རྒྱ་རིགས་གློག་བརྙན་འཁྲབ་སྟོན་པ་ཞིག་སྤྲུལ་སྐུར་ངོས་འཛིན་དང་ཁྲི་འདོན་བྱས་པའི་གླེང་ཉོག

བོད་པའི་བླ་མ་ཞིག་གི་ཡང་སྲིད་ཡིན་ཟེར་བའི་ཧོང་ཀོང་གི་རྒྱ་རིགས་ཤིག་གིས་རྒྱ་ནག་གི་གློག་བརྙན་འཁྲབ་སྟོན་པ་ཞིག་ཁྲི་འདོན་བྱས་པའི་གནས་ཚུལ་དང་པར་སོགས་དྲ་ལམ་ཁག་ཏུ་ཐོན་ཏེ། བོད་བརྒྱུད་ནང་བསྟན་རྗེས་འབྲང་བ་ཚོར་ཕོག་ཐུག་ཆེན་པོ་བཏང་ཡོད་པའི་ཐད་བོད་མིའི་སྒྲིག་འཛུགས་ཆོས་རིག་བཀའ་བློན་མཆོག་ལ་བཅར་འདྲི་ཞུས།

ཉེ་སྔོན་གསར་ལམ་ཁག་དང་སྤྱི་ཚོགས་གནས་འཕྲིན་ཁག་ཏུ། ཝུ་ཏ་རུང་ངམ་པདྨ་འོད་གསལ་ཟེར་བའི་ཧོང་ཀོང་གི་རྒྱ་མི་ཞིག་གིས། ཁོ་རང་དེ་སྔོན་བོད་པའི་རྒྱཀཿཐོག་ཆོས་བརྒྱུད་ཀྱི་བླ་སྤྲུལ་འགས་སྤྲུལ་སྐུར་ངོས་འཛིན་བྱས་ཡོད་སྐོར་གྱི་གནས་ཚུལ་དང་པར་སོགས་དྲ་ལམ་ཁག་ཏུ་ཁྱབ་བསྒྲགས་བྱས་པའི་མི་ཚད། ད་ལོའི་ཕྱི་ཟླ་ ༡༠ ཚེས་ ༤ ཉིན་ཁོ་རང་གིས་རྒྱ་ནག་གི་གློག་བརྙན་འཁྲབ་སྟོན་པ་ཀྲང་ཐའེ་ལིན་ཟེར་བ་དེ་ཡང་ཡང་སྤྲུལ་ཞིག་ལ་ངོས་འཛིན་གྱིས་ཁྲི་འདོན་མཛད་སྒོ་བསྡུས་ཏེ། མཛད་སྒོའི་ཐོག་མེས་རྒྱལ་གྱི་འཁྲུངས་སྐར་སྲུང་གཙི་བྱེད་དགོས་ལ། མེས་རྒྱལ་མེད་ན་ཁྱིམ་ཚང་ཡང་མེད་ཟེར་བ་སོགས་ཀྱི་ཆབ་སྲིད་དྲིལ་བསྒྲགས་སྣ་ཚོགས་བྱས་པ་དང་། བོད་བརྒྱུད་ནང་བསྟན་གྱི་བླ་སྤྲུལ་གསེར་ཁྲི་མངའ་གསོལ་གྱི་མཛད་སྒོའི་ཆོ་ག་དང་མི་མཐུན་པའི་བྱེད་སྒོ་ཡ་མ་བརླ་སྤེལ་བར་བརྟེན། བོད་ཕྱི་ནང་གཉིས་ཀྱི་གཙོས་འཛམ་གླིང་གི་ཡུལ་ལུང་གང་སར་ཡོད་པའི་བོད་བརྒྱུད་ནང་བསྟན་གྱི་རྗེས་འཇུག་པ་མང་པོས། བྱེད་སྟངས་དེས་བོད་བརྒྱུད་ནང་བསྟན་སྤྱི་ལ་དམའ་འབེབས་མཐོང་ཆུང་བཏང་བ་ཞིག་ཡིན་པ་མ་ཟད། ལྷག་པར་དུ་ངོ་ལོ་ ༧༠༠ ལྷག་གི་ལོ་རྒྱུས་ལྡན་པའི་བོད་པའི་ཐུན་མོང་མ་ཡིན་པའི་སྤྲུལ་སྐུའི་ལམ་ལུགས་ལ་རྡོག་རོལ་བཏང་བའི་བྱ་སྤྱོད་ཅིག་ཡིན་པ་སོགས་སྐྱོན་བརྗོད་ཤུགས་ཆེན་བྱུང་ཡོད་པ་མ་ཟད། གནས་ཚུལ་དེའི་རྒྱབ་ཏུ་རྒྱ་ནག་གཞུང་དང་རྒྱལ་ཡོངས་སྲིད་གྲོས་ཀྱི་མི་རིགས་དང་ཆོས་ལུགས་ཨུ་ཡོན་ལྷན་ཁང་གི་མགོ་ཁྲིད་ཀྲུའུ་ཝི་ཆིན་སོགས་ཡོད་པའི་དོགས་པའང་བྱེད་ཀྱིན་ཡོད།

དེ་རིང་འདི་གའི་གསར་འགོད་པས་བོད་མིའི་སྒྲིག་འཛུགས་ཆོས་རིག་བཀའ་བློན་པདྨ་ཆོས་འབྱོར་མཆོག་ལ། གོང་གི་གནས་ཚུལ་དེའི་སྐོར་མཁྱེན་རྟོགས་ཡོད་མེད་དང་། དེར་བོད་མིའི་སྒྲིག་འཛུགས་ཀྱིས་ངོས་འཛིན་གང་འདྲ་ཡོད་མེད་བཅར་འདྲི་ཞུས་པར། ཁོང་གིས། བོད་པའི་བླ་སྤྲུལ་གྱི་ཡང་སྲིད་དེ་ཚོ་ང་ཚོ་བོད་པའི་སྤྱི་ཚོགས་ནང་གནད་འགག་དང་གལ་ཆེན་པོ་ཡིན་སྟབས། རྒྱ་ནག་གཞུང་གིས་ག་དུས་ཡིན་ཡང་བེད་སྤྱོད་འདྲ་མིན་འདྲ་གཏོང་གི་ཡོད་པ་རེད། བོད་ཀྱི་བླ་སྤྲུལ་ལ་མིང་ཆད་བཟོ་ཐབས་དང་། མིན་པ་ཞིག་ཡིན་པ་དང་། ཡིན་པ་ཞིག་མིན་པ་བཟོ་ཐབས་ལ་འབད་བརྩོན་ཞེ་དྲགས་བྱེད་ཀྱི་ཡོད་སྟབས། ང་ཚོ་བོད་རིགས་ཚོས་དེ་ཚོར་དོ་སྣང་བྱེད་རྒྱུ་ཧ་ཅང་གལ་ཆེན་པོ་རེད། ༧གོང་ས་མཆོག་གི་དབུས་ཆོས་བརྒྱུད་ཁག་གི་དབུ་བླ་རྣམ་པས་འཁྲུལ་མེད་ངོས་འཛིན་གནང་བའི་ཡང་སྲིད་རྣམས་ལ་དད་པ་དང་ཡིད་ཆེས་བྱེད་དགོས་ཀྱང་། དེང་སང་ནང་ཆོས་དེ་འཛམ་གླིང་གིས་དོ་སྣང་བྱེད་ས་ཞིག་ཆགས་བསྡད་ཡོད་དུས། རྒྱ་མི་དང་ཕྱི་རྒྱལ་བ་དེ་འདྲས་ང་སྤྲུལ་སྐུ་དང་བླ་མ་ཡིན་ཟེར་ནས་མི་དང་རྒྱུ་ཐོབ་ཆེད་མི་མང་མགོ་སྐོར་གཏོང་བར་འབད་བརྩོན་བྱེད་ཀྱི་ཡོད་སྟབས། ང་ཚོས་ཐུན་མོང་མ་ཡིན་པའི་ཡང་སྲིད་ངོས་འཛིན་ཞུ་ཕྱོགས་ཀྱི་རིག་གཞུང་དེ་རྩ་ཆེན་པོ་ཡིན་པ་ངོས་ཟིན་དགོས་པ་དེ་ཧ་ཅང་གལ་ཆེན་པོ་རེད་ལ། གལ་ཆེན་པོ་ཡིན་པ་ལྟར་ང་ཚོས་དོ་དམ་དང་སྟངས་འཛིན་བྱེད་རྒྱུའང་ཤིན་ཏུ་ནས་གལ་ཆེན་པོ་རེད། ཅེས་གསུངས་སོང་།

ཁོང་གིས་མུ་མཐུད། ཉེ་སྔོན་རྒྱ་ནག་ནང་སྤྲུལ་སྐུ་ངོས་འཛིན་བྱས་པ་རེད་ཟེར་བ་དང་། རྒྱ་ནག་གཞུང་གིས་ཀྱང་བོད་པའི་སྤྲུལ་སྐུ་མང་པོ་ཞིག་ངོས་འཛིན་བྱས་ཡོད་ཟེར་བའི་གནས་ཚུལ་འདུག སྤྱིར་བཏང་སྤྲུལ་སྐུ་ཟེར་བ་དེ་རྒྱ་ནག་གཞུང་དང་། དམར་ཤོག་གི་དཔོན་རིགས་ཚོས་བསྐོ་བཞག་བྱེད་དགོས་པ་ཞིག་མ་རེད། ལས་བྱེད་ཅིག་ཡིན་ན་གཞུང་གིས་བསྐོ་བཞག་གནང་ཟེར་བ་དང་། མི་མང་གིས་འོས་འདེམས་བྱས་ཏེ་བསྐོ་བཞག་བྱེད་སྟངས་ཡོད་པ་རེད་དེ། བོད་བརྒྱུད་ནང་བསྟན་ཁྲོད་ཀྱི་སྤྲུལ་སྐུ་ངོས་འཛིན་ཞུ་ཕྱོགས་དེ་ཐུན་མོང་མ་ཡིན་པ་ཞིག་ཡོད་པ་རེད། འགྲོ་སྟངས་དེའི་ཐོག་ནས་འགྲོ་དགོས་པ་ལས་གཞུང་སྒེར་སུ་ཡིན་རུང་གང་བྱུང་མང་བྱུང་བྱེད་ཆོག་གི་མ་རེད། ཅེས་གསུངས་བྱུང་།

རྒྱ་རིགས་དེ་གཉིས་ཀྱི་བྱ་སྤྱོད་སྐོར་སྤྱི་ཚོགས་ནང་གླེང་གཞི་ཆེན་པོ་བྱུང་རྗེས། རྒྱ་ནག་དབུས་བརྙན་འཕྲིན་ཁང་གིས་བོད་བརྒྱུད་ནང་བསྟན་གྱི་བླ་མ་དང་རིན་པོ་ཆེ་སོགས་ཀྱི་ཐ་སྙད་དང་སྦྱར་ཏེ་གནས་ཚུལ་བརྒྱུད་བསྒྲགས་བྱས་པ་མ་ཟད། ཀྲུའུ་ཝི་ཆིན་གྱིས་སྤྲུལ་སྐུ་རྫུན་མའི་སྣང་ཚུལ་ས་ཁྱབ་རྡོ་ཁྱབ་ཏུ་གྱུར་ཡོད་པ་དེས་རྒྱལ་ཁབ་ཀྱི་བདེ་འཇགས་ལའང་གནོད་པ་སྐྱེལ་སྲིད་སྟབས། སྤྲུལ་སྐུ་རྫུན་མར་རྡུང་རྡེག་དང་ཁྲིམས་མཐུན་སྤྲུལ་སྐུ་ངོ་མར་མུ་མཐུད་མཐིལ་ལོན་པ་བྱེད་དགོས་པའི་བསྒྲགས་གཏམ་སྤེལ་ཡོད་པ་མ་ཟད། སྤྲུལ་སྐུ་རྫུན་མ་ཚོས་དད་ལྡན་མང་ཚོགས་ལ་མགོ་སྐོར་བཏང་ནས་རག་པའི་དངུལ་གྱིས་ཁ་བྲལ་རིང་ལུགས་ཀྱི་བྱེད་སྒོར་མཐུན་རྐྱེན་སྦྱོར་གྱི་ཡོད་སྐོར་ཡང་བརྗོད་འདུག

དེ་ཡང་རྒྱ་ནག་མི་རིགས་དང་ཆོས་ལུགས་ཨུ་ཡོན་ལྷན་ཁང་གི་མགོ་ཁྲིད་ཀྲུའུ་ཝི་ཆིན་གྱིས་རྒྱ་ནག་དབུས་བརྙན་འཕྲིན་ཁང་ལ། བསྒྱུར་བཅོས་སྒོ་འབྱེད་རྗེས་བོད་ཁུལ་དང་ནང་སའི་འབྲེལ་ལམ་ཇེ་མང་དུ་གྱུར་པ་དེ་ནི་དགའ་འོས་པའི་དོན་དངོས་ཤིག་ཡིན་མོད། མ་རུང་བ་རེ་འགས་གོ་སྐབས་འདི་བེད་སྤྱད་ནས་སྤྲུལ་སྐུར་རྫུས་ཏེ། དབུས་ཤར་ཁུལ་དུ་དད་ལྡན་པར་མགོ་སྐོར་གཏོང་བ་དང་གཅིག་ནས་རྒྱུ་དངུལ་དང་གཉིས་ནས་ཆགས་སྲེད་བསླུ་བྲིད་བྱས་པའི་གནས་ཚུལ་ཐོན་གྱི་ཡོད་ལ། ཕྱོགས་གཞན་ཞིག་ནས་སྤྲུལ་རྫུན་དག་གིས་གཞན་གྱི་ས་ནས་བསླུ་བྲིད་བྱས་ཏེ་ཐོབ་པའི་སྒོར་མོ་ཁག་ཅིག་བོད་ཁུལ་དུ་འཁྱེར་ཏེ། ཁྲིམས་འགལ་གྱི་བྱ་སྤྱོད་སྣ་ཚོགས་སྤེལ་ཞིང་ཐ་ན་མ་དངུལ་ཁག་ཅིག་ཁ་བྲལ་རིང་ལུགས་ཀྱི་བྱེད་སྒོར་རྒྱབ་སྐྱོར་བྱ་ཆེད་སྤྱོད་བཞིན་ཡོད། ཅེས་སོགས་བརྗོད་འདུག

ཡང་ཁོས་འབྲེལ་ཡོད་སྡེ་ཚན་གྱིས་བོད་ལྗོངས་དང་བོད་ཁུལ་གྱི་ས་ཆ་གཞན་པའི་ཁྲིམས་དང་མཐུན་ལ། ལོ་རྒྱུས་ཀྱི་ཁུངས་ལུང་ཡོད་པའི་སྤྲུལ་སྐུ་ངོ་མ་དག་ལ་མུ་མཐུད་དུ་མཐིལ་ལོན་སྡོམ་རྩིས་བྱས་ཏེ། དཔྱད་གཞིའི་གྲངས་མཛོད་དེ་སྤྱི་ཚོགས་ནང་གསལ་བསྒྲགས་བྱ་སྲིད་ལ། དེ་ལྟར་བྱས་ཚེ་བོད་བརྒྱུད་ནང་བསྟན་ལ་སྤྲོ་སྣང་ཡོད་པའི་མང་ཚོགས་ཚོས་སྤྲུལ་མིང་འཛིན་པ་གང་དག་ཁྲིམས་མཐུན་ཡིན་པ་འཕྲལ་མར་ཤེས་ཐུབ་པ་རེད། ཅེས་བརྗོད་འདུག

ཕྱི་ལོ་ ༢༠༠༢ ལོར་ཝུ་ཏ་རུང་དང་ཧོང་ཀོང་ལྷོ་རྒྱ་མཚོ་ཁེ་ལས་དངུལ་ཁང་གི་འགན་འཛིན་ཀྲང་ཧྲི་ཕིན་གཉིས་མཉམ་འབྲེལ་གྱིས་༼ཧོང་ཀོང་ནང་བསྟན་རིག་གནས་ཐོན་ལས་ཁང་༽ཟེར་བའི་ཚོང་གཉེར་ཁང་ཞིག་བཙུགས་ཡོད་པ་དང་། ཕྱི་ལོ་ ༢༠༠༧ ལོར་ཀྲང་ཧྲི་ཕིན་འདས་གྲོངས་སུ་ཕྱིན་རྗེས། ཝུ་ཏ་རུང་གིས་གཙོ་འགན་འཁུར་ཡོད་པ་དང་། ཕྱི་ལོ་ ༢༠༡༣ ལོར་ཨ་རིའི་ལོ་སི་ཨན་ཇི་ལི་སི་(Los Angeles)ནང་འཛམ་གླིང་ཚོང་ལས་མཉམ་འབྲེལ་ཐེབས་རྩ་(World Trade United Foundation)ཟེར་བ་ཞིག་སྒོ་འབྱེད་བྱས་ཏེ། ཝུ་ཏ་རུང་ཁོ་རང་སྤྱི་ཁྱབ་འགན་འཛིན་དང་། ལས་འཛིན་ལྷན་ཚོགས་ནང་ཁོ་རང་གི་བཟའ་ཟླ་ཝུ་ཙི་ཞིན་དང་ཕ་མ་གཉིས་སོགས་ཡོད་འདུག ཕྱི་ལོ་ ༢༠༠༦ ལོར་ཧོང་ཀོང་ནང་བསྟན་རིག་གནས་ཐོན་ལས་ཁང་གིས་༼བྱམས་བརྩེ་དང་འཆམ་མཐུན་བརྒྱུད་སྤེལ༽ཞེས་པའི་ལས་གཞིའི་འོག འཛམ་གླིང་གི་དགོན་པ་ཁག་ ༡༨༠ ལ་སྤྱི་རྒྱ་ ༦༠ ཙམ་ཡོད་པའི་གསེར་དངུལ་ལས་གྲུབ་པའི་སྟོན་པ་ཤཱཀྱ་ཐུབ་པའི་སྐུ་བརྙན་རེ་ཕུལ་ཡོད་པ་དང་། སྐབས་དེར་རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་འགན་འཛིན་ཡིན་པ་ཀྲུའུ་ཝི་ཆིན་དང་། རྒྱ་ནག་ཆོས་རིག་ལས་ཁུངས་ཀྱི་འགན་འཛིན་ཡེ་ཞོ་ཝིན་གཉིས་ལའང་རིན་པོ་ཆེ་ལས་གྲུབ་པའི་ལེགས་སྐྱེས་སྤྲད་ཡོད་འདུག

པདྨ་འོད་གསལ་རིན་པོ་ཆེ་ཟེར་བའི་ཆེད་གཉེར་དྲ་བ་སོགས་ཀྱི་ཐོག ཀཿཐོག་རྨོག་རྩ་རིན་པོ་ཆེ་དང་སྐྱབས་རྗེ་ཞིང་སྐྱོང་རིན་པོ་ཆེ་སོགས་བོད་བརྒྱུད་ནང་བསྟན་གྱི་མཁན་སྤྲུལ་ཆེན་པོ་བཞིས་པདྨ་འོད་གསལ་སྤྲུལ་སྐུར་ངོས་འཛིན་གནང་ཡོད་ལུགས་ཀྱི་ཡིག་ཆ་དང་པར་རིས་མང་པོ་བཀྲམ་པར་བརྟེན། ཟླ་འདིའི་ཕྱི་ཚེས་ ༥ ཉིན་ཀཿཐོག་དགོན་བདག་གཉེར་ཨུ་ཡོན་ལྷན་ཚོགས་ནས་གསལ་བསྒྲགས་ཤིག་སྤེལ་བའི་ནང་། “སྐྱབས་རྗེ་ཞིང་སྐྱོང་རིན་པོ་ཆེ་འཇིགས་མེད་འཕྲིན་ལས་མགོན་པོ་མཆོག་གིས་སྤྱི་ཚོགས་སྟེང་སྤྲུལ་སྐུའི་མིང་འཁུར་བཞིན་ཡོད་པའི་རྒྱ་མི་པདྨ་འོད་གསལ་ལ་སྦྱིན་བདག་ཅིག་གི་ཐོབ་ཐང་སྤྲད་པ་ལས་སྤྲུལ་སྐུར་ངོས་འཛིན་སོགས་གང་ཡང་བྱས་མེད་པ་གཟུར་གནས་བློ་ལྡན་རྣམས་ཀྱིས་རིན་པོ་ཆེ་རང་གིས་གནང་བའི་ཕྱག་བྲིས་ལས་རྟོགས་ཐུབ་པས་ལྷག་ཏུ་གསལ་བཤད་མི་དགོས། དེ་བཞིན། སྐྱབས་རྗེ་རྨོག་རྩ་རིན་པོ་ཆེ་འཇིགས་བྲལ་ཕྱོགས་ལས་རྣམ་རྒྱལ་མཆོག་གིས་ཀྱང་གཞན་གྱིས་སྤྲུལ་སྐུར་ངོས་འཛིན་བྱས་ཟིན་པའི་པདྨ་འོད་གསལ་ལ་མོས་མཐུན་ཡོད་གསུངས་པ་ཙམ་དང་། ཁོ་རང་གིས་རེ་ཞུས་ལྟར་ཞབས་བརྟན་སྨོན་ཚིག་ཞིག་བྲིས་པ་ཙམ་ལས་སྤྲུལ་སྐུ་ག་གེ་མོའི་སྐྱེ་སྤྲུལ་ཡིན་ཚུལ་གསུངས་མེད་པ་སྐྱབས་རྗེ་ཉིད་ཀྱིས་གནང་བའི་ཕྱག་བྲིས་ནང་གསལ་ལྟར་རེད། ཡིན་ནའང་། ཆོས་དད་པའི་སྤྱི་ཚོགས་ཐོག་རྒྱལ་བསྟན་ལ་ལྷག་བསམ་དཀར་བའི་གངས་ཅན་པ་དག་གིས་ཉིན་འདི་གར་དྲ་ལམ་ནས་དོ་སྣང་བྱས་དང་བྱེད་བཞིན་པའི་དོན་རྐྱེན་འདི་དག་ལ་བརྟེན་ནས། ངེད་ཀཿཐོག་དགོན་གྱིས་ཀྱང་མ་འོངས་ལུང་རྟོགས་ཀྱི་བསྟན་པ་རིན་པོ་ཆེ་འདི་འགྲོ་བའི་དཔལ་མགོན་དུ་ཡུན་གནས་ཡོང་བའི་ཆེད་དུ་དམིགས་ནས་ཐག་གཅོད་གནང་དགོས་པ་ཞིག་ལ། ཕྱི་ལོ་ ༢༠༡༠ ཟླ་ ༡༡ པའི་ནང་ཧོང་ཀོང་དུ་འཛམ་གླིང་ཞི་བདེའི་སྨོན་འདུན་གྱི་ཚོགས་འཁོར་དང་འབྲེལ་ནས་འཛམ་གླིང་ཀཿཐོག་ཆོས་བརྒྱུད་དབུ་ཁྲིད་ཚོགས་པའི་དབུ་ཁྲིད་འོག ཧོང་ཀོང་འཛམ་གླིང་ཀཿཐོག་ཆོས་བརྒྱུད་ཡན་ལག་ཚོགས་པ་དབུ་བཙུགས་ཏེ། རྒྱུན་ལས་རྒན་པ་དབོན་པོ་སྤྲུལ་སྐུ་དང་། རྒྱུན་ལས་གཞོན་པ་རྒྱ་པདྨ་འོད་གསལ་གཉིས་བསྐོ་བཞག་གནང་བ་མ་ཟད། དེར་རིན་པོ་ཆེ་ཉིད་ཀྱིས་གསུང་བཤད་གནང་དོན། ཁྱེད་ཧོང་ཀོང་ཡན་ལག་ཚོགས་པས་རྒྱལ་བསྟན་སྤྱི་དང་ཁྱད་པར་ཀཿབསྟན་དགོན་ལག་ ༧༠༠ ལྷག་ལ་ཞབས་ཞུ་ཅི་འགྲུབ་མཛད་པ་ལས་བསྟན་འགྲོ་ལ་རྨ་འབྱིན་པའི་བྱ་བ་བསྒྲུབ་མི་ཉན། གལ་སྲིད་ཀཿབསྟན་ལ་རྨ་འབྱིན་པའི་བྱ་བ་ཚབས་ཆེན་བྱུང་ན། འཛམ་གླིང་ཀཿཐོག་ཆོས་བརྒྱུད་དབུ་ཁྲིད་ལྷན་རྒྱས་ཚོགས་པས་ཐག་གཅོད་ནན་མོ་བྱ་རྒྱུ་ཡིན་ཞེས་གསུངས་པ་ལྟར། ད་སྐབས་ང་ཚོས་ཧོང་ཀོང་འཛམ་གླིང་ཀཿཐོག་ཆོས་བརྒྱུད་ཡན་ལག་ཚོགས་པ་དང་། རྒྱུན་ལས་གཞོན་པ་པདྨ་འོད་གསལ། གཞན་ཡང་ཁོ་རང་སྒེར་ནས་བཙུགས་པའི་ཀཿཐོག་རྒྱལ་སྤྱིའི་རྡོ་རྗེ་ཐེག་པའི་ལྟེ་གནས་ཟེར་བ་རྣམས་ཕྱིར་འཐེན་བྱ་རྒྱུའི་གྲོས་ཆོད་བྱུང་བ་ཡིན་པས། མ་འོངས་པའི་གནས་དུས་གང་དུ་ཡང་རྒྱ་མི་པདྨ་འོད་གསལ་ཁོས་ཀཿཐོག་དགོན་པའི་མིང་འདི་བེད་སྤྱོད་གཏོང་མི་ཆོག” ཅེས་སོགས་བཀོད་འདུག

དེ་བཞིན་ཕྱི་ཚེས་ ༦ ཉིན་ཁྲ་གླིང་དགོན་དོ་དམ་ཨུ་ཡོན་ལྷན་ཁང་ནས་གསལ་བསྒྲགས་ཤིག་སྤེལ་བའི་ནང་། “རྒྱ་མི་ཝུ་ཏ་རུང་འདི་སྤྱིར་ཁྲ་གླིང་དགོན་པའི་བླ་སྤྲུལ་སུས་ཀྱང་སྤྲུལ་སྐུ་ཡིན་ཞེས་ངོས་འཛིན་མེད་པ་དང་། བྱེ་བྲག་ཏུ་མཚན་བརྗོད་པར་དཀའ་བ་དོན་གྱི་སླད་དུ་མཚན་ནས་སྨོས་ན་༧མཁན་ཆེན་ཡེ་ཤེས་དཔལ་བཟང་ངམ་དད་པའི་རྟེན་ལགས་ཀྱིས་སྐུ་ཚེ་གང་བོར་མི་སུ་ལའང་སྤྲུལ་སྐུའི་མཚན་གནང་མྱོང་མེད་པར་མ་ཟད། བྱེ་བྲག་ཏུ་ཝུ་ཏ་རུང་ལ་སྤྲུལ་སྐུའི་མཚན་གནང་མྱོང་མེད་པ་ཆོས་དད་མང་ཚོགས་ཀུན་གྱིས་ཐུགས་ལ་འཇགས་པར་འཚལ།” ཞེས་བཀོད་འདུག

བརྒྱུད་ལམ་ཁག་ཏུ་བཀྲམ་པའི་ཝུ་ཏ་རུང་ངམ་པདྨ་འོད་གསལ་གྱི་ལོ་རྒྱུས་ནང་། ཁོ་ཕྱི་ལོ་ ༡༩༧༦ ལོར་རྒྱ་ནག་ཧྥོ་ཅན་ཞིང་ཆེན་ཆན་ཀྲུའུ་གྲོང་ཁྱེར་དུ་སྐྱེས་ཤིང་། ལོ་ ༨ ཙམ་ལ་སོན་སྐབས་ཕ་མ་གཉིས་ཀྱིས་ཁྲིད་དེ་ཧོང་ཀོང་དུ་གནས་སྤོར་བྱས་ཡོད་པ་དང་། རང་ལོ་ ༡༩ ཐོག་སློབ་ཆེན་ནས་མཐར་ཕྱིན་ཏེ་རྒྱལ་གཅེས་ལས་འགུལ་མང་པོའི་ནང་མཉམ་ཞུགས་བྱས་ཡོད་པ་མ་ཟད། རྒྱ་ནག་རྒྱལ་ཡོངས་ཕྱི་སྡོད་རང་མི་མཉམ་འབྲེལ་མཐུན་ཚོགས་ཀྱི་ཚོགས་གཙོ་གཞོན་པ་དང་རྒྱལ་ཡོངས་སྲིད་གྲོས་ཀྱི་རྒྱུན་ལས་སོགས་བྱས་ཡོད་འདུག ཁོ་རང་ལོ་ ༢༨ ཡིན་སྐབས་རྒྱ་ནག་གི་སྲིད་གྲོས་རྒྱུན་ལས་ཟུར་པ་དང་ཧོང་ཀོང་ལྷོ་རྒྱ་མཚོ་ཁེ་ལས་དངུལ་ཁང་གི་སྦྱིན་བདག་ཀྲང་ཧྲི་ཕིན་ཟེར་བ་དང་ངོ་ཤེས་སུ་གྱུར་ཏེ། རྙོག་ཟིང་ཆེ་བའི་སྤྱི་ཚོགས་ཀྱི་སྣང་བརྙན་ལ་སུན་འབྱིན་པའི་གླེང་མོལ་མང་དུ་བྱས་རྗེས། འཁོར་བ་ལ་ངེས་འབྱུང་སྐྱེས་ཏེ་ཁོ་རང་གི་ཁང་པ་དང་རྒྱུ་ནོར་རྣམས་བཙོང་སྟེ་དངུལ་རྣམས་ནང་བསྟན་རིག་གནས་ཀྱི་བྱ་གཞག་ཐོག་བཏང་བར་བརྟེན། ཁོ་རང་གི་བཟའ་ཟླ་ཕུད་ཁྱིམ་མི་གཉེན་འབྲེལ་ཚོས་ཁོའི་བྱེད་སྟངས་དེར་མོས་མཐུན་བྱས་མེད་པ་དང་། ཕྱི་ལོ་ ༡༩༩༧ ལོར་ཁོ་རང་གཅིག་པུ་རྒྱ་ནག་རི་བོའི་རྩེ་ལྔར་སོང་ནས་དངོས་སུ་ཆོས་སྒོར་ཞུགས་ཚུལ་སོགས་བཀོད་འདུག

ད་དུང་ཁོའི་ལོ་རྒྱུས་ནང་། ཕྱིས་སུ་ཁོ་རང་གིས་བོད་ཁུལ་གྱི་མཁན་པོ་དང་བླ་སྤྲུལ་གང་མང་གི་མདུན་ནས་ཆོས་དང་བཀའ་དབང་ཞུས་ཡོད་པ་མ་ཟད། ཕྱི་ལོ་ ༢༠༠༧ ལོར་ཁྲ་གླིང་དགོན་པད་མ་བློ་གྲོས་རིན་པོ་ཆེ་མཆོག་གིས་ཁོང་གི་ཚ་བོ་གླིང་བླ་མ་ཚུལ་ཁྲིམས་རྡོ་རྗེ་མཆོག་གི་ཡང་སྲིད་དུ་ངོས་འཛིན་གནང་སྟེ་ཁྲི་འདོན་གནང་ཡོད་ཚུལ་དང་། ཕྱི་ལོ་ ༢༠༠༩ ལོའི་ལོ་མཇུག་ཏུ་ཀཿཐོག་རྨོག་རྩ་རིན་པོ་ཆེ་མཆོག་གིས་ཝུ་ཏ་རུང་བླ་མའི་ཡང་སྲིད་ཅིག་ཡིན་པའི་དཔང་ཡིག་དངོས་སུ་གནང་ཡོད་པ་མ་ཟད། ཆོས་ཀྱི་གཞུང་ཆེན་པོར་སྦྱངས་བ་མཐར་ཕྱིན་པའི་པཎྚི་ཏའི་དབུ་ཞྭ་ཞིག་ཀྱང་གནང་ཡོད་ཚུལ་སོགས་བསྒྲགས་ཡོད་འདུག

གནས་ཚུལ་འདིའི་ཐད་གསར་འགོད་པ་ཚོས་ཝུ་ཏ་རུང་ལ་དངོས་སུ་བཅར་འདྲི་བྱེད་པའི་ཆུ་ཚོད་ཐེངས་གཉིས་ལ་བཟོས་ཡོད་ཀྱང་དང་ལེན་བྱས་མེད་པ་མ་ཟད། ཁོ་རང་གིས་ལྐོག་ནས་གསར་འགྱུར་ལས་རིགས་གཉེར་མཁན་ཞིག་ལ་འབྲེལ་བ་བྱས་ཏེ། ཁོ་ལ་སྲིད་གཞུང་གི་རྒྱབ་རྩ་བརྟན་པོ་དང་ཤུགས་ཆེན་པོ་ཡོད་པས། གནས་ཚུལ་ངོ་མ་རེ་སྤེལ་ཐུབ་པའི་རེ་བ་ཡོད་སྐོར་བརྗོད་ཡོད་འདུག

ཕྱི་ཟླ་ ༡༡ ཚེས་ ༢༩ ཉིན་གློག་བརྙན་འཁྲབ་སྟོན་པ་ཀྲང་ཐའེ་ལིན་གྱིས་གསལ་བཤད་ཅིག་སྤེལ་ཏེ། ཁོ་རང་འདི་ལོའི་ཕྱི་ཟླ་ ༡༠ ཚེས་ ༤ ཉིན་ཧོང་ཀོང་དུ་རྒྱལ་སྟོན་དུས་ཆེན་ ༦༦ པའི་པདྨ་འོད་གསལ་གྱི་སྨོན་ལམ་ཆེན་མོའི་ཐོག་མཉམ་ཞུགས་བྱས་ཡོད་པ་དང་། མཛད་སྒོའི་ཐོག་པདྨ་འོད་གསལ་གྱིས་ཁོ་ལ་པདྨ་ཆོས་འཕེལ་ཞེས་པའི་ཆོས་མིང་བཏགས་ཤིང་། དབུ་ཞྭ་དང་ཆོས་གོས་གཡོགས་པའི་མཛད་སྒོ་ཙམ་མ་གཏོགས་ཁྲི་འདོན་གྱི་མཛད་སྒོ་མིན་སྐོར་བརྗོད་ཡོད་པ་མ་ཟད། གནས་ཚུལ་སྤེལ་མཁན་གྱི་གསར་ཁང་དང་དྲ་རྒྱ་སྤྱོད་མཁན་ཚོས་དེའི་སྐོར་གྱི་གནས་ཚུལ་འཁྱོགས་བཤད་མཚམས་འཇོག་མ་བྱས་ན་ཁྲིམས་གཏུག་རྒྱག་རྒྱུ་ཡིན་སྐོར་བརྗོད་འདུག

༧ཀུན་གཟིགས་པན་ཆེན་རིན་པོ་ཆེའི་སྲས་མོ་རིག་འཛིན་དབང་མོ་མཆོག་གི་མཚན་ཐོག་ནས་ཐེངས་འདིའི་གནད་དོན་སྐོར་གྱི་གསལ་བསྒྲགས་ཤིག་བརྒྱུད་ལམ་དུ་སྤེལ་བའི་ནང་། གཞུང་ཕྱོགས་ཀྱི་གསར་འགོད་པ་དང་ཆབས་ཅིག་ཏུ་བོད་བརྒྱུད་ནང་བསྟན་གྱི་བླ་ཆེན་མང་པོ་དང་། དེ་བཞིན། ཀཿཐོག་དགོན་པའི་རྨོག་རྩ་རིན་པོ་ཆེ་རང་ཉིད་ཀྱིས་གསལ་བསྒྲགས་བྱས་པ་འདིས། ཁོ་མོས་བསམ་ན་ཉེ་ཆར་ཆོས་རྗེ་རྫུན་མའི་ཐད་ཀྱི་བཞད་གད་སློང་བའི་དོན་དག་མཇུག་སྒྲིལ་ཚར་བ་དང་། མ་ཟད་རྗེས་སུ་སླར་ཡང་འདི་ལ་དོན་མེད་ཀྱི་རྩོད་པ་བྱེད་དགོས་དོན་ཡོད་མ་རེད་བསམ་འདུག གལ་སྲིད་ “ཝུ་དཱ་རང་”ཁོ་རང་དང་། དེ་བཞིན་དུ་ངོ་སྤྲོད་བྱེད་པའི་སྒྲིག་གཞི་ལ་དོན་དངོས་དང་མཐུན་ས་ཞིག་ཡོད་ན། ང་ནང་པའི་སློབ་མ་གཅིག་ཡིན་པའི་ཆ་ནས་བཤད་ན། ཁོས་དྲང་བདེན་གྱི་བྱེད་ཐབས་བརྒྱུད་དེ་སྤྱི་ཕན་གྱི་ལས་དོན་ལ་ནུས་པ་འདོན་པ་དང་། ཁོའི་རྗེས་སུ་འབྲང་བའི་མི་དེ་ཚོ་དང་སྤྱི་ཚོགས་ཡོངས་ལ་དྲིན་ལན་འཇལ་བའི་རེ་བ་ཡོད། ང་བོད་མི་གཅིག་ཡིན་པའི་ཆ་ནས་བཤད་ན། སྤྱི་ཚོགས་ལས་རིགས་ཁག་གིས་ང་ཚོ་ལ་སེམས་ཁུར་གནང་བར་དཀའ་དྲིན་ཆེ་ཞུ་བ་དང་། ཚང་མས་ཚད་ལྡན་གྱི་ཐབས་ལམ་བརྒྱུད་དེ་བོད་ཀྱི་རིག་གནས་དར་སྤེལ་གཏོང་བ་ལ་མུ་མཐུད་ནས་རྒྱབ་སྐྱོར་བྱེད་པའི་རེ་བ་ཡོད། དུས་འདིར། སྐུ་ཚེ་གང་བོ་ང་ཚོའི་དད་ཡུལ་ནང་བསྟན་སྲུང་སྐྱོབ་ཀྱི་ཆེད་དུ་གཏོང་གནང་བའི་ཕ་ལགས་དང་ཆོས་རྗེ་འཇིགས་མེད་ཕུན་ཚོགས་གཉིས་ཤིན་ཏུ་དྲན་བྱུང་། ཞེས་གསུངས་འདུག

གསར་འགོད་པ། པདྨ་མཚོ།