ཤེས་རིག་བཀའ་བློན་མཆོག་གིས་དྷ་སྟེང་བོད་ཁྱིམ་དང་མ་སུ་རི་བོད་ཁྱིམ་གཉིས་ཀྱི་འཛིན་གྲྭ་དང་པོར་ལག་བསྟར་མགོ་འཛུགས་གནང་ཡོད་སྐོར་གསུངས་སོང་།
བོད་མི་མང་སྤྱི་འཐུས་གྲོས་ཚོགས་ནང་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་སྔོན་རྩིས་གཏན་འབེབས་དང་འབྲེལ་ཏེ། མདོ་སྟོད་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས་བོད་པའི་སློབ་གྲྭ་ཁག་ནང་བོད་རིགས་དང་བོད་རིགས་མ་ཡིན་པའི་གྲངས་འབོར་བརྒྱ་ཆ་ག་ཚོད་ཆགས་ཀྱི་ཡོད་མེད་དྲི་བ་བཏོན་པར། ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་ལན་འདེབས་གནང་དོན། ན་ནིང་གྲོས་ཚོགས་ནང་སྙན་གསེང་ཐེངས་གཅིག་ཞུས་པ་ལྟར། ད་ལྟ་སློབ་གྲྭ་སྤྱི་ཡོངས་ནང་སློབ་ཕྲུག་ ༢༢༠༠༠ ཙམ་ཡོད་པའི་ཁྲོད། བོད་རིགས་མ་ཡིན་པ་བརྒྱ་ཆ་ ༢༢ ཙམ་ཆགས་ཡོད། ད་ལོའི་ཕྱི་ཟླ་གསུམ་པ་ནས་སློབ་ཕྲུག་གསར་པ་བསྡུ་བཞིན་ཡོད་སྟབས། འགྱུར་བ་ག་ཚོད་ཕྱིན་ཡོད་མེད་གྲོས་ཚོགས་རྗེས་མའི་ལས་བསྡོམས་སྐབས་སུ་སྙན་གསེང་ཞུ་ཆོག་པ་བྱོས། ཞེས་གསུངས་སོང་།
ཤེས་ཡོན་སྲིད་བྱུས་སྐོར་ལ་དྲི་བ་བཏོན་པའི་ལན་དུ་ཤེས་རིག་བཀའ་བློན་མཆོག་གིས་གསུངས་དོན། ཤེས་ཡོན་སྲིད་བྱུས་སྐོར་ལ་ན་ནིང་ཕྱི་ཟླ་ ༡༠ པའི་ནང་བོད་ཁྱིམ་གྱི་དབུ་འཛིན་རྣམ་པ་མར་ཕེབས་རོགས་བྱོས་ལབ་སྟེ། ཚོགས་འདུ་ཚོགས་ཏེ། གྲོས་ཚོགས་ཀྱི་གྲོས་ཆོད་དང་། མཁས་པའི་ཚོགས་འདུའི་ལམ་སྟོན་སོགས་ལག་ལེན་བསྟར་དགོས་ཀྱི་འདུག་ཞུས་པ་ཡིན། སྐབས་དེར་ཁོ་རང་ཚོས་དངོས་ནས་ཀྱང་ལག་ལེན་བསྟར་རྒྱུ་ཡིན་གསུངས་སོང་། དེའི་རྗེས་ཀྱི་ཕྱི་ཟླ་ ༡༡ ནང་མ་སུ་རི་བོད་ཁྱིམ་གྱི་དབུ་འཛིན་རྣམ་པ་དང་ཚོགས་འདུ་ཚོགས་ཏེ་གྲོས་བསྡུར་གནང་སྟེ། ཁོང་རང་ཚོའི་ངོས་ནས་ཀྱང་མོས་མཐུན་གནང་སོང་། ད་ལྟའི་ཆར་བོད་ཁྱིམ་གཉིས་ཀྱི་འཛིན་གྲྭ་དང་པོར་ཤེས་ཡོན་སྲིད་བྱུས་ལག་ལེན་བཀལ་དང་འཁེལ་བཞིན་པ་ཡིན། ཤེས་ཡོན་ལྷན་ཚོགས་ཀྱི་འགན་འཛིན་དང་། སམ་བྷོ་ཊའི་སྤྱི་ཁྱབ་འགན་འཛིན་སོགས་ཆ་བསྐོས་བྱས་ཏེ། མ་སུ་རུ་སློབ་གྲྭ་དང་དྷ་སྟེང་བོད་ཁྱིམ་གཉིས་ནང་ཤེས་ཡོན་སྲིད་བྱུས་ངོ་སྤྲོད་དང་། སློབ་ཁྲིད་ལམ་སྟོན་སོགས་ཀྱི་སྔོན་འགྲོའི་ལས་རིམ་དེ་ཚར་ཡོད། རིམ་བཞིན་འཛིན་གྲྭ་གཉིས་པ་དང་གསུམ་པ་བྱས་ཏེ་ཐག་པ་རིམ་འཛེགས་བྱ་རྒྱུའི་འཆར་གཞི་ཡོད་པ་རེད། ཅེས་གསུངས་སོང་།
བལ་ཡུལ་ནས་ཕེབས་པའི་མདོ་སྨད་སྤྱི་འཐུས་བཀྲ་ཤིས་དོན་གྲུབ་ལགས་ཀྱིས་དེ་སྔའི་གྲོས་ཚོགས་ནང་ཤེས་ཡོན་སྲིད་བྱུས་སྐོར་གསུང་སྐབས། ཤེས་རིག་བཀའ་བློན་མཆོག་གིས་བལ་ཡུལ་ཨ་ཏ་ཤི་སློབ་གྲྭའི་ནང་ཤེས་ཡོན་སྲིད་བྱུས་ལག་བསྟར་བྱེད་བཞིན་ཡོད་སྐོར་གསུངས་སོང་ཡང་། རྗེས་ལ་ང་རང་དངོས་སུ་རྟོག་ཞིབ་བྱེད་པར་ཕྱིན་སྐབས་སློབ་གྲྭ་དེའི་ནང་ཤེས་ཡོན་སྲིད་བྱུས་ལག་བསྟར་གནང་གི་མི་མེད་པ་གསལ་བོ་རེད་འདུག དེ་སྤྱི་འཐུས་རྣམ་པས་མཁྱེན་རྟོག་ཆེད་ཞུས་པ་ཡིན་ཞེས་གསུངས་སོང་།
བོད་སློབ་འཛིན་ཚོགས་འོག་གི་སློབ་གྲྭ་ཁག་གི་ཤེས་ཡོན་ཐོག་འཐུས་ཤོར་ག་ཚོད་ཕྱིན་ཡོད་མེད་དྲི་བ་བཏོན་པའི་ལན་དུ་ཤེས་རིག་བཀའ་བློན་མཆོག་གིས། ད་ལྟའི་ཆར་སློབ་གྲྭ་དེ་དག་རྩིས་སྤྲོད་ལེན་གྱི་བར་བརྒལ་འདྲ་བོ་ཆགས་ཡོད་སྟབས། དགེ་རྒན་ཚོའི་ཐུགས་བསམ་རྣལ་དུ་གནས་ཀྱི་ཡོད་པ་མ་རེད། སྤྱིར་བཏང་དགེ་རྒན་རིགས་གཅིག་ནམ་རྒྱུན་ཞེ་དྲགས་ཡག་པོ་དང་། རིགས་གཅིག་ནམ་བཞག་རྒྱུན་དུ་ཡག་པོ་མེད་པ་དེ་འདྲ་ཞིག་ཡོད་པ་རེད། སློབ་ཕྲུག་ཚོའི་ཤེས་ཡོན་ཐོག་ལ་འཐུས་ཤོར་ག་ཚོད་ཕྱིན་ཡོད་མེད་དེ་ལབ་ཁག་པོ་འདུག
གསར་འགོད་པ། དོན་འགྲུབ་བཀྲ་ཤིས།
ང་རང་གི་བསམ་ཚུལ་བརྗོད་ན། བོད་ཀྱི་ཤེས་ཡོན་སློབ་གྲྭ་ཁག་ཏུ་བོད་ཀྱི་སྐད་ཡིག་དང་ནང་ཆོས་གཙོ་བོར་བཞག་སྟེ་སློབ་ཚན་ཕྱིའི་ཤེས་ཡོན་གང་རིགས་ལ་དམིགས་ཡུལ་སྦྱོང་བརྡར་ཤུགས་ཆེན་སྤྲད་དགོས་པ་དང། ལས་འགན་དེ་ཚོ་དགེ་རྒན་ཙམ་ལ་མ་ཡིན་པར་སློབ་ཕྲུག་ཀུན་གྱིས་སེམས་ཤུགས་རྒྱ་ཆེར་བསྐྱེད་དེ་རང་གི་རིག་གཞུང་དང་མི་ཚེ་བཟང་པོ་དང་གཤིས་སྤྱོད་བཟང་པོ་ཞིག་ལ་འབད་རྩོལ་བྱེད་དགོས། བོད་མི་ཙམ་མ་ཡིན་པར་ནང་པའི་མི་རིགས་གཞན་སུ་ལའང་དེ་བཞིན་པའི་སློབ་སྦྱོང་སྤྲད་ཐུབ་ན་ཅི་མི་ལེགས་སྙམ་པ་འདུག་་
རྩོམ་སྒྲིག་པ་ལགས། གོང་གི་གནད་དོན་དེ་ཤེས་རིག་ལས་ཁུངས་ཀྱི་གནས་ཚུལ་ཞིག་གི་སྐོར་གླེང་གི་ཡོད་སྟབས། གྲོས་ཚོགས་སུ་དཔལ་འབྱོར་བཀའ་བློན་བཞེངས་པའི་སྐུ་པར་ལས་ཤེས་རིག་བཀའ་བློན་བཞེངས་ཡོད་པའི་སྐུ་པར་ཞིག་འཇོག་ན་འོས་འཚམ་མེད་དམ་སྙམ་པས། དགོངས་འཇགས་ཞུ།
གསར་འགོད་ལས་རིགས་ཡར་རྒྱས་ཡོང་རེ་རང་གི་ཆེད་དུ་ལས་དམིགས་ཡུལ་གཞན་ཅི་ཡང་མེད།
གང་ལྟར་དྲི་བ་འདི་དག་ལ་བསམ་བློ་གཏོང་དགོས་པ་ཞིག་ཡིན་པར་མ་ཟད་ད་དུང་འདི་འདྲ་གནས་སྟངས་ཆགས་པ་གསལ་བོ་ཡིན་ཙང་ད་དུང་སློབ་གྲྭ་ཁག་གི་ནང་ཤེས་ཡོན་ཐོས་ཤོར་བྱིན་པ་ཡིན་ན་ད་དུས་ནམ་ཞིག་ལ་འཐུས་མ་ཤོར་པ་ཞིག་བྱུང་གི་རེད་ངེས་པར་འདི་སྐོར་གསལ་བོ་བཟོ་དགོས་པ་དང་སློབ་ཕྲུག་ཚོས་མདུན་ལམ་ལ་ལྟ་དགོས་པ་གལ་ཆེན་རེད། ཤེས་རིགས་བཀའ་བློན་མཆོག་གིས་ལོ་ངོ་གསུམ་ཙམ་གྱི་རིང་སྲིད་སྐྱོང་གི་སྐབས་དང་ལྟས་ན་ཤེས་ཡོན་སྐོར་བཀའ་སློབ་ཡིན་ན་རེད་དེའི་སྐོར་ཞུབ་འཇུག་ཡག་པོ་གནང་འདུག་བསམ་པ་དྲན་སོང་།
མདོ་སྨད་སྤྱི་འཐུས་བཀྲིས་དོན་གྲུབ་གསུངས་པ་དེ་བདེན་པ་རེད ཤེས་ཡོན་སྲིད་བྱུས་ལག་བསྟར་བྱེད་བཞིན་ཡོད་སྐོར་གསུངས་པ་ཚང་མ་ཅག་འཛུན་ངོ་མ་རེད
སྐྱག་རྫུན་ཡིན་རྒྱུ་མ་རེད།།