ད་ལྟ་རང་རྒྱལ་སྤྱིའི་བརྒྱུད་ལམ་ཁག་ཏུ་ཐའེ་ཝན་གྱི་སྲིད་འཛིན་འོས་བསྡུའི་གྲུབ་འབྲས་ཐོན་པ་ལྟར་ན། ཐའེ་ཝན་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལྕམ་ཚའེ་ཡེན་ཝིན་ལགས་སུ་སྲིད་འཛིན་གྱི་རྒྱལ་ཁ་ཐོབ་སྟེ་ཐའེ་ཝན་ལོ་རྒྱུས་ནང་གི་བུད་མེད་སྲིད་འཛིན་ཐོག་མ་ཆགས་ཡོད་འདུག
ཐེངས་འདིའི་ཐའེ་ཝན་གྱི་སྲིད་འཛིན་འོས་བསྡུ་ཆེན་མོའི་ཁྲོད། དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལྕམ་ཚའེ་ཡེན་ཝིན་ Tsai Ing-wen ལ་འོས་གྲངས་ ༦༨༩༤༧༤༤ ཐོབ་སྟེ་བརྒྱ་ཆ་ ༥༦།༡ ཟིན་ཡོད་པ་དང་། ཐའེ་ཝན་གོ་མིན་ཏང་ཚོགས་པའི་སྲིད་འཛིན་འོས་མི་སྐུ་ཞབས་ཨེ་རིག་ཆོ་ལེ་ལུན་ Eric Chu Li-luan ལ་འོས་ ༣༨༡༣༣༦༥ ཐོབ་སྟེ་བརྒྱ་ཆ་ ༣༡།༠༠ ཟིན་ཡོད་འདུག དེ་བཞིན། མི་མང་ཚོགས་པའི་སྲིད་འཛིན་འོས་མི་ཅམ་སི་སོན་ James Soong ལགས་སུ་འོས་ ༡༥༧༦༨༦༡ ཐོབ་སྟེ་བརྒྱ་ཆ་ ༡༢།༨ ཟིན་ཡོད་འདུག
ལྕམ་ཚའེ་ཡེན་ཝིན་ལ་སྲིད་འཛིན་རྒྱལ་ཁ་ཐོབ་རྗེས་ཁོང་མོས་གཏམ་བཤད་སྤེལ་བའི་ནང་། དེ་རིང་ཐའེ་ཝན་མི་མང་གི་བསམ་བློའི་འཕེལ་ཕྱོགས་ཤིག་མངོན་འགྱུར་བྱས་ཡོད་པ་དང་། ང་ཚོས་འཛམ་གླིང་མི་མང་ལ་རྒྱ་ནག་མི་སེར་རྒྱལ་ཁབ་དེ་དམངས་གཙོ་ཡིན་པ་གསལ་སྟོན་བྱས་ཡོད། འདི་ནི་ཐའེ་ཝན་མི་མང་ས་ཡ་ ༢༣ གྱིས་འབད་འབུང་བྱས་པའི་གྲུབ་འབྲས་རླབས་ཆེན་ཞིག་ཡིན། ཞེས་སོགས་གསུངས་འདུག
སྲིད་དོན་དབྱེ་ཞིབ་པ་མང་པོ་ཞིག་གིས། ༢༠༠༠ ལོར་དམངས་གཙོ་ཡར་ཐོན་ཚོགས་པའི་སྲིད་འཛིན་དང་པོ་ཁྲིན་ཧྲི་ཕེན་སྲིད་འཛིན་དུ་བསྡད་སྐབས། ཐའེ་ཝན་གྱི་གྲོས་ཚོགས་འཐུས་མི་མང་ཆེ་བ་གོ་མིན་ཏང་ཚོགས་པའི་མི་སྣ་ཆགས་ཡོད་སྟབས། ཁྲིན་ཧྲི་ཕིན་གྱི་ལས་དོན་མང་པོ་ཞིག་མངོན་འགྱུར་བྱེད་ཐུབ་མེད་ཀྱང་། ཐེངས་འདིར་ཐའེ་ཝན་གྲོས་ཚོགས་ནང་ཁྱོན་འཐུས་མི་ ༧༩ ཡོད་པ་ལས་དམངས་གཙོ་ཡར་ཐོན་ཚོགས་པར་རྐུབ་སྟེགས་ ༥༠ དང་། གོ་མིན་ཐང་ཚོགས་པར་རྐུབ་སྟེགས་ ༢༤ བཅས་ཐོབ་ཡོད་སྟབས། སྲིད་འཛིན་ཚའེ་ཡེན་ཝིན་གྱི་སྟོབས་ཤུགས་ཆེན་པོ་ཆགས་ཏེ་ལས་དོན་ལེགས་འགྲུབ་ཆེན་པོ་ཡོང་རྒྱུ་ཡིན་པའི་ཚོད་དཔག་བྱེད་བཞིན་ཡོད།
ཐེངས་འདིར་འོས་བསྡུའི་རྒྱལ་ཁ་ཐོབ་པའི་ལྕམ་ཚའེ་ཡེན་ཝིན་ལགས་ཀྱིས་དེ་སྔོན་རྒྱ་ནག་དང་མཉམ་འབྲེལ་བྱེད་འདོད་མེད་པའི་རྣམ་འགྱུར་ཤུགས་ཆེན་བསྟན་ཡོད་ཀྱང་། ཉེ་ལམ་གྱི་གཏམ་བཤད་ཁག་ཏུ་ཐའེ་ཝན་མི་མང་ལ་རྒྱ་ནག་གི་དཔལ་འབྱོར་དགོས་མཁོ་ཡོད་པ་དང་། ཁོང་མོས་རྒྱ་ནག་སྐམ་ས་ཆེན་མོ་དང་ཞི་བདེ་མཉམ་གནས་ཡོང་ཐབས་ཀྱི་སྲིད་བྱུས་འཛིན་རྒྱུ་ཡིན་སྐོར་སོགས་བརྗོད་ཡོད།
ཐེངས་འདི་ནི་ཐའེ་ཝན་གྱི་སྲིད་འཛིན་འོས་འདེམས་ཐེངས་ ༡༤ པ་དེ་ཡིན་པ་དང་། ཐའེ་ཝན་སྲིད་འཛིན་འོས་བསྡུ་དེ་ལོ་ ༤ རེའི་མཚམས་སུ་གནང་གི་ཡོད་ལ། ད་སྔའི་སྲིད་འཛིན་མཱ་ཡོན་ཅུག་ནི་ ༢༠༠༨ ལོར་གོ་མིན་ཏང་ཚོགས་པའི་སྲིད་འཛིན་འོས་མིར་བཞེངས་ཏེ་རྒྱལ་ཁ་ཐོབ་པ་ཞིག་ཡིན་ལ། ༢༠༡༢ ལོར་བསྐྱར་དུ་འོས་བསྡུའི་རྒྱལ་ཁ་ཐོབ་སྟེ་ད་བར་སྐབས་གཉིས་རིང་སྲིད་འཛིན་གནང་ཡོད།
ཐའེ་ཝན་ནང་སྲིད་དོན་ཚོགས་པ་མང་པོ་ཡོད་པ་ལས་ཤུགས་ཆེ་ཤོས་དམངས་གཙོ་ཡར་ཐོན་ཚོགས་པ་དང་གོ་མིན་ཏང་ཚོགས་པ། མི་མང་ཚོགས་པ་གསུམ་ཡིན་ཞིང་། ཐའེ་ཝན་གོ་མིན་ཏང་ཚོགས་པས་རྒྱ་ནག་གཅིག་གི་ལྟ་བ་བཟུང་སྟེ་སྲིད་འབྱོར་རིག་གསུམ་ཐོག་རྒྱ་ནག་དང་མཉམ་འབྲེལ་ཤུགས་ཆེན་བྱེད་བཞིན་ཡོད་པ་དང་། ཐའེ་ཝན་དམངས་གཙོ་ཡར་ཐོན་ཚོགས་པས་དཔལ་འབྱོར་ཐད་རྒྱ་ནག་ལ་མཉམ་འབྲེལ་བྱེད་འདོད་ཡོད་ཀྱང་། ཆབ་སྲིད་དང་རྒྱལ་ཁབ་ཀྱི་བདག་དབང་ཐད་ནས་ཁེར་ཚུགས་ཀྱི་ལྟ་བ་མཁྲེགས་འཛིན་བྱེད་ཀྱིན་ཡོད།
ཐའེ་ཝན་སྲིད་འཛིན་མི་མང་གིས་ཐད་ཀར་འོས་འདེམས་བྱེད་པའི་ལམ་སྲོལ་དེ་ ༡༩༩༦ ལོར་ཐོག་མར་མགོ་བཙུགས་ཡོད་པ་དང་། ༡༩༩༦ ནས་ ༢ ༠༠༠ ལོའི་བར་གོ་མིན་ཏང་ཚོགས་པའི་སྐུ་ཞབས་ལི་ཏིན་ཝཱེ་དང་། ༢༠༠༠ ནས་ ༢ ༠༠༨ ལོའི་བར་དམངས་གཙོ་ཡར་ཐོན་ཚོགས་པའི་སྐུ་ཞབས་ཁྲིན་ཧྲི་ཕེན། ༢ ༠༠༨ ནས་ ༢༠༡༦ ལོའི་བར་གོ་མིན་ཏང་ཚོགས་པའི་མཱ་ཡོན་ཅུག་སྲིད་འཛིན་དུ་བསྡད་ཡོད།
ལི་ཏིན་ཝཱེ་སྲིད་འཛིན་སྐབས་ ༡༩༩༧ ལོའི་ཟླ་ ༣ པར་ཐེངས་དང་པོར་༧གོང་ས་མཆོག་ཐའེ་ཝན་ནང་གདན་འདྲེན་ཞུས་ཡོད་པ་དང་། དེའི་རྗེས་ཁྲིན་ཧྲི་ཕིན་སྲིད་འཛིན་ཡིན་སྐབས་ ༢༠༠༡ ལོའི་ཟླ་ ༤ པར་ཐེངས་གཉིས་པར་༧གོང་ས་མཆོག་ཐའེ་ཝན་ནང་གདན་འདྲེན་ཞུས་ཡོད། མ་ཡོན་ཅུག་སྲིད་འཛིན་ཡིན་སྐབས་ ༢༠༠༩ ལོའི་ཟླ་ ༨ པར་ཐེངས་གསུམ་པར་༧གོང་ས་མཆོག་ཐའེ་ཝན་ནང་ཕེབས་ཡོད།
རྒྱལ་སྤྱིའི་སྲིད་དོན་ཉམས་ཞིབ་པ་དང་ཐའེ་ཝན་རྒྱལ་ཞེན་རིང་ལུགས་པ་མང་པོ་ཞིག་གིས་ཐེངས་འདིའི་ཐའེ་ཝན་སྲིད་འཛིན་འོས་བསྡུ་ཆེན་མོ་དེ་ནི། ཐེ་ཝན་རྒྱ་ནག་དང་མཉམ་སྡོད་རྒྱུ་ཡིན་ནམ། ཐའེ་ཝན་རང་བཙན་བྱེད་རྒྱུ་ཡིན། ཞེས་པའི་གདམ་ག་ཆེན་པོ་ཞིག་ཡིན་པ་དང་། ཐེངས་འདིའི་ཐའེ་ཝན་དམངས་གཙོ་ཡར་ཐོན་ཚོགས་པ་དང་གོ་མིན་ཏང་ཚོགས་པ་གཉིས་ཀྱི་རྒྱལ་ཕམ་དེ་རྒྱ་ནག་གི་རྒྱལ་ཕམ་ཞིག་ཀྱང་ཡིན་པར་འདོད།
ཐའེ་ཝན་གྱི་སྲིད་འཛིན་མཱ་ཡོན་ཅུག་ཐོག་མར་བོད་དོན་ལ་རྒྱབ་སྐྱོར་གནང་མཁན་ཞིག་ཡིན་པའི་ངོས་འཛིན་བྱས་ཡོད་པ་མ་ཟད། ༢༠༠༨ ལོར་བོད་ནང་ཞི་རྒོལ་བྱུང་སྐབས་མཱ་ཡོན་ཅུག་ཐའེ་ཝན་ནང་གི་བོད་མི་ཚོའི་ལས་འགུལ་ཐོག་དངོས་སུ་ཕེབས་ཡོད། འོན་ཀྱང་སྲིད་དོན་དབྱེ་ཞིབ་པ་འགའ་རེས། དེ་ནི་སྐབས་དེར་ཐའེ་ཝན་སྲིད་འཛིན་འོས་བསྡུ་འགྲོ་བཞིན་ཡོད་པ་དང་། ཐའེ་ཝན་དམངས་གཙོ་ཡར་ཐོན་ཚོགས་པས་ “དེ་རིང་གི་བོད་དང་སང་ཉིན་གྱི་ཐའེ་ཝན” ཟེར་བ་སོགས་ཀྱི་འབོད་ཚིག་བསྒྲགས་པ་སོགས་ལ་བརྟེན་ཏེ། མཱ་ཡོན་ཅུག་གིས་འོས་ཐོབ་ཐབས་སུ་རྒྱ་ནག་ལ་མཉམ་འབྲེལ་བྱེད་འདོད་མེད་པའི་རྣམ་པ་ཙམ་བསྟན་པ་ཡིན་སྐོར་བརྗོད།
ཐེངས་འདིར་གསར་དམ་བདམས་ཐོན་བྱུང་བའི་ལྕམ་ཚའེ་ཡེན་ཝིན་ནི་དེ་སྔ་བོད་དོན་ལ་རྒྱབ་སྐྱོར་ཆེན་པོ་གནང་མཁན་ཞིག་ཡིན་པ་དང་། ༢༠༠༩ ལོའི་གསུམ་བཅུའི་དུས་དྲན་གྱི་ཐའེ་ཝན་གྱི་ལས་འགུལ་ནང་མོ་རང་དངོས་སུ་མཉམ་ཞུགས་གནང་ཡོད་པ་མ་ཟད། ལོ་དེའི་ཕྱི་ཟླ་ ༦ པའི་ནང་༧གོང་ས་མཆོག་ཐའེ་ཝན་དུ་ཕེབས་སྐབས་ཀའོ་ཞུན་གྲོང་ཁྱེར་ནང་ཚའེ་ཡེན་ཝིན་གྱིས་མཇལ་ཁ་ཞུས་ཡོད། དེ་བཞིན། ༢༠༡༢ ལོའི་ཟླ་ ༦ པའི་ནང་བོད་མིའི་སྒྲིག་འཛུགས་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་ཐའེ་ཝན་ནང་ཕྱོགས་སྐྱོད་གནང་སྐབས་ཁོང་མོར་ཐུག་འཕྲད་གནང་སྟེ་བོད་དོན་སྐོར་ལ་བཀའ་མོལ་གནང་ཡོད།
སྲིད་དོན་པ་ཁ་ཤས་ཀྱིས་ ༢༠༡༥ ལོའི་ཟླ ༡༡ ཚེས ༧ ཉིན། སེང་གྷ་པོའི་ཤམ་པ་ལ་གསོལ་མགྲོན་ཁང་དུ། རྒྱ་ནག་གི་སྲིད་འཛིན་ཞི་ཅིན་ཕིན་དང་ཐའེ་ཝན་གྱི་སྲིད་འཛིན་མཱ་ཡོན་ཅིག་གཉིས་ལོ་རྒྱུས་རིང་བཞིན་ལྡན་པའི་ཐུག་འཕྲད་ཐོག་མ་གནང་པ་དེ། ཐེངས་འདིར་དམངས་གཙོ་ཡར་ཐོན་ཚོགས་པའི་ལྕམ་ཚའེ་ཡེན་ཝིན་ལ་རྒྱལ་ཁ་འཐོབ་རྒྱུ་ཡིན་པ་གཏན་འཁེལ་བར་སོང་། ‘གོ་གཉིས་ལོའི་ཐུན་མོང་གྲོས་ཆོད’ ཟེར་བ་ཁྲིམས་མཐུན་བཟོ་ཐབས་དང་། རྒྱ་ནག་གཅིག་གི་སྲིད་བྱུས་རྒྱུན་འཁྱོངས་ཡོང་ཐབས་ཡིན་སྐོར་བརྗོད།
‘གོ་གཉིས་ལོའི་ཐུན་མོང་གྲོས་ཆོད།’ ཟེར་བ་དེ་ནི། རྒྱ་ནག་གཞུང་དང་ཐའེ་ཝན་གོ་མིན་ཏང་ཚོགས་པས་ ༡༩༩༢ ལོར་རྒྱ་ནག་དང་ཐའེ་ཝན་བར་གྲོས་མོལ་ཞིག་བྱས་ཏེ་ཐུན་མོང་གི་ངོས་འཛིན་ཟེར་བའི་གྲོས་ཆོད་ཅིག་བཞག་ཡོད་པ་དང་། དེ་ནི་རྒྱ་ནག་གཅིག་ཡིན་པར་འགྲེལ་བཤད་སོ་སོར་རྒྱག་སྟངས་ཡོད་པ་ཞིག་ཡིན་སྐོར་རྗོད་ཀྱི་ཡོད་ཀྱང་། དམངས་གཙོ་ཡར་ཐོན་ཚོགས་པས་གོ་གཉིས་ལོའི་ཐུན་མོང་གི་གྲོས་ཆོད་ཟེར་བ་ཞིག་རྩ་བ་ནས་ངོས་ལེན་བྱེད་ཀྱི་མེད་པ་མ་ཟད། དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལྕམ་ཚའེ་ཡེན་ཝིན་གྱིས་ཀྱང་དེར་ངོས་ལེན་བྱེད་ཀྱི་མེད།
ལྕམ་འཚེ་ཡེན་ཝིན་མཆོག་ནི་ Tsai Ing-wen ལགས་ནི་ ༡༩༥༦ ཟླ་ ༨ ཚེས་ ༣༡ ཉིན་ཐའེ་པེ་རུ་སྐྱེས་ཤིང་། ཐའེ་ཝན་རྒྱལ་གཙུག་ལག་སློབ་ཆེན་ནས་ཁྲིམས་ལུགས་ཐོག་སློབ་སྦྱོང་དང་ཨ་རིར་ཁྲིམས་ལུགས་རམ་འབྱམས་པ་ཐོན་ཡོད། དེའི་རྗེས་དབྱིན་ཇུའི་ལོན་ཌོན་གཙུག་ལག་སློབ་ཆེན་ནས་ཁྲིམས་ལུགས་ཐོག་འབུམ་རམས་པ་ཐོན་ཡོད། ༡༩༩༣ ལོ་ནས་ཐའེ་ཝན་གཞུང་ནང་ཕྱག་ལས་གནང་མགོ་བཙུགས་ཡོད་པ་དང་། ༢༠༠༤ ལོ་ནས་ཐའེ་ཝན་དམངས་གཙོ་ཡར་ཐོན་ཚོགས་པའི་ནང་འཛུལ་ཞུགས་གནང་སྟེ། ༢༠༠༨ ལོར་དམངས་གཙོ་ཡར་ཐོན་ཚོགས་པའི་ཚོགས་གཙོར་འོས་འདེམས་བྱུང་། ༢༠༡༢ ལོར་སྲིད་འཛིན་འོས་མིར་བཞེངས་ཡོད་ཅིང་། ༢༠༡༤ ལོར་བསྐྱར་དུ་དམངས་གཙོ་ཡར་ཐོན་ཚོགས་པའི་ཚོགས་གཙོར་བསྐོ་བཞག་གནང་ཡོད། ཁོང་མོས་དེ་སྔོན་ཐའེ་ཝན་གཞུང་གི་དཔལ་འབྱོར་དང་ཚོང་ལས་སྡེ་ཚན་ནང་ཕྱག་ལས་གནང་སྟེ་གྲུབ་འབྲས་ཆེན་པོ་བླངས་ཡོད།
ཐའེ་ཝན་ལ་མི་འབོར་ ༢༣༤༦༡༧༠༨ ཡོད་པ་དང་། ཨེ་ཤ་ཡའི་ནང་གི་དཔལ་འབྱོར་སྟོབས་ཆེ་ཤོས་ཨང་ ༥ པ་དང་། འཛམ་གླིང་གི་དཔལ་འབྱོར་ཨང་ ༢༥ པ་དེ་ཆགས་ཡོད།
གསར་འགོད་པ། དོན་གྲུབ་བཀྲ་ཤིས།
རྩོམ་སྒྲིག་པ་ཆེན་མོའི་གསར་འགྱུར་ཧ་ཅང་ཚད་མཐོན་པོ་རེད། དུས་ཚོད་བྱུང་སྐབས་གསར་འགྱུར་རེ་འབྲི་རྒྱུ་མ་བརྗེད་པ་གནང་རོགས།
ཐེ་ཝན་དམངས་གཙོ་ཡར་ཐོན་ཚོགས་པའི་ཆབ་སྲིད་པ་དག་གིས་རྒྱ་ནག་མི་སེར་རྒྱལ་ཁབ་ཟེར་ན་ཐེ་ཝན་ཡིན། ཐེ་ཝན་ཟེར་ན་རྒྱ་ནག་མི་སེར་རྒྱལ་ཁབ་ཡིན་ཟེར་བཞིན་ཡོད་པ་རེད། ལྕམ་སྐུ་མཆོག་གི་གསུང་བཤད་གྲགས་ཆེན་ཞིག་ཏུ་༼རྒྱ་ནག་མི་སེར་རྒྱལ་ཁབ་དེ་ཐེ་ཝན་མི་མང་ལ་དབང་བ་དང་། ཐེ་ཝན་མི་མང་ས་ཡ་ཉེར་གསུམ་དེ་ཐེ་ཝན་རྒྱལ་དམངས་སྲིད་གཞུང་གིས་སྲུང་སྐྱོབ་བྱེད་དགོས། ༽གསུང་ཡོད་། གོང་གི་ཁོ་མོའི་གཏམ་བཤད་ནང་དུ་ཡང་ག་རེ་གསུང་འདུག་ཟེར་ན་་་དེ་རིང་ཐའེ་ཝན་མི་མང་གི་བསམ་བློའི་འཕེལ་ཕྱོགས་ཤིག་མངོན་འགྱུར་བྱས་ཡོད་པ་དང་། ང་ཚོས་འཛམ་གླིང་མི་མང་ལ་རྒྱ་ནག་མི་སེར་རྒྱལ་ཁབ་དེ་དམངས་གཙོ་ཡིན་པ་གསལ་སྟོན་བྱས་་་་ཟེར་བའི་ཚིག་དོན་་འདི་ལ་གོ་རྒྱུ་ཆེན་པོ་འདུག
སྐུ་ལྕམ་ཚེ་ཡིན་ཝུན་མཆོག་གིས་བོད་དོན་ལ་རྒྱབ་སྐྱོར་རབ་དང་རིམ་པ་གནང་བར་ཐུགས་རྗེ་ཤིན་ཏུ་ནས་ཆེ། དང་པོ་ཁྱེད་རང་སང་གནངས་ཉིན་ཨ་རིའི་མི་སྣར་མཇལ་འཕྲད་གནང་འཆར་ཡོད་པ་དེའི་སྟེང་ནས་གཟི་བརྗིད་ངོམ་དགོས། འདི་ནི་ཁྱེད་རང་སྲིད་འཛིན་ཆགས་རྗེས་ཕྱི་རྒྱལ་གྱི་གནད་ཡོད་མི་སྣར་མཇལ་འཕྲད་གནང་བ་ཐོག་མ་དེ་ཆགས་ཡོད། གཉིས་པ་སྤྱི་ཟླ་ ༥ ་ཚེས་ ༢༠ ཉིན་ཁྱེད་ཀྱིས་ཐེ་ཝན་སྲིད་འཛིན་ལས་འཁུར་མཛད་སྒོའི་ཉིན་མོར་འཛམ་གླིང་མི་དམངས་དང་ལྷག་པར་དུ་རྒྱ་ནག་དམར་གཞུང་ལ་འགྲམ་ལྕགས་ཚ་ཐག་ཆོད་པ་ཞིག་གཞུ་དགོས།
ད་གྲོགས་ནག་ཤོད་རྨུ་ཐག་ལགས་ཀྱིས་དགོངས་ཚུལ་དང་གསལ་བཤད་གནང་བར་བཀའ་དྲིན་ཆེ་ཞུ།
གོང་བཀོད་གནས་ཚུལ་དེའི་ཐད་ནས་ངས་རྩེད་མཚར་བཤད་པ་མིན།
ངས་ཤེས་ཚོད་ལ། ཐའེ་ཝན་གོ་མའི་ཕྱོགས་གཏོགས་དང་དེའི་རྒྱབ་དཔུང་བྱེད་མཁན་ཚོས་གོ་中華民國Republica of China ཀྲུང་ཧྭ་མི་སེར་རྒྱལ་ཁབ་དེའི་ཕྱོགས་སུ་ཁྲིད་གང་ནུས་བྱེད་པ་མ་གཏོགས། སྔར་ནས་ཐའེ་ཝན་གླིང་ཕྲན་སྟེང་གི་ས་སྐྱེས་རྡོ་སྐྱེས་ཀྱི་མི་རིགས་དེ་ཚོས་ཀྲུང་ཧྭ་མི་སེར་རྒྱལ་ཁབ་དེར་འདོད་པ་མེད་པར་མ་ཟད། དེར་ངོ་རྒོལ་དང་དེའི་ཆེད་དུ་ཚེ་སྲོག་བཏང་མྱོང་བ་ངས་ཤེས་ཡོད། ད་དུང་ཐའེ་ཝན་གྱི་གླིང་ཕྲན་དེའི་སྟེང་དུ་སྔར་མུས་གནས་སྡོད་པའི་ཤེས་ལྡན་པ་ཚོས་རྩོམ་ཡིག་འབྲི་བ་དང་ཤེས་ཡོད་ཀྱི་ལས་ཀ་བྱེད་པ་སོགས་ཀྱི་འདོད་མོས་མེད་པར། ནང་དུ་འཛུལ་ནས་ལས་ཀ་མཚམས་འཇོག་བྱས་པ་སོགས་ཀྱི་གནས་ཚུལ་སོགས་ཀྱང་ཤེས་ཀྱི་ཡོད། དེ་བས་ཀྲུང་ཧྭ་མི་སེར་རྒྱལ་ཁབ་中華民國 ཟེར་བ་འདི་ནི་གོ་མིན་སྲིད་གཞུང་ཕམ་ཉེས་ཐེབས་ནས་ཐའེ་ཝན་གླིང་དུ་གནས་བཅས་ཀྱི་བྱུང་རབས་ང་ཚོས་ཤེས་པ་ལས་ཁོང་ཚོར་རྒྱུས་མངའ་ཆེ་བ་བཤད་ཅི་ལ་དགོས། དེ་བས། ལྕམ་སྐུ་ཚའེ་ཡིན་ཝིན་ལགས་ཀྱི་གཏམ་བཤད་ནང་དུ་ཚིག་དེ་འདྲ་ཞིག་བེད་སྤྱད་ཡོད་ཚེ། དེ་མི་ཐའེ་ཝན་མི་དམངས་དང་སྤྱི་དང་སྒོས་སུ་དམངས་གཙོ་ཡར་ཐོན་ཚོགས་པའི་གཙི་འཛིན་ཞིག་གི་སྐད་ཆ་ཡིན་པར་ཁས་ལེན་དཀའ་བ་ཞིག་རེད་འདོད།
ད་དུང་ལྕམ་སྐུ་ཚའེ་ཡིན་ཝིན་ལགས་སྲིད་འཛིན་འོས་ཐོབ་ཀྱི་བརྙན་རོས་འདྲ་མིན་བཟོས་པའི་ནང་དུ་གོ་མིན་ཏང་གི་དར་ཆ་ཕར་ཙམ་ལ་བཞག་ནས། ལྕ་སྐུ་མཆོག་གི་ལག་གི་དར་ཆ་གཞན་ཞིག་བཞག་པ་དེས་ཀྱང་ཐའེ་ཝན་གཞོན་རབས་པ་ཚོའི་བསམ་བློའི་ནང་སྙིང་ཕྱིར་བསྟན་འདུག་སྙམ། ད་དུང་ཐའེ་ཝན་གྱི་ཕྱི་སྐྱོད་ལག་ཁྱེར་Passport ཐོག་གི་Republic of China བི་མིང་དེ་བརྗེ་བོ་རྒྱག་དགས་སྐོར་ཐད་ཀྱང་རྩོད་ཀྱང་རྩོད་པ་མང་དུ་བྱུང་བ་དང་། མཐར་ཁོང་ཚོའི་ཕྱི་སྐྱོད་ལག་ཁྱེར་སྟེང་གི་ཡི་གེ་དེ་Taiwan Passport ཞེས་པར་བརྗེས་ཐུབ་པ་བྱུང་སྐོར་གསར་ལམ་ཁག་ནས་ཤུགས་ཆེར་བཤད་པ་ཁྱོད་ཀྱིས་གོ་མེད་པ་འདྲ། ད་དུང་གོ་མིན་ཏང་གི་དར་ཆེ་དེའི་སྐོར་ནས་ཀྱང་ཐའེ་ཝན་མི་དམངས་ནང་རྩོད་རྙོག་ཡོང་དང་ཡོང་བཞིན་པའི་གནས་སྟངས་སོགས་འདིར་འབྲིར་མི་ལངས་པས་མཚམས་འཇོག་རྒྱུ་ཡིན།
དྲ་གྲོགས་རྨུག་འབུ་ལགས། ཁྱོད་ཀྱི་དྲི་བ་དེ་རྩེ་མཚར་ཡིན་ན་འགྲིག་གི་རེད། དེ་མ་གཏོགས་རྒྱ་ནག་དང་ཐེ་ཝན་གྱི་རྩོད་གཞི་གསལ་བོ་ཞིག་མ་ངེས་པའི་རྟགས་སྟོན་གྱི་འདུག རྒྱ་གུང་ཁྲན་དང་ཐེ་ཝན་མཚོ་འགག་གཉིས་ཀྱི་རྩོད་གཞི་གཙོ་བོ་དེ་(རྒྱ་ནག་མི་སེར་རྒྱལ་ཁབ་ངོ་མ་དེ་སུ་ཡིན།)ཟེར་བ་འདི་ཡིན་པ་མཁྱེན་དགོས། ཚིག་འདི་ལ་རྒྱ་སྐད་ནང་ 中華民國 ་དང་ཨང་སྐད་ནང་ Republic of China ་འདི་རེད། བདག་དབང་འདིའི་ཆེད་དུ་ཐེ་ཝན་གྱི་གཞོན་སྐྱེས་མང་པོ་ཞིག་བཙོན་དུ་ཚུད་མྱོང་ཡོད་པ་རེད།
ཐེ་ཝན་གྱི་བུད་མེད་སྲིད་འཛིན་ཐོག་མར་བཀྲ་ཤིས་བདེ་ལེགས་ཞུ།
ཐེ་ཝན་རང་བཙན་ཕྱོགས་སུ་འཕུར་སོང་། བོད་པ་རང་སྐྱོང་ཆེད་དུ་ཤི་སོང་།
གསར་འགྱུར་འདིས་ཐེ་ཝན་དང་བོད་རྒྱ་དང་ནག་གསུམ་གྱི་གནད་དོན་སྐོར་ལ་མིག་རྒྱ་སྐྱེད་སོང་བློ་སྒོ་འབྱེད་སོང་།
སྐུ་ལྕམ་ཚའེ་ཡུན་ཝིན་ཐེ་ཝན་སྲིད་འཛིན་དུ་བདམས་པར་བཀྲ་ཤིས་བདེ་ལེགས་ཞུ། ཁོ་མོས་ཐེ་ཝན་གྱི་རྨི་ལམ་མངོན་འགྱུར་བྱེད་ཐུབ་པའི་ཡིད་ཆེས་ཡོད། 1999 ལོར་ཐེ་ཝན་གྱི་སྲིད་འཛིན་སྐུ་ཞབས་ལེ་ཏིན་ཝེ་བཞུགས་སྐབས། ཁོང་མོས་ཐེ་ཝན་གཞུང་གི་དཔལ་འབྱོར་སྡེ་ཚན་དུ་ཕྱག་ལས་གནང་སྟེ་ཐེ་ཝན་གྱིས་རྒྱལ་སྤྱིའི་དཔལ་འབྱོར་ཁྲོམ་རར་འཛུལ་ཞུགས་བྱེད་སྟངས་སྐོར་གྱི་ཇུས་འདོན་གནང་ཡོད་པ་མ་ཟད། སྐབས་དེའི་སྲིད་འཛིན་ལེ་ཏིན་ཝེ་ཡི་ཆབ་སྲིད་སྒྲིག་གཞིའི་དྲུང་ཡིག་ཀྱང་གནང་མྱོང་ཡོད་པ་རེད། དེའི་རྗེས་ལ་སྲིད་འཛིན་ཁྲིན་ཧྲུ་ཕིང་གི་སྐབས་སུའང་གཞུང་གི་ལས་དོན་གལ་ཆེན་མང་པོ་ཞིག་གི་ནང་འཛུལ་ཞུགས་བྱས་ཡོད་པ་དང་སྲིད་བློན་གཞོན་པའི་འགན་ཡང་འཁུར་ཡོད་ཀྱང་། ད་ལྟའི་སྲིད་འཛིན་ལས་ཐོག་མ་ཡུན་ཅའུ་སྐབས་སུ་ཁོང་མོར་ཉམས་ཉེས་ཆེན་པོ་བཏང་སྟབས་ཐེ་ཝན་གྱི་དཔལ་འབྱོར་ཐོག་ཉམས་གུད་ཆེན་པོ་ཐེབས་པའི་ངོས་འཛིན་བྱེད་བཞིན་ཡོད།
༢༠༡༦ ལོའི་ཐའེ་ཝན་གྱི་སྲིད་འཛིན་གསར་པའི་འོས་འདེབས་དེ་ལྕམ་སྐུ་ཚའེ་ཡིན་ཝིན་蔡英文ལགས་ལ་ཐོབ་པར་རྟེན་འབྲེལ་ཞུ། འོན་ཀྱང་གསུང་བཤད་དུམ་བུ་ལུང་ཚིག་དྲངས་པ་( ང་ཚོས་འཛམ་གླིང་མི་མང་ལ་རྒྱ་ནག་མི་སེར་རྒྱལ་ཁབ་དེ་དམངས་གཙོ་ཡིན་པ་གསལ་སྟོན་བྱས་ཡོད། ) ཟེར་བ་འདི་ཐའེ་མི་དམངས་སྤྱི་དང་། ཁྱད་པར་དུ་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ཞིག་གི་སྐད་ཆ་ཨེ་ཡིན་ནམ་བསམ་བྱུང་། ཁོང་ཚོས་མ་རྒྱུན་ཐའེ་ཝན་མི་མང་
ཟེར་བ་ལས་ “རྒྱ་ནག་མི་སེར་རྒྱལ་ཁབ་”ཟེར་མྱོང་མེད་ལ་ཟེར་ཡང་མི་སྲིད་པ་ཞིག་རེད།
འདིའི་སྐོར་ནས་སར་གནས་མ་ཁུངས་གང་ཡིན་དང་། གར་ཡོད་གསུང་རོགས། ཚིག་རྩ་ཐའེ་ཝན་གྲོགས་པོ་ཚོར་གསལ་བཤད་དང་ཁ རྩོད་རྒྱག་འདོད་བྱུང་སོང་།
དཔྱད་རྩོམ་ཐབ་ཆག་བརྒྱ་ལས་ལྷག་གི་གསར་འགྱུར་ཕུལ་བྱུང་གཅིག་བྲིས་འདུག གསར་འགོད་པ་དོན་གྲུབ་བཀྲ་ཤིས་མཆོག་ལ་བསྔགས་བརྗོད་ཡོད།
གསར་འགྱུར་འདི་ཀློག་པ་བརྒྱུད་ནས་ཐེ་ཝན་དང་བོད་ཀྱི་འབྲེལ་བ། ཐེ་ཝན་ནང་ཁུལ་གྱི་འགལ་འབྲེལ། ཐེ་ཝན་དང་རྒྱ་ནག་གི་གནས་སྟངས་ཡོངས་རྫོགས་གཅིག་ཤེས་ཀུན་གྲོལ་ཆགས་སོང་།
ཐེངས་འདིར་ཐེ་ཝན་སྲིད་འཛིན་ཁོང་མོར་ཐོབ་པ་ནི་ཐེ་ཝན་རང་བཙན་འཐབ་རྩོད་པ་ཞིག་ལ་རྒྱལ་ཁ་ཐོབ་པ་རེད། འདི་བོད་མི་མང་ལ་དྲན་སྐུལ་ཞིག་བྱས་ཡོད། ད་བ་ཐེ་ཝན་གོ་མིན་ཏང་ཚོགས་པའི་རྒྱ་ནག་གཅིག་གི་ལྟ་བ་འཁྱེར་ཡོད་པ་དང་། དམངས་གཙོ་ཡར་ཐོན་ཚོགས་པས་རྒྱ་ནག་མི་སེར་རྒྱལ་ཁབ་མཐའ་གཅིག་ཏུ་མཁྲེགས་འཛིན་བྱས་ཡོད།
གསར་འགྱུར་ཡག་པོ་བྲིས་འདུག དུས་བབ་ཚང་གི་རྩོམ་སྒྲིག་པ་དོན་གྲུབ་བཀྲ་ཤིས་མཆོག་ལ་ཐུགས་རྗེ་ཆེ་ཞུ།
མཁྱེན་ལྡན་མ་ཁྱེད་རང་ལ་ཐེ་ཝན་གྱི་སྲིད་འཛིན་འོས་བསྡུའི་རྒྱལ་ཁ་ཐོབ་པར་འཚམས་འདྲིའི་བཀྲ་ཤིས་བདེ་ལེགས་ཞུ། ཁྱེད་རང་སྲིད་འཛིན་དུ་བཞུགས་པའི་རྗེས་ལ་བོད་དང་བོད་དོན་མི་རྗེད་པའི་རེ་བ་དང་ཡིད་ཆེས་ཡོད། གོང་ས་རྒྱལ་བ་རིན་པོ་ཆེ་མཆོག་ཐེ་ཝན་ནང་གདན་འདྲེན་ཞུས་ཏེ་ཐེ་ཝན་མི་མང་ཆོས་ཀྱིས་འཚིམམ་པར་གནང་རོགས།