བོད་པའི་སྐད་ཡིག་ཉམས་ཆག་ཏུ་གཏོང་མཁན་གཙོ་བོ་གཅིག་སློབ་གྲྭ་རེད།

སྐད་ཡིག་རྒྱུན་འཛིན་ཚོགས་པའི་བགྲོ་གླེང་སྟེང་བཙན་བྱོལ་སྤྱི་ཚོགས་ནང་ཐ་སྙད་གསར་བཟོ་དང་བོད་སྐད་ཀྱི་མིང་ཚིགས་མང་པོ་བློ་འཛིན་བྱ་རྒྱུ་ལས་བོད་སྐད་ཀྱི་བྱ་ཚིག་དང་རྒྱན་ཚིག་རིགས་བློ་འཛིན་སློབ་སྦྱོང་བྱ་རྒྱུ་གལ་ཆེན་པོ་ཡིན་ཚུལ་བརྗོད་སོང་།

དེ་རིང་སྔ་དྲོའི་ཆུ་ཚོད་ ༩།༣༠ དྷ་སའི་ཀིརྟི་དགེ་རྩ་ཚོགས་པའི་ཚོགས་ཁང་དུ་བོད་ཀྱི་སྐད་ཡིག་རྒྱུན་འཛིན་ཚོགས་པའི་གོ་སྒྲིག་འོག་ཚོགས་པ་དེ་དབུ་བརྙེས་ནས་ལོ་ངོ་ ༡༠ འཁོར་བའི་མཛད་སྒོ་དང་མཉམ་དུ་བོད་ཀྱི་སྐད་ཡིག་རྒྱུན་འཛིན་ཚོགས་པར་བསྐྱར་ཞིབ་དང་འབྱུང་འགྱུར་གྱི་ཁ་ཕྱོགས་གླེང་བ་ཞེས་པ་དང་། བཀའ་སྤྱི་གཉིས་དང་འབྲེལ་པའི་བོད་སྐད་ཡིག་གི་ཁ་ཕྱོགས་གླེང་བ་ཞེས་པའི་བརྗོད་གཞི་གཉིས་ཀྱི་སྟེང་རང་མོས་བགྲོ་གླེང་ཚོགས་སོང་།

ཚོགས་འདུའི་ཐོག་བཀྲ་ཤིས་ཚེ་རིང་ལགས་དང་ས་ར་མཐོ་སློབ་ཀྱི་སློབ་དཔོན་ཆེན་མོ་སྤྲེལ་ནག་པ་བློ་གྲོས་དཔལ་ བཟང་ལགས། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་གྲྭ་བློ་བཟང་སྨོན་ལམ་ལགས་དང་ཉམས་ཞིབ་པ་འཇུ་བསྟན་སྐྱོང་། པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཞོན་ཨ་རིག་དགེ་མཐོང་ལགས། པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཤེས་ཡོན་འགན་འཛིན་སྨན་ཤེར་བློ་གྲོས་ལགས་གཙོས་བོད་ཀྱི་རྩོམ་པ་པོ་དང་ཉམས་ཞིབ་པ། དེ་བཞིན། མཐོ་སློབ་ཁག་ཅིག་གི་སློབ་ཕྲུག་ཁ་ཤས་དང་འབྲིང་རིམ་སློབ་གྲྭ་ཁག་ཅིག་གི་དགེ་རྒན་དང་སློབ་ཕྲུག་བཅས་མི་ ༥༠ ཙམ་འཛོམས་སོང་།

སྔ་དྲོར་བོད་ཀྱི་སྐད་ཡིག་རྒྱུན་འཛིན་ཚོགས་པ་བསྐྱར་ཞིབ་དང་འབྱུང་འགྱུར་གྱི་ཁ་ཕྱོགས་གླེང་བ་ཞེས་པའི་བརྗོད་གཞིའི་ཐོག་བགྲོ་གླེང་། སྐད་ཡིག་རྒྱུན་འཛིན་ཚོགས་པའི་གསར་ཤོག་དབུ་འབྱེད་སོགས་གནང་ཡོད་པ་དང་། དེའི་རྗེས་བཀའ་སྤྱི་གཉིས་དང་འབྲེལ་བའི་བོད་སྐད་ཡིག་གི་ཁ་ཕྱོགས་གླེང་བ་ཞེས་པའི་བརྗོད་གཞིའི་ཐོག་བགྲོ་གླེང་གནང་རྗེས་གྲོས་ཆོད་བཞག་ཡོད་འདུག

བོད་ཀྱི་སྐད་ཡིག་རྒྱུན་འཛིན་ཚོགས་པའི་སྐབས་བཞི་བའི་ཚོགས་གཙོ་དུར་བྱང་ལགས་ཀྱིས་ངོ་སྤྲོད་གནང་བ་ལྟར་ན། ཚོགས་པ་འདི་ཐོག་མ་ ༢༠༠༥ ལོར་བལ་ཡུལ་སྣེ་ལེན་ཁང་ནས་ན་གཞོན་སྐོར་ཞིག་གིས་བཙུགས་ཡོད་པ་དང་། ཐོག་མར་ཚོགས་མི་ ༡༥ ལས་གྲུབ་ཅིང་། རིམ་གྱིས་ཚོགས་མི་བསྡུ་སྐོང་དང་ལས་འགུལ་སྣ་ཚོགས་སྤེལ་ཏེ། ༢༠༠༩ ལོར་ཚོགས་མི་ ༨༠ ཙམ་བྱུང་ཡོད་ཀྱང་རྗེས་སུ་ཕྱི་རྒྱལ་དུ་སོང་བ་སོགས་ལ་བརྟེན་རིམ་གྱིས་ཇེ་ཉུང་དུ་སོང་ཡོད་འདུག་ལ། ད་བར་བོད་ཀྱི་སྐད་ཡིག་སྲུང་སྐྱོབ་དར་སྤེལ་དང་འབྲེལ་བའི་ལས་འགུལ་ཁག་ ༡༣ ཙམ་སྤེལ་ཡོད་འདུག

གྲྭ་བློ་བཟང་སྨོན་ལམ་ལགས་ཀྱིས་གཏམ་བཤད་གནང་དོན། ང་ཚོས་སྐད་ཡིག་ཐོག་ལས་འགུལ་སྤེལ་དགོས་ཀྱི་འདུག་ཟེར་དུས། ཐ་སྙད་གསར་པ་གཏན་འབེབས་དང་ཐ་སྙད་མང་པོ་གྲངས་འདྲེན་ངོས་འཛིན་སོགས་རེད། སྐད་ཡིག་གི་གལ་ཆེ་ཤོས་ངོ་མ་གཅིག་བྱ་ཚིག་དང་ཁྱད་ཆོས་བརྗོད་པའི་མིང་ངམ་རྒྱན་ཚིག་ཟེར་བ་དེ་ཚོ་རེད་བསམ་གྱི་འདུག དེ་རིགས་གཅིག་བརླགས་སོང་བ་ཡིན་ན་བཟོ་ཐབས་མེད་པའི་ཉེན་ཁ་ཆེན་པོ་ཞིག་མཐོང་གི་འདུག ཐ་སྙད་ལྟ་བུར་མཚོན་ན། དུས་དང་གནས་སྐབས། དགོས་མཁོ་སོགས་ཀྱིས་རིམ་བཞིན་འགྱུར་བ་འགྲོ་ཡི་རེད་ལ། བར་མཚམས་ཤིག་ལ་ཐ་སྙད་དེ་བེད་སྤྱོད་མེད་པ་ཆགས་ཀྱང་སྲིད་པ་རེད། མཚམས་མཚམས་གསར་བ་བཟོ་དགོས་ཀྱི་ཡོད་པ་རེད། ཉེ་ཆར་ང་ཚོས་ཞིབ་འཇུག་བྱས་པར་བྱ་ཚིག་ ༣༠༠༠ ལྷག་ཅིག་ཆགས་ཀྱི་འདུག དེའི་ནང་མི་རབས་རྒན་པ་ཚོས་ག་ཚོད་ཅིག་བེད་སྤྱོད་གཏོང་ཐུབ་ཀྱི་འདུག མི་རབས་གསར་བ་ཚོས་ག་ཚོད་བེད་སྤྱོད་གཏོང་ཐུབ་ཀྱི་འདུག ལྷག་པར་དུ་བཙན་བྱོལ་ནང་གི་སློབ་ཕྲུག་ཚོས་ག་འདྲ་བྱས་ཏེ་བེད་སྤྱོད་གཏོང་གི་འདུག དེ་ཚོའི་ཐོག་ལ་དོ་སྣང་བྱ་དགོས་པ་ཧ་ཅང་གལ་ཆེན་པོ་རེད། ཅེས་བརྗོད་སོང་།

འཇུ་བསྟན་སྐྱོང་ལགས་ཀྱིས་གཏམ་བཤད་གནང་དོན།  རྒྱུན་སྤྱོད་ཀྱི་ཐ་སྙད་གཏན་འབེབས་བྱ་དགོས་པ་ཧ་ཅང་གལ་ཆེན་པོར་མཐོང་གི་འདུག དེ་མི་གཅིག་གཉིས་ཤིག་གིས་ལས་ཐུབ་པ་ཞིག་མ་རེད། ཚོགས་པ་དང་མི་མང་པོ་ཞིག་གིས་དོ་སྣང་སྤྲོད་དགོས་པ་ཞིག་རེད། ང་ཚོའི་སྐད་ཀྱི་ནང་ལ་དབུས་གཙང་དང་ཁམས། ཨ་མདོ་སུ་ལ་ལབ་པ་ཡིན་ན་ཧ་གོ་ཐུབ་པའི་ཐ་སྙད་ག་ཚོད་ཡོད་པ་དེར་དང་པོ་བསམ་བློ་གཏོང་དགོས་འདུག དེ་རྒྱུན་སྤྱོད་ཀྱི་ཐ་སྙད་རེད། རྒྱུན་སྤྱོད་ཀྱི་ཐ་སྙད་ལ་ཁྱད་ཆོས་ཁ་ཤས་ཤིག་འཚང་དགོས་ཀྱི་ཡོད་པ་རེད། ཁྱད་ཆོས་གཅིག་མ་གནས་ཀྱི་རིང་བཞིན་ཡིན་པ་ཞིག་ཚང་དགོས་ཡོད་པ་རེད། བོད་སྐད་བཤད་ཤེས་ནས་བཟུང་དེའི་ལོ་ཚོད་དང་ཤེས་ཡོན། ལས་རིགས་ཀྱི་ཁྱད་པར་མེད་པར་ཚང་མས་བཤད་མཁན་ཞིག་ཡིན་དགོས་ཀྱི་ཡོད་པ་རེད། དཔེར་ན། ས་ལྟ་བུ་ཡིན་ན་ཚང་མས་ཤེས་ཀྱི་ཡོད་རེད་ལ་གོ་ཡི་རེད། དེ་འདྲའི་རིགས་ཀྱི་ཐ་སྙད་ག་ཚོད་ཅིག་དང་པོ་གཏན་འབེབས་བྱ་ཐུབ་ཀྱི་རེད། བཙན་བྱོལ་ནང་ལ་བུ་ཕྲུག་ལོ་ཆུང་ཆུང་དེ་ཚོར་ང་ཚོའི་སྐད་ཡིག་དེ་ཨང་གཉིས་པ་འདྲ་ཞིག་ཆགས་འདུག སྐད་ཡིག་ཨ་མ་ཆགས་ཡོད་མཁན་ཉུང་ཉུང་རེད། དེར་བརྟེན། དེ་ཚོར་ཐ་སྙད་འདི་དག་བོད་ས་གང་དུ་སོང་ཡང་ཧ་གོ་ཡི་རེད་ཅེས་ནས་ངོ་སྤྲོད་བྱ་དགོས་ཀྱི་འདུག ཅེས་སོགས་བརྗོད་སོང་།

སྤྲེལ་ནག་པ་བློ་གྲོས་དཔལ་བཟང་ལགས་ཀྱིས་གཏམ་བཤད་གནང་དོན། ངས་ཉེན་ཁ་ཆེན་པོ་ག་རེ་མཐོང་གི་འདུག་ཅེས་ན་སློབ་གྲྭ་ལ་མཐོང་གི་འདུག ངས་སྔོན་ཆད་སློབ་གྲྭར་ཡིད་ཆེས་ཟེར་ན་འདྲ། གང་ལྟར་ཡག་པོ་ཡིན་ཤག་གིས་དོ་སྣང་བྱས་མེད། སྔོན་མ་ང་ལ་ཕྲུ་གུ་ཡོད་པ་མ་རེད། ད་ལྟ་ང་ལ་ཕྲུ་གུ་བུ་མོ་གཅིག་ཡོད་སྟབས་ང་ལ་འབྲེལ་བ་འདུག ངེད་གཉིས་ཀྱིས་སྐད་ཆ་བཤད་དུས་མོའི་ཐ་སྙད་བརྒྱ་ཆའི་ ༡༠༠ ནང་གི་ཐ་སྙད་ ༩༧ ཙམ་དབྱིན་ཇི་རེད། དཔེར་ན། ངའི་བུ་མོས་བྷ་སི་(Bus)ཞེས་དུས་ངས་སྤྱི་སྤྱོད་རླངས་འཁོར་ལབ་ན། ག་རེ་གོ་མ་སོང་ཟེར་གྱི་འདུག གནས་ཚུལ་དེས་ང་ལ་བསམ་བློ་གཏོང་དགོས་པ་མང་པོ་ཞིག་ཆགས་བཅུག་སོང་། ང་ཚོའི་བཙན་བྱོལ་ནང་གི་སྐད་ཡིག་ཉམས་ཆག་ཏུ་གཏོང་མཁན་གཙོ་བོ་གཅིག་སློབ་གྲྭ་ཁག་མཐོང་གི་འདུག དང་པོ་ཕྲུ་གུ་ཡིན་དུས་ནས་ཉམས་རྒུད་ཕྱིན་ན་རྗེས་སུ་འགྲོ་སྟངས་བཟོ་ཐུབ་ཀྱི་མི་འདུག མི་ཆེན་པོ་ཆགས་དུས་གོམ་གཤིས་ཆགས་བསྡད་ཡོད་སྟབས་བསྒྱུར་བཅོས་གཏོང་རྒྱུ་དཀའ་ལས་ཁག་པོ་རེད།

གསོག་སྒར་སློབ་གྲྭ་ནས་ཐ་སྙད་གཅིག་གྱུར་གྱི་ཆེད་དུ་ལས་འགུལ་ཐེངས་གཉིས་ཙམ་སྤེལ་སོང་། སྐབས་དེར་མཐོ་སློབ་ཀྱི་སློབ་མ་མང་པོ་ཞིག་འཛུལ་ཞུགས་བྱས་སོང་། ལས་འགུལ་གྱི་ཆེད་དུ་ལས་འགུལ་དང་འགྲན་བསྡུར་གྱི་ཆེད་དུ་འགྲན་བསྡུར་བྱེད་ཀྱི་ཡོད་ན་འགྲིག་གི་རེད་དེ། ཡིན་ཡང་ངས་སྐྱོན་ག་རེ་མཐོང་སོང་ཞེ་ན། ལས་འགུལ་གཅིག་སྤེལ་བའི་རྗེས་ལ་འབྲས་བུ་ཞིག་འཐོན་དགོས་ཀྱི་ཡོད་པ་རེད། ང་ས་ར་ན་ཡོད་དུས་འགྲན་བསྡུར་དེའི་ནང་འགྲོ་མཁན་ཚོས་ཞོགས་པ་སྔ་མོ་ནས་ཐ་སྙད་མང་པོ་ཞིག་བློར་འཛིན་གྱི་འདུག དེ་ག་རེའི་ཆེད་དུ་རེད་ཅེ་ན། ཐ་སྙད་འགྲན་བསྡུར་སྐབས་ཨང་དང་པོ་དང་། ཨང་གཉིས་པ་ལེན་པའི་ཆེད་དུ་རེད། དེ་བླངས་པའི་རྗེས་སུ་ཐ་སྙད་དེ་དག་བེད་སྤྱོད་གཏོང་གི་ཡོད་པ་མ་རེད། ཨང་དང་པོ་གཉིས་པ་ལེན་མཁན་དེ་ཚོས་ཀྱང་ཨང་དང་པོ་གཉིས་པ་ལེན་བྱེད་ཀྱི་ཐ་སྙད་དེ་དག་བརྗེད་དེ། ཁ་ནས་དབྱིན་སྐད་མང་པོ་ཞིག་བེད་སྤྱོད་བཏང་ནས་འགྲོ་བཞིན་ཡོད་པ་རེད། དེ་འདྲ་བྱས་ན་ཐ་སྙད་འགྲན་བསྡུར་དེས་ག་རེ་ཕན་སོང་། ཐ་སྙད་ཀྱི་ལས་འགུལ་སྤེལ་བའི་རྗེས་ལ་ཐ་སྙད་དེ་མི་མང་ནང་བེད་སྤྱོད་གཏོང་དགོས་པ་རེད། ང་ཚོས་རྟག་པར་སྐད་ཡིག་ནི་མི་རིགས་ཀྱི་བླ་སྲོག་རེད་ཟེར་གྱི་ཡོད། སྐད་ཡིག་ཁོ་རང་གི་བླ་སྲོག་དེ་ང་ཚོས་བེད་སྤྱོད་ལ་ཐུག་ཡོད་པ་རེད། ལས་འགུལ་གྱི་ཆེད་དང་འགྲན་བསྡུར་གྱི་ཆེད་དུ་ཡིན་ན་ཐེངས་བརྒྱ་ལ་ལས་འགུལ་སྤེལ་ཏེ་འགྲན་བསྡུར་བྱས་སྐད་ཡིག་སྲུང་སྐྱོབ་ལ་ཕན་ཐོགས་ཡོད་པ་མ་རེད། རྗེས་མ་སྐད་ཡིག་རྒྱུན་འཛིན་ཚོགས་པས་སྐད་འཕྲིན་གྱི་ལམ་ནས་ནུས་པ་ཞིག་བཏོན་ཐུབ་ན་ཡག་པོ་འདུག་མ་གཏོགས་ཚོགས་འདུ་བསྐོངས་ཏེ། ངས་བཤད་ཁོས་བཤད་རྗེས་ལག་པ་བརྡབས་ཏེ་གྲོལ་སོང་ན་ཆོ་མི་འདུག

གསར་འགོད་པ། འཇིགས་མེད་རྒྱ་མཚོ།