བོད་ཀྱི་ཆབ་སྲིད་བཙོན་པ་ཇོ་ལེབ་འཇིགས་མེད་ལགས་ལ་ཟླ་གཅིག་ལྷག་རིང་སྨན་བཅོས་བྱས་རྗེས་བཙོན་འཇུག་དུས་ཡུན་རྫོགས་ནས་ཀློད་གྲོལ་བཏང་ཡོད་འདུག
འདི་གར་འབྲེལ་ཡོད་ཅིག་གིས་གནས་ཚུལ་མཁོ་སྤྲོད་གནང་བ་ལྟར་ན། རྔ་བའི་ས་བྱི་ཞི་རྒོལ་ཆེན་མོ་དང་འབྲེལ་བ་ཡོད་པའི་ཉེས་མིང་འོག་རྔ་བ་ཀིརྟི་དགོན་གྱི་གྲྭ་ཆོས་དར་ལགས་དང་གྲྭ་འཇམ་དབྱངས་ཕུན་ཚོགས། འཇང་ཁོའམ་འཇིགས་མེད་གསུམ་ལ་ལོ་དྲུག་ནས་བཅུ་གསུམ་བར་གྱི་ཁྲིམས་ཐག་བཅད་ཡོད་པའི་ཁྲོད། ལོ་ངོ་ ༧ བཙོན་འཇུག་ཁྲིམས་ཐག་བཅད་པའི་འཇིགས་མེད་ལགས་ཀྱི་བཙོན་འཇུག་དུས་ཡུན་རྫོགས་ནས་ཀློད་གྲོལ་བཏང་སྟེ། ཟླ་འདིའི་ཕྱི་ཚེས་ ༡༢ ཉིན་ཁྱིམ་མི་གཉེན་ཉེ་དང་གྲོགས་པོ་སོགས་ཕེབས་བསུར་བཅར་ཏེ་རང་ཁྱིམ་དུ་འབྱོར་ཡོད་པ་དང་། བཙོན་གྲོལ་མ་ཐོབ་གོང་དུ་ཟླ་གཅིག་ལྷག་ལ་ཁོང་སྨན་ཁང་དུ་ཕྱིན་ནས་སྨན་བཅོས་བྱས་ཡོད་འདུག
ཇོ་ལེབ་འཇིགས་མེད་ལགས་ནི་ཇོ་ལེབ་སྡེ་བའི་ཞས་ཁོ་མ་ཚང་གི་ཡིན་ཞིང་རང་ལོ་ ༤༦ ཡིན་ལ། ཕྱི་ལོ་༢༠༠༩ ཟླ་༢ ཚེས་༧ ཉིན་འཛིན་བཀག་ཉར་བྱས་པ་དང། ཕྱི་ལོ་ ༢༠༡༠ ཟླ ༤ ཚེས་༩ ཉིན་རྔ་བ་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ཟེར་བས་ཁོང་ལ་ཕྱི་ལོ་༢༠༠༦ ལོ་ནས་ཕྱི་ཕྱོགས་སུ་འབྲེལ་བ་ཡོད་པ་མ་ཟད། རྒྱལ་ཁབ་ཀྱི་གསང་བ་ཕྱིར་བསྒྲགས་བྱས་པའི་ཉེས་མིང་འོག་བཙོན་འཇུག་ཁྲིམས་ཐག་ལོ་ ༧ བཅད་ཡོད་འདུག་ལ། ཁོང་དེ་སྔོན་རྔ་བ་ཀིརྟི་དགོན་པའི་གྲྭ་པ་ཡིན་ཞིང༌། ཕྱི་ལོ་ ༡༩༩༢ ལོར་བོད་རང་བཙན་གྱི་ཡི་གེ་སྦྱར་འགྲེམས་བྱས་པའི་ནག་ཉེས་འོག་ལོ་གཅིག་ལྷག་རིང་ཐག་གཅོད་གང་ཡང་མ་བྱས་པར་རྔ་བ་ནས་བཀག་ཉར་བྱས་པ་རེད།
གསར་འགོད་པ། པདྨ་མཚོ།
