་ལས་ཆུང་བའི་རྒྱལ་ཁབ་མང་པོ་ཞིག་གིས་སོ་སོའི་རྒྱལ་ཁབ་ནང་བསྡད་དེ་རང་དབང་དང་ཁེ་ཕན་ཡོངས་སུ་རྫོགས་པ་ལོངས་སུ་སྤྱད་ནས་སྡོད་མཁན་མང་པོ་ཡོད་ཀྱང་། ང་ཚོའི་རྒྱལ་ཁབ་མིའི་ལག་པར་ཤོར་བ་དེ་ག་རེ་བྱས་ནས་རེད་ཅེ་ན། ང་ཚོས་སྐབས་སྐབས་ལ་དྲི་བ་འདྲི་དགོས་པ་གལ་ཆེན་པོ་རེད། ཡིན་ཡང་གསལ་བོ་ཞེ་དྲགས་རེད། ང་ཚོས་སོ་སོ་ང་མ་གཏོགས་ང་ཚོ་ཞེས་པའི་བསམ་བློ་ཞེ་དྲགས་མེད་སྟབས། ང་ཚོའི་ལུང་པ་ལས་སླ་བོ་ཞེ་པོ་བྱས་ནས་མིའི་ལག་པར་ཤོར་བ་རེད། ད་ནི་ང་ཚོས་ཁྲོམ་པའི་ནང་གི་སྦལ་བའི་བསམ་བློ་མི་གཏོང་བར། འཛམ་གླིང་ཐོག་ང་ཚོ་བོད་ཀྱི་གནད་དོན་དེ་རྒྱ་ཆེ་རུ་གཏང་བ་དང་བོད་ཀྱི་གནས་ སྟངས་སོགས་བདེན་པ་ར་སྤྲོད་བྱ་རྒྱུ་ད་ལྟའི་མི་རིགས་འདིའི་སྐབས་སུ་བབ་པའི་ལས་འགུལ་ཡིན་སྟབས། ཤེས་ཡོན་དེ་གལ་ཆེན་པོ་ཞེ་དྲགས་རེད། ཅེས་སོགས་གསུངས་སོང་།

དེའི་རྗེས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། ད་ཕན་བོད་ཁྱིམ་སློབ་ཁག་ནས་བོད་མི་ན་གཞོན་ཧ་ཅང་མང་པོ་ཕྱི་ནང་གི་ཤེས་ཡོན་སློབ་སྦྱོང་ལེགས་པར་ཐོན་ཏེ་རང་རེའི་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་སོགས་སྤྱི་ཚོགས་ཀྱི་ལས་རིགས་འདྲ་མིན་ནང་ཞུགས་ཏེ། བོད་མིའི་བདེ་དོན་རྩོད་ལེན་དང་། ཆོས་དང་རིག་གཞུང་མི་ཉམས་རྒྱུན་འཛིན་སོགས་ཞབས་ཞུ་ཞུ་བཞིན་ཡོད། མ་འོངས་པར་བོད་ཁྱིམ་སློབ་གྲྭ་འདི་ལྟ་བུ་བོད་མི་གནས་ཡུལ་གཞིས་ཆགས་ཁག་ཏུ་གསར་འཛུགས་སམ་འགའ་ཞིག་གནས་སྤོ་ཐུབ་པ་བྱུང་ཚེ། བོད་མིའི་གཞིས་ཆགས་ཁག་གི་ན་གཞོན་རྣམས་ཁ་འཐོར་དུ་འགྲོ་མི་དགོས་པར་གཞིས་ཆགས་དེ་གའི་བོད་མིའི་སྤྱི་ཚོགས་ནང་མུ་མཐུད་གནས་ཏེ། ལས་གཞི་འདྲ་མིན་གསར་འཛུགས་དང་། དེའི་ཐོག་བོད་མིའི་ཆོས་དང་རིག་གཞུང་བཟང་པོའི་གོམས་གཤིས་དང་བཅས་པ་མི་ཉམས་རྒྱུན་འཛིན་ཐུབ་པ་སོགས་ཡོང་རྒྱུ་མ་ཟད། ད་ཡོད་གཞིས་ཆགས་ཁག་ཀྱང་སྲ་བརྟན་རྒྱུན་གནས་ཐུབ་རྒྱུའི་དགེ་མཚན་བཅས་ལ་བརྟེན། དེ་རིང་གོ་སྐབས་འདི་བརྒྱུད་དེ་ལྟར་འབྱུང་ཐབས་འབོད་སྐུལ་ཞུ་རྒྱུ་ཡིན་ལ། དེང་སྐབས་བོད་ཁྱིམ་སློབ་ཁག་དང་ཤེས་རིག་ཁྱབ་ཁོངས་ཀྱི་སློབ་གྲྭ་གཞན་ཁག་ནང་གང་ཅིའི་གནས་སྟངས་དབང་གིས་སློབ་ཕྲུག་གི་གྲངས་ཚད་ཇེ་ཉུང་དུ་ཕྱིན་ཡོད་པ་དང་། ད་དུང་འགྲོ་བཞིན་ཡོད་པས། སློབ་ཕྲུག་རྣམས་ནི་འབྱུང་འགྱུར་བོད་དང་བོད་མིའི་གནས་བབ་ཇི་འདྲ་ཞིག་ལ་འགྱུར་རྒྱུར་རག་ལས་པའི་གཞི་རྟེན་གཙོ་བོ་ཡིན་སྟབས། དེ་སྔོན་ཀྱང་འབོད་སྐུལ་ཞུས་ཟིན་པ་ལྟར། ཤེས་རིག་ལས་ཁུངས་ཀྱི་སྟངས་འཛིན་འོག་འབྲེལ་ཡོད་སློབ་གྲྭ་ཚང་མའི་མ་འོངས་བྱ་ ཕྱོགས་ཀྱི་ཕུགས་འཕེར་འཆར་གཞི་ཚད་ལྡན་གོང་རིམ་ལ་ཕུལ་ཏེ་གཏན་འབེབས་ལག་བསྟར་དགོས་རྒྱུ་གལ་ཆེར་མཐོང་སྟབས། ད་རེབ་སླར་ཡང་འབོད་སྐུལ་ཞུ་རྒྱུ་ཡིན། སློབ་ཕྲུག་རྣམས་ཀྱི་ངོས་ནས་ཀྱང་རང་རེའི་ཕ་ཡུལ་བོད་ལྗོངས་ནང་བོད་མི་རིགས་ཀྱི་ངོ་བོ་རྩ་བརླག་གཏོང་རྒྱུའི་སྲིད་བྱུས་འོག་བོད་ཀྱི་ཆོས་དང་རིག་གཞུང་སྐད་ཡིག་དང་བཅས་པར་སློབ་སྦྱོང་གི་གོ་སྐབས་རྒྱ་ཁྱབ་གུ་ཡངས་མེད་པའི་དཀའ་ངལ་དང་། ཡང་རང་དབང་རང་བཙན་གྱི་རྒྱལ་ཁབ་ཡུལ་གྲུ་མང་པོའི་བུ་ཕྲུག་ཁྲོད་དུའང་སློབ་སྦྱོང་གི་གོ་སྐབས་མི་འཐོབ་པ་ཅི་སྙེད་ཡོད་པ། ཁྱེད་སློབ་ཕྲུག་རྣམས་ཀྱི་ཁྲོད་ནས་མང་དག་ཅིག་རང་གི་ཕ་ཡུལ་དང་། ཕ་མའི་གཙོས་ནང་མི་དང་ཁ་བྲལ་ཏེ་སློབ་སྦྱོང་ཆེད་ཡོང་བ། ལྷག་པར་བོད་ནང་གི་གཞོན་སྐྱེས་མང་པོས་བོད་མིའི་ཆོས་དང་རིག་གཞུང་སྐད་ཡིག་དང་བཅས་པའི་ཆེད། རང་གི་སྐུ་སྲོག་བློས་གཏོང་དང་ངོ་རྒོལ་ཡོ་ལང་བཅས་ཀྱི་ངང་ཚུལ་ལ་བསམ་ཞིབ་ནན་ཏན་གྱིས། རང་རེ་རང་དབང་ལུང་པར་གནས་པའི་སློབ་ཕྲུག་ཡོངས་ཀྱིས་དེང་དུས་ཤེས་ཡོན་འཛམ་ གླིང་ཐོག་དཔུང་བ་མཉམ་གཤིབ་ཐུབ་པ་དང་། ཁྱད་པར་བོད་མི་རང་ཉིད་ཀྱི་ཆོས་དང་རིག་གཞུང་སྐད་ཡིག་བཅས་པར་དོ་སྣང་ཆེན་པོས་ སྦྱོང་བརྩོན་དང་། རྒྱུན་འཛིན་ཐུབ་པ་བྱ་རྒྱུའི་དམིགས་བསལ་གྱི་ལས་འགན་ཆེན་པོ་ཞིག་ཁུར་དུ་བབ་ཡོད་པས། དུས་ཚོད་སྐར་ཆ་ཙམ་ཡང་ཆུད་ཟོས་སུ་མི་གཏོང་བར་འབད་བརྩོན་གནང་དགོས་པའི་ནན་ སྐུལ་བྱ་རྒྱུ་ཡིན། ཞེས་བརྗོད་སོང་།

སྐུ་མགྲོན་གཙོ་བོ་དཔལ་༧རྒྱལ་བ་ཀརྨ་པ་མཆོག་གིས། ང་ཚོ་བཙན་བྱོལ་ལ་བསླེབས་ནས་དུས་ཡུན་རིང་པོ་འགྲོ་ཡི་ཡོད་སྟབས་མཚམས་མཚམས་ལ་ང་ཚོ་བཙན་བྱོལ་ལ་ཡོང་དགོས་པའི་དམིགས་ཡུལ་དང་དགོས་པ་རྒྱུ་མཚན་ཟེར་ན་འདྲ། ག་རེ་ཡིན་པ་དེ་ཕལ་ཆེར་བརྗེད་འགྲོ་ཡི་ཡོད་པའི་ཚོར་སྣང་ཡོང་གི་འདུག དེར་བརྟེན་ང་ཚོས་ཡང་ནས་ཡང་དུ་སོ་སོར་དྲན་གསོ་གཏོང་དགོས་ཀྱི་འདུག ༧རྒྱལ་བ་ཐམས་ཅད་མཁྱེན་པ་མཆོག་དབུས་པའི་བོད་མི་མང་པོ་ཞིག་བཙན་བྱོལ་ལ་ཡོང་དགོས་པ་དང་སྐབས་དེ་དུས་ཀྱི་གནས་སྟངས་ག་འདྲ་ཆགས་པ། དེ་བཞིན་བཙན་བྱོལ་ལ་ཡོང་ནས་ང་ཚོས་ལས་འགན་དང་འགན་ཁྲིད་ག་རེ་ཡོད་པ་དེ་ཡང་ནས་ཡང་དུ་སོ་སོར་དྲན་གསོ་གཏོང་དགོས་པ་མ་བརྗེད་པར་བྱ་དགོས་པ་གལ་ཆེན་པོ་ཞེ་དྲགས་རེད་བསམ་གྱི་འདུག གཙོ་ཆེ་ཤོས་དེ་ང་ཚོར་དམིགས་ཡུལ་དང་རེ་བ་ཆེན་པོ་ཞིག་ཡོད་པ་དེ། སོ་སོའི་ཤེས་ཡོན་དང་ཀུན་སྤྱོད་ཡོག་པོ་ཆགས་པའི་ཐོག་ནས་མ་འོངས་པར་སོ་སོའི་ཕ་ཡུལ་ལ་ཕྱིར་ལོག་སྟེ་ཕ་ཡུལ་ལ་རྒྱལ་ཁབ་འཛུགས་ཐུབ་པའི་ལེགས་སྐྱེས་འབུལ་དགོས་པ་དང་། དེ་འཛིན་སྐྱོང་བྱ་ཐུབ་པའི་རེ་བ་ཞིག་ཡོད་པ་རེད། དེ་འདྲ་ཞིག་ཡོང་རྒྱུར་སློབ་སྦྱོང་ཡོད་པ་ཙམ་གྱིས་ཕན་གྱི་ཡོད་པ་མ་རེད། སློབ་སྦྱོང་དེ་ཚད་ལྡན་དང་སྤུས་ཀ་ཡོད་པ་ཞིག་དགོས་རྒྱུ་གལ་ཆེན་པོ་ཞེ་དྲགས་རེད། དེར་བརྟེན་ང་ཚོའི་དམིགས་ཡུལ་དང་འགན་འཁྲི་དེ་གཞན་དང་མ་འདྲ་བའི་ཆེན་པོ་ཞིག་དང་རླབས་ཆེན་ཞིག་ཡོད་དགོས་པ་དེ་ང་ཚོའི་གནས་སྟངས་འདིས་ཁ་གྲགས་ཡོང་གི་ཡོད་པ་རེད། དེ་འདྲ་ཡིན་པའི་རྒྱུ་མཚན་གྱིས་ཚང་མས་མུ་མཐུད་ནས་འབད་བརྩོན་གནང་རྒྱུ་དང་། སྔོན་ལ་གནང་བ་རེད་ལ་མ་འོངས་པར་ཡང་གནང་དགོས་པ་མ་ཟད། སྔར་ལས་ལྷག་པའི་འབད་བརྩོན་རྒྱུ་མི་ཆད་པ་ཞིག་གནང་རོགས་བྱོས་ཞེས་ཞུ་ཡི་ཡིན།

ད་མང་པོ་ཞིག་ངས་ཞུ་ཤེས་ཀྱི་མི་འདུག མ་གཞི་མཚམས་མཚམས་ལ་ངས་འདི་འདྲ་དྲན་གྱི་འདུག ང་ཚོར་མགོ་ཁྲིད་ཀྱི་མིང་ཡོད་པ་དང་ལྷག་པར་དུ་བླ་མ་བླ་ཆེན་ཟེར་བ་དེ་ནམ་རྒྱུན་མར་བཀའ་གཏོང་མཁན་ཡིན་པའི་བཟོ་འདྲ་བོ་ཞིག་མཐོང་གི་འདུག སོ་སོས་ཞེ་དྲགས་མ་འཇོན་པར་མི་ལ་འདི་བྱོས་དང་གན་བྱེད་དགོས་པ་རེད་ཟེར་དུས་ལན་པོ་ཞེ་དྲགས་རང་མི་འདུག མཚམས་མཚམས་སུ་ངོ་ཚ་བོ་འདྲ་ཡོང་གི་འདུག ཡིན་ཡང་ཏོག་ཙམ་མ་བཤད་ན་འགྲིག་གི་མེད་པ་དང་བླང་དོར་ལམ་སྟོན་གྱི་བཀའ་སློབ་གནང་རོགས་ཞེས་ཞུས་དུས། ཤེས་ཀྱི་མེད་ཀྱང་ཤེས་ཀྱི་ཡོད་མདོག་མདོག་གིས་མ་བཤད་རང་བཤད་འདྲ་ཞིག་རེད། ཡིན་ཡང་གཙོ་ཆེ་ཤོས་ང་ཚོ་རང་གཞན་ཚང་མས་འབད་བརྩོན་བྱ་དགོས་པ་ཞིག་དང་། སྐད་ཆ་བཤད་མཁན་གྱི་ངོས་ནས་འཐུས་ཤོར་དང་སྐྱོན་ཆ། ནོར་འཁྲུལ་མང་པོ་ཞིག་ཡོང་གི་ཡོད་པ་རེད། སོ་སོའི་ངོས་ནས་སྐྱོན་ཡོ་བསྲང་བྱེད་དགོས་པ་དེ་ང་རང་ངོས་ནས་ག་ཚོད་ཐུབ་ཐུབ་བྱེད་ཀྱི་ཡོད། ང་ཚོ་ཚང་མས་འབད་བརྩོན་བྱེད་དགོས་པའི་གནས་སྟངས་ཤིག་ཆགས་བསྡད་ཡོད་པ་རེད། གང་ལྟར་མ་འོངས་པར་དུས་ཚོད་ཀྱི་འགྲོ་རིམ་བཞིན་ང་ཚོའི་གནས་སྟངས་ཛ་དྲག་ཏུ་འགྲོ་བ་དང་དཀའ་ལས་ཁག་ཏུ་འགྲོ་བ་ཞིག་ཏུ་མཐོང་གི་ཡོད། ༧རྒྱལ་བ་ཐམས་ཅད་མཁྱེན་པ་དགུང་གྲངས་ ༨༠ ཕེབས་ཡོད་པ་རེད། མ་འོངས་པའི་གནས་སྟངས་ག་འདྲ་ཞིག་ཆགས་ཡོང་གི་རེད། ཚོད་མ་ཐུག་པ་ཞིག་དང་བསམ་མ་ཐུབ་པའི་གནས་སྟངས་ཤིག་ཆགས་བསྡད་ཡོད་པ་རེད། དེར་བརྟེན་ང་ཚོས་ད་ལྟ་ནས་གྲ་སྒྲིག་དང་མ་འོངས་པ་མུ་མཐུད་ནས་བོད་ཀྱི་ཆོས་དང་རིག་གཞུང་སྲུང་སྐྱོབ་བྱ་ཐུབ་དགོས་པ་ཞིག་དང་། བོད་མི་རིགས་ཀྱི་ངོ་བོ་མ་བརླག་པ་ཞིག་ལ་འབད་བརྩོན་བྱ་དགོས་པ་དེ། ང་ཚོར་ད་ལྟ་ནས་གྲ་སྒྲིག་དགོས་པ་ཞིག་དང་འབད་བརྩོན་བྱ་དགོས་ཡོད་སྟབས། ཚང་མས་ཐུགས་ལ་འཛིན་རོགས་བྱོས་ཞུ་རྒྱུ་ཡིན། ཞེས་གསུངས་སོང་།

དེའི་རྗེས་དཔལ་༧རྒྱལ་བ་ཀརྨ་པ་མཆོག་གིས་བོད་ཁྱིམ་དུ་ཞབས་ལོ་ ༢༠ སོན་པའི་ལས་བྱེད་རྣམས་ལ་གཟེངས་བསྟོད་ཀྱི་གསོལ་རས་དང་། འདི་ལོའི་ཡིག་རྒྱུགས་གྲུབ་འབྲས་རྩེར་སོན་གྱི་སློབ་ཕྲུག་རྣམས་ལ་ཤེས་ཡོན་བྱ་དགའ་དང་། སློབ་ཕྲུག་རྩེ་ཕུད་གཉིས་ལ་ཤེས་རིག་ལས་ཁུངས་ཀྱི་བྱ་དགའ་བཅས་གནང་གྲུབ་རྗེས། སྔོན་འགྲོ་དང་དང་སློབ་ཆུང་སློབ་ཕྲུག་རྣམས་ནས་༧གོང་ས་མཆོག་གི་བཀའ་དྲིན་རྗེས་དྲན་གྱི་བསྟོད་གླུ་ཕུལ་བ་དང་། འཛིན་རིམ་ ༡༡ སློབ་མ་རྣམས་ནས་རོལ་དབྱངས་ཀྱི་མཆོད་པའི་གསོལ་འདེབས་མཉམ་གཞིས་གཟིགས་འབུལ། དེ་བཞིན་སློབ་ཕྲུགས་རྣམས་ཀྱིས་ལུས་རྩལ་གཟིགས་འབུལ་བཅས་གནང་སོང་།

གསར་འགོད་པ། འཇིགས་མེད་རྒྱ་མཚོ་དང་པདྨ་རྒྱལ།