ཤེས་ཡོན་གྱི་སྟེང་ལ་གཞན་སེམས་ཅན་ཞིག་སྐྱེད་སྲིང་བྱེད་ཀྱིན་ཡོད།

གཏོང་ལེན་སློབ་གྲྭ་དབུ་བརྙས་པའི་མཛད་སྒོའི་སྟེང་ཅན་དྷི་སྒར་དུ་དྭང་བླངས་ནད་གཡོག་ཞབས་གནང་མཁན་ཚེ་རིང་སྒྲོལ་དཀར་ལགས་སུ་གཟེངས་རྟགས་ཤིག་སྤྲད་སོང་།

དེ་རིང་སྔ་དྲོའི་ཆུ་ཚོད་ ༡༠།༣༠ སྟེང་དྷ་ཤོད་གཏོང་ལེན་སློབ་གྲྭའི་མདུན་ཐང་དུ། གཏོང་ལེན་སློབ་གྲྭ་དབུ་བརྙེས་ནས་ལོ་ངོ་ ༡༡ འཁོར་བའི་དུས་དྲན་མཛད་སྒོ་ཚོགས་ཡོད་པ་དང་། སྐུ་མགྲོན་གཙོ་བོར་དཔལ་རྒྱལ་བ་ཀརྨ་མཆོག་གི་དབུས་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་དང་། དྷ་ས་ཉེ་ཁོར་གྱི་སློབ་གྲྭ་དང་དགོན་སྡེ་ཁག་གི་སྐུ་ཚབ། སྨན་ཁང་ཁང་དང་རོགས་ཚོགས་ཁག་གི་མི་སྣ། གཏོང་ལེན་སློབ་གྲྭའི་དགེ་ལས་སློབ་ཕྲུག་དང་སློབ་མའི་ཕ་མ་བཅས་ཧིན་བོད་སེར་སྐྱ་མང་ཚོགས་ ༢༠༠ ཙམ་འཛོམས་འདུག

ཐོག་མར་སློབ་ཕྲུག་ཚོས་རྒྱ་གར་གྱི་གཞས་སྣ་འཁྲབ་སྟོན་གྱིས་སྐུ་མགྲོན་རྣམས་ལ་ཕེབས་བསུ་དང་བཅས་དཔལ་རྒྱལ་བ་ཀརྨ་པ་མཆོག་གིས་གཏོང་ལེན་སློབ་གྲྭའི་སྡོད་ཁང་གསར་བ་དབུ་འབྱེད་གནང་སོང་།

གཏོང་ལེན་བདེ་རྩ་ཚོགས་པའི་འགན་འཛིན་གྲྭ་བློ་བཟང་འཇམ་དབྱངས་ལགས་ཀྱིས་གཏོང་ལེན་སློབ་གྲྭ་གསར་འཛུགས་གནང་བའི་བརྒྱུད་རིམ་དང་གྲུབ་འབྲས་ངོ་སྤྲོད་དང་འབྲེལ་ཏེ་བརྗོད་དོན། དེ་རིང་ང་ཚོའི་གཏོང་ལེན་སློབ་གྲྭ་དབུ་བརྙེས་ཏེ་ལོ་ངོ་ ༡༡ འཁོར་བའི་རྗེས་དྲན་མཛད་སྒོ་དང་བསྟུན་ཏེ། གཏོང་ལེན་སློབ་གྲྭའི་སྡོད་ཁང་གསར་བསྐྲུན་དང་སློབ་ཞུགས་སློབ་ཕྲུག་ ༡༠༠ ལྷག་དང་དགེ་རྒན་ ༤། ཤེས་ཡོན་སློབ་ཁང་དང་། ནད་གཡོག་སྦྲ་གར་སློབ་ཁང་སོགས་ཆེས་མཛེས་སྡུག་ཡིད་འོང་གི་ཁོར་ཡུག་འདི་འདྲ་ཞིག་ཚུགས་ཐུབ་པ་བྱུང་བ་རེད།

གཏོང་ལེན་སློབ་གྲྭ་འདི་ཕྱི་ལོ་ ༢༠༠༤ ལོར་གསར་འཛུགས་བྱས་པ་དང་། སྐབས་དེར་ང་ཚོས་དྷ་རམ་ས་ལའི་ཉེ་འཁོར་གྱི་རྒྱ་གར་དབུལ་གྲོང་དག་གི་ཕྲུ་གུ་ ༡༠ ཙམ་ལ་ལྟ་སྐྱོང་གིས་ཁོ་ཚོར་གཞི་རིམ་སློབ་གསོ་སྤྲད་པ་དང་། རིམ་པས་སློབ་ཕྲུག་ཚོའི་སློབ་སྦྱོང་གི་གྲུབ་འབྲས་གཡུར་དུ་ཟ་བ་སྨིན་ཏེ། ཁོ་ཚོར་འབྲང་རིམ་དང་མཐོ་རིམ་སློབ་སྦྱོང་གི་གོ་སྐབས་ཐོབ་ཡོད་པ་དེར་ང་ཚོ་དགའ་སྤོབས་སྐྱེ་བཞིན་ཡོད།

གཏོང་ལེན་སློབ་གྲྭའི་སློབ་ཕྲུག་ཚང་མ་མཐོ་སློབ་དུ་འགྲོ་བའི་སྐལ་བ་དཀའ་མོ་ཡིན་ཡང་། ང་ཚོས་གཏོང་ལེན་སློབ་གྲྭའི་སློབ་ཕྲུག་ཚང་མར་རང་ཉིད་ལ་འཚམས་པའི་ལས་རིགས་ཐོག་ཞུགས་ཐབས་ཀྱི་སྦྱོང་བརྡར་སྣ་ཚོགས་སྤྲོད་བཞིན་ཡོད་སྟབས། ཤེས་ཡོན་གཅིག་པུ་མ་ཡིན་པར་ཁོར་ཡུག་དང་འཕྲོད་བསྟེན་སོགས་ཕྱོགས་གང་ཅིའི་ཐད་ཁོང་ཚོར་ཆེས་མཛེས་སྡུག་ལྡན་པའི་མ་འོངས་མི་ཚེ་མདུན་ལམ་རེ་ཡོད་པའི་ཡིད་ཆེས་བྱེད་བཞིན་ཡོད།

དཔལ་རྒྱལ་བ་ཀརྨ་པ་མཆོག་གིས། དེ་རིང་འདིར་ལོ་ ༡༡ ཟིན་པའི་རྗེས་སུ་གཏོང་ལེན་སློབ་གྲྭའི་སློབ་མ་མང་པོ་ཞིག་མཐོ་སློབ་འགྲིམ་པའི་གོ་སྐབས་བྱུང་ཡོད་པ་དེ་ཧ་ཅང་བློ་སྤོབས་སྐྱེས་དགོས་པ་ཞིག་རེད། ང་ཚོས་སོ་སོའི་གོ་སྐབས་དམ་འཛིན་དང་བརྩོན་འགྲུས་བསྐྱེད་པ་ཡིན་ན། ང་ཚོ་ཚང་མར་གྲུབ་འབྲས་བཟང་པོ་འཐོན་པའི་རྟགས་མཚན་གསལ་བོ་འབྱུང་ངེས་ཤིག་ལ་ངོས་འཛིན་བྱེད་ཀྱི་ཡོད། དེར་བརྟེན། ཕ་མ་ཚོ་ཡིན་ན་ཡང་སོ་སོའི་ཕྲུ་གུར་སློབ་སྦྱོང་གི་གོ་སྐབས་སྤྲོད་པ་དང་སློབ་སྦྱོང་བྱེད་དུ་གཏོང་བ་དེ་ཕན་ཐོགས་ཡོད་པ་ཞིག་དང་གྲུབ་འབྲས་ཡོད་པ་ཞིག་ཏུ་ཡིད་ཆེས་བྱས་པ་རེད་བསམ་གྱི་འདུག དེ་བཞིན། སློབ་ཕྲུག་ཚོ་ཡང་གོ་སྐབས་བྱུང་ན་སོ་སོར་འཇོན་ཐང་དང་ནུས་པ་ཡོད་སྟབས། མ་འོངས་པར་ཁྱོད་རང་ཚོས་མུ་མཐུད་ནས་སློབ་ཕྲུག་ཚོར་རྒྱབ་སྐྱོར་བྱེད་པ་དང་། སློབ་ཕྲུག་ཚོའི་ངོས་ནས་ཡིན་ནའང་སེམས་ཤུགས་མི་ཆགས་པའི་རེ་བ་ཡོད། གཙོ་བོ་གཏོང་ལེན་སློབ་གྲྭའི་སློབ་ཕྲུག་ཚོ་སློབ་ཕྲུག་གཞན་པ་དང་འདྲ་མཉམ་གྱིས་འཚོ་བ་སྐྱེལ་ཐུབ་པ་ཞིག་དང་སློབ་སྦྱོང་ཡག་པོ་ཆགས་ཐབས་ཙམ་མ་ཟད། མི་བཟང་པོ་ཞིག་དང་གཞན་ལ་ཕན་ཐོགས་མཁན་ཞིག་ཡོང་ཐུབ་བྱེད་རྒྱུ་དེ་གཙོ་བོ་རེད། དེ་ནི་ང་ཚོ་ཚང་མའི་དམིགས་ཡུལ་ཡིན་སྟབས། མ་འོངས་པར་མུ་མཐུད་དེ་ཕ་མ་ཚོ་དང་སྦྱིན་བདག་རྣམ་པ། དེ་བཞིན་དགེ་རྒན་དང་ལས་བྱེད་ཚང་མས་འབད་བརྩོན་གནང་རོགས་ཞུ་རྒྱུ་ཡིན། ཞེས་གསུང་སོང་།

མཇུག་ཏུ་དཔལ་རྒྱལ་བ་ཀརྨ་པ་མཆོག་ནས་གཏོང་ལེན་སློབ་གྲྭའི་རོགས་ཚོགས་རྒྱ་གར་ཧི་མ་ཅལ་མངའ་སྡེའི་སེ་དྷ་པུར་ (Sidhpur) ས་ཆར་རྟེན་གཞི་བྱས་པའི་རྗ་གྷོ་རེ་ (Jagori)ཚོགས་པ་དང་སུད་སིར་ (Switzerland) རྟེན་གཞི་བྱས་པའི་ཧྥོན་ཊ་ན་ཐེབས་རྩ་ (Fontana Foundation) ཚོགས་པ། དེ་བཞིན། ཅན་དྷི་གྷར་ (Chandigarh) དུ་གནས་སྡོད་སྤྱི་ཚོགས་དང་བླངས་ཞབས་ཞུ་མ་ཚེ་རིང་སྒྲོལ་དཀར་ལགས་གསུམ་ལ་སྤྱི་ཚོགས་དང་བླངས་ཞབས་ཞུའི་ཆེ་བསྟོད་གཟེངས་རྟགས་སྤྲད་སོང་།

གསར་འགོད་པ། པདྨ་རྒྱལ།