ལྕམ་ནན་སེ་པེ་ལོ་སི་(Nancy Pelosi)དང་ཇེམ་མེ་གྷོ་བོན་(Jim McGovern)ནས་བརྩམས།
བློ་བཟང་ཡེ་ཤེས་ཀྱིས་བསྒྱུར།
འདས་ལོའི་ཟླ་བ་ ༡༡ པའི་ནང་ང་ཚོ་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་པ་ཐེངས་དང་པོ་དེ་རྒྱ་ནག་གཞུང་གི་ལོ་ ༨ ལྷག་གི་རྗེས་མོས་མཐུན་འོག་བོད་ནང་ལྟ་སྐོར་དུ་བསྐྱོད་ཐུབ་པ་བྱུང་བ་རེད། དེ་རིང་ང་ཚོས་ཕྱི་ལོ་ ༡༩༥༩ ལོའི་བོད་ཀྱི་རང་དབང་སྒེར་ལངས་ཉིན་མོ་དྲན་གསོ་ཞུ་བཞིན་པའི་སྐབས་དེར་རྒྱ་ནག་ཁྱོན་ཡོངས་ལ་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པའི་གནས་སྟངས་འདི་ནི་དངོས་གནས་བློས་མ་བཟོད་པ་ཞིག་རེད། ཡིན་ཡང་ད་ཐེངས་བོད་ནང་སྐོར་སྐྱོད་བྱས་པ་བརྒྱུད་ང་ཚོས་རྒྱ་ནག་གཞུང་ཕྱོགས་ནས་བོད་ཐོག་འཛིན་པའི་སྲིད་བྱུས་ལ་བསྐྱར་ཞིབ་ཀྱི་བསྐུལ་མ་གཏང་ཐུབ་པའི་རེ་བ་ཆུང་མིན་ལ་མ་ལྟོས་པར་གང་ལྟར་རེ་བ་ཞིག་མཐོང་སོང་།
ལོ་ངོ་བཅུ་ཕྲག་རིང་རྒྱ་ནག་ངོས་ནས་ཕྱིའི་རྒྱལ་ཁབ་ཀྱི་སྐུ་ཚབ་དང་གསར་འགོད་པ་དག་བོད་དུ་ཡོང་རྒྱུར་དོ་དམ་ནན་པོ་བྱས་ཡོད་པ་རེད། ཕྱི་ལོ་ ༢༠༠༨ ལོའི་བོད་ཀྱི་ཞི་རྒོལ་བ་ཚོར་རྒྱ་གཞུང་ནས་དྲག་གནོན་གྱི་སྲིད་བྱུས་ལག་བསྟར་བྱས་རྗེས་བོད་ནང་སྐོར་སྐྱོད་བྱེད་རྒྱུ་དེ་བས་དཀའ་ལས་ཁག་ཏུ་ཕྱིན་པ་དང་། ང་ཚོ་སྐུ་ཚབ་ཚོའི་ལྟ་སྐོར་གྱི་སྔ་རྗེས་སུ་ཡང་བོད་ནང་དྲག་གནོན་ཤུགས་ཆེན་པོ་བྱེད་བཞིན་ཡོད་པ་རེད། ང་ཚོ་སྐུ་ཚབ་ཚོགས་པ་བོད་དུ་སླེབས་མ་ཐག་གནས་ཚུལ་མངོན་གསལ་ཞིག་ལ་རྒྱ་ནག་དཔོན་རིགས་ཚོས་བཅོས་བཟོ་བྱས་པའི་བོད་མི་དག་ང་ཚོར་བསྟན་གང་ཐུབ་བྱས་སོང་།
བོད་ཀྱི་རྒྱལ་ས་ལྷ་ས་ལ་རྒྱ་ནག་དཔོན་རིགས་ཚོས་ང་ཚོ་གང་དུ་འགྲོ་མིན་དང་ཅི་ཞིག་ལ་བལྟ་རྒྱུ། མི་སུ་ལ་སྐད་ཆ་བཤད་མིན་སོགས་ཀྱི་ཐད་སྟངས་འཛིན་བྱ་ཐབས་འདྲ་མིན་བྱས་ཀྱང་། རྒྱ་ནག་གཞུང་གི་ཚོད་འཛིན་དེ་དག་ལ་མ་ལྟོས་པར་ང་ཚོ་སྐུ་ཚབ་ཚོགས་པས་བོད་ཀྱི་སྲང་ལམ་ཁག་ལ་མྱུལ་ཐུབ་པ་བྱུང་བ་དང་། ལོ་རྒྱུས་རང་བཞིན་ཅན་གྱི་ཕོ་བྲང་པོ་ཏཱ་ལ་དང་དགོན་པ་དང་ཆོས་ཁང་སོགས་ལ་དངོས་སུ་ཨ་རིའི་སྐུ་ཚབ་ཀྱི་མིང་ཐོག་ནས་བཅར་ཐུབ་པ་བྱུང་། ང་ཚོས་ལམ་སྟོན་པ་ཚོའི་གནོན་ཤུགས་ལ་མ་ལྟོས་པར་སྒོ་ཡོལ་རྒྱབ་ཀྱི་བོད་དངོས་དེ་མཐོང་ཐུབ་པ་བྱུང་།
རྒྱ་ནག་གི་བོད་ཐོག་འཛིན་པའི་དམ་བསྒྲགས་ཀྱི་སྲིད་བྱུས་དེ་ནི་འདས་པའི་བྱུང་རབས་ལ་གོ་ལོག་དང་གཡོ་ཟོལ་གྱི་ལྟ་ཚུལ་རྐྱེན་པས་བྱུང་བ་ཞིག་ཡིན་པ་དང་། ང་ཚོས་རྒྱ་ནག་གཞུང་གི་མཐོ་རིམ་དཔོན་རིགས་ཚོ་དང་གཏམ་གླེང་བྱེད་སྐབས་ཀྱང་རྒྱ་གཞུང་གིས་༧གོང་ས་ཏཱ་ལའི་བླ་མར་བསྙོན་འཛུགས་བྱས་པ་ཙམ་མ་ཟད། བོད་ཀྱི་ཐུན་མིན་རིག་གཞུང་དང་སྐད་ཡིག་ཆོས་ལུགས་བཅས་ལ་གུས་བརྩི་མེད་པའི་རྣམ་འགྱུར་དེར་བློ་ཕམ་ཆེན་པོ་བྱུང་།
བོད་དང་རྒྱ་ནག་བར་གྱི་འབྲེལ་བའི་ཐད་བཟང་ཕྱོགས་ཀྱི་ནུས་པ་ཐོན་དགོས་ན་རྒྱ་ནག་གཞུང་ཕྱོགས་ནས་བོད་ཐོག་དུས་ལས་འདས་པའི་ལྟ་སྟངས་ངན་པ་དག་བསྐྱུར་ཏེ། ཕན་ཚུན་གྲོས་མོལ་ཡོང་ཐབས་ཀྱི་ལམ་ཁ་གསར་པ་ཞིག་བཙལ་རྒྱུ་ནི་གལ་འགངས་ཆེན་པོ་ཆགས་ཡོད་པ་རེད། མ་འོངས་པའི་བོད་དུ་དེང་དུས་ཀྱི་ཡར་རྒྱས་དང་སྲོལ་རྒྱུན་རིག་གནས་སྐད་ཡིག་ཆོས་དང་བོད་མིའི་འཚོ་ཐབས་བཅས་རྒྱུན་འཛིན་གོང་འཕེལ་ཡོང་ཐབས་སུ་རྒྱ་ནག་གཞུང་ཕྱོགས་ནས་ཏཱ་ལའི་བླ་མ་དང་མཉམ་འབྲེལ་སྒོས་མཐུན་ཐབས་བྱ་རྒྱུ་ནི་ཧ་ཅང་གིས་གལ་གནད་ཆེ་བ་དང་། ང་ཚོས་རྒྱ་ནག་གི་མགོ་ཁྲིད་ཚོ་དང་ཏཱ་ལའི་བླ་མའི་བར་གུས་བརྩི་དང་ཡིད་ཆེས་ལྡན་པའི་ཚད་མཐོའི་གྲོས་མོལ་ཞིག་བརྒྱུད་དེ་བོད་ཀྱི་རང་སྐྱོང་དང་རང་སྐྱོང་ཀྱི་ཁོངས་སུ་མ་གཏོགས་པའི་ས་གནས་དག་གི་དཀའ་རྙོག་སེལ་ཐུབ་པའི་གོ་སྐབས་ཤིག་ཡོང་བར་ཡིད་ཆེས་བྱེད་ཀྱི་ཡོད།
ང་ཚོའི་སྐོར་སྐྱོད་སྐབས་རྒྱ་ནག་གི་དཔོན་རིགས་མང་པོས་ཨ་རི་ཕྱོགས་ནས་བོད་དང་རྒྱ་ནག་ནང་ལ་ལྟ་སྐོར་ཡོང་རྒྱུའི་སྐུལ་མ་བཏང་བྱུང་བས། སྐད་ཆ་དེ་དག་དོན་ཐོག་ལ་འཁྱོལ་བ་བྱས་ཏེ། ཨ་རིའི་གཞུང་འབྲེལ་སྐུ་ཚབ་ཁག་དང་གྲོས་ཚོགས་ཀྱི་འཐུས་མི་གསར་འགོད་པ་དང་། དེ་མིན་བོད་དོན་ཐོག་སེམས་འཁུར་ཡོད་མཁན་དག་ལ་དམ་བསྒྲགས་མེད་པར་བོད་ཁུལ་དུ་གཏང་དགོས། ཨ་མེ་རི་ཁའི་མི་སེར་བོད་ནང་ལྟ་སྐོར་བ་རྣམས་ཀྱི་ཆེད་དུ་ལྷ་སར་ཨ་རིའི་དོན་གཅོད་ཅིག་གསར་འཛུགས་ཀྱི་ཆོག་མཆན་སྤྲད་དགོས་པ་དང་། རྒྱ་ནག་ཕྱོགས་ནས་གུ་ཡངས་དང་ཕྱི་འབྲེལ་གྱི་ལས་དོན་དག་ལ་ཞེད་སྣང་མི་བྱེད་པར་འབྲེལ་ལམ་ཡར་རྒྱས་ཡོང་ཐབས་སུ་འབད་བརྩོན་བྱ་རྒྱུ་གལ་ཆེ་ཡིན་པ་དང་། ཨ་རི་རྒྱལ་ཁབ་ཀྱི་དོན་གནད་འདིའི་སྒང་ཚད་མཐོའི་ཤུགས་གནོན་རྒྱག་དགོས།
ཡིད་སྐྱོ་བ་ཞིག་ལ་རྒྱ་ནག་གཞུང་གིས་རྒྱ་ནག་ཁྱོན་ཡོངས་ཀྱི་ཞི་རྒོལ་བ་ཚོར་དྲག་གནོན་བྱས་ཏེ་རང་དགར་བཀག་ཉར་དང་བཙོན་འཇུག་བྱས་པ་དང་། བཙན་དབང་གིས་ཁྲིམས་རྩོད་པ་བརྒྱ་ཕྲག་འགའ་དང་ཁྲིམས་ལས་དོན་གཉེར་བ་དང་འགྲོ་བ་མིའི་ཐོབ་ཐང་རྩོད་ལེན་པ། དེ་མིན་སྤྱི་དམངས་ཀྱི་ཐོབ་ཐང་རྩོད་ལེན་པ་བཅས་གར་སོང་ཆ་མེད་དུ་འགྲོ་བཞིན་པའི་གནས་སྟངས་ཐབས་རྡུགས་ཆགས་ཡོད། གཏམ་བརྗོད་རང་དབང་ཐོག་དམ་བསྒྲགས་རྒྱ་ཆེར་སྤེལ་བ་དང་དམིགས་བསལ་དྲ་ཐོག་དང་གསར་ལམ་ཁག སློབ་ཆེན་དག་གི་ནང་དོ་དམ་བཙན་པོ་བྱེད་མུས་རེད།
ཧོང་ཀོང་གི་དེབ་འཚོང་མཁན་དང་དེབ་དཔར་བསྐྲུན་བ་འགའ་གར་སོང་ཆ་མེད་དུ་འགྱུར་བའི་གནས་སྟངས་དེས་རྒྱ་གཞུང་གིས་སྤྱི་ཚོགས་ནང་དམ་བསྒྲགས་ཇེ་ཆེར་གཏོང་བཞིན་པ་མཚོན་ཐུབ། རྒྱ་ནག་གཞུང་ཕྱོགས་ནས་རྒྱལ་སྤྱིའི་ལྡིང་ཆ་འདྲ་མིན་དང་འདུ་འཛོམས་གང་སར་འགྲོ་བ་མིའི་ཐོབ་ཐང་རྡོག་རོལ་བཏང་བའི་སྐོར་ཀྱི་གླེང་སློང་དག་ལ་ཁ་གཏད་ཀྱི་ལས་གཞིར་ལམ་ལྷོང་འགྲོ་བཞིན་ཡོད། རྒྱ་ནག་ནང་ཐུག་པའི་དམངས་གཙོ་དོན་གཉེར་བ་དང་འགྲོ་བ་མིའི་ཐོབ་ཐང་རྩོད་ལེན་པ་དག་གིས་ང་ཚོར་རེ་བསྐུལ་གནང་རྒྱུར། ཨ་རི་ཕྱོགས་ནས་གནད་དོན་འདི་དག་གི་སྒང་ལ་འབབ་སྐབས་ཁ་རི་ཁ་ཐུག་དང་ཁ་གསལ་པོ་གནང་རོགས་ཞེས་བརྗོད་བྱུང་།
འགྲོ་བ་མིའི་ཐོབ་ཐང་གོང་མཐོར་གཏང་རྒྱུ་དེ་ནི་ང་ཚོའི་རྒྱལ་ཁབ་ཀྱི་གཞི་རྩའི་བཟང་སྤྱོད་དང་རྒྱལ་ཁབ་ཀྱི་བདེ་འཇགས་ཀྱི་ཁེ་ཕན་ལ་འབྲེལ་བ་ཆེན་པོ་ལྡན་ཡོད། དེར་བརྟེན། གནད་དོན་འདི་ནི་ང་ཚོས་རྒྱ་ནག་གཞུང་དང་འབྲེལ་ལམ་རིམ་པ་གང་འདྲ་ཞིག་བྱེད་ཀྱང་དོན་གཙོ་བོར་འཛིན་རྒྱུ་གལ་ཆེན་ཡིན་པ་དང་། ང་ཚོའི་རྒྱལ་ཁབ་འདི་ལ་བོད་ནང་དང་རྒྱ་ནག་ནང་གི་འགྲོ་བ་མིའི་ཐོབ་ཐང་ལ་རྒྱབ་སྐྱོར་བྱེད་རྒྱུའི་འགན་འཁྲི་ཆེན་པོ་ཞིག་ཡོད་པ་རེད། གལ་སྲིད་རང་དབང་ལ་དགའ་བའི་མི་ཚོས་ཚོང་དོན་ཁེ་བཟང་ཆེད་རྒྱ་ནག་ནང་འགྲོ་བ་མིའི་ཐོབ་ཐང་རྡོག་རོལ་བཏང་བའི་སྐོར་གླེང་སློང་མ་བྱས་པ་ཡིན་ན། ང་ཚོས་བཟང་སྤྱོད་ཀྱི་ཐོག་ནས་གནད་དོན་འདི་དག་སྐོར་རྗེས་ཕྱོགས་འཛམ་གླིང་ས་ཕྱོགས་གཞན་གང་ལ་ཡང་བཤད་པའི་འོས་བབ་མེད་པར་འགྱུར་ཉེན་ཡོད།
མ་རྩམ་འབྲེལ་ཐག http://www.usatoday.com/story/opinion/2016/03/10/tibet-dalai-lama-china-human-rights-violations-speech-restrictions-column/81501618/
