བོད་མིའི་སྐྱབས་བཅོལ་ལག་དེབ་(R.C)དུས་འགྱངས་བྱེད་པར་ཐོག་མར་དྲ་ཐོག་ནས་འགེང་ཤོག་བསྐངས་ཏེ་བདེ་སྲུང་ཡན་ལག་ལས་ཁུངས་བརྒྱུད་ཉིན་རེར་མི་གྲངས་ ༢༥ རེར་དུས་འགྱངས་གནང་བཞིན་ཡོད་འདུག
རྒྱ་གར་དབུས་ནང་སྲིད་ལས་ཁུངས་ཀྱི་བཀོད་ཁྱབ་འོག བོད་མིའི་སྐྱབས་བཅོལ་ལག་དེབ་(R.C)དུས་འགྱངས་གནང་ཕྱོགས་ཀྱི་འགྱུར་བ་དང་། དེ་བཞིན། ཕྱིར་སྐྱོད་ཆོག་མཆན་(Exit Permit)དང་ཕྱིར་ལོག་ཆོག་མཆན་(Return Visa)ཞུ་སྟངས་སོགས་ལ་འགྱུར་བ་ཁག་ཅིག་བཏང་ཡོད་པ་ལྟར། ཁ་སང་དྷ་ས་ས་གནས་མགོ་འཛིན་ལས་ཁུངས་ཀྱི་གོ་སྒྲིག་འོག གངས་སྐྱིད་གཉའ་ཁྲི་ཚོགས་ཁང་དུ། ཧི་མ་ཅལ་མངའ་སྡེའི་ཀང་ར་སྐོར་སྲུང་ལས་ཁུངས་ཀྱི་སྤྱི་ཁྱབ་གཞོན་པ་ (Sh. Pankaj Sharma)ལགས་ཀྱིས་དེའི་སྐོར་མི་མང་ལ་ལམ་སྟོན་གཏམ་བཤད་གནང་ཡོད་པ་དང་། ཟླ་ ༢ ཙམ་གྱི་སྔོན་ནས་བཟུང་སྐྱབས་བཅོལ་ལག་དེབ་དང་ཕྱིར་སྐྱོད་ཆོག་མཆན། དེ་བཞིན་ཕྱིར་ལོག་ཆོག་མཆན་བཅས་གང་ཡིན་རུང་ཐོག་མར་རྒྱ་གར་གཞུང་གི་སྙན་ཞུའི་འགེང་ཤོག་དྲ་རྒྱ་ (Indianfrro.gov.in)ཡི་ནང་གི་འགེང་ཤོག་བསྐངས་ཏེ། རྒྱ་གར་འབྲེལ་ཡོད་ལས་ཁུངས་ནང་ག་དུས་འགྲོ་དགོས་མིན་གཏན་འཁེལ་དགོས་ཀྱི་ཡོད་སྟབས། ས་གནས་མགོ་འཛིན་ལས་ཁུངས་དང་ས་གནས་རྒྱ་གར་ཉེན་རྟོག་ལས་ཁུངས་ནས་རྒྱབ་གཉེར་གནང་བ་བརྒྱུད་བདེ་སྲུང་ཡན་ལག་ལས་ཁུངས་ཀྱིས་སྔ་ཙམ་ནས་དུས་བཅད་བཟོ་ཡི་ཡོད་འདུག
དེ་རིང་འདི་གའི་གསར་འགོད་པས་དྷ་ས་ས་གནས་མགོ་འཛིན་བསོད་ནམས་རྡོ་རྗེ་ལགས་སུ། བོད་མིའི་སྐྱབས་བཅོལ་ལག་དེབ་(R.C)དུས་འགྱངས་སྐོར་ལ་འགྱུར་བ་ག་རེ་བཏང་ཡོད་དྲིས་པར་ཁོང་གིས། དེ་སྔོན་ཡིན་ན་དོ་བདག་སོ་སོ་རྒྱ་གར་ལས་ཁུངས་ནང་ཕྱིན་ནས་འགེང་ཤོག་བསྐངས་ཏེ། དེབ་རང་གི་ཐོག་ལ་ལོ་གཅིག་དང་ཡང་ན་ལོ་ལྔ་ཕར་འགྱངས་བྱེད་ཀྱི་ཡོད་པ་རེད། ཡིན་ནའང་། འདས་པའི་ཟླ་གཉིས་ཀྱི་སྔོན་དུ་འགྱུར་བ་ག་རེ་ཐེབས་ཡོད་པ་རེད་ལབ་ན་ལས་ཀ་ཚང་མ་དྲ་ཐོག་(Online)ཏུ་བཟོས་ཡོད་པ་དང་། སྐྱབས་བཅོལ་ལག་དེབ་དུས་འགྱངས་བྱེད་པར་ས་གནས་མགོ་འཛིན་ལས་ཁུངས་ནས་རྒྱབ་གཉེར་སྤྲད་དེ་བདེ་སྲུང་ཡན་ལག་ནས་དུས་ཚོད་བཟོ་ཡི་ཡོད་པ་རེད། དེ་སྔོན་ཡིན་ན་སྐྱབས་བཅོལ་ལག་དེབ་དུས་འགྱངས་བྱེད་པའི་གོ་སྐབས་བདུན་ཕྲག་གཅིག་ནང་ཉིན་གསུམ་མ་གཏོགས་མེད་ཀྱང་། ད་ལྟ་དྲ་ཐོག་ནས་ཉིན་རྟག་པར་དུས་འགྱངས་བྱེད་ཆོག་པ་མ་ཟད། ཉིན་རེར་མི་གྲངས་ ༢༥ རེར་སྐྱབས་བཅོལ་ལག་དེབ་དུས་འགྱངས་བྱེད་ཀྱི་ཡོད་པས། དེ་ལ་འགྱུར་བ་ཤུགས་ཆེན་པོ་ཕྱིན་ཡོད་པ་རེད། ཅེས་དང་།
ཁོང་གིས་མུ་མཐུད། དྲ་ཐོག་ནས་དུས་འགྱངས་བྱེད་དགོས་པ་དེར་དཀའ་ངལ་ག་རེ་ཡོད་པ་རེད་ལབ་ན། དཔེར་ན། སྐྱབས་བཅོལ་ལག་དེབ་ཀྱི་དུས་ཡུན་དེ་རིང་རྫོགས་ཀྱི་ཡོད་པ་ཡིན་ན། ཉིན་བཅུ་བཅོ་ལྔ་ཞིག་གི་སྔོན་ལ་དྲ་ཐོག་ནས་དུས་འགྱངས་བྱེད་དགོས་པའི་གནས་སྟངས་ཆགས་ངེས་རེད་ལ། དྲ་ཐོག་ནས་དུས་འགྱངས་བྱེད་སྐབས་དུས་ཚོད་དེ་ཉིན་ལྔ་དང་ཡང་ན་དྲུག་གི་རྗེས་སུ་སྟེར་སྲིད་པ་རེད། གང་ཡིན་ཟེར་ན། ཉིན་རེར་མི་ ༢༥ རེར་མ་གཏོགས་དུས་འགྱངས་བྱེད་ཀྱི་ཡོད་པ་མ་རེད། གལ་ཆེ་ཤོས་ཤིག་ལ་དྷ་རམ་ས་ལའི་སྐྱབས་བཅོལ་ལག་དེབ་ཡིན་ཡང་། ས་གནས་གཞན་དུ་མཐོ་སློབ་ནང་སློབ་སྦྱོང་བྱེད་བཞིན་ཡོད་མཁན་ཚོས་བདུན་ཕྲག་གཅིག་ཙམ་གྱི་སྔོན་ནས་དྷ་རམ་ས་ལར་ཡོང་སྟེ། དྲ་ཐོག་གི་འགེང་ཤོག་སྐོང་དགོས་པ་ཞིག་ཆགས་ཀྱི་ཡོད་པ་རེད། དྲ་ཐོག་ནས་འགེང་ཤོག་སྐོང་བ་དེར་མཚོན་ན། སློབ་སྦྱོང་ཡོད་མཁན་ཞིག་ཡིན་ན་སོ་སོས་དྲ་ཐོག་ནས་སྐོང་ཐུབ་པ་རེད། ཡིན་ནའང་། ད་ལྟ་མང་ཆེ་བ་བདེ་སྲུང་ཡན་ལག་ལས་ཁུངས་ནས་སྐོང་དགོས་པའི་གནས་སྟངས་ཆགས་ཀྱི་ཡོད་པ་རེད། དྲ་ཐོག་ནས་དུས་འགྱངས་བྱེད་པར་ཆ་རྐྱེན་གཅིག་ག་རེ་བསྐྲུན་ཡོད་པ་རེད་ལབ་ན། སོ་སོ་གང་དུ་གནས་སྡོད་བྱེད་ཀྱི་ཡོད་ནའང་དེ་གའི་ས་གནས་མགོ་འཛིན་གྱི་རྒྱབ་གཉེར་ཞིག་དགོས་ཀྱི་ཡོད་སྟབས། མཐོ་སློབ་ནང་ཡོད་པའི་སློབ་ཕྲུག་ཚོར་དཀའ་ངལ་ཞིག་འཕྲད་ཀྱི་ཡོད་པ་གང་ལ་གང་འཚམ་གསལ་པོ་རེད། གང་ཡིན་ཟེར་ན། སྔོན་མ་ཡིན་ན་སྐྱབས་བཅོལ་ལག་དེབ་དྷ་རམ་ས་ལ་ནས་ཡིན་ཞིང་། ལྡི་ལིར་གནས་སྡོད་བྱས་ཡོད་མཁན་ཞིག་གི་སྐྱབས་བཅོལ་ལག་དེབ་ཀྱི་དུས་ཡུན་སང་ཉིན་རྫོགས་ཀྱི་ཡོད་ན། དེ་རིང་དགོང་མོར་ཡར་ཡོང་སྟེ་སང་ཉིན་དུས་འགྱངས་བྱས་ནས་ཕྱིར་ལོག་འགྲོ་ཡི་ཡོད་པ་རེད། ཡིན་ནའང་། དྲ་ཐོག་ནས་དུས་འགྱངས་བྱེད་སྐབས་ཉིན་བཞི་ལྔ་ལ་འདིར་སྒུག་དགོས་བྱུང་སྲིད་པ་རེད། ཅེས་བརྗོད་བྱུང་།
ཕྱིར་སྐྱོད་ཆོག་མཆན་(Exit Permit)ལ་འགྱུར་བ་ག་རེ་བྱུང་ཡོད་དྲིས་པར་ཁོང་གིས། ཕྱིར་སྐྱོད་ཆོག་མཆན་དེ་དོ་བདག་སོ་སོ་རྒྱ་གར་ནང་སྡོད་སྐབས་ཁྲིམས་ཀྱི་ནག་ཉེས་ཕོག་མཁན་མ་ཡིན་པ་ཞིག་ལ་སྤྲོད་ཀྱི་ཡོད་པ་རེད་མ་གཏོགས། ཁྲིམས་ཀྱི་ནག་ཉེས་ཕོག་མཁན་ཞིག་ལ་ཆོག་མཆན་དེ་རྩ་བ་ཉིད་ནས་སྤྲོད་ཀྱི་ཡོད་པ་མ་རེད། བོད་མི་མང་ཆེ་བས་ཕྱིར་སྐྱོད་ཆོག་མཆན་དེ་ཉིན་གཅིག་ནང་རག་པའི་ཐབས་ཤེས་བྱེད་བཞིན་ཡོད་པ་རེད། ཡིན་ནའང་། ཆོག་མཆན་དེ་སྤྲོད་པར་རྒྱ་གར་ཉེན་རྟོག་ལས་ཁུངས་ནས་ཞིབ་འཇུག་མང་པོ་བྱེད་བཞིན་ཡོད་སྟབས། ཉིན་གཅིག་ནང་ཡོང་ཐབས་ཡོད་པ་མ་རེད་ཅེས་ཁ་སང་གཏམ་བཤད་སྐབས་ཀང་ར་སྐོར་སྲུང་ལས་ཁུངས་ཀྱི་སྤྱི་ཁྱབ་གཞོན་པས་ཀྱང་ལབ་སོང་། ད་ལྟ་ཕྱིར་སྐྱོད་ཆོག་མཆན་ཞུ་སྟངས་ལ་འགྱུར་བ་ཕྱིན་ཏེ་དྲ་ཐོག་ནས་ཞུ་དགོས་པའི་གནས་སྟངས་ཆགས་བསྡད་ཡོད་ལ། དེས་ཡག་པོ་ག་རེ་བྱུང་ཡོད་པ་རེད་ལབ་ན། དེ་སྔོན་ཕྱིར་སྐྱོད་ཆོག་མཆན་ཞུ་སྐབས་རྒྱ་གར་ལས་ཁུངས་ནས་སང་ཉིན་ཤོག་དང་གནངས་ཉིན་ཤོག་ཟེར་བ་དེ་ཚོའི་ལམ་ཀ་འགག་པ་རེད། དྲ་ཐོག་ཏུ་འགྱུར་བ་བཏང་རྗེས་དེ་རིང་ཆོག་མཆན་སྤྲོད་རྒྱུ་ཡིན་པའི་དུས་ཚོད་བཟོས་ཡོད་ན་དེ་རིང་རང་གཙང་མ་བཟོ་དགོས་པའི་གནས་སྟངས་ཤིག་ཆགས་ཀྱི་ཡོད་པ་རེད། ཅེས་བརྗོད་བྱུང་།
ཡང་ཁོང་ལ་ཕྱིར་ལོག་ཆོག་མཆན་(Return Visa)ལ་འགྱུར་བ་ག་རེ་བྱུང་ཡོད་དྲིས་པར། རྒྱ་གར་ནང་ཕྱིར་ལོག་ཆོག་པའི་ཆོག་མཆན་དྲ་ཐོག་ནས་ཞུ་རྒྱུ་ཡོད་པ་དེས་ཡག་པོ་ག་རེ་ཆགས་ཡོད་པ་རེད་ལབ་ན། དེ་སྔོན་ང་ཚོས་ཕྱིར་ལོག་ཆོག་མཆན་ཞུ་སྐབས་དམ་ཕྲུག་ཚང་མ་ཕྱིར་སྐྱོད་ལག་ཁྱེར་(I.C)ནང་ལོགས་སུ་རྒྱག་གི་ཡོད་སྟབས། དེབ་དེ་རྫོགས་འགྲོ་བའི་ཉེན་ཁ་ཆེན་པོ་ཡོད་པ་རེད། ད་ལྟ་དམ་ཕྲུག་དེ་ཕྱིར་སྐྱོད་ལག་ཁྱེར་ནང་རྒྱག་གི་མེད་པར་ཤོག་བུ་དཀར་པོ་ཞིག་གི་ནང་སྤྲོད་ཀྱི་ཡོད་སྟབས། དེབ་རྫོགས་འགྲོ་བའི་དཀའ་ངལ་དེ་ཡོད་པ་མ་རེད། ཅེས་བརྗོད་བྱུང་།
ཁོང་གིས་མུ་མཐུད་སྐྱབས་བཅོལ་ལག་དེབ་དུས་འགྱངས་ཟིན་པའི་ཤོག་བུ་དང་། དེ་བཞིན། ཕྱིར་སྐྱོད་ཆོག་མཆན་དང་ཕྱིར་ལོག་ཆོག་མཆན་སྤྲད་པའི་ཤོག་བུ་དཀར་པོ་དེའི་སྐོར་ལ་བརྗོད་དོན། གལ་སྲིད་ཤོག་བུ་དཀར་པོ་དེ་བརླག་པ་ཡིན་ནའང། ཤོག་བུའི་ཐོག་གི་ཨང་གྲངས་དེ་ཧ་གོ་ཡི་ཡོད་པ་ཡིན་ན། ངའི་ཨང་གྲངས་འདི་ཡིན་ཞེས་རྒྱ་གར་ལས་ཁུངས་ལ་ལབ་ན། ཁྱེད་རང་གི་སྐྱབས་བཅོལ་ལག་དེབ་དེ་ཡོད་ཡོད་པ་ཡིན་ལ། དེ་བཞིན། མི་སུ་འདྲ་ཞིག་གིས་ཁྱེད་རང་རྩད་གཅོད་གཏོང་དགོས་ཀྱི་ཡོད་ནའང་ཨང་གྲངས་དེའི་ཐོག་ནས་གློག་ཀླད་ནང་སྔོག་པ་ཡིན་ན། ཁྱེད་རང་གི་ལག་དེབ་དུས་འགྱངས་འདིའི་བར་དུ་འདུག་ཅེས་ལབ་ཐུབ་པའི་གནས་སྟངས་ཡོད་པ་རེད། སྔོན་མ་ཡིན་ན་སྐྱབས་བཅོལ་ལག་དེབ་བརླག་པ་ཡིན་ན། དུས་འགྱངས་ག་ཚོད་བར་དུ་བྱས་ཡོད་མེད་རྩད་གཅོད་བྱེད་ས་ཡོད་པ་མ་རེད། དེར་བརྟེན་དྲ་ཐོག་ནས་དུས་འགྱངས་བྱས་པ་དེས་དོ་བདག་སོ་སོལའང་ཕན་ཐོགས་ཡོད་པ་རེད། ཅེས་དང་། ཁ་སང་གཏམ་བཤད་སྐབས་མི་མང་གིས་མ་འོངས་པར་ཤོག་བུ་དཀར་པོ་དེ་ཆུང་ཆུང་བཟོས་ནས་སྐྱབས་བཅོལ་ལག་དེབ་རང་གི་ནང་སྦྱར་བ་ཡིན་ན་བོར་བརླག་ཏུ་མི་འགྲོ་བར་ཕན་ཐོགས་ཡོད་ལུགས་དང་། དེ་བཞིན་སྤིར་གཞིས་ཆགས་སོགས་ནས་སྐྱབས་བཅོལ་ལག་དེབ་དུས་འགྱངས་བྱེད་པར་དྷ་རམ་ས་ལར་ཡོང་མི་དགོས་པ་ཞིག་བཟོ་བར་བསམ་ཤེས་དགོས་པའི་རེ་སྐུལ་ཞུས་ཡོད་སྐོར་བརྗོད་བྱུང་།
ཉེ་སྔོན་ལྡི་ལི་དོན་གཅོད་ནས་ཕྱིར་སྐྱོད་ལག་ཁྱེར་(I.C)རྙིང་པ་རྣམས་གང་མགྱོགས་བསྐྱར་བཟོ་དགོས་པ་དང་། ལག་ཁྱེར་རྙིང་པ་ཅན་ཚོ་ཛ་དྲག་ངང་ཕྱིར་སྐྱོད་དགོས་ཚེ་ལྡི་ལི་དོན་གཅོད་ལ་འབྲེལ་གཏུག་ཞུ་དགོས་པའི་གསལ་བསྒྲགས་གནང་ཡོད་པ་ལྟར། ཕྱིར་སྐྱོད་ལག་ཁྱེར་རྙིང་པ་བསྐྱར་བཟོ་བྱེད་པར་དུས་ཡུན་ཅི་ཙམ་འགོར་གྱི་ཡོད་པ་དང་། ཛ་དྲག་ངང་ཕྱིར་སྐྱོད་དགོས་པ་ཚོས་ག་འདྲ་བྱེད་དགོས་མིན་དྲིས་པར་ཁོང་གིས། ཕྱིར་སྐྱོད་ལག་ཁྱེར་དེ་རྒྱ་གར་གཞུང་གིས་བོད་པ་སྐྱབས་བཅོལ་བ་ཚོར་དམིགས་བསལ་གྱི་ཐོག་ནས་ཕྱི་རྒྱལ་ཁག་ཏུ་འགྲོ་བར་ལག་ཁྱེར་སྤྲད་བཞག་པ་ཞིག་རེད། སྔོན་ཆད་ཡིན་ན་ལག་ཁྱེར་དེ་མཁྲེགས་པོ་ཡིན་ལ། ཕྱི་རྒྱལ་གྱི་གཞུང་ཚབ་ཚོས་ལག་ཁྱེར་བརྡར་བའི་སྐབས་སུ་ཀློག་མ་ཐུབ་པ་ཆགས་ཀྱི་ཡོད་པ་མ་ཟད། ལག་ཁྱེར་དེ་ག་རེ་རེད་མཐོང་མ་མྱོང་ཞེས་ངོས་ལེན་མ་བྱས་པའི་གནས་སྟངས་མང་པོ་ཆགས་ཀྱི་ཡོད་པ་རེད། དེ་ལྟ་བུའི་རྒྱུ་མཚན་མང་པོ་ཞིག་དང་ལྷག་པར་དུ་རྒྱ་གར་གཞུང་གིས་ཕྱི་སྐྱོད་ལག་ཁྱེར་མཁྲེགས་པོ་དེ་ཚོ་ཕྱིས་སུ་ང་ཚོས་ངོས་ལེན་བྱ་རྒྱུ་མིན་ཞེས་ལམ་སྟོན་ཕེབས་ཡོད་པ་རེད། དེར་བརྟེན་སོ་སོའི་ཕྱིར་སྐྱོད་ལག་ཁྱེར་མཁྲེགས་པོ་དེའི་དུས་ཚོད་རྫོགས་མེད་པ་ཡིན་ནའང་། གང་མགྱོགས་མགྱོགས་ཀྱིས་སྐྱབས་བཅོལ་ལག་དེབ་དང་ཕྱིར་སྐྱོད་ལག་ཁྱེར་རྙིང་པ་ཡི་ངོ་བཤུས་གཉིས་རེ་དང་། རང་བཙན་ལག་དེབ་ཀྱི་ངོ་བཤུས་གཅིག དོ་བདག་གི་པར། དེ་བཞིན་དྲ་ལམ་གྱི་འགེང་ཤོག་བསྐངས་ནས་ས་གནས་མགོ་འཛིན་ལས་ཁུངས་ལ་བཏང་བ་ཡིན་ན། ཟླ་བ་ ༣ གྱི་ནང་ཚུན་དུ་ཕྱིར་སྐྱོད་ལག་ཁྱེར་གསར་པ་རག་གི་ཡོད་པ་རེད། ཅེས་དང་།
ཡང་ཁོང་གིས། ད་ལྟ་མང་ཆེ་བ་ཞིག་གིས་ཕྱིར་སྐྱོད་ལག་ཁྱེར་ཛ་དྲག་གི་ཐོག་ནས་ལེན་པའི་གནས་སྟངས་ཤིག་ཡོད་པ་དེ་ཧ་གོ་ཡི་ཡོད་ས་མ་རེད། དཔེར་ན། སློབ་ཕྲུག་ཅིག་ཡིན་ན། ཕྱིའི་རྒྱལ་ཁབ་ཞིག་གི་ནང་སློབ་སྦྱོང་ཆེད་དུས་ཚོད་དེ་འདྲ་ལ་བསླེབ་དགོས་ཀྱི་ཡོད་ལབ་པ་དང་། དེ་བཞིན་སྨན་ཁང་ལ་ཛ་དྲག་ངང་འགྲོ་དགོས་པ་ལྟ་བུའི་རྒྱུ་མཚན་ཞུ་རྒྱུ་ཡོད་པ་ཡིན་ན། དང་པོ་ས་གནས་མགོ་འཛིན་ལས་ཁུངས་ནས་རྒྱབ་གཉེར་ཞིག་ལེན་དགོས་པ་དང་། རྒྱབ་གཉེར་དེ་འཁུར་ནས་ལྡི་ལི་དོན་གཅོད་ལ་ཕྱིན་པ་ཡིན་ན། ལྡི་ལི་དོན་གཅོད་ནས་ཛ་དྲག་གི་ཐོག་ཕྱིར་སྐྱོད་ལག་ཁྱེར་འདོན་པའི་གནས་སྟངས་དེ་འདྲ་ཡོད་པ་རེད། ཅེས་བརྗོད་བྱུང་།
གསར་འགོད་པ། པདྨ་མཚོ།
རང་བཙན་ལག་དེབ་མ་རེད། དང་བླངས་དཔྱ་དངུལ་ལག་དེབ་རེད།