ཕྱི་ལོ་ ༢༠༠༨ ལོར་རྒྱ་གཞུང་གི་བཙོན་གནོན་ལ་ཞི་རྒོལ་གནང་མཁན་འབའ་རྫོང་གཙང་དགོན་པའི་དགེ་འདུན་པ་མཁས་གྲུབ་རྒྱ་མཚོ་ལགས་ཀློད་གྲོལ་བཏང་ཡོད་འདུག
ཟླ་འདིའི་ཕྱི་ཚེས་ ༨ ཉིན་རྒྱ་གཞུང་ཉེན་རྟོག་པའི་དམ་དྲག་འོག་དགེ་འདུན་པ་མཁས་གྲུབ་རྒྱ་མཚོ་ལགས་ཀློད་གྲོལ་བཏང་ཡོད་པ་དང་། ཁྲིམས་ཐག་མ་བཅད་གོང་དུ་ཁོང་ལ་གཅར་རྡུང་མང་པོ་བཏང་བར་བརྟེན་ངོ་གདོང་གཡོན་ཞིང་མིག་ལ་སྐྱོན་ཤོར་ཡོད་ཅིང་། ད་ལྟ་ཀློད་གྲོལ་བཏང་ཚར་ཡོད་ནའང་ཁོང་རང་གི་རེ་འདོད་ལྟར་དགོན་པར་འགྲོ་རུ་མ་བཅུག་པར་ལྟ་རྟོག་འོག་གྲོང་སྡེའི་ནང་དུ་བསྡད་ཡོད་འདུག
རྒྱ་གར་ལྷོ་ཕྱོགས་སུ་ཡོད་པའི་ཁོང་གི་ནུ་བོ་བུམ་བཟང་རྒྱ་མཚོ་ལགས་ཀྱིས་འདི་གའི་གསར་འགོད་པར་བརྗོད་དོན། ཁོང་ཀློད་གྲོལ་མ་བཏང་བའི་སྔོན་དེར་ངས་མར་འབྲེལ་བ་བྱེད་སྐབས། དམ་དྲག་བྱེད་ཀྱི་འདུག་འབྲེལ་བ་བྱེད་མ་ཡོང་ལབ་སོང་བས་ཐད་ཀར་འབྲེལ་བ་བྱས་མེད། ཡིན་ནའང་། ཁོ་ལ་ཐུག་འཕྲད་དུ་སོང་བའི་གྲོགས་པོ་དེ་འདྲར་འབྲེལ་བ་བྱས་ཏེ་གནས་ཚུལ་ཏོག་ཙམ་རེ་ཤེས་བྱུང་། ཁོ་ཚོས་བརྗོད་པ་ལྟར་ན། སྤྱིར་བཏང་ཕར་བལྟས་ན་ཁོའི་གཟུགས་པོའི་གནས་སྟངས་ཞེ་དྲགས་སྐྱོ་བོ་མེད་ཀྱང་། ཁྲིམས་ཐག་མ་བཅད་གོང་དུ་འདྲི་གཅོད་བྱས་ཏེ་གཅར་རྡུང་མང་པོ་བཏང་བར་བརྟེན་ངོ་གདོང་གཡོན་ཞིང་མིག་ལ་ཆེ་ཆུང་ཤོར་བསྡད་ཡོད་པ་དང་། ད་ལྟ་རྫོང་སྨན་ཁང་དུ་སོང་ནས་སྨན་བཅོས་བྱེད་བཞིན་ཡོད་ཀྱང་དྲག་སྐྱེད་བྱུང་རྒྱུ་ཁག་པོ་རེད་ཟེར་གྱི་འདུག ཁོ་བཙོན་ཁང་ནས་གཏོང་རྒྱུར་ཟླ་བ་གཅིག་ཙམ་ཡོད་སྐབས་ངལ་གསོ་རྒྱག་ཏུ་བཅུག་སྟེ་ལུས་ཟུངས་གསོས་རྗེས་ཀློད་གྲོལ་བཏང་ཡོད་ས་རེད། ཅེས་དང་།
ཡང་ཁོང་གིས། མཁས་གྲུབ་རྒྱ་མཚོ་ལགས་བཙོན་གྲོལ་གཏོང་སྐབས་རྫོང་གི་ཉེན་རྟོག་པས་སྡེ་དཔོན་སྐལ་བཟང་རྡོ་རྗེ་ལ་པར་མི་རྒྱག་པ་དང་མི་མང་འདུ་འཛོམས་བྱེད་མི་ཆོག་པའི་ཁག་ཐེག་བྱེད་དུ་བཅུག་འདུག་ལ། དེ་བཞིན་གཙང་དགོན་པའི་དོན་དམ་ཨུ་ཡོན་ལྷན་ཁང་ལའང་ཁག་ཐེག་བྱེད་དུ་བཅུག་ཡོད་པ་མ་ཟད། ནང་མི་ལ་ཡང་པར་རྒྱག་མི་ཆོག་པ་དང་མི་མང་འདུ་འཛོམས་མི་ཆོག་པའི་ཁག་ཐེག་བྱེད་དུ་བཅུག་ཡོད་ལ། གལ་སྲིད་པར་བརྒྱབ་པ་དང་མི་མང་འདུ་འཛོམས་བྱས་ན་ཉེས་ཆད་གཅོད་རྒྱུ་ཡིན་ལུགས་བརྗོད་ཡོད་པ་མ་ཟད། སྡེ་བའི་ནང་དུ་འདུ་འཛོམས་སོགས་བྱེད་ཀྱི་ཡོད་མེད་ལྟ་རྟོག་ཆེད་དུས་རྒྱུན་ཉེན་རྟོག་པ་གཉིས་གསུམ་རེ་ཡོང་ནས་ལྟ་སྐོར་བྱེད་ཀྱིན་ཡོད་སྐོར་བརྗོད་བྱུང་།
ཡང་གནས་ཚུལ་མཁོ་སྤྲོད་པ་གཞན་ཞིག་གིས་བརྗོད་ན། མཁས་གྲུབ་རྒྱ་མཚོ་ལགས་ཀློད་གྲོལ་གཏོང་སྐབས་ཆབ་ཆའི་ཉེན་རྟོག་པས་རྨ་ལྷོ་སོག་རྫོང་གི་ཉེན་རྟོག་པར་རྩིས་སྤྲོད་བྱས་ཡོད་དང་། སྐབས་དེར་ཆབ་ཆའི་ཉེན་རྟོག་པས་མཁས་གྲུབ་རྒྱ་མཚོ་གཙང་དགོན་པར་བསྐྱར་དུ་ཞུགས་མི་ཆོག་པའི་བཙན་བཀའ་གཏོང་སྐབས། མཁས་གྲུབ་རྒྱ་མཚོ་ལགས་ཀྱིས་ངས་ཉེས་པ་གང་བྱས་ཐམས་ཅད་སེལ་ཚར་བ་རེད། དེ་འདྲའི་ཁྲིམས་མེད་ལུགས་མེད་བྱེད་དོན་ཅི་ཡིན་ཞེས་དང་ལེན་བྱས་མེད་པ་དང་། རྨ་ལྷོ་སོག་རྗོང་གི་ཉེན་རྟོག་པས་ཀྱང་ཁོང་གི་སྐད་ཆ་ལ་གནས་ལུགས་འདུག་ཅེས་རྒྱབ་སྐྱོར་བྱས་ཡོད་འདུག ཡིན་ནའང་། ད་ལྟ་ཁོང་དགོན་པར་ཕེབས་ཏུ་མ་བཅུག་པར་གྲོང་བའི་ནང་དུ་བསྡད་ཡོད་འདུག
མཁས་གྲུབ་རྒྱ་མཚོ་ལགས་ད་ལྟ་དགུང་ལོ་ ༣༣ ཡིན་ཞིང་། ཕྱི་ལོ་ ༢༠༠༤ ལོར་རྒྱ་གར་ལ་ཡོང་སྟེ་སེར་བྱེས་གྲྭ་ཚང་ནས་སློབ་གཉེར་གནང་ཡོད་པ་དང་། ཕྱི་ལོ་ ༢༠༠༧ ལོར་ཕྱིར་ཕ་ཡུལ་དུ་ལོག། ཕྱི་ལོ་ ༢༠༠༨ ལོར་གཙང་དགོན་པའི་དགེ་འདུན་པ་ཚོས་རྒྱ་གཞུང་གི་བཙན་གནོན་ལ་ཞི་རྒོལ་གནང་སྐབས་ཉེན་རྟོག་པས་མི་གྲངས་བརྒྱད་ཅུ་ལྷག་འཛིན་བཟུང་བཀག་ཉར་བྱས་ཏེ། མི་རེ་རེ་བཞིན་འདྲི་གཅོད་བྱས་རྗེས་ཡར་ལངས་ཀྱི་སྣེ་ཁྲིད་པ་གཙོ་བོ་ཡིན་པའི་ཉེས་མིང་འོག མཁས་གྲུབ་རྒྱ་མཚོ་དང་མཆོག་སྤྲིན་རྒྱ་མཚོ་གཉིས་ལ་ལོ་བཅུ་ཡི་ཁྲིམས་ཆད་དང་། ཚུལ་བཟང་རྒྱ་མཚོ་ལ་ལོ་དགུ་ཡི་ཁྲིམས་ཐག་བཅད་དེ། ཟི་ལིང་གི་ཉེ་འཁྲིས་སུ་ཡོད་པའི་བཙོན་ཁང་ཞིག་ཏུ་བཅུག་ཡོད་པ་དང་། གྲྭ་མཁས་གྲུབ་རྒྱ་མཚོ་ལགས་ཀྱིས་བཙོན་ཁང་དུ་ལས་ཀ་ཧུར་ཐག་གིས་བྱས་པར་བརྟེན་བཙོན་ཁང་ནས་ཁོང་ལ་བྱ་དགའ་ཞིག་སྤྲོད་སྐབས། ང་ལ་དམིགས་བསལ་བྱ་དགའ་མི་དགོས། དེ་ལས་ཁྲིམས་ཆད་ཀྱི་ལོ་ཇེ་ཉུང་དུ་གཏོང་རོགས་ཞེས་ཁོང་རང་གིས་རེ་སྐུལ་བྱས་པ་ལྟར་ལོ་གཉིས་ཇེ་ཉུང་དུ་བཏང་སྟེ། ཉེ་སྔོན་ཕྱི་ཟླ་ ༣ ཚེས་ ༨ ཉིན་བཙོན་འཇུག་དུས་ཡུན་རྫོགས་ནས་ཀློད་གྲོལ་བཏང་ཡོད་འདུག
གསར་འགོད་པ། པདྨ་མཚོ།
