༼གཅིག༽
ཕྱི་ཟླ་ ༢ ཚེས་ ༥ ཉིན་ཨ་རིའི་རྒྱལ་ས་ཝ་ཤིན་ཊོན་དུ་རྒྱལ་ཡོངས་སྨོན་ལམ་ཆེན་མོའི་སྟེང་༧གོང་ས་མཆོག་གདན་འདྲེན་ཞུས་ཏེ། ཨ་རིའི་སྲིད་འཛིན་ཨོ་བྷ་མས། “ངས་འདིར་དམིགས་བསལ་གྱིས་འཚམས་འདྲི་ཞུ་ཡུལ་ཞིག་ནི། ངའི་གྲོགས་པོ་བཟང་པོ་༧གོང་ས་ཏཱ་ལའི་བླ་མ་མཆོག་ཡིན། ཁོང་ནི་བྱམས་བརྩེ་ཉམས་ལེན་གནང་མཁན་གྱི་རླབས་ཆེན་དཔེ་མཚོན་ཞིག་ཡིན།” ཞེས་ཆེ་བསྟོད་ཞུས།
༼གཉིས།༽
ཕྱི་ཟླ་ ༤ ཚེས་ ༡༨ ཉིན། ལྷོ་ཨ་ཧྥི་རི་ཁའི་ཡེ་ཤུའི་ཆོས་དཔོན་ཌེ་སི་མོན་ཀྲའུ་ཀྲའུ་མཆོག་བཞུགས་སྒར་དྷ་རམ་ས་ལར་ཕེབས་ཏེ། ༧གོང་ས་མཆོག་དང་ལྷན་དུ་ཉིན་གྲངས་ ༥ རིང་དགའ་སྐྱིད་(Joy) ཞེས་པའི་དཔེ་དེབ་ཅིག་ལྗགས་རྩོམ་སྐོར་ལ་བཀའ་བསྡུར་དང་། དྷ་སྟེང་བོད་ཁྱིམ་དུ་༧གོང་ས་མཆོག་དགུང་གྲངས་ ༨༠ ཕེབས་པའི་སྐུའི་གྱ་སྟོན་སྲུང་གཙི་ཞུས།
༼གསུམ།༽
ཕྱི་ཟླ་ ༤ ཚེས་ ༢༥ ཉིན། བལ་ཡུལ་ནང་ས་ཡོམ་ཤུགས་ཚད་ ༧།༨ ཅན་ཞིག་བརྒྱབ་པའི་ཁྲོད་བོད་ཕྱི་ནང་གཉིས་ནས་བོད་མི་ ༣༣ རྐྱེན་འདས་སུ་ཕྱིན་ཏེ་མི་རྒྱུ་གཉིས་ལ་གོད་ཆག་ཆེན་པོ་བྱུང་། སྐབས་དེར་བལ་ཡུལ་གཞུང་དམངས་ལ་༧གོང་ས་མཆོག་ནས་བལ་སྒོར་འབུམ་ ༥༠ དང་རྒྱལ་བ་ཀརྨ་པ་མཆོག་ནས་ཨ་སྒོར་འབུམ་ ༢། བོད་མིའི་སྒྲིག་འཛུཊ་ཀྱིས་ཐོག་མ་ཛ་དྲག་ངལ་སེལ་ཆེད་བལ་སྒོར་འབུམ་ ༧༦ དང་། རྗེས་ལ་བལ་སྒོར་འབུམ་ ༣༠༠ གནང་གཏན་འཁེལ་བ་གསལ་བསྒྲཊ་བྱས།
༼བཞི།༽
ཕྱི་ཟླ་ ༦ ཚེས་ ༢༡ དྷ་རམ་ས་ལའི་གཙུག་ལག་ཁང་དུ། བོད་མིའི་སྒྲིག་འཛུགས་དང་མདོ་སྨད་གྱ་སྟོན་གོ་སྒྲིག་ཚོགས་ཆུང་མཉམ་འབྲེལ་ཐོག་༧གོང་ས་མཆོག་ཕྱི་ལུགས་ལྟར་དགུང་གྲངས་ ༨༠ ལ་ཕེབས་པའི་གྱ་སྟོན་སྲུང་གཙི་དང་། ཚེས་ ༢༢ ནས་ ༢༣ བར་མདོ་སྨད་གྱ་སྟོན་གོ་སྒྲིག་ཚོགས་ཆུང་གིས་མུ་མཐུད་རྒྱས་སྟོན་ཚོགས། དེ་བཞིན་བོད་ཕྱི་ནང་གཉིས་དང་ཨ་རི་དང་ཡུ་རོབ་སོགས་ནས་གྱ་སྟོན་སྲུང་གཙི་ཞུས།
༼ལྔ།༽
ཕྱི་ཟླ་ ༡༠ ཚེས་ ༡༣ ཉིན། ཨ་རིའི་ས་ལེ་བྷུ་རེ་ (Salisbury University) གཙུག་ལག་སློབ་གཉེར་ཁང་གིས། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ལ་སློབ་ཆེན་དེའི་སྲིད་འཛིན་གཟེངས་རྟགས་ (Presidential Medal) ཞེས་པ་ཕུལ།
༼དྲུག༽
ཕྱི་ཟླ་ ༡༠ ཚེས་ ༡༨ ཉིན། བཀའ་ཤག་སྐབས་བཅོ་ལྔ་པའི་སྲིད་སྐྱོང་དང་སྐབས་བཅུ་དྲུག་པའི་བོད་མི་མང་སྤྱི་འཐུས་ཀྱི་སྔོན་འགྲོའི་འོས་བསྡུ་ཆེན་མོ་གནང་། ཐེངས་འདིར་ཁྱོན་བསྡོམས་དེབ་སྐྱེལ་བྱེད་མཁན་ ༨༨༣༢༦ བྱུང་བའི་ཁྲོད། སྤྱི་འཐུས་ལ་དངོས་སུ་འོས་འཕེན་མཁན་ ༤༦༨༩༠ དང་། སྲིད་སྐྱོང་ལ་དངོས་སུ་འོས་འཕེན་མཁན་ ༤༧༡༠༥ བྱུང་ཡོད་འདུག
༼བདུན།༽
ཕྱི་ཟླ་ ༡༠ ཚེས་ ༢༦ ཉིན། ཨ་རིའི་རྒྱལ་ཡོངས་རྩ་ཁྲིམས་ལྟེ་གནས་ (National Constitution Center) ཁང་གིས། ༢༠༡༥ ལོའི་ཨ་རིའི་རང་དབང་གཟེངས་རྟཊ་ (Liberty Medal) ཞེས་པ་དེ་༧གོང་ས་མཆོག་ལ་འབུལ་ལམ་ཞུས།
༼བརྒྱད།༽
ཕྱི་ཟླ་ ༡༡ ཚེས་ ༩ ཉིན། རྒྱ་གར་ལྷོ་ཕྱོགས་ཆིན་ནཱ་ཡེ་ (Chennai) ནང་ཡོད་པའི་གྲོང་ཁྱེར་ཚོང་ལས་ལྟེ་གནས་ཁང་དུ། རྒྱ་གར་གྱི་སྲིད་འཛིན་ཟུར་པ་ཨབ་དྷུལ་ཀཱ་ལམ་ (Dr. A P J Abdul Kalam) མཆོག་གི་རྗེས་དྲན་གཟེངས་རྟགས་ཐོག་མ་དེ་༧གོང་ས་མཆོག་ལ་ཕུལ། མཛད་སྒོའི་ཐོག་༧གོང་ས་མཆོག་གིས་དམ་པ་ཁོང་གི་རླབས་ཆེན་མཛད་པ་རྣམས་རྒྱུན་སྐྱོང་དགོས་པའི་ལམ་སྟོན་གནང་།
༼དགུ༽
ཕྱི་ཟླ་ ༡༢ ཚེས་ ༡༦ ཉིན། བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གིས་གསལ་བསྒྲགས་ཤིག་སྤེལ་ཏེ། ཨ་རིའི་ནེའུ་ཡོག་དང་ནེའུ་ཇིར་སི་གནས་གཞོན་ནུ་གནས་སྐབས་རིང་སྒོ་རྒྱག་རྒྱུ་ཡིན་སྐོར་བསྒྲགས། ཚེས་ ༢༦ ཉིན་ནེའུ་ཡོག་ཏུ་ཛ་དྲག་ཚོགས་འདུ་བསྐོངས་ཏེ་ནེའུ་ཡོག་ས་གནས་གཞོན་ནུ་སྒོ་རྒྱག་མིན་ཐད་འོས་བསྡུ་གནང་སྐབས་བརྒྱ་ཆ་ ༩༥ ལྷག་གིས་ས་གནས་གཞོན་ནུ་མུ་མཐུད་གནས་དགོས་པར་རྒྱབ་སྐྱོར་ཐོབ།
༼བཅུ།༽
ཕྱི་ཟླ་ ༡༢ ཚེས་ ༢༣ ཉིན་གྱི་ཐོ་རེངས་ཆུ་ཚོད་ ༢།༣༠ ཙམ་ལ་སྔ་འགྱུར་རྙིང་མའི་དབུ་འཛིན་ཁྲི་རབས་དྲུག་པ་སྟག་ལུང་རྩེ་སྤྲུལ་རིན་པོ་ཆེ་མཆོག་གནས་མཆོག་རྡོ་རྗེ་གདན་དུ་དགོངས་པ་ཆོས་དབྱིངས་སུ་འཐིམས། བོད་མིའི་སྒྲིག་འཛུགས་བཀའ་སྤྱི་འཐུས་གཉིས་ཀྱིས་མྱ་ངན་ཞུ་ཚིག་ཕུལ་ཞིང་། ༧གོང་ས་མཆོག་གིས་ཁོང་གི་མཛད་པར་ཡི་རངས་དང་མྱུར་བྱོན་གསོལ་འདེབས་ལྗགས་རྩོམ་མཛད།
གསར་འགོད་པ། པདྨ་མཚོ།
སྲིད་སྐྱོང་ལ་མགོ་འཁྲིད་ཡག་ཤོས་ཀྱི་གཟེངས་རྟགས་སྤྲད་པ་དེ་བདེན་པའི་དཔང་རྟགས་གང་ཡོད་དམ། སློབ་ཆེན་དེའི་དྲ་ངོས་ན་མི་འདུག་ཟེར།