ཉེ་ལམ་རྒྱ་གར་གསར་ལམ་ཁག་ཅིག་གིས་རྒྱ་གར་བྱང་ཕྱོགས་དྷ་རམ་ས་ལའི་བོད་མིའི་སྐྱབས་མགོན་༧ཏཱ་ལའི་བླ་མ་མཆོག་གི་བཞུགས་གནས་ཉེ་འཁོར་དུ་རྒྱ་ནག་གི་གསང་མྱུལ་བ་སྐོར་ཞིག་འཛིན་བཟུང་བྱས་ཡོད་པའི་གནས་ཚུལ་བཀོད་པའི་ཐད་རྒྱ་ནག་གཞུང་འབྲེལ་གོ་ལའི་དུས་བབ་གསར་ཁང་གིས་གནས་ཚུལ་དེ་བདེན་པ་མི་སྐོར་བཀོད་འདུག
རྒྱ་གར་བརྒྱུད་ལམ་ (Hindustan Times) ཞེས་པའི་སྟེང་གནས་ཚུལ་སྤེལ་བ་ལྟར་ན། ཁ་སང་རྒྱ་ནག་གཞུང་འབྲེལ་བརྒྱུད་ལམ་གོ་ལའི་དུས་བབ་ (Global Times) ཅེས་པས་རྒྱ་གར་གསང་བའི་ལས་ཁུངས་ཀྱི་ཉེན་རྟོག་པས་རྒྱ་ནག་གཞུང་གིས་གསང་ཉུལ་བ་ཆེད་གཏོང་གིས་རྒྱ་གར་བྱང་ཕྱོགས་དྷ་རམ་ས་ལར་བཞུགས་པའི་བོད་མིའི་དབུ་ཁྲིད་༧གོང་ས་སྐྱབས་མཆོན་ཆེན་པོ་མཆོག་ལྐོག་ཏུ་དགྲོང་རྒྱུའི་ངན་ཇུས་བཤམ་གྱི་ཡོད་ཚུལ་བཤད་ཡོད་སྐོར་བསྒྲགས་འདུག་ལ། རྒྱ་ནག་གཞུང་གིས་སྤེལ་བའི་བསྒྲགས་གཏམ་ཞིག་གི་ནང་ “རྒྱ་ནག་གཞུང་གིས་གསང་ཉུལ་བ་ཆེད་གཏོང་གིས་བོད་མིའི་དབུ་ཁྲིད་༧གོང་ས་མཆོག་ལྐོག་ཏུ་དགྲོང་རྩིས་འདུག”ཅེས་པའི་སྐད་ཆ་འདི་ནི་དོན་དམ་རྒྱལ་སྤྱིའི་དོ་སྣང་ཡོང་ཐབས་སུ་༧གོང་ས་མཆོག་གིས་རྒྱ་ནག་གཞུང་ལ་སུན་གཙེར་གཏོང་ཐབས་ཤིག་ཡིན་ལུགས་བཤད་འདུག
བོད་ལྗོངས་དྲ་ཚིགས་ (China Tibet Online)ཞེས་པའི་སྟེང་སྤེལ་བའི་གནས་ཚུལ་ནང་། རྒྱ་གར་བརྒྱུད་ལམ་ཁག་ཏུ་རྒྱ་ནག་གཞུང་གིས་གསང་ཉུལ་བ་ཆེད་གཏོང་གིས་༧གོང་ས་མཆོག་གི་སྐུ་ཕྱྭར་གནོད་འཚེ་གཏང་རྩིས་ཡོད་སྐོར་བརྗོད་པ་དེ་ནི་གཞི་མེད་དཀྲོག་གཏམ་ཁོ་ན་ཡིན་ཞིང་། དེང་སྐབས་རྒྱལ་ཁབ་མང་པོ་ཞིག་གིས་༧གོང་ས་མཆོག་ལ་ཁ་རྡུང་གཏོང་གི་ཡོད་པར་བརྟེན། རྒྱལ་སྤྱིའི་སྟེང་ཁོང་གི་ཤུགས་རྐྱེན་ཉམས་རྒུད་དུ་ཕྱིན་ཡོད་ལུགས་སོགས་བརྗོད་འདུག
རྒྱ་གར་གྱི་དབྱིན་སྐད་གསར་ལམ་ (The Tribune) ཞེས་པའི་སྟེང་། ཉེ་བའི་ལོ་ངོ་འདི་དག་རིང་རྒྱ་གར་གསང་བའི་ལས་ཁུངས་དང་རྒྱ་གར་ཧི་མ་ཅལ་མངའ་སྡེའི་ཉེན་རྟོག་ཚན་པས་༧གོང་ས་མཆོག་གི་བཞུགས་སྒར་ཉེ་འཁོར་དུ་རྒྱ་ནག་གི་གསང་ཉུལ་བ་ཁ་ཅིག་འཇུ་བཟུང་ཐུབ་ཡོད་པ་དང་། རྒྱ་རིགས་གསང་ཉུལ་བ་དེ་ཚོའི་ལག་ཏུ་༧གོང་ས་མཆོག་གི་བཞུགས་སྒར་གྱི་ས་ཁྲ་དང་ཡིག་ཆ། གསང་བའི་གནས་ཚུལ་སོགས་ཉར་ཚགས་བྱས་ཡོད་པ་ལག་སོན་བྱུང་སྟབས། ཧི་མ་ཅལ་མངའ་སྡེའི་ཉེན་རྟོག་ཚན་པས་ཞིབ་ཕྲའི་གནས་ཚུལ་ཁག་མངའ་སྡེའི་ནང་སྲིད་ལས་ཁུངས་སུ་ཕུལ་བ་དང་། མ་འོངས་པར་མངའ་སྡེའི་ནང་སྲིད་ལས་ཁུངས་ཀྱིས་རྒྱ་གར་དབུས་ནང་སྲིད་ལས་ཁུངས་སུ་སྙན་གསེང་འབུལ་བ་བརྒྱུད། ༧གོང་ས་མཆོག་གི་སྐུ་ཕྱྭའི་བདེ་སྲུང་སྔར་བས་ཡར་རྒྱས་ཚགས་ཚད་གཏོང་རྒྱུ་མ་ཟད། ཧི་མ་ཅལ་མངའ་སྡེའི་ཉེན་རྟོག་ཚན་པས་༧གོང་ས་མཆོག་གི་བཞུགས་སྒེར་མཐའ་འཁོར་དུ་སྤུས་ཚད་ལེགས་པའི་པར་ལེན་འཕྲུལ་ཆས་དང་། ཅ་དངོས་ཞིབ་བཤེར་འཕྲུལ་ཆས་སོགས་ཉེན་སྲུང་འཕྲུལ་ཆས་ ༣༦༠ གསར་འཛུགས་བྱ་རྒྱུ་ཡིན་སྐོར་སོགས་འཁོད་འདུག
གནས་ཚུལ་འདིའི་ནང་མུ་མཐུད་དུ། ན་ནིང་ཕྱི་ཟླ་ ༩ ནང་རྒྱ་ནག་གཞུང་གིས་༧གོང་ས་མཆོག་གིས་ཁ་བྲལ་རིང་ལུགས་ཀྱི་ལས་འགུལ་སྤེལ་རྒྱུ་མཚམས་འཇོག་དགོས་པའི་ཉེན་བརྡ་བཏང་ཡོད་སྐོར་དང་། ཡང་ཕྱོགས་གཅིག་གནས་རྒྱ་ནག་གི་དཔོན་རིགས་ཚོས་༧གོང་ས་མཆོག་དགུང་ལོ་བགྲོས་པོ་ཆགས་ཀྱི་ཡོད་སྟབས། ད་ནི་འདམ་ག་ཞིག་བཟོས་པ་ཡིན་ན། དེ་གཞུང་དམངས་གཉི་གར་ཕན་པའི་ཛ་དྲག་གི་འབོད་སྐུལ་ཡང་ཞུས་ཡོད་ལུགས་བརྗོད་འདུག
གསར་འགོད་པ། པདྨ་རྒྱལ།
