ཀ་ལི་ཀ་ཏའི་ཀུན་དགའ་ཟ་ཁང་གི་འགན་འཛིན་ཟུར་བ་བསྟན་འཛིན་རིག་གྲོལ་གྱིས་ཧིན་སྒོར་ ༧༤༢༣༧༥།༦༡ ལྐོག་ཟ་རུལ་སུངས་བྱས་ཡོད་སྟབས་ད་ནས་བཟུང་བོད་མིའི་སྒྲིག་འཛུགས་ཀྱི་ལྟ་སྐྱོང་ཡོངས་རྫོགས་འགོག་རྒྱུ་ཡིན་འདུག
བསྟན་འཛིན་རིག་གྲོལ་གྱིས་སྤྱི་དངུལ་སྒེར་ཟོས་བྱས་པའི་གནས་ཚུལ་ནང་བཀོད་དོན། བསྟན་འཛིན་རིག་གྲོལ་ནས་ཕྱི་ལོ་ ༢༠༠༠ ལོར་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཀོ་ཏ་(Kolkata)ཀུན་དགའ་ཟ་ཁང་གི་འགན་འཛིན་དང་དངུལ་གཉེར་གཅིག་ལྕོགས་ལས་ཐོག་སྐབས་རྩིས་ཞིབ་སྙན་ཐོའི་ནང་ཁོ་པའི་མིང་ཐོག་གཞུང་དངུལ་ཧིན་སྒོར་༩༤༨༠༠༠་༠༠༼དགུ་འབུམ་བཞི་ཁྲི་བརྒྱད་སྟོང་། ༽རྩིས་ཆད་ཐོན་ཡོད་པ་ནས་ཧིན་སྒོར་ ༢༠༥༦༢༤་༣༩ སྒྲུབ་འབུལ་ཞུས་ཡོད་པ་དང་། འཕྲོས་ཧིན་སྒོར་ ༧༤༢༣༧༥་༦༡༼བདུན་འབུམ་བཞི་ཁྲི་ཉིས་སྟོང་སུམ་བརྒྱ་བདུན་ཅུ་དོན་ལྔ་དང་པད་རེ་གཅིག༽རྩིས་གཙང་ཞུ་བསྡད་ཡིན་པ་དོ་དག་ནས་རྩིས་ཆད་སྒྲུབ་འབུལ་ཞུ་རྒྱུའི་གན་ཡིག་སྔ་རྗེས་བཞག་པ་བཞིན་འདི་ནས་སྔ་བར་ཕྱི་གསུམ་དུ་ཡིག་ངག་གཉིས་ཐོག་ནས་བརྡ་འདེད་ཞུས་ཀྱང་། བརྩི་བཀུར་དང་ལེན་མ་བྱུང་བས་ཡོང་བསྡད་རྩིས་གཙང་བྱུང་མེད།
ཕྱི་ལོ་ ༢༠༡༥ ཟླ་ ༡༠ ཚེས་ ༡༤ འཁོད་བོད་མིའི་རང་དབང་གསར་ཤོག་དོན་ཐེངས། ལོ་ ༨ ཨང་ ༤༠ ནང་དངུལ་ཆད་ཆ་ཚང་འདི་གར་ཕྱི་ལོ་ ༢༠༡༥ ཟླ་ ༡༡ ཚེས་ ༣༠ འགྱངས་མེད་རྩིས་འབུལ་དགོས་པ་དང་། ཅི་སྟེ་དུས་ཚོད་རྒྱས་བཅད་ནང་ཚུན་རྩིས་གཙང་མ་བྱུང་ཚེ་སྤྱི་དངུལ་སྒེར་ཟས་བྱས་པའི་གསལ་བསྒྲགས་བྱ་རྒྱུ་ཡིན་ཞེས་གསལ་པོར་བཀོད་ཡོད་ཀྱང་། དུས་བཀག་ནང་ཚུན་དངུལ་ཆད་རྩིས་འབུལ་མེད་པ་མ་ཟད་དོ་དག་ནས་ཡ་ལན་ཙམ་ཡང་བྱུང་མེད་པར་སོང་། བསྟན་འཛིན་རིག་གྲོལ་ནས་ཕྱི་ལོ་ ༢༠༠༦ ནས་བཟུང་དངུལ་ཆད་ཕྱིར་སློག་བྱ་ཐབས་གཏན་ནས་བྱས་མེད་པ་ནི་བཙན་བྱོལ་བོད་མིའི་བཅའ་ཁྲིམས་དང་བོད་མིའི་སྒྲིག་འཛུགས་ཀྱི་སྒྲིག་གཞི་ཁག་ལ་སྣང་ཆུང་རྩིས་མེད་བྱས་པར་ངོས་འཛིན་གྱིས་ཧིན་སྒོར་༧༤༢༣༧༥་༦༡༼བདུན་འབུམ་བཞི་ཁྲི་ཉིས་སྟོང་སུམ་བརྒྱ་བདུན་ཅུ་དོན་ལྔ་དང་པད་རེ་གཅིག༽སྤྱི་དངུལ་སྒེར་ཟས་བྱས་ཡོད་པས། ཕྱི་ལོ་ ༢༠༡༦ ཟླ་ ༣ ཚེས་ ༣༡ ནས་བཟུང་དཔལ་འབྱོར་ལས་ཁུངས་ཀྱི་ཀོ་ཏ་(Kolkata)ཀུན་དགའ་ཟ་ཁང་གི་འགན་འཛིན་དང་དངུལ་གཉེར་གཅིག་ལྕོགས་ཟུར་པ་བསྟན་འཛིན་རིག་གྲོལ་ལ་བོད་མིའི་སྒྲིག་འཛུགས་ནས་བོད་མི་སྤྱི་འགྲེ་ལྟར་ཕན་གྲོགས་ལྟ་སྐྱོང་བྱ་སྒོ་ཡོངས་རྫོགས་བཀག་བསྐྱིལ་བྱས། ཞེས་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱིས་གསལ་བསྒྲགས་བྱས་འདུག
སྤྱིར་བཏང་དེ་ལྟར་བྱས་པ་ཡག་པོ་རེད་་་་་་། སྐུ་སྒེར་ནས་དངུལ་ཆད་བྱུང་བའི་སྲིད་སྐྱོང་གི་གྲོགས་པོ་ཐུབ་བསྟན་ཆོས་འཕེལ་ད་དུང་ལྷོ་སྤྱིའི་ལས་ཁུངས་ན། ལྷོ་སྤྱིའི་མིང་མེད་པའི་ལྷོ་སྤྱི་དེ་ལ་དེ་ལྟར་ཉེས་ཆད་མེད་པ་གང་ཡིན་ན། ཁོ་སྲིད་སྐྱོང་གིས་གཟིགས་སྐྱོང་ཡོད་སྟབས་དཔལ་འབྱོར་ལས་ཁུངས་སོགས་ཀྱིས་མཐོང་གི་མེད་པ་འདྲ་རེད་པས་ལགས།
དངོས་ནས་དཔེ་མི་སྲིད་པའི་ཐབས་སྐྱོ་བོ་རེད། ཨ་ཙི་ཙི། བོད་པའི་སྤྱི་ཚོགས་ནང་མི་དེ་འདྲ་ཡོད་པ་ཨ་ཙི་ཙི། དེ་རིང་གི་གཞུང་གི་ལས་ཕྱོགས་ལས་དེའི་ཐོག་གསལ་པོ་ཞིག་ག་རེད་ཐོན་གྱི་ཡོད་རེད་ཟེར་ན་ཕྱི་གསལ་ནང་གསལ་ཡིན་པ་དངོས་ནས་གསལ་པོ་རེད། རྗེས་སུ་དེ་འདྲ་རིག་བྱུང་ཚེ་ངེས་པར་དུས་རྒྱུན་དུ་ནས་རྟག་བཅད་ཡག་པོ་གནང་དགོས་པ་ཤིན་ཏུ་ནས་གལ་ཆེན་པོ་རེད།
མི་འདི་རིགས་སྤྱི་ཚོགས་ཐོག་ཏུ་གསལ་བོ་བཟོས་པར་ལེགས་པོ་བྱུང་། དུས་བབ་ཚང་ལ་བཀའ་དྲིན་ཆེ།