བོད་ཀྱི་བུད་མེད་མགོ་ཁྲིད་རྒྱལ་ཡོངས་ཚོགས་ཆེན་འཚོགས་རྒྱུ་ཡིན།

ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་འབྲུག་ཡུལ་དུ་བོད་མི་ཡུལ་མིའི་ཐོབ་ཐང་རག་ཡོད་མཁན་སྐོར་ཞིག་དང་སྐྱབས་བཅོལ་ལག་འཁྱེར་རག་ཡོད་པ་སྐོར་ཞིག་བཅས་རིགས་གསུམ་ཡོད་སྐོར་ངོ་སྤྲོད་གནང་སོང་།

དེ་རིང་ཉིན་རྒྱབ་བོད་མི་མང་སྤྱི་འཐུས་གྲོས་ཚོགས་ནང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྔོན་རྩིས་གཏན་འབེབས་དང་འབྲེལ་ཏེ། ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ད་ལོར་ ‘བོད་པའི་བུད་མེད་མགོ་ཁྲིད་ཀྱི་རྒྱལ་ཡོངས་ཚོགས་ཆེན’ ཟེར་བ་ཞིག་ཚོགས་འཆར་ཡོད་པ་དང་། དེ་ལ་ཧིན་སྒོར་འབུམ་ ༢༡ བཀའ་འཁྲོལ་ཞུས་ཡོད་སྐོར་སོགས་ངོ་སྤྲོད་གནང་སོང་། དེའི་སྐོར་ལ་བཀའ་བློན་མཆོག་གིས་གསུངས་དོན། “འདས་པའི་ལོ་ལྔ་བཅུ་དྲུག་ཅུར་ཕར་བལྟས་པ་ཡིན་ན། སྒང་དུ་སྡོད་མཁན་བུད་མེད་ག་ཚོད་ཡོད་མེད་ཙམ་མ་ཡིན་པར། གཞི་རིམ་གྱི་བརྒྱ་དཔོན་དང་ས་གནས་འཐུས་ཚོགས་སོགས་ཀྱི་ནང་དུ་བུད་མེད་མགོ་ཁྲིད་མཁན་ག་ཚོད་ཡོད་པ་དེ་དག་ཡོངས་རྫོགས་ཀྱི་རྒྱས་འཛོམ་ཞིག་གནང་ཐུབ་པ་ཡིན་ན། བོད་མིའི་སྒྲིག་འཛུགས་ཀྱི་མ་འོངས་བྱེད་འཆར་སོགས་ལ་བསམ་བློ་གསར་པ་རྙེད་པ་དང་། གཞི་རིམ་མང་ཚོགས་ནང་གི་བུད་མེད་དེ་དག་ལའང་ནུས་པ་ཆེ་རུ་འགྲོ་བར་ཏན་ཏན་ཕན་ཐོགས་ཡོད་པ་རེད་བསམ་གྱི་འདུག རྒྱ་གར་ལའང་དེ་འདྲའི་ཚོགས་འདུ་འཚོགས་པའི་ལུགས་སྲོལ་འདུག བུད་མེད་ཁྲི་གཅིག་དེ་འདྲ་འཛོམས་ཀྱི་འདུག ང་རང་ཡང་ཚོགས་འདུ་དེ་འདྲར་བཅར་རྒྱུ་དང་སྐད་ཆ་བཤད་རྒྱུའི་གོ་སྐབས་ཀྱང་བྱུང་མྱོང་ཡོད། དེ་ཚོར་བལྟས་ཡོང་ན་ཧ་ཅང་ཐུགས་ཕན་གསོ་བ་ཞིག་རེད། ང་ཚོའི་འཆར་གཞིའི་ནང་ཉིན་ ༣ གྱི་ཚོགས་འདུ་ཡིན། ཚོགས་ཞུགས་མི་སྣ་གཙོ་བོ་གཞི་རིམ་མང་ཚོགས་ནང་གི་བུད་མེད་མགོ་ཁྲིད་མཁན་དེ་དག་ཡིན་ལ། དེ་བཞིན། བོད་མི་མང་སྤྱི་འཐུས་ཀྱི་སྐུ་ཚབ་དང་བཀའ་ཟུར་རྣམ་པ་བཅས་ཁྱོན་ཚོགས་བཅར་བ་ ༡༠༠ ཙམ་ལ་བསམ་བློ་བཏང་ཡོད།” ཅེས་སོགས་ངོ་སྤྲོད་གནང་སོང་།

རྒྱ་རི་སྒྲོལ་མ་མཆོག་གིས་འབྲུག་སྡོད་བོད་མིའི་གནས་སྟངས་སྐོར་ངོ་སྤྲོད་གནང་དོན། ད་ལྟའི་འཆར་འབྲིག་ནང་བཙན་བྱོལ་བོད་མི་ ༢༡༤ ཙམ་འདུག དེ་དག་ལ་དབྱེ་བ་གསུམ་ཙམ་འདུག རིམ་པ་དང་པོ་དེ་འབྲུག་གི་མི་སེར་རག་ཡོད་མཁན་ ༡ ༠༠ ཙམ་ཡོད་པ་དེ་དག་རེད། དེ་གོང་གི་གྲངས་ཀ་དེའི་ནང་ཚུད་ཡོད་པ་མ་རེད། གང་ཡིན་ཟེར་ན་ཁོ་རང་ཚོ་འབྲུག་གི་མི་སེར་ཆགས་བསྡད་ཡོད་པ་རེད། རིམ་པ་གཉིས་པ། བདུན་ཅུ་དོན་གྲངས་ནང་ལ་རྒྱ་གར་ནང་གཞིས་སྤོ་ཆོག་པའི་སྙན་ཞུ་འབུལ་མཁན་དང་འབྲུག་གི་མི་སེར་ཞུས་ཀྱང་ད་དུང་མ་ཐོབ་པ་དག་རེད། ཁོང་ཚོར་འབྲུག་ནང་སྡོད་ཆོག་པའི་ལག་འཁྱེར་ཞིག་འདུག དེར་འོས་བསྡུའི་ནང་ཞུགས་རྒྱུ་དང་ས་ཆའི་བདག་དབང་སོགས་འཕུད་པའི་ཕྱི་རྒྱལ་དུ་འགྲོ་བ་སོགས་ཀྱི་ཐོབ་ཐང་ཆ་ཚང་འདུག རིམ་པ་གསུམ་པ་དེར་སྐྱབས་བཅོལ་ཡིག་ཆ་ཟེར་བ་ཞིག་འདུག དེ་དག་རྒྱ་གར་ནང་ཡོང་ཆོག་གི་འདུག་མ་གཏོགས་ཕྱི་རྒྱལ་ཁག་ཏུ་འགྲོ་ཐུབ་ཀྱི་མི་འདུག

སྤྱིར་བཏང་ང་ཚོ་ནང་སྲིད་ལས་ཁུངས་ངོས་ནས་འབྲུག་ལ་འབྲེལ་བ་ཞུ་དགོས་ཀྱི་ཡོད་ཀྱང་ང་ཚོས་བསམ་པ་ལྟར་བྱེད་ཐུབ་མ་སོང་། སྤྱི་འཐུས་ལྷན་ཚོགས་ངོས་ནས་ཆ་བསྐོས་བྱས་ཏེ་འབྲུག་ནང་སྐོར་སྐྱོད་བ་དང་མི་མང་ལ་ཐུག་འཕྲད་གནང་ཐུབ་པ་དེར་ཐུགས་རྗེ་ཆེ་ཞུ་རྒྱུ་ཡིན། ཡིན་ནའང་ལྡི་ལི་དོན་གཅོད་བསྟན་པ་ལགས་དང་འབྲེལ་ཡོད་བཀའ་བློན་ལྷན་དུ་འབྲུག་གཞུང་གི་སྐུ་ཚབ་མི་སྣ་དང་བཀའ་མོལ་རིམ་པ་གནང་ཐུབ་སོང་།

འབྲུག་གི་མི་སེར་ཞུས་ཡོད་པ་དུད་ཚང་ ༡༩༩ བྱུང་འདུག དུད་ཚང་ ༡༥ ཡིས་འབྲུག་གི་མི་སེར་ཞུས་མི་འདུག མི་ཞུ་བའི་རྒྱུ་མཚན་གཙོ་བོ་གལ་སྲིད་འབྲུག་གི་མི་སེར་ཞུས་པ་ཡིན་ན་དྷ་རམ་ས་ལའི་བོད་མིའི་སྒྲིག་འཛུགས་ལ་འབྲེལ་བ་བྱེད་ཐུབ་ཀྱི་མི་འདུག དེ་ལ་བརྟེན་ཏེ་ཁོང་རང་ཚོས་འབྲུག་གི་མི་སེར་མ་ཞུས་པ་ཡིན་ཞེས་གསུང་གི་འདུག ང་ཚོས་འབྲེལ་མཐུད་པ་བརྒྱུད་དེ་དུད་ཚང་ ༡༥ དེ་རྒྱ་གར་ནང་ཚུར་ཡོང་འདོད་ཡོད་ན། བོད་མིའི་སྒྲིག་འཛུགས་ཀྱིས་རྒྱ་གར་གཞུང་ལ་ཞུ་དགོས་ན་རེད་མཐུན་རྐྱེན་ཆ་ཚང་ཞིག་སྦྱར་ཐུབ་པ་བྱ་རྒྱུ་ཡིན་ཞེས་ཞུས་སྐབས། ཁོ་རང་ཚོ་འབྲུག་ནང་ལོ་མང་པོར་བསྡད་ཡོད་སྟབས། འབྲུག་གཞུང་ལ་དགའ་ཡི་འདུག་ལ་འབྲུག་མི་མང་ལའང་དགའ་ཡི་འདུག ཁོ་རང་ཚོས་འབྲུག་གི་མི་སེར་ཞུ་འདོད་མེད་པ་མ་གཏོགས་སྡོད་ས་དེ་འབྲུག་རང་ལ་སྡོད་རྒྱུ་ཡིན་གསུང་གི་འདུག གནས་ཚུལ་དེ་དག་འབྲུག་གཞུང་ལའང་སྙན་གསེང་ཞུས་ཡོད། དེ་རིང་གི་གོ་སྐབས་འདི་བརྒྱུད་དེ་འབྲུག་རྒྱལ་བོ་དང་འབྲུག་མི་མང་ལ་དེ་སྔའང་ཐུགས་རྗེ་ཆེ་ཞུས་ཡོད་ལ་དེ་རིང་ཡང་ཐུགས་རྗེ་ཆེ་ཞུ་རྒྱུ་ཡིན།

འབྲུག་ནང་གི་བོད་པ་ཁོ་རང་ཚོའི་སེམས་ནང་། བོད་གཞུང་གི་ངོས་ནས་རྒྱལ་ཁབ་གཞན་གྱི་མི་སེར་ཞུས་ན་འགྲིག་གི་མེད་པའི་དགོངས་པ་ཡོད་པའི་བསམ་ཚུལ་ཞིག་འཛིན་གྱི་མེད་དམ་བསམ་གྱི་འདུག དེ་འདྲ་རྩ་བ་ནས་མིན་པ་ཚང་མས་མཁྱེན་གྱི་ཡོད་པ་རེད། ཐོབ་ཐང་དེ་ལེན་དང་མི་ལེན་སོ་སོས་བསམ་བློ་གཏོང་དགོས་པ་ཞིག་ཆགས་ཡོད་པ་རེད། བོད་མིའི་སྒྲིག་འཛུགས་ཀྱི་ངོས་ནས་བཀག་བཞག་པ་ཞིག་རྒྱ་གར་དུ་ཡོད་པ་མ་རེད་ལ་ཕྱི་རྒྱལ་དུའང་ཡོད་པ་མ་རེད། ལྷག་པར་དུ་འབྲུག་གི་གནས་སྟངས་དེ་མ་འདྲ་བ་ཞིག་ཆགས་བསྡད་ཡོད་པ་རེད། དེར་བརྟེན། འབྲུག་གི་མི་སེར་ཞུ་མཁན་དེ་དག་ལའང་འབྲུག་གཞུང་གི་ངོས་ནས་མཐུན་འགྱུར་གནང་རོགས་གནང་ཞེས་ཞུ་འདོད་བྱུང་སོང་། གལ་སྲིད་ཡུལ་མིའི་ཐོབ་ཐང་མ་རག་པ་ཡིན་ནའང་སྐྱབས་བཅོལ་བའི་ཐོབ་ཐང་རག་སྟེ་ཕྱིོ་རྒྱལ་དུ་འགྲོ་ཆོག་པའི་ཐོབ་ཐང་རག་ཐབས་ལ་བཀའ་ཤག་འདིའི་རིང་ལ་མ་བྱུང་ཡང་འབྱུང་འགྱུར་བཀའ་ཤག་གིས་ཐུགས་ལ་བཞག་སྟེ་མཇུག་སྐྱོང་གནང་དགོས་པ་གལ་ཆེན་པོ་ཆགས་འདུག ཅེས་གསུངས་སོང་།

གསར་འགོད་པ། དོན་འགྲུབ་བཀྲ་ཤིས།