སྐྱིད་བྱམས་བསྟན་འཛིན་དགའ་བ།
མི་མང་པོ་ཞིག་གིས་ཁ་སང་བོད་པ་ཞིག་རྒྱ་གར་པ་གསུམ་གྱིས་བསད་པ་གོ་དུས་ཧང་སངས་སངས་བྱེད་པ་ལས། དེའི་རྒྱབ་ལྗོངས་ཀྱི་རྒྱུ་རྐྱེན་དང་འབྱུང་འགྱུར་གྱི་ཉེན་ཁའི་སྐོར་ལ་གླེང་མཁན་ཧ་ལམ་མེད་ལ། དེ་ནི་གློ་བུར་བའི་དོན་རྐྱེན་ལ་ངོས་འཛིན་བྱེད་ཀྱི་ཡོད། བོད་པ་དེ་ནི་མི་གཤིས་དང་ཀུན་སྤྱོད་གང་ཐད་ནས་ངས་ཡི་རངས་ཞུ་སའི་སློབ་གྲོགས་ཚུལ་ཁྲིམས་ལགས་རེད། ཁོང་ལ་རྒྱུས་མངའ་མེད་མཁན་དང་། གནས་ཚུལ་དངོས་ཇི་བཞིན་མི་ཤེས་མཁན་ཞིག་གི་ངོས་ནས་བལྟས་ན་ཁ་སང་བྱུང་བའི་དོན་རྐྱེན་དེ་རྒྱ་གར་པས་ཚུར་རང་འགུལ་གྱིས་བརྩམས་པ་ཞིག་མིན་པར། བོད་པས་ཕར་ར་བཟི་བཤད་ནས་གནས་ཚུལ་དེ་ལྷག་པ་ཞིག་ལ་ངོས་འཛིན་བྱེད་སྲིད། གང་ཡིན་ཞེ་ན། མེག་ལོར་ཁྲོམ་གཞུང་དུ་བོད་པའི་ཕོ་གསར་འགའ་རེས་རང་ངོ་མ་ཟིན་པར་ར་བཟི་སྟེ་འཁྲུག་རྩོད་ཤོར་བ་རྒྱུན་གཏན་གྱི་གནས་ཚུལ་ཤིག་ཡིན་པས་རེད།
དེ་ཡང་དཔེར་ན་མདང་དགོང་ཞོགས་པ་ངའི་ལས་རོགས་དང་ང་ལས་ཁུངས་སུ་ཐུག་མ་ཐག གདུང་སེམས་ཀྱི་རྣམ་འགྱུར་ཙམ་ཡང་མེད་པར་ངའི་ལས་རོགས་ཀྱིས་མདང་དགོང་བོད་པའི་ཕོ་གསར་ཞིག་རྒྱ་གར་པས་བསད་དེ་རྒྱུ་མ་ཡང་ཕྱི་ལ་བཏོན་འདུག་ཅེས་བརྗོད་བྱུང་། ངས་ག་རེ་བྱས་ནས་ཞེས་འདྲི་དུས། ར་བཟི་བཤད་ནས་ཡིན་རྒྱུ་རེད། ནམ་རྒྱུན་བོད་པའི་ཕོ་གསར་འགའ་རེ་མཚན་གུང་ཕྱི་བོ་ལ་ཡང་ར་བཟི་སྟེ་སྐད་ཅོར་བརྒྱབ་ནས་འགྲོ་ཡི་འདུག་ཅེས་བརྗོད་བྱུང་། ཁྱེད་ཀྱིས་ངའི་ལས་རོགས་ཀྱི་སྐད་ཆར་བསམ་བློ་ཞིག་ཐོངས་དང་། བོད་པ་དེ་དག་གིས་བྱེད་སྟངས་ལ་ངའི་ལས་རོགས་བོད་པའི་ཕོ་གཞོན་དེས་ཀྱང་སུན་སྣང་བྱེད་དུས་བོད་པའི་རྒན་རྒོན་ཚོས་བརྗོད་མི་དགོས་པ་ཞིག་རེད་ལ། རྒྱ་གར་ཡུལ་མི་ཚོས་དེ་བས་ཀྱང་མི་དགའ་བ་སྨོས་མེད་རེད། མ་ཟད་བོད་པའི་གཤིས་ཀ་འདི་ཆུ་ནང་གི་ཟླ་བ་བཞིན་གཏིང་མཐའ་དེ་ཙམ་མེད་པར་ཡོད་ཚད་མཁའ་རུ་མངོན་འོང་མཁན་ཞིག་ཡིན་སྟབས། ང་ཚོའི་བྱེད་སྟངས་དང་ལས་སྟངས་མང་པོ་ཞིག་གིས་ཡུལ་མིའི་སེམས་ཁམས་ལ་ཕོག་ཐུག་ཐེངས་མང་བཏང་ཡོད་པ་མ་བཤད་ཀྱང་གོ་ཐུབ་པ་ཞིག་རེད།
རྒྱུ་ཚོགས་དེ་དག་གིས་ཡུལ་མིའི་སེམས་ལ་སྔོན་ཚུད་ནས་རྨ་ཁ་ཆེན་པོ་ཞིག་བཟོས་ཡོད་པ་དེ་ཁ་སང་ཕྱི་རུ་བཏོན་སའི་རྐྱེན་དེ་སློབ་གྲོགས་ཚུལ་ཁྲིམས་ལགས་དང་སྟབས་འཁེལ་བ་ཞིག་རེད་མ་གཏོགས་ན་ཟུག་དེའི་རྒྱུ་རྐྱེན་སྔ་ས་ནས་ཡོད་པར་ངས་ཚོད་དཔག་ཐེག་གི་འདུག གང་ཡིན་ཞེ་ན། ང་སློབ་གྲོགས་ཚུལ་ཁྲིམས་ལ་རྒྱུས་མངའ་ཆེན་པོ་ཡོད་མཁན་ཞིག་ཡིན། ཁོང་རྒྱུན་གཏན་ནས་གང་དུ་རྩོད་རྙོག་ཡོད་ས་དེ་ཞི་འཇམ་དུ་གཏོང་མཁན་ཞིག་ཡིན་པ་ལས་རྩོད་རྙོག་མེད་པ་གསར་དུ་བཟོ་མཁན་དང་ཡོད་པ་ཆེ་རུ་གཏོང་མཁན་གྱི་རིགས་གཏན་ནས་མིན་ལ། ལྷག་པར་དུ་ཁོང་གི་ཕྱིའི་ཀུན་སྤྱོད་དང་ནང་གི་མི་གཤིས་སོགས་ནི་གཞུང་ལུགས་ནང་གསུངས་པའི་བཟང་པོའི་ཡོན་ཏན་དེ་དག་དང་ལྡན་པ་ཞིག་རེད། དེས་ན་ཁོང་གིས་རྒྱ་གར་པ་དེ་དག་གི་སེམས་ལ་མི་རན་པ་ཞིག་དང་མི་འོས་པ་ཞིག་བྱེད་མི་སྲིད་སྟབས། གློ་བུར་བའི་གནས་ཚུལ་ཞིག་ཡིན་ཚེ་མི་བསད་ཁྲག་སྦྱོར་གྱི་དོན་རྐྱེན་དེ་འདྲ་ལྷག་མི་སྲིད་པ་ཞིག་རེད། དེས་ན་ངས་དོན་རྐྱེན་དེའི་རྒྱུ་ཚོགས་སྔ་ས་ནས་བོད་པ་ཚོས་ཡུལ་མི་དེ་དག་གི་སེམས་ལ་བཟོས་ཚར་ཡོད་པ་ཞིག་ལ་ངོས་འཛིན་བྱེད་ཀྱི་ཡོད་པ་ལས་གློ་བུར་བ་ཞིག་ལ་ངོས་འཛིན་བྱེད་ཀྱི་མེད།
གང་ལྟར། མིག་དཔེར་འོས་པའི་སློབ་གྲོགས་ཁོང་ད་ལྟ་ང་ཚོ་དང་ཁ་བྲལ་ཟིན་པ་རེད། ད་ང་ཚོས་སློབ་གྲོགས་ཁོང་གི་ཚེ་སྲོག་དེ་བོད་པ་གཞན་ཞིག་གི་ཚབ་ཏུ་ཤོར་ཡོད་པ་བཞིན། ཁོང་གི་ཚེ་སྲོག་དེས་འབྱུང་འགྱུར་བོད་པའི་བུ་དང་བུ་མོ་ག་ཚོད་ཅིག་གིས་ཚེ་སྲོག་རྒྱ་གར་པ་ཡུལ་མི་འདི་དག་གི་ལག་འོག་ནས་སྐྱོབས་ཐུབ་མིན་ནི། ང་ཚོས་ཁོང་བསོད་མཁན་གྱི་ལག་དམར་དེ་དག་རྒྱ་གར་གཞུང་གི་ས་གནས་ཁྲིམས་ཁང་དང་། དེ་ནས་མངའ་སྡེའི་ཁྲིམས་ཁང་། དེ་ནས་མ་བྱུང་ན་དབུས་གཞུང་གི་ཁྲིམས་ཁང་བཅས་ལ་གཏུག་བཤེར་གྱིས་ཁྲིམས་གཅོད་ནན་པོ་ཞིག་གཅོད་ཐུབ་མིན་ལ་རག་ལས་ཡོད།
དེས་ན་ཁོང་གི་ཚེ་སྲོག་ཤོར་བའི་དོན་རྐྱེན་འདི་སྤྱོད་ཤེས་ན་མ་འོངས་པའི་བོད་པའི་མདུན་ལམ་དང་ཧ་ཅང་འབྲེལ་བ་དམ་ཟབ་ལྡན་ཡོད། མང་པོ་ཞིག་གི་སེམས་ལ་འདི་ནི་སྒེར་པ་ཞིག་གི་གནད་དོན་ཡིན་པས་ང་དང་ངའི་སྤུན་ཉེ་དང་འབྲེལ་བ་དེ་ཙམ་མེད་པས་ཁ་ཡ་མ་བྱས་ན་ཡག་ཤོས་རེད་བསམ་མཁན་ཡོད་ཀྱི་རེད་ལ། ཁ་སང་གི་དོན་རྐྱེན་འདི་བྱུང་དུས་བོད་པ་ཞིག་གིས་སྣང་མེད་བཏང་ཚུལ་བརྗོད་འདུག་པ་ཡང་སོ་སོ་དང་འབྲེལ་བ་མི་འདུག་སྙམ་སྟེ་མིག་གི་མཐོང་ས་རུ་ཉམས་ཆུང་གི་ཁོང་བསོད་དུ་བཅུག་པ་རེད། འདི་ནི་བློ་ཡུལ་དུ་ཤོང་དཀའ་བ་ཞིག་རེད། ལྷག་པར་དུ་ནང་པ་ཞིག་གི་ངོས་ནས་བཤད་ན་གཞན་གྱི་ཚེ་སྲོག་སྐྱོབ་གང་ཐུབ་བྱེད་དགོས་པ་ནི་བདག་ལས་གཞན་གཅེས་ཀྱི་བྱམས་སྙིང་རྗེའི་དགོངས་དོན་མཐར་ཐུག་དེ་རེད། དེར་བརྟེན་རྗེ་རིན་པོ་ཆེས། ལམ་རིམ་ནང་། ཆོས་ཐེག་པ་ཆེན་པོའི་ཆོས་ཡིན་པས་མི་ཆོག་པར་གང་ཟག་དེ་ཐེག་པ་ཆེན་པོར་ཚུད་པ་གལ་ཆེའོ་ཞེས་གསུངས་པ་ཡང་གང་ཟག་འདི་ལྟ་བུར་དགོངས་ནས་གསུངས་པ་ཞིག་རེད་ཨང་སྙམ་པ་ཞིག་ཀྱང་བྱུང་།
དོན་རྐྱེན་འདི་དང་འབྲེལ་བའི་སྐོར་ལ་དྷ་རམ་ས་ལའི་ས་གནས་མགོ་འཛིན་བསོད་ནམས་རྡོ་རྗེའི་ལགས་ཀྱིས་དུས་བབ་བཅར་འདྲིའི་ནང་འདི་ལྟར་བརྗོད་དོན། ད་ལྟ་ང་ཚོས་བརྟག་དཔྱད་བྱེད་བཞིན་ཡོད། ང་ཚོས་དེ་ཚོའི་རིགས་རྩ་བ་ཉིད་ནས་འཇོག་ཐབས་ཅེས་གསུངས་པ་བཞིན་ང་ཁོང་གི་ལྷག་བསམ་ལ་ཡིད་ཆེས་ཡོད། དེས་ན་ཁོང་དང་ཁོང་གི་ཕྱག་འབྲེལ་ཚོས་ཐུགས་འགན་ཆེ་བཞེས་ཀྱིས་ཉམ་ཆུང་ཉེས་མེད་ཀྱི་ཚེ་སྲོག་དེས་མ་འོངས་པའི་བོད་པའི་བུ་དང་བུ་མོ་གང་མང་ཞིག་གིས་ཚེ་སྲོག་དང་བདེ་འཇགས་སྲུང་སྐྱོབ་ཐུབ་བྱེད་ཀྱི་རྐྱེན་རྩར་འགྱུར་ཐུབ་རྒྱུའི་སླད་ཕུགས་རྒྱང་རིང་པོའི་ཁེ་ཕན་གྱི་སྲིད་ཇུས་འོག་ལག་དམར་པ་དེ་དག་ཁྲིམས་གཏུག་མཐིལ་ཕྱིན་གྱིས་བྱུང་ན་ལག་དམར་པའི་ཉེས་པ་ཕྱིར་བསྒྲགས་ཀྱིས་ཡུལ་མི་རྣམས་ནས་མ་གོ་མ་ཐོས་པ་མེད་པ་བྱེད་དགོས། གལ་ཏེ་དེ་ལྟར་མ་བྱས་པར་མི་སྒེར་པ་ཙམ་ཞིག་གི་ཚེ་སྲོག་ཏུ་བརྩིས་ཏེ་སྣང་མེད་དུ་བཏང་ན། དེའི་མཇུག་འབྲས་དེ་རི་ལུག་པ་ཐག་པས་མ་བསྡོམས་པ་ལྟར་བོད་མི་སྤྱི་ལ་དཀའ་ངལ་འཕྲད་རྒྱུ་ཡིན་པ་དེ་ལོངས་པས་བལྟས་ཀྱང་ཁམས་གསུམ་ཞེས་པ་ལྟར་རེད།
དེ་ཡང་དཔེ་མཚོན་གྱི་ལམ་ནས་འགའ་ཞིག་ཞུས་ན། ཕྱི་ལོ་ ༢༠༡༣ ལོར་རང་ལོ་ ༣༠ ཙམ་ལ་སླེབས་པའི་བོད་པ་ཞིག་དང་རྒྱ་གར་པ་ཞིག་ཁ་རྩོད་ཤོར་ཞིང་། སྐབས་དེར་རྒྱ་གར་པ་ལྔ་ཙམ་གྱིས་རུབ་ནས་བོད་པ་དེ་ཐོག་བརྩེགས་གསུམ་ནས་མར་གཡུགས་ཏེ་བོད་པ་དེའི་སྐེད་པ་མན་ཆད་འགུལ་སྐྱོད་མི་ཐུབ་པ་བཟོས་ཡོད། འོན་ཀྱང་སྐྱབས་བཅོལ་པ་ཞིག་གི་གནས་བབ་འོག་ཉེས་ཅན་པ་དེ་དག་ལ་གང་ཡང་བྱེད་ཐུབ་མེད། དེ་བཞིན་དུ་བོད་པའི་བུད་མེད་ཞིག་སྤྱི་སྤྱོད་རླངས་འཁོར་ནང་ཅུང་ཕྱི་བོར་ལོག་ཡོང་དུས། དྷ་ཤོད་མ་སླེབས་ཙམ་གྱི་ལམ་བར་དུ་རླངས་འཁོར་ཁ་ལོ་པ་དང་རོགས་པས་བཙན་གཡེམ་དང་ཉེས་རྡུང་བཏང་རྗེས་ལམ་ཟུར་དུ་གཡུགས་ཡོད། བུད་མེད་དེ་བདུན་ཕྲག་གཅིག་ཙམ་གྱི་རིང་བདེ་ལེགས་སྨན་ཁང་དུ་ལུས་ཡོད། ཡང་བོད་པའི་བཙུན་མ་ཚོ་ཕྱི་བོར་རླངས་འཁོར་གླས་ཏེ་དགོན་པར་ལོག་དུས་ལམ་བར་དུ་འགའ་ཞིག་ལ་བརྙས་བཅོས་དང་བཙན་གཡེམ་བཏང་བ་ཡང་ཐེངས་དུ་མར་བྱུང་ཡོད། དེ་བཞིན་ཕྱི་ལོ་ ༢༠༡༤ ལོར་བོད་པ་གསར་འབྱོར་པ་འགས་རྒྱ་གར་གྱི་ཁང་པ་གླས་ཤིང་། ཁང་གླ་སྤྲོད་དུས་ཅུང་འགོར་བར་བརྟེན་ཁང་བདག་དེས་གསར་འབྱོར་པ་དེ་ཚོའི་མགོ་ལ་ཚལ་སླང་དང་ཁོག་ལྡིར་སོགས་ཞུས་ཏེ་ཉེས་རྡུང་བཏང་ཡོད། གཞན་ཡང་མ་ན་ལི་ས་གནས་བུད་མེད་ཚོགས་པའི་ཚོགས་མི་འགའ་ཞིག་ལྡི་ལིར་འགྲོ་དུས་ལམ་བར་དུ་ཉིན་གུང་ཁ་ལག་ཟོས་ཡོད་པ་དང་། སྐབས་དེར་ཟ་ཁང་བདག་པོས་ཁ་ལག་གི་རིན་པ་ཚད་ལས་བརྒལ་བ་བླངས་པར་བརྟེན། ཁོ་ཚོས་ཁ་རྩོད་བརྒྱབ་ཡོད། འོན་ཀྱང་ཟ་ཁང་བདག་པོས་ཚོགས་མི་དེ་དག་ལ་མུར་རྫོག་དང་རྡོག་རྒྱག་སོགས་བཞུས་ཏེ་ཕྱིར་འཕུད་བྱས་ཡོད་ལ། རྗེས་སུ་ཁོ་ཚོས་ཟ་ཁང་དེའི་ནང་མི་འགྲོ་བའི་དམ་བཅའ་ཡང་འཇོག་དགོས་བྱུང་ཡོད། དེ་ལྟ་བུའི་ཡ་ང་བའི་གནས་ཚུལ་ནི་ད་དུང་མང་དུ་ཡོད་པས་རེ་རེ་བཞིན་དུ་གླེང་ནུས་བྲལ།
གང་ལྟར་འདས་པའི་དོན་རྐྱེན་འདི་དག་གི་ཉམས་མྱོང་ལས་བསླབ་བྱ་བླངས་ཏེ། འབྱུང་འགྱུར་དཀའ་ངལ་དེ་ལྟ་བུ་མུ་མཐུད་མི་འཕྲད་པའི་ཆེད་ཁ་སང་ཤོར་བའི་ཚེ་སྲོག་དེ་བོད་མི་སྤྱིའི་མ་འོངས་པའི་བདེ་ཐབས་ཀྱི་རྐྱེན་རྩར་འགྱུར་བའི་ཕྱོགས་སུ་བེད་སྤྱོད་གཏོང་ཐུབ་པ་བྱེད་དགོས། མདོར་ན། ངས་འདིར་བརྗོད་འདོད་པ་ནི་བོད་པ་ཚོས་དུས་རྒྱུན་དུ་ཡུལ་མི་དང་འབྲེལ་བ་ཇེ་ཆེར་གཏོང་དགོས་པ་ལ། ཁོ་ཚོའི་སེམས་ཁམས་ལ་ཕོག་ཐུག་འགྲོ་གཞིའི་རིགས་ཇེ་ཉུང་དུ་གཏོང་དགོས། འོན་ཀྱང་ཉེས་ཅན་པ་དེ་ཚོའི་རིགས་ལ་ནམ་ཡང་ཁྲིམས་གཏུག་གིས་གུ་ཡངས་གཏོང་ཐབས་མེད་པ་ཡང་ཤེས་དགོས་པ་ཞིག་གོ།
༢༠༡༥།༡༡།༡
བདེན་པ་འདུག
གནད་དོན་འདིས་རིགས་ལྷང་འཇགས་ངང་རྩ་བ་ཉིད་ནས་འཇོག་ཐབས་བྲལ།
དེ་བས་ང་ཚོ་བོད་པ་ཚང་མ་རྡོག་རྩ་གཅིག་སྒྲིལ་གྱིས་མི་གསོད་ལག་དམར་རྒྱ་གར་བ་དེ་ཚོར་ངོ་རྟགས་འཇོག་དགོས་ལ།
ཁོང་ཚོའི་པར་ག་ས་གང་དུ་འགྲེམས་སྤེལ་གྱིས་མི་གསོད་ལག་དམར་ཡིན་པ། རྒྱ་གར་ཁྱོན་ཡོངས་ལ་བསྒྲགས་དགོས་པ་མ་ཟད། ཁྲིམས་ཐོག་ནས་མི་གསོད་ལག་དམར་གྱི་ཉེས་ཁྲིམས་ལག་བསྟར་གང་འདྲ་བྱེད་གིན་ཡོད་མེད་ཐད། འབྲེལ་ཡོད་བོད་ཀྱི་བདེ་སྲུང་ལས་ཁུངས་དང་། རྡ་ས་ས་གནས་འགོ་འཛིན་ལས་ཁུངས་གཉིས་ནས་ཞིབ་བཤེར་ནན་ཏན་བྱེད་དགོས་སོ།