དེ་རིང་བརྟན་བཞུགས་བསྟར་འབུལ་ཞུ་སྐབས་༧གོང་ས་མཆོག་གིས་བླ་མ་དང་སློབ་མའི་བར་དུ་ལས་དང་སྨོན་གྱི་འབྲེལ་བ་ཤུགས་ཆེན་པོ་ཡོད་སྟབས། དད་དམ་གཙང་མ་ཞིག་གི་ཐོག་ནས་བརྟན་བཞུགས་ཕུལ་ན་ནུས་པ་གང་འཚམ་འཐོན་ངེས་རེད་གསུངས་སོང་།
དེ་རིང་ལྷ་བབས་དུས་ཆེན་དང་བསྟུན་ཏེ། ཞོགས་པ་ཆུ་ཚོད་ ༧།༣༠ ཙམ་ལ་དྷ་ས་ཐེག་ཆེན་གཙུག་ལག་ཁང་དུ། བར་ཁམས་སོག་ཤོད་དང་རོང་པོ། ཁྲི་རྡོ་བཅས་ཀྱི་བརྟན་བཞུགས་གོ་སྒྲིག་ཚོགས་ཆུང་དང་། མདོ་སྟོད་ཆོལ་ཁའི་དབུས་རྒྱུན་བཅས་ཐུན་མོང་ནས། ༧གོང་ས་མཆོག་ལ་སྒྲོལ་དཀར་ཡེ་ཤེས་འཁོར་ལོའི་བརྟན་བཞུགས་བསྟར་འབུལ་ཞུས་སོང་། སྐབས་དེར་༧གོང་ས་མཆོག་དབུ་བཞུགས་ཐོག་སྐུ་བཅར་རྣམ་རྒྱལ་གྲྭ་ཚང་གཙོས་མཁན་བླ་རྣམ་པ་དང་། བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་སྲི་ཞུ་ལས་བྱེད། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་སྐུ་ཚབ། ཕྱི་རྒྱལ་ཡུལ་གྲུ་མང་པོ་ནས་ཡོང་བའི་ནང་ཆོས་དོན་གཉེར་བ། དེ་བཞིན། དྷ་ས་ཁུལ་གྱི་སེར་སྐྱ་མི་མང་བཅས་ཁྱོན་མི་གྲངས་ ༥༠༠༠ ཡས་མས་འཛོམས་འདུག་ལ། བརྟན་བཞུགས་ཀྱི་ཐོག་མར་༧གོང་ས་མཆོག་གིས་མང་ཚོགས་ལ་ནང་ཆོས་ངོ་སྤྲོད་དང་ཚེ་དབང་གནང་སོང་ལ། བརྟན་བཞུགས་དང་འབྲེལ་སོག་ཤོད་སེར་སྐྱ་མི་མང་གིས་༧གོང་ས་མཆོག་གི་བཀའ་དྲིན་རྗེས་དྲན་མཚོན་ཆེད་གསེར་གྱི་རྟགས་མ་ཞིག་དང་། བར་ཁམས་རོང་པོ་སེར་སྐྱ་མི་མང་ནས་གསེར་གྱི་འཁོར་ལོ་ཞིག་ བཅས་འབུལ་ལམ་ཞུས་སོང་།
བརྟན་བཞུགས་མཛད་སྒོའི་ཐོག་སོག་ཞབས་དྲུང་རིན་པོ་ཆེ་མཆོག་གིས་བརྟན་བཞུགས་དང་འབྲེལ་བའི་གསུང་བཤད་ལྗགས་ཀློག་གནང་སྐབས། འཛམ་གླིང་འདིའི་སྟེང་གི་ཆེས་མཐོའི་མི་སྣ་དང་། མཁས་དབང་། རྣམ་དཔྱོད་ཅན་གྱི་སྐྱེ་བོ་རྣམས་ཀྱི་མངོན་སུམ་གྱི་སྤྱོད་ཡུལ་དུ་གྱུར་ཏེ། ༧གོང་ས་སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་དང་། ཨ་མི་རི་ཁའི་གསེར་གྱི་གཟེངས་རྟགས་སོགས་གཟེངས་རྟགས་ཁག་ ༡༥༥ ལྷག་ཕུལ་ཏེ། མགོན་པོ་གང་ཉིད་འཛམ་གླིང་ཡོངས་ཀྱི་ཞི་བདེའི་དབུ་ཁྲིད་ལ་མངའ་གསོལ་བའི་སྙན་གྲགས་ཀྱིས་འཛམ་གླིང་གཡོ་བར་བྱེད་པའི་ངོ་མཚར་ཆེ་བའི་མཛད་པ་བསྟན། ལྷག་པར་དུ་༧གོང་ས་མཆོག་བཙན་བྱོལ་དུ་ཞབས་སོར་བཀོད་ནས་རིས་མེད་ཀྱི་ཆོས་སྡེ་ཁག་དང་སློབ་གྲྭ་ཁག དེ་བཞིན། གཞིས་ཆགས་ཁག་བཅས་གསར་འཛུགས་བྱས་པའི་ཁྲོད། འུ་ཅག་སོག་ཤོད་ལུང་པའི་སེར་སྐྱ་མི་མང་ལ་གཅིག་མཚུངས་ཀྱི་སྐལ་བཟང་སྤྱི་
བོའི་གཙུག་ཏུ་སྨིན་པའི་བཀའ་དྲིན་ཤིན་ཏུ་ཆེ་བས་གདན་ས་ཁག་ནས་དགེ་བཤེས་ལྷ་རམས་པ་དང་ཚོགས་རམས་པ་སོགས་དགེ་བཤེས་གང་མང་ཐོན་པ་དང་། སློབ་གྲྭ་ཁག་ནས་སློབ་དཔོན་དང་བསྟན་བཅོས་སློབ་ཐོན་པ། གཞན་ཡང་སྨན་པ་དང་རྩོམ་པ་པོ། སྙན་ངག་པ། གསར་འགོད་པ་སོགས་བྱུང་ཡོད་ལ། དེ་བཞིན་ཕ་ཡུལ་སོག་དགའ་ལྡན་འཕེལ་རྒྱས་གླིང་དུ་མཚན་ཉིད་བཤད་གྲྭ་གསར་དུ་འཛུགས་ཐུབ་པ་བྱུང་བ་སོགས་སྔར་འུ་ཅག་གི་ལོ་རྒྱུས་ནང་བྱུང་མྱོང་མེད་པ་ལྟ་བུ་བྱུང་བ་འདི་དག་ནི། ༧གོང་ས་མཆོག་གི་བཀའ་དྲིན་ཉག་ཅིག་ལ་བརྟེན་ནས་བྱུང་བའི་བཀའ་དྲིན་སྙིང་དབུས་སུ་བཅངས་ནས། དེང་འདིར་༧གོང་ས་སྐྱབས་མགོན་ཆེན་པོ་མཆོག་གི་གསང་གསུམ་མཛད་འཕྲིན་ཟབ་ཅིང་རྒྱ་ཆེ་བ་རྣམས་ཇི་བཞིན་བརྗོད་པར་མི་ནུས་ཤིང་། སྟོང་གསུམ་རིན་ཆེན་གསེར་གྱིས་བཀང་སྟེ་ཕུལ་ཀྱང་མགོན་པོ་གང་གི་བཀའ་དྲིན་ནམ་ཡང་གཞལ་བར་མི་ནུས། ཞེས་དང་། གཞིས་བྱེས་མཉམ་འཛོམས་ཀྱི་བསྐལ་བཟང་ཐོབ་པའི་སྐབས་དེར་༧གོང་ས་སྐྱབས་མགོན་ཆེན་པོ་མཆོག་གི་ཞབས་ཟུང་གསེར་གྱི་འཁོར་ལོའི་འགྲོས་བར་ཁམས་སོག་ཤོད་གསེར་མོ་ལྗོངས་ཀྱི་ཕྱོགས་སུ་ཅིས་ཀྱང་བསྒྱུར་གནང་ཡོང་བར་སྙིང་ཁོངས་རུས་པའི་གཏིང་ནས་གདུང་ཤུགས་དྲག་པོས་གསོལ་བ་འདེབས་རྟེན། བར་ཁམས་སོག་ཤོད་ལྷ་སྡེ་མི་སྡེ་ཡོངས་ཀྱིས་༧གོང་ས་སྐྱབས་མགོན་ཆེན་པོ་དང་བོད་ཀྱི་བསྟན་སྲིད་ལ་བཅངས་པའི་འགྱུར་མེད་ཀྱི་ལྷག་བསམ་དང་། གཡོ་མེད་ཀྱི་མོས་གུས། ལྡོག་མེད་ཀྱི་དམ་བཅའ་དང་བཅས་དྲི་མ་མེད་པའི་གསེར་སྦྱངས་ཀྱི་ཁམས་ལས་གྲུབ་པའི་གཟེངས་རྟགས་ཀྱི་མཚོན་དོན་བཅས་ལྗགས་ཀློག་གནང་སོང་།
ཡང་སོག་ཤོད་སེར་སྐྱ་མི་མང་ནས་བོད་བསྟན་སྲིད་ཀྱི་ཕན་བདེའི་ཆེད་དམ་བཅའ་གསུམ་བཞག་ཡོད་པ་ནི། དང་པོ། དོལ་རྒྱལ་བསྟེན་གསོལ་མཚམས་འཇོག་བྱས་ཟིན་པ་དེར་མ་འོངས་པར་འགྱུར་བ་མེད་པར་ཕ་ཐོག་བུ་བརྒྱུད་ཀྱིས་རྒྱུན་འཛིན་བྱ་རྒྱུ། གཉིས་པ། བོད་མིའི་ཆོས་དང་རིག་གཞུང་དར་སྤེལ་དང་མི་རིགས་ཀྱི་ངོ་བོ་གཙང་མ་གཙང་ཉར་ཐུབ་པ་བྱ་རྒྱུ། གསུམ་པ། བཙན་བྱོལ་དུ་༧གོང་ས་མཆོག་ནས་བསྟན་པའི་དབུ་མའི་ལམ་གཙོས་པའི་ཆོས་སྲིད་གཉིས་ཐད་བཀའ་དགོངས་འོག་ཤར་སྐྱོད་དང་། བོད་སྤྱི་པ་གང་དུ་ཕྱིན་པ་ཡིན་ན་དེའི་ཐོག་ཏུ་རྡོག་རྩ་གཅིག་སྒྲིལ་བྱ་རྒྱུ་བཅས་རེད།
མཇུག་ཏུ་༧གོང་ས་མཆོག་ནས་བརྟན་བཞུགས་ཀྱི་སྐོར་ལ་གསུང་བཤད་གནང་སྐབས། དེ་རིང་ཁྱེད་རང་ཚོ་བརྟན་བཞུགས་ཁག་གསུམ་ནས་དངོས་གནས་དད་དམ་གཙང་མ་ངོ་གདོང་ལ་བལྟས་ནས་འདྲ་ཆགས་པོ་བཤད་བཞག་པའི་སྐད་ཆ་མ་རེད། དེ་སྔ་བོད་ལ་ཡོད་སྐབས་ཡིན་ན་རེད། རྒྱ་གར་ནང་བཙན་བྱོལ་ཆགས་ནས་ལོ་ ༥༦ གི་སྒང་ལ་འགྲོ་བཞིན་ཡོད་པ་རེད། དེའི་རིང་ལ་དད་དམ་གཡོ་བ་མེད་པ་བྱས་ནས་འདི་ལྟར་བསྡད་པ་རེད། བླ་མ་ལ་བརྟན་བཞུགས་ཕུལ་ཟེར་བ་དེ་འབུལ་དངོས་ཀྱི་ཐོག་ནས་བརྟན་བཞུགས་ཡོང་བ་ཟེར་བ་དེ་མ་རེད། དད་པ་དང་དམ་ཚིག་གཡོ་བ་མེད་པ་ཞིག་ཡོད་པ་ཡིན་ན། བླ་མ་དང་སློབ་མའི་བར་དུ་ལས་དང་སྨོན་ལམ་གྱི་འབྲེལ་བ་ཡོད་པ་ཞིག་རེད། ང་ལ་ཆ་བཞག་ནའང་། ང་ཨ་མདོ་སྐུ་འབུམ་གྱི་གྲོང་གསེབ་ཆུང་ཆུང་ཞིག་ལ་སྐྱེས་པ་རེད། དེ་འདྲའི་ཕྲུ་གུ་ཞིག་རིམ་གྱིས་༧རྒྱལ་བ་རིན་པོ་ཆེ་ཡིན་པ་འདྲ་པོ་མཐོང་བ་དང་། ང་རང་གི་ངོས་ནས་ཀྱང་ལོ་ ༨༡ ལ་བསླེབས་པའི་བར་དུ་གང་ལྟར་བོད་སྤྱི་པའི་དོན་ལ་སེམས་ཁུར་ཞིག་བླངས་ཏེ་གང་ཡོང་ཅི་ཡོང་བྱས་པ་རེད། སྐུ་འབུམ་གྱི་ཉེ་འཁོར་ས་ཆ་ཁུག་ཀྱོག་གཅིག་ཏུ་སྐྱེས་པའི་ཕྲུ་གུ་ཞིག་ཧོབ་སྟེ་དེ་འདྲ་ཆགས་པ་དེ། ལས་དང་སྨོན་ལམ་གྱི་ཤུགས་རྐྱེན་ཆེན་པོ་ཞིག་ཡོད་པ་རེད་མ་གཏོགས་ཤུགས་རྐྱེན་གང་ཡང་མེད་པར་ཡོང་གི་མ་རེད། ང་ཚོའི་བར་དུ་ལས་དང་སྨོན་ལམ་གྱི་འབྲེལ་བ་ཤུགས་ཆེན་པོ་ཞིག་ཡོད་དུས། དད་པ་དང་དམ་ཚིག་ཟེར་བ་དེ་གལ་ཆེན་པོ་ཞེ་དྲགས་རེད། ཁྱེད་རང་ཚོའི་ངོས་ནས་ཐོག་མཐའ་བར་གསུམ་དུ་བསམ་པ་རྣམ་དག་དང་དད་དམ་གཡོ་བ་མེད་ པར་གནས་པ་དང་། དེ་རིང་འདིར་ཀུན་སློང་ལྷག་བསམ་རྣམ་པར་དག་པ་ཞིག་གི་ཐོག་ནས་བརྟན་བཞུགས་བཀྱགས་ཡོད་སྟབས། ནུས་པ་གང་འཚམ་ཞིག་ཡོང་གི་རེད། ཐུགས་རྗེ་ཆེ་ཞེས་ཞུ་ཡི་ཡོད། ཅེས་གསུངས་སོང་།
ཡང་བར་ཁམས་སུ་དོལ་རྒྱལ་བསྟེན་མཁན་ཡོད་པ་དེར་ཁག་གཏན་ནས་མེད་སྐོར་ཁོང་གིས། ཁྱེད་རང་ཚོའི་ཁོངས་སུ་དོལ་རྒྱལ་བསྟེན་མཁན་ཡོང་གི་ཡོད་པ་དེར་ཁག་རྩ་བ་ནས་ཡོད་པ་མ་རེད། ཁོང་ཚོས་དངོས་ཡོད་གནས་ཚུལ་དེ་ཁྱོན་ནས་ཤེས་ཀྱི་ཡོད་པ་མ་རེད། ང་རང་ལ་ཆ་བཞག་ནའང་མ་ཤེས་པར་དོལ་རྒྱལ་བསྟེན་ནས་ནོར་འཁྲུལ་བྱས་པ་རེད། མཐོ་ས་༧རྒྱལ་བ་རིན་པོ་ཆེ་ནས་ནོར་འཁྲུལ་བཟོས་པ་ཡིན་ན། ཁོང་ཚོར་ཁག་ཁྱོན་ནས་ཡོད་པ་མ་རེད། གལ་སྲིད་ཁོང་ཚོས་དངོས་ཡོད་གནས་ཚུལ་དེ་ཤེས་པ་བྱུང་ན་བསམ་བློ་གཏང་གི་རེད། དོལ་རྒྱལ་མཚམས་འཇོག་དང་མི་འཇོག་སོ་སོ་སྒེར་གྱི་ཇུས་གཏོགས་རེད། ང་ལ་ལས་འགན་ག་རེ་ཡོད་པ་རེད་ལབ་ན། ང་རང་གི་ཉམས་མྱོང་གི་ཐོག་ནས་དངོས་ཡོད་གནས་ཚུལ་འགྲེལ་བཤད་རྒྱག་དགོས་པ་དེ་ངའི་ལས་འགན་རེད། འགྲེལ་བཤད་བརྒྱབ་ནས་ཉན་དང་མི་ཉན་ཟེར་བ་དེར་སྒེར་སོ་སོས་བསམ་བློ་གཏོང་རྒྱུ་རེད། ཅེས་དང་། ད་ལྟ་བར་དུ་དོལ་རྒྱལ་བསྟེན་གསོལ་བྱས་ནས་ཡག་པོ་མེད་པ་གསལ་བཤད་བྱས་ཏེ་ཕན་གྱི་ཡོད་པ་དང་། མུ་མཐུད་གསལ་བཤད་བྱ་རྒྱུ་དེ་ཞེ་དྲགས་གལ་ཆེན་པོ་ཡིན་སྐོར་སོགས་གསུངས་སོང་།
བོད་ཕྱི་ནང་གི་གཞོན་སྐྱེས་ཚོས་མི་རབས་རྒན་པ་ཚོའི་ལྷག་བསམ་དང་སྙིང་སྟོབས་རྒྱུན་མཐུད་ཐུབ་པ་དགོས་སྐོར་བཀའ་གནང་དོན། ང་ཚོའི་མི་རབས་འདི་རྫོགས་འགྲོ་བཞིན་ཡོད་པ་དང་། མི་རབས་འདི་རྫོགས་པའི་མཚམས་སུ་བསླེབས་ཡོད་སྟབས། མི་རབས་གསར་པ་ཚོས་མཇུག་སྐྱོང་ཐུབ་པ་དགོས། ང་ཚོ་བཙན་བྱོལ་སྒྲིག་འཛུགས་ལ་ཆ་བཞག་ན། ལྔ་བཅུ་ལྔ་དགུ་དང་དྲུག་ཅུ་རེ་གྲངས་གི་མི་རབས་དེ་གང་འཚམ་རྫོགས་ཚར་སྟེ། མི་རབས་གསར་པ་ཞིག་གིས་མཇུག་སྐྱོང་ནས་ཡོང་གི་ཡོད་པ་རེད། བོད་ནང་ལ་ཆ་བཞག་ནའང་གཞིས་ལུས་རྒྱ་ཆེའི་མི་མང་གི་མི་རབས་རྒན་པ་ཚོ་རྫོགས་འགྲོ་བཞིན་ཡོད་པ་དང་། མི་རབས་གསར་པ་ཚོས་མི་རབས་རྒན་པའི་སྙིང་སྟོབས་དང་ལྷག་བསམ་འགྱུར་བ་མེད་པ་བྱས་ཏེ། མི་རབས་རྒན་པའི་མཇུག་མཐུད་ནས་ཡོང་གི་ཡོད་སྟབས། ང་ཚོ་བཙན་བྱོལ་བ་ཚོས་ཀྱང་དེ་དེ་བཞིན་བྱས་ཏེ་མི་རབས་རྒན་པ་རྣམས་རྫོགས་འགྲོ་དུས། མི་རབས་གཞོན་པ་ཚོས་མཇུག་མཐུད་ཐུབ་པ་བྱེད་དགོས་པ་རེད། ཅེས་གསུང་བཤད་གནང་གྲུབ་རྗེས། བོད་ཀྱི་ཟློས་གར་ཚོགས་པ་སོགས་ནས་གཞས་སྣ་འཁྲབ་སྟོན་དང་སེར་སྐྱ་མི་མང་ལ་ཉིན་གུང་གི་ཞལ་ལག་ཕུལ་སོང་།
གསར་འགོད་པ། པདྨ་མཚོ།
ཡག་ཀི་་་་ཡག་ཀི་་་། རྩ་བའི་ཆ་ནས་བརྟན་བཞུགས་ཡག་པོ་བྱུང་སོང་། བརྟན་བཞུགས་འབུལ་མཁན་ཚོགས་སྡེ་ཁག་བཞི་འདུག འོན་ཀྱང་། སོག་ཤོད་མངོན་འདོད་ཚ་ཤོས་དེ་ཆགས་ཀྱི་འདུག གཞན་ཚོགས་སྡེ་གསུམ་ལ་གོ་སྐབས་འདྲ་འདྲ་རྩ་ནས་བྱུང་མིན་བསམ་སོང་། ཀུན་སློང་ཡང་དག་གི་སྒོ་ནས་བླ་མར་བརྟན་བཞུགས་ཕུལ་ན་ཡག་པོ་རེད། གལ་ཏེ། ཁ་ཕོ་དོན་ཆུང་གི་ཆེད་དུ་བརྟན་བཞུགས་ཁ་ལ་འཁྱེན་ན་ཐབས་སྐྱོ་པོ་རེད་དྲན་གི་ཡོད། སོག་གི་ཞབས་དྲུང་ཕེབས་ནས་ཆུ་སྒང་གསར་མ་དང་སོག་ཤོད་གཉིས་ལ་གཡས་འདེགས་གཡོན་འདེགས་ཀྱིས་ད་རེས་བརྟན་བཞུགས་འདི་གོ་སྒྲིག་བྱུང་བ་ནི་བླ་ལོག་ཁོང་གི་མཛད་ཆེན་རེད། གཅུང་མ་ལེགས་པ་ནི། རྒྱ་བའི་སྐུ་མདུན་དུ་ནིན་གུང་མང་ཚོགས་ཞལ་ལག་ཡོད་འདོད་གསུངས་སོང་། རྒྱལ་བ་རིན་པོ་ཆེས་ཀྱང་མི་མང་ལ་ནིན་གུང་ཞལ་ལག་སྤྲོ་པོ་གནང་ཨ་གསུང་སོང། ཉིན་གུས་སླེབས་དུས་ཁ་ལག་མདངས་ངེས་མེད་པ་མ་ཟད། གོ་སྒྲིག་ལྟ་རྟོགས་དང་། ལས་འགན་མགོ་རྔ་མེད་པ། ལས་མི་མཐོང་སར་མེད་པས། མེ་མང་འཚང་ཁ་རྒྱག་ནས་ཁ་ལགས་ཏོག་ཙམ་འདུག་པ་དེ་ཡང་མགོ་སྟེང་སློག་ནས་མི་མང་ཚོ་གུང་ཚིགས་མེད་ཁངས་ར་ཞེ་དྲག་བྱེད་ཀྱི་འདུག སྐབས་ང་རང་སྒང་ལ་ལྟ་ཙམ་ཕྱིན་པས་ནང་སྐོར་སྐོར་ལམ་ནི་གད་རྙིག་དང། ལྡ་ལི། ཚོགས་རྫས་སོགས་ཀྱི་འཁེངས་ནས་གཙུགས་ལག་ཁང་དུ་ད་བར་བྱུང་མ་མྱོང་བ་ཞིག་རེད་འདུག ཚོགས་པ་བཞི་ཡིས་ངོས་ནས་དེ་ལྟར་འཐུས་ཤོག་བཏང་དོན་ག་རེ་ཡིན་ནམ་སྙམ་བྱུང་། དེ་ལས་ཀྱང་ཚབས་ཆེ་བ་ནི། རྒྱལ་བ་རིན་པོ་ཆེ་དང་ལྷན་དུ་སྐུ་པར་སྒྲོན་དུས་རེད། བརྟན་བཞུགས་འབུལ་མཚོན་བཀྱག་མཁན་ཚང་མས་འཚང་ཁ་ཤིག་ཤིག་དང་ཁྲིགས་མེད་ལུགས་མེད་ཀྱིས་རྒྱལ་བ་རིན་པོ་ཆེ་ལ་འང་འབུད་རྒྱག་འཐེབ་པ་སོགས། དེ་སྔ་ནམ་ཡང་མཐོང་མྱོང་མེད་པའི་གནས་ཚུལ་ཞིག་བློ་བུར་དུ་བྱུང་ཙང། བདེ་སྲུང་གང་ཐུབ་ཀྱིས་བཀག་འགོད་བྱེད་ཐབས་བྱས་ཀྱང་དཀའ་ལས་ཁག་པོ་བཟོས་སོང་། མ་འོངས་དེ་འདྲ་རྩ་ནས་མི་ཡོང་བར་ཤོག དེ་ཉེན་ཁ་ཞེ་འདུག བརྟན་བཞུགས་གོ་སྒྲིག་པས་འགན་ཁུར་ལ་ལྟོས་ཏེ།་རྗེས་སུ་མི་མང་གིས་རྣམ་འགྱུར་འདྲ་མིན་སྟན་དགོས་ཆགས་སོང། དཔེར་ན། མེ་ཏོག་བཀྱག་པ་དང་། ཁ་ཟས་ཞལ་ཏོག ཤིང་ཏོག་སོགས་ྷབ་ཐོབ་རྒྱག་ནས་རང་རང་གི་ནང་ལ་ཁྱེར་བ་སོགས་བྱས་སོང། སོག་ཤོད་བརྟན་བཞུགས་གོ་སྒྲིག་པས་འགྲེམས་སྤེལ་བྱས་དཔེ་དེབ་རྣམས་བདག་མེད་གང་སར་གཡུག་པ་བཅས་བྱས་སོང་ནི་། བརྟན་བཞུགས་འབུལ་མཁན་དང་མི་མང་ཡོངས་ནས་གཙུགས་ལགས་ཁང་དུ་བྱེད་མི་རུང་བ་ཡིན་པས། མ་འོངས་པར་ང་ཚོས་དེ་དག་ལ་དོ་སྣང་བྱ་དགོས་འདུག