གཡུ་སྒང་དགེ་འདུན།
༢༠༡༦ ཟླ་ ༠༣ ཚེས་ ༢༠ ནས་སྲིད་སྤྱི་གཉིས་ཀྱི་འོས་བསྡུའི་ལས་རིམ་མཇུག་སྒྲིལ་བ་རེད། ལྷག་པར་ཏུ་སྲིད་སྐྱོང་འོས་མི་གཉིས་ཀྱིས་ང་ཚོའི་རྨོངས་འཐོམ་གྱི་ཁྲོད་ན་གཉིད་ཁུག་བཞིན་པ་རྣམས་གཉིད་ལས་སད་ཡོད་ལ། ནམ་རྒྱུན་ཤེས་ཡོན་དང་ལྷག་བསམ། ཆོལ་ཁའི་ཕྱོགས་ཞེན་མེད་མདོག་བྱེད་མཁན་རྣམས་ལའང་འདྲེ་གཟུགས་ཕྱི་རུ་མངོན་བཅུག་ཡོད།
ཕྱོགས་གང་ཐད་ནས་བསམ་བློ་ཞིག་བཏང་དུས་ད་རེས་སྲིད་སྐྱོང་འོས་མི་གཉིས་ཀྱི་ཟིང་ཆ་དེ་བརྒྱུད་ནས་མང་ཚོགས་ཀྱིས་མིག་ཧྲིག་ཧྲིག་དང་རྣ་བ་ཀྲོང་ཀྲོང་བྱེད་དགོས་པ་མ་ཟད། ད་དུང་རང་ཉིད་ཀྱི་འགན་རང་ཉིད་ཀྱིས་ཁུར་ཏེ་འོས་བླུག་གི་མ་འོང་ཐབས་མེད་ཆགས་པ་ཞིག་བཟོས་ཡོད་པས་མང་ཚོགས་ལ་རང་བཞིན་གྱིས་འགན་ལེན་དགོས་པའི་ལས་འགན་ཞིག་ཆགས་པ་དེ་ཡག་པོ་རེད།
ཡིན་ནའང་། སྲིད་སྐྱོང་འོས་མི་གཉིས་ཀྱི་གཅིག་ལ་ཐོབ་ན་ཟིང་ཉུང་བ་དང་གཅིག་ལ་ཐོབ་ན་ཟིང་ཆེ་བ་ཞིག་ཏན་ཏན་ཡོང་གི་རེད། གང་ཡིན་ཟེར་ན། ངས་སྲིད་སྐྱོང་འོས་གཞི་སྔོན་འགྲོ་དང་དངོས་གཞི་གཉིས་ཀྱི་སྐབས་སུ་རྒྱབ་སྐྱོར་བ་ཚོས་བྱེད་སྟངས་ཁ་ཤས་ལ་བལྟས་དུས་ཟུར་བལྟས་ལེབ་མཐོང་ཆགས་ཡོད། ངས་འདིར་ཉོག་བཤད་མི་བྱེད་མང་ཚོགས་བརྒྱ་ཆའི་བརྒྱད་ཅུའི་སེམས་ན་གསལ་པོ་ཡོད་པ་རེད།
ཡིན་ནའང་། ད་ང་ཚོ་རྒྱབ་སྐྱོར་བ་ཕྱོགས་ཁག་ཚང་མས་བསམ་བློ་གཏོང་དགོས་ས་ཞིག་ནི་སུ་སྲིད་སྐྱོང་ལ་ཕེབས་ན་དེ་ལ་མི་དགའ་བ་དང་མ་རངས་པའི་རྣམ་འགྱུར་དང་། ཕྱོགས་ཡོང་ནས་དེ་ལ་གནག་ཨེ་ཐུབ་ལྟ་བའི་ལུགས་སྲོལ་ངན་གོམས་དེ་མི་འོང་རྒྱུ་དང་། སུ་ཕེབས་ན་དེ་ལ་ཆེ་མཐོང་དང་གུས་བརྩི་ཞུས་ཏེ་མཐོ་དམའ་བར་གསུམ་གྱི་ནུས་པ་གཅིག་ཏུ་སྤུངས་རྒྱུ་གལ་ཆེན་ཡིན།
མི་ཞིག་གི་ཕྲག་ལ་རྒྱལ་ཁབ་ཅིག་དང་མི་རིགས་ཤིག་གི་འགན་འཁྲི་ལྷུང་དུས་དེ་ལས་སླ་བོ་ཞིག་གཏན་ནས་མིན་ལ། ལས་དོན་གྱི་ཐད་ལ་འགྲུབ་དང་མི་འགྲུབ་གཉིས་ཀ་ཡོད་ལ། ལམ་ལྷུང་ཡང་འབྱུང་དང་མི་འབྱུང་གཉིས་ཀ་ཡོད་དུས་དེའི་ཐད་ལ་ང་ཚོ་མང་ཚོགས་ཀྱི་ངོས་ནས་ཁ་མང་པོ་མ་གཡུག་ན་བཟང་གི་རེད། དང་པོ་དེ་རང་ཉིད་ལ་མཛུབ་མོ་བཙུགས་ནས་གཞན་ལ་བརྗོད་རྒྱུ་གལ། རང་ཉིད་ཇི་འདྲ་ཞིག་ཡིན་པ་མ་ཤེས་པར་གཞན་ལ་བཤད་རྐྱང་བྱས་ན་དེ་འདྲའི་འཚམས་པོ་མེད།
ཡིན་ནའང་དེ་དང་མཉམ་དུ་ཞུ་འདོད་པ་ཞིག་ནི་མགོ་སྲིད་སྐྱོང་ནས་མཇུག་གཞུང་ཞབས་ལས་མི་ཡན་ཆད་ཀྱི་མི་སྣ་སུ་དང་སུ་ཡིན་ཡང་མང་ཚོགས་ཀྱི་མདུན་དུ་རང་ཉིད་ཀྱི་ལས་དོན་གང་གི་ཐད་ནས་ཤེས་པ་ལ་ཤེས་པའི་ལན་དང་མ་ཤེས་པ་མི་ཤེས་པའི་ལན་སོགས་ཁ་གསལ་ཅིག་རྒྱག་དགོས་པ་དེ་ལོ་བཞི་དང་ཕྱེད་ཀའི་ཁྲོད་ཀྱི་ཉམས་མྱོང་དངོས་བྱུང་ཞིག་ཡིན་པ་སེམས་ལ་དྲན་པར་མཛོད། ཕྱོགས་ཞེན་རང་བཞིན་ཅན་མ་ཡིན་པ་ཡིན་པར་ཨུ་ཚུགས་རྒྱག་མཁན་ཅིག་ཡིན་ན་གནས་ཚུལ་ཐ་དད་རེད་མ་གཏོགས། གཞན་མང་ཚོགས་ཚང་མ་སྨྲ་ཤེས་དོན་གོ་བ་མིའི་མཚན་ཉིད་རང་བཞིན་ཅན་ཡིན་སྟབས་ལས་སླ་བོའི་མགོ་སྐོར་གཏོང་ཐུབ་པ་ཞིག་གཏན་ནས་མིན།
༢༠༡༦ ། ཟླ་ ༣། ཚེས་ ༢༢། ཉིན།
ཇི་སྲིད་ཕུང་པོར་འཛིན་ཡོད་པ། དེ་སྲིད་དེ་ལ་ངར་འཛིན་ཡོད། ངར་འཛིན་ཡོད་ན་ཡང་ལས་ཏེ། ལས་ལས་ཀྱང་ནི་སྐྱེ་བ་ཡིན།
ད་ཐེངས་ཀྱི་འོས་བསྡུ་འདིས། བཙན་བྱོལ་སྤྱི་ཚོགས་དང་ལྷག་པར་གངས་སྐྱིད་ར་བའི་ནང་དུས་རྒྱུན་དུ་སྒམ་ཚུགས་ཅན་ཡིན་མདོག་དང་། བསམ་བློ་བ་ཡིན་མདོག ཤེས་ཡོན་ཅན་ཡིན་མདོག ལྷག་བསམ་ཡོད་མདོག ཆོལ་ཁ་ཆོས་ལུགས་ཀྱི་འཐེན་འཁྱེར་མེད་མདོག་སྟོན་མཁན་གྱི་སྐུ་ངོ་མི་ཉུང་བ་ཞིག་གིས་རང་གཟུགས་ངོ་མ་ཕྱིར་རུ་མངོན་བཅུག་སོང་།
དེ་སྔོན་མི་ལྷག་བསམ་ཅན་དང་། དྲང་ཚུགས་ཅན། བོད་ཀྱི་རྩ་དོན་གཙིགས་སུ་འཛིན་མཁན་དུ་འདོད་པའི་སྐུ་ངོ་དེ་ཚོ་ངོ་མ་འཇིགས་སུ་རུང་བ་རེད་འདུག ཨ་ཁ་ཁ། ད་ནི་རྗེས་སུ་དེ་ཚོའི་གདོང་པ་མཐོང་དུས་ང་ནི་ངོ་ཚ་དང་། དོགས་མི་བདེ་བ་ཞིག་ཡོང་ས་རེད།
འོས་བསྡུ་འགོ་འཛུགས་པ་ནས་བཟུང་། དཔྱད་གཏམ་སྤེལ་ཁུལ་བྱེད་ཕལ་ཆེར་བ་རང་ངོར་གཡག་རྗེས་མི་མཐོང་བར་གཞན་ངོར་ཤིག་རྗེས་འཚོལ་མཁན་ཤ་སྟག་དུ་འདོད་ཀྱང་། དེ་རིང་འདིར་བོད་སྤྱི་པ་དང་རྩ་དོན་གཙིགས་སུ་འཛིན་ནས་དཔྱད་བརྗོད་སྤེལ་མཁན་ཨ་མདོའི་བུ་ཆུང་དྲང་ཚུགས་ཅན་ཞིག་བྱུང་བ་ནི་རྗེས་སུ་ཡི་རངས་དང་བསྔགས་བརྗོད་ཀྱི་ཐེ་བོང་གནམ་ལ་སྒྲེང་རྒྱུ་ཡིན།