༼གཅིག༽
ཕྱི་ཟླ་ ༣ ཚེས་ ༥ ཉིན། བོད་མདོ་སྨད་རྔ་པ་རྫོང་སྤྲོ་ཚིགས་ཡུལ་ཚོའི་རྡོ་བ་སྡེ་བའི་བུད་མེད་ནོར་ཕྱུག་ལགས་ཀྱིས། རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད། ནོར་ཕྱུག་ལཊ་རང་ལོ་ ༤༧ ཡིན་ཞིང་། ཁོང་མོ་དྷི་ཕུ་དགོན་གྱི་ལྷ་སྡེ་མ་ཎི་སྐྱབས་ཚང་གི་ཕ་ཚེ་བདག་དང་། མ་འོད་སྒྲོན་གཉིས་ཀྱི་བུ་མོ་ཡིན་འདུག
༼གཉིས།༽
ཕྱི་ཟླ་ ༤ ཚེས་ ༨ ཉིན། དཀར་མཛེས་རྫོང་ཉེན་རྟོག་ཁང་གི་ཉེ་འགྲམ་ཞིག་ཏུ། ལྕོགས་རི་ངང་སྒང་ཇོ་མོ་དགོན་གྱི་བཙུན་མ་ཡེ་ཤེས་མཁའ་འགྲོ་ལགས་ཀྱིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་པ་དང་། བཙུན་མ་ཡེ་ཤེས་མཁའ་འགྲོ་ལགས་ནི་བྲག་མགོ་རྫོང་བྲག་ཟུར་གྲོང་ཚོའི་བྲག་ཟུར་ཚང་གི་ཕ་ཤེས་རབ་དང༌། མ་བསོད་ནམས་སྒྲོལ་མ་གཉིས་ཀྱི་བུ་མོ་ཡིན་ཞིང་ད་ལྟ་རང་ལོ་ ༤༧ ཡིན་འདུག
༼གསུམ།༽
ཕྱི་ཟླ་ ༤ ཚེས་ ༡༦ ཉིན། བོད་མདོ་སྨད་རྔ་བ་རྫོང་ཨ་འདུས་སྡེ་བའི་བོད་མི་དམ་དཀར་རམ་གནས་སྐྱབས་ལགས་ཀྱིས་རང་གི་རྭ་སྐོར་ནང་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་འདུག ཁོང་ད་ལྟ་རང་ལོ་ ༤༥ ཡིན་ཞིང་རྔ་བ་རྫོང་ཨ་འདུས་ཡུལ་ཚོ་ནས་ཡིན་ཞིང་། ཁོང་ལ་ཕྲུ་གུ་བདུན་ཡོད་པའི་ནང་ནས་ཆེ་ཤོས་དེ་ལོ་ ༢༡ དང་ཆུང་ཤོས་དེ་ལོ་ ༧ ཡིན་འདུག
༼བཞི།༽
ཕྱི་ཟླ་ ༥ ཚེས་ ༢༡ ཉིན། དཀར་མཛེས་ཁུལ་རྟའུ་རྫོང་ཁང་སར་ཡུལ་ཚོ་རུ་བསྟན་འཛིན་རྒྱ་མཚོ་ལགས་ཀྱིས་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྐབས་རྒྱ་གཞུང་ཉེན་རྟོག་པས་བཙན་ཁྲིད་བྱས་ཡོད་འདུག བསྟན་འཛིན་རྒྱ་མཚོ་ལགས་ནི་རྟའུ་རྫོང་ཁང་གསར་ཡུལ་ཚོ་ཁུ་ནན་གྲོང་པ་ནས་ཡིན་ཞིང་ད་ལྟ་རང་ལོ་ ༣༥ ཡིན་ཞིང་། ཁོང་བཟའ་མི་གཉིས་ལ་བུ་གསུམ་དང་བུ་མོ་གཅིག་ཡོད་འདུག
༼ལྔ།༽
ཕྱི་ཟླ་ ༥ ཚེས་ ༢༧ ཉིན། ཀན་ལྷོ་བོད་རིགས་རང་སྐྱོང་ཁུལ་ཅོ་ནེ་རྫོང་ཉིན་པ་ཡུལ་ཚོའི་རྒྱ་གཞུང་ལས་ཁུངས་འགྲམ་དུ་སངས་རྒྱས་མཚོ་ལགས་ཀྱིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེཊ་གནང་སྟེ་སྐུ་གྲོངས། སངས་རྒྱས་མཚོ་ལགས་ནི་ཀན་ལྷོ་ཁུལ་ཅོ་ནེ་ཆོས་དཔལ་ཡུལ་ཚོའི་རྨེ་རུ་སྲིབ་པ་སྡེ་བ་ནས་ཡིན་པ་དང་། ཁོང་མོ་རང་ལོ་ ༣༦ ཡིན་ཞིང་། ཁོང་གི་བཟའ་ཟླ་རྟ་མགྲིན་དབང་རྒྱལ་དང་ཁོང་གཉིས་ལ་བུ་ཞིག་དང་བུ་མོ་གཅིག་ཡོད་འདུག
༼དྲུག༽
ཕྱི་ཟླ་ ༧ ཚེས་ ༡༠ ཉིན། ཡུལ་ཤུལ་སྐྱེ་རྒུ་མདོའི་གེ་སར་ཐང་ཆེན་གྱི་གཡས་ཟུར་དུ་གྲྭ་བསོད་ནམས་སྟོབས་རྒྱལ་ལགས་ཀྱིས་རྒྱ་གཞུང་ལ་ཞི་རྒོལ་གྱིས་རང་ལུས་མེར་བསྲེགས་གནང་ཡོད་པ་དང་། ཕྱིས་སུ་བོད་མི་ཚོས་ཁོང་སྨན་ཁང་དུ་བསྐྱལ་ཡོད་ཀྱང་འདས་གསོན་གྱི་གནས་ཚུལ་ཤེས་རྟོགས་ཐུབ་མེད། གྲྭ་བསོད་ནམས་སྟོབས་རྒྱལ་ལགས་རང་ལོ་ ༢༦ ཡིན་ཞིང་། ཕ་ནང་ཆེན་བཀྲ་ཤིས་དང་མ་བོད་བདེ་གཉིས་ཀྱི་བུ་ཡིན་འདུག
༼བདུན།༽
ཕྱི་ཟླ་ ༨ ཚེས་ ༢༧ ཉིན། ཀན་ལྷོ་ཁུལ་བསང་ཆུ་རྫོང་བསང་ཁོག་ཡུལ་ཚོའི་ཐོག་ཏུ། བཀྲ་ཤིས་སྐྱིད་ལགས་ཀྱིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་ཡོད་ཅིང་། ཉིན་དེའི་མཚན་མོའི་ཆུ་ཚོད་ ༣ ལ་སྐུ་གྲོངས་ཡོད་འདུག ཕྱི་ཚེས་ ༢༨ ཉིན་རྒྱ་གཞུང་ཉེན་རྟོག་ཡོང་སྟེ་སྐུ་ཕུང་བཙན་འཕྲོག་བྱས་ཡོད་འདུག བཀྲ་ཤིས་སྐྱིད་ལགས་ནི་བསང་ཆུ་རྫོང་བསང་ཁོག་ཡུལ་ཚོའི་དངུལ་ར་སྡེ་བ་ནས་ཡིན་པ་དང་ད་ལྟ་རང་ལོ་ ༥༥ ཡིན་འདུག
༼བརྒྱད།༽
ཕྱི་ཟླ་ ༡ ཚེས་ ༢༧ ཉིན། བོད་རང་སྐྱོང་ལྗོངས་སྒྲིག་ཁྲིམས་ཞིབ་བཤེར་ཁང་གིས་འདས་ལོར་བོད་རང་བཙན་ཚོགས་པ་ལ་ལྐོག་འབྲེལ་བྱས་པ་དང་། གསང་བའི་གནས་ཚུལ་མཁོ་སྤྲོད་བྱས་པ་བཅས་ཀྱི་དོགས་གཞིའི་འོག་བོད་རང་སྐྱོང་ལྗོངས་ཁོངས་ཀྱི་ཏང་ཡོན་ལས་བྱེད་པར་ཞིབ་བཤེར་བྱས་ཏེ་ཁྱོན་ཏང་ཡོན་ལས་བྱེད་པ་ ༤༥ ཕྱིར་ཕུད་དང་ལས་བྱེད་ ༡༥ ལ་ཉེས་ཆད་བཅད།
༼དགུ།༽
ཕྱི་ཟླ་ ༧ ཚེས་ ༡༢ ཉིན། ལི་ཐང་རྫོང་ཁྲིམས་སྲིད་ལྷན་ཁང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་སྐུ་གྲོངས་ཡོད་སྐོར་བརྗོད་ཡོད་པ་དང་། སྐུ་འཁོར་ནང་མི་རྣམས་སྐུ་ཕུང་གདན་འདྲེན་ཞུ་བར་བསྐྱོད་སྐབས་སྐུ་ཕུང་རྩིས་སྤྲོད་མ་བྱས་སྟབས་ཁྲིན་ཏུའུ་ཡི་བཙོན་ཁང་དུ་བཞུགས་འབུལ་བྱེད་དགོས་བྱུང་ཡོད། སྤྲུལ་སྐུ་བསྟན་འཛིན་བདེ་ལེགས་མཆོག་ ༢༠༠༢ ལོར་རྒྱ་གཞུང་གིས་འཛིན་བཟུང་བྱས་ཏེ། ཐོག་མར་དུས་འགྱངས་སྲོག་ཁྲིམས་དང་རྗེས་སུ་ཚེ་བཙོན་དུ་བསྒྱུར།
༼བཅུ།༽
ཕྱི་ཟླ་ ༡༡ ཚེས་ ༩ ནས་ ༡༡ བར། ཨ་རིའི་གྲོས་ཚོགས་ཀྱི་ཚོགས་གཙོ་ཟུར་པ་དང་དམངས་གཙོ་ཚོགས་པའི་དབུ་ཁྲིད་ལྕམ་ནན་སེ་ཕོ་ལོ་སེ་(Nancy Pelosi)ཡིས་སྣེ་ཁྲིད་པའི་དམངས་གཙོ་ཚོགས་པའི་སྐུ་ཚབ་ཚོགས་ཆུང་ཞིག་བོད་ཀྱི་རྒྱལ་ས་ལྷ་སར་གཟིགས་སྐོར་གནང་སྟེ། བོད་རང་སྐྱོང་ལྗོངས་གི་མགོ་ཁྲིད་རྣམས་དང་། སེ་འབྲས་དགའ་གསུམ་གྱི་བླ་སྤྲུལ་བཅས་སུ་ཐུག་འཕྲད་བྱས།
གསར་འགོད་པ། པདྨ་མཚོ།
