ང་ཚོས་ནང་ཆོས་སྤུས་དག་པོ་ཞིག་ཡོང་ཐུབ་ལ་འབད་བརྩོན་བྱེད་ཀྱིན་ཡོད།

དེང་སྐབས་ཕྱི་རྒྱལ་མི་རིགས་ཁྲོད་བོད་ཡིག་བོད་སྐད་ལ་དོ་སྣང་བྱེད་མཁན་མང་དུ་འགྲོ་བཞིན་ཡོད་པ་དང་། ཨ་རི་དང་ཡུ་རོབ་ནང་གི་སློབ་ཆེན་མང་པོ་ཞིག་ཏུའང་བོད་ཡིག་བོད་སྐད་སློབ་ཁྲིད་བྱེད་ཀྱིན་ཡོད་འདུག བོད་ནང་དང་བཙན་བྱོལ་སྤྱི་ཚོགས་ནང་གི་ཤེས་ཡོན་སྡེ་ཚན་ཁག་ཏུ་ཕྱི་རྒྱལ་མི་རིགས་བོད་ཡིག་བོད་སྐད་སྦྱོང་མཁན་དང་། ལྷག་པར་དུ་ནང་ཆོས་སློབ་གཉེར་བྱེད་མཁན་ལོ་རེ་བཞིན་ཇེ་མང་དུ་འགྲོ་བཞིན་ཡོད་ཅིང་། དེའི་ཁྲོད་ཀྱི་དཔེ་མཚོན་ཡག་ཤོས་གཅིག་དྷ་རམ་ས་ལའི་ ‘ནང་བསྟན་སྲི་ཞུ་ཁང’ ཆགས་ཡོད་པ་རེད།

དྷ་རམ་ས་ལར་རྟེན་གཞི་བྱས་པའི་ནང་བསྟན་སྲི་ཞུ་ཁང་ནི་ ༢༠༡༡ ལོར་གསར་དུ་བཙུགས་ཤིང་། སྲི་ཞུ་ཁང་འདིས་ཕྱི་རྒྱལ་བ་ཚོར་བོད་ཀྱི་སྐད་ཡིག་དང་ནང་ཆོས་སོགས་སློབ་ཁྲིད་བྱེད་ཀྱིན་ཡོད་ཅིང་། ཁྲིད་ཐབས་ཀྱི་ཐད་ནས་དྲ་ཐོག་ནས་ཁྲིད་པ་དང་། དངོས་སུ་འཛིན་གྲྭ་ཚོགས་པ། སྒྲ་འཇུག་དང་བརྙན་སོགས་ཀྱི་ལམ་ནས་ཁྲིད་པ་སོགས་བྱེད་ཐབས་སྣ་ཚོགས་སྤྱོད་ཀྱིན་ཡོད་འདུག སྲི་ཞུ་ཁང་འདིའི་འོག་མྱུར་སྦྱོང་འཛིན་གྲྭ་དང་དྲ་ཐོག་འཛིན་གྲྭ སྒྲ་སྒྱུར་འཛིན་གྲྭ བཀའ་བསྟན་དཔེ་བསྡུར་སྡེ་ཚན། བོད་ཀྱི་ནང་བསྟན་དཔེ་ཚོགས་ལྟེ་གནས་ཡན་ལག ཞིབ་འཇུག་སྡེ་ཚན། སྤྱི་ཁྱབ་ཡིག་ཚང་གཅིག་དང་སྤྱི་ཐབ་གཅིག་བཅས་སྡེ་ཚན་ ༨  ལས་གྲུབ་ཡོད་ཅང་། གཏན་འཇགས་མིན་ཡང་ད་ལྟའི་ཆར་ཁྱོན་བསྡོམས་ཕྱག་ལས་གནང་མཁན་ ༧༡ ཙམ་ཡོད་འདུག

གསར་འགོད་པས་རྒྱུས་ལོན་བྱས་པ་ལྟར་ན། མྱུར་སྦྱོང་འཛིན་གྲྭའི་ནང་ད་ལྟའི་ཆར་དགེ་རྒན་ ༡༧ དང་སློབ་ཕྲུག་༢༤ ཡོད་པ་དང་། སྡེ་ཚན་འདིས་ཕྱི་གླིང་བ་ཚོར་བོད་ཡིག་དང་བོད་སྐད་ཀྱི་རྨང་གཞིའི་སློབ་ཁྲིད་བྱེད་ཀྱིན་ཡོད་ཅིང་། མྱུར་སྦྱོང་ནང་གི་སློབ་མ་མང་ཆེ་བར་སློབ་མ་རེར་དགེ་རྒན་རེ་ཡོད་པ་དང་། འཛིན་གྲྭ་འདིར་སློབ་ཡོན་སྤྲོད་སྟངས་རིགས་མི་འདྲ་བ་ཁ་ཤས་ཡོད་པ་ལས། བདུན་ཕྲག་ཅིག་ལ་བོད་ཡིག་སྦྱོང་མཁན་ཚོར་ཆུ་ཚོད་རེར་མི་གཅིག་ལ་ཧིན་སྒོར་༢༢༠ རེ་དང་། བདུན་ཕྲག་གཉིས་ལ་སྦྱོང་མཁན་ཚོར་ཆུ་ཚོད་གཅིག་ལ་ཧིན་སྒོར་ ༢༡༠ ། བདུན་ཕྲག་གསུམ་ལ་སྦྱོང་མཁན་ཚོར་ཆུ་ཚོད་གཅིག་ལ་ཧིན་སྒོར་ ༢༠༠ ། བདུན་ཕྲག་བཞི་དང་དེ་ལས་མང་བར་སྦྱོང་མཁན་ཚོར་ཆུ་ཚོད་གཅིག་ལ་ཧིན་སྒོར་ ༡༨༠ བཅས་ཡིན་འདུག

དྲ་ཐོག་འཛིན་གྲྭའི་ནང་ད་ལྟའི་ཆར་དགེ་རྒན་ ༡༥ དང་སློབ་ཕྲུག་ ༡༥༠ ཡས་མས་ཡོད་པ་དང་། སྡེ་ཚན་འདིས་ཕྱི་རྒྱལ་སློབ་ཕྲུག་ཚོའི་ཆུ་ཚད་ལ་དཔག་པའི་གནས་རིམ་འདྲ་མིན་ལ་སློབ་ཁྲིད་བྱེད་ཀྱིན་ཡོད་འདུག དྲ་ཐོག་འཛིན་གྲྭའི་སློབ་ཡོན་ཆུ་ཚོད་ ༡ ནས་ ༥ བར་ཆུ་ཚོད་རེར་མི་གཅིག་ལ་ཡུ་སྒོར་ ༥ རེ་(ཧིན་སྒོར་ ༣༦༠ རེ།)ཡིན་པ་དང་། ཆུ་ཚོད་ ༥༡ ནས་ ༡༠༠ བར་ཡུ་སྒོར་ ༤།༥ རེ་(ཧིན་སྒོར་ ༣༢༠ རེ།)།  ཆུ་ཚོད་ ༡༠༡ ལས་མང་ན་ཆུ་ཚོད་རེར་ཡུ་སྒོར་ ༤ རེ་(ཧིན་སྒོར་ ༢༨༠ རེ།)བཅས་ཡིན་འདུག

སྒྲ་སྒྱུར་འཛིན་གྲྭའི་ནང་ད་ལྟའི་ཆར་དགེ་རྒན་ ༤ དང་སློབ་ཕྲུག་ ༤ ཡོད་པ་དང་། སྡེ་ཚན་འདིས་བོད་ཡིག་དང་བོད་སྐད་ཀྱི་རྨང་གཞི་ཅུང་ཙམ་ཡག་པོ་ཡོད་མཁན་ཚོ་དང་། ལྷག་པར་དུ་ནང་ཆོས་ཀྱི་ཚད་གཞི་ཡོད་མཁན་ཚོར་ཡིག་བསྒྱུར་སྐོར་ལ་སློབ་ཁྲིད་བྱེད་ཀྱིན་ཡོད་འདུག འཛིན་གྲྭ་འདིའི་སློབ་ཕྲུག་རེར་སློབ་ཡོན་ཆུ་ཚོད་རེར་ཧིན་སྒོར་ ༢༠༠ ཙམ་ཡིན་འདུག སྒྲ་སྒྱུར་འཛིན་གྲྭའི་དམིགས་ཡུལ་གཙོ་བོ་ཡིག་སྒྱུར་བ་གསོ་སྐྱོང་བྱ་རྒྱུ་དེ་ཡིན་པ་དང་ད་ལྟའི་ཆར་ཚོད་ལྟའི་ཚུལ་དུ་འགྲོ་བཞིན་ཡོད་འདུག

བཀའ་འགྱུར་དཔེ་བསྡུར་སྡེ་ཚན་ནང་ད་ལྟའི་ཆར་ལས་བྱེད་ ༡༧ ཡོད་པ་དང་། སྡེ་ཚན་འདིས་སྡེ་དགེའི་དཔར་མ་གཞི་ལ་བཞག་སྟེ། བོད་ཡུལ་གྱི་དཔར་ཁང་འདྲ་མིན་ནས་དཔར་བསྐྲུན་བྱས་པའི་བཀའ་འགྱུར་དང་བསྟན་འགྱུར་རྣམས་དཔེ་བསྡུར་བྱེད་ཀྱིན་ཡོད་འདུག ཁོ་ཚོས་དཔེ་བསྡུར་བྱེད་སའི་དཔར་ཁང་གཙོ་བོ་ ༤ ཡོད་པ་ནི་སྡེ་དགེ་དཔར་ཁང་དང་ཅོ་ནེ་དཔར་ཁང་། སྣར་ཐང་པར་ཁང་། ལི་ཐང་པར་ཁང་བཅས་ཡིན་འདུག བཀའ་འགྱུར་དཔེ་བསྡུར་གྱི་དམིགས་ཡུལ་གཙོ་བོ་སྔོན་ཆད་བོད་ཀྱི་དཔར་ཁང་འདྲ་མིན་གྱི་བཀའ་བསྟན་རྣམས་དཔེ་བསྡུར་བྱས་ཏེ། དཔེ་ཆའི་ནང་གི་ཆད་ལྷག་རྣམས་ལ་ཟུར་མཆན་བཀོད་དེ་བཀའ་བསྟན་སྤུས་དག་པོ་གཅིག་བཟོ་རྒྱུ་དང་། དེ་ཡང་མ་འོངས་པར་སྐད་ཡིག་གཞན་པའི་ནང་བསྒྱུར་རྒྱུའི་འཆར་གཞི་ཡོད་འདུག

བོད་ཀྱི་ནང་བསྟན་དཔེ་ཚོགས་ལྟེ་གནས་ཡན་ལག་ཞེས་པར་ད་ལྟའི་ཆར་ལས་བྱེད་ ༤ ཡོད་པ་དང་། སྡེ་ཚན་འདི་ཨ་རིའི་བོད་ཀྱི་ནང་བསྟན་དཔེ་ཚོགས་ལྟེ་གནས་ (Tibetan Buddhist Resource Center) དང་མཉམ་འབྲེལ་བྱས་ཡོད་འདུག སྡེ་ཚན་འདིས་ཨ་རིའི་བོད་ཀྱི་ནང་བསྟན་དཔེ་ཚོགས་ལྟེ་གནས་ཀྱིས་བོད་ཀྱི་མཁས་དབང་རིམ་བྱོན་གྱི་གསུང་འབུམ་དེབ་ ༡༦༠༠༠ ལྷག་བསྡུ་རུབ་ཀྱིས་དཔར་སློག་བརྒྱབ་སྟེ་དྲ་ཐོག་ཏུ་ཉར་ཡོད་པའི་ནང་། དཀར་ཆགས་མེད་པ་དག་ལ་དཀར་ཆགས་བཟོ་བཞིན་ཡོད་འདུག

ཞིབ་འཇུག་སྡེ་ཚན་ནང་ད་ལྟའི་ཆར་ལས་བྱེད་ ༤ ཡོད་པ་དང་། སྡེ་ཚན་འདིས་ནང་བསྟན་སྲི་ཞུ་ཁང་རང་གི་མྱུར་སྦྱོང་དང་སྒྲ་སྒྱུར། དྲ་ཐོག་འཛིན་གྲྭ་བཅས་ཀྱི་སློབ་མའི་གནས་རིམ་ལ་གཞིགས་ཏེ། སློབ་དེབ་དང་དགེ་རྒན་གྱི་ཁྲིད་དེབ་སོགས་གྲ་སྒྲིག་བྱེད་ཀྱིན་ཡོད་འདུག ཞིབ་འཇུག་སྡེ་ཚན་གྱིས་དབུས་སྐད་ཐོག་སློབ་ཚན་སྒྲ་འཇུག་བྱས་ཏེ་ཉན་རྒྱུ་དང་། ཡུ་རོབ་ཀྱི་སྐད་ཡིག་གཉིས་པའི་ཐབས་ལམ་བོད་བསྒྱུར་བྱས་ཏེ། བོད་ཡིག་ནང་གི་མིང་ཚིག་དང་བྱ་ཚིག རྒྱན་ཚིག་སོགས་དབྱེ་བ་བཀར་ཏེ། ཡུ་རོབ་ཀྱི་སྐད་ཡིག་གི་ཕུང་པོ་ཞེས་པའི་རིག་ལམ་སྤྱད་དེ་བོད་སྐད་ནང་ཕུང་པོ་བཟོ་བཞིན་ཡོད་འདུག

སྤྱི་ཁྱབ་ཡིག་ཚང་ནང་དུ་སྲི་ཞུ་ཁང་གི་འགན་འཛིན་ངག་དབང་འཕྲིན་ལས་ལགས་དང་རྩིས་པ་ཕུར་ཚེ་ལགས་གཙོ་བྱས་པའི་འཛིན་སྐྱོང་དང་འབྲེལ་བའི་ལས་བྱེད་ ༥ ཡོད་པ་དང་། སྤྱི་ཐབ་ནང་ལས་བྱེད་ཚོར་ཉིན་གུང་གསོལ་ཚིགས་བཟོ་མཁན་མ་བྱན་ ༣ དང་ལས་ཁུངས་གཙང་མ་བཟོ་མཁན་གཅིག་དང་ཅ་དངོས་ཉར་ཚགས་བྱེད་མཁན་གཉེར་བ་གཅིག་བཅས་ཡོད་འདུག

འདི་གའི་གསར་འགོད་པས་སྲི་ཞུ་ཁང་གི་འགན་འཛིན་ངག་དབང་འཕྲིན་ལས་ལགས་སུ་བཅར་འདྲི་ཞུས་དོན་ལྟར་ན། ད་ལྟའི་ཆར་སྲི་ཞུ་ཁང་གི་ཁྱབ་ཁོངས་ཡོངས་སུ་ལས་བྱེད་ ༧༡ ལྷག་ཡོད་པ་དང་། བཀའ་འགྱུར་དཔེ་བསྡུར་འཕུད་པའི་དགེ་རྒན་དང་ལས་བྱེད་རྣམས་ཐོག་མའི་ཚོད་ལྟའི་ཟླ་གསུམ་རིང་ཟླ་རེར་ཧིན་སྒོར་ ༧༠༠༠ རེ་དང་། ཟླ་གསུམ་གྱི་རྗེས་སུ་ལས་བྱེད་དངོས་ལ་ཚུད་རྗེས་ཟླ་རེར་གསོལ་ཕོགས་ཧིན་སྒོར་ ༡༠༠༠༠ རེ་སྤྲོད་བཞིན་ཡོད་པ་དང་། ལོ་རེར་ཧིན་སྒོར་ ༧༠༠ རེ་འཕར་གྱིན་ཡོད་འདུག བཀའ་འགྱུར་དཔེ་བསྡུར་སྡེ་ཚན་ནང་ཐོག་མའི་ཚོད་ལྟའི་ཟླ་གསུམ་རིང་ཟླ་རེར་གསོལ་ཕོགས་ཧིན་སྒོར་ ༡༠༠༠༠ རེ་དང་། ཟླ་གསུམ་གྱི་རྗེས་སུ་ལས་གཞི་དངོས་ལ་ཚུད་རྗེས་ཟླ་རེར་ཧིན་སྒོར་ ༡༡༠༠༠ རེ་སྤྲོད་ཀྱིན་ཡོད་ཅིང་། ལོ་རེ་ལ་ཧིན་སྒོར་ ༧༠༠ རེ་འཕར་གྱི་ཡོད་འདུག

ངག་དབང་འཕྲིན་ལས་ལགས་ཀྱིས་ངོ་སྤྲོད་གནང་བར། མྱུར་སྦྱོང་འཛིན་གྲྭ་དང་དྲ་ཐོག་འཛིན་གྲྭ སྒྲ་སྒྱུར་འཛིན་གྲྭ་སོགས་ཀྱི་སློབ་ཡོན་ཡོང་འབབ་ཀྱིས་ཞིབ་འཇུག་སྡེ་ཚན་དང་སྤྱི་ཁྱབ་ཡིག་ཚང་གི་ལས་བྱེད་ཚོར་གསོལ་ཕོགས་སྤྲོད་བཞིན་ཡོད་པ་དང་། བོད་ཀྱི་ནང་བསྟན་དཔེ་ཚོགས་ལྟེ་གནས་ཡན་ལག་གི་འགྲོ་སོང་ཨ་རིའི་བོད་ཀྱི་ནང་བསྟན་དཔེ་ཚོགས་ལྟེ་གནས་ཀྱིས་གཏོང་གི་ཡོད་འདུག གཞན། བཀའ་འགྱུར་དཔེ་བསྡུར་སྡེ་ཚན་ལ་ཐའེ་ཝན་འབའ་རོམ་བཀའ་བརྒྱུད་ཆོས་ཚོགས་ (中華民國巴融噶舉如意成就學佛會) ཀྱིས་མཐུན་འགྱུར་གནང་གི་ཡོད་འདུག

སྲི་ཞུ་ཁང་གི་དམིགས་ཡུལ་ག་རེ་ཡིན་མིན་སྐོར་ལ་འགན་འཛིན་ངག་དབང་འཕྲིན་ལས་ལགས་སུ་བཅའ་འདྲི་བྱས་པར་ཁོང་གིས། ནང་བསྟན་སྲི་ཞུ་ཁང་གི་ཚོགས་པ་འདི་འཛུགས་དགོས་པའི་དམིགས་ཡུལ་གཙོ་བོ་བོད་ཀྱི་རིག་གཞུང་མི་ཉམས་རྒྱུན་འཛིན་དང་། ལྷག་པར་དུ་བོད་ཀྱི་ནང་བསྟན་རིག་གནས་ཡུལ་ལུང་གཞན་དང་སྐད་རིགས་གཞན་ལ་དར་སྤེལ་གཏོང་རྒྱུ་དེ་ཡིན་པ་དང་། ༧རྒྱལ་བ་རིན་པོ་ཆེ་ཡི་བཀའ་སློབ་གཅིག་གི་ནང་། ད་ལྟའི་བོད་པའི་མི་རབས་འདི་ལ་ནང་པའི་མི་རིགས་གཞན་དང་མ་འདྲ་བར་ནང་ཆོས་སྤུས་དག་མོ་ཞིག་དར་སྤེལ་དང་རྒྱུན་འཛིན་བྱེད་པའི་དམིགས་བསལ་གྱི་འགན་འཁུར་ཡོད་ཅེས་གསུངས་པ་བཞིན། ང་ཚོས་ནང་ཆོས་ཡང་དག་པ་དང་སྤུས་དག་པོ་ཞིག་ཡོང་བའི་ཆ་རྐྱེན་བསྐྲུན་ཐུབ་ལ་ཐབས་ལམ་སྣ་ཚོགས་སྤྱད་དེ་འབད་བརྩོན་བྱེད་བཞིན་ཡོད། ཅེས་བརྗོད་སོང་།

སྲི་ཞུ་ཁང་འདི་ཚོགས་པ་ཆེན་པོ་ཡིན་སྟབས་འདིའི་འགྲོ་གྲོན་མ་དངུལ་ཇི་ལྟར་ཐབས་འཚོལ་གནང་གི་ཡོད་མེད་དྲིས་པར་ཁོང་གིས། ཚོགས་པ་འདིའི་བཀའ་འགྱུར་དཔེ་བསྡུར་ལྟ་བུར་མཚོན་ན་ཐའེ་ཝན་གྱི་འབའ་རོམ་བཀའ་བརྒྱུད་ཀྱི་བླ་མ་ཚོགས་ཉིད་འོད་ཟེར་དང་མཉམ་འབྲེལ་བྱས་བསྡད་ཡོད་པ་རེད། གཞན་ང་ཚོར་སྦྱིན་བདག་རྫིག་པོ་དེ་འདྲ་ཡོད་པ་མ་རེད། ལས་བྱེད་ཚོར་ཟླ་ཕོགས་ཆེན་པོ་སྤྲོད་ཐུབ་ཀྱི་མེད་ཀྱང་འཚོ་བ་འགྲོ་ཐུབ་ཙམ་སྤྲོད་ཀྱི་ཡོད་པ་རེད།

ང་ཚོས་བོད་ཀྱི་སྐད་ཡིག་གི་ཁྲོམ་ར་བཟོས་ཡོད་པ་རེད། མི་མང་པོ་ཞིག་གིས་བོད་པའི་སྐད་ཡིག་ལ་ཁྲོམ་ར་ཡོད་པ་མ་རེད། བོད་ཀྱི་སྐད་ཡིག་གིས་གྲོད་ཁོག་བརྒྱག་གི་མ་རེད་ཟེར་གྱི་ཡོད་པ་རེད། ཕྱོགས་གཅིག་ནས་བདེན་པ་ཡིན་ཡང་ཕྱོགས་གཞན་ཞིག་ནས་ཁྲོམ་ར་སོ་སོས་མ་བཟོས་པ་རེད། སྤྱིར་བཏང་བོད་པའི་སྐད་ཡིག་ལ་ཁྲོམ་ར་མེད་པ་ཁྱོན་ནས་མ་རེད། ད་ལྟ་བོད་སྐད་སྦྱོང་རྒྱུ་ཡིན་ཟེར་མཁན་དང་སྐད་བསྒྱུར་བྱ་རྒྱུ་ཡིན་ཟེར་མཁན་ཇེ་མང་ནས་ཇེ་མང་དུ་འགྲོ་བཞིན་ཡོད་པ་རེད། ད་ལྟ་ཁྲོམ་རྭ་ཆེ་ཤོས་དེ་ཕྱི་རྒྱལ་བ་མ་རེད་བོད་པ་རེད། ད་ལྟ་ཕྱི་རྒྱལ་ཁག་ཏུ་སྡོད་མཁན་བོད་པ་ཚོར་ཡང་བོད་ཡིག་བོད་སྐད་ཐོག་དོ་སྣང་གསར་པ་སླེབས་ཀྱི་ཡོད་པ་རེད། དེ་གཙོ་བོ་ ༧རྒྱལ་བ་རིན་པོ་ཆེ་མཆོག་གི་བཀའ་དྲིན་ཡིན་ས་རེད། ཁོང་ཡར་མར་ཕེབས་སྐབས་བཀའ་སློབ་མང་པོ་གནང་གི་ཡོད་པ་རེད། ཅེས་བརྗོད་བྱུང་།

ཚོགས་པ་འདི་བཙུགས་ནས་ད་ལྟའི་བར་དཀའ་ངལ་གང་འདྲ་འཕྲད་ཡོད་མེད་དྲིས་སྐབས་ཁོས། དཀའ་ངལ་མང་པོ་འཕྲད་ཡོད་པ་རེད། དཀའ་ངལ་རེ་རེ་འཕྲད་དུས་སློབ་སྦྱོང་རེ་རེ་རག་ཡོང་གི་འདུག ང་ཚོའི་ཚོགས་པ་འདིར་གྲུབ་འབྲས་ཡག་པོ་ཞིག་འཐོན་བཞིན་པ་འདི་ང་གཅིག་པུ་མ་རེད། ལས་བྱེད་མང་པོ་ཞིག་ཡོད་པ་ཁོ་རང་ཚོས་དཀའ་ལས་བརྒྱབ་པའི་གྲུབ་འབྲས་རེད། གང་ལྟར། ཚོགས་པ་འདི་བརྒྱུད་ནས་སློབ་མ་གཅིག་སྟོང་ཉིས་བརྒྱ་གསུམ་བརྒྱ་ཞིག་ལ་སློབ་ཁྲིད་བྱས་པ་རེད། ད་ལྟ་དེ་དག་བོད་པའི་རིག་གཞུང་དང་སྐད་ཡིག་ལ་འབྲེལ་བ་ཡོད་མཁན་ཞིག་ཆགས་པ་རེད། དེ་ནས་བོད་མི་བརྒྱད་ཅུ་དགུ་ཅུ་ཞིག་ལ་ལས་ཀ་སྤྲད་ཡོད་པ་རེད། འདི་དག་ང་ཚོའི་གྲུབ་འབྲས་དང་གཟི་བརྗིད་ཅིག་ལ་ངོས་འཛིན་བྱེད་ཀྱིན་ཡོད། ཅེས་བརྗོད་སོང་།

ནང་བསྟན་སྲི་ཞུ་ཁང་གི་འགན་འཛིན་ངག་དབང་འཕྲིན་ལས་ལགས་ཀྱིས་ཁོ་རང་ངོ་སྤྲད་བྱས་པ་ལྟར་ན། ཁོ་བོ་ཧྥ་རན་སིའི་མི་རིགས་ཡིན་ཞིང་ཕ་ཡུལ་ནས་སློབ་གྲྭ་ཚད་ལྡན་དེ་འདྲར་འགྲོ་མྱོང་མེད་པར་བ་ཕྱུགས་འཚོ་སྐྱོང་བྱས་མཁན་ཞིག་ཡིན་པ་དང་། རྗེས་སུ་རྒྱ་གར་དུ་ཡོང་སྟེ་སྤུར་ཉེ་འཁྲིས་དཔལ་སྤུངས་ཤེས་རབ་གླིང་ནས་ནང་དོན་རིག་པ་གཙོས་པའི་བོད་ཀྱི་སྐད་ཡིག་དང་རིག་གཞུང་ལ་སློབ་གཉེར་གནང་ཡོད་འདུག

གསར་འགོད་པ།འཇིགས་མེད་རྒྱ་མཚོ།