དེང་སྐབས་བོད་ནས་རྒྱ་གར་ལ་སྐྱབས་བཅོལ་དུ་ཡོང་མཁན་ཇེ་ཉུང་དུ་ཕྱིན་པའི་རྒྱུ་མཚན་གཅིག་ས་མཚམས་ཁག་དམ་དྲག་བྱས་པ་དང་ས་མཚམས་ཀྱི་བོད་པའི་གྲོང་ཚོ་ཁག་ལ་གསང་ཉུལ་བ་མང་པོ་འགྲེམས་འཇོག་བྱས་པའི་རྐྱེན་གྱིས་ཐར་གྱི་ཡོད་པ་མ་རེད་ཟེར།
ཉེ་བའི་ལོ་འགའི་རིང་བོད་ནས་རྒྱ་གར་ལ་སྐྱབས་བཅོལ་དུ་ཡོང་མཁན་མངོན་གསལ་གྱིས་ཇེ་ཉུང་དུ་ཕྱིན་ཡོད། སྔོན་ཆད་ལོ་རེར་བལ་ཡུལ་སྣེ་ལེན་ཁང་བརྒྱུད་ནས་སྐྱབས་བཅོལ་དུ་ཡོང་མཁན་བོད་མི་ ༣༠༠༠ ནས་ ༤༠༠༠ བར་ཡོད་ཀྱང་ན་ནིང་དང་ད་ལོར་མི་བརྒྱ་སྐོར་རེ་ལས་བྱུང་མེད་སྟབས། བལ་ཡུལ་སྣེ་ལེན་ཁང་དང་དྷ་རམ་ས་ལའི་དབུས་སྣེ་ལེན་ཁང་གི་ལས་བྱེད་མང་པོ་ཞིག་ལས་མེད་ཆགས་བཞིན་ཡོད་པ་དང་། རྒྱ་གར་ནང་གི་དགོན་སྡེ་ཁག་གི་གྲྭ་བ་དང་སློབ་གྲྭ་ཁག་གི་སློབ་ཕྲུག་ཀྱང་ཇེ་ཉུང་དུ་འགྲོ་བཞིན་ཡོད།
སྔར་ལོའི་ལོ་མཇུག་ལ་བོད་མིའི་སྒྲིག་འཛུགས་བཀའ་ཤག་གིས་ ༢༠༡༥ ལོའི་ཕྱི་ཟླ་ ༡༢ པའི་མཇུག་ལ་གནས་མཆོག་རྡོ་རྗེ་གནད་དུ་དཔལ་དུས་ཀྱི་འཁོར་ལོའི་དབང་ཆེན་ཡོད་ཚུལ་ཁྱབ་བསྒྲགས་བྱས་ཡོད་སྟབས། བོད་མདོ་དབུས་ཁམས་གསུམ་གྱི་བོད་མི་མང་པོ་ཞིག་གིས་ཐབས་ལམ་སྣ་ཚོགས་འོག་རྒྱ་ནག་གཞུང་ལ་ཕྱི་སྐྱོད་ལག་འཁྱེར་ཞུས་ཏེ། དུས་འཁོར་དབང་ཆེན་ཞུ་རྒྱུར་གྲ་སྒྲིག་བྱས་ཡོད་ཀྱང་། ཉེ་ལམ་གློ་བུར་དུ་བཀའ་ཤག་གིས་དུས་དབང་ཕྱིར་འཐེན་བྱས་སྐོར་གསལ་བསྒྲགས་བྱས་རྗེས། བོད་ནང་གི་བོད་མི་མང་པོ་ཞིག་གི་འཆར་གཞི་འཁྲུག་ཡོད་པ་མ་ཟད། དད་འདུན་གྱིས་རེ་སྒུག་བྱས་ཡོད་པའི་རྒན་འཁོགས་མང་པོ་ཞིག་ལ་བློ་ཕམ་ཡང་བྱུང་ཡོད།
ཡིན་ནའང་དུས་འཁོར་དབང་ཆེན་ལ་འགྲོ་བར་གྲ་སྒྲིག་བྱས་ཡོད་མཁན་མང་པོ་ཞིག་གིས་དུས་འཁོར་དབང་ཆེན་ཞུ་སྐལ་མ་བྱུང་ཡང་། རྒྱ་ནག་གི་ཕྱི་སྐྱོད་ལག་འཁྱེར་རག་པའི་གོ་སྐབས་དང་བསྟུན་ཏེ་༧གོང་ས་མཆོག་ལ་མཇལ་ཁ་དང་རྒྱ་གར་གནས་ཆེན་ཁག་ལ་མཆོད་མཇལ་གྱི་གོ་སྐབས་ལེན་ཆེད། ཉེ་ལམ་ཕྱི་ཟླ་ ༡༡ པ་ཡས་མས་ནས་བཟུང་བོད་ནང་གི་རྒན་རྒོན་མང་པོ་ཞིག་རྒྱ་གར་ནང་ཡོང་བཞིན་འདུག་ལ། བཞུགས་སྒར་དྷ་རམ་ས་ལ་ཁུལ་དུའང་བོད་ལཱ་སྤུས་གཙང་གྱོན་ཞིང་ལག་ཏུ་ཁ་བཏགས་དང་མཆོད་རྫས། རྟེན་སྐལ་སོགས་ཐོག་པའི་པའི་རྒན་རྒོན་མང་པོ་ཞིག་འཚང་ཁ་ཤིག་ཤིག་གིས་མཆོད་མཇལ་དང་། རྒྱ་གར་ལྷོ་ཕྱོགས་ལ་༧གོང་ས་མཆོག་གི་གསུང་ཆོས་ཞུ་བར་བཅར་རྒྱུར་བྲེལ་བཞིན་འདུག
གོ་སྐབས་དེ་དང་བསྟུན་ཏེ་འདི་གའི་གསར་འགོད་པས་དབུས་སྣེ་ལེན་ཁང་དུ་བོད་ནས་ཕེབས་མཁན་མི་ ༡༡ ཡོད་པའི་ཁྲོད་ནས་ཕ་ཡུལ་བསྟོད་དིང་རི་ནས་ཡིན་པའི་XXXXལགས་དང་གླེང་མོལ་བྱས་པ་ཡིན། ངེད་གཉིས་ཀྱིས་ཐོག་མར་དིང་རི་ཕྱོགས་ཀྱི་ད་ལྟའི་དཔལ་འབྱོར་གནས་སྟངས་སྐོར་ནས་གླེང་སྐབས། ཁོས་གསར་འགོད་པར་འདི་ལྟར་ངོ་སྤྲོད་གནང་བྱུང་། དིང་རི་ཕྱོགས་སྔོན་ཆད་དང་བསྡུར་ན་དཔལ་འབྱོར་ཡར་རྒྱས་ཆེན་པོ་ཕྱིན་ཡོད་པ་རེད། དེ་ཇི་ལྟར་བྱུང་བ་རེད་ཟེར་ན། སྔོན་མ་རྒྱ་ནག་གིས་རོགས་པ་ཞེ་དྲགས་བྱེད་ཀྱི་ཡོད་པ་མ་རེད། ༢༠༠༨ ལོར་ངོ་རྒོལ་བྱས་པ་ནས་བཟུང་སྲིད་གཞུང་གིས་དབུལ་པོ་ཚོར་དངུལ་སྤྲོད་པ་དང་། ཁང་པ་གསར་རྒྱག་བྱེད་པ་སོགས་དངོས་གནས་དྲང་གནས་རོགས་པ་མང་པོ་བྱེད་ཀྱིན་འདུག ང་རང་གི་བསམ་པར་ ༢༠༠༨ ལོ་ནས་བཟུང་བོད་པ་ཚོས་ནང་ཁུལ་ནས་ཕན་ཚུན་ལ་རོགས་པ་བྱེད་རྒྱུ་རེད་བསམ་ནས་གཞུང་གིས་དངུལ་གཏོང་མགོ་བཙུགས་སོང་བསམ་གྱི་ཡོད། གང་ཡིན་ཟེར་ན། སྔོན་ཆད་ཁྱིམ་ནང་རྩམ་པ་ཟ་རྒྱུ་མེད་མཁན་ཚོར་དངུལ་ཕྲན་བུ་རེ་སྤྲོད་ཀྱི་ཡོད་པ་རེད་མ་གཏོགས་དེ་འདྲའི་དངུལ་འབལ་འབལ་ལྷུག་ལྷུག་སྤྲོད་མཁན་ཡོད་པ་མ་རེད། ཅེས་བརྗོད་བྱུང་།
ཁོ་ལ་སྔོན་ཆད་བསྟོད་དིང་རི་བརྒྱུད་ནས་རྒྱ་གར་ལ་ཡོང་མཁན་མང་པོ་ཡོད་ཀྱང་ཉེ་བའི་ལོ་ཤས་གོང་ནས་རྦད་དེ་ཉུང་དུ་ཕྱིན་ཡོད། ཁྱོད་རང་ས་མཚམས་ཁུལ་དུ་རྒྱུས་ཡོད་སྟབས་ད་ལྟ་ས་མཚམས་ཀྱི་གནས་སྟངས་གང་འདྲ་འདུག་ཅེས་དྲིས་པར། ཉིས་སྟོང་བརྒྱད་ནས་བཟུང་ས་མཚམས་ཁག་དམ་དྲག་ཤུགས་ཆེ་རུ་བཏང་ཡོད་པ་རེད། དེང་སྐབས་དིང་རི་ས་ཁུལ་གྱི་གྲོང་ཚོ་རེ་རེའི་ནང་རྒྱ་ནག་གཞུང་གི་གསང་ཉུལ་བ་མི་ ༥ རེ་བཞག་ཡོད་པ་རེད། དེ་ཧ་ལམ་དིང་རི་རྫོང་འོག་གི་གྲོང་ཚོ་ཚང་མའི་ནང་ཡོད་པ་རེད། རྒྱ་གར་ལ་འགྲོ་མཁན་ཚོ་ཐར་ཐུབ་པ་ཁག་པོ་ཞེ་དྲགས་རེད། མཐའ་མཚམས་སྲུང་མཁན་གྱི་དམག་མི་ལས་གྲོང་ཚོ་ཁག་གི་གསང་ཉུལ་བ་དེ་ཚོ་འཇོན་པ་ཡོད་པ་རེད། གལ་སྲིད་ཁོ་ཚོས་མི་གཅིག་བཟུང་པ་ཡིན་ན་རྒྱ་ནག་གིས་དངུལ་གྱི་བྱ་དགའ་སྤྲོད་ཀྱི་ཡོད་པ་རེད། དམག་སྒར་གཅིག་གཉིས་ཡིན་ན་ཐར་ཐུབ་པའི་རེ་བ་ཡོད་པ་རེད། གྲོང་པ་ཚང་མའི་ནང་གསང་ཉུལ་བ་བཞག་ཡོད་སྟབས་རྐང་པ་བརྒྱབ་ནས་ཕྱིན་ན་ཐར་ཐབས་ཁག་པོ་རེད། སྤྱིར་བཏང་སྔོན་མ་ནས་གསང་ཉུལ་བ་ཡོད་ཀྱང་། ༢༠༡༡ ལོ་ནས་གྲོང་ཚོ་ཁག་ཡོངས་རྫོགས་ནང་ཆེད་དུ་རྩ་འཛུགས་བྱས་སོང་། གལ་སྲིད་མི་ཞིག་གིས་རྒྱ་གར་ལ་འགྲོ་མཁན་དོགས་ཡོད་གཅིག་མཐོང་ཐོས་བྱུང་ན། ལུང་པ་དེའི་གསང་མྱལ་བ་ཚང་མས་མཉམ་རུབ་ཀྱིས་མི་དེ་བཙལ་གྱི་ཡོད་པ་རེད། གལ་སྲིད་ཁོ་ཚོས་མི་དེ་རྙེད་སོང་ན་རྒྱ་ནག་གཞུང་གིས་ཁོ་རང་ཚོར་དངུལ་ཕོན་ཆེན་པོ་སྤྲོད་ཀྱི་ཡོད་པ་རེད། ང་རང་ས་གནས་རང་གི་མི་ཡིན་ནའང་ད་ཐེངས་རྒྱ་གར་ལ་ཡོང་སྐབས་ཉིན་གྲངས་ ༡༣ ལ་རྐང་པ་བརྒྱབ་ནས་ཡོང་བ་ཡིན། ཅེས་བརྗོད་སོང་།
ཁོ་རང་རྒྱ་གར་ལ་ཡོང་རྒྱུ་ཇི་ལྟར་དྲན་པའི་སྐོར་དྲིས་པར་ཁོས། ཐེངས་འདིར་ང་རྒྱ་གར་ལ་མི་འགྲོ་ཐབས་མེད་ཆགས་སོང་། སྤྱིར་བཏང་ང་རྒྱ་གར་ལ་སྔོན་མ་ནས་འགྲོ་དགོས་དྲན་ཡོད། སྔོན་མ་དུས་འཁོར་དབང་ཆེན་སྐབས་ངའི་རོགས་པ་གཅིག་ཤར་གངས་ལ་བརྒྱུད་ནས་ཕྱིན་པ་རེད། རྗེས་སུ་ཁོ་ཕྱིར་ནང་མི་ཚོར་ཐུག་ཏུ་ཡོང་སྐབས་ང་ཁོ་དང་མཉམ་དུ་འགྲོ་དགོས་བསམ་ཡོད་ཀྱང་། ཁོ་རང་རྒྱ་གཞུང་གིས་འཛིན་བཟུང་བྱས་ཏེ་ཉེས་རྡུང་མང་པོ་བཏང་མཐར་ཕྱིར་རྒྱ་གར་ལ་བཏང་འདུག ད་ལྟ་ཁོ་ཆབ་སྲིད་བཙོན་པ་བྱས་ནས་ལྡི་ལི་ན་ལས་ཀ་བྱེད་ཀྱིན་འདུག ཅེས་དང་། ཁོས་མུ་མཐུད་དུ་རྒྱ་ནག་གི་ལས་བྱེད་དེ་ཚོས་ལྐོག་ཟ་རུལ་སུངས་བྱེད་ཀྱི་ཡོད་པའི་སྐོར་བརྗོད་དོན། ད་ལྟ་རྒྱ་ནག་གཞུང་གིས་རུལ་སུངས་ལ་ངོ་རྒོལ་བྱེད་ཀྱི་ཡོད་པ་རེད་ཟེར་བ་དེ་རྫུན་མ་རྫུན་རྐྱང་རེད། དེའི་སྐོར་ང་ལ་མང་པོ་བཤད་རྒྱུ་ཡོད། ངེད་ཚང་དང་ངེད་ཚང་གི་ཁྱིམ་མཚེས་གཉིས་ཁ་མཆུར་ཐུག་སྟེ། རྒྱ་ནག་གཞུང་གི་ལས་ཁུངས་དེ་ཚོས་ལྐོག་རྔན་ཧ་ཅང་ཕོན་ཆེན་པོ་ཟོས་ཡོད་པ་ངས་ཤེས་ཀྱི་ཡོད། གང་ཡིན་ཟེར་ན། ང་ཚོའི་ཁྱིམ་ཚང་གཉིས་ཀྱིས་ཁང་པའི་ས་ཆ་ཕན་ཚུན་བརྗེ་བོ་རྒྱག་པའི་གནས་ཚུལ་ཞིག་གི་ཐོག་ནས་ཁ་མཆུར་ཐུག་པ་རེད། ཁོ་ཚང་རྒྱུ་དང་ངོ་ཆེན་པོ་ཡོད་པ་རེད། སྔོན་མ་བལ་ཡུལ་ནང་ཚོང་བརྒྱབ་པ་དང་དེང་སང་ལྷ་སར་ཚོང་རྒྱག་གི་ཡོད་པ་རེད། ཁོ་ཚང་གིས་ང་ཚོའི་ཞཱིང་དང་དིང་རི་རྫོང་། གཞིས་ཀ་རྩེ་ཁུལ་བཅས་ལ་དངུལ་ཧ་ཅང་ཕོན་ཆེན་པོ་ལྐོག་རྔན་སྤྲད་དེ། ང་རང་ནག་པོ་ནག་རྐྱང་བཟོས་པ་མ་ཟད་མི་ཚེ་གང་བོར་གཉེན་སྒྲིག་ཀྱང་བྱས་མི་ཆོག་པ་བཟོས་པ་རེད། མཐའ་ན་ད་ལོའི་ཕྱི་ཟླ་ ༩ བའི་ཚེས་ ༡༥ ཉིན་མི་གཞན་ལ་དངུལ་སྤྲད་ནས་ང་གསོད་རྩིས་བྱས་པ་སོགས་ངས་ཤེས་ཀྱི་ཡོད། དཀའ་ངལ་དེ་འདྲ་ཞིག་གི་འོག་ནས་ང་རྒྱ་གར་ལ་ཡོང་དགོས་བྱུང་སོང་། གནས་ཚུལ་དེ་ཆ་ཚང་ངས་བདེ་སྲུང་ལས་ཁུངས་ལའང་ཞུས་ཡོད། ཅེས་བརྗོད་བྱུང་།
གཞན། ཕ་ཡུལ་ཨ་མདོ་རྔ་པ་ནས་ཡིན་པའི་བུ་མོ་ཞིག་གིས་ཉིས་སྟོང་བརྒྱད་ནས་བཟུང་རྔ་པ་ས་ཁུལ་དུ་རྒྱ་གཞུང་གིས་དམ་དྲག་ཆེན་པོ་བྱེད་ཀྱི་ཡོད་པ་དང་། ལྷག་པར་དུ་ཕྱི་སྐྱོད་ལག་འཁྱེར་རག་གི་མེད་པའི་དཀའ་ངལ་འཕྲད་བཞིན་ཡོད་པ། ཁ་ཤས་ཀྱིས་སྒྲུང་རྫུན་མ་བཟོས་ཏེ་དངུལ་ཕོན་ཆེན་པོ་སྤྲད་དེ་རྒྱ་གར་ལ་གནས་མཇལ་དུ་ཡོང་ཐབས་བྱེད་ཀྱི་ཡོད་སྐོར་བརྗོད་སོང་ལ། ༢༠༠༨ ལོའི་ཞི་བའི་ངོ་རྒོལ་ནང་ཞུགས་མཁན་ཚང་མ་རྒྱ་ནག་གཞུང་གིས་ ‘མིང་ཐོ་ནག་པོ’ ཟེར་བའི་ནང་བཞག་སྟེ། སྤྱི་ཚོགས་ཀྱི་ཐོབ་ཐང་མང་པོ་ཞིག་འགོག་གི་ཡོད་པ་མ་ཟད། ཁོ་རང་ཚོའི་ཤ་ཉེ་སྤུན་མཆེད་ཡོངས་རྫོགས་ལ་དཀའ་ངལ་སྣ་ཚོགས་སྤྲོད་ཀྱི་ཡོད་སྐོར་སོགས་ངོ་སྤྲོད་གནང་སོང་།
གསར་འགོད་པ། འཇིགས་མེད་རྒྱ་མཚོ།
ང་ལ་བསྟོད་མངའ་རི་དང་ཏིང་རི་ཕྱོགས་ཀྱི་གསང་ཉུལ་བ་ཚོའི་སྐོར་གྱི་སྒྲུང་སྙན་པོ་ཞིག་བཤད་རྒྱུ་ཡོད།