དེ་རིང་སྔ་དྲོའི་ཆུ་ཚོད་ ༡༡།༡༥ ཙམ་ལ་བཞུགས་སྒར་ཁུལ་གྱི་སེར་སྐྱ་མི་མང་གི་བདུག་སྤོས་དང་ཁ་བཏགས་ཀྱི་ཕེབས་སྐྱེལ་ཁྲོད།༧གོང་ས་མཆོག་བཞུགས་སྒར་ཕོ་བྲང་ནས་ཆིབས་འཐོན་གྱིས་གྷ་གྷིལ་གནམ་ཐང་དུ་ཞབས་སོར་བཀོད་སོང་།
ཐེངས་འདིའི་༧གོང་ས་མཆོག་གི་མཛད་འཆར་རགས་ཟིན་ལྟར་ན། ཟླ་འདིའི་ཚེས་ ༨ ནས་ ༡༢ བར་རྒྱ་གར་ལྷོ་ཕྱོགས་ཀར་ནཱ་ཊ་ཀ་མངའ་སྡེའི་ཧོན་སར་རབ་རྒྱས་གླིང་གཞིས་ཁོངས་སུ་ཡོད་པའི་དཔལ་ལྡན་སྨད་རྒྱུད་གྲྭ་ཚང་དུ་མཛད་འཕྲིན་བསྐྱང་རྒྱུ་དང་། ཚེས་ ༨ གྱི་ཉིན་གུང་རྟེན་འབྲེལ་བསྟོད་པ། རྟོགས་བརྗོད་འདུན་ལེགས་མ། ལྟ་ཁྲིད་དྲན་པ་བཞི་ལྡན་བཅས་སྩལ་རྒྱུ་དང་། ཚེས་ ༩ དང་ ༡༠ ལ་གསང་བ་འདུས་པའི་དབང་སྩལ་རྒྱུ། ཚེས་ ༡༡ དང་ ༡༢ ལ་སྨད་རྒྱུད་ཁྲིད་ཆེན་བརྒྱད་བཅས་ཀྱི་གསུང་ཆོས་བསྩལ་རྒྱུ་ཡིན་འདུག
དེ་བཞིན། ཚེས་ ༡༩ ཞོགས་པ་རྒྱ་གར་ལྷོ་ཕྱོགས་ཀར་ཎ་ཀྲ་ཀ་བྷེ་ལ་ཀོབ་པེ་རུ་ཡོད་པའི་བཀྲ་ཤིས་ལྷུན་པོ་དགོན་པ་རུ་འདུ་ཁང་གསར་པ་དབུ་འབྱེད་རབ་གནས་དང་། ཉིན་རྒྱབ་སློབ་དཔོན་ཆོས་གྲགས་ཀྱིས་མཛད་པའི་ཚད་མ་རྣམ་འགྲེལ་གྱི་གསུང་ཆོས་བསྩལ་རྒྱུ་ཡིན་འདུག ཚེས་ ༢༠ ནས་ ༢༩ བར་བཀྲ་ཤིས་ལྷུན་པོ་དགོན་པ་རུ་གླིང་མཆོག་སྤྲུལ་རིན་པོ་ཆེ་དང་དགའ་ལྡན་ཤར་རྩེ་གྲྭ་ཚང་གཉིས་ནས་ཇི་ལྟར་གསོལ་བ་བཏབ་པ་ལྟར་ལམ་རིམ་འཁྲིད་ཆེན་བཅོ་བརྒྱད་ཀྱི་གསུང་ཆོས་བསྩལ་རྒྱུ། ཚེས་ ༣༠ ནས་ ༣༡ བར་ལྷོ་ཕྱོགས་བྷེལ་ཀོབ་ཏུ་ཆོས་སྡེ་ཆེན་པོ་བཀྲ་ཤིས་ལྷུན་པོར་བཀའ་གདམས་ཐིག་ལེ་བཅུ་དྲུག་གི་བཀའ་དབང་བསྩལ་རྒྱུ་ཡིན་འདུག
